Mwezi gwa 12

Ka Yehova agwerhe obuhashe bw’okufûla abafîre? Neci kobinali! Ye “Ogala-byoshi.” (Maf. 1:8) Co cirhumire, agwerhe obuhashe bw’okuhima ngasi mushombanyi, ciru n’olufû. (1 Kr. 15:26) Ecindi cirhumire cirhuyemezize oku Nnâmahanga agwerhe obuhashe bw’okufûla abafîre kuli kuba bulya ajira obukengere burhakagerwa. Anahamagale ngasi nyenyezi oku izino lyayo. (Iz. 40:26) Kandi, anakengere abantu bafîre. (Ayu. 14:13; Lk. 20:38) Anakengera buzira mazibu ebintu bisungunu-ngunu lugenda abantu ayish’ifûla, ciru n’oku bakag’ibonekana, amorhere gabo, ebyabahikire omu kalamo n’enkengero zabo. Kobinali, rhwanaba n’obuyemere omu ciragane ca Yehova c’obufûke bw’amango gayisha bulya rhumanyire oku agwerhe irala n’obuhashe bw’okucihikiriza. Rhuganirire ecindi cirhumire cirhushumize rhuyemere eciragane ca Nnâmahanga c’obufûke: Yehova afûzire abantu bal’ifîre. Omu mango ga mîra, ahîre balume baguma na baguma bishwekerezi obuhashe bw’okufûla abafîre, abo balume bahiziremwo Yezu. w23.04 buk. 9-10 cif. 7-9

Erhi rhwakaganira omu njira erhasarhazizi abandi na ya butûdu, abantu banaba babidu okurhuyumvirhiza n’okugendekeza enshambalo. Kobinali, erhi muntu mulebe akalonza okuyaza akadali erhi kugayaguza obwemere bwirhu, rhurhasezibwi oku rhugendekere rhwamushuza. (Mig. 26:4) Cikone kanji-kanji rhurharhimanana n’omuntu wa ntyo; baguma na baguma, nkaba ciru banji, banayumvirhize. Kobinali, hali bunguke bunji omu kucihangana okuba batûdu. Okashenga Yehova emisi olagirireko ly’ogendekera waba mutûdu erhi muntu mulebe akadosa amadoso g’okukujisa kadali erhi kandi ga kukugayaguza. Okengere oku obutûdu bwawe bwanarhabala ly’entanya ziri lubero n’ez’omumvirhiza wawe zirhahikiraga aha zalerha akadali. N’ishuzo lyawe ly’obutûdu n’obukenge lyanashumya abumvirhiza baguma na baguma bashanje entanya bal’igwerhe okubirhuyerekire n’okubiyerekire okuli kw’Ebibliya. Okayorha ‘ocirheganyize ensiku zoshi okuhalira’ obwemere bwawe omu ‘kujira ntyo n’obutûdu n’obukenge bunji.’ (1 Pt. 3:15, NWT) Neci, oleke obutûdu ebe misi yawe! w23.09 buk. 19 cif. 18-19

Rhuganirire njira ini rhwakayerekanamwo oborhere bw’okulembera. Burhangiriza, omuntu olembera arhakunira duba. Anacihangane okugendekera arhulirira n’okurhacihôla amango bamamugayisa erhi amango ahangayisire omu bukengere. (Lub. 34:6) Bwa kabirhi, omuntu olembera analinde erhi anarhulwire. Erhi kantu kalebe kakarhôla kasanzi kanji kulusha oku anal’irhanyize, omuntu wa ntyo anayake okuba wa mihusi arhanaba burhe. (Mt. 18:26, 27) Bwa kasharhu, omuntu olembera arhajira ebintu duba-duba buzira kurhanya. Amango omuntu olembera agwerhe mukolo mulebe gw’obulagirire gw’okuhikiriza, arhagurhondera duba-duba erhi kuguyusa duba-duba. Cikone, anacihirireho akasanzi kashinganine ly’apanga ebi ajira. Buzinda anacihirireho akasanzi alagirireko ly’ajira ogo mukolo bwinja. Bwa kani, omuntu olembera anacihangane okulembera amazibu buzira kuciduduma. Anajire okwage koshi ly’agendekera alembera erhi anagwerhe entanya nyinja. (Kl. 1:11) Rhuli Bakristu, rhushinganine rhuyerekane obulembedu muli ezo njira zoshi. w23.08 buk. 20-21 cif. 3-6

Ecirhumire c’obulagirire cirhushumya rhulange omurhima gwirhu gw’olwiganyo kuli kubona oku Yehova analolereze omurhima gwirhu. Anabone binji kulusha oku abandi barhubona ananabone oku rhuyosire kobinali ekandalala. Arhuzigira erhi rhwakagendekera rhwarhanya oku mahano gage g’obwenge gakarhurhabala rhulame ensiku n’amango. (Yn. 4:14) Erhi rhwakajira ntyo, amakanuni g’olugenzi lubi n’obunywesi bwa Shetani n’igulu lyage birhakaba n’enafasi omu bukengere bwirhu. (1 Yn. 5:18, 19) Amango rhugendekire rhwayegera Yehova, obuzigire bwirhu n’obukenge bwirhu kuli ye bwanayushuka. Bulya rhurhalonzizi okugayisa Larha wirhu, rhunagaye ciru n’entanya z’okulonza okujira ecaha. Marta, mwali wirhu muguma w’omu cihugo c’e Croatie washumikagwa okujira eby’enshonyi, ayandisire ntya: “Nabwine oku kwali kuzibu okurhanya bwinja n’okurhenza omu bwenge bwani enshumi z’okushagalukira ecaha omu kasanzi kasungunu. Cikone okuyoboha Yehova ko kwananzire.” Gurhi okuyoboha Nnâmahanga kwamulanziremwo? Marta adesire oku arhanya bwenene oku malehe mabi okurhôla omuhigo mubi kwakamudwirhire. Nirhu rhwanajira ntyo. w23.06 buk. 20-21 cif. 3-4

Yezu al’imanyire oku omuhigo gwa Yehova guba gwa kucesa izino lyage, ko kuderha kulikûlako izinga lyoshi. Co carhumaga Nnawirhu ayigiriza abanafunzi bage bakasalira ntya: “Larha, oli omu mpingu, Izino lyawe likuzibwe [licesibwe, NWT].” (Mt. 6:9) Yezu al’ihugûsirwe oku ako kali kantu k’obulagirire kayerekire ebiremwa byoshi. Nta ciremwa c’obwenge omu mpingu na hano igulu cisag’ijira binji omu kucesa izino lya Yehova aka Yezu. Ciru akaba ntyo, erhi Yezu agwarhwa, caha cihi abashombanyi bage bamushobesire? Kujacira Nnâmahanga! Yezu akag’ibona oku okukolesa izino ly’Ishe kubi erhi kulizinza cali caha cizibu bwenene. Yezu ababire bwenene okubona oku bakamushobesire eco caha banamutwira olubanja oku eco co caha anajijire. Nkaba eco co cirhumire cikulu carhumaga Yezu ‘agogomerwa n’oburhe’ omu nsa z’embere agwarhwe.​—Lk. 22:41-44. w24.02 buk. 11 cif. 11

Omu kamashigwe kirhu k’obuzine, rhugwasirwe rhuzigire Yehova na Yezu kulusha oku rhuzigira abantu b’omulala gwirhu. (Mt. 10:37) Cikone, oko kurhali kuderha oku rhwanalekerera emikolo yirhu rhugwerhe omu mulala, omu kubona nka yanarhuma rhurhashagalusa Nnâmahanga na Yezu. Lubero n’oko, lyo rhuyemerwa na Nnâmahanga na Yezu, rhushinganine rhuhikirize omukolo gwirhu omu mulala. (1 Tm. 5:4, 8) Erhi rhwakajira ntyo, rhwanaba na mwishingo munji. Kobinali, Yehova aba amanyire oku emilala yanaba n’omwishingo amango omulume na mukage bali bajirirana omu njira y’obuzigire n’obukenge, amango ababusi bazigire abana babo banali babakomereza, n’amango abana bali barhumikira ababusi babo. (Ef. 5:33; 6:1, 4) Obe oli mulume, mukazi erhi mwana, okalangalira amahano g’obwenge gali omu Bibliya ahali h’okuyegemera entanya zawe, oborhere bw’ah’olama, erhi ebi abaderhwa basomi badesire. Okakolesa bwinja ebicapo birhu biyimangire oku Bibliya. Bibamwo amahano minja gakakurhabala ly’omany’ikolesa amakanuni g’Ebibliya. w23.08 buk. 28 cif. 6-7

Omukazi Mukristu ashinganine ayige bulenga bunji bwakamurhabala. Bulenga buguma na buguma omunyere ayiga amango aciri murho bunagendekere bwamurhabala omu kalamo kage koshi. Kwa lwiganyo, oyige bwinja okusoma n’okuyandika. Omu nkomedu nguma na nguma, abantu banabone nka kurhali kwa bulagirire abakazi bayige okusoma n’okuyandika. Cikone, obulenga bw’okusoma n’okuyandika buba bwa bulagirire bwenene oku ngasi Mukristu. (1 Tm. 4:13) Co cirhumire, orhalekaga akantu koshi-koshi kakuhanze okuyiga bwinja okusoma n’okuyandika. Bunguke buhi wakaba nabo? Obo bulenga bwanakurhabala ly’opata akazi n’okukabêrana. Wanaba mwanafunzi mwinja na mwalimu mwinja w’Akanwa ka Nnâmahanga. N’akantu kinja kulusha, wanayegera Yehova amango oli wasoma Akanwa kage n’okukarhanyako bwenene.​—1 Tm. 4:15. w23.12 buk. 20 cif. 10-11.

Okahûna Yehova oburhabale ly’ohima enshumi z’okujira ebintu bibi. Bulya rhurhali bimana, ngasi mango rhunalwise enshumi z’okujira ebibi. Shetani anajire okwage koshi lyo kuba kuzibu bwenene kuli rhwe okulwisa ezo nshumi. Njira nguma asherezamwo entanya zirhu kuli kugerera ebintu bigalugalu by’okucishagalusa. Ebintu bya ntyo byanayunjuza entanya mbi omu bukengere bwirhu, ezo ntanya zanashereza obumuntu bwirhu bw’ekandalala zananarhuma rhwajira ecaha cizibu. (Mk. 7:21-23; Yk. 1:14, 15) Rhulagirire oku burhabale bwa Yehova lyo rhuhima enshumi z’okujira ebintu bibi. Omw’isala ly’olwiganyo, Yezu adesire oku rhukashenga ntya: “Orhanarhuhiraga omu mashumi, ci orhulikuze oku Mubi.” (Mt. 6:13) Yehova aba alonzize okurhurhabala, cikone rhugwasirwe rhumuhûne oburhabale. Kandi rhugwasirwe rhujire kushimbana n’amasala girhu. w23.05 buk. 6-7 cif. 15-17

Erhi akaba omulume na mukage bali babona oku obwîra bwabo haguma n’Ishe w’omu mpingu buli bwa bulagirire, banabe babidu okukolesa amahano gage n’oko kunabarhabale bakayaka n’okuhima amazibu gakarhuma obuzigire bwabo bwanyiha. Kandi abantu b’ekiroho banajire okwabo koshi lyo bayiga Yehova n’okuba n’amorhere ayerekana nk’olukogo, obulembêdu, n’okubabalira. (Ef. 4:32–5:1) Erhi omulume na mukage bakayerekana ago morhere, kwanaba kulembu obuzigire bwabo buyushuke. Mwali wirhu muguma ohamagalwa Lena, okola ogwerhe myaka 25 na kulusha omu buhya, adesire ntya: “Kuba kulembu okuzigira n’okukenga omuntu w’ekiroho.” Rhuganirire olwiganyo lw’omu Bibliya. Erhi Yehova acishoga omulume n’omukazi lyo baba babusi b’omwana wayishir’iba Masiya, acishoga Yozefu na Mariya kurhenga omu bantu banji b’omw’iburha lya Daudi. Bulya gurhi? Bulya bombi bal’igwerhe obwîra bwinja haguma na Yehova, na Yehova al’imanyire oku bakamuhizire oku nafasi ntanzi omu buhya bwabo. w23.05 buk. 20-21 cif. 3-4

Ciru akaba Cirongozi wirhu, Yezu, aba mwimana, abantu akolesa lyo balongoza hanw’igulu bohe barhaba bimana. Hali amango kwakaba kuzibu kuli rhwe okubarhumikira, bwenene erhi bakarhuhûna rhujire kantu kalebe rhurhalonzizi okujira. Entumwa Petro yarhindire okurhumikira oku murhondero. Erhi malahika abwira Petro oku alye ensimba Irhegeko lya Musa lyal’idesire oku zirhacîri, Petro alahira; arhali liguma lyone alahire, cikone kasharhu koshi-koshi! (Ebj. 10:9-16) Bulya gurhi? Arhahugûkagwa obo bulongozi buhyahya. Oku bundi, entumwa Paolo arhumikire erhi abalume Bakristu bal’ikola bashosi b’omu Yeruzalemu bamurhegeka agende na balume bani omu hekalu n’okujira enkomedu y’okucicêsa yene ly’ayerekana oku akag’irhumikira Irhegeko. Paolo al’imanyire oku Abakristu barhaciri idako ly’Irhegeko lya Musa. Na nt’igosa lyoshi-lyoshi al’ijijire. Ciru akaba ntyo, Paolo “anaciyanka balya balume, ashukûlwa bo nabo.” (Ebj. 21:23, 24, 26) Okurhumikira kwa Paolo kwagendekeza encinyabuguma.​—Rm. 14:19, 21. w23.10 buk. 10 cif. 15-16

Nkaba orhakarhanya oku oboba buli borhere bwa bulagirire bwakagendekeza obwîra bwinja. Cikone, abalonzize okuba n’obwîra bwa hofi-hofi haguma na Yehova bagwasirwe ‘bamurhinye’ erhi kumuyoboha. Rhube rhugwerhe kasanzi kanji rhuli rhwakolera Yehova erhi nanga, rhweshi rhushinganine rhugendekere rhwamuyoboha omu njira eshinganine. Cikone, okuyoboha Nnâmahanga ko kuderha gurhi? Omuntu oyoboha Nnâmahanga omu njira eshinganine aba amuzigire arhanalonza okujira akantu koshi-koshi kakashereza obwîra bwage haguma naye. Yezu agwerhe ‘obukenge bwage [oboba bwa Nnâmahanga, NWT].’ (Hb. 5:7) Arhal’iyobohire Yehova okurhalusire olugero. (Iz. 11:2, 3) Lubero n’oko, akag’iciyumva azigire Yehova anal’ilonzize okumurhumikira. (Yn. 14:21, 31) Aka Yezu, rhunaciyumve rhukenzire Yehova bwenene rhunarhangazibwe naye, bulya aba wa buzigire, wa bwenge, mushinganyanya na wa buhashe bunji. Kandi rhuba rhumanyire oku Yehova aba arhuzigire n’oku anashibirire oku rhujira erhi arhuha obulongozi. Erhi rhubula burhumikira Yehova anaciyumve kubi bwenene, cikone erhi rhwakamurhumikira rhunamushagaluse.​—Enna. 78:41; Mig. 27:11. w23.06 buk. 14 cif. 1-2; buk. 15 cif. 5

Erhi Mwami Uziya aba n’emisi, ayibagira oku Yehova wamuhâga eyo misi ye wanarhumaga ayololoka. Isomo lihi rhuciyigirizize? Kuli kwinja rhukakengera oku emigisho rhugwerhe n’emikolo rhujira omu cigamba emwa Yehova birhenga. Ahali h’okucikungira ebi rhwahikirizize, rhushinganine rhukaha Yehova irenge enyanya z’ebi rhugwerhe obuhashe bw’okujira. (1 Kr. 4:7) Rhugwasirwe rhube birhohye n’okuhugûkwa oku rhurhaba bimana n’oku rhuba rhulagirire oku buhane. Mwene wirhu muguma oli omu myaka 60, ayandisire ntya: “Naciyigirizize okurhakacibona nka ntakajira igosa ciru n’ehitya. Erhi nakahâbwa obuhane enyanya z’amagosa g’obuhwinja njira mango maguma na maguma, nancihangane okujira empindulo n’okugendekera embere.” Kobinali amango rhuli rhwayoboha Yehova n’okugendekera rhwaba birhohye, rhunabe n’omwishingo omu kalamo.​—Mig. 22:4. w23.09 buk. 10 cif. 10-11

Abakristu b’omu myaka igana mirhanzi bal’ishinganine balembere. Ciru akaba bakag’ilwisa amazibu gahikira abantu boshi, balwisize agandi mazibu. Ahanyuma n’okulibuzibwa n’ebirongozi by’idîni ly’Eciyahudi n’abarhegesi b’Abaroma, banji mulibo balibuzibwe n’abantu b’emilala yabo. (Mt. 10:21) N’omu cigamba, hali amango bal’igwasirwe balwise enshumi z’abagoma n’enyigirizo zabo zakarhumire ecigamba cagabikanamwo. (Ebj. 20:29, 30) Cikone, abo Bakristu balembera. (Maf. 2:3) Bici byabarhabire? Bakag’irhanya bwenene oku nyiganyo z’abantu balemberaga baganirirwe omu Mandiko, nk’olwiganyo lwa Ayubu. (Yk. 5:10, 11) Bakag’ishenga Yehova abahe emisi. (Ebj. 4:29-31) Na kandi bakag’isegeza obwenge oku malehe minja g’obulembedu bwabo. (Ebj. 5:41) Nirhu rhwanalembera erhi ngasi mango rhwakakayiga enyiganyo z’abantu balemberaga ziganirirwe omu Kanwa ka Nnâmahanga n’omu bicapo birhu n’okuzirhanyako. w23.07 buk. 3 cif. 5-6

Yehova na Yezu barhakarhuleka. Enyuma z’okuhakana Yezu, Petro al’ishinganine arhôle omuhigo gw’obulagirire. K’akalesire okuba mwanafunzi wa Kristu, erhi akagendekire? Yezu ali amasemberera Yehova ly’obuyemere bwa Petro burhazambanyagya. Yezu abwizire Petro lugenda er’isala anayerekana oku al’iyemire n’obwalagale oku buzinda Petro akahashire okuzibuhya bene wabo. (Lk. 22:31, 32) Petro agwasirwe abe ahâbirwe omurhima omu kukengera ezo nderho za Yezu! Amango rhugwasirwe rhurhôle omuhigo gw’obulagirire, Yehova anakolesa balungere barhushibirira lyo barhuha oburhulirize rhulagirireko lyo rhugendekera rhwabêra bishwekerezi. (Ef. 4:8, 11) Nk’oku Yehova ashibiriraga amalagirire g’omubiri ga Petro n’ezindi ntumwa, nirhu ashibirira amalagirire girhu g’omubiri erhi rhwakahira omukolo gw’amahubiri oku nafasi ntanzi omu kalamo kirhu. w23.09 buk. 24-25 cif. 14-15

Yehova anabone ciru n’ecijiro cisungunu bwenene c’olukogo rhujirire abandi. Anabone ecijiro ca ntyo nka nterekêro y’obulagirire bwenene na nk’ideni ayish’ilyula. Erhi akaba embere wali murhabazi w’abagula erhi mugula, Yehova anakengere omukolo wajijire omu mango gageraga n’obuzigire bwakushumyagya ojire ogo mukolo. (1 Kr. 15:58) Kandi ali abona obuzigire ogendekire wayerekana. Yehova alonzize rhweshi rhuyushûke omu buzigire kuli ye n’oku bandi bantu. Rhwanaseza obuzigire bwirhu kuli Yehova omu kusoma Akanwa kage n’okukarhanyako bwenene n’omu kumuganiza ngasi mango kugerera isala. Rhwanayushûka omu buzigire bwirhu kuli bene wirhu na bali birhu omu kukabaha oburhabale balagirireko. Amango obuzigire bwirhu buli bwayushûka, rhwanagendekera rhwayegera Yehova bwenene na bene wirhu na bali birhu. Na kandi, rhwayish’ishagalukira obo bwîra haguma nabo ensiku n’amango! w23.07 buk. 10 cif. 11; buk. 11 cif. 13; buk. 13 cif. 18

Ngasi Mukristu agwasirwe acirhôlere omuhigo gwage yenene lugenda oku ashibiriramwo amagala gage. Amango Abakristu barhôla emihigo lugenda eby’okubukwa, baba bashinganine barhumikire amarhegeko g’Ebibliya garhuhûnyire rhucilange n’omuko n’eby’obukurungu. (Ebj. 15:20; Gl. 5:19, 20) Lubero n’oko, ngasi muntu anacishoga eby’okubukwa akayemera. Ciru rhwakaba rhugwerhe ntanya zihi lugenda njira ndebe y’okubukwa, rhushinganine rhukenge oluhûma bene wirhu na bali birhu bagwerhe lw’okucirhôlera emihigo bonene lugenda eby’okubukwa. Lugenda oko, rhushinganine rhukakengera ebi bintu bini bikulikire: (1) Obwami bwa Nnâmahanga bone bwayish’ifumya endwala z’abantu loshi-loshi. (Iz. 33:24) (2) Ngasi Mukristu agwasirwe ‘ayemere bwinja-bwinja’ ebiri binja kuli ye. (Rm. 14:5) (3) Rhurhatwira abandi olubanja rhurhanajira akantu koshi-koshi kakabasarhaza. (Rm. 14:13) (4) Abakristu banayerekane obuzigire barhanabona oluhûma bagwerhe lw’okucirhôlera emihigo oku lo lw’obulagirire kulusha ecinyabuguma c’ecigamba.​—Rm. 14:15, 19, 20. w23.07 buk. 24 cif. 15

K’oba oshagalukire bwenene obwîra bwawe haguma na Yehova? Kobinali oba obushagalukire! Kurhenga mîra, bantu banji bwenene banaciyumve nk’oku ociyumva. (Enna. 104:33, 34) Bantu banji baciyimire bintu binji lyo baharamya Yehova. Kobinali, ako ko kali kanga k’abantu b’omu Israheli ya mîra bakag’ihamagalwa Banaziri, erhi bantu bahânyirwe lyo bajira mukolo mulebe gwago-gwago. Olo luderho luhugwîre bwinja Abaisraheli b’obushiru bakag’iciyima bintu bilebe lyo bakolera Yehova omu njira yago-yago. Irhegeko lya Musa lyal’ihîre omulume erhi omukazi obulyo bw’okujirira Yehova eciragane cago-cago omu kucishoga okulama nka Munaziri kasanzi kalebe. (Mib. 6:1, 2) Erhi Omuisraheli akajijire eciragane c’Obunaziri, akag’irhumikira amarhegeko abandi Baisraheli barhal’ihûnyirwe okurhumikira. Bulya gurhigi Omuisraheli akacishozire okuba Munaziri? Omuisraheli wa ntyo al’ishumibwe n’obuzigire bwage bunji kuli Yehova n’okuvuga kwage Yehova omunkwa kurhenga oku murhima oku migisho yage minji.​—Lush. 6:5; 16:17. w24.02 buk. 14 cif. 1-2

Omu Bibliya, oluderho lw’Ecihabraniya lwahindwirwe “bwishwekerezi,” erhi “buzigire bwishwekerezi,” luhânyire entanya z’okucishwekera kuli muntu mulebe omu njira y’obuzigire na kanji-kanji lunakolesibwe omu kuganirira obuzigire Nnâmahanga ayeresa abakozi bage. Kandi olo luderho lo n’olo lukolesibwe omu kuganirira obuzigire abakozi ba Nnâmahanga bayeresanya bone na nnene. (2 Sam. 9:6, 7) Obwishwekerezi bwanagendekera bwazibuha oku akasanzi kali kagera. Rhuganirire gurhi obwishwekerezi bwa Daniyeli bwagendekire bwazibuha. Obwishwekerezi bwa Daniyeli kuli Yehova bwarhangwirwe omu kalamo kage koshi. Cikone irhangulo liguma ly’omu marhangulo gage madarhi bwenene lyamuhikire erhi agwerhe myaka 90 na kulusha. Abakozi b’omu nyumpa y’obwami bal’ishombire Daniyeli barhanakag’ikenga Nnâmahanga akag’iharamya. Enyanya z’oko, bajirira Daniyeli ekomplo ly’anigwa. Bashumya mwami asinye irhegeko lyakarhumire Daniyeli ayerekana erhi abêra mwishwekerezi kuli Nnâmahanga wage erhi kuli mwami. Ebi Daniyeli al’igwasirwe ajire ly’ayerekana obwishwekerezi bwage kuli mwami kwali kuleka okushenga Yehova nsiku 30. Daniyeli arhayemeraga okuleka obwishwekerezi bwage kuli Yehova.​—Dan. 6:12-15, 20-22. w23.08 buk. 4-5 cif. 10-12

Yehova alonzize rhugendekere rhwalembera omu kuyeresa bene wirhu na bali birhu obuzigire. Erhi muntu mulebe akabula bwayerekana borhere bulebe bw’Ecikristu, rhwanayemera n’obwalagale oku alonzize alame kushimbana n’amakanuni g’Ebibliya, cikone nkaba anajijire kone kantu kalebe buzira kurhanya. (Mig. 12:18) Yehova aba azigire abakozi bage bishwekerezi ciru akaba bajira buzamba bulebe. Yehova anagendekere abêra mwîra wirhu ciru akaba rhujira amagosa arhanarhubikira akarhinda. (Enna. 103:9) Kuli kwa bulagirire bwenene kuli rhwe okuyiga olwiganyo lwa Larha wirhu w’obuzigire! (Ef. 4:32–5:1) Na kandi, okengere oku, bulya obuzinda buyegerire, rhulagirire oku kugendekera rhwayegerera bene wirhu na bali birhu. Rhulangalire oku amalibuko gagendekera gayushuka. Hali n’amango ciru rhwakashwekwa enyanya z’obuyemere bwirhu. Erhi oko kwakarhuhikira, rhwaba rhulagirire kuli bene wirhu na bali birhu kulusha agandi mango goshi.​—Mig. 17:17. w24.03 buk. 15-16 cif. 6-7

Amandiko gaganirire emisole yayegerire Yehova, yayemerwa naye, yanalama akalamo k’omwishingo. Daudi ali muguma wa muliyo. Erhi aciri musole, acishoga okuba mwîra wa Yehova na buzinda aba mwami mwishwekerezi. (1 Bam. 3:6; 9:4, 5; 14:8) Okuyiga lugenda akalamo ka Daudi na gurhi akoleraga Nnâmahanga n’obwishwekerezi kwanakuha omurhima n’okukushumya. Erhi kandi omw’ifunzo lyawe wanahiga okuyiga lugenda olwiganyo lwa Marko erhi olwa Timoteyo. Barhonderaga okukolera Yehova erhi banaciri misole bwenene, banagendekera bamukolera n’obwishwekerezi. Oku oli wakolesa akalamo kawe ene ko kwakarhuma kaba kinja erhi kabi omu mango gayisha. Erhi wakalangalira Yehova ahali h’okulangalira obumanye bwawe we nnene, oko kwanarhuma alongoza enjira zawe. Wanaba n’akalamo kinja na ka mwishingo. Okengere oku Yehova anashagalukire bwenene ebi omujirira. Okukolera Larha wirhu w’obuzigire w’omu mpingu yo njira nyinja bwenene wakakolesamwo akalamo kawe. w23.09 buk. 13 cif. 18-19

Entumwa Paolo yal’imanyire oku bene wabo na bali babo Bakristu barhali bimana. Kwa lwiganyo, bantu baguma na baguma b’omu cigamba e Yeruzalemu bakag’imuyoboha, barhanal’iyemire erhi kobinali ali mwanafunzi wa Yezu. (Ebj. 9:26) Enyuma z’aho, bantu baguma na baguma bakamuderha-derha kubi lyo barhuma abandi baleka okumulangalira. (2 Kr. 10:10) Paolo abona mugula muguma warhôlaga omuhigo mubi gwakarhumire abandi basarhala. (Gl. 2:11, 12) Na Marko mwîra wa hofi-hofi wa Paolo, amuvuna omurhima. (Ebj. 15:37, 38) Ebyo byoshi byakarhumire Paolo ayaka okukacilunga haguma n’abamugokezagya. Cikone, agendekera aba n’entanya nyinja lugenda bene wabo na bali babo anagendekera akolera Yehova n’obwishwekerezi. Bici byarhabire Paolo ly’alembera? Paolo al’izigire bene wabo na bali babo. Obuzigire bwa Paolo bwamurhabala arhakag’isegeza obwenge bwage oku buzamba bw’abo bene wabo na bali babo, cikone akabusegeza oku morhere gabo minja. Kandi, obuzigire bwamurhabala ajire ebidesirwe omu lwandiko lw’olusiku lw’ene. w24.03 buk. 15 cif. 4-5

Omu Bibliya muli myanzi minji eyerekine kunganaci obutûdu buba borhere bwa bulagirire bwenene. Rhuganirire olwiganyo lwa Izaki. Erhi alama omu eneo y’Abafilistini y’e Gerari, abalungu bage bagalwa bafuka amaliba abakozi b’ishe bahumbaga. Ahali h’okulwira ago maliba, Izaki ahamikiza omulala gwage ahandi hantu anahumba agandi maliba. (Murh. 26:12-18) Cikone, Abafilistini baderha oku ago mishi nago gali gabo. Ciru akaba ntyo, Izaki ajira omurhûla. (Murh. 26:19-25) Bici byamurhabire ly’agendekera aba mutûdu ciru akaba abandi bal’ibonekine oku bahizire okumuhalalira? Kobinali alolerezize olwiganyo lw’ababusi bage, aciyigiriza binji kugerera oborhere bwa Abrahamu bw’okuba wa murhûla na kugerera ‘omurhima mutûdu na gwa murhûla’ gwa Sara.​—1 Pt. 3:4-6, Mashi Bible; Murh. 21:22-34. w23.09 buk. 15 cif. 4

Enyanya z’obuzigire bwage, Yehova arhuma Omugala cusha hanw’igulu ly’ayigiriza abantu lugenda Obwami n’okuhâna obuzine bwage ly’arhucungula kurhenga omu caha n’omu lufû. Buzinda Yezu afûka, agaluka e mpingu ly’arhegeka nka Mwami w’Obwami bwa Nnâmahanga. Omwanzi mukulu gw’Ebibliya kuli kuderha oku izino lya Yehova lyayish’icêsibwa hano ahikiriza omuhigo gwage okubiyerekire igulu kugerera Obwami bwage bwayish’irhambulwa na Kristu. Omuhigo gwa Yehova gurhakashanjwa. Alaganyize oku ngasi kantu kajirikana nk’oku anadesire. (Iz. 46:10; Hb. 6:17, 18) Igulu lyayish’ihikira aha lyahinduka paradizo, hantu abantu bimana na bashinganyanya b’omu iburha lya Adamu na Eva ‘bayish’ishagalukira akalamo ensiku n’amango.’ (Enna. 22:26, NWT) Cikone arhali ebyo byone Yehova ayish’ihikiriza. Omuhigo gwage muzinda kuli kugusha haguma abakozi bage boshi b’omu mpingu n’okw’igulu. Buzinda abazine boshi omu mpingu na hanw’igulu bayish’imurhumikira nka Murhegesi wabo Mukulu. (Ef. 1:8-11) K’enjira nyinja bwenene Yehova ali ahikirizamwo omuhigo gwage erhakusomezizi? w23.10 buk. 20 cif. 7-8

Abayahudi barhenganga e Babiloni erhi bahika e Yeruzalemu, harhageraga kasanzi kanji embere bahikirwe n’amazibu g’okubula ensaranga, akavulindi omu by’epolitike, ciru n’okuhagalikwa. Enyanya z’oko, baguma na baguma muli bo babona oku kuli kuzibu kuli bo okusegeza obwenge oku kuyubaka buhyahya ehekalu ya Yehova. Co cirhumire, Yehova arhuma balebi babirhi, ko kuderha Hageyo na Zakariya, lyo barhabala abantu bacib’iba n’obushiru. (Hag. 1:1; Zak. 1:1) Hofi myaka 50 enyuma z’aho, abo Bayahudi bacib’ivunika omurhima. Ezra, mwandisi w’Irhegeko wal’igwerhe obulenga, arhenga e Babiloni ayisha e Yeruzalemu ly’aha olubaga lwa Nnâmahanga omurhima luhire enterekêro y’okuli oku nafasi ntanzi. (Ezr. 7:1, 6) Nk’oku obulebi bwa Hageyo na Zakariya bwarhabalaga abantu ba Nnâmahanga omu mango ga mîra bagendekere balangalira Yehova amango bakag’ihagalikwa, nirhu bwanarhurhabala ene lyo rhugendekera rhwalangalira oburhabale bwa Yehova ciru akaba rhuli rhwalwisa amazibu g’akalamo.​—Mig. 22:19. w23.11 buk. 14-15 cif. 2-3

Gurhi rhuyeresamwo abirhu bemezi obuzigire bwirhu? Njira nguma rhujiramwo ntyo kuli kubarhuliriza. Rhwanahasha ‘okukarhulirizanya’ erhi rhwakakayumviza abandi obwonjo. (1 Ts. 4:18) Gurhi rhwakagendekera rhwazibuhyamwo obuzigire bwirhu egarhi kirhu rhwene na nnene? Omu kubabalira amagosa ga bene wirhu na bali birhu ciru n’amango kuli kuzibu okujira ntyo. Bulya gurhi ene kuli kwa bulagirire bwenene okuyeresanya obuzigire? Petro ahânyire ecirhumire omu kuderha ntya: “Obuzinda bw’ebintu byoshi bukola buli hofi . . . bwenene muzigirane mwêne na nnene.” (1 Pt. 4:7, 8) Bulya obuzinda bw’er’igulu ligalugalu buyegerire bwenene, bici rhushinganine rhukengere? Omu kuganirira lugenda abanafunzi bage, Yezu ali adesire ntya: “Mwashombwe na boshi erhi Izino lyani lirhuma.” (Mt. 24:9) Lyo rhulembera enshombo ya ntyo, rhushinganine rhubêre omu cinyabuguma. Erhi rhwakakayeresa bene wirhu na bali birhu obuzigire, nta mango Shetani akahasha okurhujira rhugabikanemwo, bulya obuzigire bunarhume rhwaba omu cinyabuguma.​—Fl. 2:1, 2. w23.11 buk. 13 cif. 18-19

Enyigirizo z’okuli z’Akanwa ka Nnâmahanga zijira buhashe bunji. Omu kuyigiriza abantu okuli lugenda Yehova n’oku ayorha kobinali, rhunabe n’amalehe minja bwenene. Aba Shetani ahûsize banayiguke amasu bunyi-bunyi bananarhondere babona amorhere minja ga Larha wirhu. Banasomerwe bwenene n’obuhashe bwage burhakagerwa. (Iz. 40:26) Banaciyigirize okumulangalira enyanya z’obushinganyanya bwage bwimana. (Lush. 32:4) Banaciyigirize binji bwenene kugerera obwenge bwage bunji. (Iz. 55:9; Rm. 11:33) Bananarhulirizibwe omu kuyiga oku aba buzigire. (1 Yn. 4:8) Erhi bagendekera bayegera Yehova obulangalire bwabo bw’okulama ensiku n’amango nka bana bage bunahikire aha bwaba bw’okunali. Luli lukengwa lunene bwenene kuli rhwe okurhabala abantu bayegere Larha wirhu! Erhi rhujira ntyo, Yehova anabone oku ‘kugwasa rhuli rhwamugwasa.’​—1 Kr. 3:5. w24.02 buk. 12 cif. 15

Akaba oli wayiga Ebibliya nisi akaba oli walerwa n’ababusi Bahamirizi, k’oli warhanya lugenda okubatizibwa? Ogo guli muhigo mwinja bwenene! Cikone embere obatizibwe, oshinganine ocihâne emwa Yehova. Gurhi wakacihânamwo emwa Yehova? Onamulaganye kugerera isala oku wakamuharamya yenene n’oku wakahira obulonza bwage oku nafasi ntanzi omu kalamo kawe. Enyuma z’aho onalaganye Yehova oku wagendekera wamuzigira ‘n’omurhima gwawe goshi, n’omûka [buguma-guma] bwawe boshi, n’obukengere bwawe boshi n’emisi yawe yoshi.’ (Mk. 12:30) Okucihâna emwa Yehova kunajirwe n’omuntu yenene, kantu kajirwa egarhi kage na Yehova. Lubero n’oko, omuntu anabatizibwe embere z’abantu banji; oko kunayerese abandi oku wacihânyire emwa Yehova. Okucihâna emwa Yehova ciba ciragane cizibu-zibu, omuhigo gwawe kushinganine kube kuhikiriza eco ciragane na Yehova alangalire oku wacihikiriza.​—Muh. 5:4. w24.03 buk. 2 cif. 2; buk. 3 cif. 5

Amahya goshi gabamwo amazibu. Ebibliya ebwizire n’obwalagale abantu bajire omu buhya oku “bayumva amalibuko omu mubiri gwabo.” (1 Kr. 7:28) Bulya gurhi? Bulya obuhya bunahumanye haguma bantu babirhi barhali bimana na ngasi muguma muli bo, ajira agage morhere, eby’ashagalukira n’ebi arhashagalukira. Omulume n’omukazi banaba barhali b’omu bûko buguma, barhanali b’omu nkomedu ziri kuguma. Hali amango omulume erhi omukazi akabona amorhere owabo agwerhe n’obu arhagabonaga embere barhôlane. Ngasi kaguma k’ebyo bintu byoshi kanalerha amazibu. Ahali h’okukola bwenene haguma lyo bayusa amazibu banarhondera batumuzanya n’obu boshi bagwerhe amagosa. Hali amango ciru bakabona oku okulekana nisi erhi okuzaza obuhya ko kwayusa amazibu gabo. Cikone, k’okulekana erhi okuzaza obuhya k’okuyusa amazibu? Nanga. Yehova alonzize omulume n’omukazi bagendekere babêra haguma ciru akaba kurhali kulembu okujira ntyo. w24.03 buk. 16 cif. 8; buk. 17 cif. 11

Enyuma z’okucihâna emwa Yehova n’okubatizibwa, obulangalire bwawe bw’okulama ensiku n’amango omu paradizo hanw’igulu bwagendekire bwayushuka omu kugendekera wayiga binji n’okuba Mukristu okuzire kiroho. (Hb. 5:13–6:1) Nkaba wacibwinire oku ebidesirwe omu lwandiko lw’Abaroma 5:2-4 biri by’okuli. Wagwerhe amalibuko gali lubero, cikone wagalembera wanaciyumva oku oyemirwe na Nnâmahanga. Bulya omanyire oku akuzigire anakushagalukire, okola ogwerhe ciru birhumire binji by’okulangalira oku wahâbwa ebi alaganyize. Obulangalire bwawe bwazibuhire bwenene kulusha oku bwal’iyosire oku murhondero. Okola obona oku buli bw’okunali bwenene kuli we, onabushagalukire bwenene. Bukuhumire oku murhima bwenene omu kushumya ngasi cigabi c’akalamo kawe n’omu kushanja oku ojirira abantu b’omulala gwawe, oku orhôla emihigo, na ciru oku okolesamwo akasanzi kawe. Entumwa Paolo eganirire akandi kantu k’obulagirire bwenene lugenda obulangalire oba nabo enyuma z’okuyemerwa na Nnâmahanga. Akuyemezize n’obwalagale oku obulangalire bwawe bwahikirira.​—Rm. 15:13. w23.12 buk. 12-13 cif. 16-19

Amango rhuli rhwalwisa mazibu malebe, nkaba rhurhakaciyumva, rhurhakarhanya erhi kujira nk’oku rhuyorha rhujira. Rhwanaciyumva rhuli rhwahêkwa eyi n’eyi enyanya z’oku rhuli rhwaciyumva. Gurhi Yehova arhurhabalamwo amango rhuli rhwaciyumva ntyo? Arhuyemezize n’obwalagale oku arhurhabala rhurhahuliganaga. Erhi ebato erhimanana n’omulaba omu nyanja, yanarhondera yacikweba eyi n’eyi. Ly’ebato edekerera erhi kurhaja eyi n’eyi, bato nyinji zijira ebyuma biba bishwekirwe oku ngasi lunda luli omu mishi. Ebyo byuma binarhabale ly’ebato erhacikwebaga eyi n’eyi bwenene, n’oko kunarhume abantu balimwo bashagalukira omubalamo. Cikone, ebyo byuma binakole bwinja amango ebato eri yagenda. Ko n’oko, Yehova anarhurhabala lyo rhurhahuliganaga amango rhuli rhwagendekera rhwamukolera n’obwishwekerezi omu mazibu. w24.01 buk. 22 cif. 7-8

Erhi wakaciyumva oyobohire, okacidosa ntya: ‘Bici Yehova amakanjirira?’ Okarhanya kw’ebi alemire. Kwa lwiganyo, erhi ‘rhulola’ gurhi Yehova ashibirira orhunyunyi n’amauwa n’obo birhalemagwa oku nshusho yage birhanajira obuhashe bw’okumuharamya, rhunazibuhye obulangalire bwirhu oku nirhu arhushibirira. (Mt. 6:25-32) Kandi orhanye kw’ebi Yehova ajirire abakozi bage. Nkaba wanayiga lugenda muntu mulebe oganirirwe omu Bibliya wayerekine obuyemere bwago-bwago, erhi wanasoma lugenda ebi mukozi mulebe wa Yehova wa muli gano mango acibwinire. Na kandi, orhanye bwenene lugenda gurhi Yehova akushibiriremwo. Gurhi akukulwiremwo omu okuli? (Yn. 6:44) Gurhi ashuzizemwo amasala gawe? (1 Yn. 5:14) Gurhi oli wayungukamwo ngasi lusiku n’enterekêro y’Omugala muzigirwa?​—Ef. 1:7; Hb. 4:14-16. w24.01 buk. 3 cif. 6; buk. 7 cif. 17