Ishega Lizinda Yezu Ajiraga

Ngasi mwaka Abayahudi bakag’ijira olusiku lukulu lwa Pasaka omu lusiku lwa 14 lw’omwezi gwa Nisani. Olo lusiku lukulu lwakag’ibakengeza gurhi Yehova abarhenzagya omu buja e Misri anabahêka omu Cihugo c’Amalaganyo. Omu mwaka gwa 33 K.K.K., Yezu n’entumwa zage bajirira Pasaka omu cumpa c’enyanya ca nyumpa nguma omu Yeruzalemu. Erhi bali hofi bayuse balya, Yezu aderha ntya: ‘Muguma muli mwe andenganya.’ Entumwa zasomerwa bwenene, zanadosa Yezu ntya: ‘Indi oyo wakulenganya?’ Yezu aderha ntya: ‘Oyu naha ogu mugati ye wandenganya.’ Enyuma z’aho aha Yuda Iskariyoti ecihimbi c’omugati. Ho n’aho, Yuda ayimanga anahuluka mw’eco cumpa.

Enyuma z’aho Yezu asalira, abega omugati, anaguha entumwa zal’isigire. Aderha ntya: ‘Mulye ogu mugati. Gushushanyize omubiri gwani gwahânwa erhi mwe murhuma.’ Enyuma z’aho arhôla idivayi ashenga analiha entumwa zage. Aderha ntya: ‘Munywe el’idivayi. Lishushanyize omuko gwani, gwahânwa ly’ebyaha bibabalirwa. Mmulaganyize oku mwayish’iba bami haguma na nani omu mpingu. Mukajira ntya ngasi mwaka nka mwankengera.’ Abanafunzi ba Yezu banacigendekere barhimanana mw’ebyo bijingo ngasi mwaka. Eyo ntimanano ekola ehamagalwa Ishega ly’Ebijingo lya Nnawirhu.

Enyuma z’ely’ishega, entumwa za Yezu zaja kadali bwenene lyo zimanya indi wali wa bulagirire bwenene egarhi kabo. Cikone Yezu ababwira ntya: ‘Oli mukulu bwenene egarhi kinyu ali olya ocibona oku ali murho bwenene, arhanali wa bulagirire bwenene.

‘Muba bîra bani. Namubwire ngasi kantu Larha aba alonzize mmubwire. Hano hofi-hofi nagaluka emwa Larha empingu. Mwabêra hanw’igulu, n’obuzigire mwayerekana egarhi kinyu bo bwarhuma abantu bamanya oku muli banafunzi bani. Mushinganine mukazigirana nk’oku namuzigire.’

Buzinda, Yezu ashenga, anahûna Yehova alange abanafunzi bage boshi. Ahûna Yehova abarhabale lyo bakakola haguma omu murhûla. Ashenga ly’izino lya Yehova licesibwa. Enyuma z’aho Yezu n’entumwa zage bayimbira Yehova irenge banahuluka. Akasanzi ka Yezu k’okushwekwa kalikola kayegerire.