Ebicapo Bikolesibwe omu Ibugu ly’Entimanano Omukolo n’Akalamo k’Omukristu
© 2025 Watch Tower Bible and Tract Society of Pennsylvania
LUSIKU 1-7/9
OBUGALE BW’AKANWA KA MUNGU | EMIGANI 29
Oyake Enyigirizo n’Enkomedu Zirhapatini n’Ebibliya
wp16.06 buk. 6, ecisanduku
Ebibonekerezi Biyerekire Ebiremwa Birhabonekana Biba Empingu
Nka kula abashwekwa bahizirwemwo obudagule bayorha, emiliyoni y’abantu eba eshwesirwe, enyanya z’eby’obukurungu n’okuyoboha abazimu. Banakolese enshanga, n’amafumu g’obulozi lyo bacilanga. Orhashinganini ojire ebyo. Ebibliya erhuyemezize n’obwalagale ntya: “Amasu ga Nyamubaho ganaje gazungula igulu lyoshi omu kurhabala ngasi boshi banahizire omurhima gwabo loshi kuli ye.” (2 Enganîro 16:9) Mungu w’okuli, Yehova, ojira buhashe bunji kulusha Shetani, akulanga erhi wakamulangalira.
Lyo Yehova akulanga, oshinganine okamanya ebimushagalusa n’okubijira. Kwa lwiganyo, omu myaka igana mirhanzi, Abakristu b’omu vile y’e Efezi bagushire haguma ebitabu byabo by’obukurungu babiyoca. (Ebijiro by’Entumwa 19:19, 20) Ko n’oko, lyo Mungu akulanga, oshinganine okabulire enshanga, obulozi, ebitabu by’obukurungu, ebikomo erhi rhugozi “rhw’okucilanga,” na ngasi kantu kakaba kagwerhe olushangi n’eby’abazimu.
w19.04 buk. 17 cif. 13
Ocishwekere oku Nyigirizo z’Okuli Lugenda Olufû
13 Erhi akaba orhamanyiri n’obwalagale erhi nkomedu ndebe erhi bijiro bilebe byashagalusa Yehova, omuyegere kugerera isala onamuhune akuhe obwenge burhenga emwage. (Osome Yakobo 1:5.) Enyuma z’aho ojire obusagasi omu bicapo birhu. N’erhi akaba kuli kwa bulagirire, oganize abagula b’omu cigamba cinyu. Barhakurhôlere omuhigo lugenda ebi wajira, cikone bakuyeresa amakanuni g’Ebibliya gakakurhabala nk’aga gaganirirwe mw’eci cigabi. Omu kujira ntyo, onabe oli wakomereza ‘obuhashe bwawe bw’okurhanya,’ n’obo buhashe bwakurhabala ly’“okamanyîrira ecinja n’ecibi.”—Hb. 5:14.
w18.11 buk. 11 cif. 12
“Nakaz’igera omu Kuli Kwawe”
12 Enkomedu n’ebijiro birhapatini n’Amandiko. Abantu b’omu mulala, abirhu banya-kazi, n’abirhu banafunzi banalonza rhucilunge haguma nabo omu madinye gabo. Gurhi rhwakahagalikamwo enshumi z’okulonza rhucilunge omu nkomedu n’ensiku nkulu zirhakengesa Yehova? Rhwanahasha okujira ntyo erhi ngasi mango rhwakakakengera oku Yehova abona ebyo bintu. Okugalukira emyanzi eri omu bicapo birhu eyerekine omurhondero gwa nsiku nkulu ndebe zisimwa na bantu banji kwanakurhabala. Erhi rhwakakakengera ebirhumire biyimangire oku Mandiko birhushumya rhurhacilungaga omu nsiku nkulu ziri nk’ezo, rhwanayemera n’obwalagale oku rhuli rhwalambagira omu njira ‘esimisize Nyakasane.’ (Ef. 5:10) Okulangalira Yehova n’okulangalira Akanwa kage k’okuli, kwarhulanga lyo ‘rhurhayobohaga abantu.’—Mig. 29:25.
Obuhirhi bw’Ekiroho
it “Okulimirhiza” cif. 1
Okulimirhiza
Kuli kuvuga omuntu omunkwa omu njira y’obulenga ly’omusimisa; kukunga omuntu omu njira erhashinganini, kumukunga okurhalusire olugero, erhi omu njira y’obulyalya. Kanji-kanji banalimirhize omuntu lyo bamushumya acizigire yene, kumujira abonekane wa busha, na muli oko okumulimirhiza kunabe kuli kwamushereza. Ebishumya omuntu alimirhize owundi kuba kulonza ayemerwe n’oyo muntu, erhi apate obunguke bw’ebintu by’omubiri kurhenga kuli ye, kumujira aciyumve agwerhe omwenda gw’owamukungaga erhi okulerhera owamukungaga irenge. Kanji-kanji omuhigo gw’okulimirhiza kuba kulonza owundi muntu arhogere omu murhego. (Mig 29:5) Okulimirhiza kurhayerekana oku omuntu ali alongozibwa n’obwenge bwarhenga emwa Mungu; ci kunayerekane oku ali alongozibwa n’obwenge bw’er’igulu bushumibwa n’okucikaliza, okubolôla abandi, n’obulyalya. (Yk 3:17) Obulyalya, okurheba abandi, okubakunga omu njira erhashinganini, erhi okuha abantu irenge n’okubajira babonekane ba busha, kurhashagalusa Mungu ciru n’ehitya.—2Kr 1:12; Gl 1:10; Ef 4:25; Kl 3:9; Maf 21:8.
NSIKU 8-14/9
OBUGALE BW’AKANWA KA MUNGU | EMIGANI 30
“Orhampâga Bukenyi Orhampâga na Bugale”
w18.01 buk. 24-25 cif. 10-12
Buzigire Buhi Bulerha Omwishingo gw’Okunali?
10 Kobinali rhweshi rhuba rhulagirire oku nsaranga. Zinalerhe obulanzi omu njira ndebe. (Muh. 7:12) Cikone, k’omuntu anaba n’omwishingo gw’okunali erhi akaba agwerhe ensaranga zakamurhabala ahikirize ebi alagirireko byone? Neci, kobinali! (Osome Omuhanûzi 5:12.) Aguri mwene Yakehe ayandisire ntya: “Orhampâga bukenyi orhampâga na bugale, ci ondeke nani ndye oku mugati.” Kobinali rhwanahugûkwa ecarhumaga arhalonza okuba mukenyi bwenene. Nk’oku agendekire okuhugûla, arhalonzagya ahikire okuzimba bulya obushambo burhakengesa Mungu. Cikone, bici byarhumaga ahuna Mungu arhamuhâga obugale? Ayandika ntya: “Kuderha nti nakayigurha obone namakuhaba, obone nkola naderha nti: ‘Nyamuzinda ye ndi oyo!’” (Mig. 30:8, 9) Nkaba nawe omanyire abantu balangalira bwenene obuhirhi kulusha oku balangalira Mungu.
11 Abantu bazigira ensaranga barhakashagalusa Mungu. Yezu adesire ntya: “Ntaye wankakolera bami babirhi: bulya anashomba muguma, azigire owundi; erhi ashimbe muguma, anene owundi. Murhankahashikolera Nyamuzinda n’ebirugu.” Embere aderhe ezo nderho arhanzir’iderha ntya: “Murhacibikiraga omuhako en’igulu, emunda engisha [omushwa] n’enundo zaguhalagula, n’emunda ebishambo birhula enyumpa binazimba. Ci mucibikire amahirhi empingu, emunda engisha n’enundo zirhahalagula, n’aha ebishambo birharhula nyumpa birhanazimba.”—Mt. 6:19, 20, 24.
12 Bantu banji babwine oku okulama akalamo karhahunyiri binji kunarhume baba na mwishingo munji, na kandi kunarhume baba na kasanzi kanji bwenene k’okukolera Yehova. Jack, olama e Etats-Unies, aguzize enyumpa yage n’obuhirhi bwage bulya al’imanyire oku okujira ntyo kwakamuhashisize ye na mukage lyo bajira omukolo gw’obupainiya. Adesire ntya: “Kwali kuzibu bwenene okuleka enyumpa yirhu nyinja bwenene n’eciwanza ciru cali kuli n’evile. Cikone, omu kasanzi ka myaka minji, nakag’ikagaluka ekâ nantamire bwenene enyanya z’amazibu gakagirhuhikira ebwa kazi. Cikoki, mukanie yehe wakag’ikola nka painiya, ensiku zoshi nakag’irhimana agwerhe mwinshingo munji bwenene. Akag’ikambwira ntya: ‘Ndi nakolera bose mwinja bwenene kulusha abandi boshi!’ Bulya na nani ene nkola ndi painiya, rhwe na mukanie rhukolaga rhuli rhwakolera Bose muguma, ko kuderha Yehova.”
w87 15/5 buk. 30 cif. 8
Orhinye Yehova, na Ntyo Waba n’Omwishingo
◆ 30:15, 16—Bici ezo nyiganyo ziyerekine?
Ziyerekine oku obudambye bunarhume omuntu aba wa kurharhimukwa. Emishundwe enayonkereze omuko bwenene nk’oku abandabye bagendekera bahuna nsaranga nyinji bwenene erhi buhashe bunji bwenene. Ko n’oko, enshinda erharhimukwa ciru n’ehitya cikone enagendekere yabera eyashamire ly’eyankirira mifû minji bwenene. Enda y’engumba ‘enakalakira’ abana. (Omurhondêro 30:1) Idaho liyumusire linanywerereze amishi g’enkuba na kasanzi kasungunu enyuma z’aho lishub’ibonekana liyumusire. Omuliro guli gwayoca ebintu bagukwebagamwo gunalike engulumira ziyoca ebindi bintu byakahya zihisireko. Ko n’abantu badambye nabo bayorha ntyo. Cikone abantu balongozibwa n’obwenge burhenga emwa Mungu barhacileka bashumikwe n’obo borhere bwa ntyo bw’okucikaliza.
w11 1/6 buk. 10 cif. 4
Oku Wakajira ly’Olama Kushimbana n’Obuhashe Bwawe
Okabîka ensaranga embere ogule. Ciru akaba okujira ntyo kwanabonekana nk’eri nkomedu ya mîra, okubîka ensaranga embere ogule kantu kalebe, eri nguma y’omu njira z’obwenge z’okukurhabala ly’oyaka amazibu g’okubula ensaranga. Okujira ntyo kunarhabale bantu banji lyo bayâka amadeni n’amazibu galerhwa n’amadeni, nk’okulipa bunguke bunji bwenene burhuma ibeyi lya ngasi kantu omuntu agula lyayushuka. Omu Bibliya, olubasi luganirirwe oku lujira “obumanye [obwenge, NWT]” bulya ‘amango g’okusarûla lunacîhakire ebiryo’ lyo luyish’ibikolesa omu mango gayisha.—Emigani 6:6-8, Mashi Bible; 30:24, 25.
Obêre Cigolo ca Yehova Ensiku n’Amango!
18 Kuli kwinja rhukalabiriza entanya zirhu okubiyerekire ensaranga. Ocidose ntya: ‘Ka kanji-kanji nankaba ndi narhanya oku nsaranga n’ebi zakagula? Erhi nakahoza ensaranga, ka nandegerere okuzigalula, omu kurhanya oku nnazo arhazilagiririko? K’okuba n’ensaranga kunarhume naciyumva ndi wa bulagirire, cikone kujire kube kuzibu kuli nie okuba muhanyi? Ka nambone bene wirhu na bali birhu nka basima eby’en’igulu bulya kone bagwerhe ensaranga? Ka nanonze okujira obwîra n’abagale n’okurhayegera bwenene abakenyi?’ Rhwahâbirwe olukengwa lunene bwenene lw’okuba bigolo bya Yehova. Cikone, rhwanagendekera rhwabêra bigolo bya Yehova erhi rhwakajira okwirhu koshi lyo rhurhabaga n’obuzigire bw’ensaranga. Erhi rhwakajira ntyo, nta mango Yehova akarhulekerera!—Osome Abahabraniya 13:5.
Obuhirhi bw’Ekiroho
w09 15/4 buk. 17 cif. 11-13
Obwenge bwa Yehova Bunabonekane omu Bulemi
11 Ensimba elama omu lwala ehamagalwa daman eba nka nsungura ciri cindi ciremwa cisungunu cakarhuyigiriza amasomo g’obulagirire. (Osome Emigani 30:26.) Eba eshushine n’ensugura nnene cikone ejira amarhwiri mofi na ga civiringo n’amagulu mofi. Eyo nsimba nsungunu enalame ahantu h’olwala. Amasu g’e daman gabona kulî bwenene ganayirhabale bwenene, n’emina eba ahantu h’amabuye eyo nsimba elama haba hantu ha bulanzi yakacifulika erhi yakarherwa n’ezindi nsimba. E damans zinakalama haguma omu cigusho, n’oko kunarhume zaba omu bulanzi, kunanazirhabale zigendekere zaba n’ecidurhu omu mango g’emboho ndarhi.
12 Bici rhwakayiga kugerera e daman? Burhangiriza, rhubwine oku eyo nsimba erhacihira omu mazibu. Lubero n’oko, enakolese amasu gayo gabona kulî ly’ebona ezindi nsimba ziciri kulî zakayirhera, enanabêre hofi n’emina n’amabuye yakayakiramwo ly’ecilanga. Ko n’oko, rhushinganine rhube n’amasu g’ekiroho gabona kulî lyo rhumanyirira amazibu garhabonekana n’obwalagale gali mw’er’igulu lya Shetani. Entumwa Petro yahanwire Abakristu ntya: “Mulange olugero munabe masu! Omushombanyi winyu, Shetani, nka ntale yaluluma, adwirhe azunguluka-zunguluka, mpu alonze oyu amira.” (1 Pt. 5:8) Amango Yezu ali hanw’igulu, agendekire abêra masu, anacilanga oku marhangulo ga Shetani walilonzize okuvuna obwishwekerezi bwage. (Mt. 4:1-11) Yezu alekire abanafunzi bage olwiganyo lwinja!
13 Njira nguma rhwakabamwo masu kuli kukacihangana lyo rhuyunguka n’obulanzi bw’ekiroho Yehova ali arhuha. Rhushinganine rhukayiga Akanwa ka Mungu n’okukaja oku ntimanano z’Ecikristu ngasi mango. (Lk. 4:4; Hb. 10:24, 25) Na kandi, nk’oku e damans zicihangana okubêra haguma omu cigusho, rhushinganine rhubêre hofi n’abirhu Bakristu ‘lyo rhuhânana omurhima.’ (Rm. 1:12) Omu kulangalira obulanzi Yehova arhuha, rhunayerekane oku rhuyemire ezi nderho z’omwandisi w’ennanga Daudi wayandikaga ntya: “Nyakasane [Yehova, NWT] we lwala nsimikirakwo. We lugerero lwani, we Mufungizi wani. Nyamuzinda Nnahamwirhu, we lwala nyakiramwo.”—Enna. 18:2.
NSIKU 15-21/9
OBUGALE BW’AKANWA KA MUNGU | EMIGANI 31
Amasomo Rhwakayiga Kugerera Amahano g’Omuzire w’Obuzigire
w11 1/2 buk. 19 cif. 7-8
Oyigirize Abana Bawe Amakanuni g’Olugenzi Lwinja
Obayigirize okuli koshi lugenda ecijiro c’obuhya. Oburhonde buba bwa bulagirire. (1 Abakorinti 6:18; Yakobo 1:14, 15) Cikone, Ebibliya eganirire burhangiriza ecijiro c’obuhya nka ngalo kurhenga emwa Nnâmahanga, ci arhali nka murhego gwa Shetani. (Emigani 5:18, 19; Olwimbo lw’Enyimbo 1:2) Okubwira abana bawe b’omushuko lugenda amazibu gone kwanarhuma baba n’entanya zirhashinganini zirhanapatini n’Amandiko lugenda ecijiro c’obuhya. Corrina, mukazi muguma ociri musole olama e France, adesire ntya: “Ababusi bani bakag’isegeza bwenene olugenzi lw’eby’enshonyi lone, n’oko kwarhumire naba n’entanya zirhashinganini lugenda ecijiro c’obuhya.”
Ojire okwawe koshi ly’abana bawe bamanya okuli koshi lugenda ecijiro c’obuhya. Muzire muguma w’e Mexique ohamagalwa Nadia, adesire ntya: “Ngasi mango nancihangane okubwira abana bani b’omushuko oku ecijiro c’obuhya kaba kantu kinja, karhanaba ka kusomeza, n’oku Yehova Mungu acihire abantu lyo bacishagalukira. Cikone, cijira enafasi yaco ecishinganine omu buhya. Eyo ngalo y’ecijiro c’obuhya yanarhulerhera omwishingo erhi amalibuko, kushimbana n’oku rhuyikolesize.”
ijwhf mwanzi gwa 4 cif. 11-13
Okuganirira Abana Lugenda Amamvu
Orhôle omupango gw’okuganirira ogo mwanzi. Mushamuka muguma w’e Grande-Bretagne ohamagalwa Mark, adesire ntya: “Kwanaba kuzibu oku bana okumanya akaba kuli kwinja okunywa amamvu erhi nanga. Lusiku luguma nadosa mugala wani wa myaka munani ambwire akaba arhanyize oku okunywa amamvu kuba kwinja erhi kuba kubi. Naganira naye omu njira nyinja, n’oko kwarhuma kwaba kulembu kuli ye okumbwira entanya zage n’obwalagale.”
Erhi wakakaganirira kanji-kanji omwana wawe lugenda okunywa amamvu, oko kwanamurhabala akakengera oku ebi omubwira lugenda amamvu biba bya bulagirire. Kushimbana n’emyaka omwana wawe agwerhe, amango muli mwaganirira eyindi myanzi eyerekire akalamo nk’obulanzi omw’ibarabara, erhi ecijiro c’obuhya, okahiramwo n’emyanzi eyerekire okunywa amamvu.
Obe lwiganyo. Abana ko baba nka shifo, banakayonka ebibazungulusire. N’obusagasi buyerekine oku ababusi banashumye bwenene abana babo. Kuli kuderha oku erhi wankakanywa amamvu ly’orhulirira erhi ly’onyihya amahangayiko, omwana wawe anakarhanya oku amamvu ganayuse amahangayiko g’akalamo. Co cirhumire, obe lwiganyo lwinja. Ocihangane okakolesa amamvu bwinja.
g17.6 buk. 9 cif. 5
Okuyigiriza Abana Obwirhohye
Obahe omurhima bakahâna. Oyerese omwana wawe oku “haba bushagaluke bunji omu kuhâna kulusha omu kuhâbwa.” (Ebijiro by’Entumwa 20:35, NWT) Gurhi wakajiramwo ntyo? We n’omwana wawe mwanajira eliste y’abantu balagirire oku burhabale lugenda okugula bintu bilebe, etransporo, erhi okukubûla kantu kalebe. Enyuma z’aho ahêke omwana wawe amango okola waj’irhabala baguma na baguma muli bo. Oleke omwana wawe acibonere omwishingo oba nago n’oku orhimukwa amango oli wahikiriza amalagirire g’abandi. Omu kujira ntyo, kugerera olwiganyo lwawe wanayigiriza omwana wawe obwirhohye omu njira yakamushumya bwenene.—Akanuni k’Ebibliya: Luka 6:38.
Obuhirhi bw’Ekiroho
Mwe Bali Birhu Muciri Balamba, Mube Bakazi Bakristu Bakuzire Kiroho
12 Oyige obulenga bw’okuganira bwinja. Abakristu bashinganine bakaganira bwinja. Muli ntyo, entumwa Yakobo erhuhîre ihano ly’obulagirire omu kuderha ntya: “Ngasi muntu akabangaduka omu kuyumvirhiza, ci arhabaga wakuderha duba.” (Yk. 1:19) Erhi wakayumvirhiza bwinjinja amango abandi bali baganira, onayerekane oku ocihizire ahali habo, erhi ‘kubabêra lukogo.’ (1 Pt. 3:8, Mashi Bible) Erhi akaba orhahugûsirwi bwinja ebi omuntu anaderhaga erhi oku ali aciyumva, wanamudosa amadoso omu njira eshinganine. Buzinda ocihe akasanzi k’okurhanya embere oderhe. (Mig. 15:28) Ocidose ntya: ‘K’ebi naderha biri by’okuli binali bya kuyubaka? Ka biri bya bukenge na binja?’ Oyige olwiganyo lwa bali birhu bakuzire kiroho baganira omu njira nyinja. (Osome Emigani 31:26.) Olabirize bwinja oku baganira. Oku wagendekera wayiga bwinja obo bulenga bw’okuganira, ko n’obwîra bwawe haguma n’abandi bwagendekera bwaba bwinja.
NSIKU 22-28/9
OBUGALE BW’AKANWA KA MUNGU | OMUHANÛZI 1-2
Ogendekere Wakomereza Iburha Lyayisha
w17.01 buk. 27-28 cif. 3-4
“Obibise Abantu Bakwanine Okucikubagirwa”
3 Banji muli rhwe baba basimire omukolo rhujira, bananalonza bagendekere bagujira ensiku zoshi. Ciru akaba ntyo, eby’okugayisa kuli kuba kurhenga omu mango ga Adamu, ngasi iburha linashosihale n’enyuma z’aho elindi lirhôle enafasi yalyo. (Muh. 1:4) Omu mango gacizind’igera oko kwadwirhe amazibu gago-gago oku Bakristu b’okunali. Omukolo gw’abantu ba Yehova gwayushusire bwenene gunagwerhe bigabi binji. Erhi rhurhondera emikolo mihyahya rhunarhondere okukolesa enjira mpyahya z’okujira ebintu, kanji-kanji ezo njira ziba zihiziremwo okukolesa eteknoloji eshanja duba-duba. Bantu baguma baguma bakola bashosi nkaba banabona oku kuli kuzibu okugendekera bakola nk’oku ezo mpindulo zihunyire. (Lk. 5:39) Ciru n’amango arhali ntyo ko biri, abaciri misole bwenene banaba bagwerhe misi minji na buhashe bunji kulusha abakola bashosi. (Mig. 20:29) Co cirhumire, kuli kuyerekana obuzigire kunali kukolesa obwenge erhi abakola bashosi bakarheganya abaciri misole lyo bajira mikolo minji bwenene.—Osome Ennanga 71:18.
4 Balya bagwerhe bukulu bulebe nkaba banabona oku kuli kuzibu okukomereza n’okuha abaciri misole emikolo. Baguma na baguma banakayoboha okuheza omukolo baba bazigire. Abandi banayobohe lugenda okuheza ehy’obukulu bagwerhe omu kurhanya oku abaciri misole barhankajira ebintu bwinja. Abandi nkaba banarhanya oku barhagwerhi akasanzi k’okukomereza owundi muntu. Oku bundi abaciri misole nabo bagwasirwe babe masu lyo barhabulaga bwaba balembedu amango barhabahiri binji bya kujira.
Obuhirhi bw’Ekiroho
it “Omuhanûzi” cif. 1
Omuhanûzi
Izino ly’Ecihabraniya Qo·heʹleth (lihugwire “Entondôzi; Mushubûza”) liyerekine bwinja omukolo gwa mwami omu burhegesi bw’eciteokrasi ishanja ly’e Israheli lyakag’ishagalukira. (Muh 1:1, 12) Omukolo gw’omurhegesi gwali gwa kurhabala abantu bal’ihânyirwe emwa Mungu bagendekere babêra omu cinyabuguma n’okubêra bishwekerezi kuli Mwami wabo w’okunali, ko kuderha Mungu. (1Bam 8:1-5, 41-43, 66) Co cirhumire, mwami okulongoza ishanja omu nterekêro ya Yehova erhi nanga, ko kwakag’iyerekana erhi ali mwami mwinja erhi mubi. (2Bam 16:1-4; 18:1-6) Entondôzi erhi mushubûza wali mwami Solomoni, ali amakashubûza kanji-kanji ishanja ly’e Israheli n’abîra babo, bacikala ba kasanzi kalebe omu hekalu. Mw’eci citabu akag’icihangana okushubûza abantu ba Nnâmahanga kurhenga omu mikolo y’obusha-busha erhanagwerhi malehe y’er’igulu, lyo bajira emikolo eshinganine ya Nnâmahanga bal’ihânyirwe emwage nk’ishanja. Izino likolesibwe omu Bibliya zirhu z’amashi kuli kuhindulwa kw’oluderho Qo·heʹleth lw’Ecihabraniya omu mpindulo y’Ecigiriki ehamagalwa Septante, kuli kuderha Ek·kle·si·a·stesʹ (Omuhanûzi), luhugwire “omuntu w’omu ekleziya (cigamba).”
NSIKU 29/9–5/10
OBUGALE BW’AKANWA KA MUNGU | OMUHANÛZI 3-4
Muzibuhye Olukoba Lwinyu lwa Migozi Isharhu
ijwhf mwanzi gwa 10 cif. 2-8
Oku Wakakolesamwo Bwinja Eteknoloji
● Okukolesa eteknoloji omu njira y’obwenge kwanalerha obunguke omu buhya. Kwa lwiganyo, bashamuka baguma baguma na bakabo banayikolese lyo baja baganira omu mulegerege amango barhali haguma.
“Okuyandikira owinyu ezi nderho nsungunu ‘Nkusima’ erhi ‘Ndi nakurhanyako’ kwanaba kudesire binji.”—Jonathan.
● Okukolesa kubi eteknoloji kwanalerha amazibu omu buhya. Kwa lwiganyo, bantu baguma baguma banakolese ebyombo byabo by’ecielektronike ngasi kasanzi, n’oko kunarhume baba na kasanzi kasungunu k’okushibirira b’iba erhi bakabo.
“Nyemire n’obwalagale oku hali amango ibanie aba anakalonzize aganire na nani bwenene erhi nakabire ntali nakolesa etelefone yani.”—Julissa.
● Bantu baguma baguma banaderhe oku banajira enganiro nyinja haguma na b’iba erhi bakabo erhi banali bakolesa ebyombo byabo by’ecielektronike mw’ako kasanzi ko n’ako. Sherry Turkle, mukazi muguma wasomire eby’e sociologie, adesire oku “bantu banji banarhanye oku banajira mikolo minji oku liguma. Cikone oko kurhakahashikana.” Adesire oku “obuhashe bwirhu bw’okujira ebintu bwinja bunagendekere bwanyiha kuli ngasi mukolo muhyahya rhuciyushulire okujira mw’ako kasanzi ko n’ako.”
“Okuganira n’ibanie kunanderhere obunguke, cikone kurhanderhera bunguke amango ali anganiza anali ajira akandi kantu, nk’okukolesa ecombo cage c’ecielektronike. Erhi akajira ntyo anabe nk’oli ambwira oku anaba n’obushagaluke erhi akabêrana ecombo cage c’ecielektronike cone.”—Sarah.
Entanya z’obulagirire: Oku okolesa eteknoloji kwanarhabala obuhya bwinyu erhi kubushereze.
Ogendekere Wayasa ‘Engulumira ya Nyamuzinda’
12 Gurhi abalume na bakabo bakayigamwo olwiganyo lwa Akila na Prisila? Orhanye oku bintu binji we na balo erhi mukawe mulagirire okujira. Ka mwanakajira mikolo miguma na miguma haguma ahali ha muguma okuyijira yene? Kwa lwiganyo, Akila na Prisila bakag’ihubiri haguma. Ka ngasi mango munapange okujira ntyo? Kandi Akila na Prisila bakag’ikola haguma. Nkaba we na mukawe murhajira kazi kaguma, cikone ka mwanakola emikolo y’omu nyumpa haguma? (Muh. 4:9) Amango muli mwarhabalana okujira mukolo mulebe, nkaba mwanaciyumva bwenene muli nka ekipe mwananaba n’obulyo bw’okuganira. Robert na Linda bakola bagwerhe myaka 50 na kulusha omu buhya bwabo. Robert adesire ntya: “Kobinali, rhurhajira kasanzi kanji ka kugeza haguma omu kucishagalusa. Cikone amango ndi nashuka ebirugu by’omu masiga na mukanie aje abipanguza erhi amango ndi nakombeza e jardin yirhu embuga naye ayishe rhukole haguma, nanyumve nshagalusire bwenene. Okujira ebintu haguma kunarhume rhwayegerana. Obuzigire bwirhu bunagendekere bwayushuka.”
13 Cikone, okengere oku, okuba haguma arhali kone kwakarhuma mwaba omu cinyabuguma. Mukazi muguma w’omu cihugo c’e Brésil adesire ntya: “Ene, bulya hali bintu binji by’okuhêka obwenge, nabwine oku rhwanarhôgera omu murhego gw’okurhanya oku rhuli rhwageza akasanzi haguma mpu bulya kone rhuli rhwalama omu nyumpa nguma. Naciyigirizize oku rhushinganine rhujire binji kulusha okuba haguma kone. Kandi nshinganine mushibirire omu njira alagirireko.” Alaga oku Bruno na mukage, Tays, bajira lyo ngasi muguma ashibirira owabo. Bruno adesire ntya: “Amango rhuli rhwageza akasanzi haguma, rhunabîke etelefone zirhu lyo rhushagalukira akasanzi kirhu haguma.”
14 Cikone, gurhigi erhi akaba we na mukawe erhi balo murhashagalukira okugeza akasanzi haguma? Nkaba mwembi murhashagalukira bintu biguma, erhi nkaba munakagayisanya. Gurhi mwakajira? Orhanye oku muliro rhwaganiriraga omu murhondero gw’eci cigabi. Gurharhondera gwagulumira ho n’aho. Biba bihûnyire omuntu agendekere ahirako enshali nnenene. Ko n’oko, kwanaba kwinja murhondere okugeza kasanzi kasungunu haguma ngasi lusiku. Mwanacihangana okujira kantu kalebe mushagalukire mwembi ahali h’okujira akantu kakagayisa muguma muli mwe. (Yk. 3:18) Omu kurhondera bunyi-bunyi, mwanacib’irhondera mwayasa obuzigire bwinyu.
Ogendekere Wayasa ‘Engulumira ya Nyamuzinda’
3 Lyo bagendekera bayasa ‘engulumira ya Nyamuzinda,’ omulume na mukage bashinganine bajire okwabo koshi lyo baba n’obwîra busezire haguma na Yehova. Gurhi obo bwîra bwakabarhabala omu buhya bwabo? Erhi akaba omulume na mukage bali babona oku obwîra bwabo haguma n’Ishe w’omu mpingu buli bwa bulagirire, banabe babidu okukolesa amahano gage n’oko kunabarhabale bakayaka n’okuhima amazibu gakarhuma obuzigire bwabo bwanyiha. (Osome Omuhanûzi 4:12.) Kandi abantu b’ekiroho banajire okwabo koshi lyo bayiga Yehova n’okuba n’amorhere ayerekana nk’olukogo, obulembêdu, n’okubabalira. (Ef. 4:32–5:1) Erhi omulume na mukage bakayerekana ago morhere, kwanaba kulembu obuzigire bwabo buyushuke. Mwali wirhu muguma ohamagalwa Lena, okola ogwerhe myaka 25 na kulusha omu buhya, adesire ntya: “Kuba kulembu okuzigira n’okukenga omuntu w’ekiroho.”
Obuhirhi bw’Ekiroho
it “Obuzigire” cif. 39
Obuzigire
“Amango g’okurhonya [okuzigira].” Abantu bone barhayeresibwa obuzigire bali balya Yehova abona oku barhashinganini okubuyeresibwa, erhi balya bahizire okugendekera omu lugenzi lubi. Obuzigire bunayeresibwe abantu boshi kuhika amango bone bayerekana n’obwalagale oku bashombire Mungu. Enyuma z’aho akasanzi kanahike k’okurhacibayeresa obuzigire. Yehova Mungu na Yezu Kristu baba bazigire obushinganyanya bananashombe okurhakenga amarhegeko. (Enna 45:7; Hb 1:9) Balya bashomba Mungu w’okuli bwenene bali bantu barhakayeresibwa obuzigire. Co cirhumire kurhali kwa bulagirire okugendekera rhwayeresa abantu ba ntyo obuzigire bulya abashomba Mungu barhayemere obuzigire bwa Mungu kuli bo. (Enna 139:21, 22; Iz 26:10) Mungu aba abashombire enyanya z’oko anahizireho akasanzi ayishibahana.—Enna 21:8, 9; Muh 3:1, 8.
NSIKU 6-12/10
OBUGALE BW’AKANWA KA MUNGU | OMUHANÛZI 5-6
Oku Rhwakayerekanamwo oku Rhukenzire Mungu Wirhu Bwenene
w08 15/8 buk. 15-16 cif. 17-18
Okuze Yehova omu Kuyerekana Obukenge
17 Rhushinganine rhucigendese omu njira y’obukenge, ci bwenene amango rhuli rhwaharamya Yehova. Olwandiko lw’Omuhanûzi 5:1, Mashi Bible; ludesire ntya: “Nka waja omu Kanyamuzinda [Nyumpa ya Mungu, NWT] onarhangicirhegereza.” Musa na Yozwe bombi barhegesirwe bahogole ebirato byabo erhi bali ahantu hatagatifu. (Lub. 3:5; Yoz. 5:15) Bal’igwasirwe bajire ntyo lyo bayerekana bukenge bunji bwenene. Abakuhani Baisraheli bal’irhegesirwe bakayambala orhubutura rhw’ecitani “rhw’okubwikira obushugunu bwabo.” (Lub. 28:42, 43) Oko kwakag’ibarhabala lyo barhabêraga bushugunu amango bakag’ikola oku mazabahu. Ngasi muntu w’omu mulala gwa kuhani al’igwasirwe arhumikire amakanuni ga Nnâmahanga lugenda obukenge.
18 Okuba n’obukenge omu nterekêro kuhiziremwo okulerhera Mungu irenge n’okumukenga. Lyo rhushinganana obukenge rhugwasirwe rhukajira ebintu omu njira eyerekine obukenge. Obukenge rhuyerekana burhashinganini bube bwa kucijirisa erhi bube nka kula omuntu acibwika kone omushangi. Bushinganine burhaluke ebi abantu babona, ko kuderha bube bwa kurhenga oku murhima, go Mungu abona. (1 Sam. 16:7; Mig. 21:2) Obukenge bushinganine bube cigabi cirhu bunashinganine buhume oku lugenzi lwirhu, oku borhere bwirhu, oku bwîra bwirhu haguma n’abandi, ciru n’oku rhucibona n’oku rhuciyumva. Co cirhumire, obukenge bushinganine bubonekane kuli rhwe ngasi mango na muli ngasi ebi rhuderha n’ebi rhujira byoshi. Oku biyerekire olugenzi, oku rhuyambala n’oku rhuciyinjihya, rhunakakengera ezi nderho z’entumwa Paolo: “Rhurhasarhaza ndi, nti lyo barhagigayaguza obuja-bugo [mukolo] bwirhu. Ci omu ngasi kantu, kwo rhunaciyerekana nka baganda ba Nyamuzinda.” (2 Kr. 6:3, 4) Rhunalonze “muli byoshi abantu bakakenga enyigirizo z’Omuciza wirhu Nyamuzinda.”—Tt. 2:10.
w09 15/11 buk. 11 cif. 21
Oyinjihye Amasala Gawe Kugerera Ifunzo ly’Ebibliya
21 Yezu akag’isalira n’obuyemere boshi omu njira y’obukenge. Kwa lwiganyo embere afûle Lazaro, “Yezu ayinamula amasu aderha erhi: ‘Larha, nkuvuzire omunkwa, kulya kubâ wanyumvirhize. Nyorha nyishi oku onyumvirhiza ensiku zoshi.’” (Yn. 11:41, 42) K’amasala gawe ganayerekane oku ogwerhe obuyemere n’obukenge buli nk’obo? Oyige isala ly’obukenge ly’olwiganyo lya Yezu, na ntyo wabona oku ebintu asegize bwenene mw’er’isala kuli kucesibwa kw’izino lya Yehova, okuyisha kw’Obwami bwage, n’okuhikirizibwa kw’obulonza bwage. (Mt. 6:9, 10) Orhanye lugenda amasala gawe. Ka ganayerekane oku oshibirire bwenene Obwami bwa Yehova, okujira obulonza bwage, n’okucesibwa kw’izino lyage litagatifu? Ntyo ko gashinganine gabe.
K’Oli Tayari Okucihâna Emwa Yehova?
5 Gurhi wakacihânamwo emwa Yehova? Onamulaganye kugerera isala oku wakamuharamya yenene n’oku wakahira obulonza bwage oku nafasi ntanzi omu kalamo kawe. Enyuma z’aho onalaganye Yehova oku wagendekera wamuzigira ‘n’omurhima gwawe goshi, n’omûka [buguma-guma] bwawe boshi, n’obukengere bwawe boshi n’emisi yawe yoshi.’ (Mk. 12:30) Okucihâna emwa Yehova kunajirwe n’omuntu yenene, kantu kajirwa egarhi kage na Yehova. Lubero n’oko, omuntu anabatizibwe embere z’abantu banji; oko kunayerese abandi oku wacihânyire emwa Yehova. Okucihâna emwa Yehova ciba ciragane cizibu-zibu, omuhigo gwawe kushinganine kube kuhikiriza eco ciragane na Yehova alangalire oku wacihikiriza.—Muh. 5:4, 5.
Obuhirhi bw’Ekiroho
Amadoso g’Abantu Basoma Ebitabu Birhu
Ecigabi cirhanzi c’olwandiko lwa Omuhanûzi 5:8, ciganirire gurhi oburhegesi bwa bene bantu bukalyalyanya abakenyi n’okubalenganya. Cikone ecigabi ca kabirhi ciyerekine oku omurhegesi wa bene bantu ashinganine ahugûkwe oku haba owundi omukulire. Okwo kuli kuderha oku ashinganine ahugûkwe oku hali abandi bagwerhe obukulu buli enyanya z’obwage. Eby’okugayisa kuli kubona oku omu burhegesi bwa bene bantu, abarhegesi boshi banakalya ebituliro n’okwo kunarhume abantu balibuka.
Cikone ciru rhwakalibuka erhi kulenganywa omu ngasi njira, rhukwanine rhuyemere n’obwalagale oku Yehova ‘anakabona ebi abarhegesi ba bene bantu’ bali bajira. Na ntyo rhwanamulakira n’okumubwira amazibu girhu. (Enna. 55:22; Fl. 4:6, 7) Rhumanyire oku “amasu ga Yehova ganakasinza omw’igulu lyoshi mpu lyo arhabala abantu bamuzigira.”—2 Nga. 16:9, NWT.
Ecigabi cirhanzi c’olwandiko lwa Omuhanûzi 5:8, ciyerekine oku omu burhegesi bwa bene bantu muba okulire owabo. Cikone akantu k’obulagirire bwenene kali omu cigabi ca kabirhi c’olu lwandiko, kuli kubona oku Yehova ye Mukulu wa boshi. Ali arhambula kugerera Omugala Yezu Kristu. Ogala Byoshi anasinze ngasi kantu na kandi Ye n’Omugala babà bashinganyanya.
NSIKU 13-19/10
OBUGALE BW’AKANWA KA MUNGU | OMUHANÛZI 7-8
‘Oje omu Nyumpa Erimw’Emishîbo’
Bici Rhwakaciyigiriza Kugerera Emirenge ya Yezu
9 Wanarhabala abafîrirwe. Yezu arhalakaga haguma na Mariya na Marta kone, ci abayumvirhiza n’okubarhuliriza. Nirhu ntyo ko rhwakajirira abafîrirwe. Mugula muguma olama e Australie, ohamagalwa Dan, adesire ntya: “Enyuma z’okufîrwa na mukanie, nal’ilagirire oku burhulirize. Bene wirhu na bakabo bakayisha omushi n’obudufu lyo banyumvirhiza. Bakagindeka mbabwire gurhi ndi naciyumva barhanakagiciyumva kubi mpu bulya ndinalaka ngasi kasanzi. Bakampa oburhabale, nk’okushuka omutuga gwani, okugendigula ebi ndagirireko n’okunyendera ebiryo amango ntahashiri okujira ntyo. Banakag’ishenga haguma na nani ngasi mango. Bayerekana oku bali bîra b’okunali ‘omu mbaka.’”—Mig. 17:17.
w19.06 buk. 23 cif. 15
Orhabale Abandi lyo Balwisa Entanya z’Okuvunika Omurhima
15 William, mukage afâga myaka milebe egezire, adesire ntya: “Nanshagaluke erhi abandi baganirira ebintu binja bakengire lugenda mukanie; oko kunanyemeze n’obwalagale oku bal’imuzigire banakag’imukenga. Okujira ntyo kunantabale bwenene. Nanciyumve ntimusirwe bwenene bulya mukanie ali wa bulagirire bwenene kuli nie, anal’igwerhe nafasi nnene omu kalamo kani.” Mukana muguma ohamagalwa Bianca adesire ntya: “Nantulirizibwe erhi abandi basalira haguma na nani erhi bansomere lwandiko luguma erhi mandiko abirhi. Erhi baganira lugenda ibanie n’okunyumvirhiza amango ndi naganira lugenda ye, oko kunantabale bwenene.”
w17.07 buk. 16 cif. 16
‘Mulake Haguma n’Abalaka’
16 Omanye oku amasala ojira haguma n’owinyu Mukristu wafîrirwe gaba ga bulagirire bwenene. Ciru akaba kwanaba kuzibu okuderha entanya zawe zoshi omu kanga kadarhi kali nk’ako, okujira amasala garhenzire oku murhima enyanya zage, ciru n’okulaka haguma naye kwanamurhabala bwenene ly’aciyumva bwinja. Dalene akengire ntya: “Mango maguma na maguma erhi bali birhu bakayishire lyo bantuliriza, nakag’ibadosa erhi balonzize basalire haguma na nani. Oku murhondero gw’isala bakag’igagamiza, cikone ngasi mango enyuma za nderho nsungunu izu lyabo lyakazibuha, n’oko kwakarhuma bajira isala linja bwenene lirhenzire oku murhima. Obuyemere bwabo buzibu, obuzigire bwabo kuli nie, n’okunshibirira kwabo, byazibuhize obuyemere bwani bwenene.”
w17.07 buk. 16 cif. 17-19
‘Mulake Haguma n’Abalaka’
17 Amalumwa ngasi muntu ayumva enyanya z’okufîrwa ganaba lubero bwenene n’ag’owundi. Co cirhumire, ocihangane okukageza akasanzi haguma n’owafîrirwe, arhali omu nsiku nsungunu ntangiriza bîra banji n’abantu b’omulala baba haguma naye zone, cikone n’omu myezi y’enyuma z’aho amango abandi baba bagalusire omu mikolo yabo. “Mwîra wa muntu oba amuzigire ngasi mango kw’anaba nka mwene wabo omuntu omu mbaka.” (Mig. 17:17) Abirhu Bakristu banaba nshôko ya burhulirize bunji oku muntu wafîrirwe omu kasanzi koshi agendekire aba n’amalumwa enyanya z’oko.—Osome 1 Abatesalonika 3:7.
18 Okengere oku omuntu wahezize omuzigirwa wage nkaba anaciyumva kubi bwenene enyanya za nsiku nkulu ndebe, muziki mulebe, enfoto, emikolo, bwehe bulebe, izu, erhi ciru mango malebe g’omwaka. Bintu binji omuntu wafîrirwe n’iba erhi mukage ajijire yene oburhangiriza nka okuja oku ntimanano nkulu erhi okuja aha Kukengera Olufû lwa Yezu, byanarhuma aciyumva kubi bwenene. Mwene wirhu muguma adesire ntya: “Nal’imanyire oku okukengera niene oburhangiriza olusiku lw’obuhya bwirhu kwakarhumire naciyumva kubi bwenene. Kobinali birhanali bilembu. Cikone bene wirhu na bali birhu balebe bajira emipango lyo rhugeza akasanzi haguma n’abîra bani ba hofi-hofi lyo ntabaga kahumba.”
19 Cikone, okengere oku arhali omu mango ga nsiku ndebe zago-zago gone abafîrirwe n’abazigirwa babo baba balagirireko oku kuhâbwa omurhima. Junia ahugwire ntya: “Kanji-kanji okurhabalwa n’okugeza akasanzi haguma n’abîra amango harhali lusiku lulebe lwago-lwago lw’okukengerwa kwanarhabala bwenene. Ako kasanzi ka ntyo kaba ka bulagirire bwenene kananalerhe burhulirize bunji.” Kobinali, rhurhakayusa amalumwa goshi erhi okuciyumva kubi koshi omuntu wafîrirwe n’omuzigirwa wage ayumva, cikone rhwanamurhuliriza omu njira ndebe omu kujira bintu bilebe haguma naye lyo rhumurhabala. (1 Yn. 3:18) Gaby akengire ntya: “Mvuzire Yehova omunkwa bwenene oku bagula b’obuzigire ampire bakag’intabala omu ngasi mazibu gakag’impikira mw’ako kanga. Kobinali banjijire nciyumve mbagalirwe omu maboko ga Yehova g’obuzigire.”
Obuhirhi bw’Ekiroho
“Ecimanyiso Abantu Boshi Babonerekwo oku Muli Baganda Bani”
18 Hali amango rhwakabona oku kuli kwa bulagirire rhugend’iganiza owirhu mwemezi warhugokezagya. Cikone embere rhujire ntyo, kwanaba kwinja rhucidose amadoso gali nk’aga: ‘Ka mmanyire binji lugenda ako kanga?’ (Mig. 18:13) ‘K’arhakaba arhangokize n’obulonza?’ (Muh. 7:20) ‘Ka nta mango nani nkola njijire igosa liri nk’eryo?’ (Muh. 7:21, 22) ‘Omu kuganiza oyu muntu, ka najira amazibu gabe madarhi bwenene kulusha aga rhuli rhwalonza okuyusa?’ (Osome Emigani 26:20.) Erhi rhwakaciha akasanzi k’okurhanya oku madoso gali nk’ago, nkaba rhwanabona oku obuzigire bwirhu kuli oyo mwene wirhu bwanarhushumya rhuleke okurhanya kw’ebi anarhujiriraga.
NSIKU 20-26/10
OBUGALE BW’AKANWA KA MUNGU | OMUHANÛZI 9-10
Obe n’Entanya Nyinja Lugenda Amazibu Gawe
w13 15/8 buk. 14 cif. 20-21
Orhahira ‘Okakunirira Nyamuzinda’
20 Otumuze oshinganine okutumuzibwa. Bulya gurhi rhushinganine rhujire ntyo? Okuderha okuli, hali mazibu maguma maguma garhuhikira erhi rhwene rhurhuma. Erhi amazibu gakarhuhikira erhi rhwene rhurhuma, rhushinganine rhuyemere oko. (Gl. 6:7) Orhalonzagya okutumuza Yehova enyanya z’ago mazibu. Bulya gurhi okujira ntyo kwanaba kubula obwenge? Rhurhanye kw’olu lwiganyo: Omutuga gwanaba gugwerhe obuhashe bw’okulibirha bwenene. Orhanyagye erhi shoferi akalibisa omutuga kurhalusa ebitensi bihunyirwe amango ali atembeza omu lukumba na ntyo ajire e aksida. K’owatulaga ogo mutuga anatumuzibwa enyanya z’eyo aksida? Nanga ciru n’ehitya! Ko n’oko, Yehova arhulemire n’oluhuma lw’okucishoga. Cikone kandi arhuhire obulongozi bwakarhurhabala rhurhôle emihigo y’obwenge. Cakarhumaga rhwatumuza Omulemi wirhu enyanya z’amagosa girhu?
21 Okuderha okuli, arhali ngasi mazibu garhuhikira galerhwa n’amagosa girhu erhi ebijiro birhu bibi. Bintu biguma na biguma birhuhikira binalerhwe ‘n’obuhanya burhurhibukira.’ (Muh. 9:11) Cikone kandi, rhurhashinganini rhuyibagire ciru n’ehitya oku Shetani Ibilisi ye nshôko nkulu y’obubi. (1 Yn. 5:19; Maf. 12:9) Shetani ye mushombanyi wirhu, ci arhali Yehova!—1 Pt. 5:8.
w19.09 buk. 5 cif. 10
Yehova Anabone Abakozi Bage Birhohye oku Baba ba Bulagirire Bwenene
10 Obwirhohye kandi bunalembuhye akalamo kirhu. Okuderha okuli, hali amango rhwakabona omu kalamo ebintu bibonekine nka birhashinganini erhi nka birhali binja. Omwami w’obwenge Solomoni, adesire ntya: “Ndwirhe nabona abaja bagenda oku nfarasi n’abarhwali bagende n’amagulu nka baja.” (Muh. 10:7) Arhali ensiku zoshi abantu bagwerhe buhashe bunji babonwa n’abandi. Na balya bagwerhe buhashe bunyi bwenene mango maguma maguma banakengwe bwenene. Ciru akaba ntyo, Solomoni ayerekine oku kuli kukolesa obwenge kuli rhwe okuyemera akanga rhulimwo ahali h’okusegeza obwenge oku kanga kabi. (Muh. 6:9) Erhi akaba rhuli birhohye, kwanaba kulembu kuli rhwe okuyemera akalamo nk’oku kanali c’arhali nk’oku rhwal’irhanyize kashinganine kabe.
w11 15/10 buk. 8 cif. 1-2
K’Onacishagaluse n’Ebintu Bishinganine?
ERHI rhusoma Ebibliya, rhunabonemwo emyanzi eyerekine oku Yehova arhaba alonzize rhulame kone, cikone kandi aba alonzize rhushagalukire akalamo. Kwa lwiganyo, olwandiko lw’Ennanga 104:14, 15, Mashi Bible; ludesire oku Yehova ye rhuma “ebiryo bikâyera omw’idaho; n’idavayi litwa abantu enyorha, n’amavurha g’okucîshîga, n’ebiryo birhuma omuntu azibuha.” Kobinali, Yehova ye rhuma emburho zayera lyo rhupata emogomogo, amavurha, n’idivayi birhurhabala rhugendekere rhwalama. Cikone kandi idivayi linarhume ‘omurhima gwashagaluka.’ Ahanyuma n’ebiryo rhuba rhulagirireko lyo rhulama, idivayi nalyo linayushule omwishingo gwirhu. (Muh. 9:7; 10:19) Kobinali, Yehova aba alonzize rhube n’omwishingo, co cinarhuma ‘asimisa’ emirhima yirhu bwenene.—Ebj. 14:16, 17, Mashi Bible.
2 Muli ntyo, nta cirhumire rhugwerhe c’okucitumuza erhi rhwakapanga kasanzi kalebe k’‘okulola orhunyunyi n’obwaso bw’omu mashwa’ erhi okujira eyindi mikolo yakarhuma rhwaciyumva bwinja n’okurhujira rhushagalukire akalamo. (Mt. 6:26, 28; Enna. 8:3, 4) Akalamo kinja eri “ngalo ya Nyamuzinda.” (Muh. 3:12, 13) Okubona oku akasanzi k’okucishagalusa ciri cigabi c’eyo ngalo, kwarhushumya rhukakakolesa omu njira yakashagalusa Owarhuhâga yo.
Obuhirhi bw’Ekiroho
it “Okuderha-derha abandi, Akakozo” cif. 4, 8
Okuderha-derha abandi, Akakozo
Okuderha-derha abandi kwanahinduka kakozo, kwananalerhera amazibu omuntu okoza abandi. Enderho ziri omu Omuhanûzi 10:12-14 ziri z’okuli. Zidesire ntya: “Akanwa k’omusirhe yehe ko kanamuheza. Emyanzi yage ayirhangira ya bihalarhi, ayishwinje likola isirhe. Omusirhe yeluza emyanzi.”
Ciru akaba okuderha-derha abandi omu kanga kalebe kwanalerha mazibu manji, erhi kurhagalerhe (oko kwanahinduka kakozo erhi kurhume haba akakozo), ensiku zoshi akakozo kanalerhe amazibu madarhi, kanarhume abandi baciyumva kubi, n’okulerha ennongwe. Akakozo kanashumibwa n’obwenge hushu erhi nanga. Mw’ako kanga, omuntu w’akakozo anacijire mushombanyi wa Mungu, bulya “cishombanya washombanya abaguma” ali egarhi k’ebintu Mungu ashomba. (Mig 6:16-19) Oluderho lw’Ecigiriki di·aʹbo·los lo lwahindwirwe “kakoza” erhi “muntu oshobeka abandi.” Olo luderho lukolesibwe kanji omu Bibliya omu kuganirira Shetani “Ibilisi,” kakoza mukulu bwenene oshobeka Nnâmahanga. (Yn 8:44; Maf 12:9, 10; Murh 3:2-5) Oko kuyerekine indi oba nshôko y’enderho z’obunywesi zihegeza abandi irenge.
NSIKU 27/10–2/11
OBUGALE BW’AKANWA KA MUNGU | OMUHANÛZI 11-12
Obe n’Amagala Minja, Onashagalukire Akalamo
g 3/15 buk. 13 cif. 6-7
Ehihusi Hinja n’Obulangashane bw’Izuba Buli Bufumu Buyirha Emikrobe
Obulangashane bw’izuba nabo bujira obuhashe bw’okuyirha emikrobe. Gazeti nguma ehamagalwa Journal of Hospital Infection ehugwire oku “mikrobe minji elama omu cirere elerha endwala erhalembera obulangashane bw’izuba.”
Gurhi wakayunguka n’oko? Nkaba wanalonza okuja embuga ly’ogeza kasanzi kalebe k’olugero okw’izuba amango liri lyabasha n’okuyisa ehihusi hinja. Okujira ntyo nkaba kwanarhuma waciyumva bwinja.
Oshagalukire Engalo ya Nnâmahanga y’Obuzine
6 Ciru akaba Ebibliya cirhaba citabu ciganirira eby’amagala nkana erhi ca kuhâna enyigirizo okubiyerekire ebiryo, eyerekine entanya Yehova ajira lugenda ebyo bintu. Kwa lwiganyo, arhurhônzire oku ‘rhucirhenzekwo ngasi mababale’ gakashereza omubiri gwirhu. (Muh. 11:10) Ebibliya ehanzize obudanbye n’okunywa amamvu kurhalusire olugero, byombi byanashereza amagala girhu na ciru byanarhuma rhwafâ. (Mig. 23:20) Yehova ab’alonzize rhukayerekana oborhere bw’okucihasha omu mango rhuli rhwahiga lugenda bici na binganaci rhwalya n’okunywa.—1 Kr. 6:12; 9:25.
7 Rhwanarhôla emihigo eyerekine oku rhuvuzire omunkwa oku ngalo ya Nnâmahanga y’obuzine omu kukakolesa obuhashe bwirhu bw’okurhanya. (Enna. 119:99, 100; osome Emigani 2:11.) Kwa lwiganyo, rhwanarhôla emihigo minja lugenda ebi rhwalya. Erhi akaba rhusima biryo bilebe cikone rhumanyire oku binarhume rhwalwala, obuhashe bwirhu bw’okurhanya bwinja bunarhushumye rhuleke okukalya ebyo biryo. Kandi rhunayerekane oku rhugwerhe obwenge erhi rhwakakahûnga nk’oku bihûnyire, okujira esporo ngasi mango, n’okugendekera rhwacêsa omubiri gwirhu n’enyumpa yirhu.
“Mube ba Kujira Akanwa ka Nnâmahanga”
2 Rhuli bakozi ba Yehova, rhuba bantu ba mwishingo. Bulya gurhi? Rhujira birhumire binji, cikone cirhumire ciguma c’obulagirire kuli kubona oku rhunasome Akanwa ka Mungu ngasi lusiku n’okucihangana okukolesa ebi rhuyiga.—Osome Yakobo 1:22-25.
3 Hali njira nyinji rhuyungukamwo omu ‘kuba ba kujira akanwa ka Nnâmahanga.’ Kwa lwiganyo, erhi rhukolesa ebi rhuli rhwayiga omu Kanwa ka Mungu rhunamushagaluse, n’oko kunarhume rhwaba n’omwishingo. (Muh. 12:13) Erhi rhukolesa ebi rhusoma omu Kanwa ka Mungu kalongozibagwa n’iroho lyage, rhunajire akalamo k’omulala gwirhu kabe kinja n’okuba n’obwîra busezire haguma n’abirhu bemezi. Nkaba ko byabire ntyo omu kalamo kawe. Kandi, rhunayake mazibu manji omu mazibu gahikira abarhakulikira enjira za Yehova. Kobinali, rhuyemire ebi Mwami Daudi aderhaga. Enyuma z’okuganirira omu lwimbo irhegeko, oburhonde, n’enjira za Yehova z’okutwa emanja, ashwinja ntya: ‘Ogakenga gali mw’obunguke.’—Enna. 19:7-11, Mashi Bible.
Obuhirhi bw’Ekiroho
it “Okulongozibwa n’Iroho” cif. 10
Okulongozibwa n’Iroho
Hali ebintu by’okunali biyerekine oku abantu Mungu akolesagya lyo bayandika Amandiko barhali nka mashini gajira kone ebi bagarhegesire gajire, kuli kuderha oku barhakag’iyandika kone buzira kurhanya ebi babwizirwe. Rhusomire lugenda Amafulûlo Yowane ‘ahâbagwa na Nyamuzinda’ erhi amurhumira malahika, [“kugerera ebimanyiso,” NWT] n’oku Yowane naye ye ‘wayishirigihamiriza oluderho lwa Nyamuzinda n’ebinwa bya Yezu Kristu, nk’oku anabibwine kwoshi.’ (Maf 1:1, 2) Kwali omu “kulongozibwa [luderho oku lundi, ‘omu iroho’]” mwo Yowane ‘ahisire omu lusiku lwa Nyakasane’ anabwirwa ntya: “Ebi wabona, obiyandike omu citabu.” (Maf 1:10, 11) Muli oko, bibonekine oku Mungu alesire abayandikaga Ebibliya bakolese obuhashe bwabo bw’okurhanya lyo bacishoga enderho zishinganine bakolesa omu kuyandika ebibonekerezi bakag’ibona (Hab 2:2), anajaga abakolesa n’okubalongoza bwinjinja lyo ebi bayandika biyish’iba by’okuli binapatine n’obulonza bwa Yehova. (Mig 30:5, 6) Enderho ziri omu Omuhanûzi 12:9, 10, ziyerekine oku omwandisi akag’ikola bwenene bulya akag’irhanya bwenene, akag’ilongereza, n’okupanga enderho bwinja ly’ayandika “emyanzi minunu n’okusiriba bwinja enkengêro z’okunali.”—Oshushanye na Lk 1:1-4.