Petro Amahakana Yezu

Erhi Yezu aba ali omu cumpa c’enyanya ca nyumpa ndebe e Yeruzalemu haguma n’entumwa zage, azibwira ntya: ‘Omu budufu bw’ene mweshi mwanyaka.’ Petro aderha ntya: ‘Niehe ntajire ntyo! Ciru abandi boshi bakakuyaka, niehe ntakuyake.’ Cikone Yezu abwira Petro ntya: ‘Embere oluhazi lubike waderha kasharhu koshi-koshi oku orhamanyiri.’

Erhi abasoda bahêka Yezu omu nyumpa ya Kayifa, ntumwa zage nyinji zalibirha. Cikone ntumwa zage ibirhi zakulikira ehitu hyali haguma naye. Muguma muli ezo ntumwa ali Petro. Aja omu ngo y’enyumpa ya Kayifa anarhondera akaluka. Bulya hali obumoleke, muja-kazi muguma abona Petro, anaderha ntya: ‘Nkumanyire! Wali haguma na Yezu!’

Petro aderha ntya: ‘Nanga, ntali haguma naye! Ntamanyiri ciru ebi oli waderha!’ Aja ebwa muhango. Cikone erhi hagera kasanzi kasungunu owundi muja-kazi amubona anabwira abantu ntya: ‘Oyu mulume anali haguma na Yezu!’ Petro aderha ntya: ‘Ntamanyiri ciru oyo Yezu!’ Mulume muguma aderha ntya: ‘Oli muguma wa buli bo! Oli waderha nka muntu w’e Galilaya, aka Yezu.’ Cikone Petro ahakana, aderha ntya: ‘Ntamumanyiri!’

Ho n’aho, oluhazi lwabika. Petro abona Yezu akabagana anamulaba. Akengera enderho Yezu amubwiraga, ahuluka analaka bwenene.

Mw’ako kasanzi, e Sanhedrini yahiga okulibugiza Yezu omu nyumpa ya Kayifa. Bali erhi bahizire oku baniga Yezu, cikone bal’ikola bali balonza ebyarhuma bajira ntyo. Cikone nt’igosa babwine agwerhe. Buzinda, Kayifa yene adosa Yezu ntya: ‘K’oli Mugala wa Mungu?’ Yezu aderha ntya: ‘Neci.’ Kayifa aderha ntya: ‘Rhurhacilagiriri oku bandi bahamirizi. Amajacira Mungu!’ Akagombe kayemera kanaderha ntya: ‘Oyu muntu ashinganine anigwe.’ Bashurha Yezu empi, bakamutwirako, bamubwikira amasu, bakamushurha ebifundo n’okuderha ntya: ‘Akaba oli mulebi, orhubwire indi okushusire!’

Erhi buca sezi, bahêka Yezu omu Sanhedrini banashub’imudosa ntya: ‘K’oli Mugala wa Mungu?’ Yezu ashuza ntya: ‘Wene wadesire oku ndi Mugala wa Mungu.’ Enyuma z’aho bamushobeka oku anajacire Mungu banamuhêka emwa guvernere Muroma wakag’ihamagalwa Pontiyo Pilato. Gurhi byabire enyuma z’aho? Rhwabibona omw’isomo likulikire.