Mwezi gwa 2

Amango Mwami Hezekiya al’ilwazire bwenene, ahûna Yehova amurhabale afume. Yehova amushuza omu kumufumya. (2 Bam. 20:1-6) Oku bundi, erhi entumwa Paolo asemberera Yehova amurhenzemwo “akababo omu mubiri,” Yehova arharhenzagya ago mazibu. (2 Kr. 12:7-9) Mwami Herode al’ilonzize okuniga entumwa Yakobo na Petro. Yakobo anigwa, cikone Petro yehe acizibwa omu njira y’ecisomerine. (Ebj. 12:1-11) Nkaba rhwanacidosa, ‘Bulya gurhi Yehova acizize Petro cikone arhacizagya Yakobo?’ Ebibliya erhadesiri bulya gurhi. Rhwanayemera n’obwalagale oku enjira za Yehova zirhaba za ‘bulenzi.’ (Lush. 32:4, Mashi Bible) Hali amango nkaba rhwakahikirwa na kantu kalebe rhurhal’irhanyizeko. Cikone bulya rhulangalire oku amashuzo ga Yehova oku masala girhu gaba ga bushinganyanya na ga buzigire, rhurhakaba n’akarhinda lugenda enjira acishozire y’okushuzamwo amasala girhu.​—Ayu. 33:13. w23.11 buk. 21 cif. 6

Yakobo mwandisi walongozibagwa n’iroho litagatifu adesire oku abantu b’obwenge baba ‘babidu okurhumikira.’ Orhanye lugenda ebi oko kuhugwîre. Rhushinganine rhube n’irala n’obubidu bw’okurhumikira aba Yehova ahîre bukulu bulebe. Kobinali, Yehova arhakalonza rhurhumikire muntu mulebe orhuhûnyire rhuvune amarhegeko gage. (Ebj. 4:18-20) Nkaba rhwanaciyumva oku kuli kulembu bwenene okurhumikira Yehova ahali h’okurhumikira bene bantu. Kobinali, ensiku zoshi Yehova anarhuhe obulongozi bwimana. (Enna. 19:7) Cikone bene bantu bajira bukulu bulebe bohe barhaba bimana. Ciru akaba ntyo, Larha wirhu w’omu mpingu ahîre ababusi, abarhegesi, n’abagula bukulu bulebe. (Mig. 6:20; 1 Ts. 5:12; 1 Pt. 2:13, 14) Erhi rhubarhumikira, kobinali rhunabe rhuli rhwarhumikira Yehova. w23.10 buk. 6 cif. 2-3

Njira nguma rhwakazibuhyamwo obuyemere bwirhu kuli kurhanya bwenene oku buhashe bwa Yehova. Agwerhe obuhashe bw’okuhikiriza ngasi kantu alaganyize okujira. Anajira ntyo bulya ye Nnâmahanga Ogala-byoshi. (Ayu. 42:2; Mk. 10:27; Ef. 3:20) Abwira Abrahamu na Sara oku baburha omwana-rhabana omu myaka yabo y’obushosi. (Murh. 17:15-17) Kandi, abwira Abrahamu oku iburha lyage lyahâbwa ecihugo c’e Kanani. Bulya omu myaka minji, abantu b’omw’iburha lya Abrahamu, ko kuderha Abaisraheli bali baja e Misri, byakabonekine nk’eco ciragane cirhakahikirira ciru n’olusiku luguma. Cikone cahikirire. Abwira Mariya wali mubikira oku aburha Mugala wa Nnâmahanga yenene, na Yehova alaganyagya okuyisha kw’oyo Mugala omu cindi ciragane ahânaga omw’ishwa ly’e Edeni bihumbi by’emyaka embere z’aho! (Murh. 3:15) Omu kurhanya bwenene oku myanzi eganirire ebiragane Nnâmahanga ahânaga n’okubihikiriza, rhunazibuhye obuyemere bwirhu omu buhashe bwage bw’okulerha igulu lihyahya.​—Yoz. 23:14; Iz. 55:10, 11. w23.04 buk. 28 cif. 10-12

Yehova ashuzize amasala ga Daudi g’okumuhûna amucize. (1 Sam. 19:10, 18-20; 2 Sam. 5:17-25) Nirhu rhwanayemera ntyo n’obwalagale. (Enna. 145:18) Hali amango Yehova arhashuza amasala girhu omu njira rhwal’irhanyizeko. Paolo Ahûna Nnâmahanga amukûle “akababo omu mubiri.” Kasharhu koshi-koshi, Paolo ashenzire Yehova lugenda ago mazibu madarhi. Ka Yehova ashuzize ago masala gage? Neci, cikone arhagashuzagya omu njira Paolo al’ilangalire. Ahali h’okuyusa ago mazibu, Yehova amuha emisi al’ilagirireko ly’agendekera amukolera n’obwishwekerezi. (2 Kr. 12:7-10) Nirhu hali amango Yehova akarhushuza omu njira eri lubero n’eyi rhwal’irhanyizeko. Rhwanayemera n’obwalagale oku kobinali Yehova amanyire enjira nyinja bwenene y’okurhurhabala. Ciru ‘anarhujirira ngasi kantu rhwankashenga erhi kugerereza, ciru analushise.’ (Ef. 3:20) Co cirhumire, ishuzo lyage oku masala girhu lyanayisha omu kasanzi erhi omu njira rhurharhanyizi. w23.05 buk. 8-9 cif. 4-6

Kasanzi oku kandi, kuli kwinja rhweshi rhukarhanya oku ciragane c’Ebibliya c’obufûke bwaba omu mango gayisha. Bulya gurhi? Bulya rhurhakamanya mangaci rhwakarhibukirwa n’obulwala budarhi erhi mangaci rhwakafîrwa n’omuzigirwa wirhu buzira kulaliza. (Muh. 9:11; Yk. 4:13, 14) Obulangalire bwirhu bw’obufûke bwanarhurhabala rhulembere ago mazibu ga ntyo. (1 Ts. 4:13) Amandiko garhuyemezize n’obwalagale oku Larha wirhu w’omu mpingu aba arhumanyire bwinja anaba arhuzigire bwenene. (Lk. 12:7) Yehova Nnâmahanga agwasirwe abe arhumanyire bwinja bwenene ly’acib’irhulema n’oborhere bwirhu bo n’obo n’enkengero zirhu zo n’ezo. Yehova aba arhuzigire bwenene, anarhuhashisize okulama ensiku n’amango, na ciru rhwakafâ ayish’irhufûla! Bulya gurhi rhwanaba n’obuyemere omu ciragane c’obufûke? Bulya rhuba rhuyemire n’obwalagale oku owahânaga eco ciragane agwerhe irala n’obuhashe bw’okucihikiriza. w23.04 buk. 8-9 cif. 2-4

Yozefu na Mariya bakag’ikola haguma lyo bagendekera baseza obwîra bwabo haguma na Yehova. Bal’ihugûsirwe obulagirire bw’okuharamya Yehova haguma omu mulala. (Lk. 2:22-24; 4:16) Olo luli lwiganyo lwinja oku balume na bakabo ene! Akaba mugwerhe abana, aka Mariya na Yozefu, nkaba kwanaba kuzibu okukaja oku ntimanano erhi okupanga akasanzi k’okujira enterekêro y’omulala. Nkaba ciru kwanaba kuzibu bwenene okupanga akasanzi k’okuyiga erhi kusalira haguma mwembi. Cikone, mukengere oku, amango muli mwaharamya Yehova haguma, munamuyegere bwenene n’okuyegerana mwene na nnene. Co cirhumire, muhebe enterekêro ya Yehova oku nafasi ntanzi omu kalamo kinyu. Erhi akaba mugwerhe amazibu omu buhya bwinyu, nkaba murhakashagalukira okuba haguma omu nterekêro y’omulala. Akaba ntyo, murhondere omu kuganirira mwanzi mulebe mofofi na gwa kushagalusa. Okujira ntyo kwanaseza obwîra bwinyu n’irala linyu ly’okujira ebintu by’ekiroho haguma mwembi. w23.05 buk. 22 cif. 7-8

Gurhi oboba bwinja bwarhabiremwo Obadiya? Omu njira nguma, bwarhumire erhaba ndyalya anaba wa kulangalirwa; n’oko kwarhuma Mwami amujira mwimangizi w’enyumpa y’obwami. (Oshushanye na Nehemiya 7:2.) Okuyoboha Nnâmahanga kwa Obadiya kwamuhîre oburhwali bwago-bwago, anal’ilagirire kw’obo borhere bwenene. Alamaga amango g’oburhegesi bw’Omwami mubi Ahabu. (1 Bam. 16:30) Kandi, Yezebeli muka Ahabu wakag’iharamya Bali, al’ishombire Yehova bwenene analonza okurhenzaho enterekêro y’okuli omu bwami bw’e mwenè [Nord]. Ciru anayirha balebi banji ba Nnâmahanga. (1 Bam. 18:4) Erhi Yezebeli arhondera okulongereza abalebi ba Nnâmahanga ly’abaniga, Obadiya arhôla 100 mulibo ‘anafulika caligumiza balêbi makumi arhanu [arhanu] omu lwala, anakaz’ibashegulamwo omugati n’amishi.’ (1 Bam. 18:13, 14) Bacivumbulaga ebi oyo mulume w’oburhwali Obadiya akag’ijira, kobinali akanizirwe. Kobinali, Obadiya ali mwene muntu, arhanal’ilonzize okufâ. Cikone Obadiya al’izigire Yehova bwenene n’abakozi bage kulusha oku al’izigire obuzine bwage yenene. w23.06 buk. 16 cif. 9-10

Yehova agendekire alongoza abantu bage ene nk’oku ajiraga omu mango ga mîra. Ali ajira ntyo kugerera Akanwa kage n’Omugala, oli irhwe ly’ecigamba. Ka hali ebikuyeresire oku Nnâmahanga acigendekire akolesa bene bantu lyo balongoza? Neci. Kwa lwiganyo, rhuganirire ebyabaga enyuma z’omwaka gwa 1870. Charles Taze Russell n’abal’icilunzire haguma naye barhondera okuhugûkwa oku omwaka gwa 1914 gwakabire mwaka gwa bulagirire okubiyerekire Obwami bwa Nnâmahanga. (Dan. 4:25, 26) Obulebi bw’Ebibliya bo bwabarhabire okuhugûkwa ntyo. Ka Yehova akag’ibalongoza omu busagasi bwabo bakag’ijira omu Bibliya? Bibonekine ntyo n’obwalagale. Ebyajirikine omw’igulu omu mwaka gwa 1914 byayerekana n’obwalagale oku Obwami bwa Nnâmahanga bwarhondire okurhegeka mw’ogo mwaka. Ivita lirhanzi ly’Igulu lyarhondera, haba endwala z’okuyahukira, emisisi y’idaho, n’ishali. (Lk. 21:10, 11) Kobinali, Yehova akag’ikolesa abo balume Bakristu b’emirhima minja ly’arhabala abantu bage. w24.02 buk. 22 cif. 11

Rhuli bakozi ba Yehova, rhuba rhumanyire oku aba arhuzigire, n’oku aba alonzize rhube n’akalamo kinja nk’oku binahashikine. (Rm. 8:35-39) Kandi rhuba rhuyemire n’obwalagale oku amakanuni g’Ebibliya ensiku zoshi ganarhulerhere obunguke, erhi rhwakagakolesa. (Iz. 48:17, 18) Cikone, gurhi rhwakajira erhi rhwakahikirwa n’amazibu rhurhal’irhanyizeko? Kwa lwiganyo, omuntu w’omu mulala anarhuvuna omurhima omu njira ndebe. Rhwanaba rhulwazire endwala yakarhuma rhurhajira binji omu mukolo gwa Yehova. Rhwanahikirwa n’amazibu galerhwa n’obuhanya bucilerha bone. Erhi kandi rhwanahagalikwa enyanya z’obuyemere bwirhu. Erhi rhwakahikirwa n’amazibu gali nk’ago, nkaba rhwanacidosa ntya: ‘Bulya gurhi ebi biri byampikira? Ka hali akantu kabi najijire? K’ebi biri byampikira biyerekine oku Yehova arhali angisha?’ Ka hali amango okola ociyumvirhe ntyo? Akaba okola ociyumvirhe ntyo, orhavunikaga omurhima. Banji b’omu bakozi bishwekerezi ba Yehova nabo baciyumvirhe ntyo.​—Enna. 22:1, 2; Hab. 1:2, 3. w23.04 buk. 14 cif. 1-2

Erhi rhwakashumikwa okujira akantu kabi, rhunayake ho n’aho ngasi ntanya erhi ngasi cijiro cakashereza obwîra bwirhu haguma na Nnâmahanga. Yehova arhuhûnyire ‘rhushimbe [rhurhumikire] n’omurhima gwirhu gwoshi.’ (Rm. 6:17) Obulongozi bwage bunarhulerhere obunguke ensiku zoshi, rhurhakacishoga marhegeko gahi gone rhulonzize okurhumikira. (Iz. 48:17, 18; 1 Kr. 6:9, 10) Ibilisi anakolese ebirhero by’omubiri n’eby’ekandalala ly’azambanya omuhigo gwirhu. Omuhigo gwage kuba ‘kurhumira’ ly’ashereza obwîra bwirhu haguma na Yehova. (1 Pt. 5:8) Bakag’iyobohya Abakristu b’omu myaka igana mirhanzi, bakabashurha, n’okubaniga, enyanya z’omuhigo gwabo gw’okubêra bishwekerezi. (Ebj. 5:27, 28, 40; 7:54-60) Shetani acigendekire akolesa okulibuzibwa muli gano mango. Oko kubonekine n’obwalagale muli oku bene wirhu na bali birhu bali bajirirwa n’obukali omu cihugo c’e Russie n’omu bindi bihugo na muli oku abantu barhuhagalika bali balibuza bene wirhu. Kandi Shetani anakolese “obwengehusi” ahanyuma n’okurhuhagalika omu njira zibonekana n’obwalagale.​—Ef. 6:11. w23.07 buk. 15-16 cif. 6-9

Oku wagendekera wayiga Akanwa ka Nnâmahanga, ko n’obuzigire bwawe kuli Yehova bwagendekera bwayushûka. Obo buzigire bunakushumye okakolesa ebi oyiga. Onarhôle emihigo minja eyimangire oku makanuni g’Ebibliya. Onakubûle entanya zawe n’olugenzi lwawe bulya olonzize okushagalusa Nnâmahanga. Nka kula omwana ayiga olwiganyo lw’omubusi wage w’obuzigire, nawe ocihangane okuyiga olwiganyo lwa Sho w’omu mpingu. (Ef. 5:1, 2) Rhwanacidosa ntya: ‘K’obuzigire bwani kuli Yehova bukola busêzire ene kulusha oku bwali erhi mbatizibwa? Kurhenga amango nabatizibagwa, ka ndi nacihangana ly’entanya zani n’ebijiro byani bishushana n’ebya Yehova, bwenene omu kuyeresa bene wirhu na bali birhu obuzigire?’ Erhi akaba “obuzigire wali ogwerhe burhanzi” bwanyihire omu njira ndebe, orhavunikaga omurhima. Akantu kashushine n’ako kahikire Abakristu b’omu myaka igana mirhanzi. Yezu arhalekaga abo Bakristu, na nirhu arhakarhuleka. (Maf. 2:4, 7) Amanyire oku rhwanacib’iyasa obuzigire rhwayumvagya erhi rhurhondera rhwayiga okuli. w23.07 buk. 8 cif. 2-3

Entumwa Petro yajira magosa manji. Burhangiriza, Petro ayerekana oku al’icilangalire bwenene, acikunga oku abêra mwishwekerezi ciru ezindi entumwa zoshi zakayaka Yezu. (Mk. 14:27-29) Enyuma z’aho Petro ayabirwa okugendekera abêra masu. (Mk. 14:32, 37-41) Na kandi, Petro ayaka Yezu erhi bayish’imugwarha. (Mk. 14:50) Buzinda, Petro ahakana kasharhu koshi-koshi oku arhayishi Yezu, ciru ananalapa oku arhamumanyiri. (Mk. 14:66-71) Gurhi Petro ajijire erhi ahugûkwa oku anajijire ecaha cizibu? Avunika omurhima analaka bwenene. (Mk. 14:72) Ahali h’okukalihira Petro enyanya z’amagosa gage, Yezu aganiza omwîra wage anamubwira oku ahâbwa mikolo minji bwenene. (Yn. 21:15-17) Petro al’imanyire oku anajijire ecaha cizibu, cikone agendekera acihangana okujira ebintu binja. Bulya gurhi? Bulya al’imanyire oku Nnawabo Yezu acir’imuzigire. Bici rhuciyigirizize? Yehova alonzize rhuyemere n’obwalagale oku aba arhuzigire n’oku aba mubidu okurhubabalira.​—Rm. 8:38, 39. w24.03 buk. 18-19 cif. 13-15

Ecijiro c’eby’enshonyi canarhuma rhwayumva enshonyi, canarhuma rhwaciyumva ba busha, canarhulerhera izimi rhurhal’ilonzize, cananashaba emilala. Bibonekine n’obwalagale oku okuyaka “enyumpa” ya nyamusirhye w’omukazi kuli kukolesa obwenge. Ahanyuma n’olufû lw’ekiroho, bantu banji bajira ebijiro by’enshonyi banalwale endwala zibalerhera duba-duba olufû lw’okunali. (Mig. 7:23) Omulongo gwa 18 gw’Ecitabu c’Emigani cigabi ca 9 gushwinjire omu kuderha ntya: “Abalâlike ba nyamusirhye w’omukazi, omu rhubanda rhw’ekuzimu bali.” Bulya gurhigi bantu banji bayemera omulali gwage gw’oburhebanyi gubalerhera obuhanya? (Mig. 9:13-18) Murhego muguma gulug’igwarha bantu banji eri pornografi. Bantu baguma na baguma banarhanye oku okulola epornografi kurhakabalerhera mazibu goshi-goshi. Lubero n’oko, epornografi enalerhere abantu amazibu, enabanyihize obukenge, n’okubajira baja. Erhi omuntu akalola epornografi, kunabe kuzibu okukûla ezo nfoto omu bwenge. Na kandi, epornografi erharhabala abantu okuyaka enyifinjo mbi; cikone enazijire zibe na misi minji. (Kl. 3:5; Yk. 1:14, 15) Kobinali, bantu banji balola epornografi banahikire aha bajira ebijiro by’enshonyi. w23.06 buk. 23 cif. 10-11

Ciru agandi mashanja gakahagalika obo Burhegesi Bukulu bw’Igulu Lyoshi bwa Angleterre na Amérique, garhakarhôla enafasi yabo. Rhumanyire ntyo bulya “ibuye” lishushanyize Obwami bwa Nnâmahanga lyavunyungula ezo nshando, ko kuderha ecigabi c’eyo nsalamu cishushanyize omulungano gwa Angleterre na Amérique. (Dan. 2:34, 35, 44, 45) K’oyemire n’obwalagale oku obulebi bwa Daniyeli lugenda enshando z’ecuma n’ibumba buli b’okuli? Erhi akaba oyemire ntyo, oko kwanabonekana kugerera akalamo kawe. Orhakasegeza obwenge oku kulonza ensaranga nyinji erhi kuba na birugu binji bwenene by’omubiri bulya omanyire oku hano hofi-hofi er’igulu libi lyasherezibwa. (Lk. 12:16-21; 1 Yn. 2:15-17) Okuhugûkwa obo bulebi kandi kwanakurhabala obone obulagirire bw’omukolo gw’okuhubiri n’okuyigiriza. (Mt. 6:33; 28:18-20) Obu rhwamayusa rhwayiga kwa bofofi obo bulebi, wanacidosa er’idoso, ‘K’emihigo ntôla eyerekine oku nyemire n’obwalagale oku hano hofi-hofi Obwami bwa Nnâmahanga bwashereza amarhegesi goshi ga bene bantu?’ w23.08 buk. 11 cif. 13-14

Okuba n’olugero kwanakurhabala oyemere oku emyaka yawe, amagala gawe n’akanga olimwo byanarhuma orhajira binji ene nk’oku wakalonzize. Aka Barzilayi, okaba mubidu okulahira mikolo milebe erhi akaba amagala gawe, erhi emyaka yawe birhakakuyemerera okuhikiriza eyo mikolo. (2 Sam. 19:35, 36) Aka Musa, okayemera oburhabale n’okuha abandi mikolo milebe amango bihûnyire okujira ntyo. (Lub. 18:21, 22) Olugero lwa ntyo lwanakurhabala orhakag’ilangalira ebi orhakahash’ijira byakarhuma warhama. Rhurhagwasirwi rhucitumuze enyanya z’emihigo mibi y’abandi. Rhurhakarhôlera abandi emihigo; na ngasi mango rhurhakabacîka oku mazibu galerhwa n’emihigo mibi barhôzire. Kwa lwiganyo, omwana-rhabana erhi omwana-nyere anahikira aha acishoga okuleka okukolera Yehova. Ogo muhigo gwanababaza ababusi bwenene. Cikone, ababusi bacitumuza enyanya z’omuhigo mubi gw’omwana wabo banabe bali bacibarhuza omuzigo muzirho. Obo burhali buzirho Yehova alonzize bacibarhuze. w23.08 buk. 29 cif. 11-12.

Akirhu, Samusoni naye arhali mwimana, co cirhumire hali amango arhôzire emihigo mibi. Muhigo muguma omu mihigo arhôlaga gwamudwirhire amazibu madarhi bwenene. Enyuma za Samusoni okukola nka muzuzi omu kasanzi kalebe, “anaciyinjibana omukazi omu kabanda ka Soreki, izino ly’oyo mukazi ye Dalila.” Embere z’aho, Samusoni al’isimine n’omukazi Mufilistini, cikone oko “kwarhengaga emwa Nyakasane [Yehova, NWT],” bulya “akazagilonza engwarhiro y’akigenzo emunda Abafilistini bâli.” Enyuma z’aho, Samusoni abêra omu nyumpa y’omukazi Mufilistini w’embaraga omu vile y’e Gaza. Mw’ako kanga, Nnâmahanga aha Samusoni emisi ly’ahêka enyumvi z’omuhango gw’eyo vile n’oko kwarhuma yasigala buzira bulanzi. (Bac. 14:1-4; 16:1-3) Cikone byanahashikana Dalila ali Muisraheli, co cirhumire obwîra bwa Samusoni haguma naye burhakabire bulyo bw’okulwisa Abafilistini. Dalila ayemera ensaranga nyinji bwenene Abafilistini bamuhaga ly’alenganya Samusoni. w23.09 buk. 5 cif. 12-13

Oburhimanya bwanarhurhabala lyo rhuba batûdu. Omuntu w’oburhimanya anayerekane oborhere bw’okucihasha erhi akajisibwa mbaka lugenda obwemere bwage. Kanji-kanji erhi abantu barhudosa amadoso barharhubwira ecirhumire badosa. Co cirhumire embere rhushuze, kuli kwinja rhukahugûkwa oku nkaba rhurhamanyiri ebyarhumaga omuntu adosa er’idoso. (Mig. 16:23) Rhuganirire gurhi Gideoni ashuzagya bene Efrayimu. Bamulongoza mpu bulya gurhi arhabalalikaga embere lyo baj’ilwisa haguma abashombanyi b’Abaisraheli. Ka hali ecirhumire cifulike carhumaga bagaya ntyo? Ka bwali bucibone nkaba? Abe ntyo ko byali erhi nanga, Gideoni ayerekana oburhimanya. Acihangana okuhugûkwa oku bakag’iciyumva anabashuza omu njira y’obutûdu. Bunguke buhi oko kwadwirhe? Ebibliya edesire oku erhi aganira nabo omu njira ya ntyo, “oburhe bwatwika.”​—Bac. 8:1-3. w23.09 buk. 16 cif. 8-9

Yehova na Yezu bajira obwîra bwa hofi-hofi bwenene bwakabaho egarhi k’omwana n’ishe. Buzira karhinda, Yehova ayumvirhe malumwa manji bwenene erhi abona Omugala ajirirwa kubi, alahirwa, n’okulibuzibwa.Ngasi mubusi wafîrirwe n’omwana wage aba amanyire amababale manji bwenene galerhwa n’okufîrwa n’omwana. Rhujira obuyemere busezire omu bulangalire bw’obufûke, cikone oko kurharhuma rhurhayumva malumwa manji erhi rhufîrwa n’omuzigirwa wirhu. Olo lwiganyo lurhurhabire okuhugûkwa gurhi Yehova agwasirwe abe aciyumvirhe erhi abona Omugala alibuzibwa n’okufâ omu mwaka gwa 33 Kano Kasanzi Kirhu (K.K.K.). (Mt. 3:17) Embere olusiku lw’Okukengera olufû lwa Yezu luhike, ka wanapanga okuyiga lugenda engombôlo omw’ifunzo lyawe wene erhi omu Nterekêro yinyu y’Omulala? N’olusiku lw’Okukengera olufû lwa Yezu, orhayibagiraga okulola evideo y’enterekêro yago-yago y’esezi. Erhi rhwakarheganya omurhima gwirhu lugenda entimanano y’Okukengera olufû lwa Yezu, rhwanahasha okurhabala abandi lyo nabo bayunguka nayo.​—Ezr. 7:10. w24.01 buk. 11 cif. 10-12

Njira nguma rhwakahâbwamwo emisi kurhenga emwa Yehova kuli kukamuyegera kugerera isala. Lyo Yehova ashuza amasala girhu, anarhuha “obuhashe bunene . . . burhali bwirhu.” (2 Kr. 4:7, Mashi Bible) Kandi rhwanahâbwa emisi omu kusoma Akanwa kage n’okukarhanyako bwenene. (Enna. 86:11) Omwanzi gwa Yehova kuli rhwe guli omu Bibliya ‘gurhagaluka kwone.’ (Hb. 4:12, Mashi Bible) Omu kuyegera Yehova kugerera isala n’okusoma Akanwa kage, wanahâbwa emisi olagirireko ly’olembera, ly’ogendekera waba n’omwishingo, erhi ly’ohikiriza omukolo muzibu. Rhuganirire gurhi Yehova azibuhizemwo omulebi Yona. Yona ali amayaka omukolo muzibu Yehova amuhûnaga ajire. Oko kwarhuma alinz’iheza obuzine bwage omu mulaba mudarhi ahira n’obuzine bw’abali mw’obo bwarho omu mazibu. Erhi bamukweba omu nyanja acirhimana ali ahantu arhalisag’ihika bundi; omu nda y’ensamaki nnenene. Gurhi Yona ajijire ly’ahâbwa emisi amango ali yene omu nda y’ensamaki? Ayegera Yehova kugerera isala.​—Yon. 2:1, 2, 7. w23.10 buk. 13 cif. 4-6

Ciru akaba Abakristu b’omu myaka igana mirhanzi bo Petro ayandikiraga ago maruba abirhi, Yehova ajijire ago mandishi gaba cigabi c’Akanwa Kage. Co cirhumire, ene rhwanayunguka n’ago maruba. (Rm. 15:4) Rhuzungulusirwe n’abantu barhagwerhi buyemere omu bulebi bw’Ebibliya. Abantu barhuhagalika banarhushekera bulya hakola hali myaka minji rhuli rhwaderha oku obuzinda bw’er’igulu buli hofi. Bantu baguma na baguma banaderha oku obuzinda burhakayisha ciru n’ehitya. (2 Pt. 3:3, 4) Erhi omumvirhiza wirhu, owirhu munyakazi, erhi omuntu w’omu mulala gwirhu, akaderha enderho za ntyo; obuyemere bwirhu bwanadundagana. Petro ahugwîre ebyakarhurhabala. Bantu baguma na baguma banabone nka Yehova alegamire okulerha obuzinda bw’er’igulu libi. Enderho za Petro zanarhurhabala lyo rhugendekera rhwaba n’entanya nyinja, bulya arhukengezize oku, oku Yehova abona akasanzi kuba lubero bwenene n’oku bene bantu bakabona. (2 Pt. 3:8, 9) Kuli Yehova emyaka cihumbi kw’eba nka lusiku luguma. Yehova aba mulembedu, arhalonzizi ciru omuntu yeshi-yeshi asherezibwe. Hano olusiku lwage luhika, er’igulu lyahikira obuzinda. w23.09 buk. 26-27 cif. 2-5.

Bici byarhumaga entumwa Paolo yayandikira Abakristu Bahabraniya bal’ilamire omu Yudeya amaruba? Bibonekine oku hali birhumire bibirhi by’obulagirire. Ecirhumire cirhanzi, kwali kubaha omurhima. Banji muli bo bakuliraga omw’idîni ly’Eciyahudi. Abakulu b’er’idîni lyabo ly’embere bakag’ibashekera okubona babîre Bakristu. Bulya gurhi? Bulya Abakristu barhal’igwerhe hekalu nyinja bwenene y’okuharamizamwo, barhal’igwerhe mazabahu g’okuherako Nnâmahanga enterekêro, barhanal’igwerhe bakuhani b’okubajirira omukolo omu hekalu. Oko kwakavunyire abanafunzi ba Kristu omurhima kwakanarhumire obuyemere bwabo bwazambanya. (Hb. 3:12, 14) Ciru oko kwakashumize baguma na baguma muli bo bagaluke omw’idîni ly’Eciyahudi. Bwa kabirhi, Paolo ayeresa abo Bakristu Bahabraniya oku barhakag’ijira obushiru boshi-boshi lyo bahugûkwa enyigirizo mpyahya z’ekiroho erhi enyigirizo nzibu z’ekiroho, ko kuderha “ebiryo bizibu” biba omu Kanwa ka Nnâmahanga. (Hb. 5:11-14) Bibonekine oku baguma na baguma muli bo bacir’icishwekire oku Irhegeko lya Musa. w23.10 buk. 24-25 cif. 3-4

Bakazi baguma na baguma banacishoge okubêra balamba (Mt. 19:10-12) Oyemere n’obwalagale oku Yehova na Yezu barhagayaguza Abakristu balamba. Omw’igulu lyoshi, bali birhu balamba banarhabale bwenene ecigamba. Okuzigira abandi n’okubashibirira kunashumye abo bakazi Bakristu babe ba nnina wa bantu banji na bali babo omu hali y’ekiroho. (Mk. 10:29, 30) Baguma na baguma babire bakozi b’akasanzi koshi. Abakazi Bakristu banajire binji omu mukolo gw’amahubiri omw’igulu lyoshi. (Enna. 68:11) Ka wanajira emipango ene ly’oja omu mukolo gw’akasanzi koshi? Wanajira omukolo gw’obupainiya, wanaja omu mukolo gw’obubasi, erhi oku Beteli. Okasalira enyanya z’omuhigo gwawe. Okaganiza abandi bahikire omuhigo gwa ntyo, ly’omanya ebi oshinganine ojire ly’ohikira omuhigo gw’okuja omu mukolo gw’akasanzi koshi. Buzinda opange ebintu wakahash’ijira byakakurhabala ly’ohikira omuhigo gwawe. Erhi wakahikira omuhigo gw’okuja omu mukolo gw’akasanzi koshi, oko kwanakuyigulira enjira y’okujira bintu binja binji omu mukolo gwa Yehova. w23.12 buk. 22 cif. 16-17

Bulya amalibuko madarhi gayegerire, rhuhugûsirwe oku kuli kwa bulagirire bwenene rhurhumikire irhegeko lirhuhûnyire rhujire omukolo gw’amahubiri. Cikone, rhwanabona nka kuli kuzibu okusegeza obwenge oku mukolo gwirhu gw’amahubiri erhi akaba rhugwerhe amazibu g’okubula ensaranga, kandi erhi akaba omukolo gwirhu gw’amahubiri guli gwahagalikwa. Bici byakarhurhabala lyo rhuhira obunguke bw’Obwami oku nafasi ntanzi? Okugendekera rhwayemera n’obwalagale oku “Nyamuzinda” ali eluhande lwirhu. Arhurhabala erhi rhwakagendekera rhwashokoza obunguke bw’Obwami ahali h’okushokoza obunguke bwirhu rhwene. Co cirhumire ntaco rhwakayoboha. (Hag. 2:4) Alonzize rhusegeze obwenge oku mukolo guyokola obuzine gw’okujira abanafunzi. Hageyo ayinginga olubaga lwa Yehova lurhondere omukolo gw’okuyubaka buhyahya ehekalu. Yehova abalaganya oku ‘abagisha’ bakajira ntyo. (Hag. 2:18, 19, Mashi Bible) Na nirhu rhwanayemera n’obwalagale oku Yehova agisha obushiru bwirhu erhi rhwakahira oku nafasi ntanzi omukolo arhuhîre rhujire. w23.11 buk. 16 cif. 8; buk. 17 cif. 11

Omu maruba ayandikiraga Abaroma, entumwa Paolo yayerekine oku bene bantu boshi baba banyabyaha. Muli ntyo, gurhigi Nnâmahanga akasimisibwa na nirhu n’okurhuhamagala bashinganyanya? Paolo aganirire olwiganyo lwa Abrahamu ly’arhabala Abakristu boshi b’emirhima minja babone ishuzo ly’er’idoso. Yehova ahamagire Abrahamu oku ali mushinganyanya amango al’ilamire omu cihugo c’e Kanani. Bulya gurhi Yehova ahamagalaga Abrahamu oku ali mushinganyanya? K’ajijire ntyo bulya Abrahamu akag’irhumikira bwenene Irhegeko lya Musa? Nanga ciru n’ehitya. (Rm. 4:13) Ishanja ly’Abaisraheli lyahâbirwe er’irhegeko myaka 400 na kulusha enyuma za Nnâmahanga okuhamagala Abrahamu oku ali mushinganyanya. Akantu k’obulagirire bwenene, bicigi byarhumaga Nnâmahanga ahamagala Abrahamu oku ali mushinganyanya? Omu lukogo lwage lurhashinganinwi, Yehova ahamagire Abrahamu oku ali mushinganyanya enyanya z’obuyemere bwage.​—Rm. 4:2-4. w23.12 buk. 3 cif. 4-5

Mwo n’obo budufu omulebi Yonatani abwira Mwami Daudi omwanzi guli aho nyanya, Yehova abwira Natani oku arhali Daudi ye wamuyubakira ehekalu. (1 Nga. 17:3, 4, 11, 12) Gurhi Daudi ajijire erhi abwirwa ogo mwanzi? Asegeza obwenge bwage oku kugusanya ensaranga n’ebikolanwa omugala Salomoni akalagirireko ly’ajira ogo mukolo. (1 Nga. 29:1-5) Ho n’aho enyuma z’okubwira Daudi oku arhali ye wayubaka ehekalu, Yehova ajira endagano haguma naye. Alaganya Daudi oku muntu muguma w’omu iburha lyage akarhegesire ensiku n’amango. (2 Sam. 7:16) Omw’igulu lihyahya, orhanye omwishingo Daudi ayish’iba nago omu kumanya oku ali ashagalukira akalamo idako ly’oburhegesi bw’emyaka cihumbi bwa Yezu, Mwami w’omu iburha lyage! Ogo mwanzi gurhurhabire okubona oku ciru akaba rhurhahashiri okujira ebi rhwal’ilangalire okujira byoshi omu mukolo gwa Yehova, Nnâmahanga wirhu anarhugisha omu zindi njira nyinji rhurhal’irhanyizeko. w23.04 buk. 15-16 cif. 8-10

Nkaba wanabona oku okusoma bigabi bilebe by’Ebibliya kwanakurhuliriza amango oyobohire. Kwa lwiganyo, nkaba wanarhulirizibwa omu kusoma ecitabu ca Ayubu, Ennanga, n’Emigani ciru n’enderho za Yezu ziri omu Mateyo cigabi ca 6. Amango oli wasalira Yehova n’okusoma Akanwa kage, wanabona oburhulirize bwage. Rhwanayemera n’obwalagale oku Yehova arhurhabala ensiku zoshi erhi amazibu gakarhuhikira omu kalamo kirhu. Nta mango rhwakaba kahumba. (Enna. 23:4) Yehova arhulaganyize oku arhulanga, arhujira rhurhahuliganaga, arhurhabala, n’okurhurhuliriza. Lugenda Yehova, olwandiko lwa Izaya 26:3, Mashi Bible ludesire ntya: “Onahâne omurhûla kuli balya bakenga amarhegeko; bulya bakulangâlîre.” Co cirhumire, olangalire Yehova, n’okujira oku wakanahasha ly’oyunguka n’oburhabale bwage. Erhi wakajira ntyo, wanacib’iba n’emisi ciru n’omu mango g’amazibu. w24.01 buk. 25 cif. 16-17

Ezo nderho zalongozibagwa n’iroho lya Nnâmahanga ziri mw’olo lwandiko ziri zahikirira ene. Ezi nderho zikulikire z’okurhuliriza nazo ziyerekire kano kasanzi kirhu: “Bagala bawe boshi bàbà baganda ba Nyakasane [Yehova, NWT], n’omurhûla gw’abana bawe gwàbà murhûla munene. Wasimîkira oku bushinganyanya; . . . Nta kuciba n’obwôba, bulya burhankacikuyegera.” (Iz. 54:13, 14) Ciru na ‘nyamuzinda w’en’igulu,’ Shetani ye nnene, arhagwerhi obuhashe bw’okuyimanza omukolo gw’okuyigiriza abantu ba Yehova bali bahikiriza. (2 Kr. 4:4) Enterekêro ecîre yagalwirwe, erhakanaciyahukirwa n’obugoma ciru n’ehitya. Yagendekera yaba ho ensiku n’amango. Nta murasano erhi cikolanwa c’okulwa ivita catulwa mpu lyo cirhurhera cabêrwe! w24.02 buk. 4 cif. 10

Rhuli Bakristu, rhunarhôle kwa buzibu-zibu eciragane cirhu c’okucihâna emwa Yehova. Oko kunahume oku mihigo yirhu n’ebijiro birhu lugenda ebintu biyerekire omulala. Rhunajire okwirhu koshi lyo rhushibirira amalagirire g’abantu b’omulala gwirhu, cikone ensiku zoshi rhunashokoze ebi Yehova arhuhûnyire ahali h’okushokoza obulonza bw’abantu b’omulala gwirhu. (Mt. 10:35, 36; 1 Tm. 5:8) Cikone, hali amango oko kwakarhuma rhurhaba n’omurhûla haguma n’abantu b’omulala gwirhu lyo rhushagalusa Yehova. Yehova ye warhondezagya omulala, anaba alonzize rhube n’omwishingo omu mulala. (Ef. 3:14, 15) Erhi akaba rhulonzize rhube n’omwishingo gw’okunali, rhushinganine rhujire ebintu nk’oku Yehova alonzize. Oyemere n’obwalagale oku Yehova aba ashagalukire ebi ociyima ly’omuharamya amango oli washibirira omulala gwawe n’okubajirira omu njira y’obuzigire n’obukenge.​—Rm. 12:10. w24.02 buk. 17 cif. 11; buk. 18 cif. 13