Mwezi gwa 4

Ocidose ntya: ‘Gurhi njira erhi bampa amahano? Ka nampugûkwe duba-duba amagosa najijire, erhi nanjire okwani koshi lyo ndonza okucihalira? Ka nantumuze ho n’aho muntu mulebe oku ye warhumaga najira ago magosa? Amango oli wasoma emyanzi eganirirwe omu Bibliya okubiyerekire abalume n’abakazi bishwekerezi, orhanye gurhi balwisize amazibu gashushine n’ago. Omu ngasi kanga, ocidose ntya: ‘Gurhi nakayigamwo olwiganyo lw’oyu mukozi mwishwekerezi wa Yehova?’ Na kandi, rhwanayunguka omu kuyiga olwiganyo lw’abirhu bemezi, emisole n’abashosi. Kwa lwiganyo, ka wanarhanya okubiyerekire muntu mulebe w’omu cigamba cinyu oli walembera amazibu n’obwishwekerezi, nkaba kwanaba kusezibwa okujira ebintu birhashinganini, okuhagalikwa n’abantu b’omu mulala, erhi bulwala? K’oyo muntu agwerhe amorhere minja wakalonza obe nago kulusha? Omu kulola olwiganyo lwage lwinja, wanaciyigiriza gurhi wakalemberamwo amazibu gawe. Rhushagalusire bwenene okuba n’enyiganyo z’obuyemere rhushinganine rhuyige. Kobinali, abo bene wirhu na bali birhu bali cirhumire c’okucishinga!—Hb. 13:7. w22.04 buk. 13 cif. 13-14

Amango rhugwerhe mazibu malebe, rhunashagaluke bwenene erhi omugula w’obuzigire akaciha akasanzi k’okurhuyumvirhiza n’okurhuha oburhulirize. Amango rhugwerhe amazibu g’okulongoza ifunzo, rhunashagaluke bwenene erhi painiya ogwerhe obulenga akarhulusa kw’er’ifunzo n’okurhuha amahano. Abo bene wirhu na bali birhu boshi banashagalukire okurhurhabala. Na nirhu rhwanaba n’omwishingo gwa ntyo erhi rhwakakaba babidu okukolera bene wirhu na bali birhu. Erhi akaba olonzize okujira binji omu mukolo gwa Yehova muli ezo njira erhi omu zindi, bici byakakurhabala ly’ohikiriza emihigo yawe? Oyake okukacihiriraho omuhigo gurhayumvikini bwinja. Kwa lwiganyo, hali amango wakarhanya ntya: ‘Ndonzize okujira binji omu cigamba.’ Cikone, kwanaba kuzibu okumanya gurhi wakahikirizamwo ogo muhigo, na kandi wanabona oku birhakahashikana okumanya oku waguhikirizize. Co cirhumire, ocishoge omuhigo gw’obwalagale gunayumvikine bwinja. Ciru na kandi, wanayandika omuhigo gwawe n’ebi wajira ly’oguhikiriza. w22.04 buk. 25 cif. 12-13

Ene, Yehova ali agusha haguma “ehitû hy’abantu.” Ali abakomereza okushiga Obwami bwage. (Maf. 7:9, 10) Ciru akaba balamire omw’igulu ligabikinemwo enyanya z’oboba n’ivita, abantu b’eco cigusho banajire okwabo kwoshi lyo bahima enshombo elerhwa n’okuzigira bwenene ecihugo, obûko erhi egarhi k’abantu bone na nnene. Omu njira y’olwiganyo, engôrho zabo bakola bali bazitulamwo enfuka. (Mik. 4:3) Ahali h’okucihira omu mavita garhuma bantu banji bafâ, bali barhabala abantu lyo bapata “akalamo k’okunali” omu kubayigiriza lugenda Nnâmahanga w’okunali n’emihigo yage. (1 Tm. 6:19) Abantu b’omu milala yabo banabahagalika erhi kandi banabula ensaranga bulya balunzire okuboko Obwami bwa Nnâmahanga, cikone Yehova anabahe ebintu balagirireko. (Mt. 6:25, 30-33; Lk. 18:29, 30) Ebyo byoshi birhuyemezize n’obwalagale oku Obwami bwa Nnâmahanga buli bw’okunali n’oku bwagendekera bwahikiriza omuhigo gwa Yehova. w22.12 buk. 6 cif. 13

Oku buzinda bw’emyaka 1 000, abantu boshi bayish’iba balamire hanw’igulu, bayish’iba erhi bajijirwe bimana. Nta muntu wanacihikirwe n’amazibu galerhagwa n’ecaha ca Adamu rhwayimagamo. (Rm. 5:12) Amazibu galerhagwa n’ecaha ca Adamu, goshi gayish’iba erhi gamahwa. Oku buzinda bw’emyaka 1 000, abayish’iba bali hanw’igulu, bayish’igalulirwa “obuzine” nka bene bantu bimana. (Maf. 20:5) Rhumanyire oku Yezu ahimire enshumi za Shetani z’okulonza oku aleke obwishwekerezi bwage. Abêzire mwishwekerezi ciru n’omu kasanzi k’amarhangulo. Cikone, ka bene bantu bimana boshi bayish’iba babidu okubêra bishwekerezi hano Shetani ahâbwa obulyo bw’okubahira omu marhangulo? Ngasi muguma wirhu ayish’iba n’obulyo by’okushuza kw’er’idoso hano Shetani akûlwa omu abiso oku buzinda bw’emyaka 1 000. (Maf. 20:7) Abayish’iyerekana obwishwekerezi omu kasanzi k’ago marhangulo mazinda, bayish’ihâbwa obuzîne bw’ensiku n’amango na buzinda banahâbwe oluhuma lw’okunali. (Rm. 8:21) Abayish’igoma, bayish’isherezibwa emyaka n’emyaka.—Maf. 20:8-10. w22.05 buk. 19 cif. 18-20

Oko kwahikirizibwe erhi Shetani ashumya Abayahudi n’Abaroma banige Mugala wa Nnâmahanga. (Lk. 23:13, 20-24) Nka kula ecihulu c’oku kansisira cilemaza omuntu kasanzi kasungunu, Yezu arhakajijire kantu koshi-koshi erhi ayusa nsiku isharhu ali omu nshinda. (Mt. 16:21) Obo bulebi b’omu lwandiko lw’Omurhondêro 3:15 buyerekine oku Yezu arhakabêzire omu nshinda. Bulya gurhi? Bulya buyerekine oku iburha ly’omukazi lyakavunyungwire irhwe ly’enjoka. Oko kuyerekine oku byal’ihûnyire Yezu afume ecihulu c’oku kansisira. Na ntyo ko byanabire! Omu lusiku lwa kasharhu enyuma z’okufâ kwage, Yezu afûlwa anahâbwa obuzine burhakacifâ empingu. Omu kasanzi Nnâmahanga acishozire, Yezu ayish’ivunyungula Shetani arhakanacihaba bundi. (Hb. 2:14) Yezu n’abayish’irhambula haguma naye bayish’ishereza abashombanyi boshi ba Nnâmahanga, ko kuderha iburha ly’enjoka.—Maf. 17:14; 20:4, 10. w22.07 buk. 16 cif. 11-12

Mwe babusi, murhabale abana binyu bacishoge abîra binja. Akanwa ka Nnâmahanga kahugwîre oku abîra birhu banarhushumya rhujire ebintu binja erhi bibi. Ka muyishi abîra b’abana binyu? Bici mwakajira lyo murhabala abana binyu bacijirire obwîra haguma n’abantu bazigira Yehova? (1 Kr. 15:33) Mwanarhabala abana binyu barhôle emihigo minja, omu kukalalika bantu baguma na baguma bajira ehali nyinja y’ekiroho, bayishe bajire mikolo milebe haguma na ninyu n’abana binyu. (Enna. 119:63) Ishe muguma w’omulala ohamagalwa Tony, ahugwîre ntya: “Rhwajijire myaka minji, nie na mukanie rhuli rhwayegereza bene wirhu na bali birhu b’emyaka eri lubero n’enkomêdu ziri lubero lyo bayisha aha mwirhu. Rhwakag’ilya haguma nabo n’okujira enterekêro y’omulala haguma. Eyo yali njira nnene yakag’irhurhabala rhumanyane na bene wirhu na bali birhu, baba bazigire Yehova n’okumukolera n’omwishingo. . . . Ebi bacibwinire, obushiru bwabo, n’iroho lyabo ly’okucihâna byahûmire oku bana birhu, byanabarhabala bayegere Yehova.” w22.05 buk. 29-30 cif. 14-15

Erhi abagula barhimanana n’omuntu wajijire ecaha, baba balonzize okurhôla omuhigo gushushine n’ogw’arhôzirwe empingu. Bunguke buci ogo mupango gulerhera ecigamba? Ogo mupango gunalerhere ecigamba obunguke omu kujira abanya-byaha barhaciyunjuzizi barhenzibwemwo lyo barhag’ishereza ebibuzi bya Yehova by’engulo ndârhi. (1 Kr. 5:6, 7, 11-13; Tt. 3:10, 11) Na kandi, oko kunarhabale omunya-byaha aciyunjuze ly’ababalirwa na Yehova. (Lk. 5:32) Abagula banashenge enyanya z’omunya-byaha ociyunjuzize n’okuhûna Yehova amurhabale ly’acibiba n’ehali nyinja y’ekiroho. (Yk. 5:15) Gurhigi byakaba erhi omuntu akabula buciyunjuza amango abagula barhimananaga naye? Omu kanga ka ntyo, oyo muntu anatengwa n’ecigamba. Cikone, erhi buzinda omuntu akahugûkwa oku ebi ajijire byali bibi, akanaciyunjuza n’omurhima goshi n’okushanja entanya zage n’ebijiro byage, Yehova aba mubidu okumubabalira. (Lk. 15:17-24) Yehova anamubabalira ciru akaba ebyaha byage byali bizibu bwenene.—2 Nga. 33:9, 12, 13; 1 Tm. 1:15. w22.06 buk. 9 cif. 5-6

Kugerera oburhabale bwa Yehova, omw’igulu lyoshi, Abakristu bahimire akanga kazibu banahashire okuhagalika Shetani. (1 Pt. 5:9) Nawe wanahasha okujira ntyo. Hano hofi-hofi, Yehova ayish’irhegeka Yezu n’aba ayish’irhegeka nabo lyo ‘bahererekeza emikolo ya shetani.’ (1 Yn. 3:8) Enyuma z’aho, abakozi ba Yehova bayish’iba bali bamukolera okw’igulu ‘barhakaciba n’obwôba bulya burhankacibayegera.’ (Iz. 54:14; Mik. 4:4) Cikone, embere ako kasanzi kahike, rhukwanine rhujire okwirhu koshi lyo rhuhima oboba bwirhu. Rhushinganine rhugendekere rhwayemera n’obwalagale oku Yehova anazigire n’okulanga abakozi bage. Eby’akarhurhabala rhujire ntyo, kuli kurhanya n’okuganirira abandi okubiyerekire gurhi Yehova alanziremwo abakozi bage omu mango ga mîra. Na kandi, rhwanakakengera gurhi arhurhabiremwo lyo rhuhima akanga kazibu. Kugerera oburhabale bwa Yehova, rhwanahima oboba bwirhu!—Enna. 34:4. w22.06 buk. 19 cif. 19-20

Oburhegesi bukulu buzinda bw’igulu lyoshi bushushanyizibwe n’“enshando zali cihimbi cuma na cihimbi ibumba bukola buli bwarhegeka. Bwarhonderaga okurhegeka omu mango g’Ivita lya Burhanzi ly’Igulu erhi Grande-Bretagne na États-Unis bacilunga haguma, bajira omulungano gwa Angleterre na Amérique. Kandi, ensanamu y’ecilorho ca Nebukadnezari yal’ilebire bintu bibirhi okubiyerekire obo burhegesi bukulu bw’igulu lyoshi byakarhumire bwaba lubero n’agandi marhegesi makulu g’igulu lyoshi g’embere. Lubero n’agandi marhegesi makulu g’igulu lyoshi g’embere gaganirirwe mw’eco cibonekerezi, omulungano gwa Angleterre na Amérique gurhashushanyizibwi n’ecuma cizibu nka noro erhi mulinga, cikone gushushanyizibwe n’ecuma cigushemw’ibumba. Ibumba lishushanyize “engushane y’abantu,” erhi bantu barhalengeriri. (Dan. 2:43) Nk’oku rhunali rhwacibonera ene, ebi abantu bali bajira omu bulondôzi, amakampanye g’okuhalira ehaki za bacikala, amaandamano, abantu bahalira obunguke bw’abandi, ebyo byoshi biri byajira kube kuzibu kuli ebirongozi by’obo burhegesi bukulu okuhikiriza emihigo yabo. w22.07 buk. 4-5 cif. 9-10

K’oli warhindira okubatizibwa? Kwanaba kwinja erhi wakacidosa ntya, ‘Bulya gurhi ndi narhindira okubatizibwa?’ (Ebj. 8:36) Obwine oku Yezu ashushanyize okujira obulonza bw’Ishe n’ebiryo. Bulya gurhi? Bulya ebiryo biba binja kuli rhwe. Yezu al’imanyire oku ngasi kantu Yehova arhuhûnyire rhujire kaba kinja kuli rhwe. Yehova arhakalonza rhujire akantu koshi-koshi kakarhulerhera amazibu. Ka Yehova alonzize obatizibwe? Neci. (Ebj. 2:38) Co cirhumire wanayemera n’obwalagale oku okurhumikira irhegeko ly’okubatizibwa kwanakulerhera obunguke. Akaba orhakarhindira okulya ebiryo binja bwenene, bulya gurhi wakarhindira okubatizibwa? Bici birhuma bantu baguma na baguma barhindira okubatizibwa? Banji banashuza ntya, “Ntaciba tayari.” Kobinali omuhigo gw’okucihâna emwa Yehova n’okubatizibwa go muhigo gw’obulagirire bwenene wakarhôla omu kalamo kawe. Co cirhumire oshinganine orhanye bwenene kw’ogo muhigo, n’okuhikiriza ebihûnyirwe ly’obatizibwa kwanahûna akasanzi n’obushiru bunji. w23.03 buk. 7 cif. 18-20

Erhi Yezu ashigwa amavurha, aba cigabi cirhanzi c’iburha ly’omukazi. Enyuma z’okufâ n’okufûka kwa Yezu, Nnâmahanga ‘amuyambika ishungwe ly’irenge n’obukuze’ anamuha “obuhashe bwoshi bw’omu mpingu n’obw’igulu,” buhiziremwo n’obuhashe bw’‘okuhererekeza emikolo ya Shetani.’ (Hb. 2:7; Mt. 28:18; 1 Yn. 3:8) Cikone hakabire ecigabi ca kabirhi c’er’iburha. Entumwa Paolo yayerekine eco cigabi c’er’iburha erhi abwira Abakristu bashige amavurha Bayahudi n’abarhali Bayahudi ntya: “Akaba muli ba Kristu, muli iburha ly’Ibrahimu [Abrahamu], mwe mwanayîme mwa birya alaganyibagwa.” (Gl. 3:28, 29) Erhi Yehova ashiga Omukristu amavurha kugerera iroho lyage litagatifu, oyo muntu anabe w’omu cigabi c’iburha ly’omukazi. Ko kuderha oku er’iburha lijijirwe na Yezu Kristu n’abantu 144 000 bayish’irhambula haguma naye. (Maf. 14:1) Boshi banacihangane okuba n’entanya n’ebijiro biri nk’eb’Ishe, Yehova Nnâmahanga. w22.07 buk. 16 cif. 8-9

Rhumanyire oku rhwarhimanana n’amazibu muli zino nsiku nzinda. (2 Tm. 3:1) Omu kasanzi ka ntyo, rhwanaciyumva rhugogomirwe rhunavunisire omurhima, bwenene erhi byakabonekana nk’ago mazibu gakulikirine kandi erhi garhuhikire manji caligumiza. Cikone, okengere oku Yehova anarhulange, n’oku kugerera oburhabale bwage rhwanahash’ilwisa n’oburhwali ngasi mazibu gakarhuhikira. Orhanye gurhi Yehova arhabalagamwo omulume mwishwekerezi Ayubu. Ahikirwe na mazibu manji g’okuvuna omurhima omu kasanzi kasungunu. Omu lusiku luguma lone, babwira Ayubu oku ebishwekwa byage byazimbirwe erhi kunigwa n’oku bambali bage n’abana bage bazigirwa boshi banizirwe. (Ayu. 1:13-19) Kasanzi kasungunu enyuma z’aho, amango Ayubu aciri omu mishîbo, aja kw’obulwala bw’amalumwa manji bwasherezagya omubiri gwage. (Ayu. 2:7) Yehova akag’ilanga Ayubu. Bulya Yehova al’izigire Ayubu, amuha ebi al’ilagirireko ly’ahash’ilembera amazibu gage n’okubêra mwishwekerezi. w22.08 buk. 11 cif. 8-10

Okuhabwa obuhane kwanarhuma rhwaciyumva kubi ekandalala. Rhwarhanya oku obo buhane burhali bwa bushinganyanya, burhali bwa bulagirire kuli rhwe erhi oku buli bwa bukali bwenene. Oko kwanarhuma rhurhahugûkwa akantu k’obulagirire bwenene, k’okuderha oku obuhane eri njira ya Yehova y’okurhuyeresa obuzigire. (Hb. 12:5, 11) Co cirhumire, oyemere obuhane, onajire empindulo zihûnyirwe. Arhali liguma lyone Yezu ahanwire Petro embere z’ezindi ntumwa. (Mk. 8:33; Lk. 22:31-34) Nkaba oko kwakarhumire Petro ayumva enshonyi bwenene! Ciru akaba ntyo, Petro abêra mwishwekerezi kuli Yezu. Ayemera obuhane ahabagwa anaciyigiriza binji kugerera amagosa gage. Enyanya z’oko, Yehova ahemba Petro erhi bwishwekerezi bwage burhuma anamuha emikolo y’obulagirire omu cigamba. (Yn. 21:15-17; Ebj. 10:24-33; 1 Pt. 1:1) Rhunacilerhere obunguke n’okubulerhera abandi erhi rhuyemera obuhane n’okujira empindulo zihûnyirwe ahali h’okusegeza obwenge bwirhu oku nshonyi rhuyumva enyanya z’okuhabwa obuhane. Erhi rhujira ntyo, Yehova anarhukolese bwenene rhunanabe ba bulagirire kuli bene wirhu na bali birhu. w22.11 buk. 21-22 cif. 6-7

Abrahamu al’imanyire oku nta mango Yehova akajira akantu karhali ka bushinganyanya na ka buzigire. Nk’oku entumwa Paolo eyerekine, Abrahamu arhanyize oku Yehova al’igwerhe obuhashe bw’okufûla omugala Izaki. (Hb. 11:17-19) Yehova ali erhi alaganyize oku Izaki akabire ishe w’ishanja, na muli ako kasanzi, Izaki arhal’igwerhe mwana ciru n’omuguma. Abrahamu al’izigire Ishe Yehova, co carhumire alangalira oku ensiku zoshi Yehova ajira ebishinganine. Ciru akaba kwali kuzibu okujira ntyo, obuyemere bwamushumya arhumikira. (Murh. 22:1-12) Gurhi rhwakayigamwo olwiganyo lwa Abrahamu? Rhushinganine rhugendekere rhwayiga lugenda Yehova, akage. Omu kujira ntyo, rhwanayegera Yehova bwenene n’okumuzigira kulusha. (Enna. 73:28) Rhwanakomereza ezamiri zirhu okuyerekana entanya za Nnâmahanga. (Hb. 5:14) Oko kwanarhurhabala rhukalahira erhi muntu mulebe akarhushumya oku rhujire akantu kabi. Nta mango rhwakarhanya okujira akantu kakagayisa Larha wirhu n’okushereza obwîra bwirhu haguma naye. w22.08 buk. 28-29 cif. 11-12

Erhi entumwa Paolo na Barnaba bacib’ilambagirira e Listra, e Ikoniya, n’e Antiyokiya, “babahiriraho abagula omu ngasi cigamba.” (Ebj. 14:21-23, NWT) Kobinali, abo bagula bahiragwaho baba burhulirize omu bigamba, nk’oku abagula baba burhulirize omu bigamba ene. Mwe bagula, mukaba babidu okurhabala abakaba balagirire oku “kanwa kinja” k’okuhâna omurhima. Paolo akengeza ababo bemezi oku kugerera obuhashe bwa Yehova, ‘ecitu [cinene] c’abahamirizi’ cahashire okulembera amazibu. (Hb. 12:1) Paolo al’ihugûsirwe oku, okuganirira akalamo k’abo bantu ba mîra bahashire okulembera amazibu ga ngasi lubero, kwakarhabire bene wabo na bali babo babe n’oburhwali n’okugendekera basegeza obwenge bwabo oku “vile ya Nnâmahanga ozine.” (Hb. 12:22, NWT) Na ntyo kobiri ene. Rhweshi rhunazibuhe omu buyemere erhi rhusoma lugenda gurhi Yehova arhabalaga Gideoni, Baraki, Daudi, Samweli, n’abandi banji.—Hb. 11:32-35. w22.08 buk. 21-22 cif. 5-6

‘Bijiro’ bihi abayish’ifûlwa batwirwako olubanja? Ka byayish’iba bijiro bajiraga embere z’okufâ kwabo? Nanga! Okengere oku ebyaha bajiraga embere byazazibwe erhi bafâ. Co cirhumire, “ebijiro byabo” birhakaba bijiro bajiraga omu kalamo kabo ka mîra. Cikone, ebyo bishinganine bibe bijiro bajira enyuma z’okuyigirizibwa omw’igulu lihyahya. Ciru n’abantu bishwekerezi nka Nuhu, Samweli, Daudi, na Daniyeli bashinganine bayigirizibwe okubiyerekire Yezu Kristu n’okuyerekana obuyemere omu nterekêro yage. Erhi akaba abo bantu nabo bayish’iyigirizibwa, ko kuderha oku abarhali bashinganyanya bashinganine bayigirizibwe binji bwenene! Bici byayish’ihikira abayish’ilahira obo bulyo bwinja bwenene bw’okuyigirizibwa bayish’ihâbwa? Olwandiko lw’Amafulûlo 20:15, Mashi Bible, ludesire ntya: “Ngasi yeshi orhali muyandike omu citabu c’obuzine, bamukweba mw’eyo nyenga [nyanja] y’omuliro.” Kobinali, bayish’ihererekezibwa ensiku n’amango. Co cirhumire, kuli kwa bulagirire bwenene rhujire okwirhu koshi ly’izino lirhu liyandikwa omu citabu c’obuzine linagendekere lyabêramwo! w22.09 buk. 19 cif. 17-19

Mihigo yirhu minji rhurhôla lugenda amagala girhu n’eby’okubukwa eba eyimangire oku zamiri yirhu eyigirizibwe n’Ebibliya. (1 Tm. 3:9) Amango rhuli rhwarhôla emihigo n’okuyiganirira haguma n’abandi, kuli kwinja rhukakolesa akanuni kali omu lwandiko lw’Abafilipi 4:5, NWT, ludesire ntya: “Oborhere bwinyu bw’okuba ba lugero bumanyikane oku bantu boshi.” Erhi akaba rhuli ba lugero, rhurhakasegeza bwenene obwenge bwirhu oku magala girhu g’omubiri. Rhuba rhuzigire bene wirhu na bali birhu rhunanabakenge, ciru akaba emihigo barhôzire eri lubero n’eyirhu. (Rm. 14:10-12) Rhunayereke Yehova oku rhumuvuzire omunkwa, bulya ye Nshôko y’obuzine, omu kukalanga obuzine bwirhu n’okumukolera n’emisi yirhu yoshi. (Maf. 4:11) Muli gano mango, rhugwasirwe rhulwise endwala n’obuhanya. Cikone arhali ako ko kalamo Omulemi wirhu al’ilonzize rhube nako. Hano hofi-hofi arhuha obuzine bw’ensiku n’amango, rhurhakanaciyumva amalumwa rhurhakanac’ifâ. (Maf. 21:4) Embere ako kasanzi kahike, kuli kwinja bwenene okuba rhuzine n’okukolera Yehova, Larha wirhu w’obuzigire w’omu mpingu! w23.02 buk. 25 cif. 17-18

Yehova ayerekine n’obwalagale oku agwerhe obuhashe bunji bwenene kulusha ‘abarhegesi barhukulire.’ (Rm. 13:1) Rhuganirire nyiganyo isharhu. Mwami Faraoni w’e Misri ajira olubaga lwa Nnâmahanga baja na kanji-kanji alahira okubalikûla. Cikone Nnâmahanga abalikuza anazisa Faraoni omu Nyanja Ndukula. (Lub. 14:26-28; Enna. 136:15) Mwami Baltazari w’e Babiloni ajira idinye ‘analonza okucijira mukulu kulusha Nyamuzinda w’e mpingu’ kandi ‘aharamya banyamuzinda b’amarhale [erhi cuma c’ensaranga] n’ab’amasholo [erhi noro]’ ahali h’okuharamya Yehova. (Dan. 5:22, 23) Cikone Nnâmahanga arhohya oyo mulume w’obucibone. “Muli obwola budufu mwonene,” Baltazari anigwa n’obwami bwage bwahâbwa Abamedi n’Abapersi. (Dan. 5:30, 31) Mwami Herodi Agripa wa I w’e Palestina arhegeka oku entumwa Yakobo enigwe na buzinda aheba entumwa Petro omu prizo erhi anagwerhe omuhigo g’okumuniga. Cikone Yehova acîka Herodi ly’arhahikirizagya ogo muhigo gwage. “Malahika wa Nyakasane [Yehova, NWT] amunesha [amuyukiriza],” anafâ.—Ebj. 12:1-5, 21-23. w22.10 buk. 15 cif. 12

Okusoma emyanzi eyerekine gurhi Yehova ashibiriragamwo abakozi bage bishwekerezi b’omu mango ga mîra kwanarhuma obulangalire bwirhu bwagendekera bwazibuha. Ebiba omu Kanwa ka Nnâmahanga byoshi “byayandikagwa mîra mpu birhuyigirize, lyo rhuba n’obulangalire omu njira y’okukolesa obulembêdu n’oburhwali Amandiko garhuha.” (Rm. 15:4, Mashi Bible) Okarhanya bwenene lugenda gurhi Yehova ahikirizizemwo ebiragane byage. Orhanye kw’ebi Nnâmahanga ajiriraga Abrahamu na Sara. Balikola bali omu myaka barhakacibusiremwo. Ciru akaba ntyo, Nnâmahanga abalaganya oku baburha omwana. (Murh. 18:10) Gurhi Abrahamu ajijire? Ebibliya edesire ntya: “Abrahamu ayemire, na ntyo ahinduka ishe w’amashanja mwandu.” (Rm. 4:18) Ciru akaba mwene muntu akarhanyize oku birhakacihashikana, Abrahamu ayemera n’obwalagale oku Yehova akahikirizize eciragane cage. Oyo mulume w’obuyemere arhavunikaga omurhima. (Rm. 4:19-21) Emyanzi ya ntyo erhuyigirizize oku ensiku zoshi, rhwanalangalira n’obwalagale oku Yehova ahikiriza ebiragane byage. w22.10 buk. 27 cif. 13-14

Ezo nderho zahikirira erhi Abayahudi barhenga omu kuhamisibwa e Babiloni. Yehova abonekana oku ali Mwigiriza wabo Mukulu, na kugerera obulongozi bwage, abantu bage bahasha okugalula enterekêro ecîre. Rhushagalusire bwenene okubona Yehova ali Mwigiriza wirhu Mukulu ene. Izaya adesire oku rhuli nka banafunzi bali bayigirizibwa na Yehova, adesire ntya: ‘Amasu gawe gakola gakâbona Omwigiriza wawe [Mukulu].’ Mw’olo lwiganyo, Omwigiriza aganirirwe nk’oyimanzire embere z’abanafunzi bage. Luli lukengwa kuli rhwe ene okuyigirizibwa naye. Gurhi Yehova arhuyigirizamwo? Kugerera ikubuliro lyage. Rhuvuzire omunkwa bwenene oku bulongozi bw’obwalagale rhuhabwa kugerera er’ikubuliro! Enyigirizo rhuhabwa oku ntimanano zirhu, ebicapo birhu, eprograme za JW Télédiffusion, na kugerera ezindi njira nyinji zinarhurhabale rhulembere amazibu girhu n’omwishingo. w22.11 buk. 10 cif. 8-9

Lugenda akasanzi k’okusherezibwa kwa Yeruzalemu n’ehekalu yage n’akasanzi k’“okuhwa kw’igulu” rhulamiremwo ene, Yezu aderha ntya: “Olwo lusiku n’ako kasanzi, ntaye obimanyire, ciru bamalahika b’empingu, ciru n’Omugala, nta wundi aha nyuma ly’Ishe yenene.” Enyuma z’aho arhonda abanafunzi bage boshi erhi “mumanye” na kandi “mube masu.” (Mk. 13:32-37) Abakristu Bayahudi b’omu myaka igana mirhanzi bal’ishinganine bagendekere baba masu lyo bacunguka. Yezu abwizire abanafunzi bage “Amango mukabona Yeruzalemu azungulusirwe n’engabo, mumanye oku okushâbwa [okusherezibwa] kwage kukola kuli hofi.” Mw’ako kasanzi bal’ishinganine barhumikire oburhonde bwa Yezu n’‘okuyakira oku ntondo.’ (Lk. 21:20, 21) Ngasi abakulikire obo burhonde bwa Yezu bacunguka erhi Abaroma bashereza Yeruzalemu. Ene rhulamire omu mango ga buzinda g’er’igulu ligalugalu. Co cirhumire nirhu rhushinganine rhugendekere rhwalanga olugero lwirhu n’okugendekera rhwaba masu. w23.02 buk. 14 cif. 1-3

Yehova anayigirize abakozi bage okuba bikubagirwa na bashinganyanya. Oko kunabahe obukenge omu njira ndebe n’omurhûla gw’ekandalala. (Mig. 13:5, 6) K’akujirire ntyo nawe erhi oyiga Ebibliya? Wayizire oku enjira za Yehova ziba nyinja bwenene oku bantu boshi na kuli wenene. (Enna. 77:13) Co cirhumire olonzize okujira ebintu by’obushinganyanya omu masu ga Nnâmahanga. (Mt. 6:33) Olonzize okumanyisa abandi okuli n’okuyerekana oku ebi Shetani adesire lugenda Nnâmahanga wirhu Yehova, biri bya bunywesi. Gurhi wakajiramwo ntyo? Wanacishoga okulama akalamo kali nka kadesire ntya: “Ndahire obunywesi bwa Shetani, na nunzire okuli okuboko. Ndonzize Yehova abe Murhegesi wani Mukulu, na ndozize okujira ebi adesire oku bishinganine.” Gurhi wakajiramwo ntyo? Oyegere Yehova kugerera isala onacihâne emwage na buzinda obatizibwe ly’oyerekana embere z’abantu boshi oku wacihanyîre emwage. Okuzigira ebintu bishinganine na by’okuli ko kurhushumya bwenene rhurhôle omuhigo gw’okubatizibwa. w23.03 buk. 3 cif. 4-5

Haba murhûla mulebe abantu b’er’igulu barhaba bamanyire ciru n’ehitya. Ogo go ‘murhûla gwa Nyamuzinda,’ k’okuderha oburhulirize omuntu aba nabo enyanya z’okuba n’obwîra bwinja haguma na Larha wirhu w’omu mpingu. Amango rhugwerhe omurhûla gwa Nyamuzinda, rhunaciyumve rhuli omu bulanzi. (Fl. 4:6, 7) Rhunashagalukire okuba n’obwîra bwa hofi-hofi haguma n’abantu bamuzigira. Na kandi rhunashagalukire obwîra bwa hofi-hofi haguma na “Nyamuzinda w’omurhûla.” (1 Ts. 5:23) Erhi rhwakaba rhumanyire Larha wirhu, rhumulangalire, rhunali rhwamurhumikira, omurhûla gwage gwanarhuliriza omurhima gwirhu guhangayisire amango rhuli omu kanga kazibu. Ka kobinali byanahashikana rhube n’omurhûla gwa Nyamuzinda amango rhuli omu mazibu, nk’obulwala bw’okuyahukira, obuhanya bucilerha bone, akavulindi egarhi k’abantu bone na nnene, erhi amango rhuli rhwalibuzibwa? Ago mazibu goshi ganarhuyobohya. Eby’okushagalusa kuli kubona oku bene wirhu na bali birhu banakakulikira er’ihano lya Yezu liri omu lwandiko lw’olusiku lw’ene. Kugerera oburhabale bwa Yehova, banahashe okuba n’omurhûla ciru akaba bali balwisa amazibu madarhi. w22.12 buk. 16 cif. 1-2

Hali ebintu rhurhakahash’ihanza oku birharhuhikiraga omu kalamo kirhu. Co cirhumire, rhurhakag’ibona oku rhuli ba bulagirire omu masu ga Yehova mpu bulya rhugwerhe mukolo mulebe. Na kandi, rhurhakag’icigerera oku bandi bagwerhe mikolo milebe rhurhagwerhi omw’ikubuliro lya Yehova. (Gl. 6:4) Kuli kwa bulagirire okalonza enjira wakakarhabalamwo abandi n’okukolera Yehova. Wanahasha okujira binji omu mukolo gwa Yehova erhi wakalama akalamo karhahûnyiri bintu binji n’erhi wakayaka amadeni garhagwerhi nda na mugongo. Ocihirireho emihigo wakahikiriza enyuma za nsiku nsungunu yakakurhabala oyish’ihikiriza emihigo ehûnyire nsiku nyinji. Kwa lwiganyo, erhi akaba omuhigo gwawe wahikiriza enyuma za nsiku nyinji guli gwa kuba painiya w’akasanzi koshi, wanarhang’icihiriraho omuhigo g’okuba painiya murhabazi wa myezi minji. Erhi akaba omuhigo gwawe guli gwa kuba murhabazi w’abagula, ka wanakageza kasanzi kanji omu mukolo gw’amahubiri? Obulenga oli waba nabo buno, bwanay’ishikurhabala okuhikiriza mikolo minji omw’ikubuliro lya Yehova omu mango gayisha. Ohige okukahikiriza bwinja ngasi mukolo ohâbirwe omw’ikubuliro lya Yehova. w22.04 buk. 26 cif. 16-17

Yehova anarhurhabala lyo rhulwisa amazibu garhuhikira omu kalamo kirhu n’okuba n’omwishingo omu mukolo rhumujirira. Erhi rhuyegera Nnâmahanga omw’isala n’okumubwira akantu kali karhulibuza, nkaba Yehova anarhang’irhuha emisi rhulagirireko lyo rhulembera. N’erhi akaba amazibu girhu garhahwiri duba-duba nk’oku rhwal’ilangalire, byanahûna rhugendekere okuhûna Yehova arhuhe emisi y’okugalembera. Arhuhûnyire rhukajira ntyo. Ezi nderho za Izaya ziyerekine ntyo: ‘Murhalekaga [Yehova] aluhûka.’ (Iz. 62:7) Bici ezo nderho zihugwîre? Rhugwasirwe rhugendekere rhwashenga Yehova, nka bantu barhamulekiri akasanzi k’okuluhûka. Enderho za Izaya zirhukengezize enyiganyo Yezu akolesagya lugenda isala ziri omu Luka 11:8-10, 13. Mw’olo lwandiko, Yezu arhuhire omurhima rhugendekere ‘rhwahûna’ lyo rhuhabwa iroho litagatifu. Kandi rhwanayinginga Yehova arhuhe obulongozi rhulagirireko lyo rhurhôla emihigo minja. w22.11 buk. 8 cif. 1; buk. 9 cif. 6-7

We n’omulala gwawe mwanacirheganya buno lugenda okulibuzibwa. Orhakag’ibona omu bwenge bwawe ebintu bibi byoshi byakamuhikira. Ahali h’okujira ntyo, ozibuhye obwîra bwawe haguma na Yehova onarhabale abana bawe nabo bajire ntyo. Erhi mango malebe wakaciyumva ohangayisire, obwîre Nnâmahanga ebiri omu murhima gwawe byoshi. (Enna. 62:7, 8) Omu mulala, mukaganirira ebyakarhuma mwalangalira Yehova byoshi. Nkʼoku binaba okubiyerekire obuhanya bucilerha bone, okucirheganya kwawe n’okulangalira Yehova kwanarhuma abana bawe baba n’oburhwali n’omurhûla. Omurhûla gwa Nyamuzinda gunarhume rhwaciyumva rhuli omu bulanzi. (Fl. 4:6, 7) Kugerera ogo murhûla, Yehova anarhulirize omurhima gwirhu ciru rhwakahikirwa n’endwala z’okuyahukira, amahanya gacilerha gone, n’okulibuzibwa. Anakolese abagula bakola bwenene lyo barhulanga. Kandi arhuhire rhweshi olukengwa lw’okurhabalana rhwene na nnene. Omurhûla rhugwerhe ene gwarhurhabala rhucirheganye okulwisa amazibu garhuhikira omu mango gayisha, ciru n’“amalibuko [madarhi].”—Mt. 24:21. w22.12 buk. 27 cif. 17-18

Rhushinganine rhucihangane lyo rhuyaka entanya z’okucitumuza rhwakaba rhugwerhe enyanya z’ebyaha rhwajiraga omu mango gageraga. Kobinali, rhurhashinganini rhukabona nk’engombôlo erhuhire obulyo bw’‘okujira ebyaha n’oluhinzo.’ (Hb. 10:26-31) Cikone rhwanayemera n’obwalagale oku Yehova arhubabalire omu njira nnene erhi akaba rhwaciyunjuzize okunali ecaha cizibu rhwajiraga, rhwalonza oburhabale ahâna, rhwanashanja olugenzi lwirhu. (Iz. 55:7; Ebj. 3:19) Enterekêro y’engombôlo egwerhe obuhashe bw’okufunika ebyaha birhu byoshi enahashisize okuba n’obuzine omu Paradizo. Akalamo omu Paradizo karhayish’ibe ka kurhamya ciru n’ehitya. Ensiku zoshi, hayish’iba abantu rhwakashagalukira okurhimanana nabo n’omukolo mwinja gw’okujira. N’akantu kinja kulusha byoshi, ngasi lusiku rhwayish’ikaba n’obuhashe bw’okumanya Larha wirhu w’omu mpingu bwinja n’okushagalukira ebintu arhuhire. Nta lusiku rhwanabule ebi rhwayiga lugenda Larha wirhu, kandi rhwayish’iba na binji bya kuyiga lugenda obulemi bwage. w22.12 buk. 13 cif. 17, 19

“Omukazi” arhakabire Eva. Obo bulebi buyerekine oku iburha ly’omukazi ‘lyakalabasire [erhi, kuvunyungula]’ irhwe ly’enjoka. Enjoka ciri ciremwa ca kiroho cihamagalwa Shetani, na nta muntu orhali mwimana w’omw’iburha lya Eva wakabire n’obuhashe bw’okuvunyungula Shetani. Gurhigi Shetani akasherezibwemwo? Ecitabu cizinda c’Ebibliya cirhuyeresire omukazi ye ndi. (Maf. 12:1, 2, 5, 10) Oyo arhali mukazi mulebe hanw’igulu! Agwerhe omwezi aha magulu gage n’ecimanè c’enyenyezi 12 oku irhwe lyage. Aburha omwana orhali ak’abandi bana, ko kuderha Obwami bwa Nnâmahanga. Obwami bwa Nnâmahanga buba b’omu mpingu, ko kuderha oku oyo mukazi naye ashinganine abe w’omu mpingu. Ashushanyize ecigabi c’omu mpingu c’ikubuliro lya Yehova ciba cijijirwe na bamalahika bage bishwekerezi. (Gl. 4:26) Kandi Akanwa ka Nnâmahanga karhurhabire okuhugûkwa ecigabi cirhanzi c’iburha ly’omukazi. Al’ishinganine abe w’omw’iburha lya Abrahamu.—Murh. 22:15-18. w22.07 buk. 15-16 cif. 6-8

Engalo ya Yehova, kuli kuderha Ebibliya, eba eyunjwiremwo obwenge bwage. Amahano g’Ebibliya ganayinjihye akalamo k’abantu. Ebibliya enashanje akalamo. Erhi ebitabu birhangiriza by’Ebibliya biyandikwa, Musa abwira abantu ba Nnâmahanga, kuli kuderha Abaisraheli ntya: “Olwo Lushika [luderho, NWT] lurhali lwa kuhalîza, bulya luli kalamo kinyu.” (Lush. 32:47) Abakag’irhumikira Amandiko bakashagalukire okubêrwa omu kalamo n’okuba n’omwishingo. (Enna. 1:2, 3) Ciru akaba Akanwa ka Nnâmahanga kayandikagwa mîra bwenene, kacigwerhe obuhashe bw’okuyinjihya akalamo k’abantu. Amakanuni g’obwenge gaba omu Bibliya gaba g’ensiku n’amango; gabonekine oku gali ga bulagirire oku bantu balamire omu rhusanzi rhoshi. Erhi rhusoma eco citabu citagatifu n’okurhanya bwenene kw’ebi rhuli rhwayiga, owaciyandikisagya anakolese iroho lyage litagatifu lirhurhabale lyo rhumanya gurhi rhwakakolesamwo amahano g’Ebibliya omu kalamo kirhu. (Enna. 119:27; Mal. 3:16; Hb. 4:12) Neci, owayandikisagya Ebibliya ozîne ab’alonzize okukurhabala. Oko kushinganine kurhushumye rhukasoma Ebibliya ngasi mango! w23.02 buk. 3 cif. 5-6

Ecitabu c’Amafulûlo cigabi ca 13 cirhubwizire oku irhwe lya kali nda, ko kuderha, Oburhegesi Bukulu bw’omw’Igulu Lyoshi bwa Angleterre na Amérique bunakakola nka ciryanyi cigwerhe “mahembe abiri gali nka ga mwana-buzi, erhi cinadwirhe caderha aka wankuba-joka.” Eco ciryanyi “cajira ebisômerine, . . . ciru calinda cimanula omuliro oku nkuba, gwarhogera ahanshi abantu bâsinza.” (Maf. 13:11-15) Ecitabu c’Amafulûlo cigabi ca 16 n’eca 19 ciganirire eco ciryanyi nka “mulêbi w’obwihambi.” (Maf. 16:13; 19:20, Mashi Bible) Daniyeli aganirire akantu kashushine n’ako erhi aderha oku, oburhegesi bukulu bw’igulu, ko kuderha, Angleterre na Amérique bwakabire bwa “kushêreza” bwenene. (Dan. 8:19, 23, 24, Mashi Bible) Ntyo ko byanabire amango g’Ivita lya Kabirhi ly’Igulu. Ebombe Atomike ibirhi zakolesibagwa omu kuyukiriza er’ivita omu Pacifique zatulagwa n’abasomaga esiyanse b’e Angletere n’e Amérique. Omu ntyo, oburhegesi Bukulu bw’omw’Igulu Lyoshi, ko kuderha Angleterre na Amérique, bwahikira aha “bwamanula omuliro oku nkuba gwarhogera ahanshi.” w22.05 buk. 10 cif. 9