Mwezi gwa 3

Entumwa Petro yayinginga bene wabo oku bakolese ngasi ngalo erhi nshokano bagwerhe lyo bayubaka ababo bemezi. Petro ayandika ntya: “Nk’oku ngasi muguma ahâbirwe engalo, muyikolese omu kukolerana nka bimangizi binja b’olukogo lwa Nnâmahanga lurhashinganinwi.” (1 Pt. 4:10, NWT) Rhurhashinganini rhukarhindira okukolesa engalo zirhu nk’oku rhwakanahasha mpu bulya rhuyobohire oku abandi barhuyumviza obumvu erhi bavunika omurhima. Cikone rhushinganine rhube masu lyo zirhag’ikarhuma rhwalimbira abandi. (1 Kr. 4:6) Rhukengere oku ngasi buhashe bw’akaburhano rhujira eba ngalo erhenga emwa Nnâmahanga. Rhushinganine rhukakolesa ezo ngalo lyo rhuyubaka ecigamba, ahali h’okukaciyerekana rhwenene. (Fl. 2:⁠3) Erhi rhukolesa emisi yirhu n’obuhashe bwirhu lyo rhujira obulonza bwa Nnâmahanga, rhunabe n’ecirhumire c’okucishinga, arhali mpu bulya rhulushire abandi, cikone bulya rhwakolesize engalo zirhu lyo rhukuza Yehova. w22.04 buk. 11-12 cif. 7-9

Yezu al’izigire Amandiko Matagatifu, n’enderho ziri omu lwandiko lw’Ennanga 40:8, Mashi Bible, zal’izaganirire gurhi Yezu akaciyumvirhe lugenda Akanwa ka Nnâmahanga. Ludesire ntya: “Nsîma okukâjira ebi walonza waliha Nnâmahanga, amarhegeko gawe aha murhima gamba.” Bulya Yezu al’izigire Amandiko, agwerhe omwishingo anakazag’ibêrwa omu kukolera Yehova. Na nirhu rhwanaba n’omwishingo n’okubêrwa erhi rhwakakasoma Akanwa ka Nnâmahanga rhunaciyigirize okukazigira. (Enna. 1:1-3) Lekagi rhukubûle obulenga bwirhu bw’okusoma Ebibliya omu kukulikira enderho za Yezu n’olwiganyo lwage. Rhwanahash’ikubûla obuhashe bwirhu bw’okuhugûkwa amandiko g’Ebibliya omu kukasalira, omu kukasoma rhunacirhonzire, omu kukacidosa amadoso n’okukayandika myanzi milebe. Rhwanakolesa oburhimanya omu kukalabiriza bwinja ebi rhuli rhwasoma kugerera oburhabale bw’ebicapo birhu biyimangire oku Bibliya. Kandi rhwanaleka Akanwa ka Nnâmahanga kakarhushumya omu kugendekera rhwaba n’entanya nyinja amango rhuli rhwasoma. Erhi rhwakakacihangana okujira ebyo bintu rhwaganiriraga, rhwanakayunguka bwenene n’obusomi bwirhu bw’Ebibliya kandi rhwanagendekera rhwayegera Yehova.​—Enna. 119:17; Yk. 4:8. w23.02 buk. 13 cif. 15-16

Ocihirireho omuhigo g’okuyiga bulenga bulebe na buzinda ojire okwawe koshi ly’ohikiriza omuhigo gwawe. Gurhi wakajiramwo ntyo? Orhanye obe olonzize okukubûla obuhashe bwawe bw’okuyigiriza. Wanayiga bwinja-bwinja ebroshire Fanya Bidii Katika Kusoma na Kufundisha. Amango ogwerhe ecipindi oku ntimanano y’omu kagarhi k’omugobe, wanahûna mwene wirhu ogwerhe obulenga akuyumvirhize embere ogend’icijira, buzinda akuhe amahano gakakurhabala okubûle obulenga bwabwe bw’okuyigiriza. Okarheganya ebipindi byawe embere z’akasanzi ly’abandi babona oku onakole bwenene onali wa kucikubagirwa. (2 Kr. 8:22) Gurhi wakajira erhi akaba omuhigo gwawe guli gwa kuba n’obulenga bw’okujira kantu kalebe kaba kazibu kuli we? Orhavunikaga omurhima! Ka Timoteyo abire mwigiriza mwinja omu cigamba erhi muhubiri mwinja? Ntaco Ebibliya edesire kuli oko. Buzira karhinda, Timoteyo egendekire ahikiriza bwinja emikolo yage bulya akulikire ihano lya Paolo.​—2 Tm. 3:10. w22.04 buk. 24-25 cif. 8-11

Bici eciryanyi cigwerhe marhwe nda cishushanyize? Rhubwine oku eco ciryanyi cal’ishushire engwi (léopard), cikone amagulu gali ga mpangaza (ours), n’akanwa k’entale (lion), canagwerhe mahembe ikumi. Ntyo kw’ebiryanyi bini biganirirwe omu citabu ca Daniyeli cigabi ca 7 nabyo byal’iyosire. Cikone, omu citabu c’Amafulûlo ebyo biyerekire ciryanyi ciguma, ci arhali biryanyi bini biberulukine. Eco ciryanyi cirhashushanyizi burhegesi buguma bone erhi bwami buguma bw’omw’igulu. Yowane adesire oku ciri nk’ecirhambwire “ngasi bûko, na ngasi mulala, na ngasi lulimi, na ngasi ishanja.” Co cirhumire cishinganine cibe cinene kulusha ngasi burhegesi boshi bw’ishanja. (Maf. 13:7) Eco ciryanyi, cishinganine cibe erhi cishushanyize amarhegesi goshi g’epolitike makulu gamakarhegeka bene bantu kuhika buno. (Muh. 8:9) Akandi kantu kuli kubona oku kanji-kanji omubalè ikumi gunakakolesibwa omu Bibliya omu kuganirira ebintu biyenire. w22.05 buk. 9 cif. 6

Bandi bayish’ishagalukira ebyo bintu binja? Burhangiriza, hiri hitû hy’abantu bayish’icunguka ivita lya Armagedoni n’abana bayish’iburhwa omw’igulu lihyahya. Cikone kandi ecitabu c’Amafulûlo cigabi ca 20, cilaganyize oku abafîre bayish’ifûka. (Maf. 20:11-13) “Abashinganyanya” bafîre n’“abarhali bashinganyanya” barhabaga n’obulyo bw’okuyiga okubiyerekire Yehova, bayish’igalulirwa obuzîne hanw’igulu. (Ebj. 24:15, NWT; Yn. 5:28, 29) Ka ko kuderha oku ngasi muntu wafîre ayish’ifûka omu kasanzi k’Oburhegesi bw’Emyaka Cihumbi? Nanga. Abalahire n’obulonza okukolesa obulyo bagwerhe bw’okukolera Yehova embere bafê barhakafûka. Bagwerhe oluhya lw’okukolera Yehova banayerekana oku barhalonzizi okulama omu Paradizo hanw’igulu.​—Mt. 25:46; 2 Ts. 1:9; Maf. 17:8; 20:15. w22.05 buk. 18 cif. 16-17

Kugerera “mushizi mwirhonzi na mwikubagirwa,” Yezu arhondezize ikubuliro lyago-lyago hanw’igulu lyo ligendekeza enterekêro ecîre. (Mt. 24:45) Gurhi ociyumva lugenda er’ikubuliro? Nkaba onaciyumve ak’entumwa Petro yabwiraga Yezu enderho z’olwandiko lw’olusiku lw’ene. Gurhi ngasi muguma wirhu akabire ene, nk’arhamanyaga ikubuliro lya Yehova? Kugerera er’ikubuliro, Yezu ali ajira rhulisibwe bwinja omu hali y’ekiroho. Na kandi, ali arhukomereza lyo rhuhikiriza bwinja omukolo gw’amahubiri. Ananali arhurhabala rhuyambale “omuntu muhyahya,” lyo rhushagalusa Yehova. (Ef. 4:24) Yezu ali arhuha obulongozi bwinja omu mango g’amazibu. Rhwabwine obunguke bw’obo bulongozi erhi obu bulwala bw’e COVID-19 burhondera. Omu mango bantu banji ba mw’er’igulu barhal’imanyire gurhi bajira, Yezu arhuhîre obulongozi bw’obwalagale lyo rhugendekera rhwaba n’amagala minja. w22.07 buk. 12 cif. 13-14

Yehova al’irhegesire Abaisraheli ba mîra oku ngasi mango bakayigiriza abana babo okubimuyerekire. (Lush. 6:6, 7) Ngasi lusiku abo babusi bagwerhe obulyo bw’okuganiza abana babo n’okubayigiriza okuzigira Yehova. Kwa lwiganyo, omwana-­rhabana Muisraheli akabire n’akasanzi k’okugeza haguma n’ishe amango ali amurhabala okurhwera emburho erhi okusarula. Mwali wabo naye agwerhe akasanzi kanji k’okugeza haguma na nnina omu kuhanga, kusuka bintu bilebe, n’omu yindi mikolo y’aha kâ. Okubona ababusi n’abana bakag’ikola haguma, bakaganirire myanzi minji ya bulagirire. Kwa lwiganyo, bakaganirire okubiyerekire oborhere bwa Yehova bw’obwinja bakanarhanyize kunganaci Yehova arhabire omulala gwabo. Omu bihugo binji, babusi banji barhacijira akasanzi k’okugeza haguma n’abana babo omu mulegerege. Ababusi banaba bali omu kazi, n’abana banaba bali emasomo. Oko kwanarhuma ababusi bajira okwabo koshi lyo babona obulyo bakaganiramwo haguma n’abana babo.​—Ef. 5:15, 16. w22.05 buk. 28 cif. 10-11

Ecaha cizibu kuba kuvuna irhegeko lya Nnâmahanga omu njira mbi bwenene. Erhi Omukristu akajira ecaha ca ntyo, akwanine ayegere Yehova kugerera isala, n’okugend’ibona abagula lyo bamurhabala. (Enna. 32:5; Yk. 5:14) Omukolo gw’abagula muli ako kanga guba guhi? Yehova yene ojira obuhashe bw’okubabalira ebyaha loshi-loshi, ananajire ntyo kugerera engombôlo. Cikone, Yehova ahîre abagula omukolo gw’okuhiga kugerera Amandiko erhi omunya-byaha anacibêra omu cigamba erhi nanga. (1 Kr. 5:12) Egarhi k’ebintu bajira lyo bahikiriza ogo muhigo, kuba kulonza amashuzo kw’aga madoso: K’oyo muntu anajijire eco caha n’obulonza? K’oyo muntu alipanzire embere z’akasanzi oku ajira eco caha? Ka liguma lyone ajijire eco caha erhi hamagera nsiku nyinji ali acijira? N’akantu k’obulagirire bwenene, ka hali ebimanyiso biyerekine oku aciyunjuzize n’omurhima goshi? Ka hali ebimanyiso biyerekine oku Yehova amubabalire?​—Ebj. 3:19. w22.06 buk. 9 cif. 4

Yezu ahûnyire abanafunzi bage bashimbulire obushinganyanya. (Mt. 5:6) Oko kuli kuderha oku omuntu ashinganine abe n’irala linene ly’okujira ebintu bishinganine, binja na bicîre omu masu ga Nnâmahanga. K’oba ozigire okuli n’obushinganyanya? Rhuyemire n’obwalagale oku oba obizigire. Onashombe obunywesi n’ebintu byoshi birhashinganini na bigalu-galu. (Enna. 119:128, 163) Obunywesi bunayerekane oborhere bwa Shetani, murhegesi w’er’igulu. (Yn. 8:44; 12:31) Muhigo muguma omu mihigo ya Shetani kuba kuzinza izino litagatifu lya Yehova Nnâmahanga. Kurhenga obugoma bw’omu Edeni Shetani agendekire alumiza obunywesi lugenda Nnâmahanga wirhu. Ajijire okwage koshi ly’abantu barhanya oku Yehova aba Murhegesi wa kucikaliza orhali mushinganyanya oyima abantu ebintu binja. (Murh. 3:1, 4, 5) Obunywesi Shetani aderhera Yehova bugendekire bwarhuma abantu barhanyiza Yehova kubi. Erhi abantu bacishoga okurhalongereza erhi okurhazigira okuli, Shetani anabashumya bakajira ngasi bintu birhashinganini na bigalu-galu.​—Rm. 1:25-31. w23.03 buk. 2 cif. 3

Omu mango oli wajira okwawe koshi ly’ohima nkomedu ndebe mbi, hali amango wakacib’igalukira eyo nkomedu. Erhi wanaciyumva nk’orhacihashiri okulembera wananavunika omurhima bulya oli wabona nk’orhahashe okuhikira omuhigo gwawe. Bici byakakurhabala ly’olembera? Oborhere bw’obulagirire bwakakurhabala buli buzigire kuli Yehova. Obuzigire bwawe kuli Yehova buba borhere bwinja bwenene, ko kantu kinja bwenene ojira. (Mig. 3:3-6) Obuzigire bunji kuli Nnâmahanga bwanakurhabala ly’olwisa bwinja amazibu g’akalamo. Ebibliya eganirire kanji-­kanji obuzigire bwishwekerezi Yehova ayeresa abakozi bage. Obuzigire bwishwekerezi kuli kuderha oku nta lusiku Yehova akalekerera abakozi bage erhi aleke okubazigira. Walemirwe oku nshusho ya Nnâmahanga. (Murh. 1:26) Gurhi wakayerekanamwo obuzigire bwa ntyo? Orhondere omu kuba wa kuvuga omunkwa. (1 Ts. 5:18) Ngasi lusiku okacidosa ntya: ‘Gurhi Yehova anyeresiremwo obuzigire?’ Buzinda ocihangane okuvuga Yehova omunkwa omu masala gawe, omu kuderha bintu bilebe akujirire. Ohugûkwe oku Yehova anakujirire ebintu binja bulya aba akuzigire. w23.03 buk. 12 cif. 17-19

Yezu ajirire entumwa zoshi 12 omu njira nyinja na ya buzigire. Isomo lihi oko kurhuyigirizize? Akantu k’obulagirire arhali oku abandi bantu bajira kone cikone kandi oku rhujira lugenda amagosa n’obuzamba bwabo. Erhi owirhu mwemezi akarhugayisa, rhwanacidosa ntya: ‘Bici birhumire ebi anajijire byangayisa bwenene? K’oku kurhayerekini oku hali buzamba bulebe nshinganine ndwise? K’arhakaba oyo muntu wangayisize ali alwisa mazibu malebe? Ciru akaba ndi naciyumva oku ngwerhe ecirhumire cinja c’okugaya, ka ntakamuyeresa obuzigire n’okumubabalira?’ Oku rhwagendekera rhwajirira abandi omu njira y’obuzigire, ko rhwanagendekera rhwayerekana oku rhuli banafunzi b’okuli ba Yezu. Kandi olwiganyo lwa Yezu lurhuyigirizize oku rhukacihangana rhumanye bwinja abirhu bemezi. (Mig. 20:5) Kobinali, Yezu al’igwerhe obuhashe bw’okusoma emirhima. Rhwehe rhurhagwerhi obo buhashe. Cikoki rhwanahasha okulembera bene wirhu na bali birhu amango barhugokize. (Ef. 4:1, 2; 1 Pt. 3:8) Kwanaba kulembu kuli rhwe okujira ntyo erhi rhwakacihangana okuyiga binji kuli bo. w23.03 buk. 30 cif. 14-16

Shetani anakolesa akanga kazibu rhulimwo k’okubukwa duba-duba ly’arhushumya rhuvune amarhegeko ga Yehova. Badogtere erhi abantu b’omulala gwirhu barhali Bahamirizi ba Yehova banarhuseza oku rhuyemere okuhirwamwo omuko, n’obo okujira ntyo kuli kuvuna irhegeko lya Nnâmahanga. Kandi erhi muntu mulebe analonza okurhushumya lyo rhuyemera njira ndebe y’okubukwa erhapatini n’Amandiko. Ciru akaba rhurhaba rhulonzize okufâ, rhuba rhumanyire oku Yehova arhakaleka okurhuzigira ciru rhwakafâ. (Rm. 8:37-39) Erhi abîra ba Yehova bafâ, anagendekere ababîka omu bukengere bwage, banabe nk’abacizîne. (Lk. 20:37) Aba agwerhe irala ly’okubagalulira obuzine. (Ayu. 14:15) Yehova alipire ibeyi likali bwenene lyo ‘rhubona obuzine bw’ensiku n’amango.’ (Yn. 3:16) Rhumanyire oku Yehova aba arhuzigire bwenene ananarhushibirire. Co cirhumire, ahali h’okuleka Yehova amango rhulwazire erhi amango rhuli omu kanga kazibu, rhunamuhûne arhurhulirize, arhuhe obwenge, n’emisi.​—Enna. 41:3. w22.06 buk. 18 cif. 16-17

Ebibliya edesire ntya: “Okurhinya Yehova go murhondero gw’obwenge, n’okumanya Omutagatifu Bwenene ko kuhugûkwa ebintu.” (Mig. 9:10, NWT) Co cirhumire, erhi rhwakaba rhugwerhe omuhigo gw’obulagirire bwenene gw’okurhôla, gushinganine guyimangire oku ntanya za Yehova, k’okuderha “okumanya Omutagatifu Bwenene.” Rhwanajira ntyo omu kulola ebi Ebibliya edesire n’ebicapo birhu. Erhi rhujira ntyo, rhunayerekane obwenge bw’okunali. (Mig. 2:5-7) Yehova yene wakarhuha obwenge bw’okunali. (Rm. 16:27) Bulya gurhi rhwakaderha oku Yehova ye Nshôko y’obwenge? Burhangiriza, bulya ye Mulemi, agwerhe obumanye burhagwerhi lugero anaba ahugûsirwe bwinja ebintu alemire. (Enna. 104:24) Bwa kabirhi, ngasi ebi Yehova ajira byoshi binayerekane oku agwerhe obwenge. (Rm. 11:33) Bwa kasharhu, amahano ga Yehova g’obwenge ensiku zoshi ganalerhere obunguke abagakolesa. (Mig. 2:10-12) Erhi akaba rhulonzize rhube n’obwenge bw’okunali, rhugwasirwe rhuyemere ebyo bintu bisharhu by’omusingi n’okuleka bikalongoza emihigo yirhu n’ebijiro birhu. w22.10 buk. 19 cif. 3-4

Shetani ahimwa omw’ivita lyalebagwa omu citabu c’Amafulûlo cigabi ca 12 na ye n’abazimu bage bajugucirwa okw’igulu. Oko kwarhuma igulu ‘lyahanyagala,’ bulya Shetani akunire bwenene anali arhera bene bantu. (Maf. 12:9-12, Mashi Bible) Gurhi obo bulebi bwakarhulerheramwo obunguke? Ebyakajire byaba omw’igulu n’okushanja kw’oborhere bw’abantu birhurhabire rhuhugûkwe oku Yezu akola ali arhegeka. Co cirhumire, ahali h’okugaya omu kubona abantu bali baminya banali bacikaliza, rhushinganine rhukengere oku ebijiro byabo biri byahikiriza obulebi bw’Ebibliya. Obwami bwa Nnâmahanga buli bwarhegeka! (Enna. 37:⁠1) N’oku ivita lya Armagedoni ligendekire lyayegera, ko n’amazibu gagendekera gayushuka bwenene omw’igulu. (Mk. 13:8; 2 Tm. 3:13) Rhuvuzire omunkwa bwenene okubona Larha wirhu w’obuzigire w’omu mpingu arhurhabire okuhugûkwa bulya gurhi hali mazibu manji bwenene mw’er’igulu. w22.07 buk. 3-4 cif. 7-8

Rhwanashenga Yehova arhabale abirhu bemezi okulembera endwala, obuhanya, amavita, okulibuzibwa, n’agandi mazibu. Na kandi rhwanasalira enyanya za bene wirhu na bali birhu bali bacihâna lyo barhabala abali omu bulagirire. Nkaba wanaba erhi omanyire bene wirhu na bali birhu baguma na baguma bali balwisa amazibu ga ntyo. Wanaderha amazino gabo omu masala gawe. Rhunayerekane obuzigire bw’okunali kuli bene wirhu na bali birhu omu kukashenga Yehova abarhabale lyo bahasha okulembera ago mazibu. Abali balongoza omu cigamba baba balagirire bwenene oku masala g’abandi gananabarhabale. Paolo naye al’imanyire oku al’ilagirire oku masala g’abandi. Ayandika ntya: “Munsengerere nani, lyo mbona oku nabumbûla akanwa, nderhe nampanule n’oburhwali ihwe ly’Emyanzi y’Akalembe.” (Ef. 6:19) Ene nalyo, rhugwerhe bene wirhu banji bali barhulongoza bakola n’obushiru bwenene. Rhunayerekane oku rhubazigire omu kukashenga Yehova agishe omukolo gwabo. w22.07 buk. 23-24 cif. 14-16

Omusoda anayambale ensirha y’ecuma ly’elanga irhwe lyage. Omw’ivita lirhu ly’ekiroho, rhushinganine rhulange entanya zirhu lyo zirhag’ihikwako n’ebirhero bya Shetani. Anakolese bintu binji ly’arhurhangula n’okushereza entanya zirhu. Nka kula ensirha y’ecuma elanga irhwe ly’omusoda, obulangalire bwirhu bunalange entanya zirhu lyo rhugendekera okubêra bishwekerezi kuli Yehova. Erhi obulangalire bwirhu bwakazambanya rhukanaleka entanya z’omubiri ziyunjule omu bukengere bwirhu, rhwanayibagira obulangalire bwirhu bw’obuzine bw’ensiku n’amango. Orhanye lugenda ebyahikiraga Bakristu baguma na baguma bal’ilamire omu vile y’e Korinti ya mira. Bahêza obuyemere omu ciragane ciguma c’obulagirire ca Nnâmahanga, k’okuderha obulangalire bw’obufûke. (1 Kr. 15:12) Paolo ayandika oku abantu barhajira bulangalire lugenda akalamo k’amango gayisha banalame nk’oku banalonzize. (1 Kr. 15:32) Ene, bantu banji barhagwerhi obulangalire omu biragane bya Nnâmahanga banalame nk’oku banalonzize omu kujira ngasi kantu bakanahasha lyo bacishagalusa omu kalamo. Cikone rhwehe rhulangalire akasanzi kayisha Nnâmahanga arhulaganyize. w22.10 buk. 25-26 cif. 8-9

Yehova akuhûnyire oku okamuyegera kugerera isala. Anabone amazibu oli walwisa, anakuyemezize n’obwalagale oku ayumvirhiza amasala gawe akasanzi koshi-koshi. Anashagaluke okuyumvirhiza amasala g’abantu bamuharamya. (Mig. 15:8) Bici wakaderha omw’isala lyawe amango oli waciyumva kahumba? Obwire Yehova oku oli waciyumva koshi. (Enna. 62:8) Omubwire ebiri byakuhangayisa byoshi n’oku biri byarhuma waciyumva. Ohûne Yehova akurhabale ly’olwisa ezo ntanya z’okuciyumva kahumba anakuhe oburhwali olagirireko ly’ohash’ihubiri. Ciru wanamuhûna akuhe obwenge ly’ohash’ihugûla obuyemere bwawe omu njira y’obwirhonzi. (Lk. 21:14, 15) Erhi akaba oli walwisa entanya z’okuvunika omurhima, ohûne Yehova akurhabale oganire n’Omukristu okuzire kiroho lugenda oku oli waciyumva. Wanahûna Yehova arhabale oyo Mukristu wabwira ebikuli e murhima ahugûkwe oku oli waciyumva. Olabe gurhi ashuza oku masala gawe, onayemere oburhabale bw’abandi; erhi wakajira ntyo orhakaciciyumva kahumba bwenene. w22.08 buk. 10 cif. 6

Ecigamba cihyahya c’e Tesalonika cahagalikwa bwenene. Ecigusho c’abantu baminya bakulurhula “bene wirhu baguma babahekêra abarhegesi b’evile.” (Ebj. 17:6) Ka wanarhanya kunganaci abo Bakristu bahyahya bayobohire? Bakanyihize obushiru bwabo omu mukolo gwa Yehova, cikone entumwa Paolo erhalonzagya oko kubahikire. Ajira okwage koshi ly’eco cigamba cihyahya cishibirirwa bwinja. Paolo akengeza Abatesalonika ntya: “Rhwarhuma Timoteyo, mwene wirhu . . .  nti ammuzibuhye anammukomeze omu buyemere bwinyu, lyo harhag’ijira owarha omurhima muli ago malibuko.” (1 Ts. 3:2, 3) Timoteyo acibwinire gurhi Paolo azibuhize bene wabo na bali babo b’e Listra. Bulya Timoteyo acibwinire gurhi Yehova arhabire abo Bakristu b’e Listra, akahash’iriyemeza n’obwalagale abo bene wabo na bali babo bahyahya oku barhal’ishinganine bayobohe akantu koshi-koshi.​—Ebj. 14:8, 19-22; Hb. 12:2. w22.08 buk. 21 cif. 4

Oku buzinda bw’emyaka egarhi ka 1801 na 1900, ecigusho c’Abanafunzi b’Ebibliya cakag’ilongozibwa na Charles Taze Russell carhondera okuyiga Amandiko kwa buzibu-zibu. Bal’ilonzize bamanye okuli lugenda obunguke bw’enterekêro ya Yezu na gurhi olufû lwage lushinganine lukakengerwa. Ene, rhuli rhwayunguka n’obusagasi bwabo. Omu njira nci? Rhwahugûsirwe okuli lugenda enterekêro ya Yezu n’ebi eri yahikiriza. (1 Yn. 2:1, 2) Kandi rhwayizire oku hali malangalire abirhi Ebibliya ehîre abantu bashagalusa Nnâmahanga: baguma bahabwa obuzine burhakacifâ empingu n’abandi bantu bahabwa obuzine bw’ensiku n’amango hanw’igulu. Rhunayegere Yehova bwenene erhi rhurhanya gurhi aba arhuzigire bwenene na gurhi ngasi muntu ayunguka n’enterekêro Yezu ahânaga. (1 Pt. 3:18) Co cirhuma, ak’abirhu bemezi b’omu mango ga mîra, rhunalalike abandi bantu bacilunge haguma na nirhu omu kukengera olufû lwa Yezu omu njira ayigirizagya abanafunzi bage bakalukengeramwo. w23.01 buk. 21 cif. 6-7

Yezu ayigirizize abantu okubiyerekire emigisho Obwami bwa Nnâmahanga bwayish’ilerha. Rhunavuge omunkwa lugenda engombôlo bulya enarhuhashise okuba n’obwîra bwa hofi-hofi haguma na Yehova na Yezu. Abantu bayerekana obuyemere muli Yezu bagwerhe n’obulangalire bw’okulama ensiku n’amango n’okucib’ibona abazigirwa babo bafîre. (Yn. 5:28, 29; Rm. 6:23) Nta kantu koshi-koshi rhwajijire lyo rhushinganana okuhâbwa eyo migisho; na ntaco rhwakalyula Yehova na Yezu kw’ebi barhujirire. (Rm. 5:8, 20, 21) Cikone rhwanabayeresa oku rhuvuzire omunkwa bwenene. Gurhi rhwakajiramwo ntyo? Omu kuhâna oburhabale lyo rhugendekeza omukolo gw’Obwami. Kwa lwiganyo, rhwanacihâna lyo rhurhabala oku mukolo gw’okuyubaka n’okushibirira enyumpa rhukolesa omu nterekêro ecîre. w23.01 buk. 26 cif. 3; buk. 28 cif. 5

Abayish’irhegeka omu Bwami bwa Nnâmahanga bayish’iba n’omukolo gw’okushibirira emiliyare y’abantu omw’igulu lyoshi. Aka Yezu, abantu 144 000 bayish’ikola nka bami na bakuhani. (Maf. 5:10) Amango Abaisraheli bakag’irhumikira Irhegeko lya Musa, bwenene abakuhani bo bal’igwerhe omukolo gw’okurhabala abantu lyo bagendekera baba n’amagala minja g’omubiri n’ehali nyinja y’ekiroho. Irhegeko lyali “cizunguzungu c’aminja gayisha,” co cirhumire rhwanaderha oku abantu bayish’irhegeka haguma na Yezu bayish’irhabala oku mukolo gw’okushibirira amalagirire g’omubiri n’ag’ekiroho g’abantu ba Nnâmahanga. (Hb. 10:1) Rhurhamanyiri gurhi abo bami n’abakuhani bayish’ikashambazamwo bacikala b’Obwami bwa Nnâmahanga bali okw’igulu. Rhwanayemera n’obwalagale oku omu Paradizo yayisha, abantu bayish’ilama okw’igulu bayish’ikahabwa obulongozi balagirireko.​—Maf. 21:3, 4. w22.12 buk. 11 cif. 11-13

Ecirhumire cirhanzi cirhushumya rhulalike abandi bantu bayishe rhukengere haguma olufû lwa Yezu kuli kuba rhuba rhulonzize abayishire oburhangiriza oku ntimanano y’Okukegera olufû lwa Yezu bayige okuli lugenda ebi Yehova na Yezu barhujirire rhweshi. (Yn. 3:16.) Rhuba rhulangalire oku ebi babona n’okuyumva kw’eyo ntimanano byabashumya balonze okumanya binji n’okuba bakozi ba Yehova. Kandi rhunalalike abantu balesire omukolo gw’amahubiri. Rhunajire ntyo lyo rhubakengeza oku Nnâmahanga aciba abazigire. Banji banashuze oku mulali gwirhu rhunanashagaluke bwenene okubabona. Okuja oku ntimanano y’Okukengera olufû lwa Yezu kunabakengeze gurhi bal’ishagalukire okukolera Yehova omu mango gageraga. (Enna. 103:1-4) Ciru abantu bakayemera omulali gwirhu erhi bagulahire, rhunalalike abandi n’obushiru bunji oku ntimanano y’Okukengera olufû lwa Yezu, bulya rhuba rhumanyire oku Yehova anashagalukire ngasi muntu oyishire oku ntimanano y’Okukengera olufû lwa Yezu.​—Lk. 15:7; 1 Tm. 2:3, 4. w23.01 buk. 20 cif. 1; buk. 22-23 cif. 9-11

Omu budufu bw’embere Yezu afê, ajijire isala lyago-lyago. Ahûna Yehova, Ishe w’omu Mpingu, oku alange abanafunzi bage. (Yn. 17:15, 20) Ensiku zoshi Yehova analange n’okushibirira abantu bage. Cikone, Yezu al’imanyire oku Shetani akahagalisire bwenene abanafunzi bage. Kandi Yezu al’imanyire oku bakalagirire oku burhabale bwa Yehova lyo bahima ebirhero by’omubisha Shetani. Er’igulu lirhambwirwe na Shetani liri lyalerhera Abakristu mazibu manji muli gano mango. Rhuli rhwarhimanana n’amazibu gakarhuvuna omurhima na ciru gakajira kube kuzibu kuli rhwe okubêra bishwekerezi kuli Yehova. Cikone, ntaco rhwakayoboha. Yehova ali arhulanga; ali abona amazibu rhuli rhwalwisa na ngasi mango aba mubidu okurhurhabala lyo rhugalwisa. Kobinali, Yehova “analange abamukenga . . . mpu abaciza oku lufu.”​—⁠Enna. 33:18-20, Mashi Bible. w22.08 buk. 8 cif. 1-2

Ngasi mwaka, omu migobe y’embere n’enyuma z’olusiku lw’Okukengera olufû lwa Yezu, rhunayerekane oku rhuvuzire omunkwa kw’ebi Yezu arhujirire omu kuciha akasanzi k’okusalira n’okurhanya bwenene oku bunguke olufû lwage lurhulerhera. Kandi rhunalalike bantu banji nk’oku binahashikine bacilunge haguma na nirhu kw’eyo ntimanano yago-yago. Na kandi, rhunahige okurhaleka akantu koshi-koshi karhume rhurhaja oku ntimanano y’Okukengera olufû lwa Yezu. Oku ntimanano y’Okukengera olufû lwa Yezu, rhunayige bulya gurhi bene bantu balagirire oku ngombôlo na gurhi olufû lwa muntu muguma yene lwakalyula ebyaha by’abantu banji. Rhunakengezibwe ebi omugati n’idivayi bishushanyize na bandi bashinganine okulya omugati n’okunywa idivayi. (Lk. 22:19, 20) Kandi rhunarhanye bwenene oku migisho abashagalukira obulangalire bw’okulama hanw’igulu bayish’iba nayo omu mango gayisha. (Iz. 35:5, 6; 65:17, 21-23) Rhurhashinganini rhukabona nk’ezo nyigirizo zirhali za bulagirire. w23.01 buk. 20 cif. 2; buk. 21 cif. 4

Omu kuhâna Omugala ngombôlo y’okufunika ebyaha birhu, Nnâmahanga arhuhashisize rhube n’obuzine bw’ensiku n’amango. (Mt. 20:28) Entumwa Paolo yayandika erhi: “Bulyala muntu wadwirhe olufû, kwo na kwo muntu wadwirhe okufûka kw’abafîre. Neci, nka kulya boshi bafâ muli Adamu, kwo na boshi bayishishubiramwo omûka muli Kristu.” (1 Kr. 15:21, 22) Yezu ayigirizize abanafunzi bage oku bakashenga Obwami bwa Nnâmahanga buyishe n’obulonza bwa Nnâmahanga bujirikane hanw’igulu. (Mt. 6:9, 10) Ecindi cigabi c’omuhigo gwa Nnâmahanga kuli kujira abantu balame ensiku n’amango hanw’igulu. Ly’ahikiriza ogo muhigo, Yehova acishozire Omugala abe Mwami w’Obwami bw’Ecimasiya. Nnâmahanga agendekire agusha bantu 144 000 kurhenga omu igulu lyoshi lyo bakola haguma na Yezu omu kuhikiriza omuhigo gwa Nnâmahanga.​—Maf. 5:9, 10. w22.12 buk. 5 cif. 11-12

Erhi rhufîrwa n’omuzigirwa wirhu, rhunamudule bwenene! Oku murhondero, nkaba rhwanayumva amalumwa manji, bwenene erhi akaba oyo muzigirwa wirhu alibusire bwenene embere afê. Cikone, erhi hagera kasanzi, nkaba rhwanarhondera okuyumva omwishingo erhi rhwakarhanya kuli kantu kalebe arhuyigirizize erhi kantu kalebe aderhaga erhi kujira ly’arhuha omurhima erhi kurhujira rhumwemwerhwe. Ko n’oko, rhunagaye erhi rhusoma lugenda amalibuko n’olufû lwa Yezu. Omu migobe y’embere n’enyuma z’olusiku lw’Okukengera olufû lwa Yezu, rhunacihe akasanzi lyo rhurhanya bwenene lugenda kunganaci enterekêro y’engombôlo eba ya bulagirire bwenene kuli rhwe. (1 Kr. 11:24, 25) Cikone, rhunabe n’omwishingo munji erhi rhurhanya bwenene oku bintu byoshi Yezu adesire n’okujira amango ali hanw’igulu. Kandi rhunahâbwe omurhima erhi rhurhanya kw’ebi Yezu ali ajira ene na kw’ebi arhujirira omu mango gayisha. w23.01 buk. 26 cif. 1-2

Abanafunzi ba Yezu bagayire bwenene erhi afâ. Barhahezagya kone omwîra wabo bal’izigire cikone kandi bakag’iciyumva bahezize n’obulangalire bwabo. (Lk. 24:17-21) Cikone, erhi Yezu ababonekera acihâ akasanzi k’okubarhabala bahugûkwe gurhi ahikirizizemwo obulebi bw’Ebibliya. Kandi abahâ omukolo gw’obulagirire gw’okujira. (Lk. 24:26, 27, 45-48) Erhi Yezu agaluka e mpingu, abanafunzi bage barhac’ibabalaga cikone baba na mwishingo munji. Okumanya oku Nnawabo azîne n’oku ali mubidu okubarhabala bahikirize omukolo muhyahya abahaga kwarhuma baba n’omwishingo. Omwishingo gwabo gwabashumya bakuze Yehova burhahusa. (Lk. 24:52, 53; Ebj. 5:42) Lyo rhuyiga olwiganyo lw’abanafunzi ba Yezu rhugwasirwe rhuhire Obwami bwa Nnâmahanga oku nafasi ntanzi omu kalamo kirhu. Ciru akaba rhushinganine rhulembere lyo rhukolera Yehova burhahusa, alaganyize oku arhugisha bwenene erhi rhwakajira ntyo.​—Mig. 10:22. w23.01 buk. 30-31 cif. 15-16

Kobinali, rhurhalonzizi rhujire igosa Adamu na Eva bajiraga. Erhi rhwakagendekera rhwayiga okubiyerekire Yehova, okushagalukira amorhere gage, n’okucihangana lyo rhuhugûkwa entanya zage, ebyo birhakarhuhikira. Erhi rhwakajira ntyo, buzira karhinda obuzigire bwirhu kuli ye bwanayushuka. Orhanye lugenda Abrahamu. Kobinali al’izigire Yehova. Abrahamu arhalekaga okurhumikira Yehova ciru n’amango kwali kuzibu kuli ye okuhugûkwa emihigo ya Yehova. Lubero n’oko, ajira okwage koshi ly’ahikira aha amanya Yehova bwinja. Kwa lwiganyo, erhi Abrahamu amanya oku Yehova agwerhe omuhigo gw’okushereza evile y’e Sodoma na Gomora, oku murhondero ayoboha oku “omutwi w’emmanja w’igulu lyoshi” ahererekeza abashinganyanya haguma n’enkola-maligo. Abrahamu abona oku oko kurhakahashikana, n’omu bwirhohye adosa Yehova madoso manji. Na Yehova amulembera anamushuza. Buzinda, Abrahamu ahikira aha ahugûkwa oku Yehova analolereze omurhima gwa ngasi muntu n’oku nta lusiku akahana omuntu mweru-kweru haguma n’ogwerhe igosa.​—Murh. 18:20-32. w22.08 buk. 28 cif. 9-10

Omu mwaka gwa 455 Embere za Kano Kasanzi Kirhu (E.K.K.K.), enyuma za Guvernere Nehemiya okucib’iyubaka enkuta za Yeruzalemu, alonza abalume bikubagirwa bakagendekire bashibirira olo lugo. Muli aba Nehemiya acishogaga, acishoga na Hananiya oku abe murhambo w’Olugo Luzibu-zibu. Ebibliya edesire oku Hananiya “âli mwikubagirwa na wa bushinganyanya; akengaga Nnâmahanga kulusha abandi boshi.” (Neh. 7:2, Mashi Bible) Bulya Hananiya al’izigire Yehova anakag’iyoboha okumugayisa, oko kwamushumya akarhôla kwa buzibu-zibu ngasi mukolo akag’ihâbwa. Ago morhere nirhu ganarhurhabala rhube ba kucikubagirwa omu mukolo gwa Nnâmahanga. Rhuganirire olwiganyo lw’omwîra Paolo akag’ilangalira ohamagalwa Tikiko. Paolo al’ilangalire Tikiko, aderha oku ali “murhabazi mwikubagirwa.” (Ef. 6:21, 22, Mashi Bible) Arhali kuhêkera bene wirhu b’omu Efezi n’omu Kolosi amaruba kone kwarhumire Paolo amulangalira, cikone kandi al’ilangalire oku abaha omurhima n’okubarhuliriza. Tikiko arhukengezize olwiganyo lw’abalume b’obuyemere na bikubagirwa bali bashibirira amalagirire girhu g’ekiroho ene.​—Kl. 4:7-9. w22.09 buk. 9-10 cif. 5-6

Yozefu ahikirwa n’amazibu madarhi gayusagya hofi myaka 13. Yozefu akacidosize erhi kobinali Yehova al’imuzigire. Kandi akarhanyize oku nkaba Yehova al’imulikirire mw’ako kasanzi al’ilagirire oku burhabale. Cikone Yozefu arhabîkaga akarhinda omu murhima. Lubero n’oko, alanga enkengero zage omu kugendekera arhulirira. Erhi aba n’obulyo bw’okucihôla kuli bakulu bage, arhajiraga ntyo, cikone abayeresa obuzigire anabababalira. (Murh. 45:4, 5) Yozefu ajijire ntyo bulya agwerhe obuhashe bw’okurhanya bwinja. Ahali h’okusegeza obwenge oku mazibu gage, abusegeza oku muhigo gwa Yehova. (Murh. 50:19-21) Bici oko kurhuyigirizize? Erhi wakajirirwa kubi, orhabîkiraga Yehova akarhinda erhi kurhanya oku akulikirire. Ahali h’okujira ntyo, okarhanya bwenene lugenda gurhi ali akurhabalamwo ly’olembera er’irhangulo. Kandi, erhi abandi bakakujirira kubi, ocihangane ofunike obuzamba bwabo kugerera obuzigire. w22.11 buk. 21 cif. 4

Omulebi Daniyeli abwine ebibonekerezi byayerekanaga n’obwalagale oku oburhegesi bwa Yehova buli bukulu bwenene kulusha agandi marhegesi goshi. Burhangiriza, Daniyeli abona biryanyi bini bishushanyize amarhegesi makulu g’igulu lyoshi g’omu mango ga mîra, ko kuderha Babiloni, Abamedi n’Abapersi, Obugiriki, na Roma n’oburhegesi bukulu bw’igulu lyoshi bwa muli gano mango girhu, k’okuderha, Angleterre na Amerika. (Dan. 7:1-3, 17) Buzinda, Daniyeli abona Yehova Nnâmahanga atamîre omu ntebe y’obwami omu kagombe k’omu mpingu. (Dan. 7:9, 10) Nnâmahanga anyaga abarhegesi ba bene bantu oburhegesi boshi anabuha abandi bashinganine bwenene banagwerhe buhashe bunji. Bandi abuhîre? Abuha “oli nka mwene omuntu,” ko kuderha Yezu Kristu, n’“abatagatifu b’Ow’Enyanya bwenene,” ko kuderha abantu 144 000 bayish’irhegeka “ensiku n’amango.” (Dan. 7:13, 14, 18) Bibonekine n’obwalagale oku Yehova ye “Ow’Enyanya bwenene.” Ebyo Daniyeli abonaga omu cibonekerezi bipatine na kantu kaguma aderhaga embere z’aho. Daniyeli aderha ntya: “Nyamuzinda w’empingu . . .  ye oyimika abami ayimûle n’abandi.”​—Dan. 2:19-21. w22.10 buk. 14-15 cif. 9-11