Mwezi gwa 6

Ayubu al’igwerhe obwîra bwinja haguma na Yehova. Al’igwerhe omulala munene gwalimwo ecinyabuguma, anali mugale bwenene. (Ayu. 1:1-5) Cikone, omu lusiku luguma lone, Ayubu aheza hofi ngasi kantu. Burhangiriza, aheza obugale bwage. (Ayu. 1:13-17) Enyuma z’aho, abana bage bazigirwa boshi bafâ. Orhanye gurhi Ayubu na mukage baciyumvirhe erhi bababwira oku abana babo ikumi boshi bafîre. Rhurhakasomerwa okubona Ayubu asharhulaga emishangi yage anacirhimba oku idaho omu kulakira abana bage! (Ayu. 1:18-20) Na kandi, Shetani alerhera Ayubu endwala y’amalumwa manji n’okumuhegeza olukengwa. (Ayu. 2:6-8) Embere z’aho, Ayubu al’ikenzirwe bwenene omu eneo yage. Abantu bakagiyish’imuhûna amahano. (Ayu. 31:18) Lero barhondera okumuyaka. Bene wabo, abîra bage ba hofi-hofi, ciru n’abanya-kazi bage boshi bamuyaka!—Ayu. 19:13, 14, 16. w22.06 buk. 21 cif. 5-6

Enyuma z’okubatizibwa, rhweshi rhushinganine rhugendekere okurhumikira ihano entumwa Paolo yahâga ababo Bakristu b’omu Efezi. Abahîre omurhima oku bahikire okuba Bakristu “bakola bakuzire.” (Ef. 4:13, Mashi Bible) Kuli kuderha oku bal’ishinganine ‘bagendekere bajira amajambere.’ Kobinali, okola oba ozigire Yehova bwenene. Cikone, wanayushula obuzigire bwawe kuli ye. Gurhi wakajiramwo ntyo? Paolo aganirire njira nguma omu Abafilipi 1:9. Paolo asalira oku obuzigire bw’Abafilipi “buyushûke ngasi lusiku.” Kuli kuderha oku rhwanayushula obuzigire bwirhu kuli Yehova. Rhwanajira ntyo omu kuba n’“obumanye [burhalimwo magosa] n’oburhimanya [bwinjinja].” Oku rhwagendekera rhwamanya Yehova, ko n’obuzigire bwirhu kuli ye bwagendekera bwayushuka ko rhwanagendekera rhwashagalukira amorhere gage n’oku ajira ebintu. Irala lirhu ly’okulonza okumushagalusa lyanayushuka, n’okurhalonza okujira akantu koshi-koshi kakamugayisa. Rhwanajira okwirhu koshi lyo rhumanya obulonza bwage buli buhi na gurhi rhwakajiramwo obo bulonza bwage. w22.08 buk. 2-3 cif. 3-4

Ebyayandikagwa omu citabu c’Amafulûlo birhayandikagwa enyanya z’abantu boshi, cikone byayandikagwa enyanya zirhu rhwe bakozi ba Nnâmahanga bacihânyire emwage. Rhwe bakozi ba Nnâmahanga rhurhakasomerwa okubona rhuli rhwashangira okuhikiriza obulêbi buli mw’eco citabu c’okushagalusa. Entumwa Yowane yayerekine akasanzi obo bulêbi bwakahikirire. Aderha ntya: “Kugerera obulongozi bw’iroho nahikira aha naja omu lusiku lwa Nnawirhu.” (Maf. 1:10, NWT) Erhi Yowane ayandika ezo nderho hofi omu mwaka gwa 96 muli Kano Kasanzi Kirhu (K.K.K.), “olusiku lwa Nnawirhu” lwaciri kuli bwenene. (Mt. 25:14, 19; Lk. 19:12) Cikone kushimbana n’obulêbi bw’Ebibliya, olo lusiku lwarhonderaga omu mwaka gwa 1914, erhi Yezu ajirwa Mwami empingu. Kurhondera ogo mwaka, obulêbi buli omu citabu c’Amafulûlo buyerekire abakozi ba Nnâmahanga bwarhondera okuhikirira. Kobinali, rhulamire omu “lusiku lwa Nnawirhu”!—Maf. 1:3. w22.05 buk. 2 cif. 2-3

Eyo nsimba n’oyo mulêbi w’obwihambi, bakwebwa omu nyanja y’omuliro gutwanyirwe n’ecibiriti erhi banazine. Ko kuderha oku, abo bashombanyi ba Nnâmahanga bayish’isherezibwa loshi-loshi omu kasanzi bayish’iba bacir’ibarhegeka. Bici ebi bihugwîre kuli rhwe? Rhuli Bakristu rhushinganine rhugendekere rhwabêra bishwekerezi kuli Nnâmahanga n’Obwami bwage. (Yn. 18:36) Rhurhashinganini rhukalunga okuboko oluhande loshi-loshi omu by’epolitike by’er’igulu. Cikone, oko kurhalunga okuboko oluhande loshi-loshi omu by’epolitike by’er’igulu kwanaba kuzibu bulya amaguvernema g’er’igulu ganakalonza rhugalunge okuboko loshi-loshi omu bijiro n’omu nderho. Abayemera okulunga okuboko amarhegesi g’er’igulu, banahîrweko ecimanyiso c’eciryanyi. (Maf. 13:16, 17) Cikone, ngasi yeshi oyemera eco cimanyiso arhaciyemerwa na Yehova ananaheze obulyo bw’okuyish’ilama ensiku n’amango. (Maf. 14:9, 10; 20:4) Kuli kwa bulagirire bwenene kuli ngasi muguma wirhu okurhalunga okuboko oluhande loshi-loshi omu by’epolitike, ciru akaba rhuli rhwasezibwa okujira ntyo! w22.05 buk. 10-11 cif. 12-13

Muhigo muguma wakacihiriraho kuli kuyiga bulenga bulebe bwakakurhabala omu mukolo gwa Yehova. Erhi rhwakakubûla obulenga bwirhu, rhwanaba n’obuhashe bw’okuhikiriza binji omu mukolo gwa Yehova. Orhanye okubiyerekire bakozi banji rhulagirireko lyo rhuyubaka Amabeteli, Enyumpa z’Entimanano Nkulu, n’Enyumpa z’Entimanano. Bakozi banji ba muli abo babire n’obulenga omu kukakola haguma na bene wirhu na bali birhu bakola bagwerhe obulenga omu by’obubasi. Ene, bene wirhu na bali birhu bali bayiga obulenga bwakabarhabala lyo bakashibirira Enyumpa z’Entimanano Nkulu n’Enyumpa z’Entimanano. Kugerera ezo njira n’ezindi, Yehova Nnâmahanga, “Mwami w’ensiku n’amango,” na Yezu Kristu, “Mwami w’abami,” bali bahikiriza bintu binji binja omu kukolesa abo bakozi bagwerhe obulenga. (1 Tm. 1:17; 6:15) Rhuba rhulonzize rhukole bwenene n’okukolesa obushashe bwirhu lyo rhulerhera Yehova irenge ahali h’okucilerhera lyo rhwenene.—Yn. 8:54. w22.04 buk. 24 cif. 7; buk. 25 cif. 11

Solomoni ali mugale bwenene, ananagwerhe akalamo kinja bwenene. (1 Bam. 10:7, 14, 15) Lubero n’oko, Yezu yehe arhagwerhe bintu binji by’omubiri ciru arhanagwerhe ahamwage. (Mt. 8:20) Cikone abo balume bombi bagwerhe entanya z’olugero okubiyerekire ebintu by’omubiri, bulya Yehova ye wabahâga obo bwenge. Solomoni al’ihugûsirwe oku kugerera ensaranga, rhwanagula ebintu rhulagirireko, na bintu bilebe rhulonzize. Kobinali, ciru akaba Solomoni ali mugale, al’ihugûsirwe oku hali ebindi bintu biba bya bulagirire bwenene kulusha ensaranga. Kwa lwiganyo, ayandika ntya: “Aha wankaluza ebirugu, wankajira izino nkana [erhi “kuba n’oborhere bwinja,” mahugûlo g’idako, NWT].” (Mig. 22:1) Kandi Solomoni adesire oku abantu bazigira ensaranga barhalug’ishagalukira ebi bagwerhe. (Muh. 5:10, 12) Na kandi arhurhonda oku rhurhakag’ihira obulangalire bwirhu boshi omu nsaranga, bulya omu hisanzi hisungunu ensaranga rhugwerhe zoshi zanahwa.—Mig. 23:4, 5. w22.05 buk. 21 cif. 4-5

Erhi rhurhanya bwenene oku migisho rhugwerhe muli gano mango, rhunazibuhye obwîra bwirhu haguma na Yehova. N’okurhanya oku migisho Yehova alaganyize okurhuha omu mango gayisha kunagendekere kwazibuhya obulangalire bwirhu bw’okumukolera emyaka n’emyaka omu mango gayisha. Ebyo byoshi byanarhurhabala rhukolere Yehova n’omwishingo ene. Yehova ‘anayimuke’ ly’arhurhabala hano ashereza er’igulu ligalu-galu. Rhuyemire n’obwalagale oku Yehova, “Mungu w’obushinganyanya” arhaleke igulu lya Shetani ligendekere lyabaho kasanzi kaliri kulusha oku obushinganyanya bwage buhûnyire. (Iz. 25:9) Aka Yehova, nirhu rhuli rhwalinda bwenene oku olo lusiku lw’obucunguke lwahika. Embere luhike, rhuhizire okugendekera rhwashagalukira bwenene olukengwa rhugwerhe lw’okusalira, okuyiga Akanwa ka Nnâmahanga n’okukakolesa omu kalamo kirhu, n’okurhanya bwenene oku migisho ali arhuha. Erhi rhwakajira ntyo, Yehova arhurhabala lyo rhulembera n’omwishingo n’okugendekera rhwamuharamya. w22.11 buk. 13 cif. 18-19

Ciru akaba Ebibliya erhaganiriri okubiyerekire obubatizo bwa Timoteyo, kurhali kuzibu okurhanya omwishingo nnina Ewuniki abire nago erhi omugala abatizibwa. (Mig. 23:25) Kurhali kulembu kuli Ewuniki okuyigiriza omugala okuzigira Yehova na Yezu Kristu. Timoteyo aleragwa na babusi babirhi bagwerhe ngasi muguma elyage idîni. Ishe ali Mugiriki, na nnina na nakulu bali Bayahudi. (Ebj. 16:1) Nkaba Timoteyo ali mwana w’omushuko erhi nnina Ewuniki na nakulu Loisi baja omu lindi idîni, ko kuderha, idîni ly’Ecikristu. Cikone, ishe yehe arhabaga Mukristu. Idîni lihigi Timoteyo akacishozire? Ene, abazire Bakristu nabo baba bazigire emilala yabo. Kulusha ebindi byoshi, baba balonzize barhabale abana babo babe n’obwîra bwa hofi-hofi haguma na Yehova. Na Nnâmahanga wirhu anashagalukire obushiru bwabo. (Mig. 1:8, 9) Yehova arhabire bazire banji bayigirize abana babo okumuzigira n’okumukolera. w22.04 buk. 16 cif. 1-3

Hano hofi-hofi Yehova ahira omu mirhima y’abarhegesi b’epolitike “emihigo y’okujira obulonza bwage.” Gurhi byayish’iba? Ago marhegesi g’epolitike, erhi “bami ikumi,” gayish’ihindukira amadîni g’obunywesi n’okugashereza. (Maf. 17:1, 2, 12, 16) Gurhi rhumanyiremwo oku obuzinda bwa Babiloni Mukulu buli hofi? Lyo rhushuza kw’er’idoso, kuli kwinja rhukengere oku ecigabi cinene c’evile ya mîra ya Babiloni cal’ilanzirwe n’amishi g’olwishi lunene lwa Efrata. Ecitabu c’Amafulûlo cishushanyize emiliyoni y’abantu balunga Babiloni Mukulu okuboko n’“amishi” g’obulanzi. (Maf. 17:15) Cikone kandi ciyerekine oku ago mishi ‘gakaganyire,’ n’oko kuyerekine oku amadîni goshi g’obunywesi gakahezize bantu banji bagalunga okuboko. (Maf. 16:12) Ene, obo bulebi buli bwahikirira, bulya bantu banji barhacishibirira eb’idîni banarhondire okulongeza handi-handi gurhi amazibu gabo gakahwamwo. w22.07 buk. 5-6 cif. 14-15

Erhi rhubabalira, rhunayerekane oku rhuvuzire Yehova omunkwa enyanya z’obwonjo bwage. Omu lwiganyo luguma, Yezu ashushanyize Yehova na mwami muguma wababaliraga ideni linene ly’omuja wage muguma bulya arhahashaga okulilyula. Cikone, oyo muja bababaliraga ayabirwa okubêra obwonjo owabo muja wamugwerhe ideni lisungunu bwenene ly’ensaranga. (Mt. 18:23-35) Bici Yezu alonzagya okurhuyigiriza? Erhi akaba rhuvuzire Yehova omunkwa enyanya z’obwonjo bunji arhuyeresa, oko kwanarhushumya rhukababalira abandi. (Enna. 103:9) Omu myaka yageraga, Ilabiro ly’Akalalizi liguma lyadesire ntya: “Ciru rhwakababalira abirhu bantu kanga, nta mango rhwakahikira oku kubabalira kwa Nnâmahanga n’obwonjo arhuyeresa kugerera Kristu.” Yehova anababalire abababalira abandi. Yehova anabêre obwonjo ababubêra abandi. (Mt. 5:7) Yezu ayerekine ntyo n’obwalagale erhi ayigiriza abanafunzi bage okushenga.—Mt. 6:14, 15. w22.06 buk. 10 cif. 8-9

Erhi Yezu ali hanw’igulu, agwerhe omubiri gw’omuntu. Ayerekine n’obwimana amorhere g’Ishe. (Yn. 14:9) Co cirhumire kugerera Yezu, rhwahikire aha rhwamanya Yehova Nnâmahanga n’okumuzigira. Na kandi, rhwayungusire kugerera enyigirizo zage n’oku ali alongozamwo ecigamba c’Ecikristu ene. Arhuyigirizize gurhi rhwakalamamwo omu njira yakarhurhabala rhuyemerwe na Yehova. Na kandi, rhweshi rhwanayunguka kugerera olufû lwage. Erhi Yezu afûka, ahânyire akamaro k’omuko gwage nka nterekêro nyimana ‘eshuka ebyaha birhu byoshi.’ (1 Yn. 1:7) Ene, ali Mwami ogwerhe obuhashe orhakanafâ. Hano hofi-hofi, Yezu avunyungula irhwe ly’enjoka. (Murh. 3:15) Hano Shetani asherezibwa, abantu bishwekerezi bayish’irhulirizibwa bwenene! Embere ako kasanzi kahike, orharhamaga. Nnâmahanga wirhu aba mwikubagirwa. Kugerera iburha ly’omukazi, ayish’ilerhera abantu b’“amashanja goshi g’igulu” migisho minji bwenene.” w22.07 buk. 18 cif. 13; buk. 19 cif. 19

Rhushinganine rhube babidu okushanja emihigo yirhu. Bulya gurhi? Bulya, hali amango akanga kirhu kakashanja. Kwa lwiganyo, entumwa Paolo yarhabire okurhondeza ecigamba cihyahya omu vile y’e Tesalonika. Cikone abashombanyi ba Paolo bamulibirhako mpu arhenge mw’eyo vile. (Ebj. 17:1-5, 10) Paolo acibêrage mw’eyo vile, akahizire bene wabo na bali babo b’eyo munda omu mazibu. Cikone, Paolo arhalekaga okubarhabala. Lubero n’oko, erhi akanga kashanja, acipatanisha nako. Enyuma z’aho, arhuma Timoteyo e Tesalonika ly’agend’ishibirira amalagirire g’ekiroho g’abo Bakristu bahyahya. (1 Ts. 3:1, 2) Kobinali, Abatesalonika bashagalusire bwenene. Rhwanaciyigiriza binji kugerera ebyahikiraga Paolo e Tesalonika. Rhwanacihiriraho omuhigo gw’okujira binji omu mukolo gwa Yehova, cikone, akanga kirhu kanashanja n’oko kwanarhuma rhurhacihikiriza ogo muhigo. (Muh. 9:11) Erhi akaba ntyo kw’akanga kawe kayosire, obe mubidu okucihiriraho ogundi muhigo wakahash’ihikiriza. w22.04 buk. 25-26 cif. 14-15

Yehova anarhurhulirize omu kurhuha obulangalire lugenda amango gayisha. Rhuganirire ntanya nsugunu z’Ebibliya zakarhurhuliriza amango rhuli rhwalwisa amazibu. Omu Bibliya, Yehova arhuyemezize n’obwalagale oku nta kantu koshi-koshi, ciru n’amazibu madarhi, ‘kankahasha okurhunanûla oku buzigire [bwage].’ (Rm. 8:38, 39) Kandi arhuyemezize n’obwalagale oku “ali hofi ha ngasi yeshi omusengera.” (Enna. 145:18) Yehova arhubwizire oku, erhi rhwakamulangalira, rhwanahash’ilembera ngasi marhangulo na ciru rhwanaba n’omwishingo ciru akaba rhuli rhwalibuka. (1 Kr. 10:13; Yk. 1:2) Kandi Akanwa ka Nnâmahanga karhukengezize oku amazibu girhu gali ga kasanzi kasungunu na mofi erhi rhwakagagerera oku luhembo lw’ensiku n’amango ayish’irhuha. (2 Kr. 4:16-18) Yehova arhuhîre obulangalire bw’okunali oku ayish’ishereza abarhulerhera amazibu boshi, ko kuderha Shetani Ibilisi n’abantu boshi bajira amabi ak’age. (Enna. 37:10) Ka wabisire omu bwenge bwawe mandiko maguma na maguma g’Ebibliya gahânyire oburhulirize lyo gakurhabala okulembera amazibu g’amango gayisha? w22.08 buk. 11 cif. 11

Ka hali amango oyoboha oku nkaba orhahashe okugendekera walama kushimbana n’amakanuni ga Yehova g’obushinganyanya lusiku oku lundi, mwaka oku gundi? Yehova alaganyize oku obushinganyanya bwirhu bwanaba “nka mivumba y’omu nyanja.” (Iz. 48:18) Orhanye oyimanzire aha burhambi bw’enyanja nnenene, oli walaba gurhi emivumba y’omu nyanja eri yaviringana burhahusa, muguma oku gundi. Mw’ako kanga k’omurhûla, ka wanayoboha oku hali olusiku eyo mivumba erhakaciba omu nyanja? Nanga! Omanyire oku yagendekera yajira ntyo. Gurhi obushinganyanya bwawe bwakabamwo nka mivumba y’omu nyanja? Erhi wakaba okola warhôla omuhigo, orhang’ikarhanya ebi Yehova alonzize ojire. Na buzinda obijire. Ciru akaba omuhigo warhôla guli muzibu bwenene, Sho w’obuzigire agendekera abaho ly’akuha emisi n’okukurhabala ly’ogendekera walama kushimbana n’amakanuni gage g’obushinganyanya ngasi lusiku.—Iz. 40:29-31. w22.08 buk. 30 cif. 15-17

Oku buzinda bw’eyo myaka 1 000, Shetani ayish’ishwekûlwa mw’eyo mpamikwa yage. Ago mango ayish’ijira okwage koshi ly’arheba abantu bimana. Amango g’er’irhangulo, abantu bimana boshi hanw’igulu bayish’iba n’obulyo bw’okuyerekana n’obwalagale erhi bakenzire izino lya Nnâmahanga n’okulunga okuboko oburhegesi bwage. (Maf. 20:8-10) Oku ngasi muntu ayish’ijira ago mango ko kwarhuma izino lyage lyayandikwa loshi-loshi erhi lirhayandikwe omu citabu c’obuzine. Mubalè mulebe gw’abantu gurhamanyikini bayish’iba aka Adamu na Eva, omu kulahira oburhegesi bwa Yehova. Bici byayish’ibahikira? Olwandiko lw’Amafulûlo 20:15, Mashi Bible, lurhubwizire ntya: “Ngasi yeshi orhâli muyandike omu citabu c’obuzine, bamukweba mw’eyo nyenga [nyanja] y’omuliro.” Kobinali, abo bantu bagoma bayish’ihererekezibwa loshi-loshi barhakanacihaba bundi. Cikone, bantu banji bimana bayish’ihima er’irhangulo lya buzinda. w22.09 buk. 23-24 cif. 15-16

Bakristu baguma na baguma b’omu cigamba c’omu myaka igana mirhanzi bakag’isegeza oku Abakristu barhali Bayahudi bal’ishinganine bakembûlwe, nkaba mpu ly’Abayahudi barhajaga babaderha-derha kubi. (Gl. 6:12) Entumwa Paolo erhalungaga ezo ntanya okuboko ciru n’ehitya, cikone bulya ali mwirhohye ahûna entumwa n’abagula bali e Yeruzalemu ihano, ahali h’okuderha mpu entanya zage zikulikirwe. (Ebj. 15:2) Bulya Paolo ayusize ago mazibu muli eyo njira, arhabala abo Bakristu bagendekeze omurhûla n’omwishingo omu cigamba. (Ebj. 15:30, 31) Erhi hakaba akadali kadarhi, rhunagendekeze omurhûla omu kulonza obulongozi kuli balya Yehova ahizireho lyo bashibirira ecigamba. Kanji-kanji, rhunahâbwe obulongozi buyimangire oku Bibliya kugerera ebicapo birhu erhi kugerera amaruba ikubuliro lirhurhumira. Erhi rhwakakacihangana okukulikira obo bulongozi ahali h’okukasegeza entanya zirhu rhwene, rhwanarhabala ly’omurhûla guba omu cigamba. w22.08 buk. 22 cif. 8-9

Omu kalamo kirhu, hali amango rhweshi rhubona oku rhulagirire oku mwîra wa hofi-hofi rhwakabwira oku rhuli rhwaciyumva. Cikone hali amango kuba kuzibu okujira ntyo. Nkaba rhurhaba rhukomîre okubwira muntu mulebe entanya zirhu z’ekandalala, rhwananavunika omurhima bwenene erhi buzinda rhwakayumva oku omwîra wirhu abwizire abandi ebi rhwamubwiraga. Cikone rhunashagalukire bwenene omuntu oyish’ibîka ihwe! Abagula babîka amahwe baba nka “kacikirizo ka mpûsi na lwâkiro” kuli bene wabo na bali babo. (Iz. 32:2) Rhuba rhumanyire oku rhwanaganiza abo balume buzira boba n’okulangalira oku ebi rhubabwizire byabêra ihwe. Rhurhabasêza oku barhubwire emyanzi bashinganine okubîka ihwe. Na kandi, rhunashagalukire baka abagula birhu bulya barhajira okwabo koshi mpu lyo b’iba bababwira emyanzi y’ihwe eyerekire abandi omu cigamba. Kobinali guba mugisho erhi akaba muka omugula arhabwizirwi emyanzi y’ihwe eyerekire bene wirhu na bali birhu. w22.09 buk. 11 cif. 10-11

Rhwanayemera n’obwalagale oku Yehova ayish’icungula abakozi bage bishwekerezi omu mango g“amalibuko [madarhi]” gayisha. (Mt. 24:21; Dan. 12:1) Ayish’ijira ntyo amango omulungano gw’amashanja guhamagalwa Gogi w’Amagogi gwarhera abakozi bishwekerezi ba Yehova omw’igulu lyoshi. Ciru ogo mulungano gwakajirwa n’ebihugo 193 byoshi bilunzire okuboko Ecinyabuguma c’Amashanja, gurhakahash’ilwisa Ow’Enyanya Bwenene n’emirhwe yage y’omu mpingu! Yehova alaganyize ntya: ‘Nacikuza nanciheke [nancihe] irenge, nancimanyise emwa amashanja manji, gamanya oku nie ndi Nyamubaho [Yehova, NWT].’ (Eze. 38:14-16, 23) Hano Gogi arhera abakozi ba Yehova, oko kwayish’irhuma Yehova alerha ivita lya Harmagedoni n’okushereza “ngasi mwami w’en’igulu lyoshi.” (Maf. 16:14, 16; 19:19-21) Lubero n’oko, “abantu bashinganyanya bo bàyish’irya ecihugo [igulu], entagengwa [abantu bishwekerezi, NWT] zo zàyishicibêramwo.”—Mig. 2:21. w22.10 buk. 16-17 cif. 16-17

Rhurhagwerhi obuhashe bw’okusoma emirhima; “Nyakasane [Yehova, NWT] yehe ye hombaganya emirhima.” (Mig. 16:2) Aba azigire abantu ba ngasi lubero, barhenzire omu ngasi bûko na ngasi nkomêdu. Kandi Yehova arhuhûnyire oku ‘rhuyigule omurhima gwirhu gwoshi gwoshi.’ (2 Kr. 6:13) Rhunalonze okuzigira bene wirhu na bali birhu boshi, cikone rhurhalonza okubatwira olubanja. Kandi, oko kuli kuderha oku rhurhashinganini rhukatwira abantu barhali Bahamirizi olubanja. Ka wanatwira muntu mulebe w’omu mulala gwawe orhali Muhamiziri wa Yehova olubanja omu kuderha ntya: “Nta lusiku oyo anayemere okuli”? Nanga, oko kwanaba kucihira embere n’okucibona mushinganyanya. Yehova acigendekire aha “abantu boshi ba ngasi hoshi” obulyo bw’okuciyunjuza. (Ebj. 17:30) Ensiku zoshi okakengera oku okucibona mushinganyanya kuli kubula obushinganyanya. Rhulekage okuzigira kwirhu amakanuni ga Yehova g’obushinganyanya kurhulerhere omwishingo n’okurhurhabala rhube lwiganyo lwinja oku bandi lyo barhuzigira n’okuzigira Nnâmahanga wirhu bwenene. w22.08 buk. 31 cif. 20-22

Rhumanyire oku bantu balebe banarhuhagalika amango rhuli rhwajira omukolo gw’amahubiri. Buzira karhinda, rhwahagalikwa bwenene omu mango gayisha. (Dan. 11:44; 2 Tm. 3:12; Maf. 16:21) Cikone, rhwanayemera n’obwalagale oku Yehova ayish’irhuha oburhabale rhulagirireko. Bulya gurhi? Ensiku zoshi, Yehova arhabire abakozi bage bahikirize bwinja emikolo abahâga ciru yakabire mizibu gurhi. Rhuganirire omulebi Ezekiyeli erhi ali ahubiri Abayahudi bahêkagwa e Babiloni. Bantu ba gurhi Ezekiyeli akag’ihubiri? Yehova ayerekine oku bali bantu bagwerhe “irhwe lizibu,” “n’omurhima gudundagwire,” na “bagoma.” Bali bagalu-galu nka mishugi, na babi nka mpiri. Co carhumaga Yehova abwira Ezekiyeli kanji-kanji erhi: “Orhabayobohaga”! (Eze. 2:3-6) Ezekiyeli abire n’obuhashe bw’okuhikiriza omukolo gwage gw’amahubiri bulya (1) Yehova ye wamurhumaga, (2) akag’ihâbwa emisi kugerera iroho litagatifu lya Nnâmahanga, na (3) obuyemere bwage bwasezire kugerera Akanwa ka Nnâmahanga. w22.11 buk. 2 cif. 1-2

Ebiremwa byoshi Yehova alemeraga hanw’igulu abihîre akalamo kagwerhe obuzinda, cikone abantu bohe arhabalemaga ntyo. Abahîre obulangalire bwago-bwago bw’okulama buzira kufâ. Na kandi, Yehova arhulemire n’irala linene ly’okugendekera rhwalama. Okubiyerekire abantu, Ebibliya edesire oku Nnâmahanga “ahizire ensiku n’amango omu murhima gwabo.” (Muh. 3:11, NWT) Eco ciri cirhumire ciguma cakarhuyemeza oku olufû aba mushombanyi wirhu. (1 Kr. 15:26) Erhi rhwakalwala bwenene, ka rhunabule bujira akantu koshi-koshi n’okulinga kone oku rhwafâ? Nanga. Kanji-kanji rhunalonze munganga n’okunywa amafumu lyo rhulwisa eyo ndwala. Kobinali, rhunakajira oku rhwakanahasha lyo rhurhag’ihikira aha rhwafâ. N’erhi omuntu rhuzigira akafâ, ciru akaba oyo muntu ali musole erhi mushosi, rhunaciyumve kubi bwenene ekandalala kasanzi karhali kanyi. (Yn. 11:32, 33) Buzira karhinda, Omulemi wirhu w’obuzigire arhakarhuhiziremwo irala n’obuhashe bw’okugendekera rhwalama nk’omuhigo gwage gurhali gwa kuha abantu obuzine bw’ensiku n’amango. Cikone rhugwerhe ebindi birhumire byakarhuyemeza n’obwalagale oku rhwanahash’ilama ensiku n’amango. w22.12 buk. 3 cif. 5; buk. 4 cif. 7

Bene wirhu na bali birhu banji banaba balwazire, bayobohire, erhi kuciyumva kahumba muli gano mango mazibu. Ojire okwawe koshi ly’okaganira na bene winyu na bali binyu. Hali amango endwala y’okuyahukira yakarhuma rhurhakayegera abirhu bakozi ba Yehova. Omu kasanzi ka ntyo, nkaba wanaciyumva nk’oku entumwa Yowane yaciyumvagya. Al’ilonzize okubona omwîra wage Gayo busu oku busu. (3 Yn. 13, 14) Ciru akaba ntyo, Yowane al’imanyire oku muli kasanzi kalebe, arhakahashir’ibonana na Gayo. Muli ntyo, Yowane ajira oku akanahashire; ayandikira Gayo amaruba. Erhi akaba birhahashikini ngasi mango okubonana na bene winyu na bali binyu busu oku busu, ocihangane okabaganiza kugerera ezindi njira. Erhi wakagendekera okuganira n’abinyu bemezi, orhakaciciyumva oli kahumba bwenene wananaciyumva oli omu murhûla. Okaganiza abagula, bwenene amango oli waciyumva ogwerhe amahangayiko, onayemere bakuhe omurhima omu njira y’obuzigire.—Iz. 32:1, 2. w22.12 buk. 17-18 cif. 6-7

Ebibliya eyerekine oku hali akasanzi amagulu ga Yozefu gal’ishwesirwe n’obudagûle n’oku igosi lyage lyal’ihizirwe omu byuma. (Enna. 105:17, 18) Akanga ka Yozefu kagendekera kaba kabi ciru kulusha. Ali muja nnawabo al’ilangalire cikone ahikira aha aba mushwekwa wa busha-busha. K’okola ohikirwe n’akanga k’okugayisa kagendekeraga kaba kabi ciru kulusha ciru akaba wakag’isalira n’obushiru bunji? Oko kwanarhuhikira. Yehova arharhucîka mpu ly’amarhangulo garharhuhikiraga mw’er’igulu liri lyarhegekwa na Shetani. (1 Yn. 5:19) Ciru akaba ntyo, wanayemera n’obwalagale ntya: Yehova aba amanyire bwinja-bwinja ebiri byakuhikira ananakushibirire. (Mt. 10:29-31; 1 Pt. 5:6, 7) Kandi, alaganyize ntya: “Ntakakuleka, ntakanakulîkirira.” (Hb. 13:5) Yehova anakurhabala ly’olembera ciru n’omu mango orhagwerhi bulangalire lugenda akanga kawe. w23.01 buk. 15-16 cif. 7-8

Amandiko garhuyemezize n’obwalagale oku Nnâmahanga wirhu arhakarhuleka amango rhwamajira amagosa. Abaisraheli bagomire Yehova kanji-kanji; cikone, erhi bakaciyunjuzize n’omurhima goshi, Nnâmahanga akag’ibababalira. Abakristu b’omu myaka igana mirhanzi nabo bal’imanyire oku Nnâmahanga al’ibazigire bwenene. Omu kulongozibwa n’iroho litagatifu, entumwa Paolo yahûnyire ababo Bakristu oku ‘bababalire n’okuhira omurhima omu nda’ omulume wakag’ijira ecaha cizibu cikone ali amaciyunjuza. (2 Kr. 2:6, 7; 1 Kr. 5:1-5) Biri bya kushagalusa bwenene okubona oku Yehova arhalahiraga abakozi bage mpu bulya kone bamugokize! Lubero n’oko, abarhabala omu njira y’obuzigire, abahanûla, anabahûna bamugalukire. Ene nalyo, alaganyize oku ntyo ko ajirira abanya-byaha boshi baciyunjuzize. (Yk. 4:8-10) Ebibliya eyerekine obwenge bwa Nnâmahanga, obushinganyanya bwage, n’obuzigire bwage. Eco citabu ciyerekine oku Yehova aba alonzize rhumumanye. Aba alonzize rhube bîra bage. w23.02 buk. 7 cif. 16-17

Hali ecirhumire cinja cirhuma rhwalonza okumanya gurhi ebiri byajirikana omw’igulu ene biri byahikirizamwo obulebi bw’Ebibliya. Kwa lwiganyo, Yezu aganirire ebintu byakajirikine omw’igulu ly’arhurhabala rhumanye mangaci obuzinda bw’er’igulu lya Shetani bwakabire buli hofi. (Mt. 24:3-14) Entumwa Petro yarhuhîre omurhima rhukasegeza obwenge oku kuhikirizibwa kw’obulebi bw’Ebibliya ly’obuyemere bwirhu bubêra busezire. (2 Pt. 1:20, 21) Erhurhabire rhukaba n’entanya z’olugero amango rhuli rhwarhanya lugenda obulebi bw’Ebibliya. Arhuhûnyire ‘rhukacifinja okuyisha kw’olusiku lwa Nyamuzinda.’ (2 Pt. 3:11-13) Bulya gurhi? Arhali bulya rhuli rhwalonza rhumanye ‘olusiku n’akasanzi’ Yehova alerhamwo ivita lya Harmagedoni, cikone bulya rhulonzize rhukolese akasanzi kacisigire omu kuba nʼ“ebijiro bitagatifu byʼolugenzi nʼebijiro byʼobwishwekerezi kuli Nnâmahanga.” (Mt. 24:36; Lk. 12:40) Rhulonzize rhugendekere rhwaba n’olugenzi lwinja n’okujira okwirhu koshi ly’obushiru bwirhu omu mukolo gwa Yehova buyerekana oku rhumuzigire bwenene. Lyo rhuhasha okujira ntyo, rhugwasirwe rhukacilabiriza rhwenene. w23.02 buk. 16 cif. 4, 6

Hali ebintu abantu b’“ebindi bibuzi” bashinganine bajire ene lyo balame omu Paradizo. Rhushinganine rhuyerekane gurhi rhuciyumva lugenda Yezu. Kwa lwiganyo, rhunayerekane oku rhumuzigire kugerera oku rhujirira bene wabo bashige amavurha. Yezu adesire oku olubanja ayish’itwira ebindi bibuzi lwayish’iba luyimangire kw’ebi bajirire bene wabo. (Mt. 25:31-40) Rhwanalunga bene wabo Kristu okuboko omu mukolo gw’okuhubiri n’okujira abanafunzi. (Mt. 28:18-20) Rhurhakalinda mpu amango rhwahika omu Paradizo lyo rhwaba bantu Yehova alonzize bayilamemwo. Kurhangira buno rhwanacihangana okuba bikubagirwa omu nderho n’omu bijiro birhu na ba lugero omu kalamo kirhu. Kandi rhwanaba bishwekerezi kuli Yehova, kuli bene wirhu na bali birhu, na ngasi muguma wirhu anaba mwishwekerezi kuli iba erhi mukage. Erhi rhwakacihangana okurhumikira amakanuni ga Yehova mw’er’igulu ligalugalu, kwanayish’iba kulembu kuli rhwe okugarhumikira omu Paradizo. Na kandi rhwanacihangana okuba n’obulenga n’engeso nyinja lyo rhuyerekana oku rhuli rhwacirheganya okulama ago mango. w22.12 buk. 11-12 cif. 14-16

Rhunazigire Omwami wirhu Yezu bulya aba Murhegesi mwinja bwenene. Yehova yene akomerezize Omugala anamuhiraho ly’arhegeka. (Iz. 50:4, 5) Kandi, orhanye oku buzigire bw’okucihâna Yezu ayerekine. (Yn. 13:1) Bulya Yezu ye Mwami wawe, kobinali ogwasirwe omuzigire. Ayerekine oku abantu bamuzigira kobinali, ko kuderha aba ahamagala bîra bage, banayerekane obuzigire bwabo omu kukenga amarhegeko gage. (Yn. 14:15; 15:14, 15) Luli lukengwa lunene okuba mwîra wa Mugala wa Yehova! Omanyire oku Yezu aba mwirhohye, n’oku anayige olwiganyo lw’Ishe n’obwimana. Wayizire oku alisize abal’ishalisire, arhuliriza abal’ivunisire omurhima, anafumya ciru n’abalwala. (Mt. 14:14-21) Wacibwinire gurhi ali alongoza ecigamba cage ene. (Mt. 23:10) Onamanyire oku ajira binji kulusha omu mango gayisha ye nka Mwami w’Obwami bwa Nnâmahanga. Gurhi wakayerekanamwo oku omuzigire? Omu kuyiga olwiganyo lwage. Kantu kaguma omu bintu birhangiriza wakajira ly’oyiga olwiganyo lwage, kuli kucihâna emwa Yehova n’okubatizibwa. w23.03 buk. 4 cif. 8, 10

Yehova ayunjuzize empingu n’igulu ciru n’enyanja bintu binji bya kusomeza bwenene byakarhuyigiriza binji kuli ye. (Enna. 104:24, 25) Kandi orhanye lugenda oku Nnâmahanga arhulemire. Arhuhîre obuhashe bw’okushagalukira ebintu binja birhuzungulusire rhubona. Arhuhîre obuhashe bw’okubona, okuyumva, okuhuma, okulabula n’okubayiza. Obwo buhashe boshi bunarhuhashise rhushagalukire ebintu biri lubero alemire. Ebibliya eyerekine ecindi cirhumire c’obulagirire cishinganine cirhushumye rhukalolereza obulemi. Erhuyigirizize lugenda amorhere ga Yehova. (Rm. 1:20) Kwa lwiganyo, olole oku bintu Yehova alemire onabone gurhi biba bilemirwe bwinja-bwinja bwenene. Ka birhayerekana obwenge bwa Nnâmahanga? Kandi orhanye oku biryo biri lubero rhushagalukira. Ebyo biryo binayerekane n’obwalagale obuzigire ajira kuli bene bantu. Erhi rhubona amorhere ga Yehova kugerera ebintu ajijire, rhunahikire aha rhwamumanya bwinja n’oko kunarhushumye rhumuyegere bwenene. w23.03 buk. 16 cif. 4-5

Ehali ziri mw’er’igulu zagendekera okuba mbi bwenene, n’oko kwarhuma kwaba kuzibu bwenene kuli rhwe okulangalira Akanwa ka Nnâmahanga. Abantu banalonza rhucikebwe oku Ebibliya erhaba y’okuli erhi oku Yehova arhahiragaho mushizi mwirhonzi na mwikubagirwa ly’alongoza abakozi bage ene. Cikone erhi akaba rhuyemire n’obwalagale oku Akanwa ka Yehova kaba k’okuli ensiku zoshi, rhwanahash’ihagalika eyo mirhego erhangula obuyemere bwirhu. Rhwanahiga ‘okugombya omurhima gwirhu nti ebi [Yehova] arhurhegesire omu marhegeko gage, gubikole bwinjinja ensiku n’amango.’ (Enna. 119:112) ‘Rhurhakabêra nshonyi’ okuganirira abandi lugenda okuli n’okubaha omurhima balame kushimbana n’okuli. (Enna. 119:46) Na kandi rhwanahash’ilembera n’“oburhwali n’omwishingo” amazibu madarhi bwenene, ciru n’okulibuzibwa. (Kl. 1:11; Enna. 119:143, 157) Okuli kunarhurhabale rhuciyumve rhurhulirire rhunagwerhe obulangalire kunanarhuyerese gurhi rhwakalamamwo. Okuli kunarhuhe obulangalire lugenda akasanzi kinja kayisha idako ly’oburhegesi bw’Obwami bwa Nnâmahanga. w23.01 buk. 7 cif. 16-17

Omu budufu buzinda embere z’okufâ kwage, Yezu ayusize kasanzi kanji ali asalira enyanya z’abanafunzi bage, ahûna Ishe oku ‘abalange oku Mubi.’ (Yn. 17:15) Oko kuyerekine oku al’ibazigire bwenene! Ciru akaba al’imanyire oku ali hofi alibuzibwe bwenene, agendekire ahangayikira entumwa zage. Omu kuyiga olwiganyo lwa Yezu, rhurhasegeza obwenge oku malagirire girhu rhwene. Lubero n’oko, ngasi mango rhunasalire enyanya za bene wirhu na bali birhu. Erhi rhujira ntyo, rhunabe rhuli rhwarhumikira irhegeko lya Yezu ly’okuzigirana rhwene na nnene, rhunanayerese Yehova kunganaci rhuba rhuzigire abirhu bemezi. Okusalira enyanya za bene wirhu na bali birhu kurhaba kuhêza akasanzi busha. Akanwa ka Nnâmahanga karhubwizire oku “omusengero gw’omushinganyanya washenga n’omurhima gwage gwoshi gujira buhashe bunji.” (Yk. 5:16) Abirhu bemezi baba balagirire oku masala girhu bulya bali balwisa mazibu manji. w22.07 buk. 23-24 cif. 13-15