Mwezi gwa 10

Omu kuyimba n’izu n’omu kuhâna amashuzo marheganye bwinja, rhweshi rhwanarhabala ly’entimanano zirhu zigera bwinja. Bantu baguma na baguma banakabona oku kuli kuzibu okuyimba erhi okuhâna amashuzo egarhi ka bantu banji. Ka ntyo ko nawe ociyumva? Akaba ntyo k’ociyumva, wanarhanya kw’ebi abandi bajijire lyo bahima oboba bagwerhe bw’okuyimba erhi kushuza oku ntimanano z’Ecikristu. Okubiyerekire enyimbo, bantu balebe babwine oku okuyimba n’omurhima gwawe goshi kunabarhabale. Amango rhuli rhwayimba enyimbo zirhu z’Obwami, akantu karhanzi rhushinganine rhukasegeza kw’obwenge bwirhu liri irala lirhu ly’okukuza Yehova. Co cirhumire, okarheganya enyimbo, nk’oku wakanarheganya ebindi bigabi by’entimanano na buzinda olole olushangi luli egarhi k’enderho ziri mw’ezo nyimbo n’emyanzi bayish’iganirira oku ntimanano. Kandi, okasegeza obwenge oku nderho ziri mw’ezo nyimbo, ahali h’okubusegeza oku buhashe bwawe bw’okuyimba. Okuhâna amashuzo oku ntimanano kwanaba kuzibu kuli bantu baguma na baguma. Bici byakabarhabala? Okajira ntyo ngasi mango. Kwanaba kwinja erhi ishuzo lyakaba lyofofi, lilembu okuhugûkwa, linasegize ebintu by’obulagirire. Yehova anashagalukire bwenene omuhigo gwirhu gw’okulonza okumukuza oku ntimanano z’ecigamba. w22.04 buk. 7-8 cif. 12-15

Oluderho “murhabazi,” luyerekire omuntu olibirha ly’ajirhabala muntu mulebe oli wahûna oburhabale. Obone omu bukengere bwawe gurhi Yehova ali ajira duba-duba ly’arhabala muntu mulebe oli omu mazibu. Kobinali wanayemera oku ago mahugûlo gayerekine oku Yehova aba alonzize okurhurhabala. Bulya Yehova ali aha burhambi bwirhu, rhwanahash’ilembera amazibu girhu n’omwishingo. Njira zihi nguma na nguma Yehova arhurhabalamwo? Rhuje omu citabu ca Izaya lyo rhushuza kw’er’idoso. Bulya gurhi? Bulya bulebi bunji b’omu bulebi Izaya alebaga omu kulongozibwa n’iroho litagatifu buyerekire abakozi ba Nnâmahanga b’ene. Kandi, kanji-kanji Izaya aganirire Yehova omu kukolesa enderho rhwakahugûkwa bwinja. Rhulole olwiganyo omu Izaya cigabi ca 30. Mw’eco cigabi, Izaya akolesize enyiganyo nyinja bwenene ly’ayerekana gurhi Yehova arhabalamwo abakozi bage. Ayandisire oku Yehova anarhurhabale (1) omu kuyumvirhiza bwinja amasala girhu n’okugashuzako, (2) omu kurhuha obulongozi, na kandi (3) omu kurhuha emigisho muli gano mango n’omu mango gayisha. w22.11 buk. 8 cif. 2-3

Omu myanzi Yezu abwiraga ecigamba c’e Simirna n’ec’e Filadelfiya, abwira Abakristu b’eyo munda oku barhayobohaga okulibuzibwa bulya bakahembirwe enyanya z’obwishwekerezi bwabo. (Maf. 3:10) Rhushinganine rhumanye oku rhwanalibuzibwe, kunali kwa bulagirire bwenene rhucirheganye lyo rhuyish’ilembera oko kulibuzibwa. (Mt. 24:9, 13; 2 Kr. 12:10) Ecitabu c’Amafulûlo cirhuyeresire oku abakozi ba Nnâmahanga bakalibuzibwe muli zino nsiku nzinda, ko kuderha omu “lusiku lwa Nnawirhu.” (Maf. 1:10) Ecitabu c’Amafulûlo cigabi ca 12 ciyerekine oku ivita lyaba empingu enyuma z’okuburhwa kw’Obwami bwa Nnâmahanga. Mikayeli, ko kuderha Yezu Kristu oli omw’irenge na bamalahika bage balwisa Shetani n’abazimu. (Maf. 12:7, 8) Mw’er’ivita abashombanyi ba Nnâmahanga bahimwa bajugucirwa hanw’igulu, banalerhako amalibuko banagalerhera bene bantu.—Maf. 12:9, 12. w22.05 buk. 5 cif. 12-13

Ensiku zoshi, Yehova anakatwa emanja omu bushinganyanya. Yehova arhajira kabôlo ciru n’ehitya. Arhababalira omuntu mpu bulya ali w’iranga linja, ali mugale, amanyikine bwenene, erhi bulya agwerhe buhashe bulebe. (1 Sam. 16:7; Yk. 2:1-4) Ntaye wakaseza Yehova mpu ajire kantu kalebe erhi kumuha ecituliro. Emihigo yage erhaba eyimangire oku bihamba kandi erhi oku ali aciyumva. (Lub. 34:7) Kobinali, Yehova ye Mutwi w’Emanja mwinja bwenene bulya aba ahugûsirwe ngasi kantu okubirhuyerekire n’okubiyerekire akanga kirhu. (Lush. 32:4) Abayandikaga Amandiko g’Ecihabraniya bal’ihugûsirwe bwinja oku Yehova anakababalira omu njira yago-yago. Omu mandiko maguma na maguma, bakolesize oluderho lw’Ecihabraniya citabu ciguma cidesire oku “lunakolesibwe omu kuganirira okubabalira Nnâmahanga ababalira abanya-byaha, cikone nta lusiku lwakakolesibwa omukuganirira okubabalira kw’olugero omuntu ababalira owabo muntu.” Yehova yene ojira obuhashe bw’okubabalira loshi-loshi omunya-­byaha ociyunjuzize. w22.06 buk. 4-5 cif. 10-11

Erhi akaba oli walera abana bawe wene n’erhi akaba balo arhaba Muhamirizi wa Yehova, oyemere n’obwalagale oku olwiganyo lwawe lw’obwishwekerezi lwanazibuhya abandi n’okubashumya. Gurhigi erhi akaba oli wajira okwawe koshi ly’oyigiriza omwana wawe cikone arhalonzizi okukolera Yehova? Okengere oku okuyigiriza omwana kuba kuhûnyire akasanzi. Erhi wakarhwera emogomogo, hali amango wakacidosa erhi kobinali yakula ehikire aha gwaba murhi gwakayâna amalehe. Ciru akaba arhali we wakarhuma yaleheka, onagendekere wayibulagirakw’amishi ly’oyiha obulyo bw’okukula. (Mk. 4:26-29) Ko n’oko, we nka muzire hali amango ocidosa erhi kobinali onarhabale abana bawe lyo bazigira Yehova. Arhali we wakabaseza okukolera Yehova. Cikone, erhi wakagendekera wajira oku wakanahasha ly’obayigiriza, wanabaha obulyo bwinja bw’okukula kiroho. w22.04 buk. 19-20 cif. 16-17

Amango Solomoni akag’ikolera Yehova n’obwishwekerezi, agwerhe entanya z’olugero okubimuyerekire yenene. Erhi ali musole, al’ihugûsirwe oku hali ebi arhakahash’ijira n’oko kwakamushumya ahûne Yehova amahano. (1 Bam. 3:7-9) Oku murhondero gw’oburhegesi bwage, Solomoni al’ihugûsirwe obuhanya bulerhwa n’obucîbone. Ebintu by’okugayisa kuli kubona oku Solomoni arhakolesagya er’ihano ahânaga. Mango malebe erhi ali arhegeka, obucîbone bwarhuma aleka okurhumikira marhegeko maguma na maguma ga Nnâmahanga. Kwa lwiganyo, irhegeko liguma ly’ago marhegeko lyal’isegize oku omwami Muhabraniya arhashinganini ‘aluze abakazi, omurhima gwage gwakanahabuka.’ (Lush. 17:17) Solomoni arharhumikiraga er’irhegeko, arhôla bakazi 700, na baherula 300! (1 Bam. 11:1-3) Nkaba Solomoni akag’ibona oku oko “kurhamulerhere mazibu goshi-goshi.” Erhi hagera nsiku, ahikirwa n’amazibu galerhagwa n’oko kurharhumikira Yehova.—1 Bam. 11:9-13. w22.05 buk. 23 cif. 12

Abantu bagwerhe omuhigo gw’obulagirire gw’okurhôla ene. Bashinganine bahige erhi bacishoga Yehova Nnâmahanga nka murhegesi w’amalunga n’igulu, nisi erhi baja eluhande lw’omushombanyi wage nkununu, ko kuderha, Shetani Ibilisi. Ngasi muguma ashinganine acishoge oluhande aja, bulya birhakahashikana okulunga abo bantu bombi okuboko caligumiza. Omuhigo bakarhôla, go gwakayerekana erhi bayish’ilama ensiku n’amango erhi nanga. (Mt. 25:31-33, 46) Omu kasanzi k’“amalibuko madârhi,” bayish’ihirwako ecimanyiso c’okucunguka erhi kusherezibwa. (Maf. 7:14; 14:9-11; Eze. 9:4, 6) Erhi akaba wacishozire okulunga oburhegesi bwa Yehova okuboko, warhôzire omuhigo gw’obwenge. Byanahashikana erhi ogwerhe irala ly’okurhabala abandi nabo barhôle omuhigo mwinja. Abalunga oburhegesi bwa Yehova okuboko n’obwishwekerezi bayish’iba n’emigisho . Rhunajire bwinja erhi rhuciyigiriza oko okuli kw’obulagirire. Okujira ntyo, kunazibuhye omuhigo gwirhu gw’okugendekera rhwakolera Yehova. Na kandi rhwanarhabala abandi barhôle omuhigo gw’okukolera Yehova n’okugendekera bajira ntyo. w22.05 buk. 15 cif. 1-2

Rhukwanine rhukayumvirhiza Yehova, ahali h’okuyumvirhiza abashombanyi birhu. Ayubu ayumvirhizize erhi Yehova amuganiza. Nnâmahanga arhanya na Ayubu, aba nk’omubwizire ntya: Mba manyire ngasi kantu kakuhikire. K’orhanyize mpu ntakahash’ikushibirira?’ Ayubu ashuza n’obwirhohye anashagalukira obwinja bwa Yehova. Aderha ntya: “Nayumvirhe bakâkuderha, cikwone lero niene nakubwinage.” (Ayu. 42:5, Mashi Bible) Erhi Ayubu aderha ezo nderho, nkaba acir’itamire omu luvu, n’omubiri gwage guyunjwire bihulu. Ciru akaba ntyo, Yehova ayemeza Ayubu n’obwalagale oku al’imuzigire n’oku al’imuyemire. (Ayu. 42:7, 8) Ene nalyo, abantu banarhujacire n’okurhujirira nka bantu ba busha-busha. Banarhuhegeza irenge rhwennene erhi kulihegeza ikubuliro lirhu. Omwanzi guganirire Ayubu gurhuyigirizize oku Yehova aba ayemire n’obwalagale oku rhwabêra bishwekerezi kuli ye amango rhuli omu marhangulo. w22.06 buk. 24 cif. 15-16

Ciru akaba hayish’iba mwishingo munji omu mpingu amango Babiloni Mukulu asherezibwa, hali akandi kantu kayish’ilerha mwishingo munji. (Maf. 19:1-3) “Obuhya bw’Omwana-buzi,” ko kantu k’okushagalusa bwenene kaganirirwe omu citabu c’Amafulûlo. Balya 144 000, bayish’iba bakola bali omu mpingu embere ivita lya Armagedoni lirhondere. Cikone, arhali ago mango g’obuhya bw’Omwana-buzi bwayish’ijirwa. (Maf. 21:1, 2) Obuhya bw’Omwana-buzi bwanajirwe enyuma z’ivita lya Armagedoni n’enyuma z’okuhererekezibwa kw’abashombanyi ba Nnâmahanga boshi. (Enna. 45:3, 4, 13-17) Bici obuhya bw’Omwana-buzi buhugwîre kuli balya banabujemo? Nka kula obuhya buhumanya haguma omulume n’omukazi, ko n’obo buhya bw’olwiganyo bwanahumanye haguma Omwami, Yezu Kristu, haguma n’“omuhya” wage, balya 144 000. Obola buhya bo bwayish’iba idinye liyerekine okurhondezibwa kw’oburhegesi buhyahya bwanarhegeke igulu myaka 1 000.—Maf. 20:6. w22.05 buk. 17 cif. 11-13

Yezu alebire oku omu mango ga buzinda, akahizireho ‘omushizi mwirhonzi na mwikubagirwa’ ly’ahâna ebiryo by’ekiroho. (Mt. 24:45, NWT) Na ntyo kobiri. Yezu ali akolesa ecigusho cisungunu c’abalume bashîge amavurha lyo baha olubaga lwa Nnâmahanga n’abantu basimisibwe n’okuli ebiryo by’ekiroho omu “mango gakwanine.” Abo balume barhacibona nka bo barhambo b’obuyemere bw’abandi. (2 Kr. 1:24) Lubero n’oko, baba bamanyire oku Yezu Kristu ye “murhegesi na nnawabo” w’abantu bage. (Iz. 55:4, Mashi Bible). Kurhenga omu mwaka gwa 1919, mushizi mwirhonzi arheganyize bitabu binji biri lubero ly’aha abantu basimisibwe n’okuli obulyo bw’okuyiga okuli kurhenga omu Kanwa ka Nnâmahanga. Omu mwaka gwa 1921, acapisize ecitabu La Harpe de Dieu ly’arhabala abasimisibwe n’okuli bayige enyigirizo z’omusingi z’Ebibliya. Enyuma za kasanzi kalebe, haba obulagirire bw’okucapisa ebindi bitabu. Citabu cihi cakurhabire ly’omanya n’okuzigira Larha wirhu w’omu mpingu? w22.07 buk. 10 cif. 9-10

Yehova ye Muntu oba muhanyi bwenene. Ciru wakamuha kantu kanganaci, ensiku zoshi anakugalulire binji kulusha ebi wamuhaga. (Mk. 10:29, 30) Akuha akalamo kinja bwenene, ka kushagalusa, na ka kurhimusa ciru n’ene mw’er’igulu ligalu-galu. N’ogo guli murhondero kone. Wanagendekera wakolera Sho muzigirwa ensiku n’amango. Obuzigire egarhi kawe na Sho w’omu mpingu bwagendekera bwayushuka, na kandi wahikira aha walama ensiku n’amango nk’oku yene alama. Erhi wakarhôla omuhigo gw’okucihâna emwa Yehova n’okubatizibwa, wanaba n’olukengwa lw’okuha Sho w’omu mpingu akantu kinja bwenene. Akuhîre ngasi kantu kinja, ngasi kasanzi k’omwishingo washagalukire. Na nawe, wanaha Nn’empingu n’igulu kantu kalebe arhagwerhi, k’okuderha okumukolera n’obulonza n’obwishwekerezi. (Ayu. 1:8; 41:11; Mig. 27:11) Eyo yo njira nyinja bwenene wakakolesamwo akalamo kawe. w23.03 buk. 6 cif. 16-17

Omu myaka y’omushuko, irala ly’okujira eby’enshonyi lyanaba linji bwenene, n’abandi banakushumika oku ojire eby’enshonyi. Na ntyo ko Shetani aba alonzize ojire. Bici byakakurhabala ly’ogendekera waba n’olugenzi lucîre? (1 Ts. 4:3, 4) Omu masala gawe wene, okabwira Yehova oku oli waciyumva, n’okumuhûna akuhe emisi. (Mt. 6:13) Okakengera oku Yehova aba alonzize okukurhabala, cikone arhali kukutumuza. (Enna. 103:13, 14) Orhakag’ilonza okulwisa amazibu gawe wenene. Okaganira n’ababusi bawe ly’obamanyisa amazibu oli walwisa. Kobinali kurhaba kulembu oku muntu okuganirira ebyo biyerekire akalamo kage cikone kuli kwa bulagirire okujira ntyo. Kwanaba kulembu bwenene kuli we okukarhôla emihigo yashagalusa Yehova erhi wakakasoma Ebibliya n’okurhanya bwenene oku makanuni galimwo . Wabona oku orhalagiriri oku kuba n’irhegeko omu ngasi kanga bulya wahugûkwa entanya za Yehova lugenda bintu bilebe. w22.08 buk. 5 cif. 10-12

Omukristu oli irhwe ly’omulala anarhôle kwa buzibu-zibu omukolo gwage gw’okuhikiriza amalagirire g’omubiri gw’omulala gwage. Nkaba oli irhwe ly’omulala, nkaba wanayoboha oku orhahashe okulisa omulala gwawe erhi kugulipira enyumpa. Nkaba kandi wanayoboha oku okaheza akazi kawe, orhahashe okupata akandi. Erhi nkaba wanayoboha oku orhakahasha okulama na nsaranga nsungunu. Shetani ahashire okujira bantu banji baleke okukolera Yehova omu kukolesa oboba bwa ntyo. Shetani analonze okurhuyemeza oku Yehova arhashibirira ngasi muguma wirhu n’oku arharhurhabale lyo rhuhikiriza amalagirire g’omulala gwirhu. N’oko kwanarhuma rhwarhanya mpu rhushinganine rhujire ngasi kantu kahûnyirwe lyo rhurhag’iheza akazi kirhu, ciru akaba ako kantu karhapatini n’amakanuni g’Ebibliya. w22.06 buk. 15 cif. 5-6

Rhumanyire oku Yehova aba Nnâmahanga “w’olukogo n’obwonjo, arhakunîra duba anaba wa buzigire bunji bwishwekerezi n’okuli.” (Lub. 34:6, NWT) Yehova aba azigire obushinganyanya. (Iz. 61:8) Anaciyumve kubi erhi abona rhuli rhwalibuka anaba alonzize okuyusa amazibu girhu goshi anali alindirira akasanzi ahizireho ly’agayusa. (Yer. 29:11) Nirhu rhuli rhwalindirira ako kasanzi kinja bwenene! Buzira karhinda, rhuba rhuzigire Yehova bwenene! Cindi cirhumire cihi cirhushumya rhuzigire okuli? Okuli kunarhulerhere bunguke bunji. Rhuganirire lwiganyo luguma. Okuli kw’Ebibliya kuba kuhiziremwo obulangalire bwirhu lugenda akasanzi kayisha. Nka kula enanga erhabala amashuwa lyo garhag’ihêkwa n’empusi, obulangalire bwirhu buyimangire oku Bibliya bunarhurhabale rhurhadundaganaga erhi rhurhimanana n’amazibu omu kalamo. Omu lwandiko lw’olusiku lw’ene, Paolo akag’iganirira obulangalire bw’okuja empingu Abakristu bashige amavurha bashagalukira. Cikone kandi, enderho zage ziyerekire Abakristu bagwerhe obulangalire bw’okulama ensiku n’amango omu paradizo hanw’igulu. (Yn. 3:16) Kobinali, okuyiga okubiyerekire obo bulangalire bw’akalamo k’ensiku n’amango kwarhumire akalamo kirhu kaba n’omuhigo. w22.08 buk. 14-15 cif. 3-5

Obulangalire buba buyimangire oku buzigire. Amaruba marhanzi emwa Abakorinti cigabi ca 13 gaganirire morhere manji g’obuzigire gakarhurhabala lyo rhukalangalira bene wirhu na bali birhu erhi kucib’ibalangalira amango barhuvunyire omurhima. (1 Kr. 13:4-8) Kwa lwiganyo, omulongo gwa 4 gudesire oku “obuzigire buba bwa kulembera na bwinja.” Yehova anarhulembere ciru rhwakamugomera. Co cirhumire, rhushinganine rhukalembera bene wirhu na bali birhu ciru bakaderha erhi kujira ebintu birhugayisize erhi kurhulumisa omurhima. Omulongo gwa 5 guyushwire ntya: “Obuzigire . . .  burhabâ burhe, burhanabîka mujina.” Rhurhalonzizi rhukagendekera rhwakengera amagosa bene wirhu na bali birhu barhujirire. Olwandiko lw’Omuhanûzi 7:9, Mashi Bible, ludesire oku ‘rhurhakag’igaya duba.’ Ocihangane okabona bene winyu na bali binyu nk’oku Yehova ababona. Nnâmahanga aba abazigire arhanaganja ebyaha byabo. Nirhu rhurhashinganini rhukajira ntyo. (Enna. 130:3) Ahali h’okusêgeza obwenge oku magosa gabo, okabusêgeza oku morhere gabo minja.—Mt. 7:1-5. w22.09 buk. 3-4 cif. 6-7

Ecitabu ca Daniyeli ciyerekine entondekanye ebintu by’okushagalusa byajirikanamwo omu mango ga buzinda. Kwa lwiganyo, olwandiko lwa Daniyeli 12:1 luyerekine oku Mikaheli, ko okuderha Yezu Kristu, ‘anayimange ly’alikûza olubaga [lwa Nnâmahanga].’ Eco cigabi c’obo bulebi carhonderaga okuhikirizibwa omu mwaka gwa 1914 erhi Yezu ajirwa Mwami w’Obwami bwa Nnâmahanga bw’omu mpingu. Cikone, kandi Daniyeli abwizirwe oku Yezu ‘akayimanzire’ omu ‘mango g’amalumwa galya garhasag’ibonekana bundi kurhenga ishanja linasingwa [erhi, lirhondezibwa] kuhika muli agala mango.’ Ago ‘mango g’amalumwa’ go “malibuko [madarhi]” gaganirirwe omu Mateyo 24:21. Yezu ayimanga erhi kuhalira olubaga lwa Nnâmahanga, oku buzinda bw’ago mango g’amalumwa, ko okuderha okw’ivita lya Harmagedoni. Omu citabu c’Amafulûlo, abo bantu bahamagirwe ‘hitû hy’abantu bayish’irhenga omu malibuko madârhi.’—Maf. 7:9, 14. w22.09 buk. 21 cif. 4-5

Amazino gayandisirwe omu citabu c’obuzine ene, ganazazibwa. Yehova ali nk’owarhanzir’iyandika ago mazino n’ekreyo. (Maf. 3:5) Rhushinganine rhujire okwirhu koshi ly’izino lirhu libêra mw’eco citabu kuhika liyandikwe loshi-loshi n’ebike. Cigusho ciguma c’abantu amazino gabo gayandisirwe omu citabu c’obuzine cijijirwe n’abantu Nnâmahanga acishozire lyo bayish’irhambula haguma na Yezu omu mpingu. Kushimbana n’enderho Paolo ayandikiraga “ababo barhabazi,” erhi bakozi omu Filipi, amazino g’abashîge amavurha bahamagirwe lyo barhambula haguma na Yezu, gali omu citabu c’obuzine ene. (Fl. 4:3) Cikone, ly’amazino gabo gagendekera gabêra mw’eco citabu c’obuzine, bashinganine bagendekere babêra bishwekerezi kuli Yehova. Muli ntyo, hano bahirwako ecimanyiso cizinda embere z’okufâ kwabo erhi embere amalibuko madârhi garhondere, amazino gabo gayish’iyandikwa loshi-loshi mw’eco citabu.—Maf. 7:3. w22.09 buk. 14 cif. 3; buk. 15 cif. 5-6

K’aka kanga kakola kakuhikire? Muntu mulebe ayende ebiryo osîma. Cikone bulya oli buhena erhi bulya ogwerhe bintu binji oli warhanyako, olye ebyo biryo duba-duba buzira kukanja bwinja ngasi hihande ly’oyumva obununu bwahyo. Enyuma z’okulya, ohugûkwe oku walire duba-duba onabone oku kwakabire kwinja ocirhuzagye n’okushagalukira obununu bwa ngasi hihande. K’okola osomire Ebibliya duba-duba n’oko kwarhuma orhashagalukira omwanzi gulimwo? Okaciha akasanzi ly’oshagalukira okusoma Akanwa ka Nnâmahanga; okabona omu bwenge bwawe ebiri byajirikana, okagerereza oku mazu g’ebiri byajirikana, n’okurhanya bwenene kw’ebi wasomire. Okujira ntyo kwanayushula omwishingo gwawe. Yezu ahizireho “mushizi mwirhonzi na mwikubagirwa” ly’arhuha ebiryo by’ekiroho omu mango gakwanine, na kobinali rhuli rhwalisibwa bwinja omu njira y’ekiroho. (Mt. 24:45, NWT) Ebiryo byoshi mushizi mwirhonzi arhuha biba biyimangire oku Mandiko galongozibagwa n’iroho litagatifu.—1 Ts. 2:13. w22.10 buk. 7-8 cif. 6-8

Ebibliya yarhonzire oku omu nsiku nzinda, hakabire bantu banji ba kushekera abandi. (2 Pt. 3:3, 4) Banashumibwe n’“irala ly’obubi bwabo.” (Yd. 7, 17, 18) Gurhi rhwakacilangamwo lyo rhurhag’iyiga oborhere bw’abo bantu bakashekera abandi? Njira nguma rhwakajiramwo ntyo kuli kuyaka okujira obwîra haguma n’abantu baciduduma lugenda ngasi kantu. (Enna. 1:1) Oko kuli kuderha oku rhurhashinganini rhukayumvirhiza erhi kusoma akantu koshi-koshi k’abagoma. Rhunahugûkwe oku erhi akaba rhurhabiri masu, rhwanarhondera okuciduduma lugenda ngasi kantu n’okuba n’akarhinda lugenda enjira ya Yehova y’okujira ebintu n’obulongozi rhuhâbwa kugerera ikubuliro lyage. Co cirhumire, rhushinganine rhucidose ntya: ‘Ka ngasi mango nancidudume erhi rhuhâbwa obulongozi buhyahya erhi mahugûlo mahyahya? Ka nanje nalongereza amagosa oku bantu bali barhulongoza?’ Erhi rhwakaba babidu okuyaka ezo ngeso, Yehova anarhushagalukira.—Mig. 3:34, 35. w22.10 buk. 20 cif. 9-10

Iroho litagatifu lya Nnâmahanga lyaha Ezekiyeli emisi y’okuhubiri abantu bali “cikanyi-cirhagomba n’omurhima muzibu” b’omu eneo akag’ihubirimwo. Yehova abwira Ezekiyeli ntya: “Namajira obusu bwawe buzibu nk’obusu bwabo, n’amalanga gawe mazibu nk’amalanga gabo. Amalanga gawe nagazibuhya nka diyamâ, yo elusha ibuye okuzibuha. Orhabayobohaga, orhabarhinyaga.” (Eze. 3:8, 9) Yehova ali nk’obwizire Ezekiyeli ntya: ‘Orhalekaga amarhwe mazibu g’abantu gakuvune omurhima. Nakuzibuhya.’ Enyumza z’aho, iroho litagatifu lya Nnâmahanga lyahêka Ezekiyeli omu eneo akag’ijiriramwo omukolo gw’amahubiri. Ezekiyeli ayandika ntya: “Okuboko kwa Nyakasane [Yehova, NWT] kungwerhe buzirho.” Oyo mulebi ajijire mugobe muguma ali ayiga omwanzi al’ishinganine aj’iyaliza. (Eze. 3:14, 15) Buzinda, Yehova ahêka Ezekiyeli ebwa kabanda n’erhi ali eyo ‘[iroho] lya Nyamubaho lyanacimujamwo.’ (Eze. 3:23, 24) Ezekiyeli al’ikola agwerhe ebi al’ilagirireko byoshi ly’arhondera omukolo gw’amahubiri. w22.11 buk. 4 cif. 8-9

Omulebi Habakuki ahikirwe na mazibu manji. Mango maguma, abonekine oku arhal’iyemire n’obwalagale oku Yehova anamushibirire. Na ntyo abwira Yehova omw’isala oku akag’iciyumva. Yehova ashuza er’isala lyarhengaga oku murhima ly’oyo mukozi wage mwishwekerezi. (Hab. 2:2, 3) Enyuma z’okurhanya bwenene lugenda oku Yehova ayokolaga abantu bage, Habakuki acib’iba n’omwishingo. Ayemera n’obwalagale oku Yehova akag’imushibirira n’oku akamurhabire ly’ahash’ilembera ngasi mazibu. (Hab. 3:17-19) Bici ogo mwanzi gurhuyigirizize? Erhi akaba oli walwisa amazibu, okayegera Yehova kugerera isala n’okumubwira oku oli waciyumva. Buzinda, olangalire oburhabale bwage. Erhi wakajira ntyo, wanayemera n’obwalagale oku Yehova akuha emisi olagirireko ly’olembera. N’amango wamabona oku ali akurhabala, obuyemere bwawe muli ye bwanasêra. Erhi wakagendekera okuba n’eprograme nyinja y’ekiroho, orhakaleka akarhinda erhi amazibu gakunanûle kuli Yehova.—1 Tm. 6:6-8. w22.11 buk. 15 cif. 6-7

Yezu n’ebishumusi bibirhi byali eburhambi bwage bagwerhe malumwa manji bwenene omu mango bakag’iyumva oku olufû lwabo luyegerire. (Lk. 23:32, 33) Ebyo bishumusi byombi byakag’ishekera Yezu. (Mt. 27:44; Mk. 15:32) Cikone muguma mulibo ashanja entanya zage. Aderha ntya: “Yezu, oyish’inkengera han’oja omu Bwami bwawe.” Yezu amushuza kugerera enderho ziri omu lwandiko lw’olusiku lw’ene. (Lk. 23:39-42) Enderho Yezu abwiraga eco cishumusi zishinganine zirhushumye rhurhanye lugenda gurhi akalamo kayish’iyorha omu Paradizo. Oburhegesi bw’omurhûla bwa Mwami Salomoni bwanarhuyigiriza kantu kalebe lugenda Eparadizo. Ebibliya edesire oku Yezu ali mukulu bwenene kulusha Salomoni. Rhwanalangalira oku ayish’ikola haguma n’abantu barhambula haguma naye ly’ajira igulu libe paradizo nyinja bwenene. (Mt. 12:42) Bibonekine n’obwalagale oku abantu b“ebindi bibuzi” bashinganine bamanye ebi bahûnyirwe okujira lyo balama ensiku n’amango omu Paradizo.—Yn. 10:16. w22.12 buk. 8 cif. 1; buk. 9 cif. 4

Izaya arhuyemezize n’obwalagale oku Yehova arhuyumvirhiza bwinja-bwinja erhi rhwakamulakira, n’oku ashuza duba-duba ensengero zirhu. Izaya ayushwire ntya: “Mango akayumva izu lyawe, akushûza.” Ezo nderho z’okuhâna omurhima zirhukengezize oku kobinali Larha wirhu aba alonzize okurhabala abamuhûna oburhabale. Okumanya ntyo kunarhurhabale rhulembere amazibu girhu n’omwishingo. Yehova anayumvirhize isala lya ngasi muguma wirhu. Bulya gurhi rhudesire ntyo? Omu milongo mirhangiriza ya Izaya cigabi ca 30, enderho zikolesibwe ziyerekire bantu banji bulya Yehova ali aganiza abantu bage nka cigusho. Cikone, omu mulongo gwa 19, enderho zikolesibwe ziyerekire muntu muguma-muguma. Izaya ayandisire ntya: “Orhakâcirhoza mulenge bundi”; “mango okabanda endûlu, àkufâ lukogo”; “akushuza.” Bulya Yehova aba Larha w’obuzigire, anarhubone nka muntu muguma-muguma ananayumvirhize amasala ga ngasi muntu.—Enna. 116:1; Iz. 57:15. w22.11 buk. 9 cif. 5-6

Okuhubiri n’okuyigiriza ciru akaba rhuli rhwahagalikwa kunarhulerhere omwishingo n’omurhûla. Omu myaka igana mirhanzi erhi abarhegesi Bayahudi babwira entumwa oku zileke okuhubiri, abo Bakristu bishwekerezi bacishoga okurhumikira Nnâmahanga. Bagendekera okujira omukolo gw’amahubiri, n’ogo mukolo gwabalerhera omwishingo. (Ebj. 5:27-29, 41, 42) Kobinali, amango bigabi bilebe by’omukolo gwirhu bihanzibwe, rhugwasirwe rhube masu lyo rhuhubiri. Cikone erhi rhwakajira okwirhu koshi lyo rhuhubiri, rhwanaba n’omurhûla gurhenga omu kushagalusa Yehova n’omu kuganirira abandi omwanzi guyokola obuzine. Oyemere n’obwalagale oku ciru n’omu kasanzi kazibu bwenene, rhwanaba n’omurhûla. Omu kasanzi ka ntyo, rhugwasirwe rhukengere oku omurhûla rhulagirireko guli murhûla Yehova yene akahâna. Omulangalire amango hali endwala y’okuyahukira, obuhanya bucilerha bone, erhi amango rhuli rhwalibuzibwa. Obe mwishwekerezi okw’ikubuliro lyage. Okarhanya oku kasanzi kinja bwenene kayisha. Erhi wakajira ntyo, ‘Nnâmahanga orhuha omurhûla abêra haguma na nawe.’—Fl. 4:9. w22.12 buk. 21 cif. 17-18

Rhugwasirwe rhucihangane bwenene lyo rhuhasha okujira ntyo. Egarhi k’engeso rhugwasirwe rhujire okwirhu koshi lyo rhuhima, hali omujina, obukunizi, n’enongwe. (Ef. 4:31, 32) Bulya gurhi kwanaba kuzibu okuhima ezo ngeso? Bulya ngeso nguma na nguma z’oborhere bwirhu zikola ziba zigwerhe emizi muli rhwe. Kwa lwiganyo, Ebibliya edesire oku bantu baguma na baguma “banalube duba-duba” banaba “bakali.” (Mig. 29:22) Lyo rhuhima engeso mbi zikola zigwerhe emizi muli rhwe biba bihûnyire rhugendekere rhwacihangana ciru n’enyuma z’okubatizibwa. (Rm. 7:21-23) Okashenga Yehova lugenda engeso mbi oli wacihangana okuhima, onalangalire oku ayumvirhiza isala lyawe anakurhabala. (1 Yn. 5:14, 15) Ciru akaba Yehova arhakayusa eyo ngeso omu njira y’ecisomerine, anakuha emisi olagirireko ly’eyo ngeso erhag’ikunywengerera. (1 Pt. 5:10) Amango oli walinda oku Yehova ashuza oku masala gawe, ojire kushimbana n’amasala gawe omu kuyaka ebintu byakarhuma wagalukira engeso mbi z’obumuntu bwa mîra. Kandi wanayaka okusegeza obwenge bwawe oku irala libi.—Fl. 4:8; Kl. 3:2. w23.01 buk. 10 cif. 7, buk. 11 cif. 10

Njira nguma rhuyerekanamwo obuzigire bwirhu kuli kuba n’obushirhu omu mukolo gw’amahubiri. Rhunaganize ngasi muntu rhurhimanine naye. Rhurhabolôla muntu yeshi-yeshi enyanya z’irangi lyage ly’omubiri, obûko bwage, abe mugale erhi mukenyi erhi abe asomire erhi arhasomaga. Muli eyo njira, rhunabe rhuli rhwahikiriza omuhigo gwa Yehova “ye lonzize mpu abantu boshi bacizibwe lyo banahasha okumanya okuli.” (1 Tm. 2:4, Mashi Bible) Kandi rhunayerekane obuzigire bwirhu kuli Nnâmahanga na Kristu omu kuzigira bene wirhu na bali birhu. Rhunabashibirire bwenene n’okubarhabala omu mango bali bahikirwa n’amazibu. Rhunabarhulirize amango bafîrirwe n’omuzigirwa wabo, rhunabalambagirire amango balwazire, rhunanajire okwirhu koshi lyo rhubaha omurhima erhi akaba bavunisire omurhima. (2 Kr. 1:3-7; 1 Ts. 5:11, 14) Rhunasalire enyanya zabo bulya rhuba rhumanyire oku “omusengero gw’omushinganyanya washenga n’omurhima gwage gwoshi gujira buhashe bunji.”—Yk. 5:16. w23.01 buk. 28-29 cif. 7-8

Nka kula omubasi akubûla obulenga bwage erhi hagera kasanzi, nirhu rhwanaba na bulenga bunji omu kuyubaka abandi. Rhwanarhabala abandi babe n’emisi y’okulembera amazibu gabo omu kubaganirira enyiganyo z’abantu balemberaga amazibu omu mango ga mira. (Hb. 11:32-35; 12:1) Rhwanagendekeza omurhûla omu kukaganirira amorhere minja g’abandi, omu kulonza omurhûla amango kuli kuzibu okujira ntyo, n’omu kugalula omurhûla amango hali okurhayumvikana. (Ef. 4:3) Na kandi rhunagendekere rhwarhabala bene wirhu na bali birhu basêze obuyemere bwabo omu kubaganirira enyigirizo z’obulagirire z’Ebibliya, omu kubaha oburhabale balagirireko, n’omu kurhabala ngasi yeshi wazambanyize omu hali y’ekiroho. Rhunabe n’omwishingo n’okurhimukwa erhi rhurhabala oku mukolo gw’obubasi bw’ekiroho omu cigamba. Lubero n’obubasi bw’enyumpa zishabuka erhi hagera kasanzi, amalehe g’omukolo gwirhu gw’obubasi ganagendekera ensiku n’amango! w22.08 buk. 22 cif. 6; buk. 25 cif. 17-18

Yezu ayerekine akantu k’obulagirire rhulagirireko lyo rhuhugûkwa ebi rhuli rhwasoma omu Kanwa ka Nnâmahanga—kuli kuderha oburhimanya. (Mt. 24:15) Oburhimanya byo bici? Buli buhashe bw’okuhugûkwa gurhi ntanya ndebe zipatine n’ezindi na lubero luhi luli egarhi k’ezo ntanya zombi ly’omanya ntanya zihi zirhali nembu okuhugûkwa. Kandi, Yezu ayerekine oku rhulagirire oku burhimanya lyo rhubona n’obwalagale ebimanyiso biri byahikiriza obulebi bw’Ebibliya. Na kandi rhulagirirek’obo borhere lyo rhuyunguka bwenene na ngasi kantu rhuli rhwasoma omu Bibliya. Yehova ahîre abakozi bage oburhimanya. Co cirhumire okamuyegera kugerera isala, n’okumuhûna akurhabale ly’oba n’obo borhere. Gurhi wakajiramwo ebipatine n’isala lyawe? Okarhanya bwenene kw’ebi oli wasoma, onahugûkwe lushangi luhi bigwerhe n’eyindi myanzi omanyire. Okalonza amahugûlo ga lwandiko lulebe n’okumanya gurhi wakakolesamwo ebi wasomaga omu kalamo kawe. (Hb. 5:14) Amango oli wasoma n’oburhimanya, obumanye bwawe bw’Amandiko bwanayushuka. w23.02 buk. 10 cif. 7-8

Orhanye omwîra wawe akuhîre enyumpa. Ekola erhenzireko irangi enali yaloba. Ciru akaba eyo nyumpa egwerhe ago mazibu, yanaguzibwa emiliyoni y’amadolare. Kobinali, wanashagalukira eyo nyumpa n’okuyilanga. Ko n’oko, Yehova arhuhîre engalo y’engulo ndarhi bwenene, k’okuderha engalo y’obuzine. Ayerekine oku anabone obuzine bwirhu oku buli bwa ngulo ndarhi omu kuhâna Omugala abe ngombôlo kuli rhwe. (Yn. 3:16)Yehova ye Nshôko y’obuzine. (Enna. 36:9) Entumwa Paolo nayo yal’iyemire ntyo yanaderha ntya: “Muli ye, rhugwerhe obuzine, n’obwikanye n’okuba ho.” (Ebj. 17:25, 28, Mashi Bible) Co cirhumire rhwanaderha oku obuzine bwirhu eba ngalo kurhenga emwa Nnâmahanga. Enyanya z’obuzigire bwage, anarhuhe ebi rhulagirireko lyo rhugendekera rhwalama. (Ebj. 14:15-17) Cikone Yehova arhalanga obuzine bwirhu omu njira y’ecisomerine. Lubero n’oko, aba alonzize rhujire okwirhu koshi lyo rhushibirira amagala girhu g’omubiri n’ag’ekiroho.—2 Kr. 7:1. w23.02 buk. 20 cif. 1-2

Rhuvuzire Yehova Nnâmahanga omunkwa bwenene lugenda Ebibliya! Omu Bibliya yoshi, arhuhire amahano g’obwenge gakarhurhabala lyo rhuhash’ilwisa amazibu gali garhuhikira ene. Kandi arhuhire obulangalire bwinja bw’akasanzi kayisha. N’akantu k’obulagirire bwenene, Yehova akolesize Ebibliya ly’arhufulûlira binji okubiyerekire obumuntu bwage. Erhi rhurhanya bwenene oku morhere gage minja, emirhima yirhu enahumweko bwenene n’oko kunarhushumye rhulonze okuyegera Nnâmahanga wirhu omu kuba n’obwîra bwa hofi-hofi haguma naye. (Enna. 25:14) Yehova aba alonzize abantu bamumanye. Omu mango ga mîra, akag’icimanyisa oku bantu kugerera ebilorho, ebibonekerezi, na kugerera bamalahika. (Mib. 12:6; Ebj. 10:3, 4) Cikone gurhi ebyo bilorho, ebibonekerezi, erhi emyanzi kurhenga kuli bamalahika yakayizirwemwo nk’erhayandikagwa? Yehova agwerhe ecirhumire cinja c’okubwira abantu ‘bayandike omu citabu’ ebi al’ilonzize okurhumanyisa. Bulya “enjira ya Nnâmahanga w’okuli ebâ nyimâna,” rhwanayemera n’obwalagale oku enjira yage y’okushambala na nirhu eba nyinja bwenene na ya kurhulerhera obunguke.—Enna. 18:30, NWT. w23.02 buk. 2 cif. 1-2

Ocihirireho emihigo yakakulerhera obunguke. Ocishoge emihigo yakaseza obuyemere bwawe n’okukurhabala obe Mukristu okuzire kiroho. (Ef. 3:16) Kwa lwiganyo, wanahiga okukakenga eprograme yawe y’okusoma Ebibliya n’okujira ifunzo lyawe wene. (Enna. 1:2, 3) Erhi nkaba wanabona oku kuli kwa bulagirire okasalira kanji-kanji n’okuderha ebyarhenga oku murhima. Nkaba wanaba n’obulagirire bw’okuyerekana bwenene oborhere bw’okucihasha omu kucishoga eby’okucishagalusa n’omu kukolesa akasanzi kawe. (Ef. 5:15, 16) Wanaba Mukristu okuzire kiroho erhi wakakarhabala abandi. Kwa lwiganyo, wanacihiriraho omuhigo gw’okurhabala abakola bashosi n’abagwerhe buzamba bulebe bw’omubiri omu cigamba cinyu. Nkaba wanagend’ibagulira bintu bilebe erhi kubarhabala bamanye okukolesa ebyombo by’ecielektroniki. Kandi onayerese abarhali Bahamirizi obuzigire omu kubaganirira omwanzi mwinja gw’Obwami. (Mt. 9:36, 37) Akaba bihashikine, ocihirireho omuhigo gw’okuja omu mukolo mulebe gw’akasanzi koshi. w22.08 buk. 6 cif. 16-17