Nzapa aleke mbeni ye ti zi azo

Nzapa atene lani na wakua ti lo Abraham so “hale” ni so lo sara tënë ni ayeke ga na yâ ti sewa ti Abraham ni. Na lege ti “hale” ni so ande, azo ti “amara kue” ayeke bâ nzoni (Genèse 22:18). Na pekoni, Jacob, tarä ti Abraham, ague na Égypte, na kâ sewa ti lo akono aga mara ti Israël.

Na Égypte ni, mbeni sioni gbia ni asara amolenge ti Israël na ngbâa juska Nzapa atokua na ala prophète Moïse. Moïse asigigi na ala na kodoro ni, lo gue na ala na Kota Ngu-Bengba na Nzapa akangbi yâ ti ngu ni use si ala hon na yâ ni. Na pekoni, Nzapa amû andia na mara ti Israël ni, so na popo ni e yeke wara aCommandement Bale-oko, ti fa lege na ala nga ti bata ala. Andia ni afa asandaga so ala lingbi ti mû ti tene a pardone asiokpari ti ala. Nzapa atene na Moïse ti tene na amolenge ti Israël so ni Nzapa ni yeke tokua ande na ala mbeni prophète nde. Prophète ni so la si ayeke “hale” ni.

Angu 400 na ndo ni tongaso na pekoni, Nzapa atene na Gbia David so “hale” ni so a sara tënë ti lo na yaka ti Eden ayeke komande ande na yâ ti mbeni Royaume so ayeke ngbâ kpu na kpu. Lo la lo yeke Messie ni, wala zo so Nzapa asoro lo ti sö ande azo nga ti kiri na Paradis na ndo ti sese.

Na lege ti David nga na ambeni prophète, Nzapa afa yeke na yeke gbâ ti aye na ndo ti Messie ni. Aprophétie ni atene so lo yeke duti ande na tâ be-ti-molenge nga lo yeke sara ye nzoni na azo. Ala fa nga so na gbe ti komandema ti lo, nzara, sarango ye so ayeke na lege ni ape nga na bira ayeke hunzi. Azo kue ayeke duti na siriri na popo ti ala nga na popo ti ala na anyama. Kobela, pasi nga na kuâ, so ayeke aye so Nzapa aye lani ape, ayeke hunzi. Même akuâ kue, a yeke zingo ala ande ti duti na fini na ndo ti sese.

Na lege ti prophète Michée Nzapa atene a yeke dü Messie ni na Bethléhem, nga na lege ti prophète Daniel lo tene a yeke fâ lo Messie ni. Me Nzapa ayeke zingo lo nga lo yeke zia lo Gbia na yayu. Daniel abâ nga so ande Royaume so Messie ni la ayeke Gbia ni ayeke mû place ti angorogbia kue nga ayeke ngbâ lakue lakue. Me Messie ni asi tongana ti so aprophétie ni atene?

​—A wara ni na Genèse chapitre 22-50, nga na Exode, Deutéronome, 2 Samuel, Psaume, Ésaïe, Daniel, Michée nga na Zacharie 9:9.