Obe wa Lukogo

Ebi Yezu Ajijire

VIDEO: EVIDEO: Yezu Afumya Omuhurha

1. Olole EVIDEO, erhi osome Yowane 9:1-7. Enyuma z’aho, orhanye kw’aga madoso gakulikire:

1. Kantu kahi Yezu ajijire embere, ka kufumya oyo mulume wali muhurha erhi kumuganirira omwanzi mwinja?—Olole Yowane 9:35-38.

2. Bulya gurhi enjira Yezu akolesize yanaba yashumize oyo mulume ayumvirhize omwanzi mwinja?

Bici Olwiganyo lwa Yezu Lurhuyigirizize?

2. Omuntu anaba mubidu okuyumvirhiza omwanzi gwirhu erhi akaciyumva oku kobinali rhumushibirire.

Oyige Olwiganyo lwa Yezu

3. Ocihire oku nafasi y’omuntu. Ocihangane okurhanya gurhi ali aciyumva.

1. Ocidose ntya: ‘Bici byakaba biri byamubabaza? Kantu kahi kakamurhabala erhi kumushagalusa?’ Okujira ntyo kwanarhuma wayerekana olukogo omu njira eshinganine erhanalimwo bulyalya.

2. Oyerekane oku oshibirire ebintu biri bya bulagiririre oku muntu omu kumuyumvirhiza. Erhi akakubwira oku ali aciyumva lugenda kantu kalebe erhi kukubwira amazibu ali alwisa, orhashanjaga omwanzi.

4. Oderhe omu njira y’olukogo na ya bukenge. Erhi wakayumviza omuntu obwonjo n’okulonza kobinali okumurhabala, oko kwanabonekana kugerera enderho zawe. Ocishoge bwinja enderho n’izu waziderhamwo, onayake okuderha ebyakarhuma owundi aciyumva kubi.

5. Obe wa kurhabala. Olonze obulyo bwinja bw’okurhabala owundi omu njira z’okunali. Erhi rhwakayereka omuntu olukogo, oko kwanarhuma aba mubidu okuganira haguma na nirhu.