Mwezi gwa 2

Bici olwandiko lw’olusiku lw’ene luhugwîre? Nk’oku Yezu agendekire okuhugûla, obo buli buzigire bwa kucihâna, erhi buzigire bushumya Omukristu ciru ahikire aha afâ enyanya z’owabo mwemezi amango bihûnyire okujira ntyo. Akanwa ka Nnâmahanga kayigirizize oku obuzigire buba bwa bulagirire bwenene. Bantu banji banahire amandiko gakulikire oku liste y’amandiko basima bwenene: “Nyamuzinda aba buzigire.” (1 Yn. 4:8) “Okâzigira owinyu nk’oku ocizigira wenene.” (Mt. 22:39) “Obuzigire buzaza omwandu gw’ebyaha.” (1 Pt. 4:8) “Nta mango obuzigire bwahwe.” (1 Kr. 13:8) Ago mandiko n’agandi gayeresire ngasi muguma wirhu n’obwalagale kunganaci kuli kwa bulagirire okuyerekana obwo borhere bwinja bwenene. Obuzigire bw’okunali emwa Yehova burhenga; abantu bagwerhe iroho lyage n’emigisho yage bone bakaba n’obuzigire bw’okunali egarhi kabo. (1 Yn. 4:7) Co carhumaga Yezu aderha oku abanafunzi bage bone bo bakabire n’obuzigire bw’okunali egarhi kabo. Nk’oku Yezu analebaga, bantu banji bahashire okumanya abanafunzi bage b’okuli kugerera obuzigire bw’okunali bayerekana egarhi kabo. w23.03 buk. 27-28 cif. 5-8

K’olonzize okuba wa kubabalira abandi bwenene? Nkaba wanarhang’isoma n’okurhanya okubiyerekire enyiganyo ziganirirwe omu Bibliya, z’abantu bali babidu okubabalira abandi n’abarhali babidu okubabalira. Orhanye okubiyerekire olwiganyo lwa Yezu. Ali mubidu okubabalira abandi. (Lk. 7:47) Arhakag’isegeza obwenge bwage oku magosa gabo, cikone akag’ibona ebi bakahash’ijira. Lubero na Yezu, Abafarizeyi b’omu mango gage, “bakag’igayaguza abandi.” (Lk. 18:9, Mashi Bible) Enyuma z’okurhanya kw’ezo nyiganyo, wanacidosa ntya: ‘Bici mbona oku bandi? Borhere bwabo buhi nsegeza k’obwenge bwani?’ Erhi akaba ojira amazibu g’okubabalira muntu mulebe, wanacihangana okuyandika amorhere gage goshi minja oba omanyire. Buzinda ocidose ntya: ‘Gurhi Yezu abona oyu muntu? Ka yehe anamubabalira?’ Erhi rhwakajira ntyo, rhwanashanja entanya zirhu. Oku murhondero, nkaba byanahûna rhucihangane bwenene lyo rhubabalira muntu mulebe warhugokize. Cikone, erhi rhwakagendekera rhwajira ntyo, enyuma za kasanzi kalebe rhwanayish’ihikira aha rhwaba babidu okukababalirana. w22.04 buk. 23 cif. 6

Omu citabu c’Amafulûlo, abashombanyi ba Nnâmahanga baganirirwe omu njira y’olwiganyo. Omu milongo ekulikire rhwayish’ibona omubalè gw’ebiryanyi bishushanyize abashombanyi ba Nnâmahanga. Kwa lwiganyo, “eciryanyi cayinamuka omu nyanja.” Cagwerhe “mahembe ikumi na marhwe nda.” (Maf. 13:1) Enyuma z’aho “ecindi ciryanyi carhenga omu idaho.” Eco ciryanyi cakag’iderha nka wankuba-joka “canamanula omuliro oku nkuba.” (Maf. 13:11-13) Buzinda rhwabona eciryanyi ciri lubero, “ciryanyi cidukula-cidukula,” omukazi ohusha bwenene al’icishonyireko. Ebyo biryanyi bisharhu bishushanyize abashombanyi ba Yehova Nnâmahanga bagwerhe nsiku nyinji bali bamuhagalika n’okuhagalika Obwami bwage. Co cirhumire kuli kwa bulagirire okubamanyirira. (Maf. 17:1, 3) Rhushinganine rhurhang’ihugûkwa ebi ezo nderho z’olwiganyo zihugwîre. Enjira nyinja y’okubihugûkwa kuli kuleka Ebibliya ecihugûle yonene. Bimanyiso binji biri omu citabu c’Amafulûlo byarhanzir’ihugûlwa omu bindi bitabu by’Ebibliya. w22.05 buk. 8-9 cif. 3-4

Bakozi baguma na baguma ba Yehova banavunike omurhima erhi babona oku barhakacihash’ijira binji omu mukolo gwa Yehova enyanya z’emyaka yabo erhi magala gabo. Erhi akaba onavunike omurhima okubona oku hali ebi orhakacihash’ijira, ocidose ntya: ‘Bici Yehova ampunyire?’ Ko kuderha ngasi kantu kinja wakahash’ijira omu kanga olimo buno. Orhanye kuli aka kanga: Mwali wirhu muguma ogwerhe myaka 80 ali aciyumva avunisire omurhima bulya arhakacihash’ijira binji omu mukolo gw’amahubiri nk’oku akag’ijira erhi agwerhe myaka 40. Ali arhanya oku ciru akaba ali ahâna ebintu byage binja, birhakacishagalusa Yehova. Cikone, ka kobinali ntyo? Ocibig’irhanya. Erhi akaba oyo mwali wirhu akag’iha Yehova ebintu byage binja erhi agwerhe myaka 40 anacigendekire amuhabyo ciru akaba akola agwerhe myaka 80, ko kuderha oku arhasag’ileka okumuha ebintu byage binja. Erhi rhwakajira ebintu binja rhwakanahasha, Yehova ayish’irhubwira ntya: “Bwinja obwo!” (Oshushanye na Mateyo 25:20-23, Mashi Bible.) Kwanaba kulembu okuba n’omwishingo erhi rhwakakasegeza obwenge bwirhu kw’ebi rhwakahash’ijira ahali h’okubusegeza kw’ebi rhurhakacihash’ijira. w22.04 buk. 10 cif. 2; buk. 11 cif. 4-6

Ecitabu c’Amafulûlo cigabi ca 21 cishushanyize balya 144 000, n’olugo lwinja bwenene, luhamagirwe “Yeruzalemu muhyahya.” Omusingi gw’olo lugo gwal’ijijirwe na mabuye 12 bal’iyandisireko “amazîno ikumi n’abiri g’entumwa ikumi n’ibiri z’Omwana-buzi.” (Maf. 21:10-14; Ef. 2:20) Olo lugo, nta lundi loshi-loshi luba lushushine nalo. Ibarabara lyalo liba lijijirwe n’enoro ecîre, enyumvi zalo ziba zijijirwe n’amasholo, ebibambazi byalo n’emisingi yalo eba mipambe n’amabuye g’engulo ndârhi, haguma n’ebipimo by’okupima ebiyumanine bwinja. (Maf. 21:15-21) Cikone, Yowane abona nka hali akantu kal’ibuzire! Acibir’irhubwira ntya: “Ntabonaga muli ehekalu, bulya Yehova Nnâmahanga Ogala Byoshi ye hekalu yalo, haguma n’Omwana-buzi. Na kandi olo lugo lurhagwerhe obulagirire bw’izuba nisi erhi bw’omwezi lyo bilumolekera, bulya irenge lya Nyamuzinda bo bulangashane bwalo, n’Omwana-buzi ko kamole kalo.” (Maf. 21:22, 23, NWT) Balya baba cigabi ca Yeruzalemu Muhyahya, bayish’iba n’obulyo bw’okukabona Yehova. —Hb. 7:27; Maf. 22:3, 4. w22.05 buk. 17-18 cif. 14-15

Ciru akaba Yehova ye Mulemi wirhu, ye ohâna amarhegeko, na Mutwi w’Emanja, kandi aba Larha wirhu w’obuzigire w’omu mpingu. (Enna. 100:3; Iz. 33:22) Erhi rhwakamugokeza rhukanaciyunjuza n’omurhima goshi, aba agwerhe obuhashe bw’okurhubabalira anaba alonzize okujira ntyo. (Enna. 86:5) Kugerera omulebi Izaya, Yehova ayemeza abantu bage n’obwalagale ntya: “Ebyaha binyu bikabâ bidukwire nka mwambalo gwa kaduku, byahinduka byêru nka lubula.” (Iz. 1:18) Bulya rhurhaba bimana, rhweshi rhunaderhe erhi kujira ebintu byagayisa abandi. (Yk. 3:2) Cikone, oko kurhali kuderha oku rhurhakaba n’obwîra bwa hofi-hofi haguma nabo. Rhwanaba n’obwîra bwa ntyo haguma nabo erhi rhwakaciyigiriza okukababalira. (Mig. 17:9; 19:11; Mt. 18:21, 22) Erhi rhwakagokezanya omu njira nsugunu-ngunu, Yehova aba alonzize rhukababalirana. Rhugwerhe ebirhumire binja by’okujira ntyo. Kobinali, Yehova anarhubabalire “omu njira nnene” buzira kusezibwa.—Iz. 55:7, NWT. w22.06 buk. 8 cif. 1-2

Ciru akaba rhushinganine rhuyake okukacigerera oku bandi, okuciyigiriza kugerera abakozi bishwekerezi ba Nnâmahanga kwanarhulerhera bunguke bunji. Yezu ye lwiganyo lwinja rhwakayiga. Ciru akaba ali mwimana, amorhere gage minja n’enjira zage byanarhuyigiriza bintu binji. (1 Pt. 2:21) Erhi rhujira okwirhu koshi lyo rhukulikira n’obwishwekerezi olwiganyo lwage, rhwanaba bakozi binja ba Nnâmahanga. Omu Kanwa ka Nnâmahanga, rhwanabonamo nyiganyo nyinji z’abalume n’abakazi bishwekerezi rhwakayiga enyiganyo zabo ciru akaba barhali bimana. Orhanye okubiyerekire Mwami Daudi, oyu Yehova ahamagalaga “muntu w’omurhima gwani.” (Ebj. 13:22) Cikone, Daudi ajijire magosa maguma na maguma mazibu. Ciru akaba ntyo, ali lwiganyo lwinja kuli rhwe. Bulya gurhi? Bulya arhakag’ilonza okucihalira. Lubero n’oko, ayemera ihano lizibu-zibu bamuhâga ananaciyunjuza n’omurhima gwage goshi ebi ajiraga. N’oko kwarhuma Yehova amubabalira.—Enna. 51:3, 4, 10-12. w22.04 buk. 13 cif. 11-12

Ebibliya edesire oku olufû aba mushombanyi. (1 Kr. 15:25, 26) Erhi rhwakarhanya okubiyerekire olufû, rhwanaciyumva rhuyobohire, ci bwenene erhi rhwakaba rhulwazire bwenene erhi muzigirwa wirhu. Bulya gurhi rhuyoboha olufû? Bulya Yehova arhulemire n’irala ly’okulama ensiku n’amango. (Muh. 3:11) Oboba bw’olugero okubiyerekire olufû bwanarhurhabala rhulange obuzine bwirhu. Bwanarhushumya rhukacishoga bwinja ebi rhwalya n’okujira e sporo, okugend’ibona munganga amango rhulwazire, n’okuyaka ebyakahira obuzine bwirhu omu mazibu. Shetani aba amanyire oku rhuba rhuzigire obuzine. Cikone anaderhe oku rhwanaleka ngasi kantu rhugwerhe, ciru n’obwîra bwirhu haguma na Yehova, lyo rhulanga obuzine bwirhu. (Ayu. 2:5) Obo buli bunywesi bwenene! Cikone, bulya Shetani ye “nn’olufû,” anakalonza okukolesa oboba bwirhu bw’akaburhano okubiyerekire olufû ly’arhushumya rhuleke okukolera Yehova.—Hb. 2:14, 15. w22.06 buk. 18 cif. 15-16

Amango omukolo gwirhu guhanzibwe, byanahûna rhukarhimanana na bene wirhu na bali birhu omu bikundi bisungunu-ngunu. Co cirhumire kulusha agandi mango goshi, kuli kwa bulagirire rhube n’omurhûla egarhi kirhu. Rhukalwisa Shetani ahali h’okulwisanya rhwene na nnene. Orhakag’isegeza obwenge oku magosa ga bene wirhu na bali birhu, kandi okajira okwawe koshi ly’oyusa okurhayumvikana haguma n’abandi buzira kulegama. (Mig. 19:11) Okaba mubidu okurhabala abandi. (Tt. 3:14) Oburhabale ab’omu cikundi ciguma c’amahubiri bahaga mwali wirhu muguma wali omu bulagirire bwalerhire ecikundi cabo coshi obunguke. Baba bîra, nka bantu ba mulala muguma. (Enna. 133:1) Ebihumbi bya bene wirhu na bali birhu bali bakolera Yehova ciru akaba oburhegesi bw’ecihugo cabo buhanzize bigabi bilebe by’omukolo gwirhu. Baguma mulibo bali omu prizo erhi buyemere bwabo burhuma. Rhwanasalira enyanya zabo, enyanya z’emilala yabo, n’enyanya za bene wirhu na bali birhu bali bayerekana oburhwali lyo babaha oburhabale bw’omubiri, bw’ekiroho, n’okubahalira oku kagombe ciru akaba oko kwanarhuma nabo bashwekwa. (Kl. 4:3, 18) Orhayibagiraga ciru n’ehitya oku amasala gawe ganabarhabala bwenene!—2 Ts. 3:1, 2; 1 Tm. 2:1, 2. w22.12 buk. 26-27 cif. 15-16

Abana kanji-kanji banayige ababusi babo. Kobinali, nta mubusi oba mwimana. (Rm. 3:23) Ciru akaba ntyo, ababusi benge banajire okwabo koshi lyo bayeresa abana babo olwiganyo lwinja. Ishe wa mulala muguma adesire ntya: “Abana ko bayorha nka shifo bahira omu mishi, buzinda eyonke ago mishi goshi gabe gacîre erhi gazinzire.” Ayushwire ntya: “Banarhubwire erhi rhujira ebintu biri lubero n’ebi rhubayigiriza.” Co cirhumire erhi akaba rhulonzize abana birhu bazigire Yehova, rhwene rhushinganine rhurhang’iyerekana oku rhugwerhe obuzigire busêzire kuli ye. Hali njira nyinji ababusi bakayigirizamwo abana babo okuzigira Yehova. Mwene wirhu muguma ogwerhe myaka 17 ohamagalwa Andrew adesire ntya: “Ensiku zoshi ababusi bani bakag’isegeza obulagirire bw’isala. Ngasi budufu, Larha akag’isalira haguma na nani ciru akaba nali erhi nasalire niene. . . . Buno nkola nyumva kuli kulembu okushenga Yehova n’okumubona nka Larha onzigira bwenene.” Mwe babusi, mukakengera ensiku zoshi oku, oku muzigire Yehova bwenene kwanarhabala abana binyu nabo bamuzigire. w22.05 buk. 28 cif. 7-8

Lyo rhucirheganya lugenda obubatizo, kantu kaguma omu bintu birhangiriza rhugwasirwe rhujire kuli kuciyunjuza ebyaha birhu n’omurhima goshi. (Ebj. 2:37, 38) Erhi rhwakaciyunjuza n’omurhima goshi, oko kwanarhuma rhwajira empindulo z’okunali. Ka walesire enkomedu mbi zoshi zigayisa Yehova, nk’olugenzi lw’eby’enshonyi, okunywa irhabi, erhi okukolesa enderho mbi? (1 Kr. 6:9, 10; 2 Kr. 7:1; Ef. 4:29) Ogendekere wacihangana okujira empindulo. Oganire n’omuntu okuyigiriza Ebibliya, erhi ohûne abagula b’ecigamba oburhabale n’obulongozi. Erhi akaba ociri musole onaciri walama aha mwinyu, ogendekere wahûna ababusi bawe oburhabale ly’oleka enkomedu mbi zoshi zakaba ziri zakuhanza okubatizibwa. Kandi, kuli kwa bulagirire okuba n’eprograme nyinja y’ebintu by’ekiroho. Oko kuhiziremwo okukaja oku ntimanano z’Ecikristu n’okuhâna amashuzo. (Hb. 10:24, 25) N’erhi wakahikiriza ebihûnyirwe ly’okaja omu mukolo gw’amahubiri, ocihangane okajira ogo mukolo ngasi mango. w23.03 buk. 10-11 cif. 14-16

Abaganirirwe omu mwanzi guli omu Omurhondêro 3:14, 15 bahiziremwo ‘enjoka’ n’“iburha” ly’enjoka. Enjoka y’okunali erhakayumvirhe ebi Yehova aderhaga omw’ishwa ly’e Edeni. Co cirhumire, ebinwa bya Yehova byal’iyerekire eciremwa c’obwenge. Eco ciremwa aligi ndi? Olwandiko lw’Amafulûlo 12:9 luyerekine n’obwalagale enjoka ye ndi. Olo lwandiko luyerekine n’obwalagale oku ‘omujoka wa mîra’ ye Shetani Ibilisi. Hali amango Ebibliya ekolesa oluderho “iburha” omu kuganirira abayiga bwinja-bwinja olwiganyo lwa muntu mulebe, na muli ntyo banahamagalwa bana bage. Ko kuderha oku iburha ly’enjoka lijijirwe n’ebiremwa by’ekiroho n’abantu bahagalika Yehova n’abakozi bage, aka Shetani. Abo bahiziremwo bamalahika balekaga enafasi yabo omu mpingu omu nsiku za Nuhu n’abantu babi bacigendesa ak’ishe wabo Ibilisi.—Murh. 6:1, 2; Yn. 8:44; 1 Yn. 5:19; Yd. 6. w22.07 buk. 14-15 cif. 4-5

Entumwa Paolo yal’izigire bwenene bene wabo na bali babo. Naye yene ahikirwe n’amazibu; co cirhumire akag’iyumviza obwonjo ababo bemezi bakag’irhimanana n’amazibu, anakag’icihira oku nafasi yabo. Mango maguma, Paolo arhal’igwerhe nsaranga, na muli ntyo al’ishinganine alonze akazi ly’ahikiriza amalagirire gage yene n’aga abali haguma naye. (Ebj. 20:34) Akazi kage kali ka kuluka amahema. Erhi ahika e Korinti, burhangiriza akola haguma n’ababo bakag’iluka amahema, ko kuderha Akila na mukage Prisila. Cikone “ngasi lwa sabato,” akag’ihubiri Abayahudi n’Abagiriki. Buzinda, erhi Sila na Timoteyo bayisha, “Paolo acishwekera oku kukayigiriza akanwa ka Nnâmahanga.” (Ebj. 18:2-5) Nta lusiku Paolo ayibagire omuhigo gwage gw’obulagirire omu kalamo, ko kuderha okukolera Yehova. Bulya Paolo ayerekine olwiganyo lwinja lw’okukola n’obushiru, akahashir’iha bene wabo na bali babo omurhima. Abakengeza oku barhalekaga amazibu g’akalamo n’okulonza okuhikiriza amalagirire g’omulala kurhume balekerera “ebintu by’obulagirire bwenene,” ko kuderha ebigabi byoshi by’enterekêro rhuha Yehova. w22.08 buk. 20 cif. 3

Ene, Nnâmahanga alonzize omwanzi mwinja gw’Obwami guyalizibwe omw’igulu lyoshi. (1 Tm. 2:3, 4) Ogo guli mukolo gwa Yehova, kunali kwa bulagirire bwenene okubona acishozire Omugala muzigirwa oku agulongoze. Rhwanayemera n’obwalagale oku bulya Yezu y’eri warhulongoza, omukolo gw’amahubiri gwahikirizibwa nk’oku Yehova alonzize embere obuzinda buhike. (Mt. 24:14) Bici byakarhuyemeza ntyo n’obwalagale? Kasanzi kasungunu embere Yezu agaluke empingu, abuganana na banafunzi bage balebe bishwekerezi oku ntondo nguma y’e Galilaya. Ababwira ntya: “Nahîrwe obuhashe bwoshi e mpingu n’en’igulu.” Oyumve ebindi adesire enyuma z’aho: “Mugendage omu mashanja goshi, mugajire babe baganda [banafunzi].” (Mt. 28:18, 19, Mashi Bible) Ko kuderha oku obuhashe Yezu ahâbirwe, bulimwo n’obuhashe bw’okulongoza omukolo gw’amahubiri. N’ogo mukolo gw’amahubiri gwakagendekire gwalongozibwa na Yezu kuhika muli gano mango girhu. w22.07 buk. 8 cif. 1, 3; buk. 9 cif. 4

Abashinganyanya, ko kuderha abantu bajijire aminja embere bafê ‘banafûkire obuzine’ bulya amazino gabo gayish’iba gali mayandike omu citabu c’obuzine. Oko kuli kuderha oku obufûke bw“abakozire aminja” buganirirwe omu Yowane 5:29 bo n’obo bufûke bw’“abashinganyanya” buganirirwe omu lwandiko lw’Ebijiro by’Entumwa 24:15. Aga mahugûlo mahyahya gapatine n’ebidesirwe omu lwandiko lw’Abaroma 6:7, ludesire ntya: “Owafîre erhi afumire ecaha.” Yehova azazize ebyaha by’abo bantu bashinganyanya erhi bafâ, cikoki agendekire akengera ebijiro byabo by’obuyemere. (Hb. 6:10) Kobinali, abo bashinganyanya bayish’ifûlwa bakwanine bagendekere babêra bishwekerezi kuli Yehova ly’amazino gabo gagendekera okubêra omu citabu c’obuzine. w22.09 buk. 18 cif. 13, 15

Omulebi Daniyeli ayerekine olwiganyo lwinja lw’okuba muntu wa kulangalirwa. Ciru akaba al’ihamisibwe omu cihugo c’Abababiloni, enyuma za kasanzi kasungunu aciyerekana oku ali muntu wa kulangalirwa na wa kucikubagirwa. Abantu bamulangalira ciru kulusha, erhi ahugûla ebilorho bya Mwami Nebukandnezari w’e Babiloni kugerera oburhabale bwa Yehova. (Dan. 4:20-22, 25) Myaka minji enyuma z’aho, Daniyeli acib’iyerekana oku ali muntu wa kulangalirwa erhi ahugûla buzira magosa omwanzi gw’ihwe gwayandikagwa oku lukuta lw’enyumpa y’obwami omu Babiloni. (Dan. 5:5, 25-29) Na buzinda, Dariusi Mumedi n’abarhambo bage nabo babona oku Daniyeli “agwerhe bwage bwage bwenge.” Babona oku ‘âli mwikubagirwa arhânali mwo bulyalya na ciru nta bubi agwerhe.’ (Dan. 6:3, 4) Rhwanacidosa ntya: Ka manyikine omu mba muntu wa kulangalirwa?’ Rhunalerhere Yehova obukuze amango rhuli bantu ba kulangalirwa. w22.09 buk. 8-9 cif. 2-4

Rhunabe n’obunguke omu kulama kushimbana n’amakanuni ga Yehova lugenda ebinja n’ebibi. K’obwine bulya gurhi? Orhanye gurhi byakaba erhi ngasi banke yakacihiriraho amakanuni gayo gayerekine akamaro k’ensaranga kandi erhi ngasi kompanyi y’obubasi yakakulikira amakanuni gayo yone lugenda ebipimo by’obubasi. Oko kwanalerha akavulindi. Kandi erhi abanganga bakabula burhumikira amakanuni boshi bashinganine bakulikire omu kubuka abalwala, oko kwanarhuma balwala balebe bafâ. Kobinali, erhi abantu bakakulikira makanuni malebe gahizirweho lugenda njira ndebe y’okujira ebintu, oko kunalerhe obulanzi. Ko n’oko, amakanuni ga Nnâmahanga lugenda ebinja n’ebibi ganarhulange. Yehova anagishe abaciseza okulama kushimbana n’amakanuni gage. Alaganyize ntya: “Abashinganyanya bo balya igulu, bo banalibêrakwo ensiku n’amango.” (Enna. 37:29) Ka wanarhanya kunganaci abantu bayish’iba omu cinyabuguma, omu murhûla, n’omu bushagaluke amango ngasi muguma ayish’iba ali arhumikira amakanuni ga Yehova? Yehova alonzize oyish’ishagalukira akalamo ka ntyo. Kobinali, ngasi muguma wirhu agwerhe ecirhumire c’okuzigira obushinganyanya! w22.08 buk. 27-28 cif. 6-8

Erhi ebintu by’okurhugayisa birhuhikira omu kalamo, obwishwekerezi bwirhu kuli Yehova n’ikubuliro lyage bwanarhangulwa. Gurhi rhwakahimamwo amazibu ga ntyo? Rhushinganine rhulange enkengero zirhu n’okugendekera rhwaba masu, omu kusêra buzibu omu buyemere. Rhunalange enkengero zirhu omu kugendekera rhwarhulirira, omu kurhanya bwinja, n’okujira okwirhu koshi lyo rhubona ebintu nk’oku Yehova ali abibona. Erhi rhwakajira ntyo, entanya zirhu zirhakalongozibwa n’oku rhuli rhwaciyumva. Nkaba rhuli rhwaciyumva oku rhwajirirwe kubi n’owirhu mwemezi, nkaba ciru muntu ogwerhe bukulu bulebe omu cigamba. Byanahashikana oyo mwene wirhu arhajijire ntyo n’obulonza. (Rm. 3:23; Yk. 3:2) Ciru akaba ntyo, ebijiro byage byakugayisize. Nkaba ciru wanacidosa ntya: ‘Erhi mwene wirhu akanjirira ntya, ka kobinali eri liri ikubuliro lya Nnâmahanga?’ Ntyo ko Shetani aba alonzize rhurhanye. (2 Kr. 2:11) Entanya mbi za ntyo zanarhuma rhwacinanûla kuli Yehova n’ikubuliro lyage. Co cirhumire, rhugwasirwe rhube masu lyo rhurhag’ibîka akarhinda omu murhima. w22.11 buk. 20 cif. 1, 3; buk. 21 cif. 4

Yehova arhuhîre obulangalire bwinja bwenene bw’obuzine bw’ensiku n’amango. Baguma na baguma bagwerhe obulangalire bw’okulama ensiku n’amango e mpingu nka biremwa by’ekiroho birhakafâ. (1 Kr. 15:50, 53) Cikone banji bagwerhe obulangalire bw’okuyish’ilama ensiku n’amango hanw’igulu bagwerhe n’amagala mimana n’omwishingo. (Maf. 21:3, 4) Rhube rhugwerhe obulangalire bw’okulama e mpingu erhi hanw’igulu, obulangalire bwirhu buba bwa ngulo ndarhi kuli rhwe. Obulangalire bwirhu lugenda amango gayisha bwahikirira bulya burhenzire emwa Yehova. (Rm. 15:13) Rhumanyire ebi arhulaganyize, rhunamanyire oku anahikirize ebiragane byage ngasi mango. (Mib. 23:19) Rhuyemire n’obwalagale oku Yehova agwerhe obulonza n’obuhashe bw’okuhikiriza ngasi kantu alaganyize. Larha wirhu w’omu mpingu aba arhuzigire, anaba alonzize rhumulangalire. Erhi rhwakaba rhugwerhe obulangalire buzibu kuli Yehova, rhwanahash’ilembera amarhangulo rhwananaba n’oburhwali n’omwishingo ciru mazibu gahi gakarhuhikira omu mango gayisha. w22.10 buk. 24 cif. 1-3

Bulya abantu barhayemeraga okuyumvirhiza, Izaya aleba oku Yehova akabalesire bahikirwe n’obuhanya. (Iz. 30:5, 17; Yer. 25:8-11) Na kobinali, bahamisibwa omu cihugo c’e Babiloni. Cikone, hali Bayahudi baguma na baguma bishwekerezi, na Izaya ababwira oku lusiku luguma Yehova akabarhabire bagaluke omu cihugo cabo. (Iz. 30:18, 19) Na ntyo ko byabire. Yehova abarhabala barhenga e Babiloni. Cikone, hagezire myaka minji embere Yehova abalikuze. Enderho “Nyakasane [Yehova, NWT] adwirhe alinga amango ammubabalira” zal’iyerekine oku hakagezire kasanzi kalebe embere abo Bayahudi bishwekerezi balikuzibwe. Kobinali, Abaisraheli bayusize myaka 70 bahamisibwe e Babiloni embere abalisigire mulibo bayemererwe okugaluka e Yeruzalemu. (Iz. 10:21; Yer. 29:10) Erhi abantu bagaluka omu cihugo cabo, ahali h’okulaka emirenge y’amababale bakalaka emirenge y’omwishingo. w22.11 buk. 9 cif. 4

Ene omu bihugo binji, ebiri byahikira bene wirhu na bali birhu bishushine n’ebyahikiraga entumwa omu myaka igana mirhanzi erhi zilibuzibwa enyanya z’okuhubiri lugenda Yezu. Kanji-kanji, abatwi b’emanja b’omu kagombe kakulu k’Eciyahudi “babahanza mpu barhacihira bakaderha erhi kuyigiriza oku izino lya Yezu.” (Ebj. 4:18-20; 5:27, 28, 40) Cikone, bal’imanyire oku omurhegesi w’obuhashe bwenene ye ‘wabarhumaga mpu baj’iyigiriza olubaga, banahamirize’ lugenda Kristu. (Ebj. 10:42) Co carhumaga Petro na Yowane, baderhaga omw’izino ly’ezindi ntumwa zoshi, baderha n’oburhwali oku bagendekera okurhumikira Nnâmahanga kulusha abo batwi b’emanja n’oku barhakaleka okuhamiriza lugenda Yezu. (Ebj. 5:29) Enyuma z’entumwa okushurhwa enyanya z’okubêra bishwekerezi, barhenga aha kagombe kakulu k’Eciyahudi “banashagalusire bulya babonekine oku bal’ishinganine okubulirwa obukenge erhi izino lya [Yezu] lirhuma,” banagendekera bahubiri!—Ebj. 5:41, 42. w22.10 buk. 12-13 cif. 2-4

Kobinali, erhi omuntu arhondera okuyiga lugenda Yehova, anarhonderere oku nyigirizo z’omusingi z’Ebibliya. Omu maruba Paolo ayandikiraga Abahabraniya, aganirire ezo nyigirizo z’omusingi oku zo “nyigirizo z’omurhondero.” Paolo arhakag’igayaguza ezo ‘nyigirizo z’omurhondero’; akag’izishushanya n’amarha omwana alya. (Hb. 5:12; 6:1) Cikone kandi, ahûnyire Abakristu boshi bagendekere bayiga binji kulusha enyigirizo z’omusingi n’okuyiga enyigirizo nzibu z’Akanwa ka Nnâmahanga. K’okola ogwerhe irala ly’okuyiga enyigirizo nzibu z’Ebibliya? K’olonzize ogendekere wakula, ogendekere wayiga binji lugenda Yehova n’emihigo yage? Cikone kuli banji muli rhwe, okuyiga kurhaba kulembu. Ka nawe okuyiga kuba kuzibu kuli we? Ka wayigirizibwe okusoma n’okuyiga bwinja erhi oli e masomo? Ka wakag’ishagalukira okuyiga n’okuciyumva oku wayizire binji? Erhi, ka waciyemezize n’obwalagale oku orhagwerhi obuhashe bw’okuyiga ebitabu? Akaba ntyo, orhali wene. Cikone, Yehova anakurhabala. Aba mwimana ye na Mwalimu mwinja bwenene ohaba. w23.03 buk. 9-10 cif. 8-10

Erhi rhwakaba birhohye, rhwanaleka Akanwa ka Nnâmahanga kabe n’emizi omu mirhima yirhu. Erhi rhwakayaka enkomedu y’okukaderha-derha abandi kubi n’iroho ly’obucibone lyo enyigirizo z’Ebibliya lugenda olukogo, obwonjo n’obuzigire zakarhushumya. Oku rhujirira abandi kwanayerekana erhi rhuli rhwaleka Akanwa ka Nnâmahanga karhushumye. Abafarizeyi barhahashaga okuleka Akanwa ka Nnâmahanga kahume oku mirhima yabo, n’oko kwakarhuma ‘batwa olw’aberu kweru.’ (Mt. 12:7) Ko n’oko, oku nirhu rhubona abandi n’oku rhubajirira kunayerekane erhi rhwalesire Akanwa ka Nnâmahanga karhushumye erhi nanga. Kwa lwiganyo, ka rhunaganirire kanji-kanji amorhere minja g’abandi bantu erhi rhunakaba babidu okuganirira obuzamba bwabo? Ka rhunayerekane olukogo n’okuba babidu okubabalira, erhi rhunakaderha-derha abandi kubi n’okubîka akarhinda amango bamarhugokeza? Amashuzo girhu kw’ago madoso ganayerekana erhi rhuli rhwaleka ebi rhusoma bishumye entanya zirhu, oku rhuciyumva, n’ebijiro birhu erhi nanga.—1 Tm. 4:12, 15; Hb. 4:12. w23.02 buk. 12 cif. 13-14

Rhuganirire olwiganyo lwa Yozefu w’e Arimatiya. Ali muntu Abayahudi bakag’ikenga bwenene. Ali muguma w’omu Sanhedrini, erhi kagombe kakulu k’Abayahudi. Omu mango g’omukolo gwa Yezu hanw’igulu, Yozefu al’igwerhe agandi morhere minja cikone arhagwerhe burhwali. Yowane adesire oku “âli naye muganda wa Yezu, ci bufundafunda erhi kuyoboha Abayahudi kurhuma.” (Yn. 19:38) Ciru akaba Yozefu al’isimisibwe n’omwanzi gw’Obwami, akag’ifulika abandi oku agwerhe obuyemere muli Yezu. Buzira karhinda al’iyobohire oku aheza ecikono cinja al’igwerhe omu lubaga. Abe ntyo ko byali erhi nanga, Ebibliya erhubwizire oku enyuma z’okufâ kwa Yezu, Yozefu “aja emwa Bilato n’oburhwali amuhûna omubiri gwa Yezu.” (Mk. 15:42, 43) Yozefu arhacic’ifulikaga oku ali mwanafunzi wa Yezu. Ka hali amango nawe wayobohire bene bantu aka Yozefu? w23.01 buk. 30 cif. 13-14

Emyanzi lugenda omurhûla n’okuyololoka Abaisraheli bal’ishagalukire amango g’oburhegesi bwa Salomoni yahikako mwamikazi w’e Sheba. Oyo mwamikazi w’omu cihugo ca kuli bwenene abalamira e Yeruzalemu ly’acibonera yene ebi bamubwiraga. (1 Bam. 10:1) Enyuma z’okubona gurhi obwami bwa Salomoni bwal’iyosire, aderha enderho ziri aho nyanya. Cikone, oku akalamo kal’iyosire amango g’oburhegesi bwa Salomoni luli lwiganyo lw’ebi Yehova ayish’ijirira bene bantu amango g’oburhegesi bw’Omugala Yezu. Yezu ali mukulu kulusha Salomoni omu njira zoshi. Salomoni ali muntu orhali mwimana wajiraga amagosa madarhi ganahikira aha galerhera abakozi ba Nnâmahanga amazibu. Yezu yehe ali Murhegesi mwimana orhajira igosa lyoshi-lyoshi. (Lk. 1:32; Hb. 4:14, 15) Ayerekine n’obwalagale oku arhakajira ecaha ciru n’olusiku luguma erhi kujira akantu koshi-koshi kakalerhera bacikala bage bishwekerezi amazibu. Kobinali, luli lukengwa okubona ye Mwami wirhu. w22.12 buk. 11 cif. 9-10

Bici rhwakajira erhi akaba endwala y’okuyahukira eri yalandira omu eneo yirhu? Rhushinganine rhurhumikire amarhegeko g’abarhegesi, kwa lwinganyo irhegeko ly’okukalaba enfune, okurhayegera abandi, okuyambala amaske, n’okubêra omu luzerema. Erhi rhwakacihangana okujira ebyo byoshi, rhwanayerekana oku rhushagalukire engalo ya Nnâmahanga y’obuzine. Omu mango g’akanga kahûnyire okujira duba-duba, hanaba myanzi minji y’obunywesi rhwakabwirwa n’abîra, abalungu, na kugerera ebyombo by’okuhâna emyanzi. Ahali h’okuyemera ‘ngasi kanwa,’ kwanaba kwinja rhuyumvirhize emyanzi y’okuli kurhenga oku barhegesi na badoktere. (Mig. 14:15, Mashi Bible) Bene wirhu b’omu Mbaraza Eri Yalongoza n’ab’omu mabiro g’etawi banajire okwabo koshi lyo bamanya emyanzi y’okuli embere z’okurhuha obulongozi lugenda entimanano z’ecigamba n’omukolo gw’amahubiri. Omu kurhumikira obo bulongozi, rhunacilange n’okulanga abandi lyo barhag’ihikirwa n’amazibu. Kandi rhunarhabale abandi lyo baba n’entanya nyinja lugenda Abahamirizi ba Yehova.—1 Pt. 2:12. w23.02 buk. 23 cif. 11-12

Erhi Abaisraheli baja omu Cihugo c’Amalaganyo balama omu eneo ngali. Kwali kulembu bwenene Muisraheli muguma olamire omu eneo ndebe ayabirwe okushibirira ehali nyinja y’abandi Baisraheli bal’ilamire omu zindi eneo z’ecihugo. Cikone Yehova al’ihizireho omupango ly’Abaisraheli bakarhimanana haguma kasanzi oku kandi lyo bayumva oku Akanwa ka Nnâmahanga kayandike kasomwa n’okuhugûlwa. (Lush. 31:10-12; Neh. 8:2, 8, 18) Orhanye gurhi Omuisraheli mwishwekerezi akaciyumvirhe erhi akahisire omu Yeruzalemu nkaba anahikire okubona emiliyoni y’ababo bemezi b’omu ngasi eneo z’ecihugo! Ntyo ko Yehova akag’irhabala abantu bage lyo babêra omu cinyabuguma. Enyuma z’aho, erhi ecigamba c’Ecikristu cirhondezibwa, calimwo abalume n’abakazi bakag’iderha ndimi nyinji, banali b’omu bûko buli lubero na baguma mulibo bali bagale n’abandi bali bakenyi. Cikone bakag’iharamya Nnâmahanga w’okuli omu cinyabuguma. Abemezi bahyahya bakahashir’ihugûkwa Akanwa ka Nnâmahanga kugerera oburhabale bw’ababo bemezi n’omu kuja oku ntimanano haguma n’abandi.—Ebj. 2:42; 8:30, 31. w23.02 buk. 3 cif. 7

Yehova alaganyize oku abantu bamurhumikira banabe n’“obuzîne bw’ensiku n’amango.” (Rm. 6:23) Erhi rhurhanya kw’ebi Yehova arhuha, kobinali obuzigire bwirhu kuli ye bunazibuhe bwenene. Orhanye kw’oku: Larha wirhu w’empingu aba arhuzigire bwenene na nta kantu koshi-koshi kakarhunanûla kuli ye. Eciragane ca Nnâmahanga c’obuzine bw’ensiku n’amango cinarhurhabale lyo rhulembera amazibu girhu ga muli kano kasanzi. Ciru abashombanyi birhu bakarhuyobohya mpu barhuniga, rhurhakaleka okubêra bishwekerezi kuli Yehova. Bulya gurhi? Bulya rhumanyire oku ciru rhwakafâ nka rhuli bishwekerezi kuli Yehova, ayish’irhufûla rhunagwerhe obulangalire oku rhurhakacifâ ciru n’eliguma. (Yn. 5:28, 29; 1 Kr. 15:55-58; Hb. 2:15) Rhumanyire oku Yehova agwerhe obuhashe bw’okurhuha obuzine bw’ensiku n’amango bulya ye Nshoko y’obuzine, anaba w’ensiku n’amango. (Enna. 36:9) Ebibliya eyerekine oku Yehova ayorhaga ahaba, ananâhabe ensiku n’amango.—Enna. 90:2; 102:12, 24, 27. w22.12 buk. 2 cif. 1-3

Rhuli bakozi ba Yehova, rhurhasomerwa erhi amarhangulo garhuhikira. Nk’oku Ebibliya edesire, rhunahugûkwe oku “kukwanine rhugere omu malibuko manji lyo rhuhika omu Bwami bwa Nyamuzinda.” (Ebj. 14:22) Kandi rhumanyire oku mazibu girhu maguma na maguma garhakahwa loshi-loshi kuhika rhuhike omw’igulu lihyahya lya Nnâmahanga, omwo “olufû ntalo lwacihabê; emishîbo n’endûlù n’amababale birhakacihabâ bundi.” (Maf. 21:4) Yehova arharhucîka ly’amarhangulo garharhuhikiraga. Cikone anarhurhabale lyo rhugalembera. Rhuganirire ebi entumwa Paolo yabwiraga Abakristu bakag’ilama e Roma. Arhanz’iriganirira amarhangulo ye n’abandi Bakristu bakag’ilwisa. Buzinda ayandika ntya: “Rhunahime erhi Olya orhuzigira orhuma.” (Rm. 8:36, 37) Oko kuli kuderha oku Yehova anakurhabala ciru akaba oli walwisa marhangulo malebe. w23.01 buk. 14 cif. 1-2