Yowane Ali Arheganya Enjira

Olya mwana Zakariya na Elizabeti baburhaga, wakag’ihamagalwa Yowane, aba mulebi erhi akula. Yehova akolesa Yowane ly’ayigiriza abantu oku Masiya ali hofi ayishe. Cikone ahali h’okuyigiriza omu hekalu n’omu mavile, Yowane akag’ihubiri omw’irungu. Abantu bakag’irhenga e Yeruzalemu n’omu cihugo coshi c’e Yudeya lyo bayish’iyumvirhiza Yowane. Ayigiriza abantu oku lyo bashagalusa Mungu, bashinganine baleke okujira ebintu bibi. Enyuma z’okuyumvirhiza Yowane, bantu banji baciyunjuza ebyaha byabo, na Yowane ababatiza omu Lwishi Yordani.

Yowane al’ilamire akalamo karhahûnyiri binji. Akag’iyambala emishangi ejijirwe n’oluhu lw’engamiya, anakag’ilya amahanzi n’obuci. Abantu bakag’ilonza bamanye binji lugenda Yowane. Ciru n’Abafarizeyi n’Abasadukayo b’obucibone bakag’iyish’imubona. Yowane ababwira ntya: ‘Mushinganine mushanje olugenzi lwinyu munaciyunjuze. Murharhanyagya mpu muli ba bulagirire bwenene mpu bulya kone munaderhe oku muli bana ba Abrahamu. Oko kurhali kuderha oku muli bana ba Mungu.’

Bantu banji bakaja emunda Yowane ali n’okumudosa ntya: ‘Bici rhushinganine rhujire lyo rhushagalusa Mungu?’ Yowane abwira Abayahudi ntya: ‘Erhi akaba ogwerhe mishangi ibirhi, orhôle muguma oguhe abantu bali omu bulagirire.’ K’omanyire bulya gurhi aderhaga ntyo? Al’ilonzize abanafunzi bage bamanye oku lyo bashagalusa Mungu, bal’ishinganine bazigire abantu.

Yowane abwira abavurhisa b’amakoli ntya: ‘Mube bikubagirwa murhanakag’izimba omuntu ciru n’omuguma.’ Abwira abasoda ntya: ‘Murhakag’ilya ebituliro, murhanakag’iderha obunywesi.’

Abakuhani na Bene-Levi nabo bayisha emunda Yowane ali, banamudosa ntya: ‘We ndi? Ngasi muntu alonzize amanye oba ndi.’ Yowane aderha ntya: ‘Indi izu liri omw’irungu liri lyalongoza abantu emunda Yehova ali, nk’oku Izaya analebaga.’

Abantu bal’izigire ebi Yowane akag’ibayigiriza. Bantu banji bakacidosa erhi Yowane ye wali Masiya. Cikone ababwira ntya: ‘Omuntu oli mukulu kundusha ali hofi ayishe. Ntashinganini ciru okumuhogola ebirato. Nambatize abantu kugerera amishi, cikone yehe ayish’ibabatiza kugerera iroho litagatifu.’