ISOMO LYA 1
Gurhi Ebibliya Yakakurhabala?
Rhweshi rhunacidose amadoso gayerekire akalamo, amalibuko, olufû erhi amango gayisha. Na kandi rhunacidose binji okubiyerekire amazibu ga ngasi lusiku, kwa lwiganyo; gurhi rhwakahikiriza amalagirire gw’omulala gwirhu na gurhi rhwakajira lyo guba n’omwishingo. Bantu banji bacibwinire oku Ebibliya enashuze oku madoso gabo na kandi enabahe amahano minja gayerekire akalamo ka ngasi lusiku. Ka nawe onabone oku Ebibliya yanarhabala ngasi muntu?
1. Madoso maguma na maguma gahi Ebibliya eshuzizeko?
Ebibliya eshuzize kw’aga madoso g’obulagirire: Gurhi akalamo karhangiraga? Omuhigo gw’akalamo guba guhi? Bulya gurhi abantu barhagwerhi magosa balibuka? Gurhi biba erhi omuntu afâ? Erhi akaba ngasi muntu aba alonzize omurhula, bulya gurhi hali mavita manji ene? Gurhi igulu lyayishiyorha omu mango gayisha? Kuli kwinja okucidosa amadoso gali nk’ago, emiliyoni y’abantu yabwine oku amashuzo Ebibliya erhuhire gali gw’okunali.
2. Gurhi Ebibliya yakarhurhabala rhushagalukire akalamo kirhu ka ngasi lusiku?
Ebibliya enarhuhe amahano minja bwenene. Kwa lwiganyo, enayigirize emilala gurhi yakabamwo n’obushagaluke. Enahâne amahano gayerekine oku rhwakalwisa amazibu g’akalamo na gurhi rhwakashagalukira akazi kirhu. Omu bukurasa bukulikire wabona ebi Ebibliya eyigirizize okubiyerekire eyo myanzi n’eyindi rhwayishiganirira haguma. Wayishicibonera wene oku kobinali “Amandiko goshi [kw’okuderha ngasi kantu kaba omu Bibliya] . . . ganakwanana.”—2 Timoteyo 3:16.
Eyi broshuwa erharhoziri enafasi y’Ebibliya. Lubero n’oko ekuhîre omurhima ocibonere ebiba omu Bibliya wenene. Co cirhumire rhukuhûnyire osome amandiko gali omu n’okugashushanya n’ebi oli wayiga.
HUMBIRIRA LY’OHUGÛKWA
Olole gurhi Ebibliya yarhabire bantu banji, na gurhi wakajira ly’oshagalukira okukayisoma, na bulya gurhi kuba kwinja okuba n’owakakurhabala ly’oyihugûkwa.
3. Ebibliya yanarhulongoza
Ebibliya kw’eba nk’itoroshi liri lyamoleka bwenene. Rhwanakolesa Ebibliya ly’erhurhabala rhurhôle emihigo minja na kandi yanarhurhabala rhumanye ebyaba omu mango gayisha.
Osome Ennanga 119:105, na buzinda oganirire aga madoso:
Gurhi omwandisi w’olu lulanga akagibona Ebibliya?
Gurhi nawe obona Ebibliya?
4. Ebibliya yanashuza oku madoso girhu
Mukazi muguma abona oku Ebibliya yashuzize oku madoso akagicidosa kasanzi ka myaka minji. Olole EVIDEO, na buzinda oganirire amadoso gakulikire.
Madoso ga gurhi oyu mukazi oganirirwe mw’eyi video akagicidosa?
Gurhi okuyiga Ebibliya kwamurhabire?
Ebibliya erhuhire omurhima rhukadosa amadoso. Osome Mateyo 7:7, na buzinda oganirire ebi bikulikire:
Madoso gahi nawe ojira Ebibliya yakahashikushuzako?
5. Wanashagalukira okusoma Ebibliya
Bantu banji banashagalukire okusoma Ebibliya, n’oko kwabahire bunguke bunji. Olole EVIDEO, na buzinda oganirire amadoso gakulikire.
Bici emisole eganirirwe mw’eyi video yakagirhanya lugenda okusoma?
Cikone, bici edesire lugenda okusoma Ebibliya?
Ebibliya edesire oku enyigirizo zirimwo zanarhuha oburhulirize n’obulangalire. Osome Abaroma 15:4, na buzinda oganirire er’idoso:
K’oshagalukire okuyumva oku Ebibliya yanakuha oburhulirize n’obulangalire?
6. Abandi bantu banarhurhabala okuhugûkwa Ebibliya
Bantu banji banasome Ebibliya bone, cikone babwine oku okuyiganirira haguma n’abandi kunarhabale bwenene. Osome Ebijiro by’Entumwa 8:26-31, na buzinda oganirire er’idoso:
Gurhi rhwakajira lyo rhuhugûkwa Ebibliya?—Olole omulongo gwa 30 na 31.
Olya Muetiyopiya alilagirire oku burhabale ly’ahugûkwa Amandiko. Bantu banji babwine oku okuganirira Ebibliya haguma n’abandi kunarhabale
BANTU BANJI BANAKADERHA NTYA: “Okuyiga Ebibliya kuba kuheza akasanzi busha.”
Gurhi wakababwira? Bulya gurhi wakaderha ntyo?
KWA BOFOFI
Ebibliya ebamw’amahano minja lugenda akalamo kirhu ka ngasi lusiku, enashuze oku madoso gw’obulagirire enanarhuhe oburhulirize n’obulangalire.
Okucikengeza
Mahano ga gurhi rhwakabona omu Bibliya?
Madoso gahi na gahi Ebibliya eshuzizeko?
Bici wakasima oyige biri omu Bibliya?
OCIYIGIRIZE KWA BULÎRI
Amahano g’Ebibliya gaciri gabulagirire kuhika ene.
“Mafundisho ya Biblia Ni Yenye Hekima Sikuzote” (Ilabiro ly’Akalalizi No. 1 2018)
Olole gurhi Ebibliya yarhabire mulume muguma wakagiciyumva kubi kurhenga ali mwana.
Olole amahano minja Ebibliya ehîre emilala.
“Siri 12 ili Kuwa na Familia Yenye Furaha” (Amuka! No. 2 2018)
Oyige Ebibliya ly’obona oku ehânyire ishuzo ly’entanya mbi abantu bajira lugenda oli warhegeka igulu.