Mwezi gwa 4

Abakozi ba Yehova b’omu mango ga mîra bahikirwe n’amazibu barhal’irhanyizeko. Rhuganirire olwiganyo lwa Yakobo. Ishe amurhegeka oku aj’irhôla omukazi wakag’iharamya Yehova w’omu mulala gwabo omu banyere ba Labani, anamuyemeza n’obwalagale oku Yehova amugisha bwenene. (Murh. 28:1-4) Yakobo ajijire akantu kashinganine. Arhenga omu cihugo cabo c’e Kanani anajira omubalamo gw’okuja emwa Labani, wal’igwerhe banyere babirhi, ko kuderha Leya na Raheli. Yakobo asima Raheli, mwali wa Labani murho, anayemera okukolera ishe myaka nda embere amurhôle. (Murh. 29:18) Cikone birhabaga nk’oku Yakobo al’ilangalire. Labani amurheba ly’arhôla omwali mukulu, Leya. Mugobe muguma enyuma z’okurhôla Leya, Labani ayemerera Yakobo arhôle na Raheli, cikone al’igwasirwe acib’ikolera Labani yindi myaka nda ly’arhôla Raheli. (Murh. 29:26, 27) Na kandi Labani arhabaga mwikubagirwa omu mikolo bajiraga haguma na Yakobo. Labani ajirire Yakobo omu njira erhali y’obushinganyanya omu kasanzi ka myaka 20 yoshi!​—Murh. 31:41, 42. w23.04 buk. 15 cif. 5

Ndi rhwakahûna obulongozi n’oburhulirize amango rhubulagirireko? Rhumanyire ishuzo ly’er’idoso. Rhwanayegera Yehova Mungu kugerera isala. Ntyo ko Yehova arhuhûnyire rhukajira. Alonzize rhukasalira ngasi mango erhi ‘kushenga burhahusa.’ (1 Ts. 5:17) Rhwanamuyegera buzira boba kugerera isala n’okumuhûna obulongozi omu ngasi cigabi c’akalamo kirhu. (Mig. 3:5, 6) Bulya Yehova aba Mungu muhânyi bwenene, arharhubwiziri kanga kone rhushinganine rhumuyegere kugerera isala. Yezu al’ihugûsirwe oku Yehova anabone isala oku liba lya bulagirire. Myaka minji embere ayishe hanw’igulu, abwine gurhi Ishe akag’ishuza oku masala g’abalume n’abakazi bishwekerezi kuli ye. Kwa lwiganyo, Yezu ali aha burhambi bw’Ishe erhi ashuza oku masala g’okurhenga oku murhima ga Hana, Daudi, Elisha n’abandi. (1 Sam. 1:10, 11, 20; 1 Bam. 19:4-6; Enna. 32:5) Birhasomezizi okubona Yezu ayigirizize abanafunzi bage bakasalira ngasi mango erhi banagwerhe obulangalire oku Yehova ashuza amasala gabo!​—Mt. 7:7-11. w23.05 buk. 2 cif. 1, 3

Kuhani Mukulu Yehoyada al’iyobohire Yehova. Ayerekine ntyo n’obwalagale erhi mwali wa Yezebeli wakag’ihamagalwa Ataliya, aciha entebe y’obwami omu Yuda. Arhagwerhe bwonjo anal’ilalikire bwenene obukulu n’oko kwarhuma ajira okwage koshi ly’ayirha iburha ly’obwami lyoshi, ko kuderha abinjikulu bage yenene! (2 Nga. 22:10, 11) Muka Yehoyada wakag’ihamagalwa Yehosheba aciza Yowasi, muguma muli abo bana. Oyo mukazi n’iba bafulika oyo mwana banakamushibirira. Omu kujira ntyo, Yehoyada na Yehosheba barhabala okulanga iburha ly’obwami lya Daudi. Yehoyada ali mwishwekerezi kuli Yehova arhanadirhimanaga enyanya za Ataliya. Kandi Yehoyada ayerekine obwishwekerezi bwage kuli Yehova, amango Yowasi al’igwerhe myaka nda. Ajira mupango mulebe. Okugwarha kw’ogo mupango kwakarhumire Yowasi aba mwami oshinganine w’omw’iburha lya Daudi. Cikoki okurhagwarha kwago kwakarhumire Yehoyada aheza obuzine bwage. Kugerera oburhabale bwa Yehova, ogo mupango gwagwarha. w23.06 buk. 17 cif. 12-13

Mwami Nebukadnezari akabwine nk’ogo mwanzi Daniyeli amubwiraga bwali bugoma akanarhegesire oku Daniyeli anigwe. Ciru akaba ntyo, Daniyeli ayerekana oburhwali anamuhugûlira eco cilôrho. Nkaba bici byarhabire Daniyeli ly’aba n’oburhwali omu kalamo kage koshi? Amango Daniyeli ali musole, kobinali aciyigirizize kugerera olwiganyo lw’ishe na nnina. (Lush. 6:6-9) Daniyeli al’imanyire ebi Irhegeko lyal’iyimangireko, nk’Amarhegeko Ikumi, na kandi al’imanyire binji lugenda ebi Omuisraheli akalire n’ebi arhakalire. (Lev. 11:4-8; Dan. 1:8, 11-13) Kandi Daniyeli al’imanyire omwanzi guganirire abantu ba Nnâmahanga anal’imanyire ebyabahikiraga erhi babula bulama kushimbana n’amakanuni ga Yehova. (Dan. 9:10, 11) Ebyahikiraga Daniyeli omu kalamo kage byamuyemezize n’obwalagale oku Yehova na bamalahika bage b’emisi bakag’imurhabala.​—Dan. 2:19-24; 10:12, 18, 19. w23.08 buk. 3 cif. 5-6

Rebeka ali mukazi mwenge wakag’irhôla emihigo y’oburhwali omu kalamo kage anakag’ijira ebintu omu njira nyinja. (Murh. 24:58; 27:5-17) Cikone ali wa bukenge anali wa kurhumikira. (Murh. 24:17, 18, 65) Erhi wakakalunga okuboko emipango ya Yehova n’obwirhohye aka Rebeka, wanaba lwiganyo lwinja omu mulala gwawe n’omu cigamba. Olugero buli borhere Abakristu boshi bakuzire kiroho balagirireko. Esteri, mukozi mwishwekerezi wa Nnâmahanga, ali wa lugero. Okuba wa lugero kwakag’imurhabala arhabaga wa bucibone. Ayumvirhizize ihano muzala wage Mordekayi amuhaga analikulikira. (Est. 2:10, 20, 22) Wanayerekana oku oli wa lugero akage omu kukahûna amahano minja n’okugakolesa. (Tt. 2:3-5) Esteri ayerekine oborhere bw’olugero omu yindi njira. Ajiraga ‘iranga linja n’ebirumbu bisogorosire bwinja, anali mwinjinja’; cikone, arhacisegezagyako obwenge omu njira erhali ya bulagirire.​—Est. 2:7, 15. w23.12 buk. 19-20 cif. 6-8

Okucitumuza okurhalusire olugero bo buzirho Yehova arhalonzizi rhubarhule ciru n’ehitya. Erhi akaba rhwahungamire ecaha cirhu, rhwaciyunjuzize, rhunali rhwarhôla emihigo lyo rhuyaka okushubirira eco caha, rhwanalangalira oku Yehova arhubabalire. (Ebj. 3:19) Enyuma z’okujira ebyo bintu byoshi, Yehova arhalonza rhugendekere rhwacitumuza. Aba amanyire oku okugendekera rhwacitumuza kwanarhulerhera amazibu. (Enna. 31:10) Erhi rhwakababala okurhalusire olugero, rhwanarhama omu kamashigwe kirhu k’obuzine. (2 Kr. 2:7) Erhi wakagendekera wacitumuza okurhalusire olugero, osegeze obwenge “obwonjo bw’ebyaha” burhenga emwa Nnâmahanga. (Enna. 130:4) Erhi ababalira abaciyunjuzize okunali, alaganyize ntya: ‘Ntakacikengera ebyaha byabo.’ (Yer. 31:34) Oko kuli kuderha oku enyuma z’okukubabalira, Yehova arhakacikutumuza ciru n’ehitya ebyaha wajiraga omu mango gageraga. Orhanacibêraga burhe bulya amagosa wajiraga amango gageraga ganarhuma orhajira binji ene omu mukolo gwage. Yehova arhagendekera arhanya oku byaha byawe, nawe orhashinganini ojire ntyo. w23.08 buk. 30-31 cif. 14-15

Omu mango g’obulwala bw’okuyahukira bw’e COVID-19, bulya Abahamirizi ba Yehova bakag’iyumvirhiza obulongozi rhuhâbwa n’ikubuliro lirhu, bohe barhahangayikaga okurhalusire olugero ak’abantu bakag’iyumvirhiza emyanzi y’obunywesi. (Mt. 24:45) Rhugwasirwe rhusegeze obwenge oku ‘bintu by’obulagirire bwenene.’ (Fl. 1:9, 10, NWT) Ebintu by’okurhuhêka obwenge byanarhurhôla kasanzi kanji bwenene n’okurhuma rhurhasegeza obwenge oku bintu bilerha obunguke bunji. Ebintu rhujira ngasi lusiku omu kalamo nk’okulya, okunywa, okucishagalusa, n’akazi kirhu k’omubiri, byanarhuhêka obwenge erhi rhwakabihira oku nafasi ntanzi omu kalamo kirhu. (Lk. 21:34, 35) Na kandi, ngasi lusiku rhunayumve myanzi minji bwenene lugenda akavulindi egarhi k’abantu n’eby’epolitike. Rhugwasirwe rhujire okwirhu koshi ly’eyo myanzi ya ntyo erhag’irhuhêka obwenge. Erhi akaba rhurhajijiri ntyo, rhwanarhondera okulunga okuboko luhande lulebe omu bukengere bwirhu n’omu murhima gwirhu. Shetani anakolese enjira ziri lubero ly’azambanya omuhigo gwirhu gw’okujira ebintu binja. w23.07 buk. 16-17 cif. 12-13

Abantu ba Yehova banabone oku olusiku lw’Okukengera olufû lwa Kristu lo lusiku lw’obulagirire bwenene omu mwaka. Lone lusiku lw’omwaka Yezu arhegesire abanafunzi bage bakakengera. (Lk. 22:19, 20) Lunarhukengeze enjira rhwakayerekanamwo oku rhuvuzire omunkwa oku nterekêro ya Yezu. (2 Kr. 5:14, 15) Kandi kunarhuhe obulyo bw’‘okuhânana omurhima’ na bene wirhu na bali birhu. (Rm. 1:12) Na bantu banji basimisibwe n’okuli banashumibwe okurhondera balambagira omw’ibarabara lihêsire ebwa buzine enyanya z’ebi babona n’okuyumva. Na kandi orhanye gurhi Okukengera olufû lwa Yezu kulunga haguma bene wirhu na bali birhu b’omw’igulu lyoshi. Ebyo byoshi binarhume entimanano y’Okukengera olufû lwa Yezu yaba yago-yago kuli rhwe! w24.01 buk. 8 cif. 1-3

Oku rhwagendekera rhwarhanya bwenene oku ibeyi Yehova na Yezu balyuzire, ko rhwanagendekera rhwahugûkwa kunganaci baba bazigire ngasi muguma wirhu. (Gl. 2:20) Engombôlo eba ngalo y’obuzigire. Yehova ayerekine obuzigire bwage kuli rhwe omu kuhâna nterekêro omuntu wali wa bulagirire bwenene kuli ye, ko kuderha Yezu. Yehova alesire Omugala alibuke n’okufâ erhi rhwe rhurhuma. Yehova arhaciyumva arhuzigire kone, cikone kandi anarhubwire kunganaci aba arhuzigire. (Yer. 31:3) Yehova arhukulwire emunda ali bulya aba arhuzigire. (Oshushanye n’Olushika 7:7, 8.) Nta kantu na nta muntu yeshi-yeshi wakarhunanûla k’obo buzigire. (Rm. 8:38, 39) Gurhi obo buzigire burhuma waciyumva? w24.01 buk. 28 cif. 10-11

Abakristu bashige amavurha baba bashagalukire obulangalire bwabo bw’okulama empingu. Omu mwaka gwa 1991, mwene wirhu muguma wakag’ihamagalwa Frederick Franz, adesire kurhenga oku murhima ntya: “Obulangalire bwirhu, bwahikirira kobinali na ngasi muguma muli rhwe bantu 144 000 ahâbwa ebi Nnâmahanga arhulaganyize. Oluhembo lwirhu lwayish’iba lwinja bwenene kulusha akandi kantu koshi-koshi rhugwerhe.” Enyuma z’okukolera Nnâmahanga n’obwishwekerezi myaka minji, Mwene Wirhu Franz aderha ntya: “[Rhucigendekire] rhwabona obulangalire bwirhu oku buli bwa bulagirire bwenene. . . . Rhuli rhwabushagalukira omu kasanzi koshi rhugendekire rhwabulindirira. Kali kantu rhushinganine okulinda . . . Nshagalukire bwenene obulangalire bwirhu kulusha agandi mango goshi.” Rhube rhuli rhwalindirira okushagalukira akalamo k’ensiku n’amango omu mpingu erhi hanw’igulu, rhugwerhe obulangalire bwinja bwenene burhuhîre ecirhumire cinja c’okushagaluka. N’obo bulangalire bwirhu bw’okushagalusa bwanazibuha ciru bwenene. w23.12 buk. 9 cif. 6; buk. 10 cif. 8

Aha mbuga z’omuhango gw’ihema lya mîra ly’entimanano hali amazabahu g’amarhale bakag’iherako Yehova enterekêro z’ensimba. (Lub. 27:1, 2; 40:29) Cikone, ezo nterekêro zirhakarhumire abantu bababalirwa ebyaha byabo loshi-loshi. (Hb. 10:1-3) Enterekêro z’ensimba zakag’igendekera zahânwa omw’ihema ly’entimanano zakag’ishushanya enterekêro nguma yakacungwire bene bantu loshi-loshi. Yezu al’imanyire oku Yehova amurhumire hano igulu ly’ahâna obuzine bwage nka nterekêro y’engombôlo kuli bene bantu. (Mt. 20:28) Co cirhumire, erhi Yezu abatizibwa, aciyerekana ly’ajira ebi Yehova al’ilonzize. (Yn. 6:38; Gl. 1:4) Obuzine bwa Yezu bwahânyirwe “liguma kwa lwoshi” lyo bufunika ebyaha bya ngasi muntu wayerekana obuyemere muli Kristu.​—Hb. 10:5-7, 10. w23.10 buk. 26-27 cif. 10-11

Oku bwirhu rhwene, nta mango rhwakahashire okucicungula kurhenga omu caha n’omu lufû. (Enna. 49:7, 8) Yehova aciyimire binji bwenene lyo Yezu ahâna obuzine bwage erhi rhwe rhurhuma. Oku rhwagendekera rhwarhanya bwenene kw’ebi Yehova na Yezu baciyimire, ko rhwanagendekera rhwashagalukira engombôlo. Erhi Adamu ajira ecaha, acihegeza obulangalire bw’okulama ensiku n’amango abuhegeza n’abana bage boshi. Ly’ebi Adamu ahezagya bigombôlwa, Yezu ahâna obuzine bwage bwimana nterekêro. Omu kalamo kage koshi hano igulu, Yezu “arhajiraga caha, n’obulyalya burhabonekaga omu kanwa kage.” (1 Pt. 2:22) Erhi Yezu afâ, obuzine bwage bwimana bwal’ishushine bwinja-bwinja n’obuzine Adamu ahezagya.​—1 Kr. 15:45; 1 Tm. 2:6. w24.01 buk. 10 cif. 5-6

Enyuma z’okufûka kwa Yezu, aja Ahatagatifu Bwenene h’ehekalu y’ekiroho. Oko kuyerekine n’obwalagale oku omupango gwa Yehova lugenda enterekêro ecîre guyimangire oku nterekêro y’engombôlo n’obukuhani bwa Yezu guli mwinja kulusha. Kuhani mukulu w’omu Israheli akag’ija omu Hatagatifu Bwenene hajiragwa n’amaboko ga bene bantu erhi adwirhe n’omuko gw’ensimba z’enterekêro, cikone Yezu ajire “omu mpingu mwo nnene,” hantu hatagatifu bwenene kulusha ahandi hoshi ly’abonekana embere za Yehova. Omwola, ayerekana ibeyi ly’obuzine bwage bwimana bwa mwene muntu ahânaga erhi rhwe rhurhuma “mpu arhenze cirya caha omu kucihâna yene nterekêro.” (Hb. 9:24-26, Mashi Bible) Rhube rhugwerhe obulangalire bw’okulama empingu erhi hanw’igulu, rhweshi rhwanaharamya Yehova omu hekalu yage y’ekiroho. w23.10 buk. 28 cif. 13-14

Orhanye oku mukolo Yezu ali ajira e mpingu nka Mwami wirhu oli warhegeka na nka Kuhani Mukulu w’obwonjo. Kugerera ye, rhwanayegera omw’isala aha “ntebe ya Nnâmahanga . . . hali olukogo [lurhashinganinwi]” n’okumuhûna olukogo n’oburhabale “omu mango rhulagîrire.” (Hb. 4:14, 15) Rhurhakag’igeza olusiku ciru n’oluguma buzira kurhanya bwenene kw’ebi Yehova na Yezu barhujirire n’ebi bali barhujirira. Obuzigire bwabo kuli rhwe bushinganine burhuhume oku murhima bwenene n’okurhushumya rhube n’obushiru omu mukolo gwirhu n’omu nterekêro yirhu. (2 Kr. 5:14, 15) Njira nguma omu njira nyinja bwenene rhwakayerekanamwo oku rhuvuzire omunkwa, kuli kucihangana bwenene lyo rhurhabala abandi babe Bahamirizi ba Yehova na banafunzi ba Yezu. (Mt. 28:19, 20) Ntyo ko entumwa Paolo yajijire. Al’imanyire oku Yehova aba alonzize “abantu boshi bacizibwe banahashe okumanya okuli.”​—1 Tm. 2:3, 4, Mashi Bible. w23.10 buk. 22-23 cif. 13-14

Banji ba muli rhwe, amango bali bahubiri banakolese olo lwandiko lw’Ebibliya lw’okuhâna omurhima lugenda gurhi akalamo kayish’iyorha omu Paradizo. Gurhigi rhwakajira lyo rhuciyemeza rhwe nnene n’okuyemeza abandi oku emigisho eganirirwe omu citabu c’Amafulûlo 21:3, 4 yahikirira? Yehova arharhuhîri kone eco ciragane c’okushagalusa cikone kandi arhuhîre ebintu birhuyemezize n’obwalagale bulya gurhi rhwakacilangalira. Omu milongo ekulikire, rhwabona ebirhumire by’okulangalira eciragane ca Yehova c’okuhindula igulu libe Paradizo. Edesire ntya: “Olya wali otamire oku ntebe aderha, erhi: ‘Loli oku byoshi namabijira bihyahya.’ Ashubirira, erhi: ‘Yandika oku ebi binwa birhali bya bunywesi, biri by’okuli.’ Ashub’imbwira, erhi: ‘Hoshi aho! Nie Alfa, nie na Omega, nie Murhondêro, nie na Buzinda.’”​—Maf. 21:5, 6a. w23.11 buk. 2-3 cif. 3-5

Mwene wirhu ociri musole anayerekana oku agwerhe obuhashe bwinja bw’okurhanya omu kurhôla emihigo minja lugenda emyambalo n’okuciyinjihya. Kanji-kanji, ebiri alamode binajirwe n’okugendekezibwa n’abantu barhaba bakenzire Yehova erhi abantu bajira olugenzi lubi. Entanya zabo z’olugenzi lubi zinabonekane omu myambalo y’okufundera erhi erhuma abalume babonekana nka bakazi. Amango ali acishoga emyambalo, mwene wirhu ociri musole oli wagendekera okuba Mukristu okuzire kiroho analongozibwe n’amakanuni g’Ebibliya n’enyiganyo nyinja z’omu cigamba. Anacidosa ntya: ‘K’emihigo yani enayerekane oku ngwerhe enkengero nyinja n’oku nankenge abandi? K’oku nyambala kunarhume abandi barhaba n’amazibu g’okuyemera oku mba mukozi wa Nnâmahanga?’ (1 Kr. 10:31-33) Mwene wirhu ociri musole ogwerhe obuhashe bw’okurhanya anakengwe na bene wirhu na bali birhu, cikone kandi, anakengwe n’Ishe w’omu mpingu. w23.12 buk. 26 cif. 7

Omu mango ga mîra, “omwami w’e mukondwe” alibuzize abakozi ba Yehova omu njira y’obwalagale. (Dan. 11:40) Kwa lwiganyo, oko kwabire omu mango g’Ivita lya Burhanzi ly’Igulu n’omu mango g’Ivita lya Kabirhi ly’Igulu erhi bene wirhu banji bahebwa omu prizo enyanya z’olwimango lwabo lw’okurhaja omu by’ivita na Bahamirizi baguma na baguma baciri bana bahîvwa oku masomo enyanya z’okulahira okulamusa idarapo. Cikone, omu makumi g’emyaka gazind’igigera, obwishwekerezi bw’abakozi ba Yehova balamire omu burhegesi bw’oyo mwami w’e mukondwe bwarhangwirwe omu zindi njira zirhali z’obwalagale. Kwa lwiganyo, omu makampanye g’obulondôzi, Omukristu anashumibwa okulunga okuboko cama cilebe c’epolitike erhi ngereke [candidat] mulebe. Nkaba arhakahikira aha acagula, cikone analunga okuboko luhande lulebe omu bwenge bwage n’omu murhima gwage. Kuli kwa bulagirire bwenene rhugendekere rhwalahira okulunga okuboko oluhande loshi-loshi omu by’epolitike arhali kugerera ebijiro birhu byone cikone kandi kugerera entanya zirhu n’oku rhuli rhwaciyumva!​—Yn. 15:18, 19. w23.08 buk. 12 cif. 17

Amango rhuli rhwalibirha akamashigwe kirhu k’obuzine, rhugwasirwe ‘rhulibirhe lyo rhuhâbwa oluhembo.’ (1 Kr. 9:24) Yezu adesire oku ‘emirhima yirhu yanazidoherwa oku madinye [okulya okurhalusire olugero] n’endalwe n’omu ntanya z’obu bulamu.’ (Lk. 21:34, Mashi Bible) Olo lwandiko n’agandi, ganakurhabala omanye empindulo wakajira amango oli walibirha akamashigwe k’obuzine. Rhwanayemera n’obwalagale oku rhwahima akamashigwe kirhu k’obuzine bulya Yehova arhuha emisi rhulagirireko. (Iz. 40:29-31) Co cirhumire, orhashubaga amagulu! Oyige olwiganyo lw’entumwa Paolo, wajiraga okwage koshi ly’ahâbwa oluhembo lwal’ihizirwe embere zage. (Fl. 3:13, 14) Nta muntu wakalibirha ako kamashigwe ahali hawe, cikone kugerera oburhabale bwa Yehova wanahash’ilibirha kuhika e buzinda. Yehova anakurhabala ly’obarhula emizigo yawe n’okurhiba obuzirho burhali bwa bulagirire. Bulya Yehova ali olunda lwawe, wanahash’ilibirha ako kamashigwe n’obulembedu n’okuhima! w23.08 buk. 31 cif. 16-17

Erhi Yezu agwerhe myaka 12, ababusi bage bamusiga e Yeruzalemu. (Lk. 2:46-52) Gwali mukolo gwa Yozefu na Mariya okumanya erhi kobinali abana babo boshi bali omu cigusho carhenganga e Yeruzalemu enyuma z’olusiku lukulu. Erhi buzinda Yozefu na Mariya babona Yezu, Mariya amukalihira mpu bulya gurhi anabêraga e Yeruzalemu! Nkaba Yezu akamuyeresire oku oko ajijire kurhashinganini. Ahali h’okujira ntyo, Yezu aha ababusi bage ishuzo lilembu na lya bukenge. Cikone, Yozefu na Mariya “barhayumvagya eco cinwa ababwiraga.” Ciru akaba ntyo, Yezu agendekera “akabayumva.” Mwe misole, ka hali amango mubona oku kuli kuzibu okurhumikira ababusi binyu erhi bakajira amagosa kandi erhi bakamuyumva kubi? Bici byakamurhabala? Mukarhanya lugenda gurhi Yehova aciyumva. Ebibliya edesire oku erhi murhumikira ababusi binyu, “okwola kwo kusimisa Nyakasane.” (Kl. 3:20) Yehova anamanye erhi ababusi binyu baba barhamuyumvirhi bwinja kandi erhi bakamuhiriraho amarhegeko gabonekine nka garhashinganini. Ciru akaba ntyo, erhi wakacishoga okubarhumikira, onamushagaluse. w23.10 buk. 7 cif. 5-6

Nkaba owirhu mwanafunzi anaderha oku Abahamirizi bashinganine bashanje entanya zabo lugenda ecijiro c’obuhya egarhi k’omulume n’owabo mulume erhi omukazi n’owabo mukazi. Byanahûna rhumuyemeze n’obwalagale oku rhunakenge oluhuma ngasi muntu agwerhe lw’okucirhôlera emihigo. (1 Pt. 2:17) Buzinda, rhwanahasha okumuhugûlira obunguke rhuba nabo omu kukenga amakanuni g’Ebibliya g’olugenzi lwinja. Erhi omuntu akahalira bwenene entanya zage, rhurhashinganini rhuderhe duba-duba oku rhumanyire ebi aba ayemire. Kwa lwiganyo, gurhi wakajira erhi owinyu mwanafunzi akaderha oku okuba n’obuyemere muli Nnâmahanga buba buhwinja? K’oshinganine oderhe oku ayemire bwenene enyigirizo z’amageuzi n’oku amanyire binji lugenda ezo nyigirizo? Kobinali, nkaba anaba ali aderha kone ebi ayumvirhe. Nkaba wanamuyeresa mwanzi mulebe guganirire obulemi guli oku jw.org. Nkaba buzinda anaba mubidu okuganirira mwanzi mulebe erhi video ndebe eri kw’eyo site. Kobinali, erhi wakaganira naye omu njira y’obukenge, nkaba oko kwanamurhabala alonze okuyiga binji lugenda ebi Ebibliya edesire. w23.09 buk. 17 cif. 12-13

Nirhu rhwanayemera n’obwalagale oku Yehova arhukolesa n’okurhugisha ciru akaba rhwajijire amagosa erhi rhwakajira okwirhu koshi lyo rhukubûla enjira zirhu n’okugendekera rhwacikubagira ye. (Mig. 28:13) Samusoni arhali mwimana; cikone arharhamaga okucihangana ly’akolera Yehova, ciru n’enyuma z’okujira igosa ly’okubwira Dalila ihwe ly’emisi yage. Na Yehova arhamulekaga. Nnâmahanga acibir’ikolesa Samusoni omu njira y’obuhashe. Yehova acigendekire amubona nka mulume wa buyemere bwago-bwago, anamuhira omu liste y’abalume bishwekerezi baganirirwe omu citabu c’Abahabraniya cigabi ca 11. Rhuhîrwe omurhima bwenene omu kumanya oku rhunakolere Larha w’obuzigire w’omu mpingu wa ntyo olonzize okurhuha emisi, bwenene amango rhuli bazamba! Co cirhumire, aka Samusoni, lekagi rhusemberere Yehova ntya: “Onyibuke [onkengere] nani mashi, oshubimpa emisi.”​—Bac. 16:28. w23.09 buk. 7 cif. 18-19

Amango rhuli rhwacifinja erhi kubîka omu bukengere olusiku lwa Yehova, oko kunarhushumye rhukaganirira abandi omwanzi mwinja. Cikone, omu kanga kaguma na kaguma rhwanarhindira okujira ntyo. Bulya gurhi? Bulya rhwanarhogera omu murhego gw’okuyoboha bene bantu omu kasanzi kalebe. Oko kwahikire Petro. Omu budufu Yezu asambisibagwa, Petro ayabirwa okucimanyisa oku ali mwanafunzi wa Yezu anamuhakana kanji-kanji! (Mt. 26:69-75) Cikone eyo ntumwa yo n’eyo, buzinda yadesire ntya n’oburhwali: “Murhayobohaga abantu ciru n’ehitya, murharhemukaga.” (1 Pt. 3:14, Mashi Bible) Enderho za Petro zirhuyemezize n’obwalagale oku rhwanahima oboba bwa bene bantu. Bici byakarhurhabala lyo rhuhima oboba bwa bene bantu? Petro arhubwizire ntya: “Muhe Kristu olukengwa omu mirhima yinyu.” (1 Pt. 3:15) Oko kuhiziremwo okurhanya bwenene oku cikono n’obuhashe bwa Nnawirhu na Mwami wirhu, Kristu Yezu. w23.09 buk. 27-28 cif. 6-8

Rhushinganine rhugendekere rhwajira okwirhu koshi lyo rhuyaka okucihira omu “mikolo y’omwizimya erhajira kamalo [bunguke].” (Ef. 5:11) Omu kasanzi kanji, byabonekine n’obwalagale oku; oku omuntu agendekera ayumvirhiza, oku agendekera alaba, erhi kuganirira ebintu birhacîri, erhi bintu biyerekire olugenzi lw’eby’enshonyi, ko kunaba kulembu kuli ye okurhogera omu bijiro bibi. (Murh. 3:6; Yk. 1:14, 15) Igulu lya Shetani linakalonza okurhurheba, linakalonza okurhuyemeza oku ebi Yehova abona oku biri bya nshonyi birhanacîri, birhaba bibi bujayo. (2 Pt. 2:19) Njira nguma y’omu njira Shetani amakakolesa kanji-kanji, kuba kuhusa abantu lyo barhag’ihugûkwa ebinja n’ebibi. (Iz. 5:20; 2 Kr. 4:4) Co cirhuma filme nyinji, ebigera oku mateleviziyo, n’ebiba oku site nyinji z’e enternete binakaganirira entanya ziri lubero n’amakanuni mashinganyanya ga Yehova! Shetani anakalonza okurhurheba rhurhanye oku ebijiro n’olugenzi lurhacîri lurhakarhulerhera amazibu.​—Ef. 5:6. w24.03 buk. 22 cif. 8-10

Ihema ly’entimanano yali nyumpa y’ihema Abaisraheli bakag’iheka ngasi hantu bakag’ihamira. Bakolesize er’ihema omu myaka hofi 500 kuhika amango ehekalu yayubakagwa omu Yeruzalemu. (Lub. 25:8, 9; Mib. 9:22) Ihema ly’entimanano hali hantu h’obulagirire Abaisraheli bakag’iharamizaho n’okuhâniraho enterekêro zabo. (Lub. 29:43-46, Mashi Bible) Cikone, kandi ihema ly’entimanano lyal’ishushanyize kantu kalebe kinja bwenene. Cali “cizunguzungu c’eby’omu mpingu,” lyanal’ishushanyize ehekalu nnene ya Yehova y’ekiroho. Entumwa Paolo adesire oku er’ihema “luli lwiganyo lwa gano mango ga buno.” (Hb. 9:9) Co cirhumire, omu mango Paolo ayandikiraga Abahabraniya, ehekalu y’ekiroho yalikola eriho. Yarhondezibagwa omu mwaka gwa 29 Kano Kasanzi Kirhu (K.K.K.). Ogo mwaka lyo Yezu abatizibagwa, ashîgwa amavurha kugerera iroho litagatifu, anarhondera akola nka “kuhani mukulu bwenene” wa Yehova omu hekalu y’ekiroho.​—Hb. 4:14, NWT; Ebj. 10:37, 38. w23.10 buk. 25-26 cif. 6-7

Lyo rhugendekera bwinja omu hali y’ekiroho, nirhu rhugwasirwe rhube babidu okugomba erhi kukacipatanisa n’ehali. Gurhi rhwakajiramwo ntyo? Rhugwasirwe rhube ba lugero omu kucipatanisa n’ehali erhi akanga kirhu kakashanja n’omu kukakenga entanya n’emihigo y’abandi. Rhuli bakozi ba Yehova, rhulonzize rhube ba lugero. Kandi rhulonzize rhube birhohye na ba bwonjo. Yehova ahamagirwe “Ibuye” bulya aba asimisire, arhanadundagana. (Lush. 32:4) Ciru akaba ntyo, kandi aba wa lugero. Oku ebintu bigendekera byajirikana, ko na Nnâmahanga wirhu agendekera acipatanisa n’ehali ly’ajira omuhigo gwage guhikirizibwe. Yehova alemire bene bantu oku nshusho yage anabalema n’obuhashe bw’okucipatanisa n’akanga erhi hakaba empindulo omu kalamo kabo. Arhuhîre amakanuni g’Ebibliya g’obwalagale garhurhabala lyo rhurhôla emihigo y’obwenge omu ngasi kanga kakarhuhikira. Olwiganyo lwa Yehova n’amakanuni gage birhuyemezize n’obwalagale oku ciru akaba aba “Ibuye,” kandi aba wa lugero. w23.07 buk. 20 cif. 1-3

Yehova acishushanyize n’omuzire w’obuzigire. (Iz. 66:12, 13) Obone omu bukengere bwawe omuzire oli washibirira omwana wage murho. Amango rhuli omu malumwa, rhwanalangalira oku Yehova arhuzigire. Arhaleka okurhuzigira erhi rhwakajira kantu kalebe kabi. (Enna. 103:8) Ishanja ly’Abaisraheli lyagayisize Yehova kanji-kanji; cikone ayeresa abantu bage baciyunjuzagya obuzigire bwage bwishwekerezi kugerera ezi nderho: “Orhali munyi omu masu gani, oli wacitwiro cihamu, ntanahimwa kukurhonya.” (Iz. 43:4, 5) Obuzigire bwa Nnâmahanga burhasag’ishanja. Ensiku zoshi rhwanabulangalira. Ciru akaba rhwajijire amagosa mazibu, Yehova arhakarhuleka. Erhi rhuciyunjuza n’okugalukira Yehova, rhunabone oku acirhuzigire. Alaganyize oku “aba wa bwonjo bunji.” (Iz. 55:7) Ebibliya eganirire okubabalira kwa Yehova nka kunalerhe “amango g’oburhulirize . . . kurhenga emwa Yehova ye nnene.”​—Ebj. 3:19, NWT. w24.01 buk. 26-27 cif. 4-5

Yehova anarhurhabala amango rhuli rhwalwisa akanga kazibu. Kwa lwiganyo, rhwanaba n’obulyo bw’okubona okuboko kwa Yehova omu kalamo kirhu amango rhuli rhwahûna omukulu wirhu w’akazi akasanzi lyo rhuja oku ntimanano nkulu, kandi erhi rhwakahûna habe empindulo omu programe yirhu y’akazi lyo rhukaja oku ntimanano zoshi. Nkaba rhwanahâbwa ishuzo linja rhurhal’irhanyizeko. N’oko kwanarhuma obulangalire bwirhu muli Yehova bwasêra. Ezra ahûnyire Yehova oburhabale. Ngasi mango erhi akaciyumvirhe azidohirwe n’emikolo, akag’ihûna Yehova oburhabale omu njira y’obwirhohye. (Ezr. 8:21-23; 9:3-5) Bulya Ezra akag’icikubagira Yehova, abandi bamulunga okuboko n’okuyiga obuyemere bwage. (Ezr. 10:1-4) Erhi rhwakaciyumva rhuhangayisire bwenene lugenda amalagirire girhu g’omubiri, erhi lugenda obulanzi bw’omulala gwirhu, rhugwasirwe rhuhûne Yehova oburhabale kugerera isala. w23.11 buk. 18 cif. 15-17

Yehova arhadesiri oku erhi akaba rhulonzize rhuhamagalwe bashinganyanya rhugwasirwe rhujire ebi Abrahamu ajiraga byo n’ebyo. Kobinali, hali njira nyinji rhwakayerekanamwo obuyemere bwirhu kugerera ebijiro. Rhwanayegereza abahyahya omu cigamba cirhu, rhwanarhabala bene wirhu na bali birhu bali omu bulagirire bwenene, n’okujirira abantu b’omu mulala gwirhu aminja; ebyo byoshi biri bintu byakarhuma Nnâmahanga arhuyemera n’okurhugisha. (Rm. 15:7; 1 Tm. 5:4, 8; 1 Yn. 3:18) Ecijiro cinja bwenene ciyerekana oku rhugwerhe obuyemere, kuli kuba n’obushiru omu kuganirira abandi omwanzi mwinja. (1 Tm. 4:16) Rhweshi rhwanayerekana kugerera ebijiro birhu oku rhuyemire oku ebiragane bya Yehova byahikirira n’oku enjira zage ziba nyinja bwenene. N’erhi rhwakajira ntyo, rhwanayemera n’obwalagale oku Nnâmahanga arhubona nka bantu bashinganyanya n’oku arhuhamagala bîra bage. w23.12 buk. 2 cif. 3; buk. 6 cif. 15

Erhi ali hofi h’okufâ, Mwami Daudi abwira Solomoni ezo nderho. (1 Bam. 2:1, 3) Ene, kuli kwinja abalume Bakristu boshi bakolese er’ihano. Lyo babêrwa, bagwasirwe baciyigirize okurhumikira amarhegeko ga Nnâmahanga n’okukolesa amakanuni g’Ebibliya omu ngasi cigabi c’akalamo kabo. (Lk. 2:52) Bulya gurhi kuli kwa bulagirire bwenene bene wirhu baciri misole bahikire okuba balume Bakristu bakuzire kiroho? Omulume Mukristu anahikirize emikolo y’obulagirire omu mulala n’omu cigamba. Mwe bene wirhu muciri misole, buzira karhinda nkaba mwarhanyize oku mikolo mwakaba nayo omu mango gali embere. Nkaba ogwerhe omuhigo gw’okuja omu mukolo gw’akasanzi koshi, okuba murhabazi w’abagula, na buzinda mugula w’ecigamba. Kandi, nkaba ogwerhe omuhigo gw’okuja omu buhya n’okuburha abana. (Ef. 6:4; 1 Tm. 3:1) Ly’ohikira eyo mihigo n’okubêrwa, oshinganine obe Mukristu okuzire kiroho. w23.12 buk. 24 cif. 1-2

Abagula Bakristu bahâbirwe omukolo gw’okushibirira ebibuzi bya Yehova by’engulo ndarhi. Abo balume bacihânyire baba bashagalukire okukolera bene wabo na bali babo, bananajire okwabo koshi lyo baba “bangere b’okunali.” (Yer. 23:4, Mashi Bible; 1 Pt. 5:2) Rhuvuzire omunkwa bwenene okubona rhugwerhe abalume ba ntyo omu bigamba birhu! Abagula banaciyigiriza binji kugerera olwiganyo lw’Omuzuzi Gideoni. (Hb. 6:12) Ali mulanzi na lungere w’olubaga lwa Nnâmahanga. (Bac. 2:16; 1 Nga. 17:6) Aka Gideoni, abagula bahizirweho lyo bashibirira olubaga lwa Nnâmahanga omu kasanzi kazibu bwenene. (Ebj. 20:28; 2 Tm. 3:1) Rhwanaciyigiriza binji kugerera oborhere bwa Gideoni bw’olugero, obwirhohye n’okurhumikira. Obulembedu bwage bwarhangwirwe omu mango akag’ihikiriza emikolo yage. Rhube rhuli bagula erhi nanga, rhwanaciyigiriza okuba ba kuvuga omunkwa bwenene lugenda abagula birhu. Rhwanalunga okuboko abo balume bakola bwenene.​—Hb. 13:17. w23.06 buk. 2 cif. 1; buk. 3 cif. 3