Mwezi gwa 5

Enyuma z’okubona ecigusho c’abayish’ija empingu, Yowane abona “ehitû hy’abantu.” Lubero na balya 144 000, omubalè gw’ehyo hitû hy’abantu gurhankaganjwa. Bici rhuciyigirizize kuli oko? Yowane adesire ntya: “Abo bo balya bazind’irhenga omu malibuko madârhi; bashusire emyambalo yabo banayiyeruhiza omu muko gw’Omwana-buzi.” (Maf. 7:14) Enyuma z’okuyokoka amalibuko madârhi, ehyo “hitû hy’abantu” bayish’ilama hanw’igulu, n’okushagalukira migisho minji minja. (Enna. 37:9-11, 27-29; Mig. 2:21, 22; Maf. 7:16, 17) Rhube rhuli omu bishogwa b’okuyish’ilama empingu erhi hanw’igulu, ka rhunacibone oku rhwayish’iba aha kuhikirizibwa kw’ebi rhusomire omu citabu c’Amafulûlo cigabi ca 7? Rhushinganine rhukacibona ntyo, bulya kayish’iba kasanzi kinja kuli ebyo bigusho byombi by’abakozi ba Nnâmahanga! Rhwayish’ishagaluka okubona rhwalunzire okuboko oburhegesi bwa Yehova. w22.05 buk. 16 cif. 6-7

Erhi akaba okola ohikire aha warhôla omuhigo gw’obulagirire, buzira karhinda washenzire Yehova obwenge bulya wal’ihugûsirwe oku obulagirireko. (Yk. 1:5) Mwami Solomoni ayandika ntya: “Obwenge ko kaba kantu ka bulagirire bwenene.” (Mig. 4:7, NWT) Kobinali arhali ngasi bwenge boshi Solomoni akag’iganirira. Akag’iganirira obwenge burhenga emwa Yehova Nnâmahanga. Cikone, k’obwenge burhenga emwa Nnâmahanga bwanarhurhabala rhulwise ngasi mazibu rhuli rhwageramo ene? Kobinali bwanarhurhabala. Njira nguma rhwakabamwo n’obwenge, kuli kuyiga n’okukolesa enyigirizo za balume babirhi bakengagwa bwenene enyanya z’obwenge bunji bagwerhe. Burhangiriza, rhuganirire okubiyerekire Solomoni. Ebibliya edesire ntya: “Nnâmahanga aha Sulumani obwenge, n’obumanye bunji bwenene.” (1 Bam. 4:29, Mashi Bible) Bwa kabirhi, rhuganirire okubiyerekire Yezu wagwerhe bwenge bunji bwenene kulusha abantu boshi b’omu mango gage. (Mt. 12:42) Okubiyerekire Yezu, obulêbi bwal’idesire ntya: “Iroho lya Yehova lyamudekererako, iroho ly’obwenge n’obukengere.”—Iz. 11:2, NWT. w22.05 buk. 20 cif. 1-2

Rhube bashosi erhi misole, rhwanacihiriraho emihigo y’ekiroho n’okuyihikiriza. Rhuganirire olwiganyo lwa mwali wirhu mugikulu muguma ogwerhe myaka 75 ohamagalwa Beverley. Al’ilwazire obulwala buzibu bwakag’irhuma kwaba kuzibu kuli ye okulambagira. Cikone al’ilonzize okujira binji omu kampanye k’okulalika abandi aha Kukengera olufû lwa Yezu. Ntyo, acihiriraho emihigo y’obwalagale. Erhi Beverley ahikiriza eyo mihigo, ashagaluka bwenene. Obushiru bwage bwashumya abandi nabo bacihâne bwenene omu mukolo gw’amahubiri. Yehova anashagalukire omukolo gwa bene wirhu na bali birhu bakola bashosi, ciru akaba akanga kabo karhakacirhuma bajira binji nk’oku bal’ilonzize. (Enna. 71:17) Ocihirireho emihigo wakahash’ihikiriza. Obe n’amorhere gakashagalusa Yehova. Oyige obulenga bwakarhuma wakolesibwa na Nnâmahanga wirhu bwenene n’ikubuliro lyake. Olonze enjira wakakoleramwo bene wirhu na bali birhu bwenene. Aka Timoteyo, kugerera oburhabale bwa Yehova “boshi babona oku odwirhe waja embere.”—1 Tm. 4:15. w22.04 buk. 27 cif. 18-19

Gurhigi byakaba, erhi akaba mwajijire okwinyu koshi lyo murhabala abana binyu bakolere Yehova, cikone mwana muguma aderhe oku arhalonzizi okumukolera? Muyake okuderha duba-duba oku mwe mwayabirwe. Yehova ahîre ngasi muguma wirhu engalo y’oluhuma lw’okucishoga, ko kuderha, obuhashe bw’okucishoga erhi rhwamukolera erhi rhurhamukolere. Murhahezagya obulangalire oku arhakacimugalukira. Mukengere olwiganyo lw’omwana mulalahi. (Lk. 15:11-19, 22-24) Oyo mwana ajijire bintu binji bibi, cikone buzinda agalukirwa n’obwenge. Mwe babusi, mugwerhe olukengwa lunene bwenene, ko kuderha, okulera iburha lihyahya ly’abakozi ba Yehova. (Enna. 78:4-6) Ogo gurhali mukolo mulembu, rhunamuvuzire omunkwa n’omurhima goshi oku bushiru muli mwajira lyo murhabala abana binyu bazigire Yehova n’okubalera omu buhane n’omu mahano gage. Mwanayemera n’obwalagale oku Larha wirhu w’omu mpingu w’obuzigire ashagaluka bwenene.—Ef. 6:4. w22.05 buk. 30-31 cif. 16-18

Lyo rhugendekeza omurhûla n’ecinyabuguma omu cigamba, ngasi muguma wirhu ashinganine ahâne ebintu byage binja. Rhuganirire olwiganyo lw’Abakristu b’omu myaka igana mirhanzi. Bagwerhe engalo n’emikolo eri lubero. (1 Kr. 12:4, 7-11) Cikone oko kurharhumaga baja omu kamashigwe erhi kugabikanamwo. Lubero n’oko, Paolo ayinginga ngasi muguma oku ajire ebintu by’obulagirire “lyo agendereza [kuyubaka] omubiri gwa Kristu.” Paolo ayandikira Abefezi ntya: “Amango ngasi cirumbu cikola nk’oku cinagwasirwe, omubiri gwoshi gunakule n’okuyushuka n’obuzigire.” (Ef. 4:1-3, 11, 12, Mashi Bible) Abajira nk’oko Paolo aderhaga banarhabale ly’ecigamba cibamo omurhûla n’ecinyabuguma, morhere gabonekana omu bigamba birhu ene. Ohige okuyaka okukacigerera oku bandi. Lubero n’oko, oyige olwiganyo lwa Yezu, onalole gurhi wakayigamwo amorhere gage. Oyemere n’obwalagale oku Yehova ‘arhali mubula burhondekezi [mubula bushinganyanya, NWT] mpu ayibagira ebijiro byawe.’ (Hb. 6:10) Anashagalukire obushiru ojira n’omurhima gwawe goshi ly’omushagalusa. w22.04 buk. 14 cif. 15-16

Rhuvuzire omunkwa okubona rhurhagwerhi omukolo gw’okuhiga erhi Yehova ababalira omuntu erhi nanga! Cikone, hali ebi rhuba rhushinganine okuhiga. Bici ebyo? Hali amango omuntu akaba anarhugomîre, ciru bwenene, cikone anarhuhûna obwonjo. Hali agandi mango omuntu akarhugokeza arhanarhuhûne obwonjo. Ciru akaba ntyo, rhwanahiga okubabalira oyo muntu n’okuyaka okumubikira akarhinda erhi burhe. Kobinali, okujira ntyo kwanahûna akasanzi n’okucihangana bwenene, ci bwenene erhi akaba ebi oyo muntu arhujirire byarhulumisize omurhima bwenene. Ilabiro ly’Akalalizi ly’omu nsiku 15/9/1994 (omu Ciswahiri) lidesire ntya: “Erhi obabalira omunya-byaha, oko kurhali kuderha oku olunzire okuboko eco caha cage. Erhi Omukristu ababalira ecaha, kuba kuleka ebintu byoshi omu maboko ga Yehova. Ye Mutwi w’Emanja mushinganyanya w’empingu n’igulu, ananahikiriza obushinganyanya omu kasanzi kashinganine.” w22.06 buk. 9 cif. 6-7

Yehova alanganyize oku omu mango girhu, akagushire haguma abantu b’omu ngasi ishanja na ngasi bûko na ngasi lulimi, n’oku akabalunzire haguma omu nterekêro ecîre. Ene, olo lubaga lwago-lwago lumanyikine nka ‘hitû hy’abantu.’ (Maf. 7:9, 10) Ciru akaba ehyo hitû hy’abantu hijijirwe n’abalume, n’abakazi, n’abana bagwerhe enkomêdu ziri lubero, baba bajijire mulala muguma gw’omw’igulu lyoshi gugwerhe omurhûla. (Enna. 133:1; Yn. 10:16) Ngasi mango, baba babidu okuganirira ngasi muntu wakabayumvirhiza okubiyerekire obulangalire bwabo bw’igulu linja lyayisha. (Mt. 28:19, 20; Maf. 14:6, 7; 22:17) Akaba oli muguma w’omu hitû hy’abantu, kobinali oba oshagalukire bwenene obulangalire bwawe okubiyerekire amango minja gayisha. Shetani arhaba alonzize obe n’obulangalire okubiyerekire amango gayisha. Aba alonzize oyemere oku Yehova arhakahikiriza ebiragane byage. Erhi Shetani akahikira aha arhujira rhuheze obulangalire bwirhu, rhwanaheza n’oburhwali bwirhu, ciru rhwanaleka n’okukolera Yehova. w22.06 buk. 20-21 cif. 2-3

Obulangalire bwirhu bunarhurhabale rhugendekere rhwarhulirira erhi rhwakahikirwa n’amazibu bulya rhumanyire oku akasanzi kinja kayiruka. Okengere oku Yezu arhurhonzire oku rhwakalibuzibwe. (Yn. 15:20) Co cirhumire, okurhanya bwenene oku luhembo lw’amango gayisha rhulaganyizibwe kunarhurhabale rhurhadundaganaga omu lugenzi lwirhu lw’Ecikristu. Orhanye gurhi obulangalire bwarhabiremwo Yezu ly’agendekera okubêra mwishwekerezi ciru akaba al’imanyire oku afâ olufû lw’amalumwa manji. Olusiku lwa Pentekoste mwaka gwa 33 muli Kano Kasanzi Kirhu (K.K.K.), entumwa Petro yagalukira obulebi buli omu citabu c’Ennanga buyerekine bwinja-bwinja gurhi Yezu agendekire okurhulirira n’okurhaba n’oboba: “Omubiri gwani gwayish’iluhukira omu bulangalire; bulya orhankaleka omûka gwani gwabêra omu Kuzimu, orhankanayemera omwira wawe abolere omu nshinda. . . . Wanacinyunjuza masîma olusiku nabona obusu bwawe.” (Ebj. 2:25-28; Enna. 16:8-11) Yezu al’igwerhe obulangalire buzibu oku Nnâmahanga akamufûzire n’oku akabire n’omwishingo gw’okucib’ibuganana n’Ishe omu mpingu.—Hb. 12:2, 3. w22.10 buk. 25 cif. 4-5

Mango maguma, baganda bage babirhi, ko kuderha Yakobo na Yowane, barhuma nnina ahûne Yezu oku abahe ecikono cilengerire omu Bwami bwa Nnâmahanga. (Mt. 20:20, 21) Muli ntyo, Yakobo na Yowane bayerekana engeso y’obucibone banalonza babonekane ba bulagirire kulusha abandi. (Mig. 16:18) Arhali Yakobo na Yowane bone bayerekine engeso mbi muli ago mango. Olole gurhi ezindi ntumwa zajijire: ‘Erhi balya ikumi bayumva okwo, bakunirira balya babo babirhi.’ (Mt. 20:24) Rhwanarhanya oku habire akadali kadarhi egarhi ka Yakobo na Yowane n’ezindi ntumwa. Gurhi Yezu ajijire mw’ako kanga? Yezu arhakuniraga. Arhaderhaga oku akola alonza abanafunzi binja bwenene bakabire birhohye bwenene n’okujirirana omu njira y’obuzigire ensiku zoshi. Cikone, Yezu arhanya n’obulembedu haguma n’abo balume b’emirhima minja. (Mt. 20:25-28) Agendekera abajirira omu njira y’obuzigire. w23.03 buk. 28-30 cif. 10-13

Wamakahikiriza bintu binji binja. Kwa lwiganyo, nkaba wamazire myaka minji oli wayiga Ebibliya n’obushiru. Ebi wayizire byakuyemezize n’obwalagale oku Ebibliya kaba Kanwa ka Nnâmahanga. Na kandi, wahikire aha wamanya n’okuzigira Owayandikisagya eco citabu citagatifu. Obuzigire bwawe kuli Yehova bwayushuka n’oko kwarhuma wacihâna emwage n’okubatizibwa. Warhôzire omuhigo mwinja bwenene! Embere obatizibwe, buzira karhinda obuyemere bwawe bwarhangwirwe omu njira nyinji. Cikone oku wagendekera wakula kiroho, wabuganana n’agandi marhangulo. Shetani ajira okwage koshi ly’akushumya oleke okuzigira Yehova n’okumukolera. (Ef. 4:14) Orhayemeraga ebyo bikuhikire. Bici byakakurhabala ly’ogendekera waba mwishwekerezi kuli Yehova n’okuhikiriza eciragane wamuhâga c’okumukolera? Okwanine ogendekere wajira amajambere, ko kuderha ‘ocîseze ohikire’ okuba Mukristu okuzire kiroho.—Hb. 6:1, Mashi Bible. w22.08 buk. 2 cif. 1-2

Omu mulala, ngasi muntu agwasirwe akabîka ihwe lugenda ebiyerekire omulala gwabo. Kwa lwiganyo, omukazi Mukristu anaba agwerhe nkomedu ndebe iba abona oku eri ya kusomeza. K’anabwira abandi okubiyerekire eyo nkomedu na muli ntyo abonese mukage nshonyi? Nanga ciru n’ehitya! Bulya azigire mukage, arhakalonza okujira akantu koshi-koshi kakamugayisa. (Ef. 5:33) Abana b’omushuko nabo baba balonzize bakengwe omu njira ndebe. Kuli kwa bulagirire ababusi bakakengera ntyo. Barhashinganini bakabonesa abana babo nshonyi omu kuganirira abandi lugenda amagosa gabo. (Kl. 3:21) Abana nabo bashinganine baciyigirize okubîka amahwe, barhashinganini bakaganirira abantu b’embuga emyanzi yakabonesa nshonyi abandi bantu b’omu mulala gwabo. Erhi ngasi muntu w’omu mulala akajira okwage koshi ly’akabîka ihwe lugenda emyanzi eyerekire omulala gwabo, boshi banalama omu cinyabuguma. w22.09 buk. 10 cif. 9

Yehova aganiza Ayubu, amukengeza oku ajira obwenge burhagwerhi lugero n’oku anashibirire ebiremwa byage omu njira y’obuzigire. Amubwira lugenda nsimba nyinji z’okusomeza. (Ayu. 38:1, 2; 39:9, 13, 19, 27; 40:15; 41:1, 2) Kandi Yehova akolesa mulume muguma waciri musole ohamagalwa Elihu ly’azibuhya Ayubu n’okumurhuliriza. Elihu ayemeza Ayubu n’obwalagale oku ensiku zoshi Yehova anahembe abakozi bage enyanya z’okulembera kwabo. Cikone kandi Yehova alongoza Elihu ly’aha Ayubu mahano maguma na maguma g’obuzigire. Elihu arhabala Ayubu ly’aleka okucisegezako obwenge yenene omu kumukengeza oku rhuba basungunu-ngunu bwenene erhi rhwakagererwako Yehova, Mulemi w’empingu n’igulu. Kandi Yehova aha Ayubu omukolo gw’okujira; amubwira oku aj’ishengera abîra bage basharhu bajiraga ecaha. (Ayu. 42:8-10) Gurhi Yehova arhurhabalamwo ene erhi amazibu madarhi gakarhuhikira? Yehova arharhuderheza busu oku busu nk’oku aderhezagya Ayubu, cikone anarhuderheze kugerera Akanwa kage Bibliya.—Rm. 15:4. w22.08 buk. 11 cif. 10-11

Ecigamba c’e Roma calimwo Abakristu Bayahudi n’abarhali Bayahudi. Erhi irhegeko lya Musa lirhenzibwaho, abakozi ba Yehova barhacihûnagwa oku bagendekere barhumikira ebi lyal’ihanzize lugenda okulya biryo bilebe. (Mk. 7:19) Kurhangira ago mango na kugendekera, Bakristu baguma na baguma Bayahudi bakaciyumva oku bagwerhe oluhuma lw’okulya ebiryo bya ngasi lubero. Cikone, abandi Bakristu Bayahudi bakabona nk’okulya ebyo biryo kurhashinganini. Ago mazibu garhuma ecigamba cagabikanamwo. Entumwa Paolo yayerekana oku okugendekeza omurhûla kwali kwa bulagirire. Muli ntyo, Paolo arhabala ababo bemezi bahugûkwe gurhi akadali ka ntyo kakadwirhire abantu amazibu n’okugalerha omu cigamba coshi. (Rm. 14:19, 20) Ananali mubidu okujira empindulo omu kalamo kage ly’arhag’isarhaza abandi. (1 Kr. 9:19-22) Na nirhu, rhwanakayubaka abandi n’okugendekeza omurhûla erhi rhwakakayaka okujira akadali lugenda ebintu biyerekire ebi ngasi muntu asima. w22.08 buk. 22 cif. 7

Erhi rhwakacihiriraho muhigo mulebe omu mukolo gwa Yehova, rhunagendekere rhwajira okwirhu koshi lyo rhuhikira ogo muhigo. Ntyo ko rhunakwanine rhujire amango rhuli rhwakulikira obushinganyanya. Na Yehova arhulembera omu kurhurhabala lyo rhuhikira aha rhwajira amajambere bunyi-bunyi. (Enna. 84:5, 7) Yehova arhukengezize omu njira y’obuzigire oku okujira ebijiro by’obushinganyanya kurhaba kuzibu. (1 Yn. 5:3) Cikoki buba bulanzi, rhunaba rhulagirire k’obo bulanzi ngasi lusiku. Okengere ebikolanwa by’okulwa ivita ly’ekiroho entumwa Paolo yaganiriraga. (Ef. 6:14-18) Cikolanwa cihi cakag’ilanga omurhima g’omusoda? Yali ‘mpenzi y’obushinganyanya,’ eshushanyize amakanuni mashinganyanya ga Yehova. Nka kula empenzi elanga omurhima gw’omuntu, amakanuni mashinganyanya ga Yehova ganalanga omurhima gwawe gw’olwiganyo, ko kuderha omuntu wawe w’ekandalala. Co cirhumire, kuli kwa bulagirire orhabulaga empenzi y’obushinganyanya omu bikolanwa byawe by’okulwa ivita ly’ekiroho!—Mig. 4:23. w22.08 buk. 29 cif. 13-14

Akanwa ka Nnâmahanga kahîre abalume n’abakazi bishwekerezi obulongozi bwinja omu bihumbi by’emyaka. Gurhi oko kwahashikinemwo? Yehova ahashisize abantu okuyandika amakopi g’amandiko matagatifu. Ciru akaba abo bandisi b’amakopi barhali bimana, babire masu bwenene. Kwa lwiganyo, okubiyerekire Amandiko g’Ecihabraniya, musomi muguma ayandisire ntya: “Rhwanaderha buzira karhinda oku nta cindi citabu ca mîra calanzirwe buzira kujamw’amagosa nk’eco.” Co cirhumire rhwanayemera buzira karhinda oku enderho rhusoma omu Bibliya ene zo na ntanya z’owayiyandikisagya, Yehova. Yehova ye Nshôko ya “ngasi ngalo nyinja na ngasi nshokano nkana.” (Yk. 1:17) Ebibliya eri nguma y’omu ngalo nyinja bwenene Yehova arhuhire. Engalo enarhumanyise kantu kalebe lugenda owarhuhagayo: kunganaci arhumanyire bwinja na kunganaci amanyire amalagirire girhu. Ntyo kobinali lugenda owarhuhâga Ebibliya. Erhi rhurhanya kw’eyo ngalo, rhunaciyigirize binji okubiyerekire Yehova. Rhunayige oku aba arhumanyire bwinja amanyire n’amalagirire girhu. w23.02 buk. 2-3 cif. 3-4

Olusiku obufûke bwarhangira hanw’igulu omu Burhegesi bwa Yezu bw’Emyaka Cihumbi lwayish’iba lusiku lwinja bwenene! Abafîrirwe n’abazigirwa babo, boshi bali balindirira okucib’ibabona. Na Yehova naye ali alindirira ako kasanzi. (Ayu. 14:15) Orhanye kunganaci ngasi muntu ayish’ishagaluka hano acib’ibuganana n’abazigirwa bage bafîre. “Abashinganyanya,” ko kuderha abantu amazino gabo gayandisirwe omu citabu c’obuzine, “bafûkire obuzine.” (Ebj. 24:15; Yn. 5:29) Nkaba banji b’omu bazigirwa birhu bayish’iba omu bantu bayish’irhang’ifûlwa hanw’igulu. Kandi, “abarhali bashinganyanya,” kwa lwiganyo, abantu barhapataga obulyo bw’okumanya Yehova erhi kumukolera embere bafê, “bafûkire olubanja.” Abo bantu boshi bayish’ifûlwa bashinganine bayigirizibwe. (Iz. 26:9; 61:11) Co cirhumire, byayish’ihûna okujira omukolo munene bwenene gw’okuyigiriza gurhasag’ijirwa agandi mango goshi.—Iz. 11:10. w22.09 buk. 20 cif. 1-2

Yehova ayerekine oku agwerhe buhashe bunji kulusha ecigusho ca barhegesi balebe bal’icilunzire haguma. Ahashisize Abaisraheli bahima maeneo manji g’Ecihugo c’Amalaganyo. (Yoz. 11:4-6, 20; 12:1, 7, 24) Kanji-kanji, Yehova ayerekine oku ali w’Enyanya Bwenene! Erhi Mwami Nebukadnezari w’e Babiloni acikungira ‘obuhashe bw’emisi yage, n’olukengwa lw’irenge lyage’ ahali h’okuyemera n’obwirhohye oku Yehova ye shinganine irenge, Nnâmahanga amusirahya. Erhi Nebukadnezari afuma ‘acîtakîra Nnâmahanga w’Enyanya-Bwenene’ anayemera oku “oburhegesi [bwa Yehova] buba bw’ensiku n’amango.” Ayushula ntya: “Ntaye wakamuhanza oku muhigo gwage.” (Dan. 4:30, 33-35) Omuzihi w’ennanga adesire: “Liri lya bushagaluke ishanja Yehova aba Nnâmahanga walyo, abantu acishozire oku babe buhirhi bwage ye nnene.” (Enna. 33:12, NWT) Eco ciri cirhumire cinja c’okubêra bishwekerezi kuli Yehova! w22.10 buk. 15-16 cif. 13-15

Obulebi bunji bw’Ebibliya bwahikirizibwe burhuyemezize n’obwalagale oku rhwanalangalira ebiragane bya Nnâmahanga lugenda akasanzi kayisha. Rhunaciyumve ak’omuzihi w’ennanga washengaga Yehova ntya: “Omurhima gwani guyumîrire gwalinga oburhabale bwawe, akanwa kawe ko ncîkubagîre.” (Enna. 119:81) Kugerera Ebibliya, Yehova arhuhîre ‘obulangalire bw’ensiku zayisha.’ (Yer. 29:11, Mashi Bible) Obulangalire bwirhu bw’ensiku zayisha burhayimangiri oku bushiru bwa bene bantu, cikone buyimangire oku biragane bya Yehova. Lekagi rhuzibuhye obulangalire bwirhu omu Kanwa ka Nnâmahanga omu kugendekera rhwaba banafunzi binja b’obulebi bw’Ebibliya. Ecindi cirhumire cakarhuma rhwalangalira Ebibliya kuli kubona oku enarhabale abantu erhi bakulikira amahano gayo. (Enna. 119:66, 138) Kwa lwiganyo, balume na bakazi banji barhôline balikola hofi bavune obuhya bwabo, cikone ene bakola bagwerhe omwishingo bulya bakolesize amahano g’Ebibliya. Abana babo bashagalusire okulererwa omu mulala gw’Ecikristu gugwerhe obuzigire baciyumvamwo oku bali omu bulanzi banazigirwe.—Ef. 5:22-29. w23.01 buk. 5 cif. 12-13

Okarhanya kw’ebi Yehova akujirire. Orhanye gurhi wene wayungusiremwo omu kuhikirizibwa kw’ebiragane biri omu Kanwa ka Nnâmahanga. Kwa lwiganyo, Yezu alaganyize oku Ishe akuhikirigiza ebintu by’obulagirire omu kalamo kawe. (Mt. 6:32, 33) Kandi Yezu akuyemezize n’obwalagale oku Yehova akuha iroho lyage litagatifu erhi wakamuhûna lyo. (Lk. 11:13) Yehova ahikirizize ebyo biragane byage. Nkaba wanarhanya oku bindi biragane akuhikirigize. Kwa lwiganyo, akulaganyize oku akubabalira, akurhuliriza, n’okukulisa omu hali y’ekiroho. (Mt. 6:14; 24:45; 2 Kr. 1:3) Erhi wakakarhanya kw’ebi Nnâmahanga amakakujirira, wanalangalira bwenene ebi akujirira omu mango gayisha. Rhuyemire n’obwalagale oku Yehova ahikiriza ebiragane byage. Nk’oku omuzihi w’ennanga ayandikaga, “ow’omwishingo ali muntu . . . olangalira Yehova Nnâmahanga wage, . . . Ye obêra mwishwekerezi ensiku zoshi.”—Enna. 146:5, 6, NWT. w22.10 buk. 28 cif. 15, 17

K’obulebi lugenda okugalulwa kw’enterekêro ecîre burhuyerekire nirhu ene? Neci, kobinali! Omu njira nci burhuyerekiremwo? Kurhangira omu mwaka gwa 1919 muli Kano Kasanzi Kirhu (K.K.K.), emiliyoni y’abantu barhenzire omu buja bwa Babiloni Mukulu, k’okuderha amadini goshi g’obunywesi. Balongozibwe ahantu hinja bwenene kulusha Ecihugo c’Amalaganyo c’Abaisraheli. Balongozibwe omu paradizo y’ekiroho. (Iz. 51:3; 66:8) Kurhangira omu mwaka gwa 1919 muli Kano Kasanzi Kirhu (K.K.K.), Abakristu bashige amavurha bali bashagalukira okulama omu paradizo y’ekiroho. Enyuma z’aho, Abakristu bagwerhe obulangalire bw’okuyish’ilama hanw’igulu, k’okuderha “ebindi bibuzi,” nabo bajire mw’eco cihugo c’ekiroho banali bashagalukira emigisho minji Yehova ali abaha. (Yn. 10:16; Iz. 25:6; 65:13) Eparadizo y’ekiroho balamamwo eba omw’igulu lyoshi. Muli ntyo, ciru rhwakaba rhulamire ngahi okw’igulu ene, rhwanaba omu paradizo y’ekiroho erhi rhwakagendekera rhwalunga enterekêro ecîre okuboko. w22.11 buk. 11-12 cif. 12-15

K’onabone nka kuli kuzibu kuli we okuhugûkwa oku Yehova ayorha abaho “ensiku n’amango”? (Iz. 40:28) Hali abandi bantu banji babona oku kuli kuzibu kulibo okuhugûkwa ntyo. Elihu adesire ntya okubiyerekire Nnâmahanga: “Omubalé gw’emyaka yage gurhankaheka.” (Ayu. 36:26) Cikone, okuba rhurhahugûsirwi lugenda kantu kalebe arhali k’okuderha oku karhali k’okunali. Kwa lwiganyo, ciru akaba rhurhahugûkwa bwinjinja gurhi obulangashane bukola, ka kwanarhuma rhwaderha oku obulangashane burhahaba? Nanga ciru n’ehitya! Ko n’oko, ciru akaba rhwe bene bantu rhurhakahugûkwa bwinja gurhi Yehova ayorha ahaba, ananahabe ensiku n’amango, oko kurhakarhuma rhwarhanya mpu Nnâmahanga arhaba w’ensiku n’amango. Okubaho kw’Omulemi wirhu kurhayimangiri kw’ebi rhwakahash’ihugûkwa erhi kw’ebi rhurhakahash’ihugûkwa. (Rm. 11:33-36) Na kandi ayorhaga abaho embere igulu n’amalunga bihabe na ngasi kantu kabonekanamwo, nka izuba n’enyeyezi. Neci, ayorhaga abaho embere ‘ajire amalunga.’—Yer. 51:15. w22.12 buk. 2-3 cif. 3-4

Hali amango rhuhâbwa olukengwa lw’okusalira embere z’abandi. Kwa lwiganyo, mwali wirhu muguma oli walongoza ifunzo ly’Ebibliya anahûna owundi mwali wirhu omulusize kw’er’ifunzo oku asalire. Oyo mwali wirhu olusize owabo nkaba anaba arhamanyiri oyo mwanafunzi bwinja, na muli ntyo nkaba anabona oku kuli kwinja ajire isala oku buzinda bw’ifunzo. Omu kujira ntyo, kwanaba kulembu kuli ye okuhira amalagirire g’oyo mwanafunzi mw’er’isala. Mwene wirhu mulebe anahûnwa oku asalire oku ntimanano y’amahubiri erhi y’ecigamba. Bene wirhu bahâbwa olo lukengwa bashinganine bakakengera omuhigo gw’eyo ntimanano. Isala lirhashinganini likakolesibwa omu kuhâna amahano erhi omu kujira amatangazo. Ntimanano zirhu nyinji z’ecigamba zijira miniti irhanu y’olwimbo n’isala, co cirhumire mwene wirhu wajira isala arhashinganini aderhe “binji,” bwenene oku murhonderho gw’entimanano.—Mt. 6:7. w22.07 buk. 24 cif. 17-18

Yezu alebire oku omu nsiku nzinda, hakabire ebyahira erhi ndwala z’okuyahukira, hantu “hanji.” (Lk. 21:11) Gurhi okumanya ntyo kwakarhulerhera omurhûla? Rhurhasomerwa erhi endwala z’okuyahukira zirhondera. Rhunahugûkwe oku ebintu biri byajirikana nk’oku Yezu anaderhaga. Co cirhumire, rhushinganine okurhumikira ihano Yezu ahaga abantu balamire omu nsiku nzinda. Aderha ntya: “Mumanye murhayobohaga.” Kobinali, obulwala bw’okuyahukira bwanashanja bintu biguma na biguma rhuba rhukomire okujira, cikone orhayemeraga burhume waleka okujira ifunzo lyawe wene erhi okuja oku ntimanano. Emyanzi eganirire ebyahikire abantu omu kalamo eri omu bicapo birhu n’omu mavideo yakukengeza oku bene winyu na bali binyu bali bagendekera okubêra bishwekerezi ciru akaba bali bahikirwa n’ago mazibu. w22.12 buk. 17 cif. 4, 6

Yakobo ayerekine n’obwalagale oku al’izigire omugala Yozefu bwenene. (Murh. 37:3, 4) Oko kwarhuma bene Yakobo bakulu bayagalwa na mulumuna wabo. Erhi baba n’obulyo, baguliza Yozefu ecigusho c’abarhimbuzi Bamadianiti. Abo barhimbuzi bahêka Yozefu kuli bwenene e Misri, n’eyo munda nabo bacib’imuguza, lero bamuguliza Potifari, murhambo w’abalanzi ba Faraoni. Akalamo ka Yozefu kashanja duba-duba: ali mwana muzigirwa bwenene w’ishe lero ahikira aha aba muja wa busha-busha w’oyo mulume Mumisri! (Murh. 39:1) Hali amango rhuhikirwa n’amazibu “abandi bantu banabona,” k’okuderha, amazibu gahikira bene bantu boshi. (1 Kr. 10:13, Mashi Bible) Erhi kandi rhwanalibuka bulya kone rhuli banafunzi ba Yezu. Kwa lwiganyo, rhwanashekerwa, rhwanahagalikwa, erhi ciru kulibuzibwa erhi buyemere bwirhu burhuma. (2 Tm. 3:12) Ciru rhwakahikirwa na marhangulo gahi, Yehova anarhujira rhubêrwe. w23.01 buk. 14-15 cif. 3-4

Hali amango rhwakabona oku kuli kwa bulagirire rhugend’iganiza owirhu mwemezi warhugokezagya. Cikone embere rhujire ntyo, kwanaba kwinja rhucidose amadoso gali nk’aga: ‘Ka mmanyire binji lugenda ako kanga?’ (Mig. 18:13) ‘K’arhakaba arhangokize n’obulonza?’ (Muh. 7:20) ‘Ka nta mango nani nkola njijire igosa liri nk’eryo?’ (Muh. 7:21, 22) ‘Omu kuganiza oyu muntu, ka najira amazibu gabe madarhi bwenene kulusha aga rhuli rhwalonza okuyusa?’ Erhi rhwakaciha akasanzi k’okurhanya oku madoso gali nk’ago, nkaba rhwanabona oku obuzigire bwirhu kuli oyo mwene wirhu bwanarhushumya rhuleke okurhanya kw’ebi anarhujiriraga. Ngasi muguma wirhu anayerekane oku rhuli banafunzi b’okuli ba Yezu omu mango ali ayereka bene wirhu na bali birhu obuzigire burhalimwo kucikaliza ciru akaba bagwerhe obuzamba. Omu kujira ntyo, rhwanarhabala abandi bamanye idîni ly’okuli n’okucilunga haguma na nirhu omu kuharamya Yehova. Lekagi rhuhige okugendekera rhwayerekana obuzigire bulya co cimanyiso c’Abakristu b’okuli. w23.03 buk. 31 cif. 18-19

Ebibliya enarhurhabale rhuhugûkwe oku obuzigire bo buba borhere bukulu bwa Nnâmahanga. Bulya Yehova aba arhuzigire, arharhuhaga myanzi minji bwenene erhurhalusire olugero. (Yn. 21:25) Kandi Yehova arhuyeresire oku aba arhuzigire omu kuganira na nirhu omu njira erhuyeresire obukenge. Omu Bibliya, arhaba arhuhîre eliste ndiri y’amarhegeko gayerekine ebi rhushinganine rhujire n’ebi rhurhashinganini rhujire omu ngasi cigabi c’akalamo kirhu. Lubero n’oko, anakolese emyanzi y’okunali eyerekire akalamo k’abantu, obulebi bw’okushagalusa n’amahano gakarhurhabala okurhôla emihigo minja. Mw’ezo njira, Akanwa ka Nnâmahanga kanarhushumye rhumuzigire n’okumurhumikira kurhenga oku murhima gwirhu. Ebibliya eyerekine oku Yehova aba arhushibirire bwenene. Gurhi eyerekinemwo ntyo? Ebibliya ebamwo myanzi minji eyerekine gurhi bene bantu baciyumva. Rhwanahugûkwa oku abantu baganirirwe omu Bibliya bakag’iciyumva bulya bali bantu “akirhu.” (Yk. 5:17) Eby’obulagirire bwenene, omu kulolereza gurhi Yehova ajirire abantu bali akirhu, rhwanahash’ihugûkwa n’obwalagale oku “aba wa lukogo na wa bwonjo bunji.”—Yk. 5:11. w23.02 buk. 6 cif. 13-15

Ecitabu cizinda c’Ebibliya cirhondire n’ezi nderho: “Okucîmanyisa [Amafulûlo, NWT] kwa Yezu Kristu ahâbagwa na Nyamuzinda, mpu ayereke abambali ebiri hofi bibê.” (Maf. 1:1) Co cirhuma rhuhangayikira okumanya ebiri byajirikana omw’igulu ene n’okumanya gurhi byakahikirizamwo obulebi bw’Ebibliya. Na kandi rhwanaba n’irala ly’okuganirira emyanzi eri nk’eyo egarhi kirhu rhwene na nnene. Cikone, omu mango rhuli rhwaganirira obulebi bw’Ebibliya rhushinganine rhukayaka okuderha ebi rhwene rhuli rhwarhanya mpu nkaba byanabe. Bulya gurhi? Bulya rhurhakalonza rhuderhe kantu kalebe kakarhuma abantu baciberulamwo omu cigamba. Kwa lwiganyo, nkaba wayumvirhe abakulu ba mw’er’igulu bali baderha lugenda gurhi bakamalamwo kadali kalebe n’okulerha omurhûla n’akalembe. Ahali h’okurhanya rhwene mpu nkaba ezo nderho zabo ziri zahikiriza obulebi buli omu 1 Abatesalonika 5:3, kuli kwa bulagirire rhukamanya emyanzi mihyahya yazindig’icapisibwa. Erhi enshambalo zirhu zakakayimangira oku nyigirizo rhuhabwa n’ikubuliro lya Yehova, rhwanarhabala ecigamba cigendekere caba n’ecinyabuguma “omu nkengêro.”—1 Kr. 1:10; 4:6. w23.02 buk. 16 cif. 4-5

Bulya gurhi oba ozigire Yezu Kristu? Yezu aba azigire okuli, obwirhohye n’obushinganyanya. Erhi akaba oba ozigire okuli n’obushinganyanya, biyumvikine oku oba ozigire na Yezu Kristu. Orhanye gurhi Yezu ahaliragamw’okuli n’obushinganyanya omu njira y’oburhwali. (Yn. 18:37) Cikone, gurhigi azigiramwo obwirhohye? Yezu anazigire obwirhohye kugerera olwiganyo lwage. Kwa lwiganyo, ngasi mango anahe Ishe irenge lyoshi, ahali h’okuciha lyo yenene. (Mk. 10:17, 18; Yn. 5:19) Gurhi obwirhohye bwa Yezu burhumire waciyumva? Ka burhakushumizi ozigire Mugala wa Nnâmahanga onayige olwiganyo lwage? Neci kobinali. Bulya gurhi Yezu aba mwirhohye? Bulya aba azigire Ishe oba mwirhohye ananayige olwiganyo lwage. (Enna. 18:35; Hb. 1:3) Bulya Yezu anayerekane amorhere ga Yehova omu bwimana, k’oko kurhakushumizi omuzigire? w23.03 buk. 3-4 cif. 6-7

Ebibliya eganirire bigusho bibirhi by’abantu bayish’ifûlwa banagwerhe obulangalire bw’okulama emyaka n’emyaka hanw’igulu, “abashinganyanya” n’“abarhali bashinganyanya.” “Abashinganyanya” bali bantu bakolire Yehova n’obwishwekerezi akalamo kabo koshi. Lubero n’oko, “abarhali bashinganyanya” bali bantu barhamukoleraga. Bulya abantu b’ebyo bigusho bibirhi bayish’ifûlwa, ka rhwanaderha oku amazino gabo gali mayandike omu citabu c’obuzine? Embere “abashinganyanya” bafê, amazino gabo gali mayandike omu citabu c’obuzine. K’amazino gabo gazazibwe mw’eco citabu erhi bafâ? Nanga, bulya ‘bacizine’ omu nkengero za Yehova. Yehova “aba Nnâmahanga wa bantu bazine, cikwone arhaba w’abafîre, bulya kw’abona nk’abantu boshi bazine.” (Lk. 20:38, Mashi Bible) Oko kuli kuderha oku hano abashinganyanya bafûlwa hanw’igulu, amazino gabo gayish’iba gaciri mayandike omu citabu c’obuzine, ciru akaba burhangiriza gaba gaciri mayandike “n’ekreyo.”—Lk. 14:14. w22.09 buk. 16 cif. 9-10

Yehova al’ilonzize omuntu murhangiriza ashagalukire obulemi bwage. Erhi Nnâmahanga alema Adamu, amuhîre eparadizo erhal’isherezibwe n’akantu koshi-koshi akashagalukire, amuha n’omukolo gw’okuyihinga n’okuyigalihya. (Murh. 2:8, 9) Orhanye gurhi Adamu akag’ishagaluka omu mango akag’ilolereza gurhi emburho ziri zamera na gurhi ziri zajako amauwa. Adamu agwerhe olukengwa lunene lw’okushibirira ishwa ly’e Edeni! Kandi Yehova al’ihîre Adamu omukolo gw’okuha ensimba zoshi amazino. (Murh. 2:19, 20) Yehova yene akac’ishozire izino lya ngasi nsimba; cikone, aha Adamu ogo mukolo. Buzira karhinda, embere Adamu acishoge izino aha ngasi nsimba, akag’iyiyiga bwinja-bwinja, akalabiriza oku yal’iyosire embuga n’oku yakag’icigendesa. Adamu agwasirwe abe ashagalukire okujira ogo mukolo. Kobinali, ogo mukolo gwamuhîre obulyo bw’okushagalukira bwenene obwenge bw’Ishe, obulenga bwage n’obulemi bwage. w23.03 buk. 15 cif. 3

Oburhegesi bukulu bw’igulu lyoshi bwa Angleterre na Amérique, bushushanyizibwe n’enshando z’ensanamu nnenene bo burhegesi bukulu buzinda bw’igulu lyoshi bwalebirwe omu Bibliya. (Dan. 2:31-33) Nta bundi burhegesi bukulu bw’igulu lyoshi bwarhegeka enyuma z’obo. Cikone, Obwami bwa Nnâmahanga bwayish’ibushereza haguma n’agandi marhegesi goshi ga bene bantu oku ivita lya Armagedoni. (Maf. 16:13, 14, 16; 19:19, 20) Gurhi obo bulebi bwakarhulerheramwo obunguke? Obulebi bwa Daniyeli buyerekine ebindi bintu byakarhuyemeza oku rhuli rhwalama omu nsiku nzinda. Myaka 2 500 na kulusha egezire, Daniyeli aleba oku enyuma z’oburhegesi bukulu bwa Babiloni, gandi marhegesi makulu ani g’igulu lyoshi gakahumire bwenene oku bakozi ba Nnâmahanga. Kandi Daniyeli ayerekine oku Oburhegesi Bukulu bw’Igulu Lyoshi bwa Angleterre na Amérique bo bwakabire buzinda muli ago marhegesi. Oko kurhuhire oburhulirize n’obulangalire oku, hano hofi-hofi Obwami bwa Nnâmahanga bwashereza amarhegesi goshi ga bene bantu na bone burhegeke igulu lyoshi. w22.07 buk. 4 cif. 9; buk. 5 cif. 11-12