PHUNZIRO 14

Kuthandiza Anthu Kuti Aone Mfundo Zazikulu

Aheberi 8:1

MFUNDO YAIKULU: Thandizani anthu kuti azitsatira nkhani yanu komanso aziona kugwirizana pakati pa mfundo zazikulu ndi mutu wa nkhani yonseyo.

Muzikhala ndi cholinga. Muzidzifunsa kuti, Kodi cholinga cha nkhaniyi n’chiyani? Kodi ndi kuphunzitsa, kuthandiza anthu kuti asinthe maganizo kapena kuwalimbikitsa kuchita zinazake? Ndiyeno mfundo zikuluzikulu zizikuthandizani kukwaniritsa cholingacho.

Muzidzifunsa kuti, ‘Kodi anthu ayenera kuti amadzifunsa mafunso ati, nanga sangagwirizane ndi zinthu ziti pa nkhaniyi? Kodi mafunso kapena mfundo zawozo angazisanje m’njira iti?’ Ndiyeno inuyo musanje mfundo zanu m’njira imeneyo kuti anthu akutsatireni bwino komanso avomereze mfundo zimene mukuphunzitsa.
Muzitsindika mutu wa nkhani yanu. Munkhani yanu yonse muzitsindika mutu potchula mawu ofunika kwambiri a m’mutuwo kapena kugwiritsa ntchito mawu ofanana nawo.
Muzithandiza anthu kuona mfundo zazikulu m’njira yosavuta. Muzisankha mfundo zikuluzikulu zimene zikugwirizana ndi mutu wa nkhani komanso zimene mungazifotokoze bwino popanda kudya nthawi. Mfundo zikuluzikulu zizikhala zochepa, muzitchula mfundo iliyonse momveka, muzipuma mukamachoka pa mfundo ina kupita pa ina kuti musawasiye anthu m’malere.

Mungatchule mfundo zikuluzikuluzo m’mawu anu oyamba kuti anthu akutsatireni, kenako mungazitchulenso m’mawu omaliza kuti anthu azikumbukire.