Mwezi gwa 1

Yezu ‘abona’ oyo muzire wal’ifîrirwe na buzinda “amufa bwonjo”. (Lk. 7:13) Cikone Yezu arhayumvizagya oyo muzire obwonjo kone; amuyeresa obwonjo. Kobinali, aganiza oyo muzire omw’izu ly’okuhâna omurhima, anaderha ntya: “Orhalakaga.” Enyuma z’aho ajira kantu kalebe ly’amurhabala. Afûla mugala w’oyo muzire na buzinda “amuha nnina.” (Lk. 7:14, 15) Bici rhwakaciyigiriza kugerera ecisomerine Yezu ajiraga c’okufûla mugala w’omukana? Rhuyizire oku rhushinganine rhukayeresa abafîrirwe obwonjo. Aka Yezu, rhwanayeresa abantu bafîrirwe obwonjo omu kuba ba kulolereza bwinja. Rhwanayeresa abandi obwonjo omu kuderha n’okujira ebi rhunahashire byoshi lyo rhubarhabala n’okubarhuliriza. (Mig. 17:17; 2 Kr. 1:3, 4; 1 Pt. 3:8) Ciru n’enderho nsungunu erhi bijiro bisungunu byanabarhabala bwenene. w23.04 buk. 5-6 cif. 13-15

Ciru akaba Yezu al’imanyire oku omwîra wage anafîre, acibêrera aho ali zindi nsiku ibirhi na buzinda arhondera omubalamo gw’okuja e Betaniya. Co cirhumire erhi Yezu ahika e Betaniya, Lazaro ali amajira nsiku ini afîre. Yezu ajira kantu kalebe kalerhera abîra bage obunguke n’okulerhera Nnâmahanga obukuze. (Yn. 11:6, 11, 17) Ogo mwanzi gurhuyigirizize isomo lilebe lugenda obwîra. Rhanya kw’oku: Erhi Mariya na Marta barhumira Yezu omwanzi barhamuhûnaga oku ayishe e Betaniya. Bamubwizire kone oku omwîra wage muzigirwa alwazire. (Yn. 11:3) Erhi Lazaro afâ, Yezu akamufuzire erhi anali kuli. Cikone, ahiga okuja e Betaniya ly’aba haguma n’abîra bage Mariya na Marta. K’ojira omwîra wakayisha ali kurhabala orhanamuhûnyire oburhabale? Muli ntyo omanyire oku wanalangalira oku akurhabala “omu mbaka.” (Mig. 17:17) Lekagi rhube bîra ba ntyo oku bandi, aka Yezu! w23.04 buk. 10 cif. 10-11

Amango rhuli rhwalwisa mazibu malebe, rhwanabona nk’igulu lihyahya lya Yehova lirhakayisha ciru n’olusiku luguma. K’oko kuli kuderha oku obuyemere bwirhu buzambanyize? Nanga. Rhurhôle olwiganyo. Omu mango g’ecanda cidarhi, wanabona nk’amango g’empondo garhakahika ciru n’ehitya. Cikone amango g’empondo ganahike. Ko n’oko, amango rhuvunisire omurhima bwenene, rhwanabona nka nta lusiku igulu lihyahya lyanayishe. Cikone erhi rhwakaba rhugwerhe obuyemere buzibu, rhunamanye oku ebiragane bya Nnâmahanga byahikirira. (Enna. 94:3, 14, 15; Hb. 6:17-19) Erhi rhwakaba rhuyemire ntyo n’obwalagale, rhwanagendekera rhwahira enterekêro rhuha Yehova oku nafasi ntanzi omu kalamo kirhu. Rhuganirire akandi kanga kahûnyire rhube n’obuyemere buzibu: omukolo gw’amahubiri. Bantu banji banabone nk’“omwanzi mwinja” lugenda igulu lihyahya lya Nnâmahanga lyayisha, guli mwinja bwenene birhakanahashikana gube gw’okuli. (Mt. 24:14, NWT; Eze. 33:32) Rhurhalekaga rhube n’akarhinda akabo lugenda ebi Yehova ali arhuyigiriza. Ly’oko kurharhuhikiraga, rhugwasirwe rhugendekere rhwazibuhya obuyemere bwirhu. w23.04 buk. 27 cif. 6-7; buk. 30 cif. 14

Ka hali amango okola ocidosize erhi Yehova ali ashuza amasala gawe? Akaba neci, arhali wene ocidosa ntyo. Bene wirhu na bali birhu banji nabo badesire oku banacidose ntyo, ci bwenene amango bali balwisa amazibu. Erhi akaba rhuli rhwalibuka, rhwanabona nka kuli kuzibu okuhugûkwa gurhi Yehova ali ashuza amasala girhu. Bulya gurhi rhwanayemera n’obwalagale oku Yehova anashuze amasala g’abakozi bage? Amandiko garhuyemezize n’obwalagale oku Yehova aba arhuzigire bwenene n’oku rhuba ba ngulo ndarhi kuli ye. (Hag. 2:7; 1 Yn. 4:10) Co cirhumire arhuhûnyire rhukamuhûna oburhabale kugerera isala. (1 Pt. 5:6, 7) Aba alonzize okurhurhabala lyo rhugendekera rhwamuyegera n’okulembera amazibu girhu. Omu Bibliya, kanji-kanji rhunasome oku Yehova ashuzize amasala g’abakozi bage. Ka hali olwiganyo orhanyizeko? w23.05 buk. 8 cif. 1-4

Mariya acijirire yene obwîra haguma na Yehova; obuyemere bwage burhal’iyimangire kw’ebi Yozefu akag’ijira. Al’imanyire Amandiko bwinja. Kandi, akag’icihiriraho akasanzi k’okurhanya bwenene. (Lk. 2:19, 51) Buzira karhinda, obwîra bwinja Mariya agwerhe haguma na Yehova bwarhuma aba mukazi mwinja bwenene. Ene, bakazi banji banacihangane okujira nk’oku Mariya akag’ijira. Kwa lwiganyo, mwali wirhu muguma ohamagalwa Emiko adesire ntya: “Amango nali mulamba, nal’igwerhe eprograme yani niene y’ebintu by’ekiroho. Cikone enyuma z’okuja omu buhya, nabona oku bulya ibanie akag’ishenga enyanya zirhu n’okulongoza enterekêro y’omulala, obuyemere bwani bwal’ikola buyimangire kw’ebi akag’ijira. Nahikira aha nabona oku nshinganine mbarhule omuzigo gwani niene lugenda obwîra bwani haguma na Yehova. Lero nacihiriraho akasanzi k’okuba niene haguma na Mungu wani omu kusalira, okusoma Amandiko, n’okurhanya bwenene oku ntanya zage.” (Gl. 6:5) Mwe bakazi, erhi mwakagendekera mwaseza obwîra bwinyu haguma na Yehova, babalo banaba na birhumire binji by’okumukunga n’okumuzigira.​—Mig. 31:30. w23.05 buk. 21 cif. 6

Rhurhaburhanwa oboba bwa Yehova; rhugwasirwe rhuciyigirize okuba nabo. Njira nguma rhwakajiramwo ntyo kuli kulolereza obulemi. Oku rhugendekera rhwabona obwenge bwa Yehova, obuhashe bwage, n’obuzigire bunji ajira kuli rhwe rhubona kugerera ‘ebiremwa alemire,’ ko rhunagendekera rhwamukenga bwenene n’okumuzigira. (Rm. 1:20) Eyindi njira rhwakaciyigirizamwo okuyoboha Nnâmahanga kuli kukasalira ngasi mango. Oku rhugendekera rhwasalira, ko rhunagendekera rhwabona oku Yehova ali muntu w’okunali. Ngasi mango erhi rhumuhûna emisi y’okulembera amazibu, oko kunarhukengeze oku ajira misi minji bwenene. Ngasi mango erhi rhumuvuga omunkwa oku ngalo arhuhîre y’Omugala, rhunakengere oku aba arhuzigire bwenene. N’erhi rhusemberera Yehova oburhabale amango rhugwerhe mazibu malebe, rhunakengere oku aba wa bwenge bunji bwenene. Amasala ga ntyo ganarhume rhwakenga Yehova bwenene. Kandi ganazibuhye omuhigo gwirhu gw’okuyaka okujira akantu koshi-koshi kakashereza obwîra bwirhu haguma naye. w23.06 buk. 15 cif. 6-7

Ensiku zoshi Yehova anahe abantu bage amarhegeko g’obwalagale. Kwa lwiganyo, embaraza eri yalongoza y’omu myaka igana mirhanzi yayerekine njira isharhu Abakristu bagwasirwe bagendekere basimikamwo: (1) omu kuyaka okuharamya ensalamu, n’okuharamya Yehova yenene, (2) omu kurhumikira irhegeko lya Yehova liyerekine oku omuko guba mutagatifu, na (3) omu kurhumikira amakanuni g’Ebibliya galengerire g’olugenzi. (Ebj. 15:28, 29) Ene, gurhi Abakristu bakagendekera basimikamwo muli ezo njira isharhu? Omu kuharamyaYehova yenene n’okumurhumikira. Al’irhegesire Abaisraheli oku bacishwekere kuli ye yenene. (Lush. 5:6-10) N’erhi Ibilisi arhangula Yezu, Yezu ayerekine n’obwalagale oku rhugwasirwe rhuharamye Yehova yenene. (Mt. 4:8-10) Co cirhumire, rhurhaharamya nsalamu. Kandi rhurhaharamya bene bantu, babe birongozi by’amadîni, abakulu b’epolitike erhi abantu bamanyikine bwenene omu micezo erhi omu by’okucishagalusa, rhurhababona nka bamungu. Rhunaharamye olya “walemaga ebintu byoshi” yene.​—Maf. 4:11. w23.07 buk. 14-15 cif. 3-4

Abantu omw’igulu lya Shetani barhambwirwe n’ebijiro by’enshonyi n’epornografi. (Ef. 4:19) Co cirhumire, rhugwasirwe rhugendekere rhwayoboha Nnâmahanga n’okuyaka ebibi. Ecitabu c’Emigani cigabi ca 9, ciganirire bakazi babirhi bashushanyizibwe n’obwenge n’obuhwinja. Ngasi muguma muli bo aganirirwe nk’oli walalika abarhagwerhi bumanye, ko kuderha ‘abarharhimanya.’ Ngasi muguma ali nk’oli waderha ntya: ‘Yisha omu mwani olye ebiryo.’ (Mig. 9:1, 4-6) Cikone, ebihikire abayemire ngasi mulali biri lubero bwenene. Lola omulali guhânyirwe na “nyamusirhye w’omukazi.” (Mig. 9:13-18) Ali ayakuza n’oburhwali abarharhimanya omu kuderha erhi, ‘Mugere eno munda’ rhujire idinye. Bici byabahikira? “Abalâlike ba nyamusirhye w’omukazi, omu rhubanda rhw’ekuzimu bali.” Rhurhonzirwe lugenda ‘omukazi w’embuga’ n’‘omukazi mugênzi.’ Ebibliya erhubwizire ntya: “Enyumpa yage ehengemîre ebwa lufû.” (Mig. 2:11-19) Ecitabu c’Emigani 5:3-10 cirimwo obundi burhonde lugenda owundi mukazi “mugênzi” olya ‘amagulu gage garhandalikira ebwa lufû.’ w23.06 buk. 22 cif. 6-7

Abagula bagwasirwe bayerekane olwiganyo lwinja omu kuba ba lugero. (1 Tm. 3:2, 3) Kwa lwiganyo, omugula arhashinganini akarhanya mpu entanya zage zo zayemerwa ensiku zoshi mpu bulya kone agwerhe myaka minji kulusha abandi bagula. Anahugûkwe oku iroho lya Yehova lyanashumya ngasi muntu omu mbaraza y’abagula ly’ahâna entanya zakabarhabala barhôle omuhigo mwinja. N’erhi akaba nta kanuni k’Ebibliya kavunyirwe, abagula b’olugero banabe babidu okulunga okuboko omuhigo guyemirwe na bagula banji omu mbaraza ciru akaba bakalonzize barhôle omuhigo guli lubero. Abakristu banabe na bunguke bunji omu kuba ba lugero. Rhunashagalukire obwîra bwinja haguma na bene wirhu na bali birhu, n’ecigamba cinabe n’omurhûla. Rhunashagalukire amorhere n’enkomedu ziri lubero z’abantu ba Yehova. Na kandi, kuba kwinja okumanya oku ciru akaba rhweshi rhuba lubero, rhunaharamye Nnâmahanga nka mulala gugwerhe ecinyabuguma. N’akantu k’obulagirire bwenene, rhunashagaluke omu kumanya oku rhuli rhwayiga olwiganyo lwa Yehova, Nnâmahanga wirhu w’olugero. w23.07 buk. 25 cif. 16-17

Daniyeli Akag’iyiga obulebi bw’Ebibliya anagwerhe ecirhumire cinja cimushumize, al’ilonzize amanye okuli. Kandi Daniyeli ali mwirhohye, al’imanyire oku Yehova anarhabale abantu baba bamumanyire banalama kushimbana n’amakanuni gage bahugûkwe obulebi bw’Ebibliya. (Dan. 2:27, 28) Daniyeli ayerekine oku ali mwirhohye bulya akag’ilangalira oburhabale bwa Yehova. (Dan. 2:18) Kandi akag’iyiga bwinja-bwinja. Akag’ijira obusagasi omu mandiko galongozibagwa n’iroho gali ho mw’ago mango. (Yer. 25:11, 12; Dan. 9:2) Gurhi wakayigamwo olwiganyo lwa Daniyeli? Okarhanya lugenda ebikushumya oyige obulebi bw’Ebibliya. K’onayige obulebi bw’Ebibliya bulya olonzize bwenene okumanya okuli? Akaba ntyo ko biri, Yehova akurhabala. (Yn. 4:23, 24; 14:16, 17) Bantu Baguma na baguma banajire ntyo bulya balangalire oku babona ebiyerekine oku Ebibliya erhalongozibagwa n’iroho lya Nnâmahanga. Muli ntyo, banarhanye oku okujira ntyo kwabaha ecirhumire cinja c’okucihiriraho amakanuni gabo bo nnene lugenda ebinja n’ebibi n’okulama kushimbana n’ago makanuni. Cikone, rhushinganine rhube n’ecirhumire cinja cirhushumize okuyiga obulebi bw’Ebibliya. w23.08 buk. 9-10 cif. 7-8

Rhwanacibarhuza omuzigo muzirho omu kulangalira ebi rhurhakahash’ijira amango rhuli rhwacigerera oku bandi. (Gl. 6:4) Erhi ngasi mango rhwakakacigerera oku bandi, rhwanakayagalwa nabo n’okuba n’iroho ly’akamashigwe. (Gl. 5:26) Erhi rhwakajira ntyo, rhwanacihangana okujira ebirhalusire obuhashe bwirhu n’ebi ehali zirhu zirharhuyemeriri okujira. N’erhi akaba “okulangalira ehi omuntu arhahikakwo, [kuba] kulîsibwa n’amagala,” rhwanavunika omurhima bwenene erhi rhwakalangalira ebi rhurhakahash’ihikiriza ciru n’ehitya! (Mig. 13:12) Okujira ntyo kwananyihya emisi yirhu n’okurhuma rhwashuba amagulu omu kamashigwe kirhu k’obuzine. Orhacilongezagyako binji bwenene kulusha ebi Yehova akuhûnyire. Nta mango akakuhûna omuhe ebi orhagwerhi. (2 Kr. 8:12) Oyemere n’obwalagale oku Yehova arhakagerera ebi oli wajira kw’ebi abandi bali bajira. (Mt. 25:20-23) Anashagalukire ebi oli wamujirira n’obugumaguma bwawe boshi, obwishwekerezi bwawe, n’obulembedu bwawe. w23.08 buk. 29 cif. 10-11

Yehova ashuza omusengero gwa Samusoni gw’okumuhûna oburhabale omu kurhondeza enshôko y’amishi omu njira y’ecisomerine. Erhi Samusoni anywa kw’ago mishi, “ashub’izibuha.” (Bac. 15:19, Mashi Bible) Bibonekine oku eyo nshôko mpyahya y’amishi yagendekire yabaho myaka minji enyuma z’aho erhi omulebi Samweli alongozibwa n’iroho litagatifu ly’ayandika ecitabu c’Abaciranuzi. Abaisraheli bakag’ibona ago mishi gali gahulula nkaba bakag’ikengera oku erhi bakacikubagira Yehova, anabarhabala omu mango balagirire oku burhabale. Nirhu rhushinganine rhukahûna Yehova oburhabale ciru rhwakaba rhugwerhe buhashe buhi erhi rhube rhwahikirizize bintu bihi omu mukolo gwage. Rhushinganine rhube ba lugero n’okuyemera oku erhi rhwakacikubagira Yehova lyone rhwakahash’ijira ebi arhuhûnyire rhujire. Nk’oku Samusoni azibuhaga erhi anywa amishi Yehova amuhaga, nirhu rhwanaba n’emisi omu hali y’ekiroho amango rhuli rhwayunguka n’oburhabale Yehova arhuhîre.​—Mt. 11:28. w23.09 buk. 4 cif. 8-10

Gurhi rhwakajira erhi rhwakarhimanana n’akanga kazibu, kwa lwiganyo amango muntu mulebe ali azinza izino lya Nnâmahanga wirhu erhi ali agayaguza Ebibliya? Rhushinganine rhuhûne Yehova iroho lyage litagatifu n’obwenge bwage lyo rhujira omu njira y’obutûdu. Gurhigi erhi buzinda rhwakahugûkwa oku rhurhajijire bwinja nk’oku rhwal’ishinganine rhujire? Kandi rhwanashenga Yehova lugenda ako kanga n’okurhanya lugenda gurhi rhwakajira bwinja agandi mango. Erhi rhwakajira ntyo, Yehova anarhuha iroho lyage litagatifu lyo rhucihasha n’okuyerekana obutûdu. Hali mandiko manji g’Ebibliya gakarhurhabala amango kuli kuzibu kuli rhwe okuderha omu njira y’obutûdu. Iroho lya Mungu lyanarhukengeza ago mandiko. (Yn. 14:26) Kwa lwiganyo, amakanuni gali omu citabu c’Emigani ganarhurhabala rhube batûdu. (Mig. 15:18) Kandi eco citabu c’Ebibliya ciyerekine obunguke bw’okucihasha omu kanga kazibu.​—Mig. 10:19; 17:27; 21:23; 25:15. w23.09 buk. 15 cif. 6-7

Entumwa Petro al’imanyire oku al’iyegerire obuzinda bw’akalamo kage. Omu makumi g’emyaka akozire n’obwishwekerezi, alambagire haguma na Yezu, arhondeza amahubiri omu eneo nyinji mpyahya, anakola omu mbaraza eri yalongoza. Cikone hali ogundi mukolo ajijire. Hofi omu mwaka gwa 62-64 Kano Kasanzi Kirhu (K.K.K.), alongozibwa n’iroho litagatifu ly’ayandika maruba abirhi, ko kuderha ecitabu c’Ebibliya ca 1 Petro na 2 Petro. (2 Pt. 1:13-15) Petro ayandikaga amaruba gage abirhi galongozibagwa n’iroho omu mango ababo bemezi bali omu “marhangulo ga ngasi lubero.” (1 Pt. 1:6) Abantu babi bakag’ilonza okulerha enyigirizo z’obunywesi n’olungezi lubi omu cigamba c’Ecikristu. (2 Pt. 2:1, 2, 14) Abakristu bal’ilamire omu Yeruzalemu bali hofi bacibonere “obuzinda bw’ebintu byoshi,” ko kuderha okusherezibwa kw’olo lugo n’ehekalu kugerera emirhwe y’Abaroma. (1 Pt. 4:7) Buzira karhinda, amaruba ga Petro garhabire Abakristu lyo babona ebi bal’ishinganine bajire lyo balembera ago mazibu bagwerhe mw’ago mango n’agandi mazibu gakabahikire enyuma z’aho. w23.09 buk. 26 cif. 1-2

Aka Yezu, kanji-kanji rhunaciyigirize okurhumikira amango rhuli omu kanga kazibu. Kwa lwiganyo, omu mango g’obulwala bw’okuyahukira bw’e COVID-19 bwazind’igigera, ago mango erhi rhuhûnwa oku rhuleke okukajirira entimanano omu Nyumpa z’Obwami n’okuleka omukolo gw’amahubiri gw’enyumpa oku yindi, ka kwali kuzibu kuli we okurhumikira? Ciru akaba ntyo, okurhumikira kwawe kwakulanzire, kwarhuma waba omu cinyabuguma n’abinyu bemezi, wanashagalusa Yehova. Rhweshi rhukola rhucirheganyize bwinja okurhumikira ngasi bulongozi rhwayish’ihâbwa amango g’amalibuko madarhi. Okurhumikira obo bulongozi kwayish’iyokola obuzine bwirhu! (Ayu. 36:11) Rhunacishoge okurhumikira Yehova bwenene bulya rhuba rhumuzigire rhunalonzize okumushagalusa. (1 Yn. 5:3) Rhurhakabona ebi rhwalyula Yehova oku bintu binja byoshi arhujirire. (Enna. 116:12) Cikone rhwanamurhumikira n’okurhumikira balya bagwerhe bukulu bulebe. Erhi rhurhumikira, rhunayerekane oku rhugwerhe obwenge. N’abantu bagwerhe obwenge banashagaluse omurhima gwa Yehova.​—Mig. 27:11. w23.10 buk. 11 cif. 18-19

Erhi malahika akakuganiza, ka wanayumvirhiza ebi alonza okukubwira? Ene, malahika ali aganiza abantu ba “ngasi mulala, na ngasi bûko, na ngasi lulimi, na ngasi ishanja.” Bici ali ababwira? “Murhinye Nyamuzinda, munamuhê irenge . . . Muharâmye Lulema w’amalunga n’igulu.” (Maf. 14:6, 7) Yehova ye Nnâmahanga muguma w’okuli ngasi muntu ashinganine aharamye. Rhushinganine rhube ba kuvuga omunkwa bwenene okubona arhuhîre obulyo bwinja bw’okumuharamya omu hekalu yage nnene! Ehekalu y’ekiroho byo bici kobinali, na ngahi rhwakabona emyanzi ehânyire amahugûlo lugenda yo? Ehekalu y’ekiroho erhaba nyumpa y’okunali. Guba mupango Yehova ahizireho ly’abantu bamuharamya omu njira ayemire kugerera enterekêro y’engombôlo ya Yezu. Entumwa Paolo yahugwîre ogo mupango omu maruba yayandikiraga Abakristu Bahabraniya b’omu myaka igana mirhanzi bal’ilamire omu Yudeya. w23.10 buk. 24 cif. 1-2

Omu mwaka gwa 522 Embere za Kano Kasanzi Kirhu (E.K.K.K.), abashombanyi b’Abayahudi bahikira aha bayemeza oburhegesi bw’Abapersi buyimanze omukolo gw’okuyubaka buhyahya ehekalu ya Yehova. Cikone Zakariya ayemeza Abayahudi n’obwalagale oku Yehova akolesa iroho lyage litagatifu ly’arhenza ngasi cihanzo. Omu mwaka gwa 520 Embere za Kano Kasanzi Kirhu (E.K.K.K.), Dariyusi ayemerera Abayahudi bagendekeze omukolo gw’okuyubaka ehekalu abaha n’oburhabale bw’ensaranga. Na kandi arhegeka baguvernere b’omu eneo yabo oku babarhabale. (Ezr. 6:1, 6-10) Yehova alaganya abantu bage oku akabarhabire erhi bakahizire omukolo gw’okuyubaka buhyahya ehekalu oku nafasi ntanzi. (Hag. 1:8, 13, 14; Zak. 1:3, 16) Abayahudi bagalukaga bahâbwa omurhima n’abo balebi, banacib’irhondera omukolo gw’okuyubaka ehekalu omu mwaka gwa 520 Embere za Kano Kasanzi Kirhu (E.K.K.K.), banayusa ogo mukolo gw’okuyubaka ehekalu embere za hofi myaka irhanu. Bulya Abayahudi bahebire obulonza bwa Yehova oku nafasi ntanzi ciru akaba bal’igwerhe amazibu, Yehova abarhabala. N’oko kwarhuma baharamya Yehova n’omwishingo.​—Ezr. 6:14-16, 22. w23.11 buk. 15 cif. 6-7

Ciru akaba bantu banji bayumvirhe lugenda Abrahamu, banji barhaba bamanyire binji okubimuyerekire. Cikone, omanyire binji okubiyerekire Abrahamu. Kwa lwiganyo, omanyire oku Abrahamu ahamagirwe “ishe wa balya boshi bayemera.” (Rm. 4:11) Nkaba wanacidosa ntya: ‘Ka nanahasha okushimba olwiganyo lw’obuyemere Abrahamu al’igwerhe?’ Neci, wanahasha. Njira nguma rhwakabamwo n’obuyemere buli nk’obwa Abrahamu kuli kuyiga olwiganyo lwage. Omu kurhumikira irhegeko lya Nnâmahanga, Abrahamu ahamira omu cihugo ca kulî, ayusa amakumi g’emyaka ali alama omu mahema, anayemera okuhâna omugala muzigirwa Izaki nterekêro. Ebyo bijiro byoshi byayerekine obuyemere busezire. Obuyemere bwa Abrahamu n’ebijiro byage byarhumire ayemerwa na Nnâmahanga n’okuba mwîra wage. (Yk. 2:22, 23) Yehova alonzize rhweshi, ciru na nawe, rhushagalukire eyo migisho. Oko ko kwarhumaga alongoza abandisi b’Ebibliya, Paolo na Yakobo, kugerera iroho lyage litagatifu lyo bayandika lugenda olwiganyo lwa Abrahamu. w23.12 buk. 2 cif. 1-2

Bali birhu, mukuze obulenga bw’okuganira bwinja. Abakristu bashinganine bakaganira bwinja. Muli ntyo, entumwa Yakobo erhuhîre ihano ly’obulagirire omu kuderha ezo nderho. Erhi wakayumvirhiza bwinjinja amango abandi bali baganira, onayerekane oku ocihizire ahali habo, erhi ‘kubabêra lukogo.’ (1 Pt. 3:8, Mashi Bible) Erhi akaba orhahugûsirwi bwinja ebi omuntu anaderhaga erhi oku ali aciyumva, wanamudosa amadoso omu njira eshinganine. Buzinda ocihe akasanzi k’okurhanya embere oderhe. (Mig. 15:28) Ocidose ntya: ‘K’ebi naderha biri by’okuli binali bya kuyubaka? Ka biri bya bukenge na binja?’ Oyige olwiganyo lwa bali birhu bakuzire kiroho baganira omu njira nyinja. (Mig. 31:26) Olabirize bwinja oku baganira. Oku wagendekera wayiga bwinja obo bulenga bw’okuganira, ko n’obwîra bwawe haguma n’abandi bwagendekera bwaba bwinja. w23.12 buk. 21 cif. 12

Ene, Yehova anakolesa omulala, abîra, erhi abagula ly’arhurhabala. Cikone, erhi akaba rhuvunisire omurhima, nkaba rhwanalonza okuciyegula oku bandi. Rhwanashagalukira kone okubêra rhwe nnene. Biyumvikine oku omuntu anajira ntyo. Bici rhwakajira lyo rhuhâbwa oburhabale bwa Yehova? Ojire okwawe koshi ly’orhaciyegulaga oku bandi. Erhi rhwakaciyegula oku bandi, nkaba rhwanarhondera okucisegezak’obwenge rhwe nnene n’okubusegeza oku mazibu rhugwerhe. Entanya za ntyo zanarhuma rhurharhôla emihigo minja. Kobinali, rhweshi rhunalonze okubêra kahumba kasanzi kalebe, ci bwenene erhi akaba rhuli rhwalwisa mazibu malebe. Cikone erhi rhwakaciyegula oku bandi kasanzi kanji, rhwanaba rhuli rhwayaka enjira Yehova ali akolesa ly’arhurhabala. Co cirhumire, okayemera oburhabale bw’omulala gwawe, abîra bawe, n’abagula. Obone oku Yehova ali abakolesa ly’akurhabala.​—Mig. 17:17; Iz. 32:1, 2. w24.01 buk. 24 cif. 12-13

Abanaziri bakag’ijira eciragane c’okurhamomwa emviri zabo. Eyo yali njira y’okuyerekana oku bacihanyire okurhumikira Yehova loshi-loshi. Eby’okugayisa kuli kubona oku hali amango Abanaziri barhal’ikenzirwe erhi kulungwa okuboko omu Israheli. Ago mango, byal’ihûnyire Omunaziri abe n’oburhwali bunji ly’agendekera akenga eciragane cage n’okugendekera aba lubero n’abandi. (Am. 2:12) Bulya rhunacishoge okurhumikira obulonza bwa Yehova, abandi bantu banabone oku nirhu rhuli lubero nabo. Rhuba rhulagirire oku burhwali lyo rhucimanyisa oku rhuli Bahamirizi ba Yehova ebwa kazi erhi ebwa masomo. Oku entanya n’olugenzi lw’abantu b’er’igulu byagendekera byaba bibi bwenene, ko kwanagendekera kwaba kuzibu bwenene kuli rhwe okulama kushimbana n’amakanuni g’Ebibliya n’okuganirira abandi omwanzi mwinja. (2 Tm. 1:8; 3:13) Cikone, ensiku zoshi okengere oku ‘rhunashagaluse omurhima gwa [Yehova]’ erhi rhuba n’oburhwali bw’okuba lubero n’abandi bantu barhamukolera.​—Mig. 27:11; Mal. 3:18. w24.02 buk. 16 cif. 7; buk. 17 cif. 9

Orhanye oku bantu bali lubero bali omu cigamba c’e Roma. Baguma muli bo bali Bayahudi, bal’iyigirizibwe okurhumikira Irhegeko lya Musa, cikone abandi bali b’omu gandi mashanja, banakuliraga omu nkomedu ziri lubero. Bibonekine oku Bakristu baguma na baguma bali bajà cikone abandi bali bantu bal’igwerhe oluhûma, nkaba baguma na baguma muli bo ciru bal’igwerhe abajà babo. Gurhi abo Bakristu bakahimiremwo ezo mbero zoshi zali egarhi kabo n’okuzibuhya obuzigire bwabo? Entumwa Paolo yabahûna ‘bakayankirirana bone na nnene.’ Bici al’ilonzize okuderha? Oluderho lwahindwirwe “kuyankirira” luhugwîre okuyegereza muntu mulebe n’olukogo, nk’okumuyegereza omu nyumpa yawe erhi kumuyemera omu mubalè gw’abîra bawe. Kwa lwiganyo, Paolo abwizire Filemoni gurhi akayankiriremwo Onezimo mujà watorokaga. Abwira Filemoni ntya: “Omuyankirire nk’oku wankanyankirira.” (Fm. 17) Na Akila na Prisila bayankirire Apolo orhal’imanyire binji akabo lugenda idîni ly’Ecikristu, omu ‘kumuhêka haguma nabo.’ (Ebj. 18:26, Mashi Bible) Ahali h’okuleka ezo mbero zali egarhi kabo zirhume bagabikanamwo, abo Bakristu bahimire ezo mbero banayankirirana bone na nnene. w23.07 buk. 6 cif. 13

Obuzigire bwawe kuli Yehova ko kantu kakulu kakushumya ocihâne emwage. Obuzigire bwawe burhashimbini n’oku ociyumva kone. Lubero n’oko, buba buyimangire oku “bumanye burhalimwo magosa” n’“okuhugûkwa omu hali y’ekiroho” ebintu wayizire lugenda Yehova byashumyagya obuzigire bwawe kuli ye buyushuke. (Kl. 1:9, NWT) Okuyiga kwawe Amandiko kwakuyemezize n’obwalagale (1) oku Yehova aba muntu w’okunali, (2) oku Ebibliya ko Kanwa kalongozibagwa n’iroho lyage n’oku (3) anakolese ikubuliro lyage ly’ahikiriza obulonza bwage. Abacihâna emwa Nnâmahanga bashinganine bamanye enyigirizo z’omusingi z’Akanwa kage banarhumikire amarhegeko gage. Banajire okwabo koshi lyo baganirira abandi ebi bayizire. (Mt. 28:19, 20) Obuzigire bwabo kuli Yehova bwayushusire, n’irala lyabo likulu kuba kumuharamya yenene. Ka ntyo ko biyosire kuli we? w24.03 buk. 4-5 cif. 6-8

Abigaili ali muka Nabali, oyu Ebibliya edesire oku ali mudarhi anali mubi. (1 Sam. 25:3) Kushinganine kube kwali kuzibu kuli Abigaili okulama n’omulume wa ntyo. Ka Abigaili agwerhe obulyo akayusizemwo obuhya bwabo? Neci. Ahâbirwe obo bulyo erhi Daudi wakayishir’iba mwami w’Israheli ayish’iyirha iba bulya amujacire anajacira abalume bage. (1 Sam. 25:9-13) Abigaili akayasire n’okuleka Daudi anige Nabali. Arhajiraga ntyo, lubero n’oko ayemeza Daudi amanye akaniga Nabali. (1 Sam. 25:23-27) Bici byarhumaga ajira ntyo? Abigaili al’izigire Yehova, anakag’ikenga amakanuni gage lugenda obuhya. Al’imanyire oku Yehova akag’ibona obuhya oku guli mupango mutagatifu. Al’ilonzize okushagalusa Nnâmahanga, n’oko kushinganine kube ko kwamushumize ajire ebi akanahasha byoshi ly’ayokola iba n’obuhya bwabo. Ajira duba-duba ly’ahanza Daudi okuniga Nabali. w24.03 buk. 16-17 cif. 9-10

Ka hali bantu balebe omu cigamba cinyu bali bacihangana okuba n’akalamo karhahûnyiri bintu binji lyo bacihâna bwenene omu mikolo y’eciteokrasi? Ka hali emisole omanyire eri yayerekana oburhwali bw’okuba lubero n’abandi ebwa masomo, ciru akaba kuli kuzibu kuli bo okujira ntyo? Ka hali abali bacihangana okugendekera babêra bishwekerezi amango bali bahagalikwa n’omulala gwabo? Lekagi rhukolese ngasi bulyo rhwakaba nabo, lyo rhubwira abo birhu bemezi bazigirwa enderho z’okuhâna omurhima omu kubayeresa oku rhushagalukire iroho lyabo ly’okucihâna n’oburhwali bwabo. (Fm. 4, 5, 7) Yehova aba ayemire n’obwalagale oku rhuba rhulonzize okumushagalusa n’omurhima gwirhu goshi n’oku rhuba babidu okuciyima bintu bilebe lyo rhulama kushimbana n’eciragane cirhu c’okucihâna emwage. Anarhuyerese obukenge omu kurhuha obulyo bw’okucishoga okuyerekana obuzigire bwirhu kuli ye. (Mig. 23:15, 16) Lekagi rhuhige okugendekera rhwakolera Yehova, omu kumuha n’obulonza ebintu birhu binja. w24.02 buk. 18 cif. 14; buk. 19 cif. 16

Obone omu bwenge bwawe ebyabaga oku buzinda bw’omwaka gwa 29 Kano Kasanzi Kirhu (K.K.K.) erhi Yezu arhondera omukolo gwage. Yezu na nnina Mariya, bali oku idinye ly’obuhya omu Kana. Byanahashikana Mariya akag’irhabala okushibirira ebigolo. Cikone omu mango g’er’idinye, haba mazibu malebe, idivayi lyahwa. Mariya aja duba-duba emunda omugala ali anamubwira ntya: “Barhacigwerh’idivayi.” (Yn. 2:1-3) Gurhi Yezu ajijire? Omu njira y’ecisomerine ahindula amishi lyaba “idivayi linja.” (Yn. 2:9, 10) Yezu ajijire bindi bisomerine binji omu mango g’omukolo gwage hanw’igulu. Akolesize obuhashe bwage bw’okujira ebisomerine ly’arhabala amakumi g’ebihumbi by’abantu. Kwa lwiganyo, omu bisomerine byage bibirhi byone alisagyamwo balume 5 000 na buzinda balume 4 000, nkaba mw’ako kanga alisize bantu balushire 27 000 erhi rhwakahiramwo abakazi n’abana bali aho. (Mt. 14:15-21; 15:32-38) Na kandi mw’ago mango, Yezu afumize bantu banji bal’ilwazire.​—Mt. 14:14; 15:30, 31. w23.04 buk. 2 cif. 1-2

Enyuma z’okuhikirwa na mazibu malebe, hali ensiku rhukaciyumva rhugwerhe obuzamba bw’omubiri n’obw’ekandalala. Aka Eliya, rhwanaciyumva nka kuli kuzibu bwenene okuzuka n’oku rhulonzize kone rhugwishire. (1 Bam. 19:5-7) Rhulagirire oku burhabale lyo rhugendekera rhwajira binji omu mukolo gwa Yehova. Omu mango ga ntyo, Yehova arhuyemezize n’obwalagale oku anarhurhabala nk’oku olwandiko lw’olusiku lw’ene luyerekine. Mwami Daudi acibwinire obo burhabale. Omu mango akag’ilwisa amazibu n’abashombanyi bage, abwira Yehova ntya: “Oba ongwasire n’okuboko kwawe kulyo.” (Enna. 18:35, Mashi Bible) Kanji-kanji Yehova anarhurhabale omu kushumya abandi bantu barhuhe oburhabale. Kwa lwiganyo, mango maguma erhi Daudi aciyumva ali muzamba, omwîra wage Yonatani amulambagirira ly’amubwira enderho z’okumuha omurhima n’okumurhabala aciyumve bwinja ekandalala. (1 Sam. 23:16, 17) Ko n’oko, Yehova acishozire Elisha ly’aha Eliya oburhabale al’ilagirireko.​—1 Bam. 19:16, 21; 2 Bam. 2:2. w24.01 buk. 23-24 cif. 10-12

Kugerera olwiganyo lw’omukazi oshushanyizibwe n’“obwenge bw’okunali” omu citabu c’Emigani cigabi ca 9, rhuciyigirizize oku Yehova aba muhanyi ananarhuhe bintu binji bwenene. Ogo mwanzi guyerekine oku oyo mukazi w’olwiganyo al’irheganyize bwinja enyama yage, idivayi lyage likande bwinja, n’ameza gage gali mapange bwinja omu nyumpa yage. (Mig. 9:2) Kandi, kushimbana n’omulongo gwa 4 n’ogwa 5, Mashi Bible: ‘Abwizire [bwenge buganirirwe nka muntu] ngasi barhagwerhi okurhimanya erhi: Yishi mulye oku biryo byani.’ Bulya gurhi rhushinganine rhuje omu nyumpa y’obwenge bw’okunali n’okulya ebiryo oyo mukazi arhuhire? Yehova alonzize abana bage babe n’obwenge banaciyumve bali omu bulanzi, arhalonzizi rhujire amagosa gakarhuma rhwaciyumva kubi. Co cirhumire, “abashinganyanya bo abîkîre obucire bwage [obwenge bwage bukola, NWT].” (Mig. 2:7) Amango rhuyobohire Yehova omu njira eshinganine, rhwanakalonza okumushagalusa. Rhunayumve amahano gage g’obwenge, rhunanashagalukire okugakolesa.​—Yk. 1:25. w23.06 buk. 23-24 cif. 14-15

Ciru rhwakaciyumva nka rhurhakahasha okujira binji omu mukolo gwa Yehova, rhwanagendekera rhwayemera n’obwalagale oku Yehova ashagalukire obushiru rhuli rhwajira n’omurhima goshi lyo rhumushagalusa. Gurhi rhumanyiremwo ntyo? Omu nsiku za Zakariya, Yehova ahûna omulebi wage ajire ecimanè omu kukolesa enoro n’ensaranga zakag’irhumwa n’Abayahudi bal’ihesirwe e Babiloni. (Zak. 6:11) Eco “cimanè” cali ca ‘kubakengêza’ emicango yabo y’omurhima goshi. (Zak. 6:14) Rhwanayemera n’obwalagale oku Yehova arhakayibagira ciru n’ehitya obushiru rhuli rhwajira n’omurhima goshi lyo rhumukolera omu kasanzi kazibu. Kobinali, rhwagendekera rhwalwisa amazibu muli zino nsiku nzinda, n’ehali zanaba ciru mbi kulusha omu mango gayisha. (2 Tm. 3:1, 13) Ciru akaba ntyo, rhurhashinganini rhuhangayike okurhalusire olugero. Okengere ezi nderho Yehova abwiraga abantu bage omu nsiku za Hageyo: “Naba ndi haguma na ninyu . . . murhayobohaga.” (Hag. 2:4, 5, Mashi Bible) Na nirhu, rhwanayemera n’obwalagale oku Yehova aba haguma na nirhu erhi rhwakagendekera rhwajira okwirhu koshi lyo rhuhikiriza obulonza bwage. w23.11 buk. 19 cif. 20-21

Amagosa entumwa Petro yakag’ijira nkaba garhakayandisirwe omu Bibliya. Cikone, gahizirwemwo omu kulongozibwa n’iroho litagatifu lyo garhuyigiriza. (2 Tm. 3:16, 17) Okuciyigiriza lugenda oyo mulume wagwerhe obuzamba wanal’igwerhe entanya ziri nk’ezirhu, kwanarhurhabala rhubone oku Yehova arharhulongezako obwimana. Alonzize rhugendekere rhwamukolera, n’okugendekera rhwacihangana okujira ntyo, ciru akaba rhuli bazamba. Bulya gurhi kuli kwa bulagirire bwenene kuli rhwe okugendekera rhwacihangana lyo rhukolera Yehova? Enyuma z’okuciyumva oku rhwahimire buzamba bulebe, nkaba rhwanashub’ibugalukira. Cikone rhunagendekere rhwacihangana lyo rhuhima obo buzamba loshi. Rhweshi rhunaderhe erhi kujira ebintu birhuma rhwaciyunjuza buzinda; ciru akaba ntyo, erhi rhwakacihangana, Yehova anarhurhabala lyo rhugendekera rhwajira ebiri binja kulusha. (1 Pt. 5:10) Obwonjo Yezu ayeresagya Petro ciru akaba al’igwerhe obuzamba bwanarhushumya lyo rhugendekera rhwakolera Yehova. w23.09 buk. 20 cif. 2-3

Yezu akafumize Lazaro, nk’oku Martha ayerekine omu lwandiko lw’olusiku lw’ene. Cikone al’ilonzize okujira kantu kalebe kago-kago bwenene. Alaganya ntya: “Mushinja wawe afûka.” Kandi ashubimubwira ntya: “Nie bufûke [n’obuzine, NWT].” (Yn. 11:23, 25) Kobinali Nnâmahanga ahîre Yezu obuhashe bw’okufûla abafîre. Embere z’aho afuzîre omwana-nyere wali wamajira hisanzi hisungunu afîre na kandi afûla omwana-rhabana, bibonekine oku olo lusiku lo oyo murhabana afâga. (Lk. 7:11-15; 8:49-55) Cikone, k’akafuzîre omuntu okola ogwerhe nsiku ini afîre n’omubiri gwage gukola guli gwabola? Mariya, wundi mwali wabo Lazaro, agend’irhimanana na Yezu. Agalukira enderho Marta aderhaga erhi: “Nyakasane, ocibaga hano, mushinja wani arhakafîre.” (Yn. 11:32) Erhi Yezu abona n’okuyumva Mariya n’abandi bali haguma naye bali balaka, ababala bwenene. Enyanya z’okuyumviza abîra bage obwonjo bunji, naye alaka. Ahugûkwa amalumwa omuntu ayumva erhi afîrwa n’omuzigirwa wage. Kobinali, al’ilonzize bwenene okukûla ebyabalerheraga eyo mirenge! w23.04 buk. 10-11 cif. 12-13