Mwezi gwa 12

Yezu ashushanyize obwîra agwerhe haguma n’abanafunzi bage n’olushangi luba egarhi ka lungere n’ebibuzi byage. (Yn. 10:14) Oko kushushanya kwa ntyo kushinganine. Ebibuzi biyishi lungere wabyo binanayumvirhize izu lyage. Muntu muguma obalama bwenene adesire ebi acibwinire. Adesire ntya: “Rhwakagilonza okufilmé bibuzi biguma na biguma rhwanakalonza okubiyegera. Cikone birhakagirhukulikira bulya birhalimanyire izu lirhu. Buzinda hyana higuma hyali hilungere hyabyo hyayisha; ho n’aho hyabihamagala byanahikulikira.” Ebyabwinwe n’oyo mulume obalama birhukengezize enderho za Yezu lugenda ebibuzi byage erhi banafunzi bage. Aderha ntya: “Byayumva izu lyani.” Cikone Yezu ali empingu. Gurhi rhwakaderhamwo oku rhuli rhwayumva izu lyage? Enjira rhwakayerekanamwo oku rhuli rhwayumvirhiza izu lya Nnawirhu kuli kukolesa enyigirizo zage omu kalamo kirhu.​—Mt. 7:24, 25. w21.12 buk. 16 cif. 1-2

Entumwa Paolo akag’ilibuza Abakristu bwenene. Enyuma z’aho, ahugûkwa oku ebi akag’ijira byali bibi, ananaba mubidu okujira empindûlo omu ntanya zage n’omu bumuntu bwage. (1 Tm. 1:12-16) Kugerera oburhabale bwa Yehova, Paolo ahikira aha aba lungere wa buzigire, wa bwonjo, na mwirhohye. Alangalira oku Yehova amubabalira ahali h’okusegeza obwenge oku magosa gage. (Rm. 7:21-25) Arhakag’icilongezako obwimana. Lubero n’oko, ajira okwage koshi ly’akubûla obumuntu bwage bw’Ecikristu analangalira n’obwirhohye oburhabale bwa Yehova ly’ahikiriza omukolo gwage. (1 Kr. 9:27; Fl. 4:13)Abagula barhahirwaho mpu bulya bali bimana. Ciru akaba ntyo, Yehova aba alonzize bakayemera obuzamba bwabo, n’okukubûla obumuntu bwabo bw’Ecikristu. (Ef. 4:23, 24) Omugula ashinganine akacilabiriza kugerera Akanwa ka Nnâmahanga n’okujira empindûlo zishinganine. Erhi akajira ntyo, Yehova anamurhabala abe n’omwishingo anabe mugula mwinja.​—Yk. 1:25. w22.03 buk. 29-30 cif. 13-15

Bici rhwakajira erhi rhwakabona oku rhwatwirire owirhu mwemezi olubanja? Rhushinganine rhukakengera oku rhukwanine rhukazigira bene wirhu. (Yk. 2:8) Rhushinganine kandi rhushenge Yehova kurhenga oku murhima, rhumushenge arhurhabale rhuleke okukatwira abandi olubanja. Rhwanakola kushimbana n’amasala girhu omu kugend’iganiza oyo muntu rhuli rhwaderha kubi. Rhwanamuhûna rhuje naye omu mahubiri erhi rhumulalike lyo rhushangira haguma naye ebiryo. Omu kumanya mwene wirhu bwinja rhwanahikira aha rhwayiga olwiganyo lwa Yehova na Yezu lw’okulola ebinja biri omu murhima gwage. Muli eyo njira, rhwanayerekana oku rhuli rhwayumvirhiza irhegeko lya lungere mwinja liyerekine oku rhurhakazig’itwa oluli omu mwabene. Nka kula ebibuzi biyumvirhiza izu lya lungere wabyo, ko n’abanafunzi ba Yezu bayumvirhiza izu lyage. Rhube rhuli b’omu “buso busungunu” erhi b’omu “ebindi bibuzi,” rhugendekere rhwakenga n’okuyumvirhiza izu lya lungere mwinja.​—Lk. 12:32; Yn. 10:11, 14, 16. w21.12 buk. 19 cif. 11; buk. 21 cif. 17-18

Erhi Roboami aba mwami w’e Israheli, bacikala bage bayisha emunda ali lyo bamuhûna kantu kalebe. Bamuhûna oku abalembuhize omuzigo muzirho ishe Solomoni, ababarhuzagya. Ly’amanya gurhi ayish’ishuza, Roboami ajira bwinja erhi agend’idosa abagula b’omu Israheli gurhi ashuza abantu. Abo bagula bamubwira oku erhi akajirira abo bantu nk’oku banamuhûnaga, banamushiga ensiku zoshi. (1 Bam. 12:3-7) Bibonekine oku nkaba Roboami arharhimukagwa n’er’ihano abagula bamuhâga, na ntyo ajidosa emisole bakulaga boshi oku ajira. Bamuhanûla oku ayushule eyo mizigo mizirho y’abantu. (1 Bam. 12:9-11) Roboami alishinganine okudosa Yehova ihano lihi ashinganine akulikire. Lubero n’oko, ayemera ihano ahâbagwa n’eyo misole. Oko kwalerhera Roboami n’abantu b’e Israheli mazibu manji. Omu kanga kirhu, nkaba ihano rhuhâbwa lirhaba nk’eri rhwalilonzize okuyumva. Cikone, erhi akaba liyimangire oku Kanwa ka Nnâmahanga, rhushinganine rhuliyemere. w22.02 buk. 9 cif. 6

Omuntu mwirhohye na wa lugero arhasegeza obwenge bwage oku bumanye bw’emisole, cikone anabusegeze oku misi yabo. Arhabalwisa luhali, cikone anababone nka babo banyakazi. Abakola bashosi banabone emisole oku luli luhembo kurhenga emwa Yehova na muli oko, banamuvuge omunkwa. Bulya emisi yabo ekola eri yanyiha, abakola bashosi banashagaluke okubona oku, emisole ecigwerhe emisi eba mibidu enagwerhe emisi y’okuhikiriza omukolo gwa Yehova omu cigamba. Noemi oganirirwe omu Bibliya luli lwiganyo lwinja lw’omugikulu wayemeraga n’obushagaluke oburhabale bw’owaciri musole. Burhangiriza, Noemi ayinginga omwali-kazi wali mukana oku agaluke emwabo. Cikone, erhi Ruti ahiga oku arhamuleke, amulusa kuhika e Betlehemu, Noemi ayemera obwo burhabale. (Rut. 1:7, 8, 18) N’oko kwalerhera abo bakazi bombi omugisho! (Rut. 4:13-16) Obwirhohye bwanashumya abakola bashosi bayige olwiganyo lwa Noemi. w21.09 buk. 10-11 cif. 9-11

Larha wirhu w’omu mpingu aba ahugûsirwe obuhashe bwa ngasi muguma wirhu. Nkaba wanajira binji kulusha bantu banji oba amanyire onazigire. Erhi nkaba orhakahash’ijira binji nk’oku abandi bali bajira, erhi myaka yawe erhuma, amagala gawe, erhi emikolo ojira omu mulala. Orhavunikaga omurhima. (Gl. 6:4) Yehova arhakayibagira omukolo gwawe. Agendekera ashagaluka erhi wakagendekera wajira ebi wakanahasha onagwerhe ebikushumize binja. Yehova anabone ciru n’ebi olonzize okujira. Aba alonzize okashagalukira n’okurhimukwa n’enterekêro wakahash’imuha. Rhukola rhujira omurhula gw’ekandalala bulya rhuba rhumanyire oku Yehova anarhabale abakozi bage amango bali omu mazibu. (Iz. 41:9, 10) Kobinali, rhugwerhe ebirhumire binja by’okuba n’omwishingo amango rhuli rhwaha Larha wirhu w’obuzigire enterekêro bulya ashinganine ‘ahâbwe irenge, n’obukuze’ kurhenga emw’ebiremwa byage byoshi!​—Maf. 4:11. w22.03 buk. 24 cif. 16; buk. 25 cif. 18

Rhulagirire oku kuyiga olwiganyo lwa Yezu, cikoki rhurhashinganini okuvunika omurhima erhi rhwakayabirwa okuyiga olwiganyo lwa Yezu n’obwimana. (Yk. 3:2) Omuntu ociri wayiga oku babinja arhakahash’ibinja bwinja-bwinja aka mwalimu wage. Cikone erhi akagendekera aciyigiriza kugerera amagosa gage n’okuciseza okuyiga olwiganyo lwa mwalimu wage, anagendekera akubûla omukolo gwage. Ko n’oko, erhi rhwakakola kushimbana n’ebi rhuyiga omw’ifunzo lirhu rhwenene ly’Ebibliya, rhukanajira okwirhu koshi lyo rhukubûla amagosa rhwakaba rhugwerhe, rhwanahash’ikulikira olwiganyo Yezu arhusigiraga. (Enna. 119:59) Rhulamire omw’igulu liyunjwiremo iroho ly’okucikaliza. Cikone abakozi ba Yehova bohe baba lubero n’oko. Iroho ly’okucihâna lya Yezu lyarhuhumire oku murhima, rhunahizire okukulikira olwiganyo lwage. (1 Pt. 2:21) Erhi rhwakajira okwirhu koshi lyo rhuyiga oborhere bwa Yezu bw’okucihâna, rhwanaba n’omwishingo gw’okuyemerwa na Yehova. w22.02 buk. 24 cif. 16; buk. 25 cif. 18

Njira nguma Yehova ali akolesa ene ly’aha abakozi bage obulongozi, kuli kugerera Akanwa kage, Bibliya. Erhi rhwakakaciha akasanzi k’okurhanya kw’ebi Yehova ali arhuyigiriza, rhwanahash’irhumikira obulongozi bwage n’okuhikiriza omukolo gwirhu gw’amahubiri. (1 Tm. 4:15, 16) Eyindi njira Yehova akolesa ly’arhuha obulongozi kuba kugerera “mushizi mwirhonzi na mwikubagirwa.” (Mt. 24:45, NWT) Hali amango oyo mushizi akarhuha obulongozi rhurhahugûsirwi bwinja. Kwa lwiganyo, rhwanahâbwa obulongozi okubiyerekire oku rhwakacirheganya lyo rhuyokoka buhanya bulebe rhurhanyize oku burhakaba omu eneo yirhu. Gurhi rhushinganine rhujire erhi rhwakarhanya oku obulongozi rhuhâbirwe burhali bwa bwenge? Rhanya okubiyerekire emyanzi rhwasomire omu Bibliya. Hali amango abakozi ba Nnâmahanga bahâbirwe obulongozi bubonekine nka burhali bwa bwenge omu masu ga bene bantu, cikone bwayokola obuzine bwabo.​—Bac. 7:7; 8:10. w22.03 buk. 18-19 cif. 15-16

N’obulangalire boshi, Yezu aderha enderho z’olwandiko lw’olusiku lw’ene. Yezu alimanyire oku Yehova ye wakamuhashisa okucibilama, analimanyire oku arhakamuyibagira. Bici ezo nderho za Yezu zakarhuyigiriza? Obe mubidu okuhira akalamo kawe omu maboko ga Yehova. Ly’ojira ntyo, oshinganine “oyegemere Nyamuzinda n’omurhima gwawe gwoshi.” (Mig. 3:5) Rhuganirire olwiganyo lwa Joshua, Muhamirizi muguma wa myaka 15, walilwazire endwala ndarhi. Alahira okubukwa n’amafumu gapingine n’Amarhegeko ga Nnâmahanga. Hisanzi hisungunu embere afê, abwira nnina ntya: “Nyama, ndi omu maboko ga Yehova. . . . Nkubwizire ntya n’obwalagale: Manyire oku ayishinfûla amango afûla abafîre. Anasome omu murhima gwani, ayishi oku mba muzigire.” Ngasi muguma muli rhwê anacidosagya ntya: ‘Erhi nakaja omu kanga kahira obuyemere bwani omu marhangulo, ka nanahira obuzine bwani omu maboko ga Yehova n’okulangalira oku arhakanyibagira?’ w21.04 buk. 12-13 cif. 15-16

Olubaga lwa Yehova lunahâbwe emisi kugerera omukolo gw’amahubiri. Erhi rhuganirira abandi okuli kw’Ebibliya, rhunaciyumve rhurhulirizibwe na kandi rhunabe n’emisi, abe barhuyumvirhizize erhi nanga. Enyanya z’akanga balimo, baguma na baguma banaciyumva oku barhacigwerhi obulyo b’okujira binji omu mukolo gw’amahubiri. Akaba ntyo k’okola okaciyumva, okengere oku Yehova anashagaluke erhi ojira oku wakanahasha koshi kupatine n’akanga kawe. Yehova anabone n’okushagalukira irala lirhu ly’okuhubiri, ciru akaba birhakahashikana okurhenga aha ka. Yehova anarhuha obulyo bw’okuhubiri omuntu oli warhushibirira erhi munganga wirhu. Erhi rhwakakashushanya omukolo rhuli rhwajira muli gano mango n’ogu rhwakagijira omu mango gageraga, rhwanavunika omurhima. Cikone erhi rhwakahugûkwa kunganaci Yehova ali arhurhabala ene, rhwanaba n’emisi rhulagirireko lyo rhulembera n’omwishingo ngasi mazibu rhwakaba rhulimo. Omu mburho y’okuli rhurhwera, rhurhamanya mburho ehi yakamera n’okurhondera kwakula.​—Muh. 11:6. w21.05 buk. 24-25 cif. 14-17

Irala ly’okuba na binji lyarhuma Mwami Daudi ayibagira ebi Yehova ali amamuha; nk’obuhirhi, okumanyikana, n’okuhima bashombanyi bage banji. Daudi alimanyire n’obwalagale oku engalo za Nnamahanga ziba “nyinji bwenene zirhakahashiganirwa!” (Enna. 40:5, NWT) Cikone kasanzi kaguma, Daudi ahikira aha ayibagira ebi Yehova amuhâga byoshi. Ciru akaba Daudi agwerhe bakazi banji, aleka omurhima gwage gwajamw’irala lirhalusire olugero lugenda mukabene. Oyo mukazi ye wali Betisheba, muka Uriya w’omu bûko bw’Abahiti. Okucizigira yenene kwashumya Daudi ajire obugonyi na Betisheba, anahikira aha aba izimi. Eco cijiro Daudi ajiraga cali cibi cikone acibiyushûla kw’ecindi; arheganya oku Uriya ayishiyirhwamo! (2 Sam. 11:2-15.) Gurhi Daudi akagirhanya? K’akagirhanya oku Yehova arhamubwine? Oyu mukozi mwishwekerezi wa Yehova ayemera irala ly’okuba na binji n’okucizigira yenene bimuje omu murhima gwage, na ntyo byamulerhera nyamanja. Akantu kw’okushagalula, kuli kubona oku enyuma z’aho, Daudi ayemera amagosa gage anaciyunjuza. Ashagaluka bwenene okucibiyemerwa na Yehova!​—2 Sam. 12:7-13. w21.06 buk. 17 cif. 10

Rhwanarhanya mpu nta buhashe rhugwerhe b’okulongoza ifunzo ly’Ebibliya. Nkaba rhwanarhanya mpu bihûnyire rhube na bumanye bunji erhi buhashe bunji embere rhulongoze ifunzo na muntu mulebe. Akaba ntyo k’ociyumva, ololage bintu bisharhu byakakuyemeza oku wanahashiyiga Ebibliya na muntu mulebe. Burhangiriza, Yehova anakubone oku ogwerhe obuhashe bw’okuyigiriza abandi. Bwakabirhi, Yezu wahâbagwa “obuhashe bwoshi bw’omu mpingu n’obw’igulu,” akurhegesire oku oyigirize abandi. (Mt. 28:18) Na bwakasharhu, wanalangalira oku abandi banakurhabala. Yezu akagiyigiriza ebi Ishe alimubwizire oku aderhe, na nawe wanakajira ntyo. (Yn. 8:28; 12:49) Na kandi, wanabwira omwangalizi w’ecikundi cinyu c’amahubiri, erhi painiya kandi erhi muhubiri ogwerhe obulenga akurhabale ohash’irhondeza ifunzo onalilongoze. Wanakalusa abo bahubiri oku mafunzo gabo lyo nawe oba mwalimu mwinja. w21.07 buk. 5 cif. 12

Oku obuzinda bw’er’igulu bugendekire bwayegerera, rhulagirire oku kulangalira enjira ya Yehova y’okujira ebintu kulusha agandi mango goshi. Bulya gurhi? Bulya omu kasanzi k’amalibuko madârhi, nkaba rhwayish’ikahâbwa obulongozi bubonekine nka buhyahya, buzibu okurhumikira, erhi burhayumvikini. Kobinali, Yehova arhakakaganiza ngasi muguma wirhu. Nkaba ayish’ikahâna obulongozi kugerera abalume ahizireho lyo bakarhulongoza. Karhayishibe kasanzi k’okuba n’akarhinda kuyerekera obo bulongozi omu kucidosa ntya: ‘Ka kobinali emwa Yehova obu bulongozi burhenzire, erhi bene wirhu bali barhulongoza bone bacitungire bo?’ Gurhi wanajire muli ako kasanzi kazibu kanahikire bene bantu? Oku obona obulongozi bw’ikubuliro lya Yehova ene, ko kwakakurhabala obone ishuzo kw’ago madoso. Erhi akaba onalangalire obulongozi rhuli rhwahâbwa ene, onanabe mubidu okuburhumikira, kobinali wayish’ijira ntyo omu kasanzi k’amalibuko madârhi. w22.02 buk. 6 cif. 15

Yehova ahashisa Gideoni na balume 300 bali boshi okuhima abashombanyi babo n’obo buhimi bwakarhumire baciyumva oku bali ba bulagirire bwenene. Bene Efrayimu bajibona Gideoni, barhayishaga mpu lyo bamuvuga omunkwa kw’ebyo anajijire cikone bamulongoza bwenene bulya arhabalalikaga aha murhondero oku bacilunge haguma naye omw’ivita. (Bac. 8:1) Gideoni abaha olwiganyo luyerekine n’obwalagale gurhi Yehova anabagishire. Erhi bene Efrayimu bayumva ntyo “oburhe [bwabo] bwatwika.” (Bac. 8:3) Gideoni n’obulonza bwinja aleka okucibona oku ali wabulagirire bwenene ly’agendekeza omurhula egarhi k’olubaga lwa Nnamahanga. Olwiganyo lwa bene Efrayimu lurhuyigirizize oku rhurhashinganini rhukasegeza obwenge okw’irenge rhwakahâbwa cikone rhwanabusegeza okw’irenge Yehova akahâbwa. Akaba rhuli birhwe bya mulala erhi bagula omu cigamba, rhwanaciyigiriza binji kugerera olwiganyo lwa Gideoni. Erhi muntu mulebe akagaya enyanya z’ebi rhwajiraga, rhwanaciseza rhuhugûkwe bulya gurhi agayire. Na kandi rhwanavuga oyo muntu omunkwa oku bintu binja anajiraga. Lyo rhuhashijira ntyo byanahûna rhube birhohye. Cikone omurhula gwo g’obulagirire bwenene kulusha okuyerekanana oku rhwe rhugwerhe ehaki. w21.07 buk. 16-17 cif. 10-12

Yehova arhuhire olukengwa erhi arhulema oku nshusho yage. Bulya rhwalemirwe oku nshusho ya Nnâmahanga, rhwanaba na morhere manji gali nk’agage n’okugayerekana, kwa lwiganyo, obuzigire, obonjo, obwishwekerezi n’obushinganyanya. (Enna. 86:15; 145:17) Erhi rhuyerekana ago morhere, rhunahe Yehova irenge n’okuyerekana oku rhumuvuzire omunkwa. (1 Pt. 1:14-16) Erhi rhucigendesa omu njira esimisize Larha wirhu w’omu mpingu, rhunabe n’omwishingo n’okurhimûkwa. N’erhi Yehova arhulema oku nshusho yage, arhuhâ obuhashe bw’okuba bantu alonzize babe baguma b’omu mulala gwage. Yehova arhujirira ahantu hago-hago h’okulama. Embere Yehova aleme omuntu, arhang’irheganyiza bene bantu igulu balamamo. (Ayu. 38:4-6; Yer. 10:12) Bulya aba mwinja anaba muhânyi, Yehova arhurheganyigiza bintu binji binja lyo rhubishagalukira. (Enna. 104:14, 15, 24) Mango maguma arhanya kw’ebi alemire, na buzinda “abona oku binali binja.”​—Murh. 1:10, 12, 31. w21.08 buk. 3 cif. 5-6

Rhweshi rhugwerhe omukolo gw’okuhubiri n’okujira abanafunzi. (Mt. 28:19, 20; Rm. 10:14) K’olonzize okubûle obuhashe bwawe mw’ogo mukolo gw’obulagirire? Ocihirireho omuhigo g’okuciyigiriza ebroshuwa Kufundisha. Amango oli wacihiriraho emihigo wahikira, orhayibagiraga ogu muhigo gw’obulagirire bwenene: Okuba n’amorhere g’Ecikristu. (Kl. 3:12; 2 Pt. 1:5-8) Buzira karhinda, rhweshi rhuba rhulonzize rhujire binji omu mukolo gwa Yehova kulusha ebi rhuli rhwajira ene. Omw’igulu lihyahya lya Nnâmahanga, rhwayishiba n’obuhashe bw’okukolera Yehova akasanzi koshi. Omu kulinda ago mango, rhukolese obulyo rhwakaba nabo boshi lyo rhuyushûla omwishingo gwirhu n’okunyihya entanya z’okuvunika omurhima. N’ok’obulagirire bwenene, rhwanalerhera Yehova olukengwa n’irenge, “Nnâmahanga [wirhu] w’obushagaluke.” (1 Tm. 1:11, NWT) Lekagi rhweshi rhube n’omwishingo omu mikolo rhugwerhe! w21.08 buk. 25 cif. 18-20

Erhi akaba ababusi bawe baba Bahamirizi ba Yehova, byanahashikana erhi wayigirizibagwa okubiyerekire Yehova kurhenga oli mwana murho. Bakuyigiriza oku yeba Mulemi, oku ajira amorhere minja bwenene n’oku ajira omuhigo mwinja gw’obuzigire kuyerekera bene bantu. (Murh. 1:1; Ebj. 17:24-27) Cikone bantu banji barhayemera oku ho Nnâmahanga aba, ciru barhanayemera oku yeba Mulemi. Babà bayemire oku obuzine bwayisha bwahinduka bunyi-bunyi kuhika bwahikira aha bwaba buzine buyenire. Baguma baguma ba muli abo bantu babà basomire bwenene. Banaderha mpu esiyanse yayerekine oku Ebibliya erhaba edesire okuli n’oku abantu barhamanyiri kantu, abarhagwerhi bwenge, n’abakarhebwa duba-duba bo babà bayemire oku haba Omulemi. Rhube rhukola rhugwerhe myaka minji rhuli Bahamirizi ba Yehova erhi rhuciri bahyahya, rhweshi rhushinganine rhugendekere rhwazibuhya obuyemere bwirhu. Erhi rhwakakajira ntyo, rhurhakacirhebwa “n’obwenguza bw’efilozofiya y’obunywesi” eyigirizibwa n’abantu bakalahira ebi Akanwa ka Nnâmahanga kadesire.​—Kl. 2:8. w21.08 buk. 14 cif. 1-3

Abeli, Nuhu, Abrahamu, na Ayubu bayerekine oku bal’ikenzire Yehova banal’imuzigire kugerera oku kurhumikira kwabo, obuyemere bwabo, n’enterekêro zabo. Bajijire okwabo koshi lyo baha Yehova obukuze ananayemera enterekêro yabo. Buzinda, Yehova aha iburha lya Abrahamu Irhegeko lya Musa. Er’Irhegeko lya Musa lyalimo marhegeko manji galihânyire amahano gaganirire enterekêro Yehova akag’iyemera. Enyuma z’okufâ n’okufûka kwa Yezu, Yehova arhacigendekeraga ahûna abantu oku barhumikire Irhegeko lya Musa. (Rm. 10:4) Abakristu balishinganine barhondere okurhumikira irhegeko lihyahya, k’okuderha, “irhegeko lya Kristu.” (Gl. 6:2) Bakarhumikire er’“irhegeko,” arhali omu kucishwekera oku liste y’ebyakajirwa n’ebirhakajirwa, ci omu kuyiga olwiganyo lwa Yezu n’okukulikira enyigirizo zage. Ene nalyo, Abakristu bali bajira okwabo koshi lyo bakulikira Kristu, omu kujira ntyo bali banashagalusa Yehova n’‘okubona irhamuko.’​—Mt. 11:29. w22.03 buk. 20-21 cif. 4-5

Yehova anayumvirhize abana bage. Ayumvirhize masala manji Omugala asaliraga amango ali hanw’igulu. Ayumvirhize amasala Yezu asaliraga amango akagirhola emihigo y’obulagirire, kwa lwiganyo amango acishogaga baganda bage 12. (Lk. 6:12, 13) Na kandi Yehova ayumvirhize isala Yezu asaliraga amango ali omu kanga kazibu. Embere bamugwarhe, Yezu ashenga Ishe bwenene lugenda ago marhangulo galikola gali hofi gamuhikire. Yehova ayumvirhiza isala lya Yezu na kandi amurhumira malahika ly’amuzibuhya. (Lk. 22:41-44) Ene, Yehova agendekire ayumvirhiza amasala g’abakozi bage, ananagashuze omu kasanzi kakwanine n’omu njira nyinja yakanahashikana. (Enna. 116:1, 2) Rhulole gurhi mwali wirhu muguma w’omu Inde acibwinîre ntyo. Akagilwisa akanga k’ociyumva kubi bwenene n’okuyumva oboba, anasalira Yehova bwenene enyanya z’ako kanga alimwo. Ayandisire ntya: “Omwanzi gwali omu programe y’e JW Télédiffusion y’Omwezi gwa 5, 2019 gwaliganirire gurhi omuntu akahagalika akanga k’okuciyumva kubi n’okuyumva oboba, n’ogo mwanzi gwantabala bwenene. Lyali ishuzo oku masala gani.” w21.09 buk. 21-22 cif. 6-7

Ka wanarhanya kunganaci byal’ibizibu kuli abo Bakristu b’omu myaka igana mirhanzi okuleka ngasi byoshi bagwerhe n’okucib’irhondera akalamo buhyahya? Bal’ilagirire okuba n’obuyemere muli Yehova n’okulangalira oku abahikirigiza amalagirire gabo g’omusingi. Cikone hali ebyakabarhabire. Myaka irhanu embere Abaroma bazunguluke olugo lw’e Yeruzalemu, entumwa Paolo yaha Abahabraniya aga mahano g’obulagirire: “Mumanye okusîma ensaranga kwankamurhambula omu kalamo kinyu, murhimukwe n’ebi mugwerhe. Bulya adesire ntya: ‘Ntakakuleka, ntakanakulikirira.’ Co cirhumire rhwanahash’iderha n’oburhwali nti: ‘Yehova ye murhabazi wani; ntaco nankayoboha. Gurhi omuntu akanjira?’” (Hb. 13:5, 6, NWT) Buzira karhinda abarhumikire ihano Paolo ahânaga embere Abaroma barhere Yeruzalemu babwine oku biri bilembu okulama akalamo karhahûnyiri binji omu nyumpa zabo mpyahya. Bal’iyemire oku Nnâmahanga abahikirigiza amalagirire gabo g’omusingi. w22.01 buk. 4 cif. 7, 9

Erhi rhurhanya okubiyerekire omuntu w’olukogo, rhunabone omu bwenge bwirhu omuntu mwinja, wa kushagaluka, wa bwonjo na muhânyi. Nkaba rhwanakengera ho n’aho omwanzi gw’Omusamariya Yezu aganiriraga. Oyo mulume w’omu lind’ishanja ‘afa lukogo’ Omuyahudi wagwaga omu maboko g’ebishumusi. Oyo Musamariya ‘amufa lukogo’ anarhôla emipango y’obuzigire y’oku oyo Muyahudi abukwamo. (Lk. 10:29-37) Olo lwiganyo lusegize oborhere bwinja bwa Nnâmahanga wirhu: olukogo. Obo borhere ciba cigabi c’obuzigire bwa Nnâmahanga, ngasi mango anabuyerekane kugerera oku arhukolera. Haba eyindi njira olukogo luyerekanwamo yakayisha omu bukengere. Kuli kurhacihâ obuhane amango hali ecirhumire c’okujira ntyo. Kobinali muli eyo njira, Yehova arhuyeresire olukogo. Nk’oku mwandisi muguma w’olulanga adesire, “arharhujirira kungana ebyaha birhu.” (Enna. 103:10) Cikone hali agandi mango Yehova ahana buzibu-zibu omuntu wajijire ecaha cizibu. w21.10 buk. 8 cif. 1-2

Yehova anayerekane obuzigire bwage bwishwekerezi kuli bala bayemera okujira obwîra bwa hofi-hofi haguma naye, k’okuderha abakozi bage. Oko kubonekine kugerera ebi Mwami Daudi n’omulebi Daniyeli baderhaga. Kwa lwiganyo, Daudi aderha ntya: “Ogendekere wayerekana obuzigire bwawe bwishwekerezi kuli bala bakuyishi.” “Obuzigire bwishwekerezi bwa Yehova buba bw’emyaka n’emyaka yoshi kuli bala bamuyoboha.” Na Daniyeli aderha ntya: “Yagirwa Yehova Nnâmahanga w’okuli, [o]yerekana obuzigire bwishwekerezi kuli bala bamuzigira n’okukenga amarhegeko gage.” (Enna. 36:10; 103:17; Dan. 9:4, NWT) Nk’oku biyerekinwe mw’ezo nderho zalongozibagwa n’iroho lya Nnâmahanga, Yehova anayerekane obuzigire bwishwekerezi oku bakozi bage bulya bamumanyire, bamuyobohire, bamuzigire, banakenzire amarhegeko gage. Yehova anayerekane obuzigire bwage bwishwekerezi oku bantu bamuharamya omu njira y’okuli bone. Embere rhurhondere okukolera Yehova, rhunayeresibwe obuzigire Nnâmahanga ayereka abantu boshi. (Enna. 104:14) Cikone kandi rhuli bakozi bage, rhunayunguke n’obuzigire bwage bwishwekerezi. w21.11 buk. 3-4 cif. 8-9

Ciru byakaba gurhi, rhuba rhuhizire okurhumikira enderho za Yezu. Ene, bantu banji banayumvirhize enyigirizo z’abakulu banji b’amabîni. Banasimirize bwenene abo balimu ciru obone bamahikira aha babaharamya. Abantu banayinjihirize amakanisa gabo, babagulire ebitabu, bahâne n’entûlo mpu lyo balunga abakulu b’amadîni okuboko. Bantu baguma na baguma banayemereze ngasi kantu kadesirwe n’abo bakulu b’amadîni. Rhurhamanyiri erhi banashagalukira Yezu ntyo erhi yenene akababonekera. Lubero n’ago madîni, abaharamya Nnâmahanga omu njira y’okuli barhajira abakulu b’idîni. Ciru akaba rhunakenge abarhulongoza, rhunayemere nyigirizo za Yezu zidesire ntya: “Muli baguma mweshi.” (Mt. 23:8-10) Rhurhaharamya muntu yeshi-yeshi, ciru akaba mukulu w’idîni erhi wa politike. Rhurhanalunga ebyabo okuboko. Lubero n’oko, rhurhacihira omu by’epolitike rhurhanaba cigabi c’er’igulu. Muli ezo njira rhuba lubero n’ebindi bikundi by’abantu baciderha mpu bali Bakristu.​—Yn. 18:36. w21.10 buk. 20 cif. 6-7

Ngasi Mukristu olonzize abe mutagatifu arhashinganini eyemerere muntu mulebe erhi kantu kalebe kabe ka bulagirire kulusha obwîra ajira haguma na Nnâmahanga wage. Na bulya rhunakahamagalwa Bahamirizi ba Yehova rhunajire okwirhu koshi lyo rhuyaka akantu kakajaciza erhi kuzinza er’izino litagatifu. (Lev. 19:12; Iz. 57:15) Aba Israheli bakagiyerekana oku Yehova ye Nnâmahanga wabo omu kurhumikira amarhegeko manji. Olwandiko lwa Bene-Levi 18:4, NWT, ludesire ntya: “Mushinganine muhikirize emihigo yani y’okutwa olubanja, munashinganine mukenge n’okukulikira amarhegeko gani. Niono nie Yehova Nnâmahanga winyu.” Ecigabi ca 19 cirimo “marhegeko” maguma na maguma Nnâmahanga alihire aba Israheli. Kwa lwiganyo, omulongo gwa 5-8, 21, 22 guganirire okuhâna ensimba nterekêro. Oko kwalishinganine kukajirwa omu njira ‘erhakazinzize akantu katagatifu ka Yehova.’ Okusoma eyo milongo kwanarhushumya rhulonze okushagalusa Yehova n’okumuha enterekêro y’obukuze, nk’oku olwandiko lw’Abahabraniya 13:15, lurhubwizire rhujire. w21.12 buk. 5-6 cif. 14-15

Abazindigija omu buhya banayunguka n’ebyabwinwe by’abandi bantu baciyigirizize okulangalira Yehova. Barhôline baguma na baguma banaba erhi bagezize myaka minji bali omu mukolo gw’akasanzi koshi. Bulya gurhi orhakabadosa amahano erhi akaba oli warhanya lugenda emihigo yawe? Eyo eri njira wakayerekanamwo oku olangalire Yehova. (Mig. 22:17, 19) Okengere oku obuhya eba nshokano erhenga emwa Yehova. (Mt. 19:5, 6) Aba alonzize abarhôline bashagalukire eyo nshokano. Mwe mwacizindigija omu buhya, bulya gurhi murhakalola gurhi muli mwakolesa akalamo kinyu? Ka muli mwajira okwinyu koshi lyo muyereka Yehova kunganaci mushagalukire eyo nshokano amuhîre? Mukaganiza Yehova kugerera isala. Mukalonza amakanuni omu Kanwa ka Nnâmahanga galinganine n’akanga mulimo. Buzinda mucishoge okukolesa amahano Yehova amuhire. Mwanayemera n’obwalagale oku mwanaba n’omwishingo erhi mwakasegeza akalamo kinyu oku mukolo gwa Yehova! w21.11 buk. 19 cif. 16, 18

Yakobo agwerhe entanya nyinja kuciyerekera. Yakobo arhakagirhanya oku omulala akuliragamwo erhi omukolo agwerhe gumujijire abe wago-wago erhi kumujira abe wa bulagirire bwenene kulusha bene wabo na bali babo. Ahamagala ababo bemezi “bene [wabo] bazigirwa.” (Yk. 1:16, 19; 2:5) Arhalonzagya okuhâna entanya z’okuyerekana nk’ali mwimana. Isomo lici rhukuzire aho: Rhukengere oku rhweshi rhuba banyabyaha. Rhurhashinganini rhukabona oku rhuli enyanya z’aba rhuli rhwayigiriza. Bulya gurhi? Erhi rhwakaha omwanafunzi wirhu w’Ebibliya entanya z’okubona nka rhwehe rhurhajira magosa, anahikira aha arhanya mpu arhakahash’irhumikira amarhegeko ga Nnâmahanga. Erhi rhwakayemera n’obwirhohye oku ngasi mango kurhaba kulembu okukulikira amakanuni g’Ebibliya n’okuhugûla gurhi Yehova arhurhabire rhuhime amazibu girhu, ntyo rhwanarhabala omwanafunzi abone oku naye anahash’ikolera Yehova. w22.01 buk. 11-12 cif. 13-14

Oku rhwagendekera rhwarhanya aka Yezu, ko rhwanagendekera rhwajira ebintu akage, ko rhwanagendekera rhwahasha okuyerekana obumuntu bwage. (Hb. 1:3) Nkaba rhwanarhanya ntya: ‘Yezu aba mwimana. Nta lusiku nakaba akage!’ Erhi akaba ntyo k’orhanya, okengere ebi bintu. Burhangiriza, walemirwe n’obuhashe bw’okuyerekana amorhere ga Yehova n’aga Yezu. Co cirhumire wanacishoga okubayiga, na kandi, wanahasha okujira ntyo kwa lugero. (Murh. 1:26) Bwakabirhi, iroho litagatifu lya Nnâmahanga yo misi ejira obuhashe kulusha eyindi misi yoshi. Kugerera oburhabale bwalyo, wanajira ebintu orhakahash’irijira oku bushashe bwawe wene. Bwakasharhu, ene, Yehova arharhuhûnyiri mpu rhuyerekane ilehe ly’iroho litagatifu n’obwimana. Larha wirhu w’obuzigire arheganyîze abajira obulangalire bw’okuy’ishilama hanw’igulu myaka 1 000 lyo bayish’ihikira aha baba bimana. (Maf. 20:1-3) Ebi Yehova arhuhûnyire ene, kuli kujira okwirhu koshi lyo rhuyerekana ilehe ly’iroho litagatifu n’okulangalira oburhabale bwage. w22.03 buk. 9 cif. 5-6

Isala lyone rhwakakolesa lyo rhuzibuhya obwîra bwirhu haguma na Yehova. Okuyiga Akanwa ka Nnâmahanga n’okuja oku ntimanano nabyo byanarhurhabala rhuyegere Nnâmahanga. Ka hali akandi kantu wakajira ly’okolesa bwinja akasanzi kawe k’okuyiga n’akasanzi ogeza omu ntimanano y’ecigamba? Ocidose ntya: ‘Bici birhuma nabula busegeza obwenge bwani oku ntimanano erhi amango nalonza okuyiga?’ Ka nkaba bulya banakakuhamagala, kukurhumira amaruba, erhi mesaje omu telefone yawe erhi omu cindi combo c’ecielektroniki? Wanashenga Yehova akurhabale erhi wakabona oku obwenge bwawe burhasêziri kw’ebi oli wayiga amango g’ifunzo lyawe erhi amango oli omu ntimanano. Erhi akaba nkaba kurhaba kulembu okuleka okurhanya oku mazibu gawe, cikone kuba kwa bulagirire okujira ntyo. Oshenge Nnâmahanga omurhula gwage gurhakalanga omurhima gone ci “n’obukengere” bwawe.​—Fl. 4:6, 7. w22.01 buk. 28-30 cif. 12-14

Mwami Uziya alahira ihano. Aja omu hekalu ya Yehova ahantu abakuhani bone bal’iyemerirwe okuja, analonza okuyoca obukû. Abakuhani ba Yehova bamubwira ntya: “Gurhali mukolo gwawe wani Uziya okuyokera Yehova obukû! Bakuhani bone bashinganine bayoce obukû.” Gurhi Uziya ajijire? Nkaba Yehova akamubabalire aciyumvagya er’ihano, n’okurhenga omu hekalu ho n’aho. Lubero n’oko, “Uziya . . . agwarhwa n’oburhe.” Bulya gurhi arhayemeraga er’ihano? Akagirhanya oku ye nka mwami, ashinganine ajire ebi alonzize. Cikone oko kurhashagalulaga Yehova. N’enyanya z’eco cijiro ca Uziya c’obuhalanjisi, olushomyo lwamugwarha anagendekera aba “mushomyo kuhika oku lusiku lw’okufâ kwage.” (2 Nga. 26:16-21, NWT) Olwiganyo lwa Uziya lurhuyigirizize oku, ciru akaba rhugwerhe mukolo mulebe omw’ikubuliro lya Yehova, erhi rhwakalahira ihano liyimangire oku Bibliya rhurhakaciyemerwa naye. w22.02 buk. 9 cif. 7

Omuntu oli walongozibwa n’“obumuntu bwa mîra,” kanji-kanji anakarhanya n’okujira ebintu omu njira yʼomubiri. (Kl. 3:9) Anaba wa kucikaliza, wa kugaya duba, wa kurhavuga omunkwa, na wa bucibone. Anashagalukire okulola eby’epornografi, amafilme galimo olugenzi lw’eby’enshonyi n’eby’obuminya. Buzira karhinda, anaba agwerhe morhere maguma na maguma minja, ananacitumuza lugenda ebintu bibi anadesire erhi ebi anajijire. Cikone arhagwerhi obulonza bwinja bw’okujira empindûlo omu ntanya n’omu lugenzi lwage. (Gl. 5:19-21; 2 Tm. 3:2-5) Bulya rhurhaba bimana, ntaye wa muli rhwe wakahasha okukûla loshi-loshi entanya n’irala libi lyoshi omu murhima n’omu bukengere bwage. Hali amango rhwakajira erhi kuderha akantu karhuma rhwaciyunjuza. (Yer. 17:9; Yk. 3:2) Cikone erhi rhuhogola obumuntu bwa mîra, entanya n’ebijiro by’omubiri birhacigendekera byarhurhegeka. Rhwanashanja oku rhwal’iyosire.​—Iz. 55:7. w22.03 buk. 3 cif. 4-5

Mwe bagula, mukasegeza obwenge bwinyu oku morhere minja ga bene winyu na bali binyu. Ngasi muguma mulibo arhaba mwimana; cikone, ajira amorhere minja rhwakashagalukira. Kobinali, mango oku gandi byanahûna abagula bahanûle mwene wirhu erhi mwali wirhu. Cikone ak’entumwa Paolo, abagula barhashinganini bakasegeza obwenge bwabo oku nderho erhi oku bijiro by’okugayisa by’oyo muntu bahanûlaga. Lubero n’oko, kwanaba kwinja erhi bakakasegeza obwenge bwabo oku buzigire oyo muntu ajira kuli Yehova, oku bulembêdu bwage omu mukolo gwa Nnâmahanga, n’oku bintu binja akahash’ijira omu mango gayisha. Abagula basegeza obwenge bwabo oku morhere minja g’abandi, banarhabale bene wabo na bali babo baciyumve bazigirwe na ngasi muntu omu cigamba. Mukakengera oku Yehova arhaba amuhûnyire mube bimana, aba amuhûnyire mube bishwekerezi. (1 Kr. 4:2) Mwanayemera n’obwalagale oku ninyu, Nnâmahanga anashagalukire ebi mujira omu mukolo gwage. Yehova ‘arhakayibagira ebijiro binyu n’obuzigire mwàyerekîne oku izino lyage, bulya mwàkolire abatagatifu, munacidwirhe mwakujira.’​—Hb. 6:10. w22.03 buk. 30 cif. 19, buk. 31 cif. 21