Ebicapo Bikolesibwe omu Ibugu ly’Entimanano Omukolo n’Akalamo k’Omukristu
© 2025 Watch Tower Bible and Tract Society of Pennsylvania
NSIKU 5-11/5
OBUGALE BW’AKANWA KA MUNGU | EMIGANI 12
Omukolo Muzibu Gunalerhe Amalehe Minja
w16.06 buk. 30 cif. 6
Oborhere bw’Obulagirire Bwenene Kulusha e Alimasi [Diamants]
Bakozi baguma na baguma ba Yehova banacirhimana omu kanga kali kazibu bwenene kuli bo okuhikirizamwo amalagirire gabo. Ahali h’okubula buba bikubagirwa mpu lyo bapata duba-duba ebi balagirireko, banakole bwenene n’obushiru. Omu kujira ntyo banayerekane oku bashagalukire amorhere ga Mungu, gahiziremwo obwikubagirwa, buba borhere bwa bulagirire bwenene kulusha ngasi kantu.—Mig. 12:24; Ef. 4:28.
w15 1/2 buk. 5 cif. 4-6
Oku Wakashagalukiramwo Omukolo Muzibu
Kuli kwa bulagirire bwenene okurhanya kw’er’idoso lizinda, bulya rhwanarhimukwa n’akazi kirhu erhi rhwakabona gurhi kali karhabala abandi bantu. Yezu yene adesire ntya: “Haba bushagaluke bunji omu kuhâna kulusha omu kuhâbwa.” (Ebijiro by’Entumwa 20:35, NWT) Hali abandi bantu bayunguka n’akazi kirhu kazibu ahanyuma n’abakiliya birhu, n’abanyakazi birhu. Bahiziremwo abantu b’omu mulala gwirhu n’abandi baba omu bulagirire.
Abantu b’omu mulala gwirhu. Erhi irhwe ly’omulala lyakakola bwenene lyo lihikiriza amalagirire g’abantu b’omu mulala gwage, anabalerhere obunguke omu njira ibirhi. Burhangiriza, anacihangane lyo bapata ebintu balagirireko omu kalamo nk’ebiryo, emishangi, n’ahantu h’okulama. Anabe ali ahikiriza omukolo Mungu amuhîre ‘gw’okushibirira . . . ab’omu mwage.’ (1 Timoteyo 5:8) Bwa kabirhi, omuntu okola bwenene ly’apata ebi alya anayigirize abandi obulagirire bw’okukola kugerera olwiganyo lwage. Shane, rhwaganiriraga omu cigabi cageraga, adesire ntya: “Larha ali lwiganyo lwinja lw’omuntu okola bwenene. Aba muntu mwikubagirwa wakozire bwenene akalamo kage koshi omukolo gw’okubinja. Olwiganyo lwage lwanyigirizize obulagirire bw’okukola n’amaboko gani lyo njira ebintu abandi bantu bakakolesa.”
Abali omu bulagirire. Entumwa Paolo yahanwire Abakristu ‘bakole n’obushiru n’amaboko gabo . . . lyo bahash’irhabala ab’obuligo.’ (Abefezi 4:28) Kobinali, erhi rhwakakola n’obushiru lyo rhuhikiriza amalagirire girhu n’ag’abantu b’omu mulala gwirhu, nkaba rhwanaba n’obulyo bw’okurhabala abandi bali omu bulagirire. (Emigani 3:27) Okukola n’obushiru kwanarhurhabala lyo rhuba n’omwishingo gurhenga omu kuhâna.
Obuhirhi bw’Ekiroho
ijwyp mwanzi gwa 95 cif. 10-11
Ka Njira Obuhashe bw’Okulembera Amazibu?
● Ohugûkwe bwinja amazibu gawe. Ocihangane okukamanya olubero egarhi k’amazibu madarhi n’amazibu garhali madarhi. Ebibliya edesire ntya: “Omuhwinja anayerekane oburhe bwage ho na halya, omwenge yêhe anabê nk’arhali ye bajizire burhe (bagayisize).” (Emigani 12:16) Arhali ngasi mazibu goshi go gashinganine gakakuhangayisa.
“Emasomo, abirhu banafunzi bakag’iciduduma enyanya z’ebintu omuntu arhakacidudumira. Enyuma z’aho bakahira ebyo bintu oku site z’e Enternete z’okuganira na bantu banji, n’abîra babo bakalunga obo borhere bwabo okuboko. Oko kwakarhuma byaba bizibu kulusha n’okurhuma barhaba n’obuhashe bw’okuhugûkwa amazibu bagwerhe.”—Joanne.
NSIKU 12-18/5
OBUGALE BW’AKANWA KA MUNGU | EMIGANI 13
Orharhebagwa n’Itara ly’Omubi
it-2 buk. 196 cif. 2-3
Itara
Okukolesibwa omu Zindi Njira z’Olwiganyo. Ebyakarhabala omuntu ly’abona enjira biba bishushanyizibwe n’itara. Mw’eyo njira y’olwiganyo ecitabu c’emigani ciyerekine olubero egarhi k’omuntu mushinganyanya n’omuntu mubi, omu kuderha ntya: “Omushinganyanya kwo ali nka kamole kayasire, cikwone omuntu mubi kw’ali nk’itara lizimire.” (Mig 13:9, Mashi Bible) Itara ly’omuntu mushinganyanya linagendekere lyayaka bwenene, cikone ciru itara ly’omuntu mubi lyakabonekana nka liyasire n’okuba nka liri lyamuyeresa enjira, Mungu amuleka omu mwizimya omu okugulu kwage kwasarhala. Ntyo ko byabera omuntu oheherera ishe na nnina.—Mig 20:20.
Kandi ‘okuzima kw’itara’ ly’omuntu kuhugwîre oku arhagwerhi obulangalire bw’amango gayisha. Ogundi mugani gudesire ntya: “Bulya nta irhondo ly’enkola-maligo: akamole k’endyalya kuzima kanazima.”—Mig 24:20.
w12 15/7 buk. 12 cif. 3
Okolere Mungu Ohâna Oluhûma
3 Okubona Shetani arhumire bantu babirhi bimana na biremwa binji by’ekiroho bahagalika oburhegesi bwa Mungu, oko kuyerekine oku na nirhu anarhurheba. Enjira akolesagya ago mango yo anacikolesa ene. Analonze okurhurheba rhurhanye oku amarhegeko ga Mungu gaba garhushwesire, n’oku gananarhuyime oluhûma. (1 Yn. 5:3) Entanya za ntyo zanarhuzidohera erhi rhwakakazirhanyako ngasi mango. Mwali wirhu muguma ogwerhe myaka 24 wagwerhe olugenzi lw’okujira eby’enshonyi, adesire ntya: “Abîra babi banshumize bwenene, bulya nakag’iyoboha okuba n’entanya ziri lubero n’ez’eyirhu misole.” Nkabaga na nawe okola ohikirwe n’akanga ka ntyo k’okusezibwa n’eyinyu misole.
w04 15/7 buk. 31 cif. 6
“Omuntu Okengukwa Arhajira Ebi Arhagererezize”
Omuntu okengukwa na mushinganyanya okolesa obumanye bw’okuli anagishwe. Solomoni arhuyemezize ntya n’obwalagale: “Omushinganyanya alya anayigurhe, endà y’enkola-maligo erhahwa kulakira ishali.” (Emigani 13:25) Yehova aba amanyire ebintu binja kuli rhwe, bibe biyerekire amazibu g’omulala gwirhu, obwîra bwirhu haguma n’abandi, omukolo gwirhu gw’amahubiri, erhi amango rhwahabirwe obuhane. N’omu kukolesa n’obwenge amahano gaba omu Kanwa kage, rhwanaba n’omwishingo omu kalamo.
Obuhirhi bw’Ekiroho
it-2 buk. 276 cif. 2
Obuzigire
Okuyerekana obuzigire omu njira erhali nyinja. Oko kuyerekine oku erhi omuntu akalongozibwa n’iroho lya Mungu n’obumanye buba omu Kanwa kage, anaba n’obuzigire bw’okunali n’okubuyerekana omu njira nyinja. Kwa lwiganyo, omubusi anaba azigire omwana wage. Cikone obo buzigire bwanasherera erhi abuyerekane kubi enyanya z’oku ali aciyumva, omu kuha oyo mwana ngasi kantu erhi okumuleka ajire ngasi ebi alonzize. Anaba arhali ajira omukolo gw’omubusi guhiziremwo okuha omwana obuhane. (Mig 22:15) Obuzigire bwa ntyo bwanarhuma omulala gwaba n’obucibone, n’okuba gwa kucikaliza. Ebibliya edesire oku omuntu wa ntyo arhali buzigire ayerekana, cikone nshombo, bulya arhaba ali ajira akantu kakayokola akalamo k’omwana wage.—Mig 13:24; 23:13, 14.
NSIKU 19-25/5
OBUGALE BW’AKANWA KA MUNGU | EMIGANI 14
Orhanye Lugenda Ebi Wakajira Amango g’Obuhanya
Oshagalukire Engalo ya Nnâmahanga y’Obuzine
10 Hali amango rhurhakahasha okujira akantu koshi-koshi lyo rhucîka akanga kazibu karharhuhikiraga. Kwa lwiganyo, rhurhakahasha okucîka obuhanya bucilerha bone, endwala z’okuyahukira, n’akavulindi k’obuminya. Cikone erhi obuhanya bwa ntyo bwakarhibuka, rhwanajira okwirhu koshi lyo rhucilanga n’okucira obo buhanya omu kurhumikira amarhegeko g’abarhegesi garhuhûnyire rhubêre aha mwabirhwe, rhurhenge omu eneo yirhu, n’agandi marhegeko garhuhûnyire okujira duba-duba. (Rm. 13:1, 5-7) Byanahashikana rhucirheganye lugenda kanga kaguma na kaguma kahûna okujira duba-duba, co cirhumire rhushinganine rhuyumvirhize obulongozi bw’abarhegesi b’omu eneo yirhu bwakarhurhabala rhucirheganye lugenda ako kanga. Kwa lwiganyo, rhwanabîka amishi n’ebiryo birhakabola n’amafumu gakarhurhabala oku ndwala zirhali ndarhi.
11 Bici rhwakajira erhi akaba endwala y’okuyahukira eri yalandira omu eneo yirhu? Rhushinganine rhurhumikire amarhegeko g’abarhegesi, kwa lwinganyo irhegeko ly’okukalaba enfune, okurhayegera abandi, okuyambala amaske, n’okubêra omu luzerema. Erhi rhwakacihangana okujira ebyo byoshi, rhwanayerekana oku rhushagalukire engalo ya Nnâmahanga y’obuzine.
12 Omu mango g’akanga kahûnyire okujira duba-duba, hanaba myanzi minji y’obunywesi rhwakabwirwa n’abîra, abalungu, na kugerera ebyombo by’okuhâna emyanzi. Ahali h’okuyemera ‘ngasi kanwa,’ kwanaba kwinja rhuyumvirhize emyanzi y’okuli kurhenga oku barhegesi na badoktere. (Osome Emigani 14:15, Mashi Bible.) Bene wirhu b’omu Mbaraza Eri Yalongoza n’ab’omu mabiro g’etawi banajire okwabo koshi lyo bamanya emyanzi y’okuli embere z’okurhuha obulongozi lugenda entimanano z’ecigamba n’omukolo gw’amahubiri. (Hb. 13:17) Omu kurhumikira obo bulongozi, rhunacilange n’okulanga abandi lyo barhag’ihikirwa n’amazibu. Kandi rhunarhabale abandi lyo baba n’entanya nyinja lugenda Abahamirizi ba Yehova.—1 Pt. 2:12.
Obe wa Burhwali aka Sadoki
11 Erhi byakahûna rhurhabale bene wirhu na bali birhu omu mango mazibu, gurhi rhwakayerekanamwo oburhwali buli nk’obwa Sadoki? (1) Okulikire obulongozi. Omu kanga ka ntyo, kuli kwa bulagirire rhugendekere rhwabêra omu cinyabuguma. Okulikire obulongozi bw’etawi y’e mwinyu. (Hb. 13:17) Abagula bashinganine bakasoma ngasi mango emipango eyerekire e eneo yabo lugenda ebyakajirwa erhi obuhanya bwakarhibuka, n’okusoma obulongozi bw’ikubuliro lugenda ebyakajirwa erhi akaba obuhanya buyegerire. (1 Kr. 14:33, 40) (2) Obe wa burhwali cikone obe masu. (Mig. 22:3) Okolese obwenge. Orhacihiraga omu mazibu garhali ga bulagirire. (3) Olangalire Yehova. Okengere oku Yehova alonzize we na bene winyu na bali binyu mugendekere mwabêra omu bulanzi. Anakuhashisa okurhabala bene winyu na bali binyu buzira kucihira omu mazibu.
Obuhirhi bw’Ekiroho
Oku Wakakarhôlamwo Emihigo Minja
Ebibliya edesire ntya: “Omwenge yehe anakazilola bwinja ah’agera.” (Emigani 14:15) Oko kuli kuderha oku amango rhukola rhwarhôla emihigo rhushinganine rhurhangiy’irhanyako bwenene. Amango oli warhanya okurhôla muhigo mulebe, wanarhangicidosa ntya: ‘Kanuni kahi k’Ebibliya kakantabala muli aka kanga? Erhi nakarhôla ogu muhigo, ka gwarhuma naba n’omurhula gw’ekandalala? K’ogu muhigo gwalerherha abandi amazibu erhi nanga? N’idoso ly’obulagirire wakacidosa liri ly’eri: K’ogu muhigo narhôla gwashagalusa Yehova?’—Olushika 32:29.
Yehova yeshinganine arhubwire ebintu binja byo bihi n’ebibi byo bihi. Erhi rhuhugûkwa bwinja amarhegeko n’amakanuni gage na buzinda rhuciseze okugakulikira, rhwanaba erhi rhuli rhwakomereza ezamiri zirhu zikakola bwinja. Ezamiri, ziba ntanya z’ekandalala zibwira omuntu oku akantu kali kinja erhi kali kabi. (Abaroma 2:14, 15) Ezamiri eri yakola bwinja enarhurhabale rhurhôle emihigo minja.
NSIKU 26/5–1/6
OBUGALE BW’AKANWA KA MUNGU | EMIGANI 15
Orhabale Abandi lyo Baba n’Omwishingo
w10 15/11 buk. 31 cif. 16
Rhwalambagira omu Bwishwekerezi Bwirhu!
16 Ayubu ali muhanyi. (Ayu. 31:31, 32) Ciru akaba rhurhaba bagale, ‘rhwanakahandisa [kuyegereza] ebigolo.’ (Rm. 12:13) Rhwanakashangira akantu kasungunu rhugwerhe haguma n’abandi, omu kukengera oku “okulya enshogo lubala nka hali obuzigire, kwo kukulu hali okulya enyama zishushagîre nka hali n’enshombo.” (Mig. 15:17, Mashi Bible) Okushangira ebiryo omu buzigire haguma n’owirhu mukozi wa Mungu oli mwishwekerezi, kwanarhuma rhwashagalukira ciru n’ebiryo bibonekine nka bya busha-busha, kwananarhuma rhwarhabalana omu hali y’ekiroho.
w18.04 buk. 23-24 cif. 16-18
Rhukahânana Omurhima ci “Bwenene” Muli Gano Mango
16 Kwanaba kucirheba erhi rhwakakarhanya oku rhurhakaha abandi omurhima mpu bulya kone rhurhish’iganira bwinja n’abandi. Birhaba bihûnyire binji ly’omuntu aha owundi omurhima, nkaba rhwanajira ntyo omu kumwemwerhwa amango rhuli rhwalamusa muntu mulebe. Erhi oyo muntu akabula bwamwemwerhwa, oko kwanayerekana oku agwerhe amazibu, n’okumuyumvirhiza kone kwanarhuma arhulirizibwa.—Yk. 1:19.
17 Mwene wirhu muguma ociri musole ohamagalwa Henri, avunisire omurhima bwenene erhi abantu b’omu mulala gwage bahiziremwo n’ishe wali mugula okenzirwe, baleka okuli. Henri ahâbirwe omurhima na mwangalizi w’omuzunguko wamuhekaga hantu haguma baj’inywa akahwa anamuha oluhya lw’okumubwira ebimuli omu murhima. Henri ahugûkwa oku okubêra mwishwekerezi kone kantu akajijire ly’arhabala omulala gwage gushub’igaluka omu okuli. Arhulirizibwa bwenene erhi asoma Ennanga 46; Sofoniya 3:17; na Marko 10:29, 30.
18 Olwiganyo lwa Marthe na Henri luyerekine oku rhwanaha omurhima mwene wirhu erhi mwali wirhu olagirire oku kurhulirizibwa. Mwami Solomoni ayandisire ntya: “Okuderha akanwa amango ganakwanine, okwo kuba kwinja bwenene. Obusu burhulwire bunalerhe enshagali, n’emyanzi y’omurhûla enazibuhye omuntu.” (Mig. 15:23, 30, Mashi Bible) Na kandi, okusoma Ilabiro ly’Akalalizi erhi okusoma emyanzi eri oku site yirhu y’e Enternete kwanarhuliriza omuntu ovunisire omurhima. Paolo ayerekine oku okuyimba haguma enyimbo z’Obwami kwanarhuliriza. Ayandika ntya: “Mukâyigirizanya munakârhondana n’obumanye bunji. Mukâyimbira Nnâmahanga n’omurhima gwinyu gwoshi n’okumuvuga omunkwa omu nnanga, n’omu nyimbo z’okucîtakira, n’omu zindi nyimbo zage.”—Kl. 3:16, Mashi Bible; Ebj. 16:25.
Obuhirhi bw’Ekiroho
ijwbq mwanzi gwa 39 cif. 3
K’Omukristu Anayemera Okubukirwa Emwa Munganga?
2. Ka nshinganine mpûne abandi banganga amahano? Okuba na ‘bahanûzi banji’ kwanaba kwa bulagirire, ci bwenene erhi akaba oli omu kanga kazibu.—Emigani 15:22.
NSIKU 2-8/6
OBUGALE BW’AKANWA KA MUNGU | EMIGANI 16
Madoso Asharhu Gakarhurhabala Rhurhôle Emihigo Minja
w14 15/1 buk. 19-20 cif. 11-12
Okurhôla Emihigo Minja Amango g’Obusole
11 Okukolera Yehova ko kurhuma rhwaba n’omwishingo gw’okunali. (Mig. 16:20) Bibonekine oku omwandisi wa Yeremiya, wakag’ihamagalwa Baruki, ayibagire oko. Mango maguma arhacikag’ishagalukira okukolera Yehova. Yehova amubwira ntya: “Nawe odwirhage wahûna mpu bakuhe byawe-byawe. Orhahûne, bulyala, sinza: buhanya nalerhera ngasi mubiri, . . . Na nawe, omunyago nkuhîre, bunali obuzine bwawe ngasi aha wakanaja.” (Yer. 45:3, 5) Gurhi orhanyize? Bici byashagalusize Baruki, ka kulongereza bintu binji erhi okuyokoka bulya ali mukozi mwishwekerezi wa Mungu erhi Yeruzalemu asherezibwa?—Yk. 1:12.
12 Mwene wirhu Ramiro ali muguma w’omu bantu babire n’omwishingo omu kurhabala abandi. Adesire ntya: “Nakuliraga omu mulala mukenyi omu Ntondo z’e Andes. Co cirhumire erhi mukulu wani ambwira oku andipira lyo nsoma e université, nabona oku ako kali kantu kinja bwenene anjirira. Cikone lyo naciyusag’ibatizibwa nka muguma w’omu Bahamirizi ba Yehova, na painiya muguma ali amandalika oku rhuj’ihubiri naye omu vile nguma nsungunu. Nagenda n’oyo painiya, nayiga okumoma, nanakamoma abantu lyo mpikiriza amalagirire gani g’omubiri. Erhi rhurhondera okuyigiriza abantu Ebibliya, banji bashagalukira okuyiyiga. Enyuma z’aho, naja omu cigamba cacirhondezibagwa c’olulimi lw’eyo munda. Nkola ngwerhe myaka ikumi ndi omu mukolo gw’akasanzi koshi. Nta gundi mukolo nakajijire gwakampa omwishingo guli nk’ogu mba nago erhi ntabala abantu bayige omwanzi mwinja omu lulimi lwabo lw’akaburhano.”
w13 15/9 buk. 17 cif. 1-3
Ka Wajijire Empindulo?
RHWESHI rhunakashumibwa n’aha rhwakuliraga n’oku rhulamire. Rhunakayambala omu njira ndebe, okushagalukira biryo bilebe, n’okuba na lugenzi lulebe. Bulya gurhi? Kanji-kanji binakaba ntyo enyanya z’abantu rhulama nabo n’akanga rhwageziremwo omu kalamo.
2 Cikone, hali ebindi bintu by’obulagirire bwenene kulusha ebiryo rhushagalukira n’emishangi rhucishoga okuyambala. Kwa lwiganyo, rhwayigirizibwe okukabona oku bintu bilebe bili binja binashinganine, n’okubona ebindi oku bili bibi birhanashinganini. Ngasi muntu ajira oku abona ebintu bya ntyo. Ezamiri yirhu yanarhushumya okurhôla emihigo minja erhi emihigo mibi. Ebibliya erhumanyisize oku kanji-kanji “abapagani [bantu b’amashanja, NWT] bakulikira obworhere bwabo bwinja ciru ankaba barhagwerhi marhegeko.” (Rm. 2:14) Cikone, k’oko kuli kuderha oku omu kanga irhegeko lya Mungu lirhayerekini n’obwalagale ebi rhwakajira, rhushinganine kone rhukulikire amarhegeko rhwayigirizibagwa kurhenga eburho n’ebintu bilug’ijirikana omu eneo rhulamiremwo?
3 Hali bintu bibirhi by’obulagirire byakarhuma Abakristu barhajira ntyo. Burhangiriza, Ebibliya erhukengezize ntya: “Hali engeso omuntu abona nk’eri nyinja, cikwone obuzinda enahêke omuntu omu lufu.” (Mig. 16:25, Mashi Bible) Bulya rhurhaba bimana, rhurhajira obuhashe bw’okuhiga ebintu byakarhulongoza bwinja n’okurhulerhera obunguke. (Mig. 28:26; Yer. 10:23) Bwa kabirhi, Ebibliya eyerekine oku Shetani, “nyamuzinda w’en’igulu” ye okashumya amakanuni g’er’igulu n’ebijirwamwo. (2 Kr. 4:4; 1 Yn. 5:19) Co cirhumire erhi akaba rhulonzize Yehova akarhugisha n’okurhuyemera, rhushinganine rhurhumikire oburhonde buli omu Abaroma 12:2.—Osome.
Obuhirhi bw’Ekiroho
it-1 buk. 629
Obuhane
Ebyakarhuhikira Erhi Rhwakayemera Obuhane Erhi Okubulahira. Abantu babi, ebinganyi, erhi abarhajira olugenzi lwinja banayerekane oku bashombire obuhane bwa Yehova omu kubulahira loshi-loshi. (Enna 50:16, 17; Mig 1:7) Obunganyi bwa ntyo bunarhume omuntu ahabwa obuhane buzibu bwenene erhi ciru okushurhwa. Nk’oku emigani eyerekine: “Isirhe ly’abahwinja bwo na buhane bwabo.” (Mig 16:22) Banacilerhere obukenyi, okurhacikakengwa, endwala, erhi ciru okufâ embere z’akasanzi. Ebyahikiraga Abaisraheli biyerekine amazibu gakahikira enyanya z’okurhayemera obuhane. Barhayemeraga obuhane bakag’ihabwa omu kukalihirwa n’okukubulwa kugerera abalebi. Bakasegeza obwenge bwabo oku buhane Yehova akag’ibaha omu kubayima omugisho gwage n’obulanzi bwage. Buzinda, bahikirwa n’obuhane bwalebagwa embere, kuli kuderha okugwarhwa n’okuhekwa omu cindi cihugo.—Yer 2:30; 5:3; 7:28; 17:23; 32:33; Hoz 7:12-16; 10:10; Sof 3:2.
NSIKU 9-15/6
OBUGALE BW’AKANWA KA MUNGU | EMIGANI 17
Oshagalukire Omurhûla omu Buhya Bwawe
g 9/14 buk. 11 cif. 2
Oku Wakayakamwo Okubîka Akarhinda
Ocilabirize bwinja. Ebibliya erhubwizire oku bantu baguma na baguma ‘banakaluba duba’ bananaba ‘bakali.’ (Emigani 29:22) Ka ntyo k’oyorha? Ocidose ntya: ‘Ka nankagaya bwenene? Ka nangayire busha? Ka nansegeze obwenge oku magosa masungunu-ngunu?’ Ebibliya edesire oku ‘oja aderha ecibî ca bene anashombanye abayinjibîne.’ (Emigani 17:9; Omuhanûzi 7:9) Oko kwanahikira n’omu buhya. Co cirhumire erhi akaba ojira oborhere bw’okubika akarhinda, ocidose ntya: ‘Ka nanakalembera ibanie erhi mukanie bwenene?’—Akanuni k’Ebibliya: 1 Petro 4:8.
w08 1/5 buk. 10 cif. 6–buk. 11 cif. 1
Okuyusa Amazibu
1. Mucihirireho akasanzi k’okuganirira amazibu. “Ngasi kantu kajira amango gako, . . . amango g’okuganira n’ag’okuhulika.” (Omuhanûzi 3:1, 7) Nk’oku biyerekinwe oku murhondero, mazibu maguma na maguma ganarhuma abantu baba burhe. Erhi oko kwakahikira, mwanayerekana oborhere bw’okucihasha omu ‘kuhulika’ lyo murhag’iba burhe. Mwanalanga obwîra bwinyu erhi mwakarhumikira er’ihano ly’Ebibliya lidesire ntya: “Okuzusa olubanja kuba kufukulira amishi, onacizibuke lo lurhacikula.”—Emigani 17:14.
Cikone, haba n’amango “g’okuganira.” Amazibu ganakula nka lubala erhi akaba garhashibirirwi. Co cirhumire murhakag’ilekerera amazibu mugwerhe omu kurhanya oku gahwa gone. Erhi wakatwa omu nganiro zinyu, wanayeresa balo erhi mukawe obukenge omu kupanga muyish’iganirira ago mazibu agandi mango. Okujira ntyo kwanamurhabala mwembi lyo murhumikira aka kanuni k’Ebibliya kadesire ntya: “Izuba lirhazikaga n’obukunizi bucimmugwerhe.” (Abefezi 4:26) Cikone, oshinganine ohikirize ebi walaganyagya.
Obuhirhi bw’Ekiroho
Ogendekere Wayunguka omu Kuyoboha Nnâmahanga
Ecirhumire c’obulagirire cirhushumya rhulange omurhima gwirhu gw’olwiganyo kuli kubona oku Yehova analolereze omurhima gwirhu. Anabone binji kulusha oku abandi barhubona ananabone oku rhuyosire kobinali ekandalala. (Osome Emigani 17:3.) Arhuzigira erhi rhwakagendekera rhwarhanya oku mahano gage g’obwenge gakarhurhabala rhulame ensiku n’amango. (Yn. 4:14) Erhi rhwakajira ntyo, amakanuni g’olugenzi lubi n’obunywesi bwa Shetani n’igulu lyage birhakaba n’enafasi omu bukengere bwirhu. (1 Yn. 5:18, 19) Amango rhugendekire rhwayegera Yehova, obuzigire bwirhu n’obukenge bwirhu kuli ye bwanayushuka. Bulya rhurhalonzizi okugayisa Larha wirhu, rhunagaye ciru n’entanya z’okulonza okujira ecaha. Erhi rhwakashumikwa okujira akantu kabi, rhukacidosa ntya: ‘Gurhi nakagayisa n’obulonza Omuntu wanyeresire buzigire bunji bwenene?’—1 Yn. 4:9, 10.
NSIKU 16-22/6
OBUGALE BW’AKANWA KA MUNGU | EMIGANI 18
Okarhuliriza Abali Balwisa Amazibu g’Amagala
Obwenge bw’Okunali Buli Bwayakûza
17 Okarhanya embere oderhe. Erhi akaba rhurhabiri masu, enderho zirhu zanalerha mazibu manji. Ebibliya edesire ntya: “Ola oderha duba buzira kugerêreza anayagaze owabo nka ngorho, cikwone enderho z’ab’obumanye [ab’obwenge, NWT] buba bufûmu.” (Mig. 12:18, Mashi Bible) Rhunarhabale okugendekeza omurhûla amango rhuli rhwayaka okuderha-derha lugenda amagosa g’abandi. (Mig. 20:19) Ly’enderho zirhu zifumya abandi ahali h’okubayagaza, rhugwasirwe rhuyunjuze omu mirhima yirhu obumanye kurhenga omu Kanwa ka Nnâmahanga. (Lk. 6:45) Erhi rhwakakarhanya bwenene kw’ebi Ebibliya edesire, enderho zirhu zanaba “nshôko y’obwenge” na kandi zanaha abandi omurhima.—Mig. 18:4, NWT.
mrt mwanzi gwa 19 cisanduku
Gurhi Rhwakajira Erhi Rhwakalwala?
Omuyumvirhize bwinja. Enjira ntanzi nyinja y’okurhabala omwîra wawe, kuli kumuyumvirhiza amango alonzize okuderha. Orhahunyirwi mpu oshuze oku ngasi kantu ali aganira. Okuyumvirhiza ebi ali aderha kone kwanarhabala. Ciru akaderha bici, orhamutwiraga olubanja. Orhalonzagya okumubwira oku ohugûsirwe bwinja akanga alimo, ci bwenene erhi akaba endwala yage erhali yabonekanira oku mubiri.—Emigani 11:2.
Obe n’Enderho nyinja. Biyumvikine okubula enderho wakabwira omwîra wawe amango alwazire, cikoki, nkaba wanamubwira oku akanga alimwo nawe kakugayisize bwenene, n’oko kwanarhuma aciyumva bwinja. Wanamubwira enderho nembu na za kurhenga oku murhima nk’ezi: “Ntamanyiri bici naderha, cikoki, ndonzize omanye oku ndi nakurhanyako bwenene.” Lubero n’oko, oyake okuderha enderho ziri nk’ezi: “Ebintu byakabire bizubu bwenene” erhi “Kuli kwinja okubona orhajijire . . .”
Wanayerekana oku oshibirire omwîra wawe erhi wakajira obusagasi lugenda endwala alwazire. Anashagaluka bwenene erhi akabona obushiru ogwerhe bw’okulonza okuhugûkwa oku ali aciyumva. (Emigani 18:13) Cikoki, omanye wakamuha amahano erhi akaba arhakuhunyirigo.
Odose ebi wakajira ly’ohâna oburhabale bwawe. Orharhanyagya mpu ohugûsirwe bwinja ebyakarhabala, muli oko wanadosa bici wakajira ly’orhabala. Cikoki, okengere oku hali amango omwîra wawe akalahira obo burhabale bulya arhalonzizi akubarhuze omuzigo. Muli oko, wanamubwira oku erhi akalonza wamujîra aha akanajire hoshi, wanamurhabala okucesa anyumpa erhi kuyenda, n’ebindi n’ebindi.—Abagalasiya 6:2.
Orharhamaga. Byanahashikana obulwala bwanarhuma omwîra wawe alahira oku murhacibonane n’obo mwali murheganyize oku mwabonana erhi kandi anaderha oku arhalonza okuganira. Muli oko byanahuna obe wa kulembera na mumva. Ogendekere wamulunga okuboko.—Emigani 18:24.
wp23.1 buk. 14 cif. 3–buk. 15 cif. 1
Oku Wakarhabalamwo Abalwazire Endwala y’omw’Irhwe
“Muderhe omu njira y’okurhuliriza.”—1 ABATESALONIKA 5:14, NWT.
Omwîra wawe anaciyumva agwerhe amahangayiko, erhi alwise entanya z’okuciyumva arhali wa bulagirire. Omu kuyerekana n’obwalagale oku omushibirire, wanamurhuliriza n’okumuha omurhima, ciru akaba orhamanyiri bwinja ebi waderha.
‘Mwîra wa muntu aba amuzigire ngasi mango.’—EMIGANI 17:17.
Omuhe oburhabale bushinganine. Ahali h’okurhanya oku omanyire gurhi wamurhabalamwo, wanamudosa bici wakamujirira. Erhi akaba kuli kuzibu oku mwîra wawe okukubwira ebi alagirireko, wanamubwira erhi byanahashikana mujire kantu kalebe haguma, kwa lwiganyo nk’okugend’ilambagira haguma. Erhi wanamurhabala omu kugend’imugulira ebintu, okumucekeza enyumpa, okumufulira, erhi okumujirira ebindi bintu.—Abagalasiya 6:2.
“Mulembere.”—1 ABATESALONIKA 5:14, NWT.
Hali amango kwakaba kuzibu oku mwîra wawe okukuganiza. Oyemeze omwîra wawe n’obwalagale oku wamuyumvirhiza hano aciyumva oku anahash’iganira. Enyanya z’obulwala, omwîra wawe anaderha erhi kujira kantu kalebe orhashagalukiri. Hali amango akavuna emipango mwarhozire erhi abe mukali. Obe wa kulembera na wa kuhugûkwa oku ali aciyumva amango oli wamuha oburhabale alagirireko.—Emigani 18:24.
Obuhirhi bw’Ekiroho
Yehova Akurhabala omu Mango Mazibu
Ebi rhushinganine rhujire. Ojire okwawe koshi ly’orhaciyegulaga oku bandi. Erhi rhwakaciyegula oku bandi, nkaba rhwanarhondera okucisegezak’obwenge rhwe nnene n’okubusegeza oku mazibu rhugwerhe. Entanya za ntyo zanarhuma rhurharhôla emihigo minja. (Mig. 18:1) Kobinali, rhweshi rhunalonze okubêra kahumba kasanzi kalebe, ci bwenene erhi akaba rhuli rhwalwisa mazibu malebe. Cikone erhi rhwakaciyegula oku bandi kasanzi kanji, rhwanaba rhuli rhwayaka enjira Yehova ali akolesa ly’arhurhabala. Co cirhumire, ciru amazibu gawe gakaba madarhi gurhi, okayemera oburhabale bw’omulala gwawe, abîra bawe, n’abagula. Obone oku Yehova ali abakolesa ly’akurhabala.—Mig. 17:17; Iz. 32:1, 2.
NSIKU 23-29/6
OBUGALE BW’AKANWA KA MUNGU | EMIGANI 19
Obe Mwîra w’Okuli Kuli Bene Winyu na Bali Binyu
Oku Rhwakazibuhyamwo Obuzigire Bwirhu Egarhi Kirhu Rhwene na Nnene
16 Okasegeza obwenge oku morhere minja ga bene winyu na bali binyu, arhali oku magosa gabo. Rhuganirire olu lwiganyo. Orhanye obe oli okw’idinye haguma n’ecigusho ca bene winyu na bali binyu muli mwacishagalusa. Muli mwashagalukira akasanzi kinja n’oku buzinda bw’er’idinye murhôlwe enfoto haguma. Kobinali, mwanarhôlesa zindi nfoto ibirhi mwakabêrana erhi akaba eya burhanzi erhayish’irhenge bwinja. Mwanabaga mukola mugwerhe nfoto isharhu. Cikone oku nfoto nguma mulizo, oboneko mwene wirhu muguma anzinzire amalanga. Gurhi wakajira eyo nfoto? Wanayizaza bulya ogwerhe zindi nfoto ibirhi, na kw’ezo nfoto ngasi muguma winyu ali amwemwerhwa, kuhiramwo n’oyo mwene wirhu.
17 Lekagi rhushushanye enfoto rhubîka n’ebintu binja rhugendekera rhwakengera kuli bene wirhu na bali birhu. Kanji-kanji rhunakengere akasanzi kinja rhwagezize haguma na bene wirhu na bali birhu. Cikone orhanye kasanzi kaguma mw’orho rhusanzi mwagezagya haguma, mwene wirhu muguma erhi mwali wirhu aderha erhi kujira kantu kalebe karhashinganini. Bici rhushinganine rhujire lugenda ako kantu karhashinganini? Bulya gurhi orhakacihangana okukazaza omu bwenge nka kula wanazazagya erya nfoto nguma mw’ezirya nfoto? (Mig. 19:11; Ef. 4:32) Rhwanajira okwirhu koshi lyo rhuzaza ecaha cisungunu c’oyo mwene wirhu bulya rhukengire rhusanzi rhunji rhwinja rhwagezize haguma naye. Ebyo bintu bya ntyo byo rhulonzize rhukabîka omu bwenge bwirhu n’okubikengera.
Ogendekere Wayushûka omu Buzigire Bwawe
10 Nirhu rhunalonze enjira rhwakarhabalamwo bene wirhu na bali birhu Bakristu. (Hb. 13:16) Rhuganirire olwiganyo lwa Anna, rhwaganiriraga omu cigabi c’embere. Enyuma z’empusi ndarhi, ye n’iba balambagirira mulala muguma gw’Omuhamirizi wa Yehova banabona oku oburhungiri bw’enyumpa y’ogo mulala bwahesirwe n’empusi, n’enyanya z’oko abantu b’ogo mulala barhacigwerhe mishangi ecîre. Anna adesire ntya: “Rhwarhôla emishangi yabo rhwayifula, rhwanayigalula enakola migome na mikunje. Rhwehe rhwabwine nk’eco cali cijiro cisungunu bwenene, cikone carhuma rhwakoma obwira bucisêzire kuhika ene.” Obuzigire Anna n’iba bagwerhe kuli bene wabo na bali babo bwabashumya babaha oburhabale bal’ilagirireko.—1 Yn. 3:17, 18.
11 Amango rhuli rhwajirira abandi omu njira y’obuzigire n’olukogo, kanji-kanji banabone oku rhuli rhwacihangana lyo rhurhanya n’okujira ebintu aka Yehova. Kandi banashagalukira bwenene olukogo lwirhu kulusha oku rhwal’irhanyize. Khanh rhwaganiriraga embere, anakengere bwenene abamurhabalaga. Adesire ntya: “Mvuzire omunkwa bwenene bali birhu bazigirwa boshi bakag’impeka omu mukolo gw’amahubiri. Bakagiyish’intôla aha kâ, bakag’indalika rhulye haguma ebiryo by’okumacuza erhi ebiryo by’omulegerege, banakag’ijira okwabo koshi lyo ngaluka bwinja aha kâ. Nkola mba mpugûsirwe oku okujira ntyo gwali mukolo munji kuli bo. Cikone bakag’ijira ntyo n’obuzigire.” Kobinali, arhali abantu boshi bakarhuvuga omunkwa kw’ebi rhubajirire. Khanh adesire ntya lugenda abakag’imurhabala: “Nakalonzize mbalipe enyanya z’olukogo lwabo lunji banyeresire, cikone ntamanyiri ngahi boshi balama. Ciru akaba ntyo, Yehova yehe ahamanyire, kandi namushenge ayish’ibandipira.” Khanh adesire okuli. Yehova anabone ciru n’ecijiro cisungunu bwenene c’olukogo rhujirire abandi. Anabone ecijiro ca ntyo nka nterekêro y’obulagirire bwenene na nk’ideni ayish’ilyula.—Osome Emigani 19:17.
Mugendekere Mwayerekana Obuzigire Bwishwekerezi Mwene na Nnene
6 Ene, rhwanaderha oku muntu mulebe okola ogwerhe myaka minji ali akolera bose mulebe banamubone nka mukozi mwishwekerezi. Cikone, muli eyo myaka yoshi arhasagirhimanana ciru n’omukulu muguma w’ako kazi. Hali amango erhi hali ensiku arhayemera amarhegeko goshi g’ako kazi. Arhaba azigire ako kazi, cikone anashagalukire okukakola bulya kanamuhe ensabuni n’akalyo. Nk’arhabwini akandi kazi kinja, anagendekera akola aho kuhika arhenzibwe oku kazi enyanya z’obushozi.
7 Olubero egarhi k’obwishwekerezi nk’oku bwaganiriragwa omu cifungo ca 6 n’obuzigire bwishwekerezi ciba cirhumire cishumya omuntu ajire kantu kalebe. Omu mango ga mîra, bici byakagishumya abakozi ba Nnâmahanga bayerekane ebijiro by’obuzigire bwishwekerezi? Abakagiyerekana obuzigire bwishwekerezi barhakag’ibuyerekana bulya basezibwe cikone bakag’ibuyerekana bulya balonzize okujira ntyo. Rhuganirire olwiganyo lwa Daudi. Omurhima gwage gwakagimushumya okuyereka omwîra wage muzigirwa Yonatani obuzigire bwishwekerezi ciru akaba ishe wa Yonatani akagilonza okuniga Daudi. Myaka minji enyuma z’okufâ kwa Yonatani, Daudi agendekera ayereka Mefibosheti mugala wa Yonatani obuzigire bwishwekerezi.—1 Sam. 20:9, 14, 15; 2 Sam. 4:4; 8:15; 9:1, 6, 7.
Obuhirhi bw’Ekiroho
it-1 buk. 515
Ihano, Omuhanuzi
Yehova ye mwenge bwenene kulusha abantu boshi. Arhaba alagirire oku ihano lya muntu mulebe. (Iz 40:13; Rm 11:34) Omugala agwerhe obuhashe bw’okukola nka “Muhanuzi Mukulu,” w’okuhâna obulongozi, bulya ahâbirwe amahano n’Ishe anagakulikira, ananagwerhe iroho lya Mungu. (Iz 9:6, Mashi Bible; 11:2; Yn 5:19, 30) Oko kuyerekine n’obwalagale oku ly’ihano lilerha obunguke, lishinganine libemwo entanya za Yehova. Ngasi ihano liba lipingine n’entanya z’Ogala-Byoshi lirhajira bunguke. Rhurhakaderha oku elyo liri ihano ciru n’ehitya.—Mig 19:21; 21:30.
NSIKU 30/6–6/7
OBUGALE BW’AKANWA KA MUNGU | EMIGANI 20
Amahano Gakarhabala Abantu lyo Bashebana omu Njira Nyinja
Oku Mwakashebanamwo omu Njira y’Okulerhera Yehova Obukuze
3 Ciru akaba akasanzi k’okushebana kanaba ka mwishingo, kandi kali kasanzi k’obulagirire kakabahisa oku buhya. Olusiku lw’obuhya bwabo, omulume n’omunyere banajire eciragane embere za Yehova c’okuzigirana n’okukengana omu kalamo kabo koshi. Embere z’okujira eciragane coshi-coshi, rhushinganine rhucirhanyeko bwenene. (Osome Emigani 20:25.) Kobinali ntyo lugenda eciragane c’obuhya. Amango g’okushebana ganahashise omulume n’omunyere bamanyane bwinja lyo barhôla omuhigo mwinja. Hali amango ogo muhigo gwakaba gwa kuja omu buhya; agandi mango gwanaba gwa kulekana. Erhi omulume n’omunyere bakalekana, oko kurhali kuderha oku bajijire kubi. Lubero n’oko, oko kushebana kwabo kwahikirizize omuhigo gwako, ko kuderha oku kwabarhabire bahikire okurhôla omuhigo mwinja.
4 Bulya gurhi kuli kwa bulagirire okuba n’entanya nyinja lugenda okushebana? Erhi omuntu ociri mulamba akaba agwerhe entanya nyinja, arhakarhondera asheba muntu mulebe arhanagwerhi omuhigo gw’okumurhôla. Cikone, arhali abalamba bone bashinganine babe n’entanya nyinja. Rhweshi rhushinganine rhube n’entanya nyinja. Kwa lwiganyo, baguma na baguma banarhanye oku amango omulume n’omunyere bali bashebana, bagwasirwe baje omu buhya. Malehe gahi oko kwakalerhera Abakristu baciri balamba? Melissa, mwali wirhu muguma w’e États-Unis, adesire ntya: “Abakristu bali bashebana banakaciyumva basezibwe bwenene oku barhôlane. Enyanya z’oko, Bakristu baguma na baguma bali bashebana banayabirwe okulekana n’obo barhapatini. Abandi Bakristu baciri balamba banayake okusheba loshi-loshi. Oko kusezibwa kwanarhuma baciyumva bazidohirwe.”
Oku Wakapatamwo Omulume Erhi Omukazi Waja Naye omu Buhya
8 Gurhi wakalabirizamwo omuntu buzira kumumanyisa? Oku ntimanano z’ecigamba erhi amango murhimanine n’abandi, nkaba wanabona bintu bilebe lugenda ehali y’ekiroho y’oyo muntu, amorhere gage n’olugenzi lwage. Bandi baba bîra bage, na bici aganirira? (Lk. 6:45) K’emihigo yage epatine n’eyawe? Nkaba wanaganiza abagula b’omu cigamba cage erhi abandi Bakristu bakuzire kiroho bamumanyirire bwinja. (Mig. 20:18) Wanabadosa lugenda irenge ly’oyo muntu n’amorhere gage. (Rut. 2:11) Amango oli walabiriza oyo muntu, omanye orharhumaga aciyumva kubi. Okenge oku ali aciyumva, orhanalonzagya okumanya ngasi kantu okubimuyerekire.
Oku Mwakashebanamwo omu Njira y’Okulerhera Yehova Obukuze
7 Gurhi wakamanyamwo oku omuntu muli mwashebana naye ayosire ekandalala? Njira nguma y’omu njira nyinja wakajiramwo ntyo kuli kuganira n’obwalagale na buzira kufulika akantu, okudosa amadoso n’okuyumvirhiza bwinja. (Mig. 20:5; Yk. 1:19) Lyo mujira ntyo, kwanaba kwinja okujira ebintu haguma byakamurhabala muganire, kwa lwiganyo okulya haguma, okulambagira haguma aha nafasi y’abantu baji, n’okuhubiri haguma. Kandi okugeza akasanzi haguma n’abîra n’abantu b’omu mulala kwanamurhabala mumanyane. Na kandi, mupange bintu bilebe mwakajira haguma byakakurhabala okumanya gurhi omuntu muli mwashebana naye ajira omu kanga kali lubero na gurhi ajirira abantu bali lubero. Olole ebi Aschwin, w’omu Pays-Bas, acihanganyire okujira. Adesire ntya lugenda amango akag’ishebana na Alicia: “Rhwakag’ilonza emikolo rhwakajira haguma lyo rhumanyana. Kanji-kanji ebyo byali bintu bisungunu-ngunu nk’okudeka ebiryo haguma erhi okujira emikolo y’omu nyumpa haguma. Amango rhwakag’ijira ebyo bintu haguma, rhwakabona obuhashe bwa ngasi muguma n’obuzamba bwage.”
8 Kandi okuyiga emyanzi y’ekiroho haguma kwanamurhabala mumanyane. Erhi mwakarhôlana, mwanayish’iba mulagirire oku kasanzi k’okujira enterekêro y’omulala, lyo Mungu aba cigabi c’obulagirire omu buhya bwinyu. (Muh. 4:12) Co cirhumire, mwanapanga akasanzi k’okuyiga haguma ene amango muli mwashebana. Okuderha okuli, abantu babirhi bali bashebana gurhaciba mulala, na mwene wirhu arhaciba cirhwe ca mwali wirhu. Ciru akaba ntyo, omu kuyiga haguma ngasi mango, ngasi muguma anamanya ehali y’ekiroho y’owabo. Max na Laysa, mulume na mukage b’omu États-Unis, babire n’obundi bunguke. Max adesire ntya: “Oku murhondero g’okushebana kwirhu, rhwarhondera okuyiga ebicapo biganirire emyanzi nk’okushebana, obuhya, n’akalamo k’omulala. Ebyo bicapo byarhuhashisa okuganirira bintu binji by’obulagirire byakabire bizibu okuganirira.”
Obuhirhi bw’Ekiroho
Obwenge bw’Okunali Buli Bwayakûza
Okarhanya embere oderhe. Erhi akaba rhurhabiri masu, enderho zirhu zanalerha mazibu manji. Ebibliya edesire ntya: “Ola oderha duba buzira kugerêreza anayagaze owabo nka ngorho, cikwone enderho z’ab’obumanye [ab’obwenge, NWT] buba bufûmu.” (Mig. 12:18, Mashi Bible) Rhunarhabale okugendekeza omurhûla amango rhuli rhwayaka okuderha-derha lugenda amagosa g’abandi. (Mig. 20:19) Ly’enderho zirhu zifumya abandi ahali h’okubayagaza, rhugwasirwe rhuyunjuze omu mirhima yirhu obumanye kurhenga omu Kanwa ka Nnâmahanga. (Lk. 6:45) Erhi rhwakakarhanya bwenene kw’ebi Ebibliya edesire, enderho zirhu zanaba “nshôko y’obwenge” na kandi zanaha abandi omurhima.—Mig. 18:4, NWT.