Mwezi gwa 3

Igulu lihyahya lirhacibaho. Cikone hali bintu biguma na biguma biriho: enyenyezi, emirhi, ensimba n’abinyu bantu. Ntaye wakaderha oku ebyo bintu byoshi birhaba by’okuli. Ciru akaba hali amango birhaliho, biriho ene bulya Yehova abilemire. (Murh. 1:1, 26, 27) Kandi Nnâmahanga wirhu ahizire oku ajira igulu libe lihyahya. Ahikiriza ogo muhigo. Omw’igulu lihyahya abantu bayish’ishagalukira akalamo karhagwerhi buzinda n’amagala mimana. Rhwanayemera n’obwalagale oku igulu lihyahya lyayisha oku kasanzi Nnâmahanga ahizireho. (Iz. 65:17; Maf. 21:3, 4) Embere er’iguli lihyahya liyishe, okakolesa ngasi bulyo ogwerhe ly’ozibuhya obuyemere bwawe. Ensiku zoshi, obe wa kuvuga omunkwa enyanya z’engombôlo. Okarhanya bwenene oku buhashe bwa Yehova. Okajira binji omu mikolo y’ekiroho. Omu kujira ntyo wanaba muguma muli “bala bayemire banali ba bushibirizi banahîragwe ebi Nnâmahanga alaganyagya.”​—Hb. 6:11,12, Mashi Bible. w23.04 buk. 31 cif. 18-19

Yezu ayinamula amasu gage anasalira embere z’abantu banji. Al’ilonzize okuha Yehova obukuze enyanya z’ebyajirikana enyuma z’aho. Buzinda ayakuza ntya: “Lazaro, huluka!” (Yn. 11:43) Na Lazaro arhenga omu nshinda! Yezu ajira akantu bantu baguma na baguma bakarhanyize oku karhakahashikine. Ogu mwanzi guzibuhize obuyemere bwirhu omu bulangalire bw’obufûke. Omu njira nci? Okengere eciragane Yezu ahaga Marta: “Mushinja wawe afûka.” (Yn. 11:23) Ak’Ishe, Yezu agwerhe irala n’obuhashe bw’okuhikiriza eco ciragane. Emirenge alakaga yayerekine oku alonzize bwenene akuleho olufû n’amababale galerhwa n’olufû. N’erhi Lazaro arhenga omu nshinda, Yezu ayerekana oku agwerhe obuhashe bw’okufûla abafîre. Kandi, orhanye oku nderho Yezu akengezagya Marta ziri omu lwandiko lw’olusiku lw’ene. Rhugwerhe ebirhumire binja by’okuyemera oku eciragane ca Nnâmahanga c’obufûke cahikirira. w23.04 buk. 11-12 cif. 15-16

Hali amango byakahûna rhushanje ebi rhuli rhwahûna omu isala lirhu erhi rhwakahugûkwa bwinja bwenene obulonza bwa Yehova. Rhugwasirwe rhukakengera oku Yehova agwerhe omuhigo, n’oku aguhikiriza oku kasanzi ahizireho. Ogo muhigo guhiziremwo okuyusa loshi-loshi amazibu goshi gali garhuma rhwalibuka bwenene ene, kwa lwiganyo, obuhanya bucilerha bone, endwala n’olufû. Yehova ayish’ihikiriza ogo muhigo gwage kugerera Obwami bwage. (Dan. 2:44; Maf. 21:3, 4) Cikone, embere ako kasanzi kahike, Yehova alesire Shetani arhegeke igulu. (Yn. 12:31; Maf. 12:9) Erhi Yehova akayusa amazibu ga bene bantu ene, byanabonekana nk’oburhegesi bwa Shetani buli bwinja omu njira ndebe. Co cirhumire, ciru akaba rhugwasirwe rhulinde Yehova ahikirize ebiragane byage, oko kurhali kuderha oku arhulesire kone buzira burhabale. Yehova arhurhabala. w23.05 buk. 8 cif. 4; buk. 9-10 cif. 7-8

Gurhi rhwakarhabalamwo abandi lyo bayunguka n’entimanano y’Okukengera olufû lwa Yezu? Kobinali, akantu karhanzi rhwakajira kuli kubalalika. Ahanyuma n’okulalika abantu rhurhimanana nabo omu mukolo gw’amahubiri, rhwanajira eliste y’abandi bantu rhwalalika. Kwa lwiganyo, abantu b’omu mulala gwirhu, abirhu banyakazi, abirhu banafunzi n’abandi. Ciru akaba rhurhagwerhi milali minji y’akaratasi, rhwanabarhumira e lien y’omulali gw’ecielektronike. Nkaba rhwanasomerwa okubona bantu banji bashuzize oku mulali gwirhu! (Muh. 11:6) Okakengera oku abantu rhulalika nkaba banaba bagwerhe amadoso bakarhudosa, bwenene erhi akaba barhalisag’ija oku ntimanano yirhu ciru n’enguma. Co cirhumire kwanaba kwinja rhurhanye oku madoso bakarhudosa n’okucirheganya okugashuzako. Ciru n’enyuma z’okuja aha Kukengera olufû lwa Yezu, abantu basimisibwe banaba na madoso manji. Rhulonzize rhujire ebi rhwakanahasha embere z’Okukengera olufû lwa Yezu, amango g’okulukengera, n’enyuma z’aho lyo rhurhabala balya “bagwerhe irala” bayunguke n’eyo ntimanano.​—Ebj. 13:48, NWT. w24.01 buk. 12 cif. 13, 15; buk. 13 cif. 16

Ebibliya eganirire bantu munani bafûlagwa n’okulama hanw’igulu. Wanacihiriraho omuhigo gw’okuyiga bwinja-bwinja ngasi muguma gw’eyo myanzi. Amango oli wajira ntyo, olonze n’amasomo eyo myanzi yakakuyigiriza. Okarhanya lugenda gurhi ngasi lwiganyo luyerekinemwo oku Nnâmahanga agwerhe irala n’obuhashe bw’okufûla abafîre. Na kulusha byoshi, orhanye oku bufûke bw’obulagirire bwenene, ko kuderha obufûke bwa Yezu. Okengere oku hali amagana g’abantu babwine Yezu enyuma z’okufûka kwage banahamiriza oku afûsire n’ogo guli musingi mwinja gw’obuyemere bwirhu. (1 Kr. 15:3-6, 20-22) Rhuvuzire omunkwa bwenene enyanya z’eciragane ca Yehova c’obufûke! Rhwanayemera n’obwalagale oku eco ciragane cayish’ihikirira, na Yehova agwerhe irala n’obuhashe bw’okucihikiriza. Lekagi rhuhige okugendekera rhwazibuhya obuyemere bwirhu mw’obo bulangalire bwinja bwenene. Omu kujira ntyo, rhwanagendekera rhwayegera bwenene Nnâmahanga wirhu, olaganyize ngasi muguma wirhu ntya: ‘Abazigirwa bawe bafûka!’​—Yn. 11:23. w23.04 buk. 8 cif. 2; buk. 12 cif. 17; buk. 13 cif. 20

Olugero n’obwirhohye gali morhere gaba gashushine bwenene. Erhi rhwakaba rhuli ba lugero, rhurhakacisegezako obwenge bwenene na kandi rhunahugûkwe oku hali ebintu rhurhakahash’ijira. Erhi akaba rhuli birhohye, rhunakenge abandi n’okubona oku bali ba bulagirire bwenene kurhulusha. (Fl. 2:3) Kanji-kanji, omuntu w’olugero kandi aba muntu mwirhohye. Gideoni ali mulume wa lugero na mwirhohye. Erhi malahika wa Yehova abwira Gideoni oku Yehova acishozire ye ly’acungula Abaisraheli kurhenga omu maboko g’Abamidyani b’emisi bwenene, oyo mulume mwirhohye ashuza ntya: “Enyumpa yirhu yo ngonyo bwenene omu bûko bwa Manasé, na nani nie munyi kulusha w’omu nyumpa ya Larha.” (Bac. 6:15) Aciyumva nk’arhagwerhi obuhashe bw’okuhikiriza ogo mukolo, cikone Yehova al’imumanyire bwinja. Kugerera oburhabale bwa Yehova, Gideoni ahikiriza ogo mukolo bwinja. Abagula banajire okwabo koshi lyo bayerekana olugero n’obwirhohye omu ngasi kantu. (Ebj. 20:18, 19) Barhacikungira obuhashe bwabo erhi ebi bahikirizize; barhanacibona ba busha enyanya z’amagosa gabo erhi buzamba bwabo. w23.06 buk. 3 cif. 4-5

Okuvunyungulwa kw’irhwe lya Shetani, kwayish’ihikirizibwa enyuma za myaka 1 000 na kulusha kurhangira buno. (Maf. 20:7-10) Embere oko kuhikire, Ebibliya elebire ebi bintu byash’iyidundaganya igulu. Burhangiriza, amashanja gayish’iyaliza ‘omurhûla n’akalembe!’ (1 Ts. 5:2, 3) Amalibuko madarhi gayish’irhondera “caligumiza,” hano amashanja garhera amadîni goshi g’obunywesi. (Maf. 17:16) Enyuma z’aho, Yezu ayish’itwira bene bantu olubanja, omu kuberûla empene n’ebibuzi. (Mt. 25:31-33, 46) Cikone, Shetani, arhayish’igoyole. Bulya aba ashombire abantu ba Yehova bwenene, ayish’ishumya omulungano gw’amashanja Ebibliya ehamagire Gogi w’omu cihugo c’Amagogi gurhere abantu balunga okuboko enterekêro ecîre. (Eze. 38:2, 10, 11) Kasanzi kalebe, abashige amavurha bacisigire bayish’ihekwa e mpingu lyo bacilunga haguma na Kristu n’emirhwe yage y’omu mpingu balwe ivita lya Harmagedoni, bwayish’iba buzindikiriza bw’amalibuko madarhi. (Mt. 24:31; Maf. 16:14, 16) Enyuma z’aho, Oburhegesi bwa Kristu bw’Emyaka Cihumbi okw’igulu bwayish’irhondera.​—Maf. 20:6. w23.10 buk. 20-21 cif. 9-10

Ene, bakozi banji ba Yehova balamire omu bihugo omukolo gwirhu guhanzibwemwo. Banayerese abarhegesi bene bantu obukenge bubakwanine, cikone aka Obadiya, abo bene wirhu na bali birhu bazigirwa banahe Yehova ebi ashinganine, kuli kuderha oku banagendekere babêra bishwekerezi kuli ye yene. (Mt. 22:21) Banayerekane oku baba bayobohire Nnâmahanga omu kumurhumikira ahali h’okurhumikira bene bantu. (Ebj. 5:29) Banajire ntyo omu kugendekera bayaliza omwanzi mwinja n’omu kujira entimanano omu bwifulikwe. (Mt. 10:16, 28) Banajire okwabo koshi lyo bene wabo na bali babo baba n’ebiryo binji by’ekiroho balagirireko. Rhuganirire olwiganyo lwa Mwene Wirhu Henri, olama omu cihugo ciguma c’omu Afrique omukolo gwirhu gwal’ihanzibwemwo kasanzi kalebe. Mw’ako kasanzi, Henri acihâna ly’aj’ahisako ababo Bahamirizi ebiryo by’ekiroho. Ayandisire ntya: “Mba wa nshonyi. . . . Yehova . . . ampire oburhwali nal’ilagirireko.” Ka nawe wanaba n’oburhwali buli nk’obwa Henri? Wanaba nabo erhi wakakayoboha Nnâmahanga omu njira eshinganine. w23.06 buk. 16 cif. 9, 11

Erhi Adamu na Eva bayus’igoma, oko kwakarhumire byabonekana nka birhakahashikana abantu bimana na ba kurhumikira Yehova babumbe igulu. Shetani akarhanyize oku Yehova agwerhe bintu bisungunu byone akajira ly’ahikiriza omuhigo gwage. Kantu kaguma ka muli ebyo bintu kwali kuniga Adamu na Eva n’okulema owundi mulume n’omukazi mwimana ly’ahikiriza omuhigo gwage kuli bene bantu. Cikone Nnâmahanga acijiraga ntyo, Ibilisi akamushobesire oku ali munywesi. Bulya gurhi? Bulya, nk’oku biyerekinwe omu citabu c’Omurhondêro 1:28, Yehova ali erhi abwizire Adamu na Eva oku iburha lyabo lyo lyakabumbire igulu. Erhi nkaba Shetani akarhanyize oku Yehova akalesire Adamu na Eva baburhe iburha lirhali limana lirhakanahashire ciru n’ehitya okuhikira okuba limana. (Muh. 7:20; Rm. 3:23) Yehova acijiraga ntyo, buzira karhinda, Ibilisi akamushobesire oku anayabirwe okuhikiriza omuhigo gwage. Bulya gurhi? Bulya oko kwakarhumire Nnâmahanga arhahikiriza omuhigo gwage gw’okujira igulu Paradizo n’okuliyunjuza iburha limana na lya kurhumikira lya Adamu na Eva. w23.11 buk. 6 cif. 15-16

Yehova anarhuhe obulongozi bw’obwalagale kugerera Akanwa kage na kugerera ikubuliro lyage. Nta cirhumire rhugwerhe c’okuyushûla kantu kalebe oku bulongozi arhuha. (Mig. 3:5-7) Co cirhumire, rhurhayushûla kantu kalebe oku biyandisirwe omu Bibliya erhi kuhiriraho abirhu bemezi amarhegeko lugenda ebi Ebibliya erhadesiri. Shetani anakolese “oburhebanyi bw’obusha” n’“ebintu by’omusingi by’er’igulu” ly’arheba abantu ba Nnâmahanga erhi kujira bagabikanemwo. (Kl. 2:8, NWT) Omu myaka igana mirhanzi, ebyo byal’ihiziremwo efilozofiya zal’iyimangire oku ntanya za bene bantu, enyigirizo z’Abayahudi zirhal’ipatine n’Amandiko, n’enyigirizo zal’idesire oku Abakristu bagwasirwe barhumikire Irhegeko lya Musa. Ebyo byali bya burhebanyi bulya byakag’irhuma abantu barhasegeza obwenge kuli Yehova, Nshôko y’obwenge bw’okunali. Ene, Shetani anakolese ebyombo by’okuyaliza emyanzi n’esite z’e Enternete z’okuganira na bantu banji ly’alumiza entanya zirhagwerhi musingi n’emyanzi y’obunywesi etungwa n’ebirongozi by’epolitike. w23.07 buk. 16 cif. 11-12

Yehova al’igwerhe akantu kinja akajijire ly’ahikiriza omuhigo gwage ciru akaba Shetani, Adamu na Eva bamugomire. Ahali h’okuba munywesi, Yehova ayerekana oku ali wa kulangalirwa omu kuleka Adamu na Eva baburhe abana. Yehova ayerekana oku erhi akahiga okujira kantu kalebe, ntabyo byakamuhanza okukahikiriza. Ayerekine n’obwalagale oku omuhigo gwage gwakahikirire omu kuhiraho “iburha” lyakayokwire abana ba Adamu na Eva bakarhumikire. (Murh. 3:15; 22:18) Shetani agwasirwe abe aciyumvirhe kubi lugenda omupango Yehova arhôlaga gw’okuhâna engombôlo! Bulya gurhi? Bulya ogo guli mupango guyimangire oku buzigire burhali bwa kucikaliza. (Mt. 20:28; Yn. 3:16) Shetani arhajira obo borhere. Aba wa kucikaliza. Bicigi byayish’iba kugerera ogo mupango gw’engombôlo? Oku buzinda bw’Emyaka Cihumbi, iburha limana na lya kurhumikira lya Adamu na Eva lyayish’ilama omu paradizo hanw’igulu, nk’oku Yehova al’ihizire kurhenga aha murhondero. w23.11 buk. 6 cif. 17

Rhunarhumikire irhegeko lya Yehova liyerekine oku obuzine n’omuko biba bitagatifu. Bulya gurhi? Bulya Yehova adesire oku omuko gushushanyize obuzine, n’obo obuzine eba ngalo ya ngulo ndarhi bwenene kurhenga emwage. (Lev. 17:14) Oku murhondero erhi Yehova ayemerera bene bantu oku bakalya enyama, abarhegeka barhakag’ilya omuko. (Murh. 9:4) Acibir’igalukira er’irhegeko erhi aha Abaisraheli Irhegeko lya Musa. (Lev. 17:10) Kandi arhegesire embaraza eri yalongoza y’omu myaka igana mirhanzi erhegeke Abakristu boshi ‘baciyase . . . n’omuko.’ (Ebj. 15:28, 29, NWT) Rhunarhumikire er’irhegeko buzira kudundagana erhi rhurhôla emihigo lugenda eby’okubukwa. Kandi rhunacihangane bwenene okukulikira amakanuni ga Yehova galengerire g’olungezi lwinja. Omu kukolesa enderho z’olwiganyo, entumwa Paolo erhuhanwire ‘rhubabaze’ erhi kuniga ebirumbu by’omubiri gwirhu, ko kuderha oku rhugwasirwe rhurhôle omuhigo muzibu-zibu lyo rhuyaka enyifinjo mbi z’omubiri. Rhunayake okulola erhi okujira akantu koshi-koshi kakarhuma rhwajira ecijiro c’eby’enshonyi.​—Kl. 3:5; Ayu. 31:1. w23.07 buk. 15 cif. 5-6

Nkaba bulya Samusoni al’izigire Dalila bwenene, arhahashaga okuhugûkwa ebi al’ilonzize okujira. Abe ntyo ko byali erhi nanga, Dalila agendekire okuseza Samusoni amubwire aha emisi yage yakag’irhenga na buzinda ahikira aha amubwira. Eby’okugayisa kuli kubona oku er’igosa lya Samusoni lyarhumire aheza emisi yage arhanacigendekeraga ayemerwa na Yehova omu kasanzi kalebe. (Bac. 16:16-20) Samusoni ahikirwa n’amazibu madarhi enyanya z’okulangalira Dalila ahali h’okulangalira Yehova. Abafilistini bamugwarha banamurhomola amasu. Bamushwekera omu vile y’e Gaza n’abo bantu bamujira muja w’okushwa emogomogo. Enyuma z’aho Abafilistini bamubonesa nshonyi erhi barhimanana okw’idinye lilebe. Bajirira mungu wabo w’obunywesi ohamagalwa Dagoni enterekêro nnene, bulya bal’iyemire oku ye wahizire Samusoni omu maboko gabo. Lyo bashekera Samusoni, bamurhenza omu prizo n’okumulerha kw’er’idinye mpu ‘abasimise.’​—Bac. 16:21-25. w23.09 buk. 5-6 cif. 13-14

Nkaba owirhu munyakazi erhi owirhu mwanafunzi anarhudosa bulya gurhi rhurhumikira makanuni malebe g’olugenzi. Rhwanajira okwirhu koshi lyo rhuhalira obwemere bwirhu omu njira eyerekine oku rhukenzire n’entanya z’omumvirhiza wirhu. (1 Pt. 3:15) Co cirhumire ahali h’okurhanya oku er’idoso lyage ciri cirhero, rhwanarhanya lugenda gurhi lyakarhurhabalamwo rhumanye ebiri bya bulagirire kuli ye. Habe hali cirhumire cici cashumyagya omuntu adose idoso, kuli kwinja rhumushuze omu njira y’obutûdu na ya lukogo. Erhi rhwakajira ntyo, ishuzo lirhu lyanashumya omuntu ashanje entanya anal’igwerhe. Kwa lwiganyo, erhi owirhu munyakazi akarhudosa bulya gurhi rhurhajira idinye ly’ensiku z’okuburhwa, rhwanarhanya ntya: K’ali acidosa erhi rhurhaba rhuyemerirwe okugeza akasanzi kinja haguma n’abandi? Rhwanarhuliriza oyo wirhu munyakazi omu kumuyeresa oku rhushagalusire bwenene okubona aba ashibirire ababo banyakazi. Oko kwanarhuha obulyo bw’okuganira naye omu njira y’obwîra ebi Ebibliya edesire okubiyerekire ensiku z’okuburhwa. w23.09 buk. 16-17 cif. 10-11

Luli lukengwa lunene bwenene okukolesa akasanzi kacisigire lyo rhuhâna obuhamirizi oku bantu b’amashanja goshi. Entumwa Petro erhuyinginzire ‘rhukacifinja’ okuyisha kw’olusiku lwa Yehova. (2 Pt. 3:11, 12) Gurhi rhwakajiramwo ntyo? Kuli kwinja rhukarhanya bwenene ngasi lusiku, nka bihashikine, oku migisho rhwaba nayo omw’igulu lihyahya. Okacibona oli wayisa ehihusi hicire, oli walya ebiryo binja bwenene, oli wayegereza abazigirwa bawe omu mango g’obufûke, onali wayigiriza abantu balamaga myaka minji egezire lugenda okuhikirizibwa kw’amalebi g’Ebibliya. Okurhanya bwenene kw’ebyo bintu kwanakurhabala ly’ogendekera walinda kwananakulanga ly’orhag’iba nk’orhamanyiri akasanzi rhuli rhwalamamwo. Bulya ‘rhukola rhumanyire’ lugenda amango gayisha, ‘rhurhakarhebwa’ n’abalimu b’obunywesi. w23.09 buk. 27 cif. 5-6.

Emisole yirhu eba ezungulusirwe n’ababo baba “ba kurhayûmva ababusi babo.” (2 Tm. 3:1, 2, Mashi Bible) Bulya gurhi banji mulibo barharhumikira? Baguma na baguma banarhanye oku ababusi babo ziba ndyalya. Ababusi banahûne abana babo bajire ebi bone bayabirwa okujira. Abandi banabone nk’amahano g’ababusi babo gakola ga mîra, garhashinganini, ganarhalusire olugero. Akaba oli musole, ka hali amango nawe orhanya ntyo? Banji banabone oku kuli kuzibu okurhumikira er’irhegeko lya Yehova liri omu lwandiko lw’olusiku lwene. Bici byakakurhabala okujira ntyo? Wanaciyigiriza okurhumikira kugerera olwiganyo lwinja bwenene, ko kuderha Yezu. (1 Pt. 2:21-24) Ali muntu mwimana wagwerhe ababusi barhali bimana. Cikone Yezu akag’ikenga ababusi bage ciru n’amango bakag’ijira amagosa n’okumuyumva kubi.​—Lub. 20:12. w23.10 buk. 7 cif. 4-5

Entumwa Paolo yahugwîre oku enterekêro zal’ihûnyirwe n’Irhegeko lya Musa zirhakahashire okukula ecaha loshi-loshi. Co cirhumire, er’Irhegeko lyali “lyàrhenzibwe.” Muli ntyo, Paolo abayigiriza nyigirizo nguma na nguma nzibu. Akengeza ababo Bakristu lugenda “obulangalire bulushire” buyimangire oku nterekêro ya Yezu yakabarhabire kobinali “okuyemera [okuyegera, NWT] Nnâmahanga.” (Hb. 7:19) Paolo ahugûlira bene wabo Bahabraniya bulya gurhi enjira yabo y’okuharamya y’Ecikristu yali nyinja bwenene kulusha enjira yabo y’okuharamya y’omu mango g’embere. Enjira y’okuharamya y’Abayahudi kushimbana n’Irhegeko cali “cizunguzungu cône c’ebyaciyisha, ci okuli kwônene guli mubiri gwa Kristu.” (Kl. 2:17) Ecizunguzungu ca kantu kalebe eba nshusho kone y’ako kantu, cikone eco cizunguzungu karhaba ako kantu ko na nnene. Ko n’oko, enjira y’okuharamya y’Abayahudi cali cizunguzungu kone c’enjira nyinja bwenene y’okuharamya yakayishire. Rhushinganine rhuhugûkwe omupango Yehova ahizireho lyo rhubabalirwa ebyahya birhu n’okumuha enterekêro ayemire. w23.10 buk. 25 cif. 4-5

Ecitabu ca Daniyeli cigabi ca 11 ciganirire bami babirhi, erhi marhegesi abirhi g’epolitike, bali balwira okurhegeka igulu. Omu kushushanya obo bulebi n’agandi malebi gali omu Bibliya, rhwanahugûkwa oku “omwami w’e mwené” ye Russie n’ebindi bihugo bimulunzire okuboko “n’omwami w’e mukondwe” bo Burhegesi Bukulu bw’Igulu Lyoshi bwa Angleterre na Amérique. Abakozi ba Nnâmahanga balamire omu burhegesi bw’“omwami w’e mwené” bali balibuzibwa n’oyo mwami omu njira y’obwalagale. Bahamirizi baguma baguma bashurhagwirwe banakwebwa omu prizo erhi buyemere bwabo burhuma. Ebijiro by’“omwami w’e mwené” birhali byayobohya bene wirhu cikone biri byarhuma baseza obuyemere bwabo. Bulya gurhi? Bulya bene wirhu bamanyire oku okulibuzibwa kw’abakozi ba Nnâmahanga kuli kwahikiriza obulebi buli omu citabu ca Daniyeli. (Dan. 11:41) Okumanya ntyo kwanarhurhabala rhugendekere rhwazibuhya obulangalire bwirhu n’okubêra bishwekerezi kuli Yehova. w23.08 buk. 11 cif. 15-16

Bulya Yehova aba arhuzigire, anahugûkwe oku rhuciyumva anaba mubidu okurhulanga. Anaciyumve kubi amango rhuli rhwaciyumva kubi. Co cirhumire rhwanayemera n’obwalagale oku arhushuza, erhi rhwakamushenga ntya: “Onnange nka mbonyi y’isu [lyawe].” (Enna. 17:8) Isu ciba cirumbu cizamba na ca bulagirire bwenene c’omubiri. Muli ntyo, omu kurhushushanya n’embonyi y’isu lyage, Yehova ali nk’odesire ntya: ‘Ngasi yeshi omujirire kubi bantu bani, ajirire kubi akantu k’obulagirire bwenene kuli nie.’ Yehova alonzize rhuyemere n’obwalagale oku aba azigire ngasi muguma wirhu. Cikone aba amanyire oku enyanya z’ebyarhuhikire omu kalamo, nkaba rhwanacidosa erhi anarhuzigira. Erhi nkaba ene rhwanaba rhuli rhwalwisa akanga kakarhuma rhurhalangalira obuzigire bwa Yehova. Bici byazibuhya obulangalire bwirhu omu buzigire bwa Yehova? Kuli kuyiga gurhi Yehova ayerekanamwo obuzigire bwage kuli Yezu, oku Bakristu bashige amavurha, na kuli rhweshi. w24.01 buk. 27 cif. 6-7

Ezra ali acibwinire gurhi Yehova arhabire abantu bage omu mango mazibu. Myaka minji embere, omu mwaka gwa 484 Embere za Kano Kasanzi Kirhu (E.K.K.K.), byanahashikana Ezra al’ilamire e Babiloni erhi Mwami Asuerusi ahâna irhegeko ly’okumaliriza Abayahudi bal’ilamire omu Burhegesi bw’e Persi. (Est. 3:7, 13-15) Akalamo ka Ezra kali omu mazibu! Enyanya z’okuyoboha oko, Abayahudi bali omu ngasi “cihugo [provense]”, bacishalisa banaja omu mishibo, buzira karhinda okujira ntyo kwali kuhûna Yehova obulongozi kugerera isala. (Est. 4:3) Orhanye gurhi Ezra n’ababo Bayahudi baciyumvirhe erhi abajiraga ekomplo y’okuniga Abayahudi baba bo banigwa! (Est. 9:1, 2) Ebi Ezra acibwinire mw’ago mango mazibu nkaba byamurheganyize oku mazibu g’amango gali embere, nkaba byanazibuhya obulangalire bwage omu buhashe bwa Yehova bw’okulanga abakozi bage. w23.11 buk. 17 cif. 12-13

Entumwa Paolo yakag’iganirira burhangiriza ‘ebijiro by’amarhegeko,’ ko kuderha irhegeko lya Musa lyahânagwa oku Ntôndo Sinayi. (Rm. 3:21, 28) Bibonekine oku omu nsiku za Paolo, Bakristu baguma na baguma Bayahudi bal’igwerhe amazibu g’okuyemera oku Irhegeko lya Musa n’ebijiro byal’ihûnyirwe n’er’irhegeko byali byamarhenzibwaho. Enyanya z’oko, Paolo aganirira olwiganyo lwa Abrahamu ly’ayerekana oku ‘ebijiro by’amarhegeko’ birhakarhuma omuntu aba mushinganyanya omu masu ga Nnâmahanga. Cikone, obuyemere bo bwakarhuma omuntu aba mushinganyanya omu masu ga Nnâmahanga. Oko kurhuhîre omurhima bulya okumanya ntyo kurhuyemezize n’obwalagale oku rhwanayemerwa na Nnâmahanga. Kuli kuderha oku rhwanaba n’obuyemere muli Nnâmahanga na muli Kristu, n’oko kwanarhuma rhwayemerwa na Nnâmahanga. Oku bundi, “ebijiro” biganirirwe omu Yakobo cigabi ca 2 arhali byo “bijiro by’amarhegeko” Paolo aganiriraga. Yakobo aganirire ebijiro, erhi mikolo Abakristu bajira omu kalamo kabo ka ngasi lusiku. (Yk. 2:24) Ebijiro bya ntyo binayerekane erhi Omukristu agwerhe obuyemere bw’okunali muli Nnâmahanga erhi nanga. w23.12 buk. 3 cif. 8; buk. 4-5 cif. 10-11

Akaba oli warhanya lugenda okuja omu buhya, oshinganine ocishoge bwinjinja omulume waba balo. Okengere oku, oshinganine okulikire obulongozi bw’omulume wacishoga okuja naye omu buhya. (Rm. 7:2; Ef. 5:33) Co cirhumire ocidose ntya: ‘K’ali mulume okuzire kiroho? K’anahire ebintu by’ekiroho oku nafasi ntanzi omu kalamo kage? K’anarhôle emihigo y’obwenge? K’anayemere amagosa gage? K’anakenge abakazi? K’agwerhe obulenga buhûnyirwe ly’antabala omu hali y’ekiroho, y’omubiri, n’ey’ekandalala? Kobinali, akaba olonzize opate omulume mwinja, nawe oshinganine obe mukazi mwinja. Omukazi mwinja aba “murhabâzi” w’iba “omushushire [omuyenezize, NWT].” (Murh. 2:18) Na bulya aba azigire Yehova, anajire okwage koshi lyo iba aba n’irenge linja. (Mig. 31:11, 12; 1 Tm. 3:11) Wanacirheganya okuhikiriza ogo mukolo omu mango gayisha omu kusêza obuzigire bwawe kuli Yehova n’omu kuba murhabazi w’abandi aha kâ n’omu cigamba. w23.12 buk. 22-23 cif. 18-19

Yehova alaganyize oku arhuha obwenge rhulagirireko lyo rhurhôla emihigo minja. Rhuba rhulagirire bwenene oku bwenge burhenga emwa Nnâmahanga erhi rhurhôla emihigo yahuma oku kalamo kirhu koshi. Kandi anarhuhe emisi y’okulembera. Nk’oku ajiriraga entumwa Paolo, Yehova anarhuhe emisi rhulagirireko lyo rhulembera amazibu girhu. (Fl. 4:13) Njira nguma akolesa guli mulala gwirhu gw’ekiroho. Omu budufu bw’embere z’okuhâna akalamo kage, Yezu asalîre n’obushiru. Asemberera Yehova arhalekaga abantu barhanye oku ali muntu ojacira Nnâmahanga. Ahali h’okujira ntyo, Yehova arhabala Yezu omu kurhuma malahika muguma ly’amuha emisi. (Lk. 22:42, 43) Kandi Yehova anarhurhabala omu kukolesa muguma w’omu bene wirhu erhi bali birhu arhuhe omurhima omu kurhuhamagala oku telefone erhi kurhulambagirira. Rhweshi rhushinganine rhukalonza obulyo bw’okubwira abirhu bemezi “akanwa kinja.”​—Mig. 12:25. w23.05 buk. 10 cif. 9-11

Abalesire omukolo gw’amahubiri bajire aha Kukengera olufu lwa Yezu, nkaba banaba bayobohire oku barhayegerezibwe bwinja. Co cirhumire, omanye orhabadosagya amadoso gakababonesa nshonyi erhi kuderha kantu kalebe kakabasarhaza. Abo bene wirhu na bali birhu baba birhu bemezi. Rhunashagaluke okucib’iharamya Yehova haguma nabo! (Enna. 119:176; Ebj. 20:35) Rhuvuzire omunkwa okubona Yezu ajijire omupango lyo rhukakengera olufû lwage ngasi mwaka. Erhi rhujira ntyo, rhunacilerhere obunguke n’okubulerhera abandi omu njira nyinji. (Iz. 48:17, 18) Rhunayushule obuzigire bwirhu kuli Yehova na Yezu. Rhunayerekane oku rhuvuzire omunkwa bwenene kw’ebi barhujirire. Rhunazibuhye obwîra bwirhu haguma na bene wirhu na bali birhu. Kandi nkaba rhwanarhabala abandi bayige gurhi nabo bakashagalukira emigisho engombôlo ehashisize okuba nayo. Lekagi rhujire ebi rhwakanahasha byoshi lyo rhucirheganya lugenda olo lusiku lw’obulagirire bwenene omu mwaka, ko kuderha olusiku lw’Okukengera olufû lwa Yezu! w24.01 buk. 14 cif. 18-19

Gurhi Yehova arhulongozamwo? Burhangiriza, kugerera Akanwa kage Bibliya. Cikone kandi anakolese abantu aba ahizireho lyo barhulongoza. Kwa lwiganyo, anakolese “mushizi mwirhonzi na mwikubagirwa” ly’arhuha ebiryo by’ekiroho birhurhabala okurhôla emihigo y’obwenge. (Mt. 24:45, NWT) Kandi Yehova anakolese abandi balume b’obuhashe lyo barhulongoza. Kwa lwiganyo, abangalizi b’omuzunguko n’abagula b’ecigamba banarhuhe omurhima n’enyigirizo zirhurhabala lyo rhulwisa amazibu girhu. Rhuvuzire omunkwa bwenene oku bulongozi bw’okulangalirwa rhuli rhwahâbwa muli zino nsiku nzinda! Oko kunarhurhabale rhugendekere rhwayemerwa na Yehova n’okugendekera rhwalambagira omw’ibarabara lihêsire ebwa buzine. Ciru akaba ntyo, hali amango rhubona nka kuli kuzibu okukulikira obulongozi bwa Yehova, bwenene amango rhubuhâbirwe n’abantu barhali bimana. Omu mango ga ntyo, rhushinganine rhuyemere bwenene oku Yehova yeri walongoza abantu bage n’oku okukulikira obulongozi bwage kunalerhe emigisho. w24.02 buk. 20 cif. 2-3

Rhwanayushûla obuzigire bwirhu kuli Nnâmahanga omu kuyiga Akanwa kage n’obushiru. Amango oli wasoma Ebibliya, okacihangana okumanya bici ngasi mulongo guyerekine lugenda Yehova. Okacidosa ntya: ‘Gurhi ogu mwanzi guyerekinemwo oku Yehova aba anzigire? Bici ogu mwanzi gunyeresire byakarhuma nazigira Yehova?’ Eyindi njira rhwakayushûlamwo obuzigire bwirhu kuli Yehova kuli kumubwira ngasi mango kugerera isala ebirhuli e murhima byoshi. (Enna. 25:4, 5) Yehova naye, ashuza amasala girhu. (1 Yn. 3:21, 22) Kandi rhushinganine rhuyushûke omu buzigire bwirhu oku bandi. Myaka milebe enyuma za Paulo okuba Mukristu, arhimanine na musole muguma mwinja wakag’ihamagalwa Timoteyo. Timoteyo al’izigire Yehova, anal’izigire abantu. Paolo abwizire Abafilipi ntya: “Nta wundi ngwerhe ncikubagira aka [Timoteyo], owankashibirira obunguke bwinyu n’omurhima gwoshi.” (Fl. 2:20) Bibonekine n’obwalagale oku Paolo al’ishagalukire obuzigire Timoteyo agwerhe kuli bene wabo na bali babo. Buzira karhinda, ebigamba Timoteyo akag’ilambagirira byakag’ilingusa bwenene oku abilambagirira.​—1 Kr. 4:17. w23.07 buk. 9 cif. 7-10

Embere z’Abaisraheli okuja omu Cihugo c’Amalaganyo, Musa afâ. Buzira oyo mulume mwishwekerezi, k’abantu ba Mungu babêzire buzira burhabale? Nanga. Omu kasanzi koshi bagendekire babêra bishwekerezi, Yehova abashibirire. Embere Musa afê, Yehova amubwizire oku ahe Yozwe omukolo gw’okulongoza abantu bage. Musa ajijire amakumi g’emyaka ali akomereza Yozwe. (Lub. 33:11; Lush. 34:9) Na kandi, hali abandi balume banji b’obuhashe bakag’ilongoza: abarhambo b’ebihumbi, ab’amagana, ab’amakumi arhanu, ciru n’ab’ikumi ikumi. (Lush. 1:15) Abantu ba Nnâmahanga bakag’ishibirirwa bwinja. Eliya luli lundi lwiganyo luyerekine ntyo. Ajijire amakumi g’emyaka ali alongoza Abaisraheli omu nterekêro ecîre. Cikone buzinda Yehova amuha ogundi mukolo, omu eneo y’emukondwe y’e Yuda. (2 Bam. 2:1; 2 Nga. 21:12) K’abantu bishwekerezi b’omu bwami bw’e Israheli bw’amûko ikumi balekerirwe? Nanga. Eliya ali amajira myaka minji ali akomereza Elisha. Yehova agendekera ahikiriza omuhigo gwage, n’okushibirira abakozi bage bishwekerezi. w24.02 buk. 5 cif. 12

Abakristu b’e Efezi bal’ikola bali balama nk’oku Akanwa ka Nnâmahanga kadesire, kali nka bulangashane bwakag’ibalongoza. (Enna. 119:105) Abefezi baleka ebijiro by’amadîni g’obunywesi n’olugenzi lw’okujira eby’enshonyi. Barhondera ‘bashusha Nnâmahanga’ banajira okwabo koshi lyo baharamya Yehova n’okumushagalusa. (Ef. 5:1) Ko n’oko, embere rhuyige okuli, rhwali omu mwizimya enyanya z’amadîni n’enyanya z’olugenzi lubi. Baguma na baguma muli rhwe bakag’ijira ensiku nkulu z’amadîni; n’abandi bagwerhe olugenzi lw’okujira eby’enshonyi. Cikone, erhi rhuyiga amakanuni ga Nnâmahanga lugenda aminja n’amabi, rhwajira empindûlo. Rhwarhondera okulama nk’oku alonzize rhulame. N’oko kwarhumire rhwaba na bunguke bunji bwenene. (Iz. 48:17) Ciru akaba ntyo, buno rhuciri rhwalwisa ebyo bintu. Rhushinganine rhugendekere rhwayaka omwizimya rhwalesire enyuma, n’okugendekera ‘rhwayorha nka bana ba bumoleke.’ w24.03 buk. 21 cif. 6-7

Hali amango wakaciyumva oku orhali tayari akucihâna emwa Yehova n’okubatizibwa. Nkaba ocilagirire oku kasanzi k’okujira empindûlo, ly’akalamo kawe kapatana n’amarhegeko ga Yehova, erhi nkaba ocilagirire oku kasanzi kanji ly’ozibuhya obuyemere bwawe. (Kl. 2:6, 7) Abanafunzi boshi b’Ebibliya barhajirira amajambere caligumiza, n’emisole yoshi erhaba tayari okucihâna emwa Yehova n’okubatizibwa oku myaka miguma. Opime okulabiriza amajambere g’ekiroho oli wajira kushimbana n’obuhashe bwawe c’arhali omu kucigerera oku wundi muntu. (Gl. 6:4, 5) Ciru wakahûgukwa oku orhaciba tayari okucihâna emwa Yehova, ogendekere wacihêberaho ogo muhigo. Oshenge Yehova akurhabale ojire empindûlo z’obulagire omu kalamo kawe. (Fl. 2:13) Wanayemera n’obwalagale oku ayumvirhiza isala lyawe n’oku akushuza.​—1 Yn. 5:14. w24.03 buk. 5 cif. 9-10

Mango maguma, Sara al’igayire anabwira Abrahamu oku akag’iciyumva, ciru anamutumuza enyanya z’ago mazibu. Abrahamu al’imanyire oku Sara ali mukazi wa kurhumikira anakag’imulunga okuboko. Amuyumvirhiza anajira okwage koshi ly’ayusa ago mazibu. (Murh. 16:5, 6) Bici oko kurhuyigirizize? Mwe balume, mwe mugwasirwe mukarhôla emihigo eyerekire emilala yinyu. (1 Kr. 11:3) Ciru akaba ntyo, akantu kinja mwakajira kuli kuyumvirhiza bwinjinja n’okusegeza obwenge entanya za bakinywe embere murhôle omuhigo, ci bwenene erhi akaba ogo muhigo gwahûma oku kalamo kabo. (1 Kr. 13:4, 5) Agandi mango, Abrahamu ahiga okuyegereza ebigolo byamuyishiraga buzira kulaliza. Abrahamu abwira Sara aleke ebi akag’ijira byoshi anarheganye migati minji bwenene. (Murh. 18:6) Sara ajira duba-duba analunga ogo muhigo gwa Abrahamu okuboko. Mwe bakazi, ninyu mwanayiga olwiganyo lwa Sara omu kukalunga emihigo y’abalume binyu okuboko. Omu kujira ntyo, mwanazibuhya obuhya bwinyu.​—1 Pt. 3:5, 6. w23.05 buk. 24-25 cif. 16-17

Enyuma za Gideoni okuhirwaho nka muzuzi, okurhumikira kwage n’oburhwali bwage byarhangulwa. Ahâbwa omukolo mudarhi gw’okushereza amazabahu ga Bali ishe akag’ikolesa. (Bac. 6:25, 26) Enyuma z’aho, erhi Gideoni ayus’igusanya omurhwe gw’abasoda, ahâbwa obulongozi kabirhi koshi oku abanyihyeko. (Bac. 7:2-7) Buzinda, abwirwa oku arhere akambi k’abashombanyi omu kagarhi k’obudufu. (Bac. 7:9-11) Abagula bashinganine babe ‘babidu okurhumikira.’ Omugula orhumikira aba mubidu okukulikira ebi Amandiko gadesire n’okushimba obulongozi bw’ikubuliro lya Nnâmahanga. Omu kujira ntyo, anayerese abandi olwiganyo lwinja. Ciru akaba ntyo, okurhumikira kwage kwanarhangulwa. Kwa lwiganyo, nkaba anabona oku kuli kuzibu okukulikira obulongozi ahâbirwe. Omu kanga kaguma na kaguma, nkaba anacidosa erhi bulongozi bulebe bupatine n’ehali erhi kandi buli bwa bwenge. Erhi kandi anahûnwa oku ajire mukolo mulebe gwakarhuma ashwekwa. Gurhi abagula bakayigamwo olwiganyo lwa Gideoni lw’okurhumikira omu kanga ka ntyo? Okayumvirhiza bwinja obulongozi n’okubukolesa. w23.06 buk. 4-5 cif. 9-11