ISOMO LYA 66
Ezra Ayigirizize Abantu Irhegeko lya Mungu
Hal’ikola hagezire hofi myaka 70 kurhenga amango Abaisraheli bagalukaga e Yeruzalemu, cikone baguma na baguma muli bo bacil’ilamire omu maeneo gali lubero g’Oburhegesi bw’Abapersi. Muguma muli bo ali kuhani wakag’ihamagalwa Ezra, wakag’iyigiriza abantu Irhegeko lya Yehova. Ezra amanya oku abantu b’e Yeruzalemu barhakag’irhumikira Irhegeko lya Yehova, analonza okuja yo ly’abarhabala. Artashasta Mwami w’Abapersi amubwira ntya: ‘Mungu akuhîre obwenge ly’oyigiriza Irhegeko lyage. Ogende haguma na ngasi yeshi olonzize okugenda na nawe.’ Ezra arhimanana na ngasi muntu wal’ilonzize okugaluka e Yeruzalemu. Embere bagende bashenga Yehova ly’abalanga mw’ogo mubalamo mulî.
Bahika e Yeruzalemu enyuma za myezi ini. Abaluzi b’eyo babwira Ezra ntya: ‘Abaisraheli barharhumikiraga Yehova, banarhôzire abakazi baharamya bamungu b’obunywesi.’ Gurhi Ezra ajijire? Ezra afukama embere z’olubaga, anashenga ntya: ‘Yehova, warhujirire bintu binji bwenene, cikone rhwakujirire ecaha.’ Abantu baciyunjuza, cikone bagendekera bajira ebintu bibi. Ezra acishoga abagula n’abazuzi lyo bashibirira ako kanga. Omu myezi isharhu yakulikiraga, bakafukuza ngasi muntu orhakag’iharamya Yehova.
Hagera myaka ikumi n’ibirhi. Cikone mw’ako kasanzi, enkuta z’evile y’e Yeruzalemu zayubakwa buhyahya. Muli oko Ezra ahamagala abantu boshi haguma ly’abasomera Irhegeko lya Mungu. Erhi Ezra ayigula ecitabu, abantu boshi bayimanga. Akuza Yehova, n’abantu boshi bahira amaboko enyanya lyo bayerekana oku balunzire okuboko ebi aderhaga. Enyuma z’aho Ezra asoma anahugûla Irhegeko lya Mungu, n’abantu bayumvirhiza bwenene. Bayemera oku bali balesire Yehova, banalaka bwenene. Olusiku lwakulikiraga, Ezra agendekera abasomera Irhegeko lya Mungu. Bahugûkwa oku bali hofi bajire idinye ly’Olusiku Lukulu lw’Ebihando. Ho n’aho, barhondera bacirheganya kw’er’idinye.
Omu nsiku nda er’idinye lyajiraga, abantu bashagaluka bwenene banavuga Yehova omunkwa okubona bayezize mburho nyinji. Harhal’isag’iba idinye ly’Olusiku Lukulu lw’Ebihando liri nk’elyo kurhenga amango ga Yozwe. Enyuma z’er’idinye, abantu barhimanana banasalira ntya: ‘Yehova, warhuyokwire kurhenga omu buja, warhulisa erhi rhuli omw’irungu, wanarhuha eci cihugo cinja bwenene. Cikone, rhwakag’ikugomera kanji-kanji. Warhurhumire abalebi lyo barhurhonda, cikone rhurhayumvagya. Ciru akaba ntyo, wagendekire warhulembera. Wahikirizize eciragane wahaga Abrahamu. Rhukulaganyize oku rhwakurhumikira.’ Bayandika eco ciragane cabo, n’abaluzi, Bene-Levi, na bakuhani bacihirako esinyatire.
“Ab’omwishingo bali balya bayumva akanwa ka Nnâmahanga n’okukakulikira!”—Luka 11:28, NWT