K’Amadîni Goshi go Ganaba Maguma? Ka Goshi Ganahêke emwa Nnâmahanga?

Ishuzo ly’Ebibliya

Nanga, amadini goshi garhaba gonamaguma. Omu Bibliya muli nyiganyo nyinji z’amadîni gagayisa Nnâmahanga. Amadîni ganagabwamo mbero ibirhi.

Cigabi 1: Okuharamya rhunnâmahanga rhw’obunywesi

Ebibliya ehugwire Okuharamya rhunnâmahanga rhw’obunywesi omu nderho nka “busha,” “bwihambi,” “birhajira mukolo muci.” (Yeremiya 10:3-5; 16:19, 20) Yehovaa Nnâmahanga al’irhegesire ishanja lya mîra ly’Abaisraheli ntya: “Orhahîraga okabâ n’abandi banyamuzinda kuleka nie.” (Olubungo 20:3, 23; 23:24) Erhi Abaisraheli bakaharamize orhundi rhunnâmahanga, ‘oburhe bwa Nyamubâho bakag’iyâka.’​—Emibalè 25:3; Bene-Levi 20:2; Abaciranuzi 2:13, 14.

Entanya za Nnâmahanga zirhasag’ishanja lugenda okuharamya “banyamuzinda b’obwihambe.” (1 Abakorinti 8:5, 6; Abagalasiya 4:8) Arhegesire ngasi balya boshi balonza okumuharamya baleke olushangi haguma n’amadîni g’obunywesi, adesire ntya: “Rhengagi ekarhi kabo, munaciyegûle.” (2 Abakorinti 6:14-17) Akaba amadini goshi gaba gonamaguma gananahêke emwa Nnâmahanga, bulya gurhi Nnâmahanga ahânyire elyo irhegeko?

Cigabi 2: Okuharamya Nnâmahanga w’okuli omunjira arhayemiri

Mango maguma na maguma, Abaisraheli bakaharamya Nnâmahanga omukukolesa obwemere n’ebijiro by’abantu bakag’iharamya rhunnâmahanga rh’obunywesi , cikone Yehova alahira eyo nkomedu y’okulonza okucanga idîni ly’okuli haguma n’ely’obunywesi. (Olubungo 32:8; Olushika 12:2-4) Yezu atwira abakulu b’amadini b’omu mango gage olubanja enyanya z’oku bakag’iharamya Nnâmahanga; bakag’icijira babonekane ebunga nka bemezi, n’obu zili ndyalya ‘zileka enyigirizo nkulu kulusha ezindi zoshi z’omu marhegeko: nk’obushinganyanya n’okuba n’omurhima mwinja n’okuba n’obwemere.’​—Mateyo 23:23, Mashi Bible.

Ko n’oko ene nalyo, idîni liyimangire oku okuli lyone lihêka abantu emwa Nnâmahanga. Oko okuli kuba omu Bibliya. (Yowane 4:24; 17:17; 2 Timoteyo 3:16, 17) Amadîni enyigirizo zago zipingine n’Ebibliya ganakahabula abantu baje kuli na Nnâmahanga. Nyigirizo nyinji abantu bakarhanya mpu omu Bibliya zirhenzire; zihiziremo obusharhu butagatifu, iroho garhafa, n’omuliro gw’ecihenama; zarhengaga emw’abantu baharamya rhunnâmahanga rhw’obunywesi. Enterekêro eyimangire oku nyigirizo za ntyo eba ya “bunywesi,” erhi ya busha, bulya enakakûla amarhegeko ga Nnâmahanga n’okuhebaho amarhegeko ga bene bantu.​—Marko 7:7, 8.

Nnâmahanga ashomba obulyalya bw’amadîni. (Tito 1:16) Lyo abantu bayegera Nnâmahanga, enyigirizo zishinganine zibe borhere bw’akalamo kabo ci arhali kujira enkomedu za busha-busha n’ez’obunywesi kone. Kwa lwiganyo, Ebibliya edesire ntya: “Erhi omuntu ank’aderha mpu ali mwinja omw’idini lyage, ci akaba arhish’ishuba olulimi lwage, na ntyo acirhebe yêne, idini ly’oyo muntu liri lyabusha. Idini licîre lirhanaliko ibala omu masu ga larha Nyamuzinda, muliyumvagye: okukarhandula enfuzi n’abakana omu malibuko gabo, n’okucilanga buzira izabyo en’igulu.” (Yakobo 1:26, 27) Empindûlo King James ekolesize oluderho “idini licîre ” kuli obo bucêse, nterekêro erhalimo bulyalya.