Adamu na Eva Barharhumikiraga Mungu

Lusiku luguma erhi Eva ali yene enjoka yamuganiza. Yaderha ntya: ‘Ka kobinali Mungu arhayemeraga mukalya oku malehe g’emirhi y’obustani yoshi?’ Eva aderha ntya: ‘Rhwanalya oku malehe g’emirhi yoshi ahanyuma na murhi muguma gone. Erhi rhwakalya oku malehe g’ogo murhi, rhwanafâ.’ Enjoka yaderha ntya: ‘Murhafê. Kobinali erhi mwakalya oku malehe g’ogo murhi, mwanaba aka Mungu.’ K’ezo nderho zali z’okuli? Nanga, bwali bunywesi. Cikone Eva aziyemera. Oku Eva agendekire alaba kw’ago malehe, ko anagendekire acifinjago. Agalyako anagahako Adamu. Adamu al’imanyire oku bakafîre bakabula burhumikira Mungu. Cikone, oko kurharhumaga Adamu arhalya kw’ago malehe.

Enyuma z’aho, Yehova aganiza Adamu na Eva. Abadosa bulya gurhi babuzire bwamurhumikira. Eva atumuza enjoka na Adamu atumuza Eva. Bulya Adamu na Eva barharhumikiraga Yehova, abafukuza mw’obo bustani. Lyo barhag’igaluka mw’obo bustani, Yehova ahira bamalahika n’engorho yakag’iyaka muliro oku muhango gw’obo bustani.

Yehova aderha oku oyo warhebaga Eva naye ashinganine ahanwe. Kobinali arhali njoka yaganizagya Eva. Erhi Yehova alema enjoka arhazihaga obuhashe bw’okukaganira. Malahika mubi ye wahashisagya eyo njoka ly’eganira. Ajiraga ntyo ly’arheba Eva. Oyo malahika ye Shetani Ibilisi. Omu mango gayisha, Yehova ayish’ishereza Shetani ly’arhag’igendekera arheba bene bantu bajire ebintu bibi.