Ka hali olusiku amalibuko ganahwe?

ALAGA ISHUZO LY’EBIBLIYA

“Nyamuzinda . . . ahôrhola ngasi mulenge gubali omu masu: olufû ntalwo lwacihabê; emishibo n’endûlu n’amababale birhakacihabâ bundi; bulya okwâli burhanzi kwahwire.”​—Amafulûlo 21:3, 4.

OKUMANYA EZO NYIGIRIZO Z’EBIBLIYA KWANAKULERHERA BUNGUKE BUCI?

Wanamanya n’obwalagale oku arhali Nnamahanga orhulerhera amalibuko.​—Yakobo 1:13.

Oko kwanakuha oburhulirize okumanya oku Nnamahanga anaciyumve kubi erhi abona oli walibûka.​—Zakariya 2:8.

Wanaba n’obulangalire oku aga malibuko goshi ganacihwê.​—Ennanga 37:9-11.

KA KOBINALI RHWANAYEMERA EZO NYIGIRIZO Z’EBIBLIYA?

Neci, hali bintu bibirhi byakarhuma rhwayemera ezo nyigirizo z’Ebibliya:

• Nnamahanga aba ashombire amalibuko n’obubule bw’obushinganyanya. Okengere amango gamira gurhi Yehova akag’iciyumva erhi abashombanyi b’abakozi bage babà bali babalibuza. Ebibliya edesire oku erhi Yehova abona kunganaci bali “balibûka, erhi bashombanyi babo barhuma,” aciyumva kubi bwenene.​—Abaciranuzi 2:18.

  Nnamahanga ashomba bwenene abantu balibuza abandi. Alaga olwiganyo, Ebibliya edesire oku Nnamahanga ashomba bwenene “enfune zibulaga omukô gw’omuntu mweru-kweru.”​—Emigani 6:16, 17.

• Nnamahanga anashibirire ngasi muntu. Ciru ankaba ngasi muntu ayishi “amalibuko gage,” Yehova aba agamanyire kurhulusha!​—2 Enganîro 6:29, 30.

  Hano hofi-hofi, Yehova akolesa Obwami bwage ly’ayukiza ngasi muntu amalibuko. (Mateyo 6:9, 10) Cikone mwakano kasanzi kirhu, ali arhuliriza ngasi yeshi oli wamulonza n’omurhima goshi.​—Ebijiro by’Entumwa 17:27; 2 Abakorinti 1:3, 4.