Gabriyeli Amalambagirira Mariya

Elizabeti agwerhe omuntu w’omu mulala gwabo waciri musole wakag’ihamagalwa Mariya, wal’ilamire omu vile y’e Nazareti e Galilaya. Mariya akag’ishebwa na Yozefu, wali mubinji. Erhi Elizabeti ali izimi lya myezi ndarhu, malahika Gabriyeli abonekera Mariya. Amubwira ntya: ‘Asinge, Mariya. Yehova anakuhîre olukengwa lunene bwenene.’ Mariya arhahugûkagwa bici Gabriyeli alonzagya okumubwira. Gabriyeli amubwira ntya: ‘Waba izimi, waburha n’omwana-rhabana, oshinganine oyish’imuha izino lya Yezu. Ayish’iba Mwami. Obwami bwage bwayish’iba bw’ensiku n’amango.’

Mariya aderha ntya: ‘Cikone nciba bikira. Gurhigi nakaburhamwo omwana?’ Gabriyeli amushuza ntya: ‘Nta kantu kakayabira Yehova. Wahâbwa iroho litagatifu, na ntyo waburha omwana-rhabana. Elizabeti muntu w’omu mulala gwinyu naye akola ali izimi.’ Enyuma z’aho Mariya aderha ntya: ‘Ndi mujakazi wa Yehova. Bimbere nk’oku wanadesire.’

Mariya alambagirira Elizabeti emunda al’ilamire. Erhi Mariya amulamusa, Elizabeti ayumva omwana wali omu nda yage acidunda. Kugerera iroho litagatifu, Elizabeti aderha ntya: ‘Mariya, Yehova akugishire. Luli lukengwa lunji bwenene kuli nie okuyegereza nnina wa Nnawirhu omu mwani.’ Mariya aderha ntya: ‘Omurhima gwani goshi gukuzize Yehova.’ Mariya ayusa myezi isharhu emwa Elizabeti, n’enyuma z’aho agaluka emwabo e Nazareti.

Erhi Yozefu amanya oku Mariya ali izimi, alonza okuyusa obwîra bwabo. Cikone malahika amubonekera omu cilorho anamubwira ntya: ‘Orhayobohaga okuja omu buhya we na Mariya. Nta kantu kabi ajijire.’ Ntyo Yozefu aja omu buhya bo na Mariya anamuhêka emwage.