“E wara Messie ni awe!”

Angu 700 tongaso na peko ti so a sû prophétie na ndo ti Messie na yâ ti mbeti ti Michée, prophétie ni aga tâ tënë: A dü Jésus na Bethléhem. Angu 30 tongaso na pekoni, so ti tene na ngu 29, kozo mbage ti prophétie ti Daniel na ndo ti gango ti Messie aga tâ tënë. Jésus awara batême nga Nzapa atokua yingo vulu ti lo na ndo ti lo. Messie ni, wala Hale ni so a sara tënë ti lo giriri, asi tâ gi na ngoi ni so a fa.

Gi na pekoni Jésus akomanse kusala ti lo, “lo yeke tene nzoni tënë ti royaume ti Nzapa.” (Luc 8:1). Tongana ti so aprophétie ni atene ândö, Jésus asara nzoni ye na azo nga lo fa so nzoni ti azo agbu bê ti lo. Afango ye ti lo alingbi tâ na ni nga lo fa ni na ndoye. Lo kaï mara ti “asongo tere nde nde kue” na tere ti azo, ye so afa so Nzapa ayeke lani na lo (Matthieu 4:23). Azo nde nde kue, atâa ngu ti ala ayeke oke, ague lani na mbage ti Jésus na ala tene mara ti oko tënë so mbeni disciple ti Jésus atene: “E wara Messie ni awe!”​—Jean 1:41.

Jésus atene lani so kozo ti tene Royaume so lo yeke duti Gbia ni akomande na ndo ti sese kue, bira, yengingo ti sese nga na ambeni kpale ni nde ayeke mû ndo ti dunia. Ni la lo hunda na azo kue ti “lango pëpe.”​—Marc 13:37.

Jésus ayeke lani zo so ayeke na siokpari na tere ti lo ape na lakue lo mä yanga ti Nzapa, me awato ti lo afâ lo. Tongaso kuâ ti lo ni amû lege ti kiri tâ na ye so Adam na Ève agirisa, so ayeke fini ti lakue lakue na yâ ti Paradis.

Kuâ ti Jésus asara si mbeni prophétie aga tâ tënë. So Nzapa azingo lo na kuâ na peko ti lango ota tongana mbeni ngangu zo ti yingo, a sara nga si mbeni prophétie ni nde aga nga tâ tënë. Na pekoni, Jésus asi na adisciple ti lo ahon 500 tongaso. Kozo ti tene lo gue na yayu, lo tene na abazengele ti lo ti fa nzoni tënë na ndo ti lo nga na ndo ti Royaume so lo yeke duti Gbia ni na “azo na popo ti amara kue”. (Matthieu 28:19). Adisciple ni asara lani tongana nyen ti sara kusala ni so mbilimbili?

​—A wara ni na Matthieu, Marc, Luc, Jean nga na 1 aCorinthien.