Mwezi gwa 1

Bici byarhumire Yehova akolesa Timoteyo bwenene? Amukolesize bwenene, enyanya z’amorhere gage minja g’Ecikristu. (Fl. 2:19-22) Ebi entumwa Paolo ayandikaga okubiyerekire Timoteyo, biyerekine oku ali mwirhohye, mwishwekerezi, wa bushiru, na mwikubagirwa. Akag’ishibirira bene wabo na bali babo bwenene. Oko kwarhuma Paolo azigira Timoteyo, arhanarhindiraga okumuha emikolo mizibu omw’ikubuliro lya Yehova. Nirhu, erhi rhwakaba n’amorhere Yehova azigira, anarhuzigira bwenene, rhwananakolesibwa omu cigamba bwenene. (Enna. 25:9; 138:6) Co cirhumire orhanye kugerera isala cigabi cihi c’obumuntu bwawe oshinganine okubûle. Ocishoge borhere buhi wakalonza okujiramwo amajambere bwenene. Ka wanalonza okuba wa bwonjo bunji? Ka bikuhûnyire okuba wa kujira omurhûla na wa kubabalira bwenene? Wanabona oku kuli kwinja okudosa omwîra wawe ocikubagira ly’akuyeresa enjira wakajiramwo amajambere.—Mig. 27:6. w22.04 buk. 23 cif. 4-5

Yehova aba alonzize rhube n’omwishingo. Rhumanyire ntyo bulya omwishingo ciba ciguma c’omu bigabi by’ilehe ly’iroho lyage litagatifu. (Gl. 5:22) Bulya haba bushagaluke bunji omu kuhâna kulusha omu kuhâbwa, rhunabe n’omwishingo munji erhi rhucihâna omu mukolo gw’Ecikristu n’erhi rhurhabala bene wirhu omu njira ziri lubero. (Ebj. 20:35) Nk’oku biyerekinwe omu lwandiko lw’olusiku lw’ene, entumwa Paolo eganirire bintu bibirhi byakarhurhabala rhugendekere rhwaba n’omwishingo. Burhangiriza, omuhigo rhushinganine rhube nago kuli kuha Yehova ebintu birhu binja. Erhi rhwakakamuha ebintu birhu binja rhwanaba n’obushagaluke. (Mt. 22:36-38) Bwakabirhi, rhushinganine rhuyake okukacigerera oku bandi. Rhube rhwanahash’ihikiriza bintu binji erhi bisungunu omu mukolo gwa Yehova enyanya z’amagala girhu, amasomo girhu, erhi buhashe bwirhu bwʼakaburhano, rhushinganine rhukamuvuga omunkwa. Omu yindi njira, erhi abandi bakaba na malehe manji omu bigabi bilebe by’omukolo gw’amahubiri kurhulusha, rhushinganine rhushagaluke bwenene bulya bali bakolesa enshokano yabo lyo bakuza Yehova. w22.04 buk. 10 cif. 1-2

Okusherezibwa kwa Babiloni Mukulu buzira kulaliza kwayish’isomeza igulu lyoshi. (Maf. 18:8-10) Okusherezibwa kwa Babiloni Mukulu kwayish’idundaganya igulu lyoshi nkaba kwayish’ilerha n’amazibu, cikone abakozi ba Nnâmahanga bayish’iba na bintu bibirhi byayish’irhuma baba n’omwishingo. Oyo mushombanyi wa Yehova wa kurhenga mîra arhakacihaba bundi, n’obucunguzi bwirhu bwayish’iba buli hofi bwenene! Daniyeli alebire oku “obumanye bw’okunali bwakabire bunji bwenene.” Na ntyo ko byanabire! Rhuli rhwahugûkwa obulebi lugenda gano mango girhu. (Dan. 12:4, 9, 10, NWT) Okuhikirira kw’obo bulebi buzira magosa, kuli kwarhuma rhwakenga Yehova bwenene n’Akanwa kage kalongozibagwa n’iroho. (Iz. 46:10; 55:11) Co cirhumire, ogendekere waseza obuyemere bwawe omu kuyiga Ebibliya n’obushiru n’omu kurhabala abandi bajire obwîra bwinja haguma na Yehova. Ayish’ilanga abamulangalira loshi-loshi n’okubaha “omurhûla [gw’ensiku zoshi].”—Iz. 26:3. w22.07 buk. 7 cif. 16-17

Ecitabu c’Amafulûlo ciyerekine oku Obwami bwa Nnâmahanga bwashimisirwe n’oku Shetani alibisirweko empingu. (Maf. 12:1-9) Oko kulibirhako Shetani kwalerha omurhûla omu mpingu, cikone kwarhulerhera mazibu manji. Bulya gurhi? Bulya Shetani agwerhe obukunizi oku bantu bali hanw’igulu bali bakolera Yehova n’obwishwekerezi. (Maf. 12:12, 15, 17) Gurhi rhwakabêramwo bishwekerezi kuli Nnâmahanga ciru akaba Shetani ali arhuhirako ecirhero? (Maf. 13:10) Kantu kaguma kakarhurhabala kuli kumanya ebyaba omu mango gayisha. Kwa lwiganyo, omu citabu c’Amafulûlo entumwa Yowane eganirire migisho miguma na miguma rhwashagalukira hano hofi-hofi. Egarhi k’eyo migisho muli okuhererekezibwa kw’abashombanyi ba Nnâmahanga. Omulongo murhanzi gw’ecitabu c’Amafulûlo gurhubwizire oku emyanzi rhuli rhwasoma yahânagwa omu njira “y’ebimanyiso,” ko kuderha, omu nderho z’olwiganyo.—Maf. 1:1, NWT. w22.05 buk. 8 cif. 1-3

Okubona abakozi ba Yehova bayish’igendekera babêra bishwekerezi kuli ye, abamuhagalika bayish’igaya bwenene. Oko kwayish’irhuma omulungano gw’amashanja gwayish’ihîra abakozi ba Nnâmahanga b’omw’igulu lyoshi kw’ecirhero. Eco cirhero bayish’ihîra kw’abakozi ba Nnâmahanga co Ebibliya eba ehamagire cirhero ca Gogi wa Magogi. (Eze. 38:14, 15) Gurhi Yehova ayish’ijira ago mango bahira abakozi bage kw’ecirhero? Arhubwizire ntya: “Oburhe bwananyisha emalanga.” (Eze. 38:18, 21-23) Ecitabu c’Amafulûlo cigabi ca 19, ciganirire ebyayish’iba enyuma z’aho. Yehova anarhume Omugala ly’alanga abakozi bage n’okubulabuza abashombanyi bage. Yezu ayish’iba ali haguma n’“emirhwe y’abalwi b’omu malunga,” ko kuderha, bamalahika bishwekerezi na balya 144 000. (Maf. 17:14; 19:11-15) Gurhi er’ivita lyanahwe? Okuhererekezibwa kw’abantu boshi na ngasi ikubuliro lyoshi lihagalika Yehova!—Maf. 19:19-21. w22.05 buk. 17 cif. 9-10

Erhi Adamu na Eva bayus’ijira ecaha, Yehova aha iburha lyabo obulangalire kugerera bulebi buguma bw’obulagirire. Ebi adesire biri omu lwandiko lw’Omurhondêro 3:15: ‘Nahira obushombanyi ekarhî kawe n’omukazi, ekarhi k’iburha lyawe n’ekarhi k’iburha ly’omukazi. Walonza okumulumira oku kasinsira naye mpu akulabarhire oku igosi.’ Obo bulebi buli omu citabu cirhanzi c’Ebibliya. Cikone omu njira nguma erhi yindi, ebindi bitabu byoshi by’Ebibliya biba bipatine n’obo bulebi. Nka kula ecibambiro c’ecitabu cihumanya haguma orhuratasi rhoshi, enderho ziri omu lwandiko lw’Omurhondêro 3:15 zinahumanye haguma ebitabu byoshi by’Ebibliya lyo guba mwanzi muguma gone, ko kuderha oku hakabire Omucunguzi wayish’ishereza Shetani n’abantu babi boshi bamulunga okuboko. Oko kwayish’ilerhera abazigira Yehova boshi emigisho! Okuyiga Ebibliya kwarhurhabala rhubone gurhi obo bulebi buli bwahikirizibwamwo na gurhi rhuli rhwayunguka kugerera bo. w22.07 buk. 14 cif. 1-3

Mukahûna Yehova amuhe obwenge mulagirireko lyo murhabala abana binyu bamuzigire. (Yk. 1:5) Yene Muntu oshinganine okuhâna amahano. Hali bintu binji byakarhuma rhwaderha ntyo. Rhuganirire bibirhi bya mulibyo. Burhangiriza, ye nka mubusi aba ahugûsirwe binji bwenene. (Enna. 36:9) Na bwa kabirhi, amahano g’obwenge ahâna ganalerhe obunguke ensiku zoshi. (Iz. 48:17) Kugerera Akanwa kage n’ikubuliro lyage, Yehova anahâne biryo binji by’ekiroho biyimangire oku Bibliya byakarhabala ababusi balere abana babo banabayigirize okuzigira Yehova. (Mt. 24:45) Kwa lwiganyo, mwanabona amahano mwakakolesa omu cigabi cidesire “Oburhabale oku Mulala,” ciri oku site yirhu y’e Enternete, embere eco cigabi cakag’icapwa omu gazeti Amuka!. Na kandi, oku jw.org kunaje mavideo manji g’enganîro haguma n’abantu n’emicezo yakarhabala ababusi bakolese amahano ga Yehova amango bali balera abana babo.—Mig. 2:4, 5. w22.05 buk. 27 cif. 4-5

Yehova ye babalira bwenene empingu n’igulu. Burhangiriza, ensiku zoshi aba mubidu okubabalira. Bwa kabirhi, aba amanyire ngasi kantu okubirhuyerekire. Aba amanyire bwinja-bwinja oborhere bwirhu na yene wakamanya erhi rhuciyunjuzize okunali. Na bwa kasharhu, erhi Yehova arhubabalira, anababalire loshi-loshi, binabonekane nka ciru rhurhajijire eco caha. Oko kunarhume rhwaba n’ezamiri ecîre n’okuyemerwa naye. Kobinali, rhwagendekera okujira ecaha bulya rhurhali bimana. Cikone, ebinwa biri omu citabu Étude perspicace des Écritures, Ibugu lya 2, bukurasa bwa 765, byanarhurhuliriza. Rhusomireho ntya: “Bulya enyanya z’obwonjo bwage, Yehova anabone obuzamba bw’abakozi bage, barhashinganini bagendekere bacitumuza okurhalusire olugero enyanya z’amagosa bajiraga erhi hali yabo y’okurhaba bimana bayimaga erhumire. (Enna. 103:8-14; 130:3) Erhi bakajira okwabo koshi lyo balambagira omu njira za Yehova, banaba n’omwishingo. (Fl. 4:4-6; 1 Yn. 3:19-22).” w22.06 buk. 7 cif. 18-19

Okuyoboha okuhagalikwa n’amarhegesi arhali yone njira Shetani akolesa. Bantu baguma na baguma banayobohe gurhi abantu b’omu mulala gwabo barhanya hano baba Bahamirizi ba Yehova. Hali amango bayoboha oko bwenene kulusha oku bayoboha okushurhwa. Baba bazigire bwenene abantu b’omu mulala gwabo banaba balonzize bahikire aha bamanya Yehova n’okumuzigira. Banaciyumve kubi erhi bayumva abantu b’omu mulala gwabo bali baderha kubi Nnâmahanga w’okuli n’abakozi bage. Cikone, omu hali nguma na nguma abantu b’omulala bakag’irhuhagalika embere, bahikire aha bayemera okuli. Cikone, gurhigi rhwakajira erhi abantu b’omu mulala gwirhu bakarhukaga enyanya z’obuyemere bwirhu buhyahya? Rhwanarhulirizibwa n’enderho nyinja ziri omu Ennanga 27:10. Erhi rhukengera kunganaci Yehova aba arhuzigire, rhurhayoboha ciru akaba rhuli rhwahagalikwa n’abantu b’omu mulala gwirhu. Kandi rhuba rhuyemire n’obwalagale oku anarhuhembe enyanya z’okulembera kwirhu. Yehova ashibirira bwinja bwenene amalagirire girhu g’omubiri, ag’ekandalala, n’ag’ekiroho kulusha oku omuntu yeshi-yeshi akajira! w22.06 buk. 16-17 cif. 11-13

Amango Yezu akag’ijira omukolo gwage hanw’igulu, bamushobesire bintu binji by’obunywesi, kwa lwiganyo, baderha oku ali mulalwe, mudambye, mukozi wa Shetani, arhakag’ikenga Esabato, ciru banaderha oku akag’ijacira Nnâmahanga. (Mt. 11:19; 26:65; Lk. 11:15; Yn. 9:16) Ciru akaba ntyo, Yezu arhashuzagya n’enderho z’obukali. Aka Yezu, rhurhashinganini rhukashuza omu kukolesa enderho mbi ciru bakarhukalihira. (1 Pt. 2:22, 23) Kobinali, okujira ntyo kurhali kulembu. (Yk. 3:2) Bici byakarhurhabala? Amango oli omu mukolo gw’amahubiri orhakag’igaya erhi omumvirhiza wawe akakubwira enderho mbi. Mwene wirhu muguma ohamagalwa Sam adesire ntya: “Nanjire okwani koshi lyo nsegeza obwenge bwani oku bulagirire bw’omumvirhiza bw’okuyumvirhiza okuli, n’oku mpindulo akahash’ijira omu kalamo kage.” Hali amango omumvirhiza wirhu akaliha mpu bulya rhwayishire omu kasanzi kabi. Amango rhwamarhimanana n’omuntu ogayire, rhwanajira isala lyofofi omu kuhûna Yehova arhurhabale rhugendekere rhwaba bantu barhuzize rhurhanaderhaga kantu koshi-koshi omu njira mbi erhi omu njira erhali ya bukenge. w22.04 buk. 6 cif. 8-9

Enjira y’obulagirire y’okurhabala abana bayegere Yehova kuli kuyiga Ebibliya haguma nabo. (2 Tm. 3:14-17) Cikone, Ebibliya eyerekine eyindi njira abana bakayigamwo lugenda Yehova. Omu citabu c’Emigani, bibonekine oku mulume muguma ali akengeza omugala oku arhahiraga akayibagira amorhere ga Yehova, gabonekana kugerera obulemi. (Mig. 3:19-21) Mwe babusi, bibonekine oku munashagalukire okugeza akasanzi embuga z’aha kâ haguma n’abana binyu. Mukakolesa ako kasanzi lyo murhabala abana binyu babone gurhi amorhere minja ga Yehova gabonekana kugerera ‘emikolo ajiraga.’ (Rm. 1:20) Lola gurhi Yezu akolesizemwo obulemi ly’ayigiriza. Mango maguma, ahûna abanafunzi bage balolereze bahungwe n’amauwa. (Lk. 12:24, 27-30.) Ayigiriza abanafunzi bage er’isomo linja bwenene lugenda gurhi Ishe w’omu mpingu aba muhanyi na wa lukogo: Yehova alisa n’okuyambika abakozi bage bishwekerezi nk’oku ajirira bahungwe n’amauwa. w23.03 buk. 20 cif. 1-4

Rhunavuge Yehova omunkwa okubona rhwanamuyegera omw’isala kugerera Omugala. Yehova anashuze oku masala girhu kugerera Yezu. Yehova anayumvirhize n’okushuza amasala rhusalira okw’izino lya Yezu ananarhubabalire ebyaha birhu kugerera engombôlo ya Yezu. (Rm. 5:1) Amandiko gayerekine oku Yezu ali “kuhani wirhu mukulu [otamire] ebwa kulyo kw’entebe y’Obukulu omu mpingu.” (Hb. 8:1, NWT) Yezu ye ‘mubulanyi [murhabazi] oba ho Larha.’ (1 Yn. 2:1, Mashi Bible) Rhuvuzire Yehova omunkwa bwenene okubona arhuhîre Omukuhani Mukulu w’obwonjo ohugûkwa obuzamba bwirhu n’‘okurhulagira’ emwa Larha! (Rm. 8:34; Hb. 4:15) Birhakahashikine kuli rhwe okuyegera Yehova kugerera isala buzira enterekêro ya Yezu. Kobinali, nkaba nawe wanayemera oku rhurhakabona enderho zishinganine z’okuvuga Yehova omunkwa enyanya z’eyo ngalo nyinja bwenene arhuhîre, ko kuderha obuzine bw’Omugala muzigirwa! w22.07 buk. 23 cif. 10-12

Omuntu w’okulangalirwa anajire okwage koshi ly’ahikiriza ebiragane byage na kandi anaderhe okuli. (Enna. 15:4) Abantu banamanye oku banacikubagira ye. Ntyo ko rhulonzize bene wirhu na bali birhu bakaciyumva okubirhuyerekire. Rhurhakasêza abandi oku barhulangalire. Ebijiro birhu byo byakayeresa abandi oku banarhulangalira. Banaderhe oku okuba wa kulangalirwa kuba nka nsaranga. Okuzipata kuba kuzibu, cikone okuziheza kuba kulembu. Yehova ayerekine oku kobinali rhwanamulangalira. “Ngasi mukolo ajira erhi gunali gwa nkwîra [gwa kulangalirwa].” (Enna. 33:4) Anaba alonzize rhuyige olwiganyo lwage. (Ef. 5:1) Rhuvuzire omunkwa bwenene okubona Yehova arhukulwire lyo rhuja omu mulala gw’omw’igulu lyoshi gw’abantu baba ba buzigire na ba kulangalirwa! Rhweshi rhushinganine rhujire okwirhu koshi lyo bene wirhu na bali birhu bakarhulangalira. Erhi ngasi muguma wirhu akacihangana ly’akayerekana obuzigire, obwirhohye, oburhimanya, obwikubagirwa, n’okucihasha, rhwanagendekeza iroho ly’okulangalirana omu cigamba. Lekagi rhuyige olwiganyo lwa Yehova, Nnâmahanga wirhu, na ntyo rhugendekere rhwayerekana oku rhuli bantu ba kulangalirwa. w22.09 buk. 8 cif. 1-2; buk. 13 cif. 17

Ciru akaba rhuli omu mulala munene gw’abakozi ba Yehova, hali amango rhwakaciyumva rhuli kahumba rhwananavunika omurhima enyanya z’okurhanya oku rhushinganine rhulembere ago mazibu oku buhashe bwirhu rhwene. Yehova arhaba alonzize rhuciyumve ntyo ciru n’ehitya. Rhuganirire oku ajiriraga omulebi Eliya. Aha Eliya omurhima ly’aderha. Kabirhi koshi-koshi amudosa ntya: “Bici oli wajira aha?” (1 Bam. 19:9, 13, Mashi Bible) Ako kabirhi koshi, Yehova ayumvirhiza Eliya erhi amubwira oku akag’iciyumva. Kandi ayemeza Eliya n’obwalagale oku hali abandi Baisraheli banji bacikag’imuharamya. (1 Bam. 19:11, 12, 18) Buzira karhinda, Eliya ayumvirhe oburhulirize enyuma z’okubwira Yehova ebyamuli omu murhima byoshi n’enyuma z’okuyumvirhiza gurhi Yehova amushuzize. Yehova aha Eliya mikolo minji y’obulagirire. Amurhuma oku aj’ishiga Hazaeli amavurha ly’aba mwami w’e Siria, Yehu ly’aba mwami w’e Israheli, na Elisha ly’aba mulebi. (1 Bam. 19:15, 16) Omu kuha Eliya eyo mikolo, Yehova amurhabala ly’asegeza obwenge oku bintu binja. Na kandi Nnâmahanga amuha omwîra mwinja, ko kuderha Elisha. w22.08 buk. 8 cif. 3; buk. 9 cif. 5

K’enyumpa y’Entimanano y’ecigamba cinyu ekola eyubasirwe erhi kukubûlwa? Akaba neci, buzira karhinda okengire entimanano ntanzi mwajiriraga mw’eyo nyumpa mpyahya. Wavuga Yehova omunkwa bwenene. Nkaba wagwerhe mwishingo munji n’oko kwarhuma walaka nkaba kwanaba kuzibu kuli we okuyimba olwimbo lurhanzi. Enyumpa zirhu z’Entimanano nyubake bwinja zinalerhere Yehova obukuze. Cikone kandi rhunamulerhere bukuze bunji kulusha erhi rhujira oku gundi mukolo gw’obubasi guli lubero. Ogo mukolo guhiziremwo kantu kalebe ka bulagirire bwenene kulusha obubasi bw’enyumpa. Ako kantu kuba kuzibuhya erhi kuyubaka abantu bayisha kw’ezo nafasi zirhu rhujirira enterekêro. Entumwa Paolo yakag’irhanya kw’obo bubasi bw’olwiganyo erhi eyandika enderho ziri omu lwandiko lwirhu lw’olusiku lw’ene. Al’imanyire bwinja okuyubaka ababo bemezi, n’olo luli lwiganyo lwinja kuli rhwe. Akag’icihira oku nafasi y’abandi. Rhwanayiga olwiganyo lwage omu kuyubaka bene wirhu na bali birhu ene.—1 Kr. 11:1. w22.08 buk. 20 cif. 1-2

Omukristu olonzize abe mushinganyanya omu masu ga Nnâmahanga, ashinganine abe mwikubagirwa omu mikolo yage yoshi y’oburhimbuzi. Kandi, omuntu mushinganyanya aba azigire obushinganyanya; anagaye erhi akabona muntu mulebe ajirirwa okurhashinganini. Na kandi, ly’‘asimisa [Yehova] muli byoshi,’ omuntu oli mushinganyanya kobinali anakarhanya gurhi Yehova abona emihigo arhôla. Ebibliya eyerekine oku Yehova ye Nshoko y’obushinganyanya. Co cirhumire, ahamagirwe “cihando c’obushinganyanya.” (Yer. 50:7, NWT) Bulya Yehova ye Mulemi, yene ogwerhe ehaki y’okuhiraho amakanuni gayerekine ebinja n’ebibi. Entanya zage lugenda ebinja n’ebibi zilushire bwenene entanya zirhu. (Mig. 14:12; Iz. 55:8, 9) Cikone, bulya rhwalemirwe oku nshusho ya Nnâmahanga, rhugwerhe obuhashe bw’okulama kushimbana n’amakanuni gage g’obushinganyanya. (Murh. 1:27) Rhunaba rhusimire okujira ntyo. Obuzigire rhujirako Larha wirhu bunarhushumye rhujire okwirhu koshi lyo rhuyiga olwiganyo lwage.—Ef. 5:1. w22.08 buk. 27 cif. 5-6

Amango rhugwerhe amazibu erhi rhuvunisire omurhima, nkaba rhwanaciyumva oku rhushinganine rhujire kantu kalebe kakarhurhabala lyo rhuyaka ago mazibu girhu. Oko kuyumvikine, cikone rhugwasirwe rhube masu lyo rhurhag’ijira akantu kakagayisa Yehova. (Ef. 5:10-12, 15, 16) Omu maruba Paolo ayandikiraga Abafilipi, ayinginzire Abakristu oku bagendekere barhanya oku bintu “bishinganine, . . . bicîre, . . . bikwanine okuzigizwa, n’okukengwa.” (Fl. 4:8) Ciru akaba Paolo arhakag’iganirira ebintu by’okucishagalusa, ebi ayandikaga byanarhurhabala rhucishoge bwinja ebintu rhucishagalusamwo. Obe nka wajira ntya: Ngasi hoshi oluderho “bintu” luhugwîre binji lubonekine mw’olo lwandiko, oje wahiraho oluderho “nyimbo,” “filme,” “bitabu,” erhi “micezo y’evideo.” Okujira ntyo kwanakurhabala ohugûkwe bici byakasimisa Nnâmahanga na bici birhakamusimisa. Rhulonzize okulama kushimbana n’amakanuni ga Yehova galengerire.—Enna. 119:1-3. w22.10 buk. 9 cif. 11-12

Embere bafê, baguma b’omu bantu “barhali bashinganyanya” bajijire ebijiro bigalu-galu bwenene. Co cirhumire, bayish’iba balagirire oku kuyigirizibwa lyo bamanya gurhi bakalamamwo kushimbana n’amakanuni mashinganyanya ga Yehova. Lyo bayigirizibwa gurhi bakajiramwo ntyo, Obwami bwa Nnâmahanga bwayish’ilongoza omukolo munene bwenene gw’okuyigiriza gurhasag’ijirwa bundi. Bandi bayish’iyigiriza abarhali bashinganyanya? Abantu b’ehitû hinene n’abashinganyanya bayish’ifûlwa. Ly’amazino g’abarhali bashinganyanya gayandikwa omu citabu c’obuzine, byayish’ihûna bajire obwîra haguma na Yehova n’okucihâna emwage. Yezu Kristu n’abashige amavurha bayish’ikalabiriza erhi banali empingu amajambere abo barhali bashinganyanya bayish’iba bali bajira. (Maf. 20:4) Ngasi yeshi wayish’ilahira obo burhabale ahâbwa ayish’ihererekezibwa, ciru akaba anaba acigwerhe myaka 100. (Iz. 65:20) Bulya Yehova na Yezu banasome emirhima, barhayish’iyemerere omuntu yeshi-yeshi ajire amaligo omw’igulu lihyahya.—Iz. 11:9; 60:18; 65:25. w22.09 buk. 17 cif. 11-12

Mw’olu lwandiko, oluderho “abarhegesi bamukulire” luhugwîre bene bantu bagwerhe obuhashe oku bandi bantu. Abakristu bagwasirwe barhumikire abo barhegesi bene bantu. Abo barhegesi banarhabale lyo harhabaga akavulindi, ly’abantu bakenga amarhegeko, na ciru hali amango bahalira abakozi ba Yehova. (Maf. 12:16) Co cirhumire rhurhegesirwe okulipa amatakse, okuvurha amakoli, okubayoboha, n’okubaha obukenge bahûnyire. (Rm. 13:7) Cikone, abo barhegesi bene bantu bagwerhe obuhashe bulya Yehova abalesire babe nabo. Yezu ahugwîre ako kanuni n’obwalagale erhi Guvernere Muroma Pontyo Pilato amudosa amadoso. Erhi Pilato aderha lugenda obuhashe al’igwerhe bw’okuciza Yezu erhi kurhegeka anigwe, Yezu amubwira ntya: “Nta buhashe ongwerhe kwo okuleka bulya Nnâmahanga akuhâga kurhenga enyanya.” (Yn. 19:11, Mashi Bible) Nk’oku byali lugenda Pilato, ene obuhashe bw’abarhegesi bene bantu n’obw’abantu b’epolitike boshi buba bwa lugero. w22.10 buk. 14 cif. 6

Omu kulongozibwa n’iroho litagatifu, Mwami Daudi ayandisire lugenda gurhi akalamo kakayosire erhi omwami w’obwenge na mwishwekerezi akatamire oku cirhi c’obwami. (Enna. 37:10, 11, 29) Kanji-kanji rhunasomere abantu olwandiko lw’Ennanga 37:11 erhi rhubaganirira lugenda Eparadizo y’amango gayisha. Ebyo biyumvikine bulya Yezu agalukire olo lwandiko omu Mahubiri gage g’oku Ntondo, n’oko kuyerekine oku lwahikirira omu mango gayisha. (Mt. 5:5) Cikone kandi, ezo nderho za Daudi zayerekine gurhi akalamo kakayosire omu mango g’oburhegesi bwa Mwami Salomoni. Amango Salomoni al’irhegesire ecihugo c’e Israheli, abantu ba Nnâmahanga bal’igwerhe omurhûla gwago-gwago n’obololôke omu cihugo “cihululamwo amarhà n’obûci.” Nnâmahanga al’idesire ntya: “Mukakaz’ikulikira amarhegeko gani . . . , Nahira omurhûla omu cihugo cinyu, mwakaz’ihunga na ntaye wamufudusa.” (Lev. 20:24; 26:3, 6) Ebyo biragane byahikirire omu mango g’oburhegesi bwa Salomoni. (1 Nga. 22:9; 29:26-28) Enderho ziri omu Ennanga 37:10, 11, 29 zahikirire omu mango ga mîra na kandi zahikirira omu mango gayisha. w22.12 buk. 10 cif. 8

Rhwe Bakristu b’okuli, rhugwasirwe rhukarhumikira obulongozi. Ebibliya erhuhîre er’ihano lyakarhurhabala: “Obumanye [obwenge, NWT] bwanarhuma walwa entambala, n’okuhima kurhenga omu bahanûzi banji.” (Mig. 24:6, Mashi Bible) Rhuganirire gurhi okukolesa ako kanuni kwakarhurhabala lyo rhuba n’amalehe minja omu mukolo gwirhu gw’okuhubiri n’okuyigiriza. Ahali h’okujira omukolo gw’amahubiri nk’oku rhunalonzize, rhunacihangane okukulikira obulongozi rhuhabwa. Rhunahabwe amahano g’obwenge oku ntimanano zirhu z’ecigamba; kw’ezo ntimanano, abahanûzi bagwerhe obulenga banageze ehotuba n’ebipindi biyimangire oku Bibliya lyo barhukomereza. Kandi, ikubuliro lya Yehova linarhuhe ebikolanwa binja, ko kuderha ebicapo n’amavideo garhabala abantu bahugûkwe Ebibliya. Rhuvuzire omunkwa bwenene oku mahano minja rhukûla omu Kanwa ka Nnâmahanga! Gurhi akalamo kirhu kakabire buzira ago mahano? Lekagi rhuhige okukolesa omu ngasi cigabi c’akalamo kirhu obwenge Yehova arhuha.—Mig. 3:13-17. w22.10 buk. 23 cif. 18-19

Nka kula rhulya ebiryo by’omubiri n’okuleka e estoma ebishwe lyo bijira omukolo omu mubiri gwirhu, rhunalisibwe omu hali y’ekiroho erhi rhuciyigiriza Akanwa ka Nnâmahanga n’okurhanya kw’ebi rhwaciyigirizagya. Lugenda Akanwa ka Nnâmahanga, Yehova aba alonzize rhukahugûkwe bwinja. Rhwanajira ntyo kugerera isala, okusoma, n’okurhanya. Burhangiriza, rhunashenge lyo rhurheganya omurhima gwirhu guyankirire bwinja entanya za Nnâmahanga. Enyuma z’aho, rhunasome cigabi cilebe c’Ebibliya. Buzinda, rhunarhang’ihulika hitya lyo rhurhanya bwenene kw’ebi rhwasomaga. Bici okujira ntyo kwakarhulerhera? Oku rhwagendekera rhwarhanya, ko rhwanagendekera rhwahugûkwa Akanwa ka Nnâmahanga, ko kanagendekera kaseza obuyemere bwirhu. Bulya gurhi okusoma Ebibliya n’okurhanya kw’ebi rhuli rhwasoma kuli kwa bulagirire bwenene? Okujira ntyo kwanarhuha emisi y’ekandalala rhulagirireko lyo rhuyaliza Omwanzi mwinja gw’Obwami ene na lyo rhuhash’iyaliza omwanzi gw’olubanja omu mango gayisha. Na kandi, erhi rhurhanya oku morhere minja ga Yehova, obwîra bwirhu haguma naye bunagendekere bwasêra. w22.11 buk. 6-7 cif. 16-17

Yezu ayerekine oku arhali abanafunzi bage bone cikone n’abantu barhali b’omu cigamba c’Ecikristu bakamanyire abanafunzi bage b’okunali kugerera obuzigire burhali bwa kucikaliza bayerekana egarhi kabo. N’obuzigire buba egarhi k’abantu b’omu cigamba c’Ecikristu kobinali buba bwago-bwago. Cikone, Abahamirizi ba Yehova barhaba bimana. (1 Yn. 1:8) Co cirhumire oku rhugendekera rhwamanya bwinja abantu b’omu cigamba c’Ecikristu, ko rhunagendekera rhwabona obuzamba bwabo. (Rm. 3:23) Eby’okugayisa, kuli kubona oku bene wirhu na bali birhu baguma na baguma balesire obuzamba bw’abandi bwarhuma baleka okukolera Yehova. Gurhi Yezu ayeresiremwo entumwa zage obuzigire? Na gurhi byakahashikanamwo okuyiga olwiganyo lwa Yezu ene? Kwanaba kwinja Abahamirizi ba Yehova barhanye bwenene oku mashuzo g’ago madoso. Okujira ntyo kwanarhurhabala rhuyerekane obuzigire bunji, ci bwenene omu mango ngasi muguma ali alembera obuzamba bw’owundi.—Ef. 5:2. w23.03 buk. 26-27 cif. 2-4

Oku rhuli rhwayegera obuzinda bw’er’igulu, ko na mazibu manji gakarhuhikira kurhenga omu cigamba. Ago mazibu ganahira obwishwekerezi bwirhu kuli Yehova omu marhangulo. Co cirhumire, rhugwasirwe rhulange enkengero zirhu. Erhi wakaciyumva oku wajirirwe kubi n’owinyu Mukristu, orhabikaga akarhinda omu murhima. Erhi wakahâbwa obuhane, orhasegezagya obwenge bwawe oku nshonyi wakayumva enyanya z’obo buhane, oyemere ihano, onajire empindulo zihûnyirwe. N’erhi ikubuliro lya Yehova lyakajira empindulo zikuhumireko, oziyemere n’omurhima gwawe goshi onarhumikire obo bulongozi. Ogendekere okulangalira Yehova n’ikubuliro lyage erhi obwishwekerezi bwawe bwakaja omu marhangulo. Orhulirire, okarhanya bwinja, n’okubona ebintu nk’oku Yehova ali abibona. Okahûna Yehova oburhabale. Orhanahiraga okaciyegûla n’ecigamba. Okajira ntyo, ciru byakaba gurhi, Shetani arhakahasha okukunanûla kuli Yehova n’ikubuliro lyage.—Yk. 4:7. w22.11 buk. 24-25 cif. 14-16

Abagula banarhabale bene wabo na bali babo lyo baba bacirheganyize embere obuhanya bucilerha bone buhike. Banajire okwabo koshi ly’abantu boshi omu cigamba bamanya ebi bakajira lyo bacira na gurhi bakaganizamwo abagula. Gurhi nawe wene wakajira? Erhi obuhanya bwakahikira abantu omu eneo eri hofi n’ah’olama, odose abagula gurhi wakarhabalamwo. Nkaba wanahandisa abayasire aha mwababwe erhi bavolontere bali bayubakira abantu enyumpa. Nkaba wanaba n’obuhashe bw’okulerhera abahubiri ebiryo n’ebindi bintu balagirireko. Erhi obuhanya bwakahikira abantu omu eneo eri kuli n’aha olama, kandi wanahâna oburhabale. Omu njira nci? Omu kusalira enyanya z’abahikirwe n’obuhanya. (2 Kr. 1:8-11) Wanalunga okuboko omukolo gw’okuhâna oburhabale omu kuhâna ensaranga ly’orhabala okugendekeza omukolo gw’omw’igulu lyoshi. (2 Kr. 8:2-5) Erhi akaba ogwerhe obuhashe bw’okubalamira omu eneo yahikirwe n’obuhanya ly’oj’ihâna oburhabale, odose abagula oku wajira ly’oba volontere. Erhi wakayemererwa okuba volontere, nkaba banakukomereza ly’okolesibwa ahantu n’akasanzi bakulagirireko bwenene. w22.12 buk. 24 cif. 8; buk. 25 cif. 11-12

Eyindi mpindulo y’Ebibliya ehindwire ogo mulongo ntya: “Nta marhangulo gamuhikire garhali gala gahikira bene bantu.” Ezo nderho zayandikiragwa abalume n’abakazi bal’ilamire omu Korinti. Baguma mulibo mîra bali bagonyi, balume bajira ecijiro c’obuhya n’ababo balume erhi bakazi bajira ecijiro c’obuhya n’ababo bakazi, na balalwe. (1 Kr. 6:9-11) K’orhanyize oku nt’irala libi bakacigendekire balwisa enyuma z’okubatizibwa kwabo? Birhakabire ntyo. Boshi bali Bakristu bashige amavurha, cikone baciri bene bantu barhali bimana. Buzira karhinda, baligwasirwe bakalwisa irala libi kasanzi oku kandi. Oko kwanarhuha omurhima. Bulya gurhi? Bulya kuyerekine oku, erhi akaba hali irala libi oli walwisa, hali owundi muntu walihimire. Kobinali, rhwanagendekera rhwalihagalika ‘n’obuzibu bw’obuyemere bwirhu, rhunamanye oku ago malibuko go ganadwirhe galibuza bene wirhu bali omu igulu.’—1 Pt. 5:9. w23.01 buk. 12 cif. 15

Yezu ashenga Yehova oku alange abanafunzi bage. (Yn. 17:11) Bulya gurhi oko kurhuhire oburhwali? Bulya Yehova agwerhe misi minji kulusha abashombanyi birhu boshi. (1 Yn. 4:4) Anabone ngasi kantu. Rhuyemire n’obwalagale oku erhi rhwakalangalira Yehova, rhwanahima oboba bwirhu n’okuyerekana oburhwali. Ka hali amango oyumva enshonyi z’okucimanyisa oku oba Muhamirizi wa Yehova? K’oli warhindira okuba muhubiri erhi okubatizibwa bulya oyobohire lugenda ebi abandi bakurhanyiza? Orhalekaga enshonyi n’oboba birhume waleka okujira akantu omanyire oku kali kinja. Oshenge Yehova kurhenga oku murhima. Omuhûne akuhe oburhwali bw’okujira obulonza bwage. Okubona gurhi Yehova ashuzize oku masala gawe, kwanakurhabala obe n’emisi minji n’oburhwali bunji.—Iz. 41:10, 13. w23.01 buk. 30 cif. 12, 14

Yezu adosize idoso “Ka murhasag’isoma?” ly’ayerekana entanya mbi Abafarizeyi bagwerhe lugenda ebi bakag’isoma omu Mandiko. (Mt. 12:1-7) Muli ako kanga, Abafarizeyi baderha oku abanafunzi ba Yezu bavunyire irhegeko ly’e Sabato. Omu kubashuza, Yezu aganirira nyiganyo ibirhi z’omu Mandiko anagalukira lwandiko luguma lw’omu citabu ca Hozeya ly’ayerekana oku Abafarizeyi barhal’ihugûsirwe bulya gurhi irhegeko ly’e Sabato lyahebagwaho n’oku barhakag’iyereka abandi bantu olukogo. Bulya gurhi abo balume barhalekaga obusomi bwabo bw’Akanwa ka Nnâmahanga bubashumye? Bulya bakag’ikasoma banagwerhe enkomedu y’okuderha-derha abandi kubi n’obucibone. Eyo nkomedu yabo yakarhuma barhahugûkwa ebi bakag’isoma. (Mt. 23:23; Yn. 5:39, 40) Olole n’omu citabu ca Mateyo 19:4-6, aha Yezu acibig’idosa Abafarizeyi elyo idoso: “Ka murhazig’isoma?” Ciru akaba bakag’isoma emyanzi eganirire obulemi, barhahugûkagwa ebi eyo myanzi eyigirizize lugenda oku Nnâmahanga abona obuhya. Enderho za Yezu zirhuyigirizize oku kuli kwa bulagirire rhukaba n’entanya nyinja amango rhuli rhwasoma Ebibliya. Lubero n’Abafarizeyi, rhugwasirwe rhukaba birhohye na babidu okuyemera okuyigirizibwa. w23.02 buk. 12 cif. 12-13

Yehova al’ihîre Abaisraheli Irhegeko lyalimwo obulongozi buyerekine gurhi bone bakacilanziremwo lyo barhahikiragwa n’e aksida ndarhi aha mwababwe n’ebwa kazi. (Lub. 21:28, 29; Lush. 22:8) Erhi muntu mulebe akanizire owundi buzira kumanya, hakabire amazibu madarhi bwenene. (Lush. 19:4, 5) Irhegeko lyal’ihûnyire oku ciru n’abantu bakajirire kubi omwana orhac’iburhwa buzira kumanya bahâbwe obuhane. (Lub. 21:22, 23) Amandiko gayerekine n’obwalagale oku Yehova alonzize rhukayaka ebyakarhuma e aksida yarhuhikira.Rhunayerekane oku rhushagalukire engalo ya Nnâmahanga y’obuzine omu kujira okwirhu koshi lyo rhucilanga rhurhahikiragwa n’e aksida aha kâ n’ebwa kazi. Rhunabîke bwinja ebyoji, ama produits chimiques erhi amafumu gakayirha abantu, na kandi rhunabîke ebyo bintu aha abana barhakahika. Rhunabe masu erhi rhuyasa omuliro, erhi rhudeka amishi, n’amango rhuli rhwakolesa ebyombo bikolesibwa n’omuliro gw’e kura, rhunanabe masu ly’ebyo bintu birharhulerheraga amazibu. Rhurhatembeza omutuga amango rhuli rhwanywa amafumu gakarhuma kwaba kuzibu kuli rhwe okutembeza, erhi akaba rhwanywire amamvu rhurhakanahash’itembeza bwinja, n’erhi akaba rhurhamire bwenene. Rhurhanakolesa etelefone zirhu omu mango rhuli rhwatembeza omutuga. w23.02 buk. 21-22 cif. 7-9

Yehova aba Mwalimu wa kulembera, wa lukogo, ohugûkwa akanga k’abandi. Anakabona amorhere minja g’abanafunzi bage. (Enna. 130:3) Na kandi, nta mango akarhuhûna oku rhujire ebirhalusire obuhashe bwirhu. Okengere, alemire obongo bwawe, ngalo nyinja bwenene. (Enna. 139:14) Omulemi wirhu aba alonzize rhugendekere rhwayiga ensiku n’amango rhunashagalukire okuyiga. Co cirhumire, ene kuli kwinja ‘rhukâcîfinja buzira kuhusa’ enyigirizo z’Ebibliya. (1 Pt. 2:2, Mashi Bible) Ocihirireho emihigo wakahash’ihikiriza, onakenge bwinja-bwinja eprograme yawe y’okusoma n’okuyiga Ebibliya. (Yoz. 1:8) Kugerera oburhabale bwa Yehova, wahikira aha washagalukira okusoma n’okuyiga binji kuli ye. Okuba n’obumanye kone arhali ko k’obulagirire. Ecirhumire olagirire oku bumanye kuli kubona oku bwanakurhabala oyige binji lugenda Yehova n’okuba n’amorhere nk’obuzigire kuli ye n’obuyemere muli ye. (1 Kr. 8:1-3) Omu mango oli wagendekera wayiga, okahûna Yehova akurhabale ly’oba na buyemere bunji. (Lk. 17:5) Anashuze oku masala ga ntyo. w23.03 buk. 10 cif. 11, 13

Yezu al’ilonzize abanafunzi bage babe na binji bya kujira omu mango bali balinda oku obuzinda bwahika. Yezu abahîre omukolo gw’okujira. Abarhegesire oku bahubiri omwanzi mwinja “omu Yeruzalemu, n’omu Yudeya yoshi, n’omu Samariya, na kuhika aha igulu lihekera.” (Ebj. 1:6-8) Ogo guli mukolo munji abanafunzi ba Yezu bahabirwe! Bakolesize bwinja akasanzi kabo omu kucihâna bwenene mw’ogo mukolo. Lyo rhucilabiriza rhwenene, rhushinganine rhukarhanya bwenene lugenda gurhi rhuli rhwakolesa akasanzi kirhu. “Obuhanya [mazibu gahika buzira kulaliza, NWT]” bwanahikira ngasi muguma wirhu. (Muh. 9:11) Rhwanafâ omu kasanzi rhurhal’irhanyize. Rhwanakolesa bwinja akasanzi kirhu omu kujira obulonza bwa Yehova n’omu kuseza obwîra bwirhu haguma naye. (Yn. 14:21) Rhushinganine ‘rhusimike, rhurhadundaganaga, ensiku zoshi rhukaja embere [rhube na binji bya kujira, NWT] omu mukolo gwa Nyakasane.’ (1 Kr. 15:58) Erhi rhwakajira ntyo, hano obuzinda buhika, bube buzinda bw’akalamo kirhu erhi buzinda bw’er’igulu ligalugalu, rhurhakaciyunjuza ciru n’ehitya.—Mt. 24:13; Rm. 14:8. w23.02 buk. 18 cif. 12-14