Amadoso g’Abantu Basoma Ebicapo Birhu

“Entôle zage bamalahika [bamalahika bage bishogwa, NWT]” baganirirwe omu 1 Timoteyo 5:21, bo bandi?

Entumwa Paolo yayandikire owabo mugula Timoteyo ntya: “Nkulahirize embere za Nnâmahanga n’embere za Kristu Yezu, n’ez’entôle zage bamalahika [bamalahika bage bishogwa, NWT]: oshimbe ebi binwa buzira kabolo na buzira kanana.”​—1 Tm. 5:21.

Lyo rhumanya abo bamalahika bo bahi, rhwarhang’iganirira bamalahika bahi barhakaba mw’eco cigusho ca bamalahika. Bibonekine n’obwalagale oku abo bamalahika barhakaba ba mwa balya 144 000. Erhi Paolo ayandikira Timoteyo, obufûke bw’Abakristu bashîge amavurha baja empingu burhal’icirhondera. Entumwa n’abandi bashîge amavurha barhal’iciba biremwa by’ekiroho, co cirhumire “bamalahika bage bishogwa” barhankaba abo.​—1 Kr. 15:50-54; 1 Ts. 4:13-17; 1 Yn. 3:2.

Kandi, “bamalahika bage bishogwa” barhakaba bamalahika barhakag’irhumikira Mungu amango g’Enkuba y’Ecihonzi. Abo bamalahika bacilunzire haguma na Shetani baba bazimu, banaba bashombanyi ba Yezu. (Murh. 6:2; Lk. 8:30, 31; 2 Pt. 2:4) Omu mango gayisha, bayish’ikwebwa omu abiso bajiremwo myaka 1 000 n’enyuma z’aho, bayish’isherezibwa haguma na Shetani Ibilisi.​—Yd. 6; Maf. 20:1-3, 10.

“Bamalahika bage bishogwa” Paolo aganiriraga, bagwasirwe babe bali bamalahika b’empingu balungaga ‘Nnâmahanga na Kristu Yezu’ okuboko, nk’oku banaganirirwe boshi mw’ogo mulongo.

Haba ebihumbi n’ebihumbi bya bamalahika bishwekerezi. (Hb. 12:22, 23) Rhurhashinganini rhurhanye oku Yehova anabahe boshi mukolo muguma omu kasanzi ko na kalya. (Maf. 14:17, 18) Okengere oku mango maguma, malahika muguma yene ahâbirwe omukolo gw’okushereza basoda Baasiriya 185 000. (2 Bam. 19:35) Bamalahika banji banaba bahâbirwe omukolo gw’‘okukûla abantu b’enshumi mbi n’ab’amabi omu Bwami [bwa Yezu].’ (Mt. 13:39-41) Abandi bamalahika nkaba bahâbirwe omukolo g’‘okushubûza abarhôle bage’ lyo baja empingu. (Mt. 24:31) N’abandi bamalahika banahâbwe omukolo gw’‘okurhulanga omu njira zirhu zoshi.’​—Enna. 91:11; Mt. 18:10; oshushanye na Mateyo 4:11; Luka 22:43.

“Bamalahika bage bishogwa” baganirirwe omu 1 Timoteyo 5:21 bashinganine babe bamalahika bahâbirwe emikolo yago-yago eyerekire abantu ba Mungu. Kushimbana n’akanga olo lwandiko lwayandikagwamwo, Paolo ahâna amahano lugenda oku abagula bashinganine bahikirize emikolo yabo n’oku abantu omu cigamba bashinganine bakenge abagula. Okubiyerekire abagula, bashinganine bahikirize emikolo yabo “buzira kabolo na buzira kanana,” barhanashinganini barhôle emihigo buzira kurhanya buzibu-zibu. Ecirhumire c’obulagirire bwenene kuli bo c’okukulikira ihano lya Paolo lyalongozibagwa n’iroho litagatifu, kuli kuba banabe bali bakola “embere za Nnâmahanga, n’embere za Kristu Yezu, n’ez’entôle zage bamalahika [bamalahika bage bishogwa, NWT].” Co cirhumire biyumvikine n’obwalagale oku bamalahika balebe banahâbwe emikolo egwerhe olushangi n’ecigamba nka okucilanga, okuyimangira omukolo gw’amahubiri, n’okuha Yehova eraporo.​—Mt. 18:10; Maf. 14:6.