Yezu Amagwarhwa

Yezu n’entumwa zage bagezire omu Kabanda k’e Kidroni erhi bali baja oku Ntondo y’Emizeti. Bajiraga ntyo enyuma z’emidi y’obudufu, n’omwezi gwakag’ibasha gwal’iyenire. Erhi bahika omw’ishwa ly’e Getesemani, Yezu ababwira ntya: “Mutamale aha munabêre masu.” Enyuma z’aho Yezu aja kuli hitya mw’er’ishwa anafukama. Erhi aba ababîre bwenene, ashenga Yehova ntya: “Obulonza bwawe bujirikane.” Enyuma z’aho Yehova arhuma malahika ly’aha Yezu omurhima. Erhi Yezu agaluka emunda entumwa zali arhimana isharhu mulizo zigwishire. Aderha ntya: ‘Muzuke! Aka karhali kasanzi k’okuhunga! Akasanzi k’okuhirwa kwani omu maboko g’abashombanyi bani kamahika.’

Kasanzi kasungunu enyuma z’aho Yuda ahika, alilusibwe na bantu banji bagwerhe engorho n’obuhiri. Al’imanyire aha barhimana Yezu bulya kanji-kanji bakag’ija boshi mw’er’ishwa. Yuda ali erhi anabwizire abasoda oku abayeresa Yezu. Aja emunda Yezu ali anaderha ntya: ‘Mpanyire omusingo Mwigiriza,’ anamununugurha. Yezu aderha ntya: ‘Yuda, ka kununugurha wampânamwo?’

Yezu ayegera eco cigusho c’abantu anabadosa ntya: “Indi muli mwalonza?” Baderha ntya: “Rhuli rhwalonza Yezu w’e Nazareti.” Enyuma z’aho abashuza ntya: “Nie Yezu w’e Nazareti,” ho n’aho abo bantu bagaluka enyuma banahirimira okw’idaho. Yezu ashub’ibadosa ntya: “Indi muli mwalonza?” Bashub’iderha ntya: “Yezu w’e Nazareti.” Yezu abashuza ntya: ‘Namubwizire oku nie Yezu w’e Nazareti. Muleke aba banafunzi bani bagende.’

Erhi Petro abona ebyakag’ijirikana, arhôla engorho yage anatwa okurhwiri kwa Malkusi, mukozi muguma wa kuhani mukulu. Cikone Yezu ahuma oku kurhwiri kw’oyo mulume anamufumya. Enyuma z’aho abwira Petro ntya: ‘Bika engorho yawe. Erhi wakalwa omu kukolesa engorho, wanayish’ifâ n’engorho.’ Abasoda bagwarha Yezu bamushweka amaboko, n’entumwa zalibirha. Enyuma z’aho abo bantu bahêka Yezu emwa kuhani mukulu wakag’ihamagalwa Anasi. Anasi adosa Yezu madoso manji anamurhuma emwa Kayifa wakag’ikola nka Kuhani Mukulu mw’ogo mwaka. Cikone gurhi byabêrire entumwa?