၁ ရာဇဝင်ချုပ်
၁၁ နောက်ပိုင်းမှာ အစ္စရေးအားလုံးက ဒါဝိဒ်ရှိတဲ့ ဟေဗြုန်မြို့ကို စုရုံးလာပြီး+ “ကျွန်တော်တို့ဟာ ခင်ဗျားရဲ့ သွေးသားရင်းချာတွေပါ။+ ၂ ရှောလုမင်း လက်ထက်ကတည်းက ခင်ဗျားဟာ အစ္စရေးတပ်ကို ဦးစီးပြီး တိုက်ပွဲဝင်ခဲ့သူပါ။+ ယေဟောဝါဘုရားကလည်း ‘ငါ့လူမျိုး အစ္စရေးကို မင်း ထိန်းကျောင်းရမယ်။ မင်းဟာ အစ္စရေးခေါင်းဆောင် ဖြစ်လာမယ်’ လို့ မိန့်မှာထားတာပဲ”+ ဆိုပြီး ပြောကြတယ်။ ၃ ဒါနဲ့ ဒါဝိဒ်ရှိတဲ့ ဟေဗြုန်မြို့ကို အစ္စရေးအကြီးအကဲအားလုံး ရောက်လာတယ်။ ဒါဝိဒ်လည်း ဟေဗြုန်မြို့၊ ယေဟောဝါရှေ့မှာ သူတို့နဲ့ ကတိသစ္စာပြုတယ်။ ရှမွေလကတစ်ဆင့် ယေဟောဝါ ပြောခဲ့တဲ့အတိုင်း+ ဒါဝိဒ်ကို အစ္စရေးဘုရင်အဖြစ် သူတို့ ဘိသိက်ပေးကြတယ်။+
၄ နောက်တော့ ဒါဝိဒ်နဲ့ အစ္စရေးတွေက ယေဗုတ်လို့ခေါ်တဲ့+ ဂျေရုဆလင်မြို့ကို ချီတက်သွားတယ်။ အဲဒီမှာ ယေဗုသိလူမျိုးတွေ+ နေထိုင်တယ်။ ၅ ယေဗုတ်မြို့သားတွေက “ဒီမြို့ထဲကို မင်း လုံးဝ မဝင်ရဘူး”+ ဆိုပြီး ဒါဝိဒ်ကို ခနဲ့တဲ့တဲ့ ပြောကြတယ်။ ဒါပေမဲ့ ဒါဝိဒ်က ဇိအုန်ခံတပ်ကို သိမ်းပိုက်ခဲ့တယ်။+ အခုတော့ အဲဒီနေရာက ဒါဝိဒ်မြို့လို့ နာမည်တွင်နေပြီ။+ ၆ ဒါဝိဒ်က “ယေဗုသိလူတွေကို ဦးဆုံးတိုက်နိုင်တဲ့သူ ဗိုလ်ချုပ်ဖြစ်စေ” လို့ပြောတော့ ဇေရုယာရဲ့သား ယွာဘက+ ဦးဆုံးတိုက်ခိုက်တဲ့အတွက် ဗိုလ်ချုပ်ဖြစ်လာတယ်။ ၇ နောက်တော့ ဒါဝိဒ်က ဇိအုန်ခံတပ်မြို့မှာ နေထိုင်တယ်။ ဒါကြောင့် အဲဒီမြို့ကို ဒါဝိဒ်မြို့လို့ခေါ်ကြတယ်။ ၈ ဒါဝိဒ်က တောင်ကုန်း* ပေါ်မှာရော ပတ်ဝန်းကျင်ဒေသတွေမှာပါ မြို့ရိုးနဲ့ တခြားအဆောက်အအုံတွေ ဆောက်လုပ်တယ်။ မြို့ထဲက ကျန်တဲ့နေရာတွေကိုတော့ ယွာဘပြုပြင်တယ်။ ၉ ဒီလိုနဲ့ ဒါဝိဒ်ဟာ အင်အားကြီးသည်ထက် ကြီးလာတယ်။+ ဗိုလ်ခြေတို့ရဲ့အရှင် ယေဟောဝါလည်း သူနဲ့အတူရှိတယ်။
၁၀ အစ္စရေးတွေကို ယေဟောဝါ ကတိပေးထားတဲ့အတိုင်း ဒါဝိဒ်ကို မင်းမြှောက်ဖို့ အစ္စရေးအားလုံးနဲ့အတူအစွမ်းကုန် ထောက်မကူညီခဲ့တဲ့ ခေါင်းဆောင်သူရဲကောင်းတွေ ရှိတယ်။+ ၁၁ သူတို့ရဲ့နာမည်တွေကတော့– သူရဲကောင်းသုံးယောက်ထဲမှာ ခေါင်းဆောင်ဖြစ်တဲ့+ ဟခမောနိအမျိုးသား ယာရှောဗံ။+ သူက လှံကိုကိုင်ပြီး တစ်ချီတည်းနဲ့ လူ ၃၀၀ ကို သတ်ပစ်ခဲ့တယ်။+ ၁၂ နောက်တစ်ယောက်က သူရဲကောင်းသုံးယောက်အဝင်ဖြစ်တဲ့ အဟောဟိအမျိုးသား+ ဒေါဒေါရဲ့သား ဧလာဇာ။+ ၁၃ ဖိလိတိတွေ စစ်တိုက်ဖို့ စုရုံးခဲ့တဲ့ ပါဒမိမ်အရပ်မှာ+ သူက ဒါဝိဒ်နဲ့အတူရှိခဲ့တယ်။ အဲဒီမှာ မုယောစပါး စိုက်ထားတဲ့ လယ်တစ်ကွက် ရှိတယ်။ ဖိလိတိတွေကြောင့် လူတွေ ထွက်ပြေးတဲ့အခါ၊ ၁၄ ဧလာဇာက လယ်ကွက်အလယ်မှာရပ်ပြီး ဖိလိတိလူတွေကို ခုခံတိုက်ခိုက်တယ်။ ဒါကြောင့် ယေဟောဝါက အကြီးအကျယ် အောင်ပွဲခံစေခဲ့တယ်။+
၁၅ ဖိလိတိတပ်က ရေဖိမ်ချိုင့်ဝှမ်းမှာ+ စခန်းချနေတဲ့အခါ ခေါင်းဆောင် ၃၀ ထဲက သုံးယောက်ဟာ ဒါဝိဒ်ရှိတဲ့ အဒုလံလိုဏ်ဂူကို+ ဆင်းသွားကြတယ်။ ၁၆ ဒီအချိန်မှာ ဒါဝိဒ်က သူ့ရဲ့ခံတပ်မှာ ရောက်နေပြီး ဖိလိတိမြို့စောင့်တပ်ကတော့ ဘက်သလီဟင်မြို့မှာ ရှိနေတယ်။ ၁၇ ဒါဝိဒ်က “ဘက်သလီဟင်မြို့+ တံခါးနားမှာရှိတဲ့ ရေလှောင်ကန်ထဲက ရေကို သောက်ချင်လိုက်တာ” လို့ တောင့်တပြီးပြောတယ်။ ၁၈ အဲဒီအခါ သူရဲကောင်းသုံးယောက်က ဖိလိတိတပ်ကို ထိုးဖောက်ပြီး ဘက်သလီဟင်မြို့ တံခါးနားမှာရှိတဲ့ ရေလှောင်ကန်ထဲက ရေကို ခပ်ယူလာတယ်။ ဒါပေမဲ့ ဒါဝိဒ်က မသောက်ဘဲ ယေဟောဝါရှေ့မှာ သွန်ချလိုက်တယ်။ ၁၉ “ဘုရားသခင်ရဲ့ရှုထောင့်ကနေ ကြည့်ရင် ဒီရေကိုသောက်ဖို့ ကျွန်တော် စဉ်းတောင် မစဉ်းစားဝံ့ပါဘူး။ သူတို့က အသက်ကို ရင်းပြီး ဒီရေကို ယူလာခဲ့တာ။ အဲဒီလို အသက်ကိုရင်းပြီး စွန့်စားခဲ့သူတွေရဲ့ သွေးကို ငါမသောက်ဘူး”+ လို့ပြောပြီး မသောက်ဘဲ နေလိုက်တယ်။ ဒါတွေဟာ သူရဲကောင်း သုံးယောက်ရဲ့ စွမ်းဆောင်ချက်တွေပဲ။
၂၀ ယွာဘရဲ့အစ်ကို+ အဘိရှဲကလည်း+ လူစွမ်းကောင်း သုံးယောက်ထဲမှာ ခေါင်းဆောင်ပဲ။ သူက လှံကိုကိုင်ပြီး လူ ၃၀၀ ကိုသတ်ပစ်ခဲ့တယ်။ သူရဲကောင်း သုံးယောက်လိုပဲ ဂုဏ်သတင်း ကျော်စောတယ်။+ ၂၁ သူက လူစွမ်းကောင်း သုံးယောက်ထဲမှာ ကျန်တဲ့နှစ်ယောက်ထက် ထင်ပေါ်ပြီး သူတို့ရဲ့ခေါင်းဆောင်ဖြစ်ပေမဲ့ သူရဲကောင်း သုံးယောက်ကိုတော့ မမီဘူး။
၂၂ ယောယဒရဲ့သား ဗေနာယဟာ+ ရဲစွမ်းသတ္တိရှိသူ ဖြစ်ပြီး ကပ်ဇေလမြို့မှာ+ စွန့်စားတဲ့လုပ်ရပ် အများကြီး လုပ်ဆောင်ခဲ့တယ်။ မောဘလူမျိုးဖြစ်တဲ့ အေရေလရဲ့ သားနှစ်ယောက်ကို သတ်ခဲ့တယ်။ နှင်းကျတဲ့နေ့တစ်နေ့မှာ ရေတွင်းထဲ ဆင်းပြီး ခြင်္သေ့တစ်ကောင်ကို သူသတ်ခဲ့တယ်။+ ၂၃ အရပ်ငါးတောင်* ရှိတဲ့ အီဂျစ်လူထွားကြီးတစ်ယောက်ကိုလည်း သတ်ခဲ့တယ်။+ အီဂျစ်လူက ရက်ကန်းလိပ်တုံးလောက် ကြီးတဲ့ လှံကို ကိုင်ထားပေမဲ့+ ဗေနာယကတော့ တုတ်တစ်ချောင်းနဲ့ပဲ တိုက်ခိုက်တယ်။ ပြီးတော့ အီဂျစ်လူရဲ့လက်ထဲက လှံကို လုယူပြီး အဲဒီလှံနဲ့ပဲ ထိုးသတ်လိုက်တယ်။+ ၂၄ ဒါတွေဟာ ယောယဒရဲ့သား ဗေနာယရဲ့ စွမ်းဆောင်ချက်တွေ ဖြစ်တယ်။ သူရဲကောင်းသုံးယောက်လိုပဲ သူလည်း ဂုဏ်သတင်းကျော်စောတယ်။ ၂၅ သူက ခေါင်းဆောင် ၃၀ ထက် ထင်ပေါ်ပေမဲ့ သူရဲကောင်းသုံးယောက်ကိုတော့ မမီဘူး။+ ဒါပေမဲ့ ဒါဝိဒ်က သူ့ကို ကိုယ်ရံတော် ခန့်ထားတယ်။
၂၆ အစ္စရေး တပ်မှာရှိတဲ့ တခြားသူရဲကောင်းတွေကတော့ ယွာဘရဲ့ညီ အာသဟေလ၊+ ဘက်သလီဟင်မြို့သား ဒေါဒေါရဲ့သား ဧလဟာနန်၊+ ၂၇ ဟာရုတ်အရပ်သား ရှမုတ်၊ ပေလောနိလူ ဟေလက်၊ ၂၈ တေကောမြို့သား အိကေရှရဲ့သား အိရာ၊+ အာနသုတ်မြို့သား အဗျေဇာ၊+ ၂၉ ဟုရှအမျိုးသား သိဗေခဲ၊+ အဟောဟိအမျိုးသား အိလဲ၊ ၃၀ နေတောဖရွာသား မဟာရဲ၊+ နေတောဖရွာသား ဗာနာရဲ့သား ဟေလက်၊+ ၃၁ ဂိဗာမြို့သား ဗင်ယာမိန်အနွယ်+ ရိဘဲရဲ့သား အိတ္တဲ၊ ပိရသုန်မြို့သား ဗေနာယ၊ ၃၂ ဂါရှသဲချောင်းတွေမှာနေတဲ့+ ဟုရဲ၊ ဧရဗာမြို့သား အဗျေလ၊ ၃၃ ဗာဟုရိမ်ရွာသား အာဇမာဝက်၊ ရှာလဗိမ်မြို့သား ဧလျာဘာ၊ ၃၄ ဂိဇောနိမြို့သား ဟာရှိမ်ရဲ့သားတွေ၊ ဟာရာရိအမျိုးသား ရှာဂဲရဲ့သား ယောနသန်၊ ၃၅ ဟာရာရိအမျိုးသား စာကာရဲ့သား အဟိအံ၊ ဥရရဲ့သား ဧလိဖလ၊ ၃၆ မေခေရာအရပ်သား ဟေဖာ၊ ပေလောနိအမျိုးသား အဟိယ၊ ၃၇ ကရမေလမြို့သား ဟေဇရဲ၊ ဧဇဗဲရဲ့သား နာရဲ၊ ၃၈ နာသန်နဲ့ ညီအစ်ကိုတော်တဲ့ ယောလ၊ ဟေဂရိရဲ့သား မိဗဟာ၊ ၃၉ အမ္မုန်အမျိုးသား ဇေလက်၊ ဇေရုယာရဲ့သား ယွာဘရဲ့ လက်နက်ကိုင်ဖြစ်တဲ့ ဗေရုတ်မြို့သား နဟာရဲ၊ ၄၀ အိသရိဆွေမျိုးစုထဲက အိရာနဲ့ ဂါရက်၊ ၄၁ ဟိတ္တိလူမျိုး ဥရိယ၊+ အာလဲရဲ့သား ဇာဗဒ်၊ ၄၂ ရုဗင်အမျိုးသား ရှိဇရဲ့သား ခေါင်းဆောင် အဒိနတို့ဖြစ်တယ်။ အဒိနလက်အောက်မှာ ရုဗင်အမျိုးသား ၃၀ ရှိတယ်။ ၄၃ မာခါရဲ့သား ဟာနန်၊ မိသနိအမျိုးသား ယောရှာဖတ်၊ ၄၄ အာရှတရုတ်မြို့သား သြဇိယ၊ အာရော်မြို့သား ဟောသံရဲ့သားတွေဖြစ်တဲ့ ရှာမနဲ့ ယေယေလ၊ ၄၅ ရှိမရိရဲ့သား ယေဒယေလ၊ သူနဲ့ညီအစ်ကိုတော်တဲ့ တိဇိမြို့သား ယောဟ၊ ၄၆ မဟာဝိအမျိုးသား ဧလျလေ၊ ဧလနန်ရဲ့သားတွေ ဖြစ်တဲ့ ယေရိဗဲနဲ့ ယောရှဝိ၊ မောဘအမျိုးသား အိသမ၊ ၄၇ ဧလျေလ၊ ဩဗက်၊ မေဇောဗိတ်အရပ်သား ယာသေလတို့ဖြစ်တယ်။