Okuderha Enderho z’Okuli na Zakuyemeza Abumvirhiza

Luka 1:3

OBOFOFI: Oyerekane ahantu h’okulangalirwa wakûlaga emyanzi ly’orhabala abumvirhiza bawe bahikire okurhôla emihigo minja.

OKU WAKAJIRAMWO NTYO:

• Olonze onakolese emyanzi yarhengaga ahantu h’okulangalirwa. Enderho zawe ziyimangire oku Kanwa ka Nnâmahanga, n’amango bihashikine okujira ntyo osome omu Bibliya. Erhi akaba olonzize okuganirira kantu kalebe k’esiyanse, erhi mwanzi mulebe gwaganirirwe oku radiyo, oku televiziyo, omu gazeti, erhi akantu kabwinwe erhi bindi bintu by’okunali bilunzire okuboko entanya oli waganirira, olabirize embere z’akasanzi erhi aha eyo myanzi erhenzire hali ha kulangalirwa n’erhi eyo myanzi epatine n’amahugûlo ga mwa gano mango.

• Okolese bwinja enshôko y’emyanzi yawe. Ohugûle amandiko kushimbana n’akanga ganirirwemwo, kushimbana n’omwanzi mukulu gw’Ebibliya, na kushimbana n’ebicapo bya “mushizi mwirhonzi na mwikubagirwa.” (Mt. 24:45, NWT) Erhi akaba wakolesa bicapo bilebe birhayimangiri oku Bibliya, ojire ntyo buzira kushanja amahugûlo g’okunali ga byo, na buzira kuderha kantu kalebe kali lubero n’ebi owayandikaga al’ilonzize okuhugûla.

• Orhanye haguma n’abumvirhiza bawe k’ogo mwanzi. Enyuma z’okusoma olwandiko erhi kuganirira nshôko ndebe y’omwanzi, odose amadoso n’obulenga erhi ohâne olwiganyo luhugwîre ogo mwanzi ly’orhabala abumvirhiza bawe bacirhôlere bone omuhigo.