Ka ‘Wacikomerezize’ Ihwe ly’Okurhimukwa?

1. Bici okurhimukwa kuhugwîre, na bici kurhahugwîri?

K’OBA muntu wa kurhimukwa? Omuntu w’okurhimukwa anabe n’omwishingo n’omurhûla omu kusegeza obwenge oku migisho agwerhe. Arhaba burhe erhi kukunira enyanya z’ebi abuzire. Ciru akaba ntyo, okuba muntu wa kurhimukwa kurhahugwîri okurhac’ilonza okujira amajambere. Kwa lwiganyo, kurhali kubi kuli rhwe okulonza okujira binji omu mukolo gwa Yehova. (Rm. 12:1; 1 Tm. 3:1) Ciru akaba ntyo, omuntu w’okurhimukwa arhaheza omwishingo gwage erhi akaba arhahâbirwi emikolo y’eciteokrasi duba-duba nk’oku anakag’irhanya.

2. Bulya gurhi okurharhimukwa kuli kubi bwenene?

² Okurharhimukwa kwanalerha amazibu madarhi. Abantu barharhimukwa ciru n’ehitya n’ebi bagwerhe banakola nsa nyinji okurhalusire olugero lyo bapata ebintu by’omubiri barhalagiririko kobinali. Eby’okugayisa, Bakristu balebe ciru bazimbire ensaranga erhi ebindi bintu bakag’icifinja. Nkaba bacibwizire ntya: ‘Nshinganine aka kantu,’ ‘Ngwerhe kasanzi kanji bwenene ndi nalinda,’ erhi ‘Narhôla ezi nsaranga, nayish’izilyula.’ Cikone, ngasi bushambo burhashagalusa Yehova burhanamukengesa. (Mig. 30:9) Abandi bahikire okuvunika omurhima bulya barhahâbagwa mukolo mulebe gw’eciteokrasi na ntyo baleka okukolera Yehova. (Gl. 6:9) Gurhi omukozi wa Yehova wacihânyire emwage akahikira ciru okurhanya okujira ntyo? Ago mazibu ganahikira erhi akaba omuntu ajire aheza bunyi-bunyi oborhere bw’okuba wa kurhimukwa.

3. Nyigirizo zihi z’okuhâna omurhima rhuyizire omu Abafilipi 4:11, 12?

³ Rhweshi rhwanaciyigiriza okuba ba kurhimukwa. Entumwa Paolo yayandisire oku ‘akomerire [ayizire, NWT] okusima ngasi bworhere [kanga] alimo.’ (Osome Abafilipi 4:11, 12.) Ayandikaga ezo nderho erhi ali omu prizo. Ciru akaba ntyo, arhahezagya omwishingo gwage. ‘Akomerire’ ihwe ly’okurhimukwa. Erhi akaba rhuli rhwacihangana lyo rhuba ba kurhimukwa, enderho za Paolo n’ebi aciboneraga byanarhuyemeza oku rhwanaba ba kurhimukwa. Rhurhashinganini rhurhanye oku okuciyumva rhurhimusirwe n’akanga kirhu kwacilerha kone. Lubero n’oko, rhugwasirwe rhuyige okuba ba bakurhimukwa. Gurhi rhwakajiramwo ntyo? Leki rhuganirire amorhere gakarhurhabala okuyiga ihwe ly’okurhimukwa.

OBE WA KUVUGA OMUNKWA

4. Gurhi okuba ba kuvuga omunkwa kurhurhabalamwo lyo rhuba ba kurhimukwa? (1 Abatesalonika 5:18)

⁴ Omuntu oba wa kuvuga omunkwa anakaba wa kurhimukwa. (Osome 1 Abatesalonika 5:18.) Kwa lwiganyo, erhi akaba kobinali rhuli ba kuvuga omunkwa oku bintu by’obulagirire by’akalamo, nkaba rhurhakarhanya okurhalusire olugero lugenda ebintu rhulonzize cikone rhurhabigwerhi. Erhi rhwakashagalukira omukolo gw’eciteokrasi rhugwerhe ene, rhwanasegeza obwenge bwirhu oku kugujira bwinja bwenene nk’oku rhwakanahasha, ahali h’okulalikira bwenene okuhâbwa omukolo muhyahya. Buzira karhinda, Amandiko garhubwizire rhukahira enderho z’okuvuga Yehova omunkwa omu masala girhu! Okuba ba kuvuga omunkwa kunarhurhabale okuyumva “omurhûla gwa Nyamuzinda gulushire ngasi nkengero.”​—Fl. 4:6, 7.

5. Bici byakarhumire Abaisraheli baba ba kuvuga omunkwa? (Olole n’enfoto.)

⁵ Orhanye lugenda ebyahikiraga Abaisraheli. Bacidudumire kanji-kanji emunda Yehova ali oku babuzire ebiryo bakag’ishagalukira okulya e Misri. (Mib. 11:4-6) Okuderha okuli, okulama omw’irungu kurhali kulembu. Bici byakabarhabire lyo baba ba kuvuga omunkwa? Bal’ishinganine barhanye kw’ebi Yehova ali amabajirira byoshi. E Misri, emunda bakag’ijirirwa kubi bwenene bulya bali bajà, Yehova alerha mahanya ikumi oku Bamisri anayokola Abaisraheli. Enyuma z’okulikulwa kw’Abaisraheli, “banyaga abanya-Misri” amarhale, amasholo erhi noro, n’emyambalo. (Lub. 12:35, 36) Erhi Abaisraheli bali egarhi k’omurhwe gwa Faraoni n’Enyanja Ndukula, omu njira y’ecisomerine Yehova agabanya amishi lyo bayikirira ishiriza. N’omu kasanzi k’omubalamo gwabo omw’irungu, Yehova akag’ibalisa ngasi lusiku kugerera amana. Bulya gurhigi Abaisraheli bakag’iciduduma lugenda ebiryo? Abaisraheli barharhimukagwa, arhali mpu bulya babuzire ebiryo bal’ilagirireko, cikone bulya barhali ba kuvuga omunkwa kw’ebi Yehova ali amakabaha.

6. Bici byakakurhabala ly’oba wa kuvuga omunkwa?

⁶ Bicigi byakakurhabala ly’oba wa kuvuga omunkwa? Burhangiriza, ngasi lusiku okaciha akasanzi k’okurhanya oku bintu bikushagalusa omu kalamo. Wanayandika bintu bibirhi erhi bisharhu ovuzireko omunkwa. (End. 3:22, 23) Bwa kabirhi, okayerekana oku ovuzire omunkwa. Okacihangana okuvuga abandi omunkwa kw’ebi bakujirira. Kulusha byoshi, okavuga Yehova omunkwa ngasi mango. (Enna. 75:1) Bwa kasharhu, ocishoge abîra baba ba kuvuga omunkwa. Okuvuga omunkwa kunayahukire, n’okurharhimukwa nako kunayahukire. (Lush. 1:26-28; 2 Tm. 3:1, 2, 5) Erhi rhwakakasegeza obwenge bwirhu oku kuvuga omunkwa, rhwanaba n’obulyo bw’okulwisa entanya z’okurharhimukwa.

7. Bici byarhabire Aci okuba wa kuvuga omunkwa?

⁷ Orhanye oku byahikiraga Aci, olama omu Indonésie. Adesire ntya: “Omu mango g’endwala y’okuyahukira y’e COVID-19, narhondera nagerera akanga kani oku k’abirhu bemezi. Oko kwarhuma naba wa kurharhimukwa.” (Gl. 6:4) Bici byamurhabire okushanja entanya zage? Aci adesire ntya: “Narhondera okuganja emigisho nakag’ihâbwa ngasi lusiku nanakarhanya oku bintu binji binja nakag’ipata enyanya z’okuba omw’ikubuliro lya Yehova. Enyuma z’aho nakavuga Yehova omunkwa. Oko kwarhuma nakaciyumva ntimusirwe bwenene.” Erhi akaba oli wagogomerwa n’entanya mbi, ka wanajira ebi Aci ajiraga ly’oba n’omurhima gw’ovuga omunkwa?

OSEGEZE OBWENGE OKU BULONZA BWA YEHOVA ONABE MWIRHOHYE

8. Bici byahikire Baruki?

⁸ Baruki, mwandisi w’omulebi Yeremiya, mango malebe aciyumvirhe arharhimusirwi n’akanga alimwo. Baruki agwerhe omukolo muzibu, ko kuderha, okurhabala omulebi Yeremiya amango akag’ihâna omwanzi muzirho okw’ishanja lirhali lya kuvuga omunkwa. Omu njira ndebe, Baruki abula busegeza obwenge oku bintu by’obulagirire. Ahali h’okusegeza obwenge kw’ebi Yehova al’ilonzize ajire, byanahashikana oku arhondera okucisegezako obwenge bwenene n’okubusegeza oku bintu al’ilonzize ajire. Kugerera omulebi Yeremiya, Yehova abwira Baruki ntya: “Nawe odwirhage wahûna mpu bakuhe byawe-byawe [bintu binji, NWT]. Orhahûne.” (Yer. 45:3-5) Omu zindi nderho, Yehova akag’iderha ntya: “Orhimukwe n’akanga olimwo buno.” Baruki ayemera okukubûlwa anagendekera aba n’obwîra bwa hofi-hofi haguma na Yehova.

9. Kushimbana n’olwandiko lwa 1 Abakorinti 4:6, 7, bici obwirhohye burhushumya rhuhugûkwe? (Olole n’enfoto.)

⁹ Hali amango Omukristu akaciyumva nk’ashinganine okuhâbwa mukolo mulebe gw’eciteokrasi. Nkaba anaciyumva ntyo bulya agwerhe bulenga bunji, anakole bwenene, erhi agwerhe myaka minji ali akolera Yehova. Cikone abandi banahâbwa omukolo gw’eciteokrasi anal’ilalikire bwenene. Bici byakamurhabala omu kanga ka ntyo? Anarhanya kw’ebi entumwa Paolo yayandikaga biri omu 1 Abakorinti 4:6, 7. (Osome.) Ngasi mukolo gw’eciteokrasi rhuhâbwa na ngasi bulenga rhujira emwa Yehova birhenga. Yehova arharhuha ebyo bintu mpu bulya rhuli ba bulagirire bwenene kulusha abandi. Ezo zoshi ziba njira Yehova arhuyerekamwo olukogo lurhashinganinwi.​—Rm. 12:3, 6; Ef. 2:8, 9.

10. Gurhi rhwakabamwo birhohye?

¹⁰ Rhwanaba birhohye erhi rhwakarhanya bwenene oku lwiganyo Yezu arhusigire. Orhanye oku bintu byabaga omu budufu Yezu ashukaga amagulu g’entumwa zage. Lugenda Yezu, entumwa Yowane yayandisire ntya: “Erhi amanyire [1] oku Ishe ahizire obuhashe bwoshi omu maboko gage [2] n’oku emwa Nnâmahanga arhengaga [3] n’emwa Nnâmahanga ashubira, . . . arhonderashuka amagulu g’abaganda bage.” (Yn. 13:3-5) Yezu akaciyumvirhe oku entumwa zage zal’ishinganine zimushuke amagulu. Cikone omu kalamo kage hano igulu, nta mango Yezu arhanyize oku bulya ali Mugala wa Mungu al’ishinganine abe n’akalamo kayololosire bwenene na ka bugale. (Lk. 9:58) Yezu ali mwirhohye na wa kurhimukwa. Arhulekire olwiganyo lwinja.​—Yn. 13:15.

11. Gurhi obwirhohye bwarhabiremwo Denis ly’aciyumva arhimusirwe?

¹¹ Mwene wirhu muguma ohamagalwa Dennis, w’omu Pays-Bas, acihanganyire okukulikira olwiganyo lwa Yezu lw’obwirhohye, cikone kurhali kulembu okujira ntyo. Adesire ntya: “Mango maguma maguma nanyumve entanya z’okucikunga erhi entanya z’okurharhimukwa ziri zayushuka muli nie, kwa lwiganyo amango owundi muntu amahâbwa mukolo mulebe gw’eciteokrasi. Erhi oko kuhikira, nanyige omwanzi guganirire obwirhohye. Omu JW Library^®, nampire ecimanyiso oku mandiko gaganirire obwirhohye lyo nkagapata duba-duba n’okushub’igasoma agandi mango. Nahizire hotuba ndebe omu telefone yani ziganirire obwirhohye, na kanji-kanji nanziyumvirhize.a Nayizire oku ngasi mukolo rhujira rhunagujire lyo rhukuza Yehova, c’arhali lyo rhucikuza rhwenene. Ngasi muguma muli rhwe anajire cigabi cisungunu mw’ebi Yehova ali ahikiriza.” Erhi wakarhondera waciyumva orhashagalukiri akanga kawe, ojire bintu bilebe ly’oyiga okuba mwirhohye. Oko kwazibuhya obwîra bwawe haguma na Yehova n’okukurhabala ociyumve orhimusirwe.​—Yk. 4:6, 8.

ORHANYE BWENENE OKU BULANGALIRE BWAWE

12. Bulangalire buhi bw’amango gayisha burhurhabala rhube ba kurhimukwa? (Izaya 65:21-25)

¹² Rhunaciyumve rhurhimusirwe bwenene erhi rhurhanya bwenene oku bulangalire bwinja buli embere zirhu. Omu citabu ca Izaya, Yehova arhubwizire oku ahugûsirwe oku rhugwerhe mazibu manji. Cikone kandi arhulaganyize oku akûla ago amazibu goshi. (Osome Izaya 65:21-25.) Rhwayish’ilama omu bulanzi n’omu nyumpa nyinjinja. Rhwayish’iba n’omukolo gw’okurhimusa, rhwayish’ikalya ebiryo by’okuyubaka omubiri na binunu. Rhurhakaciyoboha oku hali akantu kabi karhuhikira erhi kahikira abana birhu. (Iz. 32:17, 18; Eze. 34:25) Amango girhu gayisha gali minja bwenene, gananabemwo obulanzi.

13. Omu kanga kahi kwakaba kwa bulagirire ciru bwenene okusegeza obwenge oku bulangalire bwirhu?

¹³ Ene kulusha agandi mango goshi, rhulagirire oku kusegeza obwenge oku bulangalire bwirhu. Bulya gurhi? Bulya rhulamire omu “nsiku nzinda” na rhweshi rhugwerhe amazibu. (2 Tm. 3:1) Ngasi lusiku Yehova ali arhurhabala lyo rhulembera omu kurhuha obulongozi, emisi, n’oburhabale rhulagirireko. (Enna. 145:14) Kandi, obulangalire bwirhu bw’Ecikristu bwanarhurhabala omu mango mazibu. Nkaba kurhali kulembu kuli we okuhikirigiza omulala gwawe amalagirire g’omubiri. K’oko kuli kuderha oku ensiku zoshi waba n’akalamo kazibu? Nanga ciru n’ehitya! Omu Paradizo Yehova alaganyize okukuha ebi olagirireko, binji bwenene. (Enna. 9:18; 72:12-14) Wanaba oli walwisa amalumwa garhahwa, okuvunika omurhima, erhi amazibu galerhwa n’obushosi. Ka walibuzibwa n’ago mazibu ensiku zoshi buzira bulangalire bw’okufuma? Nanga ciru n’ehitya. Endwala n’olufû byahwa loshi-loshi omw’igulu lihyahya lya Mungu. (Maf. 21:3, 4) Obo bulangalire bunarhurhabale lyo rhurhag’iciyumva rhuli burhe erhi rhukunire enyanya z’ebiri byarhuhikira ene. Rhwanaciyumva rhurhimusirwe ciru akaba rhuli rhwalwisa obubule bw’obushinganyanya, okufîrwa, n’amango rhuli rhwalembera endwala erhi kulwisa agandi mazibu. Bulya gurhi? Bulya ciru amazibu rhugwerhe gakaba madarhi bwenene ene, rhumanyire oku oko ‘kulibuka [kuli] kwa hisanzi hitya’ n’oku hano hofi-hofi igulu lihyahya lyarhulerhera oburhulirize bw’ensiku zoshi.​—2 Kr. 4:17, 18.

14. Gurhi rhwakazibuhyamwo obulangalire bwirhu?

¹⁴ Bulya obulangalire buli bwa bulagirire lyo rhurhimukwa, gurhi rhwakabuzibuhyamwo? Nka kula omuntu akanayambala amataratara [maneti] ly’abona bwinja bwenene ebintu biri kulî, rhwanaba rhulagirire oku kujira bintu bilebe bishinganine lyo rhuzibuhya obulangalire bwirhu na muli ntyo rhwanahasha okubona bwinja bwenene Eparadizo y’omu mango gayisha. Amango rhuhangayisire bwenene lugenda oku rhwapatamwo ensaranga, rhwanabona omu bwenge bwirhu oku akalamo kayish’iyorha amango ensaranga, emyenda, obukenyi, birhakacihaba bundi. Erhi akaba rhuhangayisire enyanya za mikolo milebe y’eciteokrasi rhurhacihâbwa, rhwanarhanya kunganaci ago mahangayiko gayish’iba ga busha enyuma z’okuhikira okuba bimana n’okukolera Yehova omu bihumbi by’emyaka. (1 Tm. 6:19) Mwa gano mango, rhuli rhwahangayika enyanya za bintu binji n’oko kwanarhuma kwaba kuzibu okurhanya lugenda ebyo biragane by’amango gayisha. Cikone oku rhwagendekera rhwarhanya bwenene oku mango minja Yehova alaganyize, ko kwanagendekera kwaba kulembu okugasegezako obwenge ahali h’okubusegeza oku mazibu girhu.

15. Bici ociyigirizize kugerera enderho za Christa?

¹⁵ Olole gurhi obulangalire bwarhabiremwo Christa, muka Dennis, rhwaganiriraga embere. Adesire ntya: “Njira endwala y’omu misi egendekire yalandira erhuma nakolesa ecirhi c’ebirema n’okugeza kasanzi kanji k’olusiku omu ncingo. Nanyumve amalumwa ngasi lusiku. Doktere azindig’imbwira oku nta bulangalire oku nafuma. Cikone ho n’aho narhanya ntya: ‘Arhali abona akasanzi kayisha nk’oku ndi nakabona.’ Mba nsegize obwenge oku bulangalire bwani, n’oko kunarhume naba n’omurhûla omu bukengere. Ene, byanahûna nembere mazibu manji mw’er’igulu, cikone nayish’iba n’akalamo kinja bwenene omw’igulu lihyahya!”

“ABAMUKENGA BARHABULIRWA NA BICI”

16. Bulya gurhi Mwami Daudi ayandikaga oku abarhinya Yehova “barhabulirwa na bici”?

¹⁶ Ciru rhwakaba rhurhimusirwe, rhwanahikirwa n’amazibu. Orhanye lugenda Mwami Daudi. Afîrirwe na bana bage basharhu. Ashobesirwe eby’obunywesi, alenganyizibwa, anajira myaka minji ali ahivwa n’oko kwarhuma alama nka mubunga. Ciru akaba ntyo, omu mango akag’ilembera amazibu madarhi, aderha ntya lugenda Yehova: “Abamukenga [abamurhinya] barhabulirwa na bici.” (Enna. 34:9, 10) Bulya gurhi aderhaga ntyo? Bulya ciru akaba rhuli bantu ba Yehova rhurharhanya oku rhwalama akalamo karhagwerhi mazibu, rhuba rhuyemire n’obwalagale oku nta mango rhwanabulirwe n’ebi rhulagirireko kobinali. (Enna. 145:16) N’aka Daudi, rhwanalangalira oku Yehova arhurhabala oku mazibu girhu goshi. Rhwanaba n’omurhûla n’omwishingo ciru rhwakaba rhuli omu kanga kahi.

17. Bulya gurhi ohizire okuyiga ihwe ly’okurhimukwa?

¹⁷ Yehova alonzize obe wa kurhimukwa. (Enna. 131:1, 2) Co cirhumire ocihangane okuyiga ihwe ly’okurhimukwa. Erhi wakacihangana ly’oba wa kuvuga omunkwa, okugendekera wasegeza obwenge oku bulonza bwa Yehova n’okuba mwirhohye, onazibuhye obulangalire bwawe, wanahash’iderha ntya: ‘Ecigabi cani ciri cinja.’​—Enna. 16:5, 6.