Yezu Amaba Masiya

Yowane akag’ihubiri ntya: ‘Omuntu mukulu bwenene kundusha ali hofi ayishe.’ Erhi Yezu agwerhe hofi myaka 30, arhenga e Galilaya aja ebwa Lwishi Yordani, aha Yowane akag’ibatigiza abantu. Yezu al’ilonzize Yowane amubatize, cikone Yowane aderha ntya: ‘Yaga ntakakubatiza. We wakambatiza.’ Yezu abwira Yowane ntya: ‘Yehova alonzize ombatize.’ Ntyo baja omu Lwishi Yordani, na Yowane ayubiza Yezu yeshi omu mishi.

Erhi Yezu arhenga omu mishi, asalira. Ho n’aho, empingu zayiguka, n’iroho lya Mungu lyamuyandagalira omu nshusho y’engûku. Enyuma z’aho Yehova aderha ntya kurhenga empingu: ‘Oli Mugala wani muzigirwa, oyu mba nyemire.’

Erhi iroho lya Yehova liyandagalira Yezu, aba Kristu erhi Masiya. Arhondera ajira omukolo Mungu amurhumaga ayish’ijira hanw’igulu.

Erhi Yezu ayus’ibatizibwa, ho n’aho aja omw’irungu anayusamwo nsiku 40. Erhi agaluka, aj’ilola Yowane. Erhi ahika aha Yowane ali, Yowane aderha ntya: ‘Oyu ye Mwana-buzi wa Mungu wakûla ecaha c’igulu.’ Omu kuderha ntyo, Yowane al’ilonzize abantu bamanye oku Yezu ye Masiya. K’omanyire ebyahikire Yezu erhi ali omw’irungu? Rhwabibona omw’isomo likulikire.