Chapitre 128

Jésus ayeke na fini!

NA NGOI so awali abaa so du-kua ti Jésus ayeke senge, Marie Madeleine akpe ti gue ti sala tene ni na Pierre nga na Jean. Tanga ti awali ni angba na tele ti du-kua ni. Ngoi kete na pekoni, mbeni ange asigigi na ahiri ala ti li na ya ni.

Na ya ni ka, awali so abaa mbeni use ange ni, na mbeni oko na popo ti ala atene: “I zia mbito, teti mbi hinga i gi Jésus so afa lo na ndo ti keke. Lo yeke na ndo so pepee, teti lo londo awe, lege-oko tongana lo tene giriri. Ga, i baa ndo so lo lango da. Na i gue fade i tene na adisciple ti lo so ayaa lo na popo ti awakinda.” Ni laa, na mbito nga na kota ngia, awali so ague nga na loro.

Gi na ngoi so, Marie awara Pierre na Jean, na lo tene na ala: “Ala lungula Seigneur na ya du-kua awe, na e hinga ndo so ala zia lo da pepee.” Fade fade abazengele use so ague na loro. Jean ague ti lo hio mingi​—teti lo yeke pendere na popo ti ala use so​—ni laa lo si kozo na du-kua ni. Na ngoi so awali ague awe na zo oko ayeke ndulu na ndo so pepee. Jean abaa tele ti lo ti baa ndo na ya du-kua ni, na lo baa bongo ti lin alango ka, me lo li na ya ni pepee.

Ti Pierre, tongana lo si, lo li fade. Lo baa bongo ti lin ayeke lango ka, nga na bongo so ala kanga na li ti Jésus. A kanga ni na ndo oko na mbage. Fadeso Jean ali nga na ya du-kua ni, na lo ma na be na tene ti Marie. Me Pierre na Jean ahinga pepee so ayaa Jésus awe, ataa Lo fa na ala lege mingi giriri awe so fade ye tongaso ayeke si na Lo. Ala hinga ye so ala lingbi sala pepee, tongaso ala kiri na ndo ti ala, me Marie, so akiri fade mbeni na du-kua, angba da.

Na popo ti ngoi so, ambeni wali so ague na loro na atene na adisciple so ayaa Jésus na popo ti awakinda awe, lege-oko tongana ti so a-ange atene na ala. Na ngoi so ala kpe loro na ngangu, Jésus ate ala na lo tene na ala: “Balao mingi!” Ala ti na gere ti lo na amu gunda na lo. Na Jésus atene na ala: “I zia mbito! I gue, i fa tene na aita ti mbi, si ala gue na Galilée; na ka fade ala baa mbi.”

Ngoi kete kozoni, tongana sese ayengi na a-ange afa tele ti ala na gigi, mbito agbu aturugu so abata ndo na ala ga tongana akua. Tongana li ti ala aga da awe, ala gue na ya gbata ni na ala sala tene ti ye kue so asi na akota prêtre. Na peko ti salango tene na popo ti ala na “a-ancien” ti aJuif, ala leke ti gi ti honde tene ni na lege ti mungo nginza na aturugu ni. Tongaso ala mu yanga so na ala: “I tene: ‘Adisciple ti lo aga na bi na ngoi so e lango awe si ala nzi lo.’ ”

Teti ayeke fa ngbanga ti kui na ndo aturugu ti Rome giriri tongana ala lango na ndo kusala ti ala, aprêtre amu zendo so na ala: “Tongana zo ti komande ama tene ni [so i lango awe], fade e leke tene na lo si i wara ngbanga pepee.” Teti nginza ti kunyon zo ni ayeke kota mingi, aturugu akamata ni na ala sala lege-oko tongana afa na ala. Tongaso tene ti wataka so anzi kua ti Jésus atambela na popo ti aJuif.

Marie Madeleine angba na yanga ti du-kua ni na vundu asala lo mingi. Jésus ayeke na ndo wa fadeso? Lo zuku tele ti lo na lo baa ndo na ya du-kua ni, lo baa a-ange use so ayu vulu bongo, so akiri awe! Ala duti na ndo so kua ti Jésus alango da kozoni, oko aduti na li ni na oko aduti na gere ni. Ala hunda lo: “Wali, teti nyen mo toto na ngule?”

Marie atene na ala: “Ala lungula Seigneur ti mbi awe, na mbi hinga pepee ndo so ala zia lo da.” Tongaso lo vi tele ti lo na lo baa mbeni zo so akiri ahunda na lo oko tene so: “Wali, teti nyen mo toto na ngule?” Me zo so ahunda tene so nga: “Mo gi zo wa?”

Teti be ti lo atene lo yeke na gbele zo ti bata yaka so du-kua ni ayeke da, lo tene na lo: “Seigneur, tongana mo si mo mu lo, tene na mbi ndo so mo zia lo da, na fade mbi lungula lo.”

Zo so atene na lo: “Marie!” Fade fade, na lege ti salango tene ti lo, lo hinga so a yeke Jésus, na lo dekongo: “Rabbouni!” (so aye ti tene “Wafango ye!”). Na kota ngia na be ti lo, lo hulu lo gbu lo. Me Jésus atene: “Zia ti gbu mbi. Teti ade mbi gue na Baba pepee. Me gue na aita ti mbi na mo tene na ala: ‘Mbi ma na Baba ti mbi na Baba ti i, na mbi ma na Nzapa ti mbi na Nzapa ti i.’ ”

Fadeso Marie akpe loro ti gue na ndo so abazengele na adisciple abungbi da. Lo zia tene ti ye so lo baa na ndo ti so ambeni wali so atene kozoni awe, so atene ala baa Jésus so alondo na popo ti awakinda. Ye oko, lege-oko tongana ti so ala ke ti ma na be fade na tene ti ambeni wali, akoli so ake nga lege-oko ti ma na be na tene ti Marie. Matthieu 28:3-15; Marc 16:5-8; Luc 24:4-12; Jean 20:2-18.

▪ Na pekoni abaa ya ti du-kua ayeke senge, Marie Madeleine asala nyen? Nga nyen asi na ambeni wali ni?

▪ Pierre na Jean asala ye tongana nyen tongana ala baa so ya ti du-kua ni ayeke senge?

▪ Ambeni wali so ague ti sala tene ti londongo ti Jésus na adisciple awara tele na zo wa?

▪ Ye nyen asi na aturugu so aluti ti bata du-kua ni, na aprêtre asala nyen tongana ala gue asala tene ni na ala?

▪ Ye nyen asi tongana Marie Madeleine angba gi oko na yanga ti du-kua ni? Adisciple asala nyen tongana awali afa na ala ye so ala baa?