Paolo na Timoteyo

Timoteyo ali mwene wirhu musole wali omu cigamba cali e Listra. Ishe ali Mugiriki, na nnina ali Muyahudi. Nnina wa Timoteyo, wakag’ihamagalwa Ewuniki, na nakulu wakag’ihamagalwa Loisi bamuyigirizize lugenda Yehova kurhenga amango aciri murho.

Erhi Paolo alambagirira e Listra omu mubalamo gwage gwa kabirhi gw’okuhubiri, abona oku Timoteyo al’izigire bene wirhu anal’ilonzize okubarhabala. Paolo alalika Timoteyo bagende haguma omu mubalamo gwage. Bunyi-bunyi, Paolo akakomereza Timoteyo ly’ahikira aha aba muhubiri mwinja na mwigiriza mwinja w’omwanzi mwinja.

Iroho litagatifu lyakag’ilongoza Paolo na Timoteyo ngasi aha bakag’ija. Budufu buguma, Paolo abona omu cibonekerezi mulume muguma anamubwira aje e Makedoniya ly’abarhabala. Muli oko Paolo, Timoteyo, Sila, na Luka baja eyo munda lyo bahubiri n’okurhondeza ebigamba.

Balume banji na bakazi banji b’omu vile y’e Tesalonika yali e Makedoniya, baba Bakristu. Cikone Bayahudi baguma na baguma bayagalwa enyanya za Paolo n’abîra bage. Bagusha bantu banji haguma n’abo bantu baheka bene wirhu emw’abarhegesi b’evile, banaderha ntya n’izu linene: ‘Aba bantu bali bahagalika oburhegesi bw’e Roma!’ Bulya obuzine bwa Paolo na Timoteyo bwali omu mazibu, bayakira e Beroya mw’obo budufu.

Abantu b’e Beroya bagwerhe irala ly’okuyiga omwanzi mwinja, n’Abayahudi n’Abagiriki b’eyo munda baba bemezi. Cikone erhi Bayahudi baguma na baguma barhenga e Tesalonika n’okurhondeza akavulindi eyo munda, Paolo ayakira e Atene. Timoteyo na Sila babêra e Beroya lyo bazibuhya bene wirhu. Erhi hagera akasanzi, Paolo ashub’irhuma Timoteyo e Tesalonika ly’arhabala bene wirhu b’eyo munda balembere okulibuzibwa. Buzinda, Paolo arhuma Timoteyo ly’alambagirira bindi bigamba binji n’okubiha omurhima.

Paolo abwira Timoteyo ntya: ‘Abantu balonza okukolera Yehova balibuzibwa.’ Timoteyo alibuzibwe anashwekwa enyanya z’obuyemere bwage. Ashagalukire okuba n’obulyo bw’okuyerekana oku ali mwishwekerezi kuli Yehova.

Paolo abwira Abafilipi ntya: ‘Mmurhumire Timoteyo. Amuyigiriza okulambagira omu kuli ko kuderha gurhi, anamukomereza okujira omukolo gw’amahubiri.’ Paolo al’imanyire oku analangalira Timoteyo. Bayusize myaka minji bali bakola haguma banali bîra.