Mwezi gwa 9

Erhi rhukolesa bwinja engalo yirhu y’okuderha, rhunayerekane oku rhuli bakozi ba Yehova. Rhunarhabale abarhuzungulusire bahugûkwe oku “okolera Nyamuzinda n’orhamukolera barhali bo baguma.” (Mal. 3:18) Rhulole gurhi ezo nderho zabonekine oku ziri z’okuli omu kanga ka mwali wirhu muguma ohamagalwa Kimberly. Erhi ali oku masomo g’enyanya ahâbwa omukolo ajira haguma n’owabo mwanafunzi. Erhi bayusa ogo mukolo, oyo wabo mwanafunzi abona oku Kimberly ali lubero n’abandi banafunzi. Arhakag’iderha ebintu bibi okubiyerekire abandi bantu, akag’iderha omu njira nyinja, arhanakag’ikolesa enderho mbi. Obo borhere bwa Kimberly bwahuma oku murhima g’oyo wabo mwanafunzi, anarhondera ayiga Ebibliya. Yehova anashagaluke bwenene erhi rhuderha omu njira y’okushumya abandi bayishe omu okuli! Rhweshi rhuba rhulonzize rhukaderha omu njira yakalerhera Yehova olukengwa. w22.04 buk. 5-6 cif. 5-7

Yezu akûlako Mariya Magadalena bazimu nda! Okuba wakuvuga omunkwa kwamushumya aba mwanafunzi wa Yezu n’okulunga okuboko omukolo gw’amahubiri. (Lk. 8:1-3) Ciru akaba Mariya avuzire omunkwa bwenene kw’ebi Yezu amujiriraga, nkaba arhal’ihugûsirwe oku Yezu amujirira binji bwenene enyuma z’aho. Akahânyire obuzine bwage lyo “ngasi yeshi wamuyemera” aba n’obuzine bw’ensiku n’amango. (Yn. 3:16) Ciru akaba ntyo, Mariya ayerekine oku avuzire Yezu omunkwa omu kubêra mwishwekerezi kuli ye. Amango Yezu akag’ilibuzibwa oku murhi gw’amalibuko, Mariya al’iyimanzire eburhambi bwage, bulya al’ishibirire Yezu anal’ilonzize okurhuliriza abandi baliho. (Yn. 19:25) Enyuma z’okufâ kwa Yezu, Mariya n’abandi bakazi babirhi badwirhe amavurha garhenga omu mirhi y’ehisununu hinja lyo bagashiga oku mubiri gwa Yezu lyo bagurheganya oku mazishi. (Mk. 16: 1, 2) Mariya abire n’omwishingo omu kurhimanana na Yezu enyuma z’okufûka kwage anaganira naye; olo lwali lukengwa banafunzi banji barhabaga nalo.—Yn. 20:11-18. w23.01 buk. 27 cif. 4

Rhurhashinganini rhurhanye oku bulya omu mango gageraga rhwakolire Yehova bwenene, rhurhacishinganini rhugendekere rhwamukolera. Ciru akaba rhwanaba rhurhacigwerhi buhashe bunji nk’oku byali embere, rhushinganine rhugendekere rhwaba na binji bya kujira omu “mukolo gwa Nyakasane,” n’okugendekera kwaba masu kuhika ebuzinda. (1 Kr. 15:58; Mt. 24:13; Mk. 13:33) Rhushinganine rhube ba bushiru n’okuha Nnâmahanga enterekêro n’omurhima gwirhu goshi. Omwanzi Yezu abwiraga ecigamba c’e Laodikiya, gwal’iyerekine oku bagwerhe amazibu gali lubero. Bali “bîkàngà” omu nterekêro yabo. Bulya barhakag’irhôla ebintu kwa buzibu-zibu, Yezu ababwira oku ‘balihanyagîre, [banali] bakubêrwa lukogo.’ Bal’ishinganine babe na bushiru bunji omu nterekêro bakag’iha Yehova. (Maf. 3:16, 17, 19) Isomo lici rhukuzire aho? Erhi akaba rhwahezize ehy’obushiru hisungunu omu nterekêro rhuha Yehova, rhushinganine rhugendekere rhwashagalukira ebintu byoshi binja Yehova n’ikubuliro lyage bali barhuha. (Maf. 3:18) Rhurhayemeraga ciru n’ehitya okulongereza akalamo k’okuba na bintu binji kurhume rhwabula kuba masu, n’oko kurhume ebintu by’ekiroho byaja oku nafasi ya kabirhi omu kalamo kirhu. w22.05 buk. 3-4 cif. 7-8

Omu bihumbi by’emyaka, Yehova ali ayandika ecitabu cago-cago. Eco citabu cirimwo amazino garhonderire okw’izino lya Abeli, muhamirizi murhangiriza mwishwekerezi. (Lk. 11:50, 51) Kurhangira ago mango, Yehova ajire ayushula amazino mw’eco citabu, n’ene cikola cirimwo emiliyoni y’amazino. Omu Bibliya, eco citabu cihamagirwe “citabu c’okukengeza,” “citabu c’obuzine,” na “citabu c’okukunjwa c’obuzine.” (Mal. 3:16; Maf. 3:5; 17:8) Eco citabu cago-cago, cirimwo amazino g’abantu boshi baharamya Yehova omu bukenge bunji banazigira izino lyage. Bayish’iba n’obulyo bw’okuhâbwa obuzine bw’ensiku n’amango. Ene, izino lirhu lyanayandikwa mw’eco citabu erhi rhwakacijirira obwîra bwinja na bwa hofi-hofi haguma na Yehova buyimangire oku nterekêro y’engombôlo y’Omugala Yezu Kristu. (Yn. 3:16, 36) Rhweshi rhulonzize amazino girhu gayandikwe mw’eco citabu; rhube rhugwerhe obulangalire bw’okulama empingu erhi hanw’igulu. w22.09 buk. 14 cif. 1-2

Ecitabu c’Amafulûlo ciganirire ‘enkuba-joka nnênênè eshushire isêsè.’ (Maf. 12:3) Eyo nkuba-joka yalilwisize Yezu na bamalahika bage. (Maf. 12:7-9) Eri yahira abakozi ba Nnâmahanga kw’ecirhero, enali yaha ebiryanyi by’epolitike obukulu. (Maf. 12:17; 13:4) Eyo nkuba-joka ye ndi? Y’olya “mujoka wa mira, [ohamagalwa, NWT] Shetani.” (Maf. 12:9; 20:2) Y’erhegeka abashombanyi boshi ba Yehova. Bici byayish’ihikira enkuba-joka? Ecitabu c’Amafulûlo 20:1-3 cihugwîre oku malahika ayish’ikweba Shetani omu abiso, eabiso eshushanyize eprizo arhakacirhengamo. Ako kasanzi ayish’iba ali omu abiso ly’‘arhak’ihabula kandi embaga kuhika erya myaka cihumbi ebe yamâhwa.’ Buzinda, Shetani n’abazimu bage bayish’isherezibwa liguma lya loshi, oko kushushanyizibwe n’okubakweba omu “nyanja y’omuliro n’ecibiriti.” Obone omu bwawe gurhi igulu lirhacirimo Shetani n’abazimu bage lyayish’iyorha. Ako kayishiba kasanzi kinja bwenene! w22.05 buk. 14 cif. 19-20

Yezu ali mukozi wa bushiru. Erhi ali musole, akag’ijira omukolo gw’okubinja. (Mk. 6:3) Buzira karhinda ababusi bage bashagalukire oburhabale akag’ihâna bulya bakag’icihangana okukola lyo bahikiriza amalagirire g’omubiri g’omulala gwabo gwalimo bantu banji. Yezu ali mwimana anakag’ijira omukolo gwage bwinja. Co cirhumire nkaba bantu banji bakag’ishagalukira ebintu akag’itula! Kobinali, Yezu akag’ishagalukira omukolo gwage. Ciru akaba Yezu ali mukozi wa bushiru, ngasi mango akag’icihiriraho akasanzi k’okujira ebintu by’ekiroho. (Yn. 7:15) Enyuma z’aho erhi arhondera omukolo gwage gw’amahubiri, ahanûla abumvirhiza bage ntya: “Murhakag’ikolera ebiryo by’okugaga, cikwone mukâkolera ebirhagaga byo bilerha obuzine bw’ensiku n’amango.” (Yn. 6:27, Mashi Bible) N’omu Mahubiri gage g’oku Ntondo, Yezu aderha ntya: “Mucibikire amahirhi empingu.” (Mt. 6:20) Obwenge bwarhenga emwa Nnâmahanga bunarhurhabale rhube n’entanya z’olugero okubiyerekire omukolo gwirhu gw’omubiri. Rhwe nka Bakristu, rhwayigirizibwe oku ‘rhukakola n’amaboko girhu . . . , ebishinganine.’ w22.05 buk. 22 cif. 9-10

Ewuniki ayeresire Timoteyo olwiganyo lwinja. Buzira karhinda, abwine oku obuzigire busêzire nnina agwerhe kuli Yehova bo bwakag’ishumya ebijiro byage n’okukolera Yehova kwarhumire nnina aba n’omwishingo. Ko n’oko, bazire banji barhabire “buzira binwa” abantu b’omu mulala gwabo bakolere Yehova. (1 Pt. 3:1, 2) Na nawe wanajira ntyo. Gurhi wakajiramwo ntyo? Ohire obwîra bwawe haguma na Yehova oku nafasi ntanzi omu kalamo kawe. (Lush. 6:5, 6) Aka bazire banji, onaciyime bintu binji. Onaciyime akasanzi kawe, ensaranga, iro, n’ebindi bintu ly’oshibirira amalagirire g’omubiri g’abana bawe. Cikone, orhashinganini okakolesa akasanzi kawe koshi ly’ohikiriza ago malagirire n’oko kurhume wayibagira obwîra bwawe haguma na Yehova. Ngasi mango okacihiriraho akasanzi k’okushenga, okujira ifunzo lyawe wene ly’Ebibliya n’okuja oku ntimanano z’ecigamba. Omu kujira ntyo, wanacizibuhya kiroho wananayeresa abantu b’omu mulala gwawe olwiganyo, ciru n’abandi. w22.04 buk. 16 cif. 1; buk. 19 cif. 12-13

Rhuhîrwe omurhima okumanya oku, arhali rhwe rhushinganine rhuhige gurhi abantu bakwanine okutwirwa olubanja! Bulya Yehova ye Mutwi w’Emanja Mukulu, ahikiriza ogo mukolo gw’obulagirire. (Rm. 14:10-12) Rwanayemera n’obwalagale oku, ensiku zoshi atwa emanja kushimbana n’amakanuni gage mimana gayerekire aminja n’amabi. (Murh. 18:25) Nta lusiku akajira akantu karhali kashinganyanya! Rhuli rhwalindirira amango Yehova ayusa amazibu goshi galerhwa n’ecaha n’okurhaba bimana. Ago mango, amalumwa girhu goshi g’omubiri nag’ekandalala gayish’ihwa loshi-loshi. (Enna. 72:12-14; Maf. 21:3, 4) Ago malumwa garhakac’ikengerwa ciru n’ehitya. Embere ako kasanzi kinja kahike, rhuvuzire Yehova omunkwa bwenene okubona arhuhîre obuhashe bw’okuyiga olwiganyo lwage lw’okubabalira. w22.06 buk. 13 cif. 18-19

Omutwi w’emanja mwinja aba ashinganine ahugûkwe bwinja amarhegeko. Aba ashinganine amanye bwinja-bwinja ebinja n’ebibi. Bindi bici omutwi w’emanja mwinja aba alagirireko? Aba alagirire oku kumanya ebintu byoshi okubiyerekire kanga kalebe embere atwe olubanja. Co cirhumire, Yehova ye Mutwi w’Emanja mwinja bulya ngasi mango anabe amanyire ebintu byoshi okubiyerekire ngasi kanga. Lubero n’abatwi b’emanja ba bene bantu, ensiku zoshi Yehova anabe amanyire bwinja-bwinja ebintu byoshi okubiyerekire ngasi kanga. (Murh. 18:20, 21; Enna. 90:8) Obuhashe bwage bw’okutwa emanja burhaba buyimangire kw’ebi abantu babona kone erhi kuyumva. Yehova aba ahugûsirwe bwinja-bwinja oku amorhere omuntu ayimaga kurhenga oku babusi bage, oku aleragwamwo, aha aburhiragwa, n’oku ayosire ekandalala n’omu bukengere bwage, byanashumya ebijiro byage. Kandi Yehova anasome omurhima gw’omuntu. Na kandi anabone ebishumya omuntu ajire kantu kalebe. Nta kantu kaba kafulisirwe omu masu ga Yehova. (Hb. 4:13) Co cirhuma, erhi Yehova ababalira muntu mulebe, anajire ntyo bulya ahugûsirwe ebintu byoshi okubiyerekire akanga k’oyo muntu. w22.06 buk. 4 cif. 8-9

Rhushinganine rhumanyirire obulenga Shetani akolesize kuli Ayubu bulya obo bulenga bo n’obo bo ali akolesa ene kuli rhwe. Shetani ayerekine oku rhurhajira obuzigire bw’okunali kuli Yehova Nnâmahanga n’oku, erhi byakahûna rhumuleke lyo rhuciza obuzine bwirhu, rhwanajira ntyo. Kandi, Shetani ayerekana oku Nnâmahanga arhaba arhuzigire n’oku arhashagalukira obushiru rhujira lyo rhumushagalusa. Co cirhumire, rhurhayemera obunywesi bwa Shetani bulya rhumanyire ebi aba alonzize okuhikiriza. Rhushinganine rhukabona amarhangulo oku buli bulyo bw’okurhurhabala rhucimanye rhwe nnene. Amarhangulo Ayubu alwisize gamurhabire amanye obuzamba bwage buguma na buguma n’okubukubûla. Kwa lwiganyo, ahugûkwa oku al’ishinganine abe mwirhohye kulusha. (Ayu. 42:3) Nirhu rhwanamanya binji okubirhuyerekire amango rhuli omu marhangulo. Erhi rhwakamanya obuzamba bwirhu, rhwanajira okwirhu koshi lyo rhubukubûla. w22.06 buk. 23 cif. 13-14

Yehova arhuyemezize n’obwalagale oku arhurhabala. Kwa lwiganyo, embere Yehova aderhe erhi: ‘Muli bahamîrizi bani,’ arhang’iderha ntya: “Hano oyikira enyishi, naba ndi haguma na nawe; hano ogera omu nyishi ngali, orhâzike, ciru wakagera omu muliro, orhâkahya ciru gwakalîka engulumira.” (Iz. 43:2, Mashi Bible) Amango rhuli rhwajira omukolo gwirhu gw’amahubiri, hali amango rhwakarhimanana n’ebihanzo biri nka nyishi ngali, n’amarhangulo gali nka muliro. Ciru akaba ntyo, kugerera oburhabale bwa Yehova rhunagendekere rhwahubiri. (Iz. 41:13) Bantu banji ene barhayumvirhiza omwanzi rhuyaliza. Rhunabîke omu bukengere bwirhu oku oko kulahira omwanzi rhuyaliza, arhali k’okuderha oku rhurhish’ijira omukolo gw’amahubiri bwinja. Rhunarhulirizibwe n’okuba n’emisi omu kumanya oku Yehova anashagaluke bwenene erhi rhugendekera rhwayaliza omwanzi mwinja n’obwishwekerezi. Entumwa Paolo yayandika ntya: “Ngasi muntu ayish’ihembwa nk’oku anakozire.”—1 Kr. 3:8; 4:1, 2. w22.11 buk. 3-4 cif. 5-6

Ene, Rhuli rhwacibonera oku obulebi bw’Ebibliya buli bwahikirizibwa. Abantu “b’amashanja ga ngasi lulimi” bali bayiga okuderha “olulimi lucîre” lw’okuli kw’Ebibliya. (Zak. 8:23; Sof. 3:9, NWT) Bantu 8 000 000 na kulusha b’omu bihugo 240 bali omw’ikubuliro lya Yehova, na ngasi mwaka, amakumi g’ebihumbi by’abantu bali babatizibwa. Cikone eby’obulagirire bwenene kulusha eyo mibalè, gali morhere g’ekiroho erhi “muntu muhyahya” abo banafunzi bahyahya bali baba nago. (Kl. 3:8-10) Bantu banji balesire olugenzi lubi, obuminya, akabôlo, n’okuzigira ecihugo cabo okurhalusire olugero. Obulebi buli omu Izaya 2:4 buli bwahikirizibwa; barhaciri ‘baciyigiriza okulwa amatumu [ivita].’ Rhuli rhwayerekana oku rhuli rhwakulikira obulongozi bwa Yezu Kristu, omu kucihangana okuyambala obumuntu buhyahya n’omu kurhabala abandi baje omw’ikubuliro lya Yehova. (Yn. 13:35) Bulya gurhi ebyo byoshi biri byahikirira? Bulya Yezu ali arhuha oburhabale rhulagirireko. w22.07 buk. 9 cif. 7-8

Omu mango rhuli rhwayegera Yehova kugerera isala, rhushinganine rhukayaka izala. Lubero n’oko, rhushinganine rhukayegera Yehova kugerera isala omu njira y’obukenge bwenene. Orhanye lugenda ebibonekerezi by’okusomeza Izaya, Ezekiyeli, Daniyeli, na Yowane babonaga. Byoshi biyerekine oku Yehova ali Mwami wa bushashe bunji bwenene. Izaya ‘abwine Nyakasane [Yehova, NWT] erhi atamîre oku ntebe yage ndîri y’obwami.’ (Iz. 6:1-3) Ezekiyeli abona Yehova atamire oku ngalè y’empingu, al’izungulusirwe n’“obulangashane . . . bwali buyosire nka mutirigongo.” (Eze. 1:26-28, Mashi Bible) Daniyeli abona “omushosi mulamu” ayambirhe emyambalo myeru, n’engulumira z’omuliro zakag’irhenga oku ntebe yage y’obwami. (Dan. 7:9, 10, Mashi Bible) Na Yowane abwine Yehova atamire oku ntebe yage yal’izungulusirwe n’akantu kali nka mutirigongo gwakag’ibonekana nk’ibuye ly’engulo ndarhi lihamagalwa emerodi. (Maf. 4:2-4) Erhi rhurhanya oku bukuze bunji bwa Yehova, rhunakengere oku, okumuyegera kugerera isala luli lukengwa bwenene n’oku rhushinganine rhukajira ntyo omu njira y’obukenge. w22.07 buk. 20 cif. 3

Mwe misole, Shetani ajira okwage koshi ly’amuhanza okujira amajambere g’ekiroho. Njira nguma akajiramwo ntyo kuli kukulerhera akarhinda omu bwenge lugenda nyigirizo nguma na nguma z’Ebibliya. Kwa lwiganyo, nkaba hali abanakubwire oku Nnâmahanga arhalemaga ebintu cikone byajire byahinduka-hinduka. Amango wali murho, nkaba orharhanyagya kw’ezo nyigirizo, cikone buno okola mukulu nkaba oli waziyigirizibwa ebwa masomo. Ebi abalimu bawe baderha lugenda ezo nyigirizo z’amageuzi byanabonekana nka bipatine n’obwenge binali by’okuli. Cikone nkaba barhasag’irhanya bwenene oku bintu birhuyemezize oku haba Omulemi. Okengere akanuni kali omu lwandiko lw’Emigani 18:17 kadesire ntya: “Orhangîderha aha ngombe ye bahâ n’olubanja, erhi owabo ayisha balushubiremwo.” Ahali h’okuyemera duba-duba oku ebi wayigirizibwe ebwa masomo biri by’okuli, oshinganine oyige bwinja enyigirizo ziri omu Bibliya, Kanwa ka Nnâmahanga n’omu bicapo birhu. w22.08 buk. 2 cif. 2; buk. 4 cif. 8

Rhuba rhulonzize rhukahugûkwa ebi rhusoma omu Kanwa ka Nnâmahanga. Erhi akaba rhurhahugûsirwi ebi rhusomire, rhurhakayunguka bwenene n’obusomi bwirhu. Kwa lwiganyo, rhuganirire enshambal za Yezu haguma na “mushamuka muguma w’ihano.” (Lk. 10:25-29, Mashi Bible) Erhi oyo mulume amudosa ebi al’ishinganine ajire ly’aba n’obuzine bw’ensiku n’amango, Yezu amurhabala ly’abona ishuzo omu Kanwa ka Nnâmahanga. Amudosa ntya: “Kurhi biyandisirwe omu marhegeko girhu? Kurhi oyumva nk’oli wagasoma?” Oyo mulume ahashire okuhâna ishuzo linja omu kugalukira ebi amandiko gadesire lugenda okuzigira Nnâmahanga n’okuzigira omulungu. (Lev. 19:18; Lush. 6:5) Cikone oyumve ebi adesire enyuma z’aho: “Owirhu ye nndi [omulungu wani ye ndi, NWT]?” Oyo mulume ayerekana oku arhal’ihugûsirwe bwinja ebi asomaga. N’enyanya z’oko, arhal’imanyire gurhi akakolesa bwinja ago mandiko omu kalamo kage. Rhuba rhulagirire oku burhabale bwa Yehova lyo rhuhugûkwa Amandiko. Co cirhumire rhwanamuhûna iroho lyage litagatifu lyo lirhurhabala rhusegeze obwenge kw’ebi rhuli rhwasoma, na buzinda rhwanamuhûna arhurhabale lyo rhukolesa ebi rhwasomaga omu kalamo kirhu. w23.02 buk. 9 cif. 4-5

Gurhi wamanyagamwo okuli?” Buzira karhinda, nkaba washuzize kw’er’idoso kanji-kanji. Eryo liri liguma ly’omu madoso marhanzi owirhu Muhamirizi wa Yehova arhudosa amango alonzize arhumanye bwinja. Rhunashagaluke okuyumva gurhi bene wirhu na bali birhu bamanyagamwo Yehova n’okumuzigira, rhunanashagaluke okubaganirira bulya gurhi rhuba rhuzigire okuba Bahamirizi ba Yehova. (Rm. 1:11) Ezo nganîro za ntyo zinarhukengeze bulya gurhi okuli kuba kwa bulagirire bwenene kuli rhwe. Kandi, zinazibuhye omuhigo gwirhu gw’‘okugendekera rhwashimba okuli,’ ko kuderha okugendekera rhwalama omu njira yakarhuma Yehova arhugisha n’okurhuyemera. Rhugwerhe birhumire binji birhushumya rhuzigire okuli. Ecirhumire c’obulagirire bwenene, rhuba rhuzigire Yehova Nnâmahanga, Nshoko y’okuli. Kugerera Akanwa kage, Bibliya, rhwahikire aha rhwamanya oku aba Mulemi ogala-byoshi w’empingu n’igulu cikone kandi oku aba Larha w’obuzigire w’omu mpingu orhushibirira.—1 Pt. 5:7. w22.08 buk. 14 cif. 1, 3

Entumwa Paolo yahîre bene wabo na bali babo omurhima bakayerekana obuzigire omu “kukola aminja.” (Hb. 10:24) Arhabire bene wabo na bali babo arhali kugerera enderho zage zone cikone na kugerera ebijiro byage. Kwa lwiganyo, erhi ababo bemezi b’omu Yudeya bahikirwa n’amazibu g’ishali, Paolo arhabire omu kubahêkera oburhabale. (Ebj. 11:27-30) Kobinali, ciru akaba Paolo al’igwerhe binji bya kujira omu mukolo gw’okuhubiri n’okuyigiriza, ngasi mango akag’ilonza obulyo bw’okurhabala abal’igwerhe bulagirire bulebe bw’omubiri. Omu kujira ntyo, abarhabala bayemera n’obwalagale oku Yehova abashibirira. Ene nalyo, erhi rhuhâna akasanzi kirhu, emisi yirhu, n’obuhashe bwirhu lyo rhurhabala abahikirwe n’obuhanya, nirhu rhunarhabale bene wirhu na bali birhu basêze obuyemere bwabo. Kandi rhwanajira ntyo omu kuhâna ngasi mango oburhabale bwirhu lyo rhulunga okuboko omukolo gw’omw’igulu lyoshi. Muli ezo njira n’ezindi, rhunarhabale bene wirhu na bali birhu bayemere oku nta mango Yehova akabalekerera. w22.08 buk. 24 cif. 14

Ebibliya ebamwo bulebi bunji bwenene bwahikirizibwe, bulebi buguma na buguma mulibo bwahikirizibwe erhi hagera amagana g’emyaka enyuma z’okuyandikwa kwabo. Ehistware eyerekine n’obwalagale oku obo bulebi bwahikirire. Oko kurhakarhusomeza bulya rhumanyire n’obwalagale oku Yehova ye wayandikisagya obulebi buba omu Bibliya. Orhanye oku bulebi bunji bwalebagwa lugenda okusherezibwa kw’evile ya mîra ya Babiloni. Kasanzi kalebe egarhi k’omwaka gwa 778 na 732 Embere za Kano Kasanzi Kirhu (E.K.K.K.), omulebi Izaya alongozibwa n’iroho litagatifu ly’aleba oku evile nzibu y’ago mango ya Babiloni yakagwasirwe. Ciru aderha oku omulume ohamagalwa Sirusi ye wakagwasire eyo vile anahugûla gurhi akajijiremwo ntyo. (Iz. 44:27–45:2) Kandi Izaya alebire oku eyo vile ya Babiloni buzinda yakasherezibwe na nta muntu wakacilamiremwo. (Iz. 13:19, 20) Evile ya Babiloni yagwarhwa n’Abamedi n’Abaperse omu mwaka gwa 539 Embere za Kano Kasanzi Kirhu (E.K.K.K.), n’aha eyo vile nnene bwenene yabaga hakola haba bigûka. w23.01 buk. 4 cif. 10

Yehova acishozire rhwe lyo rhuba baguma b’omu mulala gw’abakozi bage b’omw’igulu lyoshi. Olo luli lukengwa lwago-lwago lunanarhulerhere migisho minji! (Mk. 10:29, 30) Omw’igulu lyoshi, rhugwerhe bene wirhu na bali birhu baba bazigire Yehova akirhu bananajire okwabo koshi lyo balama kushimbana n’amakanuni gage. Olulimi lwirhu, enkomêdu zirhu, n’emyambalo yirhu byanaba biri lubero n’ebyabo, cikone rhunaciyumve rhubazigire ciru n’amango rhurhimanine nabo oburhangiriza. Rhunazigire bwenene okuba haguma nabo lyo rhukuza n’okuharamya Larha wirhu w’obuzigire w’omu mpingu. kandi rhushinganine rhube omu cinyabuguma haguma nabo. (Enna. 133:1) Hali amango barhurhabala okubarhula emizigo yirhu. (Rm. 15:1; Gl. 6:2) Kandi, banarhuhe omurhima lyo rhugendekera rhwaba n’obushiru omu mukolo gwa Yehova n’okuba n’ehali nyinja y’ekiroho. (Hb. 10:23-25) Orhanye gurhi rhwakaciyumvirhe erhi akaba rhurhal’igwerhe obulanzi bw’ecigamba cirhurhabala lyo rhugendekera rhwahagalika abashombanyi birhu rhweshi, ko kuderha Shetani Ibilisi n’igulu lyage libi. w22.09 buk. 2-3 cif. 3-4

Okucihasha kwanaba kuzibu amango rhuli rhwakolesa esite z’e Enternete z’okuganira na bantu banji. Erhi akaba rhurhabiri masu, rhwanamanyisa bantu banji bwenene mwanzi mulebe gw’ihwe buzira kulonza. N’enyuma z’okurhuma mwanzi mulebe kugerera ebyombo by’ecielektroniki, rhurhakacimanya gurhi gwakolesibwa erhi mazibu manganaci gwakalerha. Kandi, oborhere bw’okucihasha bunarhurhabale rhuhulike amango abashombanyi birhu bali bajira okwabo koshi lyo rhufulûla ebintu byakahira bene wirhu na bali birhu omu mazibu. Oko kwanarhuhikira amango abapolisi bali barhudosa amadoso omu cihugo omukolo gwirhu guhanzibwemwo goshi-goshi erhi bigabi bilebe byago. Muli ako kanga erhi omu kandi, rhwanakolesa akanuni k’Ebibliya kadesire oku ‘rhulange akanwa [kirhu] kugerera akantu k’okushweka akanwa.’ (Enna. 39:1, NWT) Rhushinganine rhube ba kulangalirwa n’abantu boshi, babe bantu b’omu mulala gwirhu, abîra birhu, bene wirhu na bali birhu, erhi bandi bantu. Na lyo rhuba bantu ba kulangalirwa, rhushinganine rhube n’oborhere bw’okucihasha. w22.09 buk. 13 cif. 16

Lyo rhuba n’omwishingo gw’okunali, rhugwasirwe rhukacilisa ebiryo by’ekiroho. Rhunaba rhubilagirireko. Co carhumaga Yezu aderha ntya: “Omuntu arhankalama n’omugati gwone, cikwone na ngasi luderho lurhenga ekanwa ka Nnâmahanga.” (Mt. 4:4, Mashi Bible) Co cirhumire, rhurhashinganini rhugeze ciru lusiku luguma buzira kucilisa ebiryo by’ekiroho kurhenga omu Bibliya, Kanwa ka Nnâmahanga. Bulya Yehova aba arhuzigire, arhuyeresire omu Bibliya ebi rhushinganine rhujire lyo rhuba n’omwishingo omu kalamo. Erhuyigirizize omuhigo gwage lugenda akalamo kirhu. Erhuyigirizize gurhi rhwakamuyegeramwo n’ebi rhushinganine rhujire ly’arhubabalira ebyaha birhu. Na kandi erhuyigirizize obulangalire bwinja bwenene arhulaganyize lugenda amango gayisha. (Yer. 29:11) Ezo nyigirizo z’okuli rhupata omu kuyiga Ebibliya zinayunjuze omwishingo omu murhima gwirhu! Ngasi mango erhi wakaciyumva ovunisire omurhima erhi mazibu g’akalamo garhuma, okageza kasanzi kanji oli wasoma Akanwa ka Yehova n’okukarhanyako bwenene. w22.10 buk. 7 cif. 4-6

Ebibliya egwerhe ecirhumire cinja c’okurhuha omurhima oku rhurhagendekeraga rhwabêra bingolo-ngolo erhi bantu barhagwerhi bumanye. Rhunabe n’obwenge omu kukolesa amakanuni g’Ebibliya omu kalamo kirhu. Rhunacibonere bunyi-bunyi gurhi ago makanuni garhurhabala rhuyake amazibu n’okurhôla emihigo y’obwenge. Kuli kwinja rhukalabiriza amajambere rhwamakajira muli oko. Erhi akaba rhukola rhugwerhe kasanzi kalebe rhuli rhwayiga Ebibliya n’okuja oku ntimanano, rhwanacidosa bulya gurhi rhurhasag’irhôla omuhigo gw’okucihâna emwa Yehova n’okubatizibwa. Akaba rhwabatizibwe, ka rhuli rhwajira amajambere lyo rhuba bahubiri na balimu binja? K’emihigo yirhu enayerekane oku rhuli rhwalongozibwa n’amakanuni g’Ebibliya? Ka rhunayerekane amorhere g’Ecikristu muli oku rhujirira abandi? Erhi rhwakabona oku rhugwasirwe rhujire empindulo, rhushinganine rhurhanye bwenene oku nyigirizo Yehova arhuyigiriza bulya zo ‘ziyengehya embula-bwenge ebe n’obumanye.’—Enna. 19:7, Mashi Bible. w22.10 buk. 20 cif. 8

Ezekiyeli acibwinire oku iroho litagatifu lya Nnâmahanga lijira buhashe bunji. Ebi Ezekiyeli abonaga omu cibonekerezi, byamurhabire ohugûkwa oku iroho litagatifu lya Nnâmahanga lyarhabire bamalahika b’obuhashe lyanakag’ilongoza amapine g’omutuga munene bwenene gw’olwiganyo gw’omu mpingu. (Eze. 1:21) Gurhi Ezekiyeli ajijire? Ayandika ebi abonaga mw’eco cibonekerezi. Adesire ntya: “Erhi mbona ebyo, nahirimira obusu.” Enyanya z’okusomerwa bwenene, Ezekiyeli ahirimira okw’idaho. (Eze. 1:28, Mashi Bible) Enyuma z’aho, ngasi mango erhi Ezekiyeli akarhanyize kw’eco cibonekerezi c’okusomeza, akazibuhize obulangalire bwage oku kugerera oburhabale bw’iroho litagatifu lya Nnâmahanga, akahikirizize omukolo gwage gw’amahubiri. Yehova arhegeka Ezekiyeli ntya: “Mwene-omuntu, yimuka, hali ebi nakubwira.” Ezo nderho nʼiroho lya Nnâmahanga byahire Ezekiyeli emisi yʼekandalala alʼilagirireko lyʼayimuka. (Eze. 2:1, 2, Mashi Bible) Enyuma z’aho, n’omu mukolo gwage goshi gw’amahubiri, Ezekiyeli akalongozibwa n’“okuboko” kwa Nnâmahanga, k’okuderha iroho lyage litagatifu.—Eze. 3:22; 8:1; 33:22; 37:1; 40:1. w22.11 buk. 4 cif. 7-8

Omulebi Izaya aganirire Yehova nka mwigiriza oyumvirhiza oli walambagira enyuma z’abanafunzi bage n’okubalongoza omu kubayeresa enjira bageramwo. Ene, rhunayumve izu lya Nnâmahanga enyuma zirhu. Gurhi rhuliyumvamwo? Enderho za Nnâmahanga zalongozibagwa n’iroho litagatifu zayandisirwe omu Bibliya mira bwenene, kasanzi ka mira enyuma zirhu. Co cirhumire amango rhuli rhwasoma Ebibliya, rhunabe nk’abali bayumvirhiza izu lya Nnâmahanga liri lyaderha enyuma zirhu. (Iz. 51:4) Gurhi rhwakayunguka bwenene n’obulongozi Yehova arhuha? Olole bintu bibirhi Izaya aganirire. Burhangiriza adesire erhi, “eyi yo njira.” Bwa kabirhi adesire erhi, “muyishimbe.” Rhurhashinganini rhumanye kone eyo “njira.” Kandi rhushinganine ‘rhuyishimbe.’ Kugerera Akanwa ka Yehova n’amahugûlo rhuhabwa n’ikubuliro lyage, rhunayige ebi Yehova alonzize rhujire. Kandi, rhunayige gurhi rhwakakolesamwo ebi rhuyigirizibwa. Lyo rhulembera n’omwishingo omu mukolo gwa Yehova, rhushinganine rhuyige n’okukolesa omu kalamo kirhu ebi rhuli rhwayigirizibwa. Erhi rhwakajira ntyo, lyone rhwakayemera n’obwalagale oku Yehova arhugisha. w22.11 buk. 11 cif. 10-11

Kasanzi kasungunu enyuma z’okufâ kw’entumwa nyinji za Yezu, Abakristu b’obunywesi baja omu cigamba c’Ecikristu. (Mt. 13:24-27, 37-39) Bakayigiriza ‘ebibi mpu lyo babona abaganda babashimba.’ (Ebj. 20:30) Kantu kaguma omu bintu “bibi” abo Bakristu b’obunywesi bahikire aha barhondera okuyigiriza kwali kuderha oku Kristu arhahânaga omubiri gwage “nterekêro liguma lyône mpu azaze ebyaha bya bantu banji,” nk’oku Ebibliya enadesire, cikone bakayigiriza oku enterekêro yage egwasirwe ekahânwa kanji-kanji. (Hb. 9:27, 28) Ene, bantu banji baba bayemire ezo nyigirizo z’obunywesi. Banarhimanane omu makanisa gabo ngasi mugobe, ciru hali n’amango bajira ntyo ngasi lusiku, lyo bakengera enterekêro ya Yezu ehamagalwa omu Katolika “Nterekêro y’Emisa.” Abandi bantu b’omu gandi madîni barhakengera olufû lwa Yezu kanji-kanji, cikone bantu banji ba mw’ago madîni barhaba bahugûsirwe bwinja ebi enterekêro ya Yezu yahikirizize. w23.01 buk. 21 cif. 5

Omu mango g’Oburhegesi bwa Yezu bw’Emyaka Cihumbi, abantu bafîre bayish’ifûlwa n’abantu barhumikira Yehova bayish’ihikira aha baba bimana. Enyuma z’irhangulo lizinda, abantu Yehova abona oku bali bashinganyanya “bo balya igulu, bo banalibêrakwo ensiku n’amango.” (Enna. 37:10, 11, 29) Eby’okushagalusa, “omushombanyi muzinda washerezibwa luli lufû.” (1 Kr. 15:26, Mashi Bible) Obo bulangalire bwanarhurhabala rhugendekere rhwabêra bishwekerezi muli zino nsiku nzinda z’amazibu. Cikone lyo rhusimisa Yehova, arhali irala ly’okulama ensiku n’amango lyone lishinganine lirhushumye. Obuzigire bunji rhujirako Yehova na Yezu co cirhumire c’obulagirire bwenene cirhushumya rhubêre bishwekerezi kulibo. (2 Kr. 5:14, 15) Obo buzigire bunarhushumye rhuyige olwiganyo lwabo n’okuganirira abandi obulangalire bwirhu. (Rm. 10:13-15) Erhi rhuyiga okurhaba ba kucikaliza n’okuba bahanyi, rhunabe bantu Yehova aba alonzize babe bîra bage ensiku n’amango. w22.12 buk. 7 cif. 15-16

Amango rhuli rhwalibuzibwa, rhwanaheza bintu binji birhuma rhwaba n’omurhûla. Rhwanakaciyumva rhuhangayisire omu kuyoboha gurhi byaba buzinda. Okuciyumva ntyo kurhali kubi. Cikone, rhugwasirwe rhube masu. Yezu ayerekine oku okulibuzibwa kwakarhumire abanafunzi bage basarhala. (Yn. 16:1, 2) Ciru akaba Yezu arhubwizire oku rhwalibuzibwa, kandi arhuyemezize n’obwalagale oku rhwanahash’ibêra bishwekerezi. (Yn. 15:20; 16:33) Amango omukolo gwirhu guhanzibwe goshi-goshi erhi bigabi bilebe byago, rhwanahâbwa obulongozi kurhenga oku biro by’etawi na kugerera abagula. Obo bulongozi buba bwa kurhulanga, bwa kurhurhabala lyo rhugendekera rhwapata ebiryo by’ekiroho, n’okurhurhabala rhugendekere rhwajira omukolo gw’amahubiri nk’oku byakanahashikana. Ojire okwawe koshi ly’orhumikira obo bulongozi. (Yk. 3:17) Kandi, erhi abantu barhashinganini okumanya emyanzi eyerekire bene wirhu na bali birhu bakakuyenja, orhahiraga okabafululira eyo myanzi.—Muh. 3:7. w22.12 buk. 20-21 cif. 14-16

Ene, Yezu agendekire alongoza abanafunzi bage omu mango bali bahubiri omwanzi gw’Obwami bwa Nnâmahanga omw’igulu lyoshi. Ajijire ecage cigabi. Kugerera ikubuliro lya Yehova, Yezu ali arhukomereza gurhi rhwakahubiri anali arhuha ebikolanwa rhulagirireko lyo rhuyalagaza omwanzi mwinja. (Mt. 28:18-20) Rhunajire ecirhu cigabi omu kuba n’obushiru omu mukolo gwirhu gw’okuhubiri n’okuyigiriza n’omu kugendekera rhwaba masu amango rhuli rhwalinda oku Yehova alerha obuzinda bw’er’igulu. Erhi rhwakakolesa ihano liri omu Abahabraniya 6:11, 12, Mashi Bible, rhwanagwarha kwa buzibu-zibu obulangalire bwirhu “kuhika oku buzinda.” Yehova ahizireho olusiku n’ensa alerha obuzinda bw’er’igulu lya Shetani. Amango olo lusiku lwahika, Yehova ahikiriza obulebi boshi ayandikisize omu Kanwa kage. Nkaba hali amango rhwakarhanya oku obuzinda bw’er’igulu burhayishiri duba. Cikone, olusiku lwa Yehova lwayisha “buzira kulegama!” (Hab. 2:3) Co cirhumire, rhuhige oku ‘Nyamuzinda yene rhwalola kwo,’ rhunagendekere ‘okulangalira Nnâmahanga [wirhu] orhuciza.’—Mik. 7:7, Mashi Bible. w23.02 buk. 19 cif. 15-16

Omuhigo gw’omuntu osoka oku ntondo kuba kuhika oku busongerwe bwayo. Cikone omu njira haba hantu hanji arhang’iyimanga n’okushagalukira ebintu binja abwine. Ko n’oko, ngasi mango nawe okaciha akasanzi k’okurhanya lugenda gurhi Yehova ali akurhabalamwo ly’obêrwa ciru akaba oli walembera amazibu. Oku buzinda bwa ngasi mulegerege okacidosa ntya: ‘Gurhi Yehova anangishiremwo omu lusiku lw’ene? Ciru akaba nciri nalwisa mazibu malebe, gurhi Yehova ali antabalamwo lyo ngalembera?’ Ocihangane ohugûkwe ciru kantu kaguma kone Yehova ajijire ly’akurhabala obêrwe. Kobinali, nkaba wanaba oli wasalira ly’amarhangulo gawe gahwa. (Fl. 4:6) Cikone kandi rhushinganine rhukabona emigisho rhugwerhe ciru na muli gano mango. Yehova alaganyize oku arhuha emisi n’okurhurhabala lyo rhulembera. Co cirhumire, ensiku zoshi okavuga omunkwa okubona Yehova ali akurhabala. Erhi wakajira ntyo, wanabona gurhi Yehova ali akurhabalamwo ly’obêrwa, ciru n’omu mango oli omu marhangulo.—Murh. 41:51, 52. w23.01 buk. 19 cif. 17-18

Ocidose ntya: ‘K’enjira yani y’akalamo eyerekine oku mpugûsirwe oku rhuyegerire bwenene obuzinda bw’er’igulu ligalugalu? K’emihigo yani lugenda amasomo n’akazi enayerekane oku okukolera Yehova ko kantu k’obulagirire bwenene omu kalamo kani? Ka ngwerhe obuyemere oku Yehova ampikirigiza amalagirire gani n’ag’omulala gwani?’ Orhanye gurhi Yehova ashagaluka bwenene erhi abona rhuli rhwacihangana lyo ngasi kantu rhujira omu kalamo kirhu kapatana n’obulonza bwage. (Mt. 6:25-27, 33; Fl. 4:12, 13) Ngasi mango rhushinganine rhukalabiriza entanya zirhu n’okujira ngasi mpindulo zihûnyirwe. Paolo abwizire Abakorinti ntya: “Mubage nka mwagerereza mulole erhi munali omu buyemere; mucirhangule mwêne.” (2 Kr. 13:5) Co cirhumire, rhushinganine rhugendekere rhwajira buhyahya enjira yirhu y’okurhanya omu kusoma Akanwa ka Nnâmahanga, okuciyigiriza okurhanya nk’oku arhanya, n’okujira ngasi kantu kahûnyirwe lyo rhulama kushimbana n’obulonza bwage.—1 Kr. 2:14-16. w23.01 buk. 9-10 cif. 5-6