Mwezi gwa 12

Ka kobinali omukozi w’omu burhegesi bw’e Etiyopiya ali tayari okurhôla omuhigo gw’okubatizibwa? Orhanye k’oku: Oyo mulume Muetiyopiya “al’iharâmya e Yeruzalemu.” (Ebj. 8:27) Co cirhumire, ashinganine abe ali muntu wayemeraga idîni ly’Eciyahudi. Buzira karhinda, ayigaga lugenda Yehova kugerera Amandiko Matagatifu g’Ecihabraniya. Ciru akaba ntyo, al’ilonzize okuyiga binji. Erhi Filipo arhimanana n’oyo mukozi w’omu burhegesi bw’e Etiyopiya omw’ibarabara, akag’isoma ecitabu cizinge z’amandishi g’omulebi Izaya. (Ebj. 8:28) Al’ilonzize agendekere ayiga. Alijijire omubalamo muliri kurhenga e Etiyopiya ly’aj’iharamya Yehova omu hekalu e Yeruzalemu. Filipo ayigirizize oyo mulume Muetiyopiya nyigirizo nguma na nguma mpyahya z’obulagirire, kwa lwiganyo, amuyigirizize oku Yezu ye Masiya. (Ebj. 8:34, 35) Obuzigire bwage kuli Yehova n’Omugala bwayushuka. Oko kwamushumya arhôle omuhigo gw’obulagirire bwenene omu kalamo kage gw’okubatizibwa n’okuba mwanafunzi wa Yezu Kristu. Filipo abona oku oyo mulume ali tayari, n’oko kwarhuma amubatiza. w23.03 buk. 8-9 cif. 3-6

Rhurhakashagalusa Yehova erhi akaba rhurhaderha okuli. Aba ashombire obunywesi boshi. (Mig. 6:16, 17) Ciru akaba bantu banji ene barhacibona oku, okunywerha kuba kubi, rhwehe rhunayake okunywerha bulya rhuba rhumanyire oku Yehova anakushombe. (Enna. 15:1, 2) Kobinali, arhali bunywesi nkununu bone rhuyaka, cikone rhunayake n’enderho zakarhuma abandi baba n’entanya mbi. Kandi rhushinganine rhuyake okukalumiza emyanzi mibi okubiyerekire abandi. (Mig. 25:23; 2 Ts. 3:11) Erhi wakabona enganiro zinyu zamaba za kulumiza emyanzi mibi okubiyerekire abandi wanashanja enganiro ho n’aho omu kuganirira akantu kinja. Bulya rhulamire omw’igulu bantu banji bali bakolesa enderho mbi, rhushinganine rhujire okwirhu koshi ly’enderho zirhu zikashagalusa Yehova. Anagishe obushiru bwirhu rhujira lyo rhukolesa enderho zirhu omu njira nyinja amango rhuli omu mahubiri, oku ntimanano, n’omu nganiro zirhu za ngasi lusiku. Hano Yehova ashereza er’igulu ligalugalu, kwayishiba kulembu bwenene okumukengesa kugerera enderho zirhu.—Yd. 15. w22.04 buk. 9 cif. 18-20

Erhi rhurhanya kunganaci Yehova na Yezu baba barhuzigire, oko kunarhushumye nirhu rhubazigire. (1 Yn. 4:10) Rhunabazigire ciru kulusha erhi rhuhugûkwa oku Yezu afîrire ngasi muguma wirhu. Entumwa Paolo ali yemire ntyo, anayerekana oku al’ivuzire omunkwa enyanya z’okwo erhi ayandikira Abagalasiya. Aderha ntya: ‘Mugala wa Nyamuzinda . . . anzigire anacihâna erhi nie ntuma.’ (Gl. 2:20) Kugerera engombôlo Yehova akukulwire emunda ali ly’oba mwîra wage. (Yn. 6:44) K’orhashagalusiri omu kuyumva oku Yehova abwine kantu kalebe kinja omu murhima gwawe n’oku alyuzire ibeyi linene bwenene ly’oba muguma w’omu bîra bage? K’oko kurhazibuhizi obuzigire bwawe kuli Yehova na Yezu? Co cirhumire ngasi muguma wirhu ashinganine acidose ntya: ‘Bici obo buzigire bunshumize okujira?’ Obuzigire bwirhu kuli Nnâmahanga na Kristu bunarhushumye rhuzigire abandi. —2 Kr. 5:14, 15; 6:1, 2. w23.01 buk. 28 cif. 6-7

Ebibliya ciri cikolanwa ca bulagirire bwenene Yehova akolesa ly’arhabala abantu bage ‘bàkazimuharamya . . . boshi n’omurhima muguma.’ Yehova ayandikisize bigabi binji by’Amandiko omu njira yakarhabala abasomi birhohye bone babihugûkwe. (Lk. 10:21.) Omw’igulu lyoshi abantu banasome Ebibliya. Cikone abantu birhohye bone bahugûkwa n’okukolesa ebi edesire. (2 Kr. 3:15, 16) Rhunayige lugenda obwenge bwa Yehova buba omu Bibliya. Yehova anakolese Amandiko ly’arhuyigiriza nka cigusho cikone kandi anayigirize n’okurhuliriza ngasi muguma wirhu. Amango rhuli rhwasoma Akanwa ka Yehova, rhweshi rhwanabona oku anashibirire ngasi muguma wirhu. (Iz. 30:21) Ka kanji-kanji orhayigula Amandiko n’okusoma olwandiko lubonekine nka we lwayandikiragwa? Ciru akaba ntyo, Ebibliya yayandisirwe oku bunguke bw’emiliyoni y’abantu. Gurhi yakabamw’emyanzi epatine n’akalamo k’ene eshuzize oku malagirire gawe? Oko kuhashikine bulya owayandikisagya Ebibliya ajira obwenge burhankagerwa.—2 Tm. 3:16, 17. w23.02 buk. 4-5 cif. 8-10

Rhwe Bakristu b’okuli, rhuba rhuzigire Yehova bwenene. Rhuba rhulonzize rhujire ebintu binja omu mukolo gwa Yehova. Cikone, lyo rhujira byoshi rhwakanahasha omu mukolo gwage, rhushinganine rhucihirireho emihigo y’ekiroho. Kwa lwiganyo, okuba n’amorhere g’Ecikristu, okuciyigiriza bulenga bulebe bwakarhurhabala omu mukolo gwa Yehova, n’okulonza njira nci rhwakakoleramwo abandi. Bulya gurhi rhushinganine rhulonze okujira amajambere g’ekiroho? Burhangiriza, rhuba rhulonzize rhushagaluse Larha wirhu w’obuzigire w’omu mpingu. Yehova anashagaluke erhi abona rhuli rhwakolesa enshokano zirhu n’obuhashe bwirhu omu mukolo gwage. Na kandi rhuba rhulonzize rhujire amajambere g’ekiroho lyo rhurhabala bene wirhu na bali birhu bwenene. (1 Ts. 4:9, 10) Rhweshi rhwanajira amajambere g’ekiroho ciru akaba rhukola rhugwerhe myaka minji erhi nsiku nsungunu omu okuli. w22.04 buk. 22 cif. 1-2

Ebigabi by’epolitike by’er’igulu, byashomba Babiloni Mukulu, madîni goshi gʼobunywesi. Eco cijiro co cayish’iba murhondero gw’amalibuko madârhi. Cikone, k’oko kwayish’ishumya bantu banji bahige okukolera Yehova? Nanga. Lubero n’oko, ecitabu c’Amafulûlo cigabi ca 6 ciyerekine oku muli ako kasanzi kazibu, abantu barhali bakolera Yehova, bayish’ikalongeza obulanzi omu bigabi by’er’igulu biyerekire epolitike n’eby’oburhunzi, bishushanyizibwe n’entondo. Okubona abo bantu barhayish’ije eluhande lw’Obwami bwa Nnâmahanga, Yehova ayish’ibabona nka bashombanyi bage erhi bakumuhagalika. (Lk. 11:23; Maf. 6:15-17) Kobinali, abakozi bishwekerezi ba Yehova bayish’ibonekana bali lubero muli ako kasanzi k’amalibuko madârhi. Bone bayish’iba cigusho c’abantu bali bakolera Yehova Nnâmahanga hanw’igulu, n’okulahira okulunga okuboko “eciryanyi.”—Maf. 13:14-17. w22.05 buk. 16-17 cif. 8-9

Arhali “omwanzi gw’akalembe” gone abakozi ba Nnâmahanga bashinganine bayalize. (Mt. 24:14) Kandi bashinganine balunge okuboko omukolo gwa bamalahika baganirirwe omu citabu c’Amafulûlo cigabi ca 8 kuhika ca 10. Abo bamalahika bali bayaliza amahanya gahikira abarhayemera Obwami bwa Nnâmahanga. Omu ntyo, Abahamirizi ba Yehova bali bayaliza omwanzi gw’olubanja gushushanyizibwe n’“olubula n’omuliro,” biyerekine emanja Nnâmahanga atwira ebigabi by’igulu lya Shetani. (Maf. 8:7, 13) Abantu bali omu bulagirire bw’okumanya oku obuzinda buli hofi lyo bajira empindulo zishinganine omu kalamo kabo, lyo bayish’iyokoka olusiku lw’obukunizi lwa Yehova. (Sof. 2:2, 3) Cikone bantu banji barhal’ibayemera ogo mwanzi. Rhushinganine rhube n’oburhwali lyo rhugendekera rhwayaliza ogo mwanzi. Omu kasanzi k’amalibuko madârhi, omwanzi muzinda g’olubanja rhwayish’iyaliza go gwayish’igayisa abantu bwenene.—Maf. 16:21. w22.05 buk. 7 cif. 18-19

Orhanye oku biba erhi omulume n’omukazi Bakristu baba bali hofi babe babusi. Omu myaka minji, nkaba banaba erhi bayumvirhizize hotuba nyinji ziganirire okubiyerekire okulera abana. Cikone amango bakola babusi ago makanuni ganaba ga bulagirire bwenene kulibo. Bakola baba n’owabo mwana balera bone. Ogo gurhali mukolo mulembu! Kobinali, erhi ebintu bishanja omu kalamo kirhu, makanuni maguma na maguma g’Ebibliya ganabe ga bulagirire bwenene kuli rhwe. Eco co cirhuma abakozi ba Yehova basoma Amandiko, n’okugarhanyako “ensiku z’akalamo [kabo] zoshi,” nk’oku abami Baisraheli bal’ibwizirwe. (Lush. 17:19) Mwe babusi, mugwerhe olukengwa lunene bwenene Omukristu akaba nalo, ko kuderha, okuyigiriza abana binyu okubiyerekire Yehova. Cikone mushinganine mujire binji ahanyuma n’okubwira abana binyu kone myanzi milebe eyerekire Nnâmahanga. Mulonzize murhabale abana binyu bazigire Yehova bwenene. w22.05 buk. 26 cif. 2-3

Rhurhashinganini rhuciyumve kubi kone enyanya z’ecaha rhwajijire. Rhushinganine rhube babidu okurhôla omuhigo. Akantu k’obulagirire Yehova arhanyako embere ahige erhi ababalira erhi nanga kuba kuhinduka kw’omuntu wajiraga ecaha. Okuhinduka kuba “kuhindula olugenzi.” Omu zindi nderho, omuntu ashinganine ahindule olugenzi lwage omu kuleka ebijiro byage bibi n’okurhondera alama nk’oku Yehova alonzize. (Iz. 55:7) Oyo muntu akwanine ashanje obukengere bwage ly’arhondera okulongozibwa n’entanya za Yehova. (Rm. 12:2; Ef. 4:23) Ashinganine ahige okuleka entanya mbi n’ebijiro byage bibi bya mîra. (Kl. 3:7-9) Kobinali, obuyemere bwirhu omu nterekêro Kristu ahânaga bo burhuma Yehova arhubabalira n’okurhucêsa kurhenga omu caha. Yehova anarhubabalira kugerera eyo nterekêro erhi akabona oku rhuli rhwajira okwirhu koshi lyo rhushanja olugenzi lwirhu lwa mîra.—1 Yn. 1:7. w22.06 buk. 6 cif. 16-17

Kurhenga mîra, abantu banakalibuza ababo. (Muh. 8:9) Kwa lwiganyo, abantu banakolese kubi obukulu bwabo, abantu babisha banakajira ebijiro by’obuminya, abanafunzi bahalalira ababo e masomo banakabajacira n’okubayobohya, hali ciru n’abantu bajirira ab’omu mulala gwabo n’obukali. Gurhi Shetani akolesamwo oboba bwa bene bantu ly’arhushumya rhurhôle emihigo mibi? Shetani anakolese oboba bwa bene bantu ly’arhushumya rhuleke omukolo gw’amahubiri erhi lyo rhuleka okujira ebi Yehova arhuhûnyire rhujire. Shetani anashumye amarhegesi ga bene bantu lyo gahanza omukolo gwirhu n’okurhulibuza. (Lk. 21:12) Bigabi bilebe by’igulu lya Shetani binakalumîza emyanzi y’obunywesi okubirhuyerekire. Abantu bayemera obo bunywesi banarhushekera, erhi ciru banarhuhira kw’ecirhêro. (Mt. 10:36) Ka rhwanasomêrwa n’obo bulenga bwa Shetani? Nanga, ciru n’ehitya. Ali amabukolesa omu myaka igana mirhanzi.—Ebj. 5:27, 28, 40. w22.06 buk. 16 cif. 10-11

Bandi bayish’iba omu “bandi” erhi banji bamanyisibwa enjira y’obushinganyanya? Abo bayish’ihiramwo abantu bayish’ifûlwa n’abantu bayokoka ivita lya Harmagedoni haguma n’abana boshi bayish’iburhwa omw’igulu lihyahya. Oku buzinda bw’emyaka 1 000, abantu boshi bayish’iba balamire hanw’igulu bayish’iba bimana. Rhushinganine rhukengere oku okuba mwimana kone arhali ko kuderha oku omuntu apata obuzine bw’ensiku n’amango. Orhanye kuli Adamu na Eva. Bali bimana, cikone bal’ishinganine bagendekere barhumikira Yehova Nnâmahanga lyo bahâbwa obuzine bw’ensiku n’amango. Cikoki, eby’okugayisa, bayabirwa okumurhumikira. (Rm. 5:12) Bulya boshi bayish’iba bakola bali bimana oku buzinda bw’emyaka 1 000, k’abo bantu bimana boshi bayish’ilunga okuboko oburhegesi bwa Yehova ensiku n’amango? Erhi, ka baguma mulibo bayish’iba aka Adamu na Eva bayabiragwa okugendekera babêra bishwekerezi kuli Yehova, ciru akaba bali bimana? Ago madoso gayish’ishuzibwa. w22.09 buk. 22-23 cif. 12-14

Erhi olaba ebiri byaba omw’igulu, k’onabone nka kuli kuzibu okuyemera oku ebintu byanaciyinjihe? Abantu b’omu mulala muguma barhacizigirana nk’oku byali burhanzi. Abantu bali bagendekera okuba baminya bwenene, ba kucikaliza, na bakali. Bantu banji bali babona oku kuli kuzibu okulangalira abarhegesi. Cikone, ebyo biri byajirikana byoshi byanakuha obulangalire. Bulya gurhi? Bulya abantu bali bacigendesa nk’oku byanal’ilebirwe omu bulebi buguma bwago-bwago bw’Ebibliya okubiyerekire ‘ensiku nzinda.’ (2 Tm. 3:1-5) Nta muntu mwirhohye wakalahira oku obo bulebi burhali bwahikirira, n’okuhikirizibwa kw’obo bulebi kuyerekine n’obwalagale oku Yezu akola ali Mwami w’Obwami bwa Nnâmahanga. Cikone, obo buli bulebi buguma bone b’omu bulebi bunji bwenene buyerekire Obwami bwa Nnâmahanga. Obo bulebi boshi buba bupatine bwinja-bwinja nka kula balunga haguma ebihande by’enfoto ly’eba nguma-guma, bunarhuyeresire ngahi rhwahika oku kalandriye ka Yehova. w22.07 buk. 2 cif. 1-2

Omu kasanzi k’obu bulwala bw’okuyahukira bw’e COVID-19, rhwahâbirwe obulongozi bw’obwalagale lugenda oku rhwakajira entimanano zirhu z’ecigamba n’omukolo gwirhu gw’amahubiri. Buzira kulegama, rhwarhondera okujira entimanano zirhu z’ecigamba, n’entimanano zirhu nkulu kugerera e vidéoconférence. Rhwanarhondera okuhubiri kugerera amaruba n’etelefone. Yehova agishire obushiru bwirhu. Tawi nyinji zahânyire eraporo ziyerekine oku omubalè gw’abahubiri babo gwayushusire. Kobinali, hali eby’okuhâna omurhima banji bacibwinire muli ako kasanzi. Nkaba hali baguma na baguma barhanyize oku ikubuliro lirhalusire olugero omu kuba masu lugenda obu bulwala bw’okuyahukira. Cikone, kanji-kanji byabonekine n’obwalagale oku obulongozi rhwahâbirwe bwali bwa bwenge. N’erhi rhurhanya gurhi Yezu ali alongoza abantu bage omu njira y’obuzigire, oko kunarhuyemeze n’obwalagale oku ciru mazibu gahi gakarhuhikira omu mango gayisha, Yehova n’Omugala muzigirwa baba haguma na nirhu.—Hb. 13:5, 6. w22.07 buk. 13 cif. 15-16

Ahanyuma n’okukuza Yehova omu masala girhu, rhwanakamuvuga omunkwa enyanya z’ebintu binja arhuha. Kwa lwiganyo, rhwanamuvuga omunkwa enyanya z’amarangi minja rhubona oku mauwa, ebiryo binunu bya ngasi lubero rhujira, n’omwishingo g’okuba n’abîra ba hofi-hofi. Larha wirhu w’obuzigire anarhuhe ebyo byoshi n’ebindi bintu binji lyo rhuba n’omwishingo. (Enna. 104:12-15, 24) N’akantu k’obulagirire bwenene, rhunavuge Yehova omunkwa enyanya z’ebiryo binji by’ekiroho arhuha n’obulangalire bwinja rhugwerhe lugenda akasanzi kayisha. Kwanaba kulembu bwenene okuyibagira okuvuga Yehova omunkwa oku bintu byoshi arhujirira. Bici byakakurhabala ly’okakengera? Wanajira e liste y’ebintu wahûnyire Yehova omu masala gawe n’okulabiriza ngasi mango gurhi Yehova ashuzize kw’ago masala. Na buzinda, wanasalira ly’omuvuga omunkwa oku burhabale bwage.—Kl. 3:15. w22.07 buk. 22 cif. 8-9

Rhumanyire oku rhushinganine rhujire binji ahanyuma n’okuyiga kone okuli. Lyo rhuba na bunguke bunji, rhushinganine rhulame kushimbana n’okuli, ko kuderha oku rhushinganine rhukakolesa ebi rhuli rhwayiga omu kalamo kirhu. Okujira ntyo kone kwakarhuma okuli kwarhulerhera omwishingo gw’okunali. (Yk. 1:25) Bici byakarhuyemeza n’obwalagale oku rhuli rhwalama kushimbana n’okuli? Mwene wirhu muguma adesire oku rhukwanine rhukacilabiriza rhwene lyo rhumanya ebi rhuli rhwajira bwinja n’ebi rhushinganine rhukubûle omu kalamo kirhu. Entumwa Paolo yadesire ntya: “Ngasi aha rhwakaba rhuhisire omu kujira amajambere, rhugendekere rhwalambagira omu lugenzi lo n’olo buzira kavulindi.” (Fl. 3:16, NWT) Orhanye oku bunguke rhuba nabo erhi rhujira okwirhu koshi lyo ‘rhugendekera rhwashimba okuli’! Omu kujira ntyo, akalamo kirhu kanabe kinja rhunanalerhere Yehova omwishingo na bene wirhu na bali birhu. (Mig. 27:11; 3 Yn. 4) Kobinali, ebyo biri birhumire binja birhushumya rhuzigire okuli n’okulama kushimbana n’okuli. w22.08 buk. 19 cif. 16-18

Gurhi abagula bakayerekanamwo oku bazigire Yehova na Yezu? Njira nguma y’obulagirire bakajiramwo ntyo kuli kushibirira amalagirire g’ebibuzi bya Yezu. (1 Pt. 5:1, 2) Yezu ayeresire entumwa Petro ntyo n’obwalagale. Enyuma z’okuhakana Yezu kasharhu koshi, Petro al’ilonzize bwenene ayerekane oku al’izigire Yezu. Enyuma z’okufûka kwage, Yezu adosa Petro ntya: “Simoni, mwene Yowane, k’onzigira?” Rhwanayemera n’obwalagale oku Petro akalonzize ajire okwage koshi ly’ayerekana oku al’izigire Nnawabo. Yezu abwira Petro ntya: “Yabula abana-buzi bani.” (Yn. 21:15-17) Omu kalamo kage koshi enyuma z’aho, Petro ashibirire bwenene ebibuzi bya Nnawabo, n’oko kwayerekana oku al’imuzigire. Mwe bagula, gurhi mwakayerekanamwo oku ebinwa Yezu abwiraga Petro biri bya bulagirire kuli mwe? Mwanayerekana oku muzigire Yehova na Yezu omu kujira ngasi mango omukolo gw’okulambagirira ebibuzi n’omu kujira okwinyu koshi lyo murhabala abalesire omukolo gw’amahubiri bagalukire Yehova.—Eze. 34:11, 12. w23.01 buk. 29 cif. 10-11

Oyake omurhego gw’okukarhanya oku nta muntu yeshi-yeshi wakahugûkwa mazibu malebe oli walwisa. Okurhanya ntyo kwanarhuma waderha oku nta bulangalire buliho lugenda akanga kawe n’oku orhagwerhi obuhashe bw’okulwisa irala libi. Entanya z’Ebibliya ziri lubero n’ezo. Edesire ntya: “Haguma n’amashumi, amuha oku mwagafuma n’emisi mwagagalamwo.” Co cirhumire, ciru akaba irala lirhu libi liri lidarhi bwenene, rhwanahasha okubêra bishwekerezi kuli Yehova. Kugerera oburhabale bwa Yehova, rhwanahasha okulihima. Ensiku zoshi okakengera ntya: Bulya rhuli bantu barhali bimana, rhurhakahasha okuyaka okuba n’irala libi. Cikone erhi irala libi lyakakuyishira, wanalihagalika ho n’aho, nk’oku Yozefu ajiraga erhi ayaka muka Potifari buzira kulegama. (Murh. 39:12) Orhashinganini okahikiriza irala libi! w23.01 buk. 13 cif. 16-17

Obushinganyanya buba bundi borhere bwa Yehova. (Lush. 32:4) Obushinganyanya buba bupatine bwenene n’okurhaba n’akabôlo, na Yehova arhajira kabôlo. (Ebj. 10:34, 35) Endimi Ebibliya yayandikagwamwo ziyerekine oku Yehova arhajira kabôlo. Yehova alaganya oku omu nsiku nzinda, “obumanye bw’okunali” buba omu Bibliya “bwakayushusire.” Bantu banji bakabuhugûsirwe. (Dan. 12:4, NWT) Njira nguma obo bumanye bwayushusiremwo kuli kuhindula Ebibliya n’ebicapo biyimangire oku Bibliya omu zindi ndimi, okubicapisa, n’okubigabira abantu. Abakozi ba Yehova bahindwire Akanwa kage, koshi kagumana erhi bigabi bilebe, omu ndimi zilushire 240, na ngasi muntu anapata eyo mpindulo y’Ebibliya buzira kulipa. Oko kuli kwarhuma abantu b’omu mashanja goshi bayiga lugenda “omwanzi mwinja gw’Obwami” embere obuzinda buyishe. (Mt. 24:14, NWT) Nnâmahanga wirhu w’obushinganyanya alonzize bantu banji bwenene babe n’obulyo bw’okumumanya omu kusoma Akanwa kage, bulya aba arhuzigire bwenene. w23.02 buk. 5 cif. 11-12

K’onazigire obushinganyanya? Buzira karhinda neci. Cikone rhweshi rhurhaba bimana, n’erhi rhwakabula buba masu, kwanaba kulembu entanya z’igulu lugenda obushinganyanya zirhuyahukire. (Iz. 5:20) Erhi abantu barhanya lugenda omuntu mushinganyanya, banji banarhanye oku aba muntu wa bucibone, okatwira abandi olubanja, erhi ocibona nk’ali mwinja kulusha abandi. Cikone Nnâmahanga arhasima ago morhere ciru n’ehitya. Amango Yezu ali hanw’igulu, atumuza bwenene ebirongozi by’amadîni by’omu nsiku zage bulya bakag’icihiriraho agabo makanuni g’obushinganyanya. (Muh. 7:16; Lk. 16:15) Omuntu mushinganyanya arhaba muntu orhanya oku ye mwinja kulusha abandi. Obushinganyanya buba borhere bwinja bwenene. Kwa bofofi, obushinganyanya kuli kujira ebiri binja omu masu ga Yehova Nnâmahanga. Omu Bibliya, enderho zahindwirwe bushinganyanya zihânyire entanya z’okulama kushimbana n’amakanuni galengerire, ko kuderha amakanuni ga Yehova. w22.08 buk. 27 cif. 3-5

Yezu al’ilangalire abanafunzi bage ciru akaba bal’igwerhe obuzamba. (Yn. 15:16) Erhi Yakobo na Yowane bahûna Yezu enafasi yago-yago omu Bwami bw’empingu, Yezu arhabaga n’akarhinda lugenda ebyakag’ibashumya lyo bakolera Yehova erhi kubakûla omu mubalè gw’entumwa zage. (Mk. 10:35-40) Buzinda, omu budufu Yezu agwarhagwa, abanafunzi bage boshi balibirha bamusiga. (Mt. 26:56) Cikone, Yezu arhalekaga okubalangalira. Al’imanyire obuzamba bwabo, ciru akaba ntyo, “abazigira lwoshi.” (Yn. 13:1) Erhi Yezu afûka, aha abaganda bage 11 bishwekerezi olukengwa lunene lw’okulongoza omukolo gw’okujira abanafunzi n’okushibirira ebibuzi byage by’engulo ndarhi. (Mt. 28:19, 20; Yn. 21:15-17) Al’igwerhe ebirhumire binja by’okulangalira abo bantu barhali bimana. Boshi bakolire Yehova n’obwishwekerezi kuhika oku buzinda bw’akalamo kabo ka hanw’igulu. Kobinali, Yezu ayerekine olwiganyo lwinja omu kulangalira abantu barhali bimana. w22.09 buk. 6 cif. 12

Erhi rhwakayemera n’obwalagale oku Yehova aba arhuzigire, ko kuderha oku ali haguma na nirhu, Shetani arhakarhuyobohya. Kwa lwiganyo, omuzihi w’Olulanga lwa 118 arhimanine na hali nguma na nguma z’okuyobohya bwenene. Al’igwerhe bashombanyi banji, ciru baguma na baguma bal’ilengerire (mulongo gwa 9, 10). Hali amango ayobohire bwenene (mulongo gwa 13). Anahâbwa obuhane buzibu-zibu kurhenga emwa Yehova (mulongo gwa 18). Ciru akaba ntyo, oyo muzihi w’olo lulanga ayimba ntya: “Nta bwoba bungwerhe.” Al’imanyire oku, ciru akaba Yehova Ishe w’omu mpingu amuhîre obuhane, al’imuzigire. Oyo muzihi w’olo lulanga al’iyemire n’obwalagale oku ciru akarhimanine na kanga kahi, Nnâmahanga wage w’obuzigire akabire mubidu okumurhabala ensiku zoshi. (Enna. 118:29) Rhushinganine rhuyemere n’obwalagale oku Yehova aba azigire ngasi muguma wirhu. Okuyemera ntyo n’obwalagale kwanarhurhabala rhuhime ebi bintu bisharhu abantu balug’iyoboha: (1) okuyoboha oku rhurhahashe okuhikiriza amalagirire g’omulala gwirhu, (2) okuyoboha abantu, (3) n’okuyoboha olufû. w22.06 buk. 15 cif. 3-4

Rhugwasirwe rhujire okwirhu koshi lyo rhuheba enterekêro ya Yehova oku nafasi ntanzi omu kalamo kirhu. Bulya Yehova ye Mulemi wirhu, rhushinganine rhukamuharamya. (Maf. 4:11; 14:6, 7) Co cirhumire, akantu k’obulagirire omu kalamo kirhu, kuli kumuharamya omu njira alonzize, ko kuderha “omu murhima [omw’iroho, NWT] n’omw’okuli.” (Yn. 4:23, 24, Mashi Bible) Rhulonzize iroho litagatifu lya Nnâmahanga lilongoze enterekêro yirhu ly’epatana n’enyigirizo z’okuli ziri omu Kanwa kage. Rhugwasirwe rhuhebe enterekêro rhuha Yehova oku nafasi ntanzi omu kalamo kirhu ciru akaba rhulamire omu cihugo omukolo gwirhu guhanzibwemwo goshi erhi bigabi bilebe byago. Kuhika buno, bene wirhu na bali birhu 100 na kulusha bali omu prizo bulya kone bali Bahamirizi ba Yehova. Ciru akaba ntyo, bagwerhe omwishingo banali bajira okwabo koshi lyo basalira, lyo bayiga, n’okuganirira abandi lugenda Nnâmahanga n’Obwami bwage. Erhi rhwakajacirwa erhi kulibuzibwa, rhwanaba n’omwishingo bulya rhumanyire oku Yehova ali haguma na nirhu n’oku anarhuhembe.—1 Pt. 4:14. w22.10 buk. 9 cif. 13

Omu citabu coshi c’Emigani, Yehova arhuhîre amahano gakola ensiku zoshi gakarhurhabala okujira akalamo kirhu kabe kinja erhi rhwakagakolesa. Rhuganirirage nyiganyo ibirhi zone z’ago mahano g’obwenge. Burhangiriza, orhimukwe n’ebi ogwerhe. Olwandiko lw’Emigani 23:4, 5 lurhuhanwire ntya: “Orhacîrhamagya mpu walwira okuhirhira, . . . Bulyala kwo bujira ebyubi nk’ikozi, lyo liyakira oku nkuba.” Cikone, ene abagale n’abakenyi boshi banahangayikire bwenene ensaranga. Oko kunarhume bashereza irenge lyabo, obwîra haguma n’abandi, ciru n’amagala gabo. (Mig. 28:20; 1 Tm. 6:9, 10) Bwa kabirhi, okarhanya embere oderhe. Erhi akaba rhurhabiri masu, enderho zirhu zanalerha mazibu manji. Olwandiko lw’Emigani 12:18, Mashi Bible, ludesire ntya: “Ola oderha duba buzira kugerêreza anayagaze owabo nka ngorho, cikwone enderho z’ab’obumanye [ab’obwenge, NWT] buba bufûmu.” Rhunarhabale okugendekeza omurhûla amango rhuli rhwayaka okuderha-derha lugenda amagosa g’abandi.—Mig. 20:19. w22.10 buk. 21 cif. 14; buk. 22 cif. 16-17

Ezekiyeli alishinganine ahugûkwe bwinja ogo mwanzi embere aguyalize. Alishinganine ayemere ogo mwanzi lyo gumushumya ahubiri. Buzinda, kantu kalebe ka kusomeza kajirikana. Ezekiyeli abona oku eco citabu cizinge ‘câli cinunu nka buci.’ (Eze. 3:3) Bulya gurhi? Bulya Ezekiyeli akag’ibona oku olukengwa lw’okurhumwa na Yehova lwali lununu erhi lwinja bwenene. (Enna. 19:8-11) Avuzire omunkwa bwenene okubona Yehova ayemire okumukolesa nka mulebi wage. Enyuma z’aho, Yehova abwira Ezekiyeli ntya: “Ebinwa byoshi nkubwizire, obibikirire emurhima, onabiyumvirhize n’amarhwiri gombi.” (Eze. 3:10) Kugerera ago mahano, Yehova abwira Ezekiyeli oku abîke omu bukengere bwage enderho zali nyandike mw’eco citabu cizinge n’okukazirhanyako bwenene. Okujira ntyo kwarhuma obuyemere bwa Ezekiyeli bwasêra. Na kandi, amanya omwanzi gwal’igwerhe emisi alishinganine abwire abantu. (Eze. 3:11) Omu kuba n’Akanwa ka Nnâmahanga omu murhima n’oku milomo yage, Ezekiyeli aba n’obuhashe bw’okuhikiriza omukolo ahâbagwa. w22.11 buk. 6 cif. 12-14

Gurhi wakajira erhi empindulo zijijirwe omw’ikubuliro zakahira obwishwekerezi bwawe omu marhangulo? Olunge okuboko n’omurhima gwawe goshi empindulo zijijirwe omw’ikubuliro. Omu mibalamo Abakohati bajiraga omw’irungu, bakag’ibarhula isanduku ly’amalaganyo embere z’olubaga loshi. (Mib. 3:29, 31; 10:33; Yoz. 3:2-4) Olo lwali lukengwa lunene bwenene! Cikone, omukolo gwabo gwashanja erhi Abaisraheli barhondera balama omu Cihugo c’Amalaganyo. Isanduku lirhacijaga lyahamisibwa ngasi mango. Co carhumaga, Abakohati bahabwa eyindi mikolo. (1 Nga. 6:31-33; 26:1, 24) Nta mwanzi guli omu Bibliya guyerekine oku Abakohati bakag’iciduduma erhi kuhûna ogundi mukolo gulengerire bwenene mpu bulya bal’igwerhe omukolo gwago-gwago embere z’aho. Bici oko kwakarhuyigiriza? Olunge okuboko n’omurhima gwawe goshi ngasi mpindulo zijirwa omw’ikubuliro lya Yehova, ciru n’empindulo zakarhuma omukolo gwawe gwashanja. Okashagalukira ngasi mukolo ohabirwe. Okakengera oku arhali omukolo gwawe go gurhuma waba muntu wa bulagirire omu masu ga Yehova. Yehova anashagalukire bwenene okurhumikira kwawe kulusha ngasi mukolo wakaba ogwerhe. w22.11 buk. 23 cif. 10-11

Onesiforo aj’ilonza entumwa Paolo, n’erhi amubona, alonza gurhi akamurhabalamwo. Omu kujira ntyo, Onesiforo ahira akalamo kage omu mazibu. Bici oko kurhuyigirizize? Rhurhagwasirwi rhuleke okuyoboha bene bantu kurhume rhurhalunga bene wirhu bali balibuzibwa okuboko. Lubero n’oko, rhukabahalira n’okubarhabala. (Mig. 17:17) Balagirire oku buzigire n’oburhabale bwirhu. Orhanye gurhi bene wirhu na bali birhu b’omu Russie barhabire ababo bemezi bali omu prizo. Erhi baguma na baguma mulibo basambisibwa, bene wirhu na bali birhu banji banayishe oku kagombe lyo babalunga okuboko. Bici oko kurhuyigirizize? Erhi bene wirhu bali balongoza bakashobekwa eby’obunywesi, bashwekwe, erhi kulibuzibwa, orhayobohaga. Okabaheba omu masala gawe, okashibirira abantu b’omu milala yabo, n’okulonza ezindi njira wakabalungamwo okuboko.—Ebj. 12:5; 2 Kr. 1:10, 11. w22.11 buk. 17 cif. 11-12

Abagula bajira omukolo gw’okuha bene wirhu na bali birhu omurhima kugerera Ebibliya n’okurhabala abagwerhe amahangayiko. (1 Pt. 5:2) Omu mango g’obuhanya, bashinganine barhang’imanya erhi ngasi mwene wirhu na mwali wirhu anacizire, anagwerhe ebiryo, emishangi, n’ecihando. Cikone omu myezi minji enyuma z’aho, bene wirhu na bali birhu bacizire banaba balagirire oku burhabale bw’ekiroho n’oku kuhâbwa omurhima. (Yn. 21:15) Mwene wirhu Harold oba muguma w’omu Komite y’Etawi anarhimanine na bene wirhu na bali birhu banji bahikirwe n’obuhanya, adesire ntya: “Binahûne kasanzi kanji ly’abantu baciyumva bwinja. Banacib’irhondera okulama akalamo kabo nk’oku byali embere z’aho, cikone banagendekera bakengera abazigirwa babo bafîre enyanya z’obo buhanya, akantu kabo k’engulo ndarhi, erhi akanga kadarhi bageziremwo. Okukengera ebyo kwanabalerhera amababale kanji-kanji. Okuciyumva ntyo kurhali kubula obuyemere bulya kwanahikira ngasi muntu.” Abagula banakolese ihano ly’Ebibliya lidesire oku ‘rhulake haguma n’abali balaka.’—Rm. 12:15. w22.12 buk. 22 cif. 1; buk. 24-25 cif. 10-11

Yehova anarhuhe iroho lyage litagatifu ly’arhurhabala rhuhime entambala y’okujira aminja. Erhi rhuyiga Akanwa ka Nnâmahanga, rhunacihire idako ly’obulongozi bw’er’iroho litagatifu. Kandi rhunahâbwe iroho litagatifu erhi rhuja oku ntimanano zirhu. Kw’ezo ntimanano z’Ecikristu, rhunageze akasanzi haguma na bene wirhu na bali birhu bali bacihangana lyo bajira aminja akirhu, n’oko kunarhuhe omurhima. (Hb. 10:24, 25; 13:7) N’erhi rhushenga Yehova n’obushiru n’okumuhûna arhurhabale lyo rhuhima buzamba bulebe, anarhuhe iroho lyage litagatifu lyo lirhuha emisi y’okugendekera rhwalwisa obo buzamba. Ciru akaba okujira ebyo byoshi nkaba kurhayusa loshi-loshi irala lirhu libi, kwanarhurhabala rhuhime enshumi z’okuhikiriza er’irala lirhu libi. Enyuma z’okucihiriraho eprograme nyinja y’ebintu by’ekiroho, kuli kwa bulagirire rhugendekere rhwaba n’eyo nkomêdu n’okugendekera rhwaba n’irala ly’okujira ebintu binja. w23.01 buk. 11 cif. 13-14

Ciru akaba Ebibliya cirhaba citabu ciganirira eby’amagala nkana erhi ca kuhâna enyigirizo okubiyerekire ebiryo, eyerekine entanya Yehova ajira lugenda ebyo bintu. Kwa lwiganyo, arhurhônzire oku ‘rhucirhenzekwo ngasi mababale’ gakashereza omubiri gwirhu. (Muh. 11:10) Ebibliya ehanzize obudanbye n’okunywa amamvu kurhalusire olugero, byombi byanashereza amagala girhu na ciru byanarhuma rhwafâ. (Mig. 23:20) Yehova ab’alonzize rhukayerekana oborhere bw’okucihasha omu mango rhuli rhwahiga lugenda bici na binganaci rhwalya n’okunywa. (1 Kr. 9:25) Rhwanarhôla emihigo eyerekine oku rhuvuzire omunkwa oku ngalo ya Nnâmahanga y’obuzine omu kukakolesa obuhashe bwirhu bw’okurhanya. (Enna. 119:99, 100; Mig. 2:11) Kwa lwiganyo, rhwanarhôla emihigo minja lugenda ebi rhwalya. Erhi akaba rhusima biryo bilebe cikone rhumanyire oku binarhume rhwalwala, obuhashe bwirhu bw’okurhanya bwinja bunarhushumye rhuleke okukalya ebyo biryo. Kandi rhunayerekane oku rhugwerhe obwenge erhi rhwakakahûnga nk’oku bihûnyire, okujira esporo ngasi mango, n’okugendekera rhwacêsa omubiri gwirhu n’enyumpa yirhu. w23.02 buk. 21 cif. 6-7

Gurhi wakapatamwo obuhirhi bw’ekiroho amango oli wasoma Ebibliya? Rhulole ebi olwandiko lwa 2 Timoteyo 3:16, 17 ludesire. Obwine oku olo lwandiko ludesire oku “amandiko goshi . . . gakwanana” oku (1) kuyigiriza, (2) kuhanûla, (3) kuhabûla abahabusire, n’oku (4) kuherha abantu omu bushinganyanya erhi kuhâna obuhane. Ciru n’ebitabu by’Ebibliya orhakolesa bwenene byanakulerhera obunguke mw’ezo njira ini. Okarhanya bwenene oku mwanzi mulebe ly’obona ebi gukuyigirizize lugenda Yehova, omuhigo gwage, erhi lugenda amakanuni gage. Okalola gurhi ogo mwanzi gwakarhabala omu kuhanûla. Okajira ntyo omu kubona gurhi amandiko gakurhabire omanye entanya mbi n’okuziyaka n’okugendekera wabêra mwishwekerezi kuli Yehova. Ololereze gurhi wakakolesamwo lwandiko lulebe ly’ohabûla, erhi kukubûla entanya mbi warhimanine nazo omu mukolo gw’amahubiri. Na kandi okalonza ngasi buhane amandiko gahânyire, bwanakurhabala ly’obona ebintu nk’oku Yehova abibona. Erhi wakakengera ezo njira ini Amandiko garhulerheramwo obunguke, wanabona obuhirhi bw’ekiroho bwakakurhabala ly’oyunguka bwenene n’obusomi bwawe bw’Ebibliya. w23.02 buk. 11 cif. 11

Obulebi buli omu citabu ca Daniyeli bwayerekine oku Yezu akahâbirwe obo Bwami oku buzinda bw’amango gahamagirwe rhusanzi nda. Ka byanahashikana okumanya mangaci Yezu ajiragwa Mwami? (Dan. 4:10-17) Orho “rhusanzi nda” gali mango ga myaka 2520. Ago mango garhonderaga omu mwaka gwa 607 Embere za Kano Kasanzi Kirhu (E.K.K.K), erhi Abababiloni bakûla omwami muzinda oku ntêbe ya Yehova omu Yeruzalemu. Gahwa omu mwaka gwa 1914 muli Kano Kasanzi Kirhu (K.K.K.), erhi Yehova ayimika Yezu, ko kuderha “olya ogwerhe ehaki kushimbana n’irhegeko,” y’okuba Mwami w’Obwami bwa Nnâmahanga. (Eze. 21:25-27, NWT) Gurhi obo bulebi bwakarhulerheramwo obunguke? Okuhugûkwa obulebi okubiyerekire ‘orhusanzi nda’ kwanarhuyemeza n’obwalagale oku Yehova ahikiriza ebiragane byage omu kasanzi kashinganine. Nk’oku Yehova ahiragaho akasanzi Obwami bwage bwakarhondire okurhegeka, ayish’ijira obundi bulebi boshi buhikirizibwe oku kasanzi ahizireho. Kobinali, olusiku lwa Yehova lwahika “buzira kulegama!”—Hab. 2:3. w22.07 buk. 3 cif. 3-5