Obulonza bwa Nnâmahanga lugenda Akalamo Kani Buli Buhi?

Ishuzo ly’Ebibliya

Nnâmahanga aba alonzize ohikire okumumanya nka Muntu w’okunali, omuyegere, na buzinda omuzigire n’okumukolera n’omurhima gwawe goshi. (Mateyo 22:37, 38; Yakobo 4:8) Wanayiga oku wakajiramwo obulonza bwa Nnâmahanga kugerera akalamo n’enyigirizo za Yezu. (Yowane 7:16, 17) Yezu arhakag’iderha kone lugenda obulonza bwa Nnâmahanga​—cikoki akag’ibulama. Co carhumaga Yezu aderha ntya lugenda omuhigo agwerhe omu kalamo kage: “arhali mpu nkajira oku nalonza, ci oku owantumaga alonza.”​—Yowane 6:38.

Ka ndagirire oku cimanyiso cago-cago, ecibonekerezi, erhi kuhamagalwa lyo manya obulonza bwa Nnâmahanga lugenda akalamo kani buli buhi?

Nanga, bulya Ebibliya ebamo emyanzi Nnâmahanga arhumiraga abantu. Egwerhe ebyakakurhabala ly’‘oshinganana okujira ngasi cijiro cinja.’ (2 Timoteyo 3:16, 17) Nnâmahanga alonzize okolese Ebibliya haguma n’“obuhashe [bwawe] bw’okurhanya” ly’omanya obulonza bwage lugenda akalamo kawe.​—Abaroma 12:1, 2, NWT; Abefezi 5:17.

Ka kobinali nanahasha okujira obulonza bwa Nnâmahanga?

Neci, wanahasha, kulya kuba Ebibliya edesire oku: “Amarhegeko gage garhaba mazirho.” (1 Yowane 5:3) Oko kurhali kuderha oku okukenga amarhegeko ga Nnâmahanga kuba kulembu ngasi mango. Cikone obunguke wayish’iba nabo enyuma z’okugakenga bo bunji kulusha oku wacihangana koshi ly’ojira ntyo. Yezu yene adesire oku: ‘Ab’obushagaluke bo abayumva ecinwa ca Nnâmahanga n’okucilanga [kucirhumikira]!’​—Luka 11:28.