Mwezi gwa 5

Nnâmahanga arhacikaga Abakristu b’omu myaka igana mirhanzi amango ishali lidarhi lyabaga “omu igulu lyoshi.” Buzira karhinda, ebirhwe by’emilala byakag’iyoboha lugenda gurhi balisamwo abantu b’omulala gwabo. Na gurhigi lugenda emisole yakag’ipanga okujira binji omu mukolo gw’amahubiri? Nkaba bacidosize erhi balinde er’ishali lirhang’ihwa bagal’ijira ntyo. Abakristu bakag’ilama kushimbana na ngasi kanga balimwo. Bagendekire bahubiri omu ngasi njira bakanahashire, banagendekera bashagalukira okushangira ebintu by’omubiri bagwerhe haguma n’ababo bemezi b’omu Yudeya. (Ebj. 11:29, 30) Abahâbirwe oburhabale bw’ebintu by’obulagirire bacibonera okuboko kwa Yehova. (Mt. 6:31-33) Bagwasirwe babe baciyumvirhe bayegerire bwenene ababo Bakristu babahâga oburhabale. N’abahânyire oburhabale erhi kandi abashangire oku mukolo gw’okuhâna oburhabale babire n’omwishingo gurhenga omu kuhâna.​—Ebj. 20:35. w23.04 buk. 16 cif. 12-13.

Hali amango Yehova ashuza amasala g’abakozi bage omu kushumya abantu barhali bemezi lyo babarhabala. Kwa lwiganyo, Yehova ashumize Mwami Artazerzesi ayemerere Nehemiya agaluke e Yeruzalemu ly’arhabala omu kucib’iyubaka olo lugo. (Neh. 2:3-6) Ene nalyo, Yehova anashumya ciru n’abantu barhamuharamya lyo barhurhabala amango rhuli omu bulagirire. Kanji-kanji amasala girhu garhashuzibwa omu njira y’okurhangaza. Cikone amashuzo rhupata ganabe go rhunalagirireko lyo rhubêra bishwekerezi kuli Larha wirhu w’omu mpingu. Co cirhumire, okaba masu ly’omanya gurhi Yehova ashuzize amasala gawe. Kasanzi oku kandi, rhukarhanya lugenda gurhi Yehova ali ashuzamwo amasala girhu. (Enna. 66:19, 20) Rhunayerekane obuyemere arhali omu kusalira Yehova kone cikone n’omu kuyemera ishuzo lyage oku masala girhu ciru akarhuha lyo omu njira nci.​—Hb. 11:6. w23.05 buk. 12 cif. 13, 15; buk. 13 cif. 16

Erhi rhucihâna emwa Yehova, rhwajijire eciragane c’okumuharamya n’okujira obulonza bwage. Rhugwasirwe rhuhikirize eco ciragane. Okulama kushimbana n’eciragane cirhu c’okukolera Yehova gurhaba muzigo muzirho. Rhudesire ntyo bulya Yehova arhulemire lyo rhujira obulonza bwage. (Maf. 4:11) Arhuhiziremwo obulagirire bw’ekiroho anarhulemire oku nshusho yage. Co cirhumire, rhunahashe okumuyegera rhunanashagalukire okujira obulonza bwage. Na kandi, erhi rhujira obulonza bwa Nnâmahanga n’okukulikira Omugala, ‘rhunabone irhamuko’ ly’obuzine bwirhu. (Mt. 11:28-30) Co cirhumire ozibuhye obuzigire bwawe kuli Yehova omu kurhanya bwenene oku bintu binja byoshi akujirire n’oku migisho akuha omu mango gayisha. Oku obuzigire bwawe kuli Nnâmahanga bwagendekera bwayushuka, ko kwanagendekera kwaba kulembu kuli we okumurhumikira. (1 Yn. 5:3) Yezu ahashire okujira obulonza bwa Yehova Nnâmahanga bulya akag’imuhûna oburhabale anagendekera asegeza obwenge oku luhembo akahabirwe. (Hb. 5:7; 12:2) Aka Yezu, okahûna Yehova emisi onagendekere wabîka obulangalire bw’obuzine bw’ensiku n’amango omu bwenge bwawe. w23.08 buk. 27-28 cif. 4-5

Rhweshi rhunashagalukire abantu baba ba kulembera. Bulya gurhi rhushagalukira abantu ba ntyo? Rhunakenge abantu balinda kantu kalebe buzira kuvunika omurhima. Rhunashagaluke erhi abandi barhulembera amango rhwamajira amagosa. Kandi rhushagalusire okubona mwalimu wirhu w’Ebibliya arhulembire amango kwali kuzibu kuli rhwe okuyiga nyigirizo ndebe z’Ebibliya, okuziyemera, erhi okuzikolesa omu kalamo kirhu. N’akantu k’obulagirire, rhuvuzire omunkwa bwenene okubona Yehova Nnâmahanga anarhulembere! Ciru akaba rhunashagalukire abantu balembera, rhwanabona oku ensiku zoshi kurhaba kulembu kuli rhwe okulembera. Kwa lwiganyo, kwanaba kuzibu kuli rhwe okugendekera rhwarhulirira erhi akaba emituga elundamine omw’ibarabara, ci bwenene erhi akaba rhwacerirwe. Nkaba rhwanaba burhe bwenene erhi abandi bakarhugayisa. Kandi, hali amango kwakaba kuzibu kuli rhwe okugendekera rhwalinda igulu lihyahya Yehova arhulaganyize. Ciru akaba ntyo, mw’ako kanga koshi, rhushinganine rhube ba kulembera bwenene. w23.08 buk. 20 cif. 1-2

Yehova abwizire Gideoni oku anyihye oku basoda bage banji bagaluke emwababwe. Nkaba akarhanyize ntya: ‘K’eyi mpindulo kobinali eri ya bulagirire? Ka yantabala?’ Ciru akaba ntyo, Gideoni arhumikire. Ene, abagula banayige olwiganyo lwa Gideoni omu kurhumikira erhi ikubuliro lyakabahûna bajire mpindulo ndebe. (Hb. 13:17) Gideoni arhumikire Yehova ciru n’amango al’iyobohire n’amango omukolo gwage gwakamudwirhire amazibu. (Bac. 9:17) Enyuma za Yehova okumuzibuhya, Gideoni ayemera n’obwalagale oku Yehova akamurhabire ly’alanga abakozi bage. Abagula balamire omu maeneo omukolo gwirhu guhanzibwemwo banayige olwiganyo lwa Gideoni. Banalongôze n’oburhwali entimanano n’omukolo gw’amahubiri ciru bakabayobohya oku babashweka, ciru bakabadosa amadoso, ciru bakaheza omukolo gwabo erhi kukolerwa n’obuminya. Omu mango g’amalibuko madarhi, abagula bayish’iba balagirire oku burhwali lyo barhumikira obulongozi bayish’ihâbwa ciru akaba okukulikira obo bulongozi kwabalerhera amazibu. w23.06 buk. 5-6 cif. 12-13

Yehova ayandikisize ebijiro binja bya Kuhani Mukulu Yehoyada lyo birhuyigiriza. (Rm. 15:4) N’erhi Yehoyada afâ, ahâbwa olukengwa lwago-lwago lw’okubishwa “omu lugo lwa Daudi haguma n’abami, kulya kuba ajizire ebinja omu Israheli n’embere za Nyamubâho n’omu nyumpa yage.” (2 Nga. 24:15, 16) Omwanzi guganirire Yehoyada gwanarhurhabala rhweshi lyo rhuba n’oboba kuli Nnâmahanga. Abagula Bakristu banayiga olwiganyo lwa Yehoyada omu kugendekera baba masu n’omu kulanga obuso bwa Nnâmahanga n’obwishwekerezi. (Ebj. 20:28) Kugerera olwiganyo lwa Yehoyada, abakola bashosi banaciyigiriza oku erhi bakayoboha Yehova n’okugendekera babêra bishwekerezi, anabakolesa ly’ahikiriza omuhigo gwage. Abaciri misole banalola gurhi Yehova ajirire Yehoyada na kandi banayiga olwiganyo lwa Yehova omu kujirira abantu bishwekerezi bakola bashosi n’obukenge, ci bwenene balya bakola bagwerhe myaka minji bali bakolera Yehova n’obwishwekerezi. (Mig. 16:31) Lekagi rhweshi rhukalunga okuboko “abali balongoza” omu kubakenga.​—Hb. 13:17, NWT. w23.06 buk. 17 cif. 14-15

Oku ntimanano, okakolesa oburhimanya ly’ohiga kanga wahira okuboko enyanya ly’ohâna ishuzo. Erhi rhwakaheba okuboko enyanya kanji bwenene, rhwanajira oli walongoza aciyumve nka rhumusezize arhuhe obulyo bw’okushuza kanji-kanji ciru akaba abandi barhacihâbwa obulyo bw’okushuza. Okujira ntyo kwanarhuma abandi bavunika omurhima banaleke okuhira okuboko enyanya. (Muh. 3:7) Erhi akaba bahubiri banji banahire okuboko enyanya omu mango g’ifunzo, rhurhakaba n’obulyo bw’okushuza kanji-kanji nk’oku rhwakalonzize. Hali amango oli walongoza akayabirwa okuha abantu boshi obulyo bw’okushuza. Oko kwanavuna omurhima, cikone rhurhashinganini rhugaye amango rhurhahâbirwe obulyo bw’okushuza. (Muh. 7:9) Erhi akaba birhahashikini ohâne amashuzo kanji-kanji nk’oku wal’ilonzize, bulya gurhi orhakayumvirhiza bwinja-bwinja amashuzo g’abandi n’enyuma z’entimanano obavuge omunkwa oku mashuzo gabo? Okuvuga bene winyu na bali binyu omunkwa kwanabaha omurhima nk’oku bakanahâbirwe omurhima kugerera amashuzo wakanahânyire. w23.04 buk. 23-24 cif. 14-16

Okayiga Akanwa ka Nnâmahanga n’okukarhanyako bwenene. Nka kula omurhi gubêra gusêzire erhi gwakaba gugwisire emizi bwenene omw’idaho, nirhu rhurhakadundagana erhi akaba obuyemere bwirhu bugwisire emizi bwenene omu Kanwa ka Nnâmahanga. Oku omurhi gugendekera gwakula, ko n’emizi yago egendekera yasêra omw’idaho bwenene n’okulandira bwenene. Erhi rhuyiga n’okurhanya bwenene, rhunaseze obuyemere bwirhu rhunanayemere n’obwalagale oku enjira za Nnâmahanga ziba nyinja bwenene. (Kl. 2:6, 7) Orhanye lugenda gurhi obulongozi bwa Yehova, amahano gage, n’obulanzi bwage byarhabire abakozi bage omu mango ga mîra. Kwa lwiganyo, Ezekiyeli asegize obwenge bwenene kw’ebi akag’ibona omu cibonekerezi erhi malahika aba ali apima bwinja-bwinja ehekalu. Eco cibonekerezi cazibuhize Ezekiyeli, cinarhuhire amasomo gakarhurhabala lugenda gurhi rhwakalungamwo okuboko amakanuni ga Yehova okubiyerekire enterekêro ecîre. (Eze. 40:1-4; 43:10-12) Kandi rhunayunguke erhi rhwakaciha akasanzi k’okuyiga n’okurhanya bwenene oku nyigirizo nzibu z’omu Kanwa ka Nnâmahanga. Rhwanaba n’omurhima guzibuhire omu kulangalira Yehova loshi-loshi.​—Enna. 112:7. w23.07 buk. 18 cif. 15-16

Ebibliya erimw’enyiganyo nyinja abalume baciri misole bakayiga. Abo balume b’omu mango ga mîra bal’izigire Nnâmahanga banashibirira abakozi bage omu njira ziri lubero. Nawe wanabona enyiganyo nyinja egarhi k’abalume Bakristu bakuzire kiroho b’omu mulala gwawe n’omu cigamba cinyu. (Hb. 13:7) Na kandi ogwerhe olwiganyo lwimana lwa Yezu Kristu wakayiga. (1 Pt. 2:21) Amango oli wayiga bwinjinja ezo nyiganyo, okarhanya oku morhere gabo minja. (Hb. 12:1, 2) Buzinda, ohige oku wakayigamwo olwiganyo lw’abo balume. Omuntu ogwerhe obuhashe bw’okurhanya arhajira ebintu duba-duba cikone anarhanye bwinja-bwinja embere ahige ebi ajira. Co cirhumire, ojire okwawe koshi ly’oba n’obo buhashe n’okubulanga. Burhangiriza, oyige amakanuni g’Ebibliya n’okurhanya lugenda bulya gurhi gaba ga kurhulerhera obunguke. Buzinda, okolese ago makanuni lyo gakurhabala orhôle emihigo yakashagalusa Yehova. (Enna. 119:9) Oko ko kwakakurhabala bwenene ly’oba mulume Mukristu okuzire kiroho.​—Mig. 2:11, 12; Hb. 5:14. w23.12 buk. 24-25 cif. 4-5

Ababusi banahash’iyigiriza abana babo gurhi bakashuzamwo omu njira y’obutûdu erhi obwemere bwabo bwakahagalikwa. (Yk. 3:13) Babusi baguma na baguma baba bapanzire ebigabi by’okucikomereza omu nterekêro yabo y’omulala. Banaganirire amadoso abana babo bakadosibwa ebwa masomo, n’okujira eonyesho lugenda gurhi gakashuzibwamwo, bananayigirize abana babo gurhi bakaderha omu njira nyinja na ya butûdu. Ebigabi by’okucikomereza byanarhabala Abakristu baciyemeze n’obwalagale bulya gurhi baba bayemire bintu bilebe n’okumanya gurhi bakahugûliramwo abandi obwemere bwabo. Ecigabi cidesire “Amadoso Emisole Ecidosa” ciri oku jw.org cirimwo amakaratasi emisole yakayandikirako. Ago makaratasi garheganyizibwe lyo garhabala emisole ezibuhye obwemere bwabo n’okurheganya amashuzo omu nderho zabo bonene. Okuyiga ebyo bigabi omu mulala, kwanarhurhabala rhweshi rhumanye gurhi rhwakahaliramwo obuyemere bwirhu omu njira nyinja, na ya butûdu. w23.09 buk. 16 cif. 10; buk. 18 cif. 15-16

Ka hali amango wacihirireho omuhigo gw’ekiroho cikone wayabirwa okuguhikira? Akaba ntyo, orhali wene. Kwa lwiganyo, Philip al’ilonzize okujira amasala gage gabe minja bwenene n’okukasalira ngasi mango, cikone akayabirwa okuba n’akasanzi k’okusalira. Erika al’igwerhe omuhigo gw’okukahika embere oku ntimanano y’amahubiri; ciru akaba ntyo, agendekera akacerehwa hofi oku ngasi ntimanano. Erhi akaba hali omuhigo gw’ekiroho wacihirireho cikone orhaciguhikira, orhavunikaga omurhima. Ciru n’okuhikira omuhigo musungunu kanji-kanji kunahûne akasanzi n’obushiru bunji. Okubona oku olonzize okuhikira omuhigo gwawe kuyerekine oku onabone obwîra bwawe haguma na Yehova oku buli bwa bulagirire n’oku olonzize omukolere n’obuhashe bwawe boshi. Yehova anashagalukire obushiru bwawe. Kobinali, arhakakuhûna ojire ebirhalusire obuhashe bwawe. (Enna. 103:14; Mik. 6:8) Cikone oshinganine ocihirireho omuhigo gw’olugero, kushimbana n’akanga kawe. w23.05 buk. 26 cif. 1-2

Abantu b’oburhwali banayoboha, cikone barhaleka obo boba burhume barhajira ebintu binja. Daniyeli gwali musole gwa burhwali bwenene. Ayizire amandishi g’abalebi ba Nnâmahanga, kuhiramwo n’obulebi bwa Yeremiya. Kugerera ebyo Daniyeli ayigaga, ahikira aha ahugûkwa oku akasanzi kalîri k’okuhêkwa mpira kw’Abayahudi e Babiloni kali hofi kahwe. (Dan. 9:2) Okubona okuhikirizibwa kw’obulebi bw’Ebibliya kwasezize obulangalire bwa Daniyeli muli Yehova, n’abantu bagwerhe obulangalire busêzire muli Nnâmahanga banaba n’oburhwali bwago-bwago. (Oshushanye n’Abaroma 8:32, 37-39.) N’akantu k’obulagirire bwenene, Daniyeli akag’iyegera Ishe w’omu mpingu kanji-kanji kugerera isala. (Dan. 6:10) Akag’ihungama ebyaha byage emwa Yehova n’okumubwira oku akag’iciyumva. Kandi Daniyeli akag’ihûna Yehova oburhabale. (Dan. 9:4, 5, 19) Daniyeli ali muntu akirhu, co cirhumire arhaburhanagwa oburhwali. Lubero n’oko, okuyiga, okusalira, n’okulangalira Yehova ko kwamurhabire abe n’obo borhere. w23.08 buk. 2 cif. 4; buk. 4 cif. 7

Erhi rhurhumikira abarhegesi barhukulire, oko kunarhulerhere obunguke n’okubulerhera abandi. Omu njira nci? Rhurhahâbwa obuhane abarharhumikira bahâbwa. (Rm. 13:1, 4) Okurhumikira kwirhu kwanarhuma abarhegesi bashanja entanya bajira lugenda Abahamirizi ba Yehova boshi. Kwa lwiganyo, hakola hali myaka minji omu cihugo c’e Nigéria, abasoda bajaga omu Nyumpa y’Obwami amango g’entimanano y’ecigamba, bali balonza abakag’ilahira okulipa amatakse. Cikone omukulu w’abo basoda ababwira oku bahuluke, omu kuderha erhi: “Abahamirizi ba Yehova barhahanza abantu okulipa amatakse.” Ngasi mango erhi orhumikira onarhume abantu ba Yehova baba n’irenge linja, er’irenge nkaba lusiku luguma lyanalanga abinyu bemezi. w23.10 buk. 9 cif. 13

Bakozi ba Yehova baguma na baguma bakola bagwerhe kasanzi kanji bali balinda obuzinda bw’er’igulu. Oku ntanya za bene bantu, okuhikirizibwa kw’eciragane ca Nnâmahanga kwanabonekena nka kulegamire. Yehova ayerekine oku amanyire oku abantu banaciyumve ntyo erhi ayemeza n’obwalagale omulebi Habakuki ntya: ‘Ebyo nkufulûlîre amango byabâmwo garhacihika, cikwone byayish’iyalagala omu mango gabyo. Obilinde kwone onabilembere ciru wankabona nka bilegamire: ebi ndesire byayisha buzira kulegama!’ (Hab. 2:3) Ka Nnâmahanga ayemezize Habakuki ntyo n’obwalagale oku bunguke bwage yene? Erhi ka hali ebi enderho zage zihugwîre kuli rhwe ene? Omu kulongozibwa n’iroho litagatifu, entumwa Paolo yakolesize ezo nderho lugenda Abakristu bali balindirira igulu lihyahya. (Hb. 10:37) Kobinali, rhwanayemera n’obwalagale oku ciru obucunguke rhulaganyizibwe bwakabonekana nka bulegamire, ‘bwayisha buzira kulegama!’ w23.04 buk. 30 cif. 16

Abaisraheli balahire okuyemera ebintu byal’iyerekine n’obwalagale oku Yehova ye wal’ihizireho Musa ly’abalongoza. (Mib. 14:10, 11) Kanji-kanji balahira okuyemera oku Yehova ye wakag’ikolesa Musa ly’abalongoza. Enyanya z’oko, Yehova arhabayemereraga okuja omu Cihugo c’Amalaganyo. (Mib. 14:30) Cikone, hali Baisraheli balebe bakulikire obulongozi bwa Yehova. Kwa lwiganyo, Yehova adesire ntya: ‘Kalebu . . . ayosire acîshwekire kuli nie.’ (Mib. 14:24) Nnâmahanga ahembire Kalebu, anamuha ciru e eneo nyinja al’icishozire omu cihugo c’e Kanani. (Yoz. 14:12-14) Iburha lyakulikiraga ly’Abaisraheli nalyo lyayerekine olwiganyo lwinja omu kukulikira obulongozi bwa Yehova. Erhi Yozwe ahirwaho ly’alongoza Abaisraheli ahali ha Musa, “bâmukenga . . . omu kalamo kage mwoshi.” (Yoz. 4:14, Mashi Bible) Oko kwarhuma Yehova abagisha omu kubahisa omu cihugo al’ibalaganyize.​—Yoz. 21:43, 44. w24.02 buk. 21 cif. 6-7

Nk’oku munganga akamanya myanzi milebe lugenda amagala girhu n’omurhima gwirhu amango ali alabiriza gurhi omuko guli gwatera-tera omu njingo y’ecigasha cirhu, rhwanamanya kunganaci obuzigire bwirhu kuli Nnâmahanga busêzire omu kulabiriza oku obuzigire bwirhu buyosire oku bandi. Erhi rhwakabona oku obuzigire bwirhu kuli bene wirhu buli bwanyiha omu njira ndebe, nkaba oko kwanayerekana oku obuzigire bwirhu kuli Nnâmahanga nabo buli bwanyiha. Cikone erhi ngasi mango rhwakakayereka bene wirhu obuzigire, ako kali kantu kayerekana oku obuzigire bwirhu kuli Nnâmahanga busêzire. Erhi akaba obuzigire bwirhu kuli bene wirhu na bali birhu buli bwanyiha, rhwanaba rhugwerhe amazibu bwenene. Bulya gurhi? Bulya oko kwanaba kuyerekine oku ehali yirhu y’ekiroho eri omu mazibu. Entumwa Yowane yahugwîre ntyo n’obwalagale erhi erhukengeza ntya: “Orhazigira mwene wabo adwirhe abona, ntakwo ankazigira Nyamuzinda arhabona.” (1 Yn. 4:20) Isomo lihi rhuyizire? Erhi ‘rhwakakazigirana’ lyone Yehova akarhushagalukira.​—1 Yn. 4:7-9, 11. w23.11 buk. 8 cif. 3; buk. 9 cif. 5-6

Amango Mwami Yowasi aciri musole, arhôzire omuhigo mwinja. Bulya arhal’igwerhe ishe, akulikira obulongozi ahâbagwa na Yehoyada, Kuhani Mukulu mwishwekerezi. Oyo kuhani ayigiriza Yowasi nka mwana wage ye nnene. Enyanya z’oko, Yowasi ayerekana obwenge omu kuhiga okulongoza omu nterekêro ecîre n’omu kukolera Yehova. Ciru Yowasi ajira emipango ly’ehekalu ya Yehova elumulwa. (2 Nga. 24:1, 2, 4, 13, 14) Erhi akaba oli wayigirizibwa okuzigira Yehova n’okulama kushimbana n’amakanuni gage, oli wahâbwa engalo y’engulo ndarhi. (Mig. 2:1, 10-12) Ababusi bawe banakukomereza omu njira nyinji. Erhi wakakakolesa obulongozi buyimangire oku Mandiko oli wahâbwa, wanashagalusa ababusi bawe. N’akantu k’obulagirire bwenene, wanashagalusa Nnâmahanga na kandi wanajira obwîra bwagendekera ensiku zoshi haguma naye. (Mig. 22:6; 23:15, 24) K’oko kurhakuhîri ecirhumire cinja c’okuyiga olwiganyo lwa Yowasi amango aciri musole? w23.09 buk. 8-9 cif. 3-5

Yehova arhulaganyize oku ayumvirhiza amasala girhu. Nnâmahanga wirhu aba azigire abakozi bage bishwekerezi, co cirhumire arhakabula buyumvirhiza amasala gabo. (Enna. 10:17; 37:28) Cikone, oko kurhali kuderha oku arhuha ngasi byoshi rhumuhûnyire. Nkaba rhushinganine rhulinde igulu lihyahya lyo rhuhâbwa bintu biguma na biguma rhumuhûna. Yehova analole erhi amasala girhu gapatine n’omuhigo gwage. (Iz. 55:8, 9) Cigabi ciguma c’ogo muhigo cihiziremwo okuyunjuza igulu abalume n’abakazi bagwerhe omwishingo n’ecinyabuguma balongozibwe naye. Cikone Shetani adesire oku bene bantu banaba n’akalamo kinja bwenene erhi bakacilongoza bone. (Murh. 3:1-5) Yehova alesire bene bantu bone bacilongoze ly’ayerekana oku ebi Shetani adesire biri bya bunywesi. Cikone, okucilongoza kw’abantu kwadwirhe mazibu manji rhuli rhwabuganana nago ene. (Muh. 8:9) Rhuhugûsirwe oku Yehova arharhenzeho ago mazibu goshi mwa kano kasanzi. w23.11 buk. 21 cif. 4-5

Yehova alilaganyize Abrahamu oku kugerera ye amashanja g’igulu goshi gagishwa. Cikone Abrahamu ahisize myaka 100 na Sara myaka 90, buzira kuba n’omwana. Kuli mwene muntu, byabonekine nka birhakahashikana Abrahamu na Sara baburhe omwana kw’eyo myaka. Kobinali elyo lyali irhangulo kuli Abrahamu. “Omu kulangalira . . . Abrahamu ayemire, na ntyo ahinduka ishe w’amashanja mwandu.” (Rm. 4:18, 19) Na kobinali, ebi Abrahamu al’ilangalire byahikirizibwe. Abire ishe wa Izaki, mwana-rhabana al’ilangalire kasanzi kanji. (Rm. 4:20-22) Rhwanayemerwa na Nnâmahanga n’okuhamagalwa bashinganyanya na bîra bage, aka Abrahamu. Oko ko Paolo asegezagya erhi ayandika ntya: “Arhali [Abrahamu] yêne wayandikîrwe mpu ahindusire mushinganyanya; ci nirhu rhweshi kukwanine obuyemere burhubêre, rhweshi rhuyemera owafûlaga Nnawirhu Yezu omu bafîre.” (Rm. 4:23, 24) Aka Abrahamu, rhushinganine rhube n’obuyemere n’ebijiro ciru n’obulangalire. w23.12 buk. 7 cif. 16-17

Erhi wakahikirwa n’amazibu garhumire wayoboha, okengere oku Yehova anabone ago mazibu anamanyire gurhi gali garhuma waciyumva. Kwa lwiganyo, Yehova arhal’imanyire kone gurhi Abaisraheli bakag’ijirirwa kubi e Misri, cikone kandi al’imanyire ‘malibuko maci balimwo.’ (Lub. 3:7) Nkaba wanacidosa gurhi Yehova ali akurhabalamwo amango oli walwisa amazibu g’okuyobohya. Muli ntyo, omuhûne akurhabale ly’obona enjira ali akurhabalamwo. (2 Bam. 6:15-17) Buzinda orhanye ntya: Ka hotuba ndebe erhi ishuzo lilebe oku ntimanano y’ecigamba lyakuhîre emisi? Ka cicapo cilebe, video ndebe, erhi lwimbo lulebe lwago-lwago lwakuhîre omurhima? Ka muntu mulebe akuganirire entanya erhi lwandiko lw’okuhâna omurhima? Nkaba kwanaba kulembu okuyibagira obulagirire bw’omulala gugwerhe obuzigire gwa bene wirhu na bali birhu n’ebiryo by’ekiroho rhuhâbwa. Cikone ezo ziba ngalo zago-zago kurhenga emwa Yehova. (Iz. 65:13; Mk. 10:29, 30) Ezo ngalo zinayerekane oku anakushibirire. (Iz. 49:14-16) Na kandi zinayerekane oku ashinganine okulangalirwa. w24.01 buk. 4-5 cif. 9-10

Hisanzi hisungunu embere z’okugaluka e mpingu, Yezu akengeza abanafunzi bage lugenda omukolo gwabo gw’okuhâna obuhamirizi okubimuyerekire “omu Yeruzalemu, n’omu Yudeya yoshi, n’omu Samariya, na kuhika aha igulu lihekera.” (Ebj. 1:8; Lk. 24:46-48) Na kasanzi kasungunu enyuma z’aho, abakulu b’idîni ly’Eciyahudi bagwarha entumwa Petro na Yowane banabahêka embere z’e Sanhedrini, bahûna abo balume bishwekerezi oku baleke okuhubiri ciru banabayobohya. (Ebj. 4:18, 21) Petro na Yowane baderha ntya: “K’omu masu ga Nyamuzinda kukwanine okummuyumva kulusha Nnâmahanga? Mwêne mulutwage. Rhwehe oku bwirhu rhurhankahasha okurhaderha ebi rhwâbwine n’ebi rhwâyumvirhe.” (Ebj. 4:19, 20) Erhi Petro na Yowane bashwekulwa, abanafunzi basalira Yehova omw’izu linene ly’abarhabala bajire obulonza bwage. Yehova ashuzize kw’er’isala lyabo basaliraga n’omurhima gwabo goshi.​—Ebj. 4:31. w23.05 buk. 5 cif. 11-12

Yehova n’Omugala balamire haguma omu kasanzi ka myaka minji bwenene kulusha abandi bantu boshi. Mw’eyo miliyare y’emyaka balamire haguma, bayegererana bwenene banaba n’obwîra bwa hofi-hofi bwenene. Yehova ayerekine n’obwalagale oku aba azigire Yezu, nk’oku biyerekinwe omu lwandiko lw’olusiku lw’ene. Yehova akadesire kone ntya: ‘Oyu ye mba nyemire.’ Cikone, al’ilonzize rhumanye kunganaci aba azigire Yezu, co carhumire amuhamagala “Mugala wani, muzigirwa.” Yehova acidinire Yezu, bwenene bulya al’iyemire okuhâna akalamo kage. (Ef. 1:7) Na Yezu arhal’igwerhe karhinda lugenda oku Ishe akag’iciyumva enyanya zage. Al’iyemire n’obwalagale oku Ishe amuzigire. Adesire kanji-kanji na buzira karhinda oku Ishe aba amuzigire.​—Yn. 3:35; 10:17; 17:24. w24.01 buk. 28 cif. 8

Orhanye kuli oku: Muntu mulebe ob’oshibirire aderhe kantu kalebe kabi kuli we. Omanyire oku ebi anaderhaga buli bunywesi, cikone bantu baguma na baguma babuyemire. N’akantu k’okugayisa bwenene, abo bantu bayemire obo bunywesi barhondere babuderha-derha, na bandi bantu banji babuyemere. Gurhi wakaciyumva? Kanji-kanji oyo kakoza anarhuma waciyumva kubi, k’arhali ntyo? Ako kanga kanarhurhabala rhuhugûkwe gurhi Yehova aciyumvirhe erhi bamuhegeza irenge. Muguma w’omu bana bage b’ekiroho abwira omukazi murhangiriza, Eva, obunywesi lugenda Yehova, naye anabuyemera. Enyanya z’obo bunywesi, ababusi birhu barhangiriza bagomera Yehova. Oko kwalerhera bene bantu boshi ecaha n’olufû. (Murh. 3:1-6; Rm. 5:12) Amazibu goshi rhuli rhwabona ene omw’igulu, nk’olufû, amavita, n’amalibuko, gadwirhwe n’obo bunywesi Shetani aderhaga omw’ishwa ly’e Edeni. Ka Yehova anaciyumve kubi enyanya z’obo bunywesi n’amazibu bwadwirhe? Neci, buzira karhinda. Ciru akaba ntyo, Yehova arhaba wabukunizi erhi wakubîka akarhinda. Lubero n’oko, agendekire okuba “Nnâmahanga w’omwishingo.”​—1 Tm. 1:11, NWT. w24.02 buk. 8 cif. 1-2

Gurhi wakayigamwo olwiganyo lwa Yozefu lw’okugendekera wabêra mwishwekerezi kuli Yehova amango wamarhangulwa? Wanahiga buno gurhi wayish’ijira erhi wakahikirwa n’irhangulo. Oyige okuyaka ho n’aho ebintu Yehova ashomba, onayake ciru okukabirhanyako. (Enna. 97:10; 119:165) Muli eyo njira orhakajira ecaha erhi wakarhangulwa. Omu kanga ka ntyo, wayish’iba okola omanyire ebi wakajira erhi wakarhangulwa. Omu kanga kawe, nkaba omanyire oku wabwine okuli onalonzize okolere Yehova n’omurhima gwawe goshi, cikone nkaba haciri kantu kalebe kali karhuma warhindira okucihâna emwa Yehova n’okubatibwa. Wanajira nk’oku Mwami Daudi ajiraga. Wanasemberera Yehova ntya: “Onje ebulâbi, omanye n’oku ndi emurhima, onsinze omanye n’emihigo yani. Olole erhi hali ngeso mbi nkola ngwerhe, onnongôle omu njira nyinja ensiku n’amango.” (Enna. 139:23, 24, Mashi Bible) Yehova anahembe “balya bamulonza” n’omurhima goshi. Okukola kwawe ly’ohikiriza omuhigo gw’okucihâna emwage n’okubatizibwa kunamuyerese oku okola oli wamulonza.​—Hb. 11:6. w24.03 buk. 6 cif. 13-15

Kuhani mukulu akag’iyimangira olubaga embere za Nnâmahanga. Haruni, kuhani mukulu murhangiriza w’ishanja ly’Abaisraheli, ahiragwaho na Yehova amango ihema ly’entimanano lyahânagwa emwa Yehova. Cikone, nk’oku entumwa Paolo yanahugûlaga, “abandi bàli badâhwa [bakuhani] banji, bulyala olufû lurhazigaga bayorha ensiku zoshi.” (Hb. 7:23-26) Na bulya barhali bimana, abo bakuhani bakulu bal’igwasirwe bakahâna enterekêro enyanya z’ebyaha byabo bo nnene. Olo lo lubero lunene bwenene luliho egarhi ka bakuhani bakulu b’ishanja ly’Abaisraheli na Kuhani Mukulu Bwenene, Yezu Kristu. Nka Kuhani Mukulu, Yezu Kristu “ali ajira omukolo . . . omw’ihema ly’okuli. Nyamuzinda ye waligwikaga, lirhagwikagwa na muntu.” (Hb. 8:1, 2, Mashi Bible) Paolo ahugwîre oku “bulyala [Yezu] abâho ensiku n’amango, obudâhwa [obukuhani] bwage burhakayurha.” Paolo ayushwire oku Yezu ‘arhalikwo ishembo, arhalukira haguma n’abanya-byaha’ n’oku lubero n’abakuhani bakulu b’ishanja ly’Abaisraheli, “yehe nta bulagirire agwerhe, aka abandi badâhwa [bakuhani] bakulu b’okurhûla enterekêro ngasi lusiku” enyanya z’ebyaha byabo. w23.10 buk. 26 cif. 8-9

“Amalunga [empingu] marhanzi” gaganirire amarhegesi ga bene bantu gali gashumibwa na Shetani n’abazimu bage. (Mt. 4:8, 9; 1 Yn. 5:19) Erhi Ebibliya eganirira oluderho “igulu” enabe ehugwîre abantu balilamireko. (Murh. 11:1; Enna. 96:1) Cikone, “igulu lirhanzi” liyerekire abantu babi balamire oku igulu ene. Yehova arhakakubûla kone “amalunga [empingu]” n’“igulu” biriho ene; lubero n’oko, ayish’ibishereza loshi-loshi anabishanje. Ayish’irhenza amalunga erhi empingu eriho ene n’igulu liriho ene n’okuhiraho “amalunga [empingu] mahyahya n’igulu lihyahya” ko kuderha, oburhegesi buhyahya bwayish’irhambula abantu bashinganyanya. Yehova ayish’ijira igulu libe lihyahya n’abantu babe bahyahya omu kujira igulu limana n’abantu babe bimana. Nk’oku Izaya ali alebire, Yehova ayish’ijira igulu lyoshi habe hantu hinja bwenene, nk’oku ishwa ly’e Edeni lyal’iyosire. Yehova ayish’irhujira bahyahya omu kufumya ngasi muguma wirhu loshi-loshi. Ebirema, emihurha, n’ebihuli bayish’ifuma, ciru n’abafîre nabo bayish’ifûka.​—Iz. 25:8; 35:1-7. w23.11 buk. 4 cif. 9-10

‘Amalibuko [madarhi]’ gayish’irhibuka buzira kulaliza. (Mt. 24:21) Cikone amalibuko madarhi gayish’iba lubero n’agandi mahanya manji bulya rhumanyire oku gayisha. Hakola hali hofi myaka 2 000 Yezu arhonzire abanafunzi bage oku bayorhe bacirheganyize kw’olo lusiku. Erhi rhwakaba rhucirheganyize, kwayish’iba kulembu kuli rhwe okulembera ago mango mazibu n’okurhabala abandi nabo bajire ntyo. (Lk. 21:36) Rhwayish’iba rhulagirire oku bulembedu lyo rhurhumikira Yehova n’okulangalira oku arhulanga. Gurhi rhwayish’ijira erhi bene wirhu bakaheza bintu biguma na biguma by’omubiri erhi baheze byoshi? (Hab. 3:17, 18) Rhwayish’iba rhulagirire oku borhere bw’obwonjo lyo burhushumya rhubarhabale. Gurhi rhwayish’ijira erhi enyanya z’ecirhero c’omulungano gw’amashanja, byakarhuhûna rhulame hantu halebe haguma na bene wirhu na bali birhu banji omu kasanzi kalebe? (Eze. 38:10-12) Rhwayish’iba rhulagirire oku buzigire busezire kuli bo lyo burhurhabala rhulembere ago mango mazibu. w23.07 buk. 2 cif. 2-3

Abalume na bakabo banayiga binji kugerera olwiganyo lwa Akila na Prisila, mulume n’omukazi bal’izigirwe na Bakristu banji b’omu myaka igana mirhanzi. (Rm. 16:3, 4) Bakag’ikola haguma, bakag’ihubiri haguma, n’okurhabala abandi haguma. (Ebj. 18:2, 3, 24-26) Kobinali, ngasi mango erhi Ebibliya eganirira Akila na Prisila, enabaganirire bombi haguma. Gurhi abalume na bakabo bakayigamwo olwiganyo lwabo? Orhanye oku bintu binji we na balo erhi mukawe mulagirire okujira. Ka mwanakajira mikolo miguma na miguma haguma ahali ha muguma okuyijira yene? Kwa lwiganyo, Akila na Prisila bakag’ihubiri haguma. Ka ngasi mango munapange okujira ntyo? Kandi Akila na Prisila bakag’ikola haguma. Nkaba we na mukawe murhajira kazi kaguma, cikone ka mwanakola emikolo y’omu nyumpa haguma? (Muh. 4:9) Amango muli mwarhabalana okujira mukolo mulebe, nkaba mwanaciyumva bwenene muli nka ekipe mwananaba n’obulyo bw’okuganira. w23.05 buk. 22-23 cif. 10-12

Ngasi muntu anaciyumva ayobohire kasanzi oku kandi. Kwa lwiganyo, amango Mwami Sauli akag’ihiva Daudi ly’amuniga, Daudi ahiga okuyakira omu lugo lw’Abafilistini lw’e Gati. Enyuma za kasanzi kasungunu, Akishi mwami w’e Gati amanya oku Daudi y’olya mulwi w’ivita w’emisi bayimbaga omu lwimbo oku ananizire “amakumi g’ebihumbi” by’Abafilistini. Daudi “ayoboha bwenene.” (1 Sam. 21:10-12, NWT) Ayoboha oku Akishi amujira kubi. Gurhi Daudi ahimiremwo oboba bwage? Omu Olulanga lwa 56, Daudi ayerekinemwo oku akag’iciyumva amango ali e Gati. Olo lulanga luyerekine oboba Daudi agwerhe, cikone kandi luyerekine gurhi abuhimiremwo. Erhi Daudi aciyumva ayobohire, alangalira Yehova. (Enna. 56:1-3, 11) Daudi arhal’ilangalire busha. Kugerera omugisho gwa Yehova, Daudi ajira ekomplo yago-yago yanagwarha: Acijira musirhe! Lero Akishi arhacilonzagya okumuniga, cikone alonza agende, na muli ntyo Daudi acira.​—1 Sam. 21:13–22:1. w24.01 buk. 2 cif. 1-3

Bandi baganirirwe omu lwandiko lw’olusiku lw’ene? Abashige amavurha bafûzirwe! Co cirhumire hano abashige amavurha bazinda hano igulu bahêkwa empingu oku buzinda bw’amalibuko madarhi, muguma gw’omu mikolo yabo mirhanzi kwayish’iba kulwa ivita. Enyuma z’okuja empingu, bayish’ikola haguma na Kristu na bamalahika bage batagatifu, omu kulwisa abashombanyi ba Nnâmahanga ivita lizinda. Orhanye k’oku! Bakristu baguma na baguma bashige amavurha bali hano igulu, bakola bashosi erhi ciru bazamba. Cikone hano bafûlwa n’okuhâbwa obuzine empingu, byayish’iba biremwa by’ekiroho bigwerhe emisi birhakanafâ, banayish’iba bagwerhe omukolo gw’okulwa haguma na Yezu Kristu Mwami wabo Mulwi w’Ivita. Enyuma z’okulwa ivita lya Har-magedoni, bayish’ikola haguma na Yezu lyo barhabala abantu bahikire okuba bimana. Buzira karhinda, ago mango bayish’ijirira bene wabo na bali babo bazigirwa bali okw’igulu bintu binji bwenene erhi banali empingu kulusha ebi bakahashir’ijira amango baciri bantu barhali bimana! w24.02 buk. 6-7 cif. 15-16

Bantu baguma na baguma baba tayari okucihâna emwa Yehova n’okubatizibwa banarhindire. Hali amango bakayoboha oku, ‘enyuma z’okubatizibwa bayish’ijira ecaha cizibu n’oko kwanarhuma batengwa n’ecigamba.’ Erhi akaba nawe oyobohire ntyo, oyemere n’obwalagale oku Yehova akuha ngasi kantu olagirireko ly’‘ogenda nk’oku Nyakasane [Yehova, NWT] alonzize n’okukâjira ebimusîmîsize ensiku zoshi.’ (Kl. 1:10, Mashi Bible) Na kandi, akuha emisi y’okujira ebishinganine. Ayerekine oku anajira ntyo kugerera oku ajirire abandi bantu banji. (1 Kr. 10:13) Eco co cirhuma bantu basungunu bone batengwa omu cigamba c’Ecikristu. Yehova anarhabale abantu bage lyo babêra bishwekerezi. Ngasi muntu orhali mwimana anashumibwe okujira ebintu bibi. (Yk. 1:14) Cikone, amango oli omu irhangulo wene oshinganine ocishoge ebi wajira. Okuderha okuli, wene oshinganine ocishoge oku walama. Bantu baguma na baguma banaderhe oku rhurhakaba n’obuhashe lugenda oku rhuciyumva na lugenda ebi rhujira, cikone obo buba bunywesi, wanayiga okuhasha amarala gawe mabi. w24.03 buk. 5 cif. 11-12