Mwezi gwa 11

Enderho mbi zirhashinganini zikarhenga omu kanwa k’Omukristu. Cikone, hali ezindi nderho zirhabonekana nka za bijaci rhushinganine rhuyake. Rhushinganine rhube masu lyo rhurhag’ikaderha kubi abantu b’enkomêdu ndebe, ba bûko bulebe, erhi ba cihugo cilebe. Na kandi, rhurhaba rhulonzize rhuderhe enderho z’okujacira abandi. Okaderha omu njira y’okuyubaka abandi. Obe mubidu okukavuga abandi omunkwa ahali h’okubaderha kubi erhi kukaciduduma. Abaisraheli bagwerhe binji bakavuzireko Yehova omunkwa, cikone bakaciduduma kanji-kanji. Iroho ly’okuciduduma lyanayahukira abandi. Okengere oku eraporo mbi ndolerezi ikumi zahânaga yarhumire “bene Israheli boshi bakazicîdudumira Musa.” (Mib. 13:31–14:4) Lubero n’oko, enderho z’okuvuga omunkwa zanarhuma abandi baba n’omwishingo. Co cirhumire okalonza obulyo wakavugamwo abandi omunkwa n’omurhima goshi. w22.04 buk. 8 cif. 16-17

Kurhenga mîra, Yehova arhabire misole minji bwenene ly’ehikira aha yaba bîra bage. Anarhabala abana bawe nabo bakule kiroho; erhi akaba balonzize okujira ntyo. (1 Kr. 3:6, 7) Yehova anagendekere azigira abana bawe ciru akaba banakabonekana nka barhakamukolera. (Enna. 11:4) Erhi bakayerekana ciru himanyiso hisungunu hyone hy’oku “bagwerhe irala” ly’okumukolera, anaba mubidu okubarhabala lyo bahikira aha baba bîra bage. (Ebj. 13:48, NWT; 2 Nga. 16:9) Anakurhabala oderhe akantu kashinganine omu kasanzi kashinganine amango abana bawe balagirire okukayumva. (Mig. 15:23) Kandi erhi Yehova anashumya mwene wirhu erhi mwali wirhu mulebe w’omu cigamba cinyu ly’abashibirira omu njira yago-yago. Ciru n’amango abana bawe bakola bakulu, Yehova anabakengeza kantu kalebe wabayigirizagya mîra. (Yn. 14:26) Erhi ogendekera wayigiriza abana bawe kugerera enderho zawe n’olwiganyo lwawe, onahe Yehova bintu binji akagisha. w22.04 buk. 21 cif. 18

Bulya Shetani arhakacihash’ija empingu, ajira obukunizi kuyerekera Abakristu bashîge amavurha bacisigire hanw’igulu bulya bo ba ambasadere b’Obwami bwa Nnâmahanga hanw’igulu, bajira omukolo g’okuhâna “obuhamirizi bwa Yezu.” (2 Kr. 5:20; Ef. 6:19, 20) Omu mwaka gwa 1918, bene wirhu munani bal’imanyikine bwenene bashobekwa eby’obunywesi, na ngasi muguma wabo bamutwira olubanja lw’okuyusa myaka minji omu prizo. Byabonekana oku omukolo gw’abo bashîge amavurha ‘gwamanigwa’ erhi kuyimanzibwa. (Maf. 11:3, 7-11) Cikone oku murhondero g’omwaka gwa 1919 abo bene wirhu bashîge amavurha bashwekulwa n’ebi babashobekagwa byakûlwa. Ho n’aho, abo bene wirhu bacib’igalukira omukolo gw’Obwami. Cikone Shetani arhalekaga okuhira abakozi ba Nnâmahanga kw’ecirhero. Kurhenga ago mango, Shetani ali alerhera abakozi ba Nnâmahanga “olwishi” lw’okulibuzanya. (Maf. 12:15) Kobinali, rhweshi rhushinganine ‘rhube ba kulembera na ba buyemere.’—Maf. 13:10, NWT. w22.05 buk. 5-6 cif. 14-16

Omu cibonekerezi, entumwa Yowane yabwine bigusho bibirhi by’abantu bali balunga okuboko oburhegesi bwa Yehova, banahâbwa emigisho y’obuzine bw’ensiku n’amango. Omubalè gw’ecigusho cirhanzi bali bantu 144 000. Bakulagwa omw’igulu, lyo bagend’ijira oburhegesi erhi Bwami haguma na Yezu omu mpingu. Barhegeka igulu haguma na Yezu. (Maf. 5:9, 10; 14:3, 4) Omu cibonekerezi, Yowane ababona bayimanzire haguma na Yezu omu mpingu oku Ntondo Siyoni. (Maf. 14:1) Kurhangira omu mango g’entumwa kuhika buno, ebihumbi by’abantu biri byacishogwa lyo baba baguma b’omu 144 000. (Lk. 12:32; Rm. 8:17) Cikone Yowane adesire oku omubalè gw’abashîge amavurha bacisigire hanw’igulu gwakabire musungunu bwenene omu nsiku nzinda. (Maf. 12:17) Buzinda, omu kasanzi k’amalibuko madârhi, abashîge amavurha bacisigire hanw’igulu, bayish’ihêkwa empingu lyo bacilunga haguma n’ababo bʼomu 144 000, bafâga banali bishwekerezi. Eyo munda empingu, bayish’iba bami haguma na Yezu omu Bwami bwa Nnâmahanga.—Mt. 24:31; Maf. 5:9, 10. w22.05 buk. 16 cif. 4-5

Yezu ayigirizize abanafunzi bage oku bakaba n’entanya nyinja okubibayerekire bonene. Yezu ababwira n’obwalagale ntya: “Emviri z’irhwe linyu zoshi ziri nganje!” (Mt. 10:30) Okumanya oku emviri zirhu nazo ziba nganje kurhurhulirizize, ci bwenene erhi akaba rhujira entanya z’okucibona oku rhuli ba busha-­busha. Oko kuyerekine oku Larha wirhu w’omu mpingu aba arhushibirire, ko kuderha oku rhuba ba bulagirire bwenene omu masu gage. Rhurhashinganini rhube n’akarhinda okubiyerekire entanya za Yehova z’okuderha oku rhushinganine rhube bakozi bage n’oku rhushinganine rhuyish’ihâbwa obuzine bw’ensiku n’amango omw’igulu lihyahya. Omu myaka 15 egezire, hali Ilabiro ly’Akalalizi lyal’idesire oku rhube n’entanya z’olugero okubirhuyerekire. Lidesire ntya: “Buzira karhinda, rhurhakalonza rhukacirhanyiza okulushire olugero n’oko kurhume rhwaba n’obucîbone. Na kandi rhurhakalonza rhukaciyumva oku rhuli ba busha-busha ciru n’ehitya. Ahali h’okujira ntyo, omuhigo gwirhu gushinganine gube gwa kuba n’entanya nyinja okubirhuyerekire omu kuhugûkwa oku hali ebi rhurhakahasha.” w22.05 buk. 24-25 cif. 14-16

Gurhi ngasi muguma wirhu akajira ly’agendekeza eco cinyabuguma? Anajira ntyo omu kuba muntu wa kujira omurhûla. (Mt. 5:9; Rm. 12:18) Ngasi mango erhi rhujira okwirhu koshi lyo rhugendekeza omurhûla haguma n’abandi omu cigamba, rhunabe rhuli rhwayinjihya bwenene eyo paradizo yirhu y’ekiroho. Rhunakengere oku Yehova ye wakululaga ngasi muguma w’abalama omu paradizo y’ekiroho ly’aja omu nterekêro ecîre. (Yn. 6:44) Orhanye gurhi Yehova ashagaluka bwenene erhi abona rhuli rhwajira okwirhu koshi lyo rhugendekeza omurhûla n’ecinyabuguma egarhi k’abantu baba ba ngulo ndarhi kuli ye, k’okuderha abakozi bage! (Iz. 26:3; Hag. 2:7) Gurhi rhwakajira lyo rhuyunguka bwenene n’emigisho Yehova aha abakozi bage? Rhushinganine rhukarhanya bwenene kw’ebi rhuyiga omu Kanwa ka Nnâmahanga. Oko kuyiga n’okurhanya kwanarhurhabala rhube n’amorhere g’Ecikristu garhushumya ‘rhuzigirane nk’abalondana’ na “ngasi muguma akakenga ababo” omu cigamba.—Rm. 12:10. w22.11 buk. 12-13 cif. 16-18

Erhi rhuyemera oku Yehova arhubabalire, rhunashagalukire “orhusanzi rhw’okurhuliriza,” rhuhiziremwo omurhûla gw’omu bukengere, rhunanabe n’ezamiri ecîre. Okubabalira kwa ntyo kurharhenga emwa bene bantu cikone kushinganine kurhenge emwa “Yehova yenene.” (Ebj. 3:19, NWT) Erhi Yehova arhubabalira, anagalule loshi-loshi obwîra bwage haguma na nirhu na ntyo rhunabe nk’abarhajijire ecaha. Erhi Yehova arhubabalira, arhakacirhutumuza ciru n’ehitya erhi kurhuhana enyanya z’eco caha. (Iz. 43:25) Yehova anakwebe kuli ebyaha birhu “nka kulya ebushoshokero eri kulî n’ebuzikiro.” (Enna. 103:12) Erhi rhurhanya kunganaci Yehova ababalira, rhunasomerwe bwenene n’okumuvuga omunkwa. (Enna. 130:4) Erhi Yehova ahiga okubabalira omuntu, arhalola erhi ecaha cage ciri cinene erhi cisungunu. Yehova anakolese obumanye bwage nka Mulemi, Ohâna amarhegeko, na Mutwi w’Emanja embere ahige erhi ababalira omuntu erhi nanga. w22.06 buk. 5 cif. 12-14

Yehova ahîre abantu bamuzigira obulangalire bwinja bwenene. Hano hofi-hofi, ayusa endwala, amababalè n’olufû. (Maf. 21:3, 4) Arhabala abantu “batûdu” bamulangalira bahindule igulu libe paradizo. (Enna. 37:9-11) Na kandi, ayish’ihashisa ngasi muguma wirhu abe n’obwîra bwa hofi-hofi haguma naye, obo bwîra bwanabe bwinja bwenene kulusha obu rhujira haguma naye ene. Obo buli ­bu­langalire bwinja bwenene! Cikone, bici birhuyemezize oku ebiragane bya Nnâmahanga byanahikirire? Ngasi mango Yehova anahikirize ebiragane byage. Muli ntyo, rhugwerhe ecirhumire cinja c’‘okulangalira Nyamuzinda.’ (Enna. 27:14) Rhunayerekane ntyo omu kulinda n’omwishingo gurhi Nnâmahanga wirhu ahikiriza ebiragane byage.​ (Iz. 55:10, 11) Rhugendekere rhwaba bishwekerezi kuli Yehova, n’okuyemera n’obwalagale oku anahembe “abamulonza” n’omurhima goshi. w22.06 buk. 20 cif. 1; buk. 25 cif. 18

Bulya yehova ye Irhwe ly’omulala gwirhu, rhwanayemera n’obwalagale oku arhumikira akanuni ahîre b’ishe w’omulala kali omu 1 Timoteyo 5:8. Erhi rhwakayemera n’obwalagale oku Yehova aba arhuzigire anaba azigire omulala gwirhu, rhurhakayoboha oku rhwabula ebintu rhulagirireko. (Mt. 6:31-33) Yehova aba alonzize okurhuhikirigiza amalagirire girhu, n’enyanya z’obuzigire bwage, anarhuhe bintu binji bwenene! Erhi alema igulu, ajijire bintu binji bwenene kulusha ebi rhuba rhulagirireko lyo rhulama. Enyanya z’obuzigire bwage, ayunjuza igulu bintu binji rhushagalukira bwenene. (Murh. 2:9) Ciru akaba hali amango rhuba rhugwerhe ebintu rhulagirireko byone, rhwanakengera oku rhugwerhe ebyo bintu bulya Yehova anarhuhîre byo. (Mt. 6:11) Rhushinganine rhukakengera oku Yehova arhuha bintu binji kulusha ebi rhuli rhwaciyima ene, n’oku omu mango gayisha ayish’irhuha obuzine bw’ensiku n’amango.—Iz. 65:21, 22. w22.06 buk. 15 cif. 7-8

Arhali abantu bahyahya basimisibwe n’okuli bone balagirire oku biryo bizibu by’ekiroho. Rhweshi rhubilagirireko. Entumwa Paolo yayandisire oku okukolesa ebi rhuli rhwayiga kurhenga omu Bibliya, kwanarhurhabala “lyo rhukamanya ebinja n’ebibi.” Bulya muli zino nsiku olugenzi lwa bantu banji luli lubi bwenene, kwanaba kuzibu okurhumikira amakanuni ga Yehova. Cikone, Yezu ali ajira rhube n’ebiryo by’ekiroho rhulagirireko lyo rhuba n’emisi. Ebyo biryo biri byarhenga omu Bibliya, Kanwa ka Nnâmahanga. Aka Yezu, rhwahîre izino lya Nnâmahanga olukengwa lishinganine. (Yn. 17:6, 26) Kwa lwiganyo, omu mwaka gwa 1931, rhwarhôzire izino liyimangire oku Mandiko, ly’Abahamirizi ba Yehova. Omu kujira ntyo, rhwayerekine oku izino lya Nnâmahanga liri lya bulagirire kuli rhwe. (Iz. 43:10-12) Na kandi, empindûlo y’Ebibliya ehamagalwa Biblia—Tafsiri ya Ulimwengu Mupya, yagalwire izino lya Nnâmahanga ngasi hoshi lishinganine okuba omu Kanwa kage. w22.07 buk. 11 cif. 11-12

Kandi okuli kw’Ebibliya kuhiziremwo omwanzi mwinja guyerekire Obwami bwa Nnâmahanga. Yezu ashushanyize okuli lugenda obo Bwami n’obuhirhi bwali bufulike. Omu lwandiko lwa Mateyo 13:44, Yezu aderha ntya: “Obwami bw’empingu bwanagererwa oku buhirhi bufulike omu ishwa; omuntu wabubonaga, ashub’ibubishamwo, agend’asimire, aj’iguza ebi âli agwerhe byoshi, okuhandi agula eryo ishwa.” Obwine oku oyo mulume arhali kulonza ajag’alonza obo buhirhi. Cikone erhi abubona, aleka bintu binji bwenene ly’aba nabo. Aguza ngasi kantu al’igwerhe. Bulya gurhi? Al’imanyire oku obo buhirhi bwali bwa ngulo ndarhi bwenene. Rhumanyire oku nta kantu kaba ka ngulo ndarhi bwenene mw’er’igulu kulusha omwishingo rhugwerhe omu kukolera Yehova ene, n’obulangalire bw’akalamo k’ensiku n’amango omu kasanzi kayisha idako ly’oburhegesi bw’Obwami bwa Nnâmahanga. Olukengwa rhugwerhe lw’okuba n’obwîra bwa hofi-hofi haguma na Yehova luba lwa bulagirire bwenene kulusha ngasi kantu rhwakaleka. Rhunabe n’omwishingo munji omu ‘kumusimisa muli byoshi.’—Kl. 1:10. w22.08 buk. 15 cif. 8; buk. 17 cif. 9, 12

Gurhi Yozefu amanyiremwo oku okujira obugonyi haguma n’oyo mukazi bwali “bubi bungana aho [bunji]” omu masu ga Nnâmahanga wage? Irhegeko lya Musa, lyal’ihiziremwo irhegeko ly’obwalagale lidesire “Orhakag’igona,” lyayishir’iyandikwa myaka magana abirhi enyuma z’aho. (Lub. 20:14, Mashi Bible) Cikone, Yozefu al’imanyire Yehova bwinja n’oko kwamurhabala ahugûkwa gurhi Yehova aciyumva lugenda ecijiro c’obugonyi. Kwa lwiganyo, Yozefu al’imanyire bwinja oku Yehova arheganyize obuhya bukajirwa egarhi ka mulume muguma na mukazi muguma. Na kandi, nkaba ali amayumva gurhi Yehova alangagamwo Sara, nakulu w’ishe kabirhi koshi-koshi amango balikola bamubaka. (Murh. 2:24; 12:14-20; 20:2-7) Erhi Yozefu aja arhanya kw’ebyo byoshi, ahugûkwa bici byali binja na bici byali bibi omu masu ga Nnâmahanga. Bulya Yozefu al’izigire Yehova Nnâmahanga wage, kandi al’izigire amakanuni ga Yehova g’obushinganyanya, ananal’ihizire okugarhumikira. w22.08 buk. 26 cif. 1-2

Obo bulebi burhaganiriri obufûke bw’olwiganyo, erhi bufûke bw’ekiroho bw’abakozi ba Nnâmahanga, bwakajirikine omu nsiku nzinda, nk’oku rhwal’ihugûsirwe embere. Lubero n’oko, ezo nderho ziganirire obufûke bw’abafîre bwajirikana omw’igulu lihyahya lyayisha. Bulya gurhi rhudesire ntyo? Omu ndimi ntangiriza Ebibliya yayandikagwamwo, oluderho “budaka” lukolesibwe omu Ayubu 17:16 n’omu Daniyeli 12:2. Co cirhumire, rhwanaderha oku olwandiko lwa Daniyeli 12:2 luganirire obufûke bw’okunali bwajirwa enyuma z’okuhwa kw’ensiku nzinda n’enyuma z’ivita lya Harmagedoni. Cikone, bicigi olwandiko lwa Daniyeli 12:2 luhugwîre, omu kuderha oku baguma bayish’ifûkira “obuzine bw’ensiku n’amango”? Luhugwîre oku, abantu bayish’ifûlwa n’okuhikira okumanya Yehova na Yezu, erhi kugendekera babamanya, n’okubarhumikira omu myaka 1 000, buzinda bayish’ihâbwa obuzine bw’ensiku n’amango.—Yn. 17:3. w22.09 buk. 21 cif. 6-7

Ezo nderho zirhayerekini oku Yehova arhuhûnyire rhukalangalira abirhu buzira kurhanya; lubero n’oko, rhushinganine rhubalangalire bulya bayerekine oku bali ba kulangalirwa. Biba bihûnyire akasanzi lyo rhulangalira abandi. Gurhi wakajiramwo ntyo? Olonze okubamanya bwinja. Okabaganiza oku ntimanano z’ecigamba. Okapanga okuhubiri haguma nabo. Okabalembera, omu kubaha obulyo bw’okuyerekana oku bali ba kulangalirwa. Oku murhondero, nkaba wanacishoga emyanzi ekuyerekire wene wakabwira muntu mulebe oli walonza okumanya bwinja. Amango obwîra bwinyu bukola busêzire, nkaba wanaba mubidu okumubwira entanya zawe zoshi. (Lk. 16:10) Cikone, gurhigi wakajira erhi mwene wirhu mulebe akajira akantu kakarhuma orhacimulangalira? Orhayirhaga obwîra bwinyu duba-duba, cikone omulekere akasanzi. Na kandi, orhalekaga ebijiro by’abantu basungunu birhume orhalangalira abandi bene wirhu na bali birhu. w22.09 buk. 4 cif. 7-8

Mugula muguma ohamagalwa Miqueas akag’iciyumva oku akag’ijirirwa kubi na bene wirhu baguma na baguma bagwerhe bukulu bulebe omu cigamba. Cikone, agendekera okulanga enkengero zage anajira okwage koshi ly’agendekera okucihasha. Akasalira kanji-kanji, ly’ahûna Yehova iroho lyage litagatifu n’emisi y’okulembera. Kandi akalonza omu bicapo birhu emyanzi yakamurhabala. Bici oko kurhuyigirizize? Erhi wakaciyumva oku wajirirwe kubi na mwene wirhu erhi mwali wirhu mulebe, ogendekere warhulirira onajire okwawe koshi ly’ogendekera okucihasha. Orhakamanya kanga kahi oyo mwene wirhu erhi mwali wirhu alimwo karhumaga ajira erhi kuderha ntyo. Co cirhumire, oganire na Yehova kugerera isala n’okumuhûna akurhabale obone ebintu nk’oku oyo mwene wirhu erhi mwali wirhu ali abibona. Obone oku oyo mwene wirhu erhi mwali wirhu arhakujiriraga ntyo n’obulonza kandi ocihangane omubabalire. (Mig. 19:11) Okengere oku Yehova amanyire bwinja akanga olimwo n’oku akuha emisi olagirireko ly’olembera.—Muh. 5:8. w22.11 buk. 21 cif. 5

Ocishoge abîra bazigira Yehova. Abîra ocishoga banakurhabala bwenene ly’oba Mukristu okuzire kiroho. (Mig. 13:20) Julien, oli mugula ene, adesire ntya: “Amango nali musole, napasire abîra binja omu kuhubiri haguma n’abandi. Abo bîra bal’igwerhe obushiru, banantabala mbone oku omukolo gw’amahubiri gunalerhe omwishingo munji. . . . Kandi nahugûkwa oku ntal’igwerhe abîra binja banji bulya nakag’ijira obwîra haguma n’abantu bagwerhe emyaka yani bone.” Gurhigi wakajira erhi wakabona oku muntu mulebe omu cigamba arhali mwîra mwinja kuli we? Paolo al’imanyire oku bantu balebe b’omu cigamba c’Ecikristu c’omu myaka igana mirhanzi barhakag’irhanya n’okucigendesa nka Bakristu, n’oko kwarhuma arhonda Timoteyo oku abayake. (2 Tm. 2:20-22) Obwîra bwirhu haguma na Yehova buba bwa ngulo ndarhi. Rhwajijire okwirhu koshi lyo rhuba n’obwîra haguma na Larha wirhu w’omu mpingu, co cirhumire rhurhashinganini rhuleke omuntu yeshi-yeshi ashereze obo bwîra. w22.08 buk. 5-6 cif. 13-15

Lubero n’abantu barhashagalukira amahano ga Nnâmahanga, rhunayige okuzigira enjira zage, zihiziremwo amakanuni g’olugenzi lwinja. Rhwanazigira bwenene enjira za Nnâmahanga omu kulola ebihikira abamurhumikira n’abarhamurhumikira. Olole amazibu abantu bacilerhera bonene enyanya z’okulahira amahano ga Yehova g’obwenge erhi buhwinja bwabo burhuma. Buzinda, olole gurhi akalamo kawe kaba kinja enyanya z’okurhumikira Nnâmahanga. (Enna. 32:8, 10) Yehova ahîre abantu boshi obulyo bw’okuba n’obwenge, cikone arhasêza omuntu yeshi-yeshi mpu abuyemere. Ciru akaba ntyo, arhuyeresire ebihikira abalahira okuyumvirhiza obwenge. (Mig. 1:29-32) “Bàlya amalehe gw’obuhabusi bwabo.” Enjira yabo y’akalamo yayish’ibalerhera amalumwa, amazibu, na buzinda bayish’isherezibwa. Lubero n’oko, abayumvirhiza amahano ga Yehova g’obwenge n’okugakolesa omu kalamo kabo balaganyizibwe ntya: “Onyumva yehe ayorha adekerîre, anarhulûle buzira kuyoboha buhanya buci.”—Mig. 1:33. w22.10 buk. 21 cif. 11-13

Okurhinya Yehova kuli kumukenga bwenene n’okuyaka okujira ngasi kantu kakamugayisa. (Mig. 16:6) Co cirhumire, rhunagendekere rhwajira okwirhu koshi lyo rhulama kushimbana n’amakanuni ga Nnâmahanga lugenda ebinja n’ebibi nk’oku ganayerekinwe omu Bibliya. (2 Kr. 7:1) Rhwanaba n’omwishingo erhi rhwakakajira ebintu Yehova asima n’okuyaka ebintu ashomba. (Enna. 37:27; 97:10; Rm. 12:9) Omuntu anamanya oku Yehova ye gwerhe obuhashe bw’okuhiga bici biri binja na bici biri bibi, cikone kandi yene agwasirwe ayemere okurhumikira amakanuni ga Nnâmahanga. (Rm. 12:2) Kugerera olugenzi lwirhu, rhunayerekane oku rhuyemire n’obwalagale oku okurhumikira amakanuni ga Yehova yo njira nyinja bwenene y’akalamo. (Mig. 12:28) Daudi al’iyemire ntyo n’obwalagale, co carhumaga aderha ntya lugenda Yehova: “We wanyereka enjira y’obulamu, nanshagaluke nka ndi embere zawe, omwishingo gw’ensiku n’amango emwawe yo guba.”—Enna. 16:11, Mashi Bible. w22.10 buk 8 cif. 9-10

Yezu ali mwirhohye, ananagendekire aba n’entanya z’olugero okubimuyerekire yenene. Embere Yezu ayishe hanw’igulu, ajijire bintu binji binja omu mukolo gwa Yehova. Kugerera Yezu, ‘byoshi byalemwa emalunga n’en’igulu.’ (Kl. 1:16) Erhi Yezu abatizibwa, buzira karhinda akengire ebintu ahikirizize erhi ali haguma n’Ishe empingu. (Mt. 3:16; Yn. 17:5) Cikone, oko kuhugûkwa ebyo bintu, kurharhumaga Yezu aba wa bucîbone. Lubero n’oko, nta lusiku ayerekine oku alushire abandi. Abwira abanafunzi bage oku arhayishaga hanw’igulu “mpu akolerwe, ci akolere abandi, anahâne obuzine bwage mpu lyo acungula banji.” (Mt. 20:28) Na kandi aderha oku arhakajira akantu koshi-koshi Ishe arhamurhegekaga oku ajire. Kobinali, Yezu ali muntu mwirhohye! Yezu ayerekine olwiganyo lwinja rhushinganine rhuyige. w22.05 buk. 24 cif. 13

Embere ahige erhi ababalira omuntu erhi nanga, Yehova analole erhi omunya-byaha ahugûsirwe oku ebi anajiraga biri bibi. Yezu ayerekine ntyo n’obwalagale kugerera enderho zage ziri omu Luka 12:47, 48. Omuntu ohiga okujira n’obulonza akantu kabi anamanyire bwinja-bwinja oku ebi ali ajira binagayise Yehova, anabe erhi ajijire ecaha cizibu. Yehova anahiga oku arhababalire oyo muntu. (Mk. 3:29; Yn. 9:41) Ka hanaba obulangalire boshi-boshi bw’okubabalirwa muli ako kanga? Neci! Kandi Yehova analole erhi omunya-byaha aciyunjuzize okunali. Okuciyunjuza kuba “kushanja obukengere, entanya, erhi muhigo.” Kuhiziremwo entanya z’okuciyumva kubi n’okugaya bwenene enyanya z’ebintu bibi omuntu anajijire erhi enyanya z’ebintu binja al’ishinganine ajire cikone arhabijijire. Omuntu ociyunjuzize anagaye enyanya z’ebintu bîbi anajijire na kandi bulya analesire obwîra bwage haguma na Yehova buzambanye n’oko kwarhuma ajira ebyo bintu bibi. w22.06 buk. 6 cif. 15-17

Abashombanyi birhu banalumize emyanzi y’obunywesi erhi kushobeka bene wirhu bali balongoza omw’ikubuliro lya Yehova. (Enna. 31:13) Hali bene wirhu baguma na baguma bagwasirwe banashobekwa oku bali banyankola-maligo. Abakristu b’omu myaka igana mirhanzi bahikirwe n’akanga ka ntyo erhi entumwa Paolo eshobekwa eby’obunywesi n’okushwekwa. Amango Paolo al’ishwekirwe e Roma, Bakristu baguma na baguma bamulekerera. (2 Tm. 1:8, 15; 2:8, 9) Orhanye gurhi Paolo aciyumvirhe enyanya z’oko. Ali amalembera mazibu manji n’okuhira obuzine bwage omu mazibu erhi bo barhuma. (Ebj. 20:18-21; 2 Kr. 1:8) Rhurhahiraga rhukaba nk’abo Bakristu balekereraga Paolo! Co cirhumire rhurhakasomerwa okubona Shetani anahire ecirhero kuli bene wirhu bali balongoza omw’ikubuliro. Aba alonzize ebyo birhero bivune obwishwekerezi bwabo n’okurhuyobohya. (1 Pt. 5:8) Ogendekere okulunga bene wirhu okuboko onabêre mwishwekerezi kuli bo.—2 Tm. 1:16-18. w22.11 buk. 16-17 cif. 8-11

Nkaba oyo mulume w’ecishumusi waciyunjuzagya watundikagwa aha burhambi bwa Yezu embere afê ali Muyahudi. Abayahudi bakag’iharamya Nnâmahanga muguma yene, cikone abantu b’amashanja bal’iyemire bannâmahanga banji. (Lub. 20:2, 3; 1 Kr. 8:5, 6) Nk’oyo mulume w’ecishumusi arhali Muyahudi, idoso adosagya liri omu lwandiko lw’olusiku lw’ene lyakabire ntya, “K’orhayobohiri bannâmahanga ciru n’ehitya?” Kandi, Yezu arharhumagwa oku bantu b’amashanja, cikone arhumirwe oku “banabuzi bahezire b’Israheli.” (Mt. 15:24) Nnâmahanga ayeresire Abaisraheli oku ayish’ifûla abantu bafîre. Nkaba oyo mulume w’ecishumusi waciyunjuzagya al’imanyire ntyo, na nk’oku enderho zage ziyerekine, al’ilangalire oku Yehova akafûzire Yezu ly’arhegeka omu Bwami bwa Nnâmahanga. Bibonekine oku oyo mulume al’ilangalire oku Nnâmahanga akamufûzire naye. Nka Muyahudi, eco cishumusi canaba cal’imanyire lugenda Adamu na Eva n’Eparadizo Yehova abahebagamwo. Co cirhumire, canaba cal’ihugûsirwe oku eyo Paradizo Yezu aganiriraga omu Luka 23:43 bwayish’iba bustani bwinja bwenene hanw’igulu.—Murh. 2:15. w22.12 buk. 8-9 cif. 2-3

Iroho litagatifu lya Nnâmahanga lyone lyakarhurhabala rhuhikirize bwinja omukolo gwirhu gw’amahubiri. Bulya gurhi? Bulya Shetani anarhulwise bwenene lyo rhuleka omukolo gwirhu gw’amahubiri. (Maf. 12:17) Bantu banji banakarhanya mpu Shetani ajira misi minji bwenene n’oku rhurhakahash’imuhima omw’ivita rhuli rhwamulwisa. Cikone, kugerera omukolo gwirhu gw’amahubiri rhuli rhwahima Shetani! (Maf. 12:9-11) Omu njira nci? Erhi rhujira omukolo gw’amahubiri, rhunabe rhuli rhwayerekana oku rhurhayobohiri Shetani. Ngasi mango erhi rhuhubiri, Shetani anahimwe. Co cirhumire, rhwanayemera n’obwalagale oku iroho litagatifu linarhuhe emisi n’oku rhuba rhuyemirwe na Yehova. (Mt. 5:10-12; 1 Pt. 4:14) Iroho litagatifu lya Nnâmahanga lyarhuha emisi rhulagirireko lyo rhulwisa ngasi mazibu rhwakarhimanana nago omu mukolo gw’amahubiri. (2 Kr. 4:7-9) Cikone, bicigi rhwakajira lyo rhugendekera rhwahâbwa iroho litagatifu lya Nnâmahanga? Rhushinganine rhugendekere rhwakalihûna Yehova burhahusa n’okuyemera n’obwalagale oku ayumvirhiza amasala girhu. w22.11 buk. 5 cif. 10-11

Rhunayerekane obuzigire bwirhu kuli bene wirhu na bali birhu omu kucihangana bwenene lyo rhugendekeza omurhûla haguma nabo. Rhunajire okwirhu koshi lyo rhuyiga olwiganyo lwa Yehova lw’okubabalira. Erhi akaba Yehova abire mubidu okuleka Omugala afê erhi byaha birhu birhuma, ka nirhu rhurhashinganini rhube babidu okubabalira bene wirhu na bali birhu amango barhugokize? Rhurhalonzizi rhube ak’omuja mugalugalu Yezu aganiriraga omu lwiganyo lwage luguma. Ciru akaba nnawabo amubabalire omwenda munene bwenene, oyo muja ayabirwa okubabalira owabo muja omwenda musungunu bwenene. (Mt. 18:23-35) Erhi akaba hali okurhayumvikana egarhi kawe na muntu mulebe omu cigamba, ka wanacihangana obe murhanzi okujira omurhûla haguma naye embere olusiku lw’Okukengera olufû lwa Yezu luhike? (Mt. 5:23, 24) Okujira ntyo kwanayerekana oku ozigire bwenene Yehova na Yezu. w23.01 buk. 29 cif. 8-9

Enjira nguma yakakurhabala ly’omanya ebi bene winyu na bali binyu balagirireko kuli kubadosa amadoso garhakababonesa nshonyi. (Mig. 20:5) Ka bagwerhe ebiryo, obufumu, n’ebindi bintu by’obulagirire? Ka bali omu kanga kakarhuma baheza akazi kabo erhi ciru enyumpa yabo? Ka balagirire oku burhabale bwirhu lyo bamanya gurhi bakapatamwo oburhabale bw’ecihugo nkaba ogo mupango guliho? Yehova arhuhûnyire rhweshi rhukahânana omurhima n’okurhabalana. (Gl. 6:10) Ciru rhwakajira kantu kasungunu kone lyo rhurhabala muntu mulebe olwazire, oko kwanamuha omurhima bwenene. Omwana anarhumira mwene wirhu erhi mwali wirhu akarte erhi kumucapira kantu kalebe. Nkaba mwene wirhu erhi mwali wirhu ociri musole anagendera mwali wirhu hantu halebe erhi kuj’imugulira ebintu alagirireko. Abandi omu cigamba banaba n’obuhashe bw’okuyendera muntu mulebe olwazire ebiryo. Bahamirizi baguma na baguma bayandikire abagula amaruba g’okubavuga omunkwa enyanya z’okuba na binji bwenene bya kujira omu mango g’endwala y’okuyahukira. Kuba kwinja bwenene erhi rhwakajira ecirhu cigabi lyo ‘rhushibirizanya n’okuzibuhanya’!—1 Ts. 5:11. w22.12 buk. 22 cif. 2; buk. 23 cif. 5, 6

Abasadukayo bakag’isoma bwenene ebitabu birhanu birhanzi by’Amandiko g’Ecihabraniya, cikone barhal’iyemire enyigirizo z’okuli zali mw’ebyo bitabu byalongozibagwa n’iroho litagatifu. Kwa lwiganyo, olole oku Yezu ashuzagya erhi Abasadukayo bamujisa mbaka lugenda obufûke bw’abafîre. Abadosa ntya: “Ka murhasag’isoma omu citabu ca Musa, halya hadesire ogw’ishaka ly’emishugi? Aho hayandisirwe oku Nnâmahanga abwiraga Musa erhi: ‘Ndi Nnâmahanga wa Abrahamu, na wa Isaki na wa Yakobo.’” (Mk. 12:18, 26, Mashi Bible) Ciru akaba Abasadukayo bali bamakasoma kanji-kanji olo lwandiko, idoso lya Yezu lyayerekine oku barhal’iyemire ezi nyigirizo z’obulagirire z’Amandiko: enyigirizo z’obufûke. (Lk. 20:38) Isomo lihi oko kurhuyigirizize? Amango rhuli rhwasoma, rhulonzize rhukasegeza obwenge oku bintu byoshi olwandiko erhi mwanzi mulebe gw’Ebibliya gwakarhuyigiriza. Rhurhalonza okuhugûkwa enyigirizo z’omusingi zone cikone kandi rhunalonze rhuhugûkwe enyigirizo nzibu n’amakanuni g’Ebibliya garhali gabonekana n’obwalagale. w23.02 buk. 11 cif. 9-10

Abahamirizi boshi baganirirwe omu lwandiko lw’olusiku lw’ene boshi bahikirwe n’amarhangulo mazibu; cikone bagendekera baba bishwekerezi kuli Yehova omu kalamo kabo koshi. (Hb. 11:36-40) K’omukolo gwabo n’okulembera kwabo byafîre busha? Nanga, ciru n’ehitya! Ciru akaba barhabonaga okuhikirizibwa kw’ebiragane byoshi bya Yehova omu kalamo kabo, bagendekire bamulangalira. Na bulya bal’iyemire n’obwalagale oku bal’iyemirwe na Yehova, bal’iyemire n’obwalagale oku banabone oku ebyo biragane byahikirizibwa. (Hb. 11:4, 5) Olwiganyo lwabo lwanazibuhya omuhigo gwirhu gw’okugendekera rhwalangalira Yehova. Ene, rhulamire omw’igulu ligendekire lyasherera buca buyira. (2 Tm. 3:13) Shetani arhacirhama okulerhera abakozi ba Nnâmahanga amarhangulo. Ciru rhwakarhimanana na mazibu gahi omu mango gayisha, rhuhige okugendekera rhwakolera Yehova n’obushiru, n’‘okulangalira Nyamuzinda ozine.’—1 Tm. 4:10. w22.06 buk. 25 cif. 17-18

Ecirhumire ciguma cirhushumya rhujire okwirhu koshi lyo rhugendekera rhwaba n’amagala minja kuli kubona oku rhwanakolera Yehova n’obushashe bwirhu boshi erhi rhwakaba rhugwerhe amagala minja. (Mk. 12:30) Co cirhumire rhunayake okujira ebintu rhumanyire oku byanahira amagala girhu omu mazibu. (Rm. 12:1) Kobinali, ciru rhwakajira gurhi, arhali ko kuderha oku rhurhakacilwala. Cikone, rhunajire oku rhwakanahasha koshi bulya rhulonzize rhuyerese Larha wirhu w’omu mpingu oku rhushagalukire engalo y’obuzine. Erhi rhwakalwala erhi kushosihala nkaba rhurhakacihash’ijira bintu binji nk’oku rhwaka g’ijira embere. Enyanya z’oko, nkaba rhwanaciyumva kubi na kandi rhwanavunika omurhima. Cikone rhurhagwasirwi rhuleke okujira okwirhu koshi lyo rhushibirira amagala girhu. Bulya gurhi? Bulya ciru rhwakashosihala gurhi erhi kulwala kunganaci, rhwanacigendekera rhwaha Yehova obukuze, nk’oku Mwami Daudi akag’ijira. Okumanya oku Nnâmahanga wirhu anabone obuzine bwirhu oku buli bwa bulagirire ciru akaba rhurhaba bimana kurhuhumire oku murhima bwenene! (Mt. 10:29-31) Ciru rhwakahikira aha rhwafâ, anaciyish’irhufûla. (Ayu. 14:14, 15) Amango rhucizine, rhulonzize rhujire okwirhu koshi lyo rhulanga amagala girhu n’obuzine bwirhu. w23.02 buk. 20-21 cif. 3-5

K’amazino g’ehitû hy’abantu b’ebindi bibuzi gayish’iba gaciri omu citabu c’obuzine enyuma z’okucunguka kwabo ivita lya Harmagedoni? Neci. (Maf. 7:14) Yezu adesire oku abo bantu bashushanyizibwe n’ebibuzi banaje “omu buzine bw’ensiku n’amango.” (Mt. 25:46) Cikone, abo bantu bayish’icunguka ivita lya Harmagedoni, barhakahâbwa obuzine bw’ensiku n’amango ho n’aho. Omu Burhegesi bwa Yezu bw’Emyaka Cihumbi, yene “aba lungere wabo, anabalangûle enjira ehêka ebw’iriba ly’amishi g’obuzine.” Abayish’irhumikira obulongozi bwa Kristu na buzinda babonekane oku bali bishwekerezi kuli Yehova, amazino gabo gayish’iyandikwa loshi-­loshi omu citabu c’obuzine. (Maf. 7:16, 17) Cikone, abantu bashushanyizibwe n’empene bayish’isherezibwa okw’ivita lya Harmagedoni. Yezu adesire oku “bayish’ihâbwa obuhane [buhererekeze] bw’ensiku n’amango.” (Mt. 25:46, Mashi Bible) Omu kulongozibwa n’iroho litagatifu, entumwa Paolo erhubwizire oku “abola bayish’ihâbwa obuhane bw’okukagwa n’okuhererekera ensiku n’amango.”—2 Ts. 1:9; 2 Pt. 2:9. w22.09 buk. 16 cif. 7-8

Amango abantu b’omulala bali bashagalukira ebintu Yehova alemire, banaluhuka n’okucishagalusa haguma, n’oko kwanabarhabala okuzigirana bwenene. Yehova alemire hantu hanji hinja bwenene okw’igulu rhwakajiriraho ebintu rhusima. Milala minji enashagalukire okuba haguma omu parke, omu eneo eri kuli n’evile, erhi oku mashinji. Omw’igulu lihyahya, ababusi n’abana bayish’ishagalukira obulemi bwa Yehova bwenene kulusha embere. Lubero n’oku biyosire ene, rhurhakaba n’ecirhumire coshi-coshi c’okuyoboha ensimba; nazo zirhakarhuyoboha. (Iz. 11:6-9) Rhwayish’iba n’akasanzi k’okushagalukira obulemi bwa Yehova ensiku n’amango. (Enna. 22:26) Cikone mwe babusi, murhalindaga mpu kuhika ako kasanzi kahike lyo murhabala abana binyu barhondere okushagalukira obulemi. Erhi mwakakakolesa obulemi lyo muyigiriza abana binyu lugenda Yehova, nkaba banahikira aha bayemera ezi derho za Mwami Daudi: “Nta mulenga ohisire okw’ikola lyawe.”—Enna. 86:8. w23.03 buk. 25 cif. 16-17