Orhalekaga Akantu Koshi-Koshi Kakunanûle Kuli Yehova

1. Gurhi rhumanyiremwo oku Yehova alonzize okurhuyegera?

YEHOVA arhuhûnyire rhumuyegere. (Yk. 4:8) Alonzize abe Nnâmahanga wirhu, Larha wirhu, na Mwîra wirhu. Anashuze oku masala girhu ananarhurhabale omu mango g’amazibu. Na kandi, anakolese ikubuliro lyage ly’arhuyigiriza n’okurhulanga. Cikone, bici rhugwasirwe rhujire lyo rhuyegera Yehova?

2. Gurhi rhwakayegeramwo Yehova?

² Rhwanayegera Yehova omu kukasalira n’okukasoma Akanwa kage n’okukarhanyako bwenene. Erhi rhwakajira ntyo, rhwanamuzigira bwenene n’okukamuvuga omunkwa. Oko kunarhushumye rhumuyereke obukenge n’okumuha obukuze ashinganine. (Maf. 4:11) Oku rhwagendekera okumanya Yehova, ko rhwanagendekera okumulangalira n’okulangalira ikubuliro akolesa ly’arhurhabala.

3. Gurhi Ibilisi ajira ly’arhunanûla kuli Yehova, cikone bici byarhurhabala lyo rhurhalekaga Nnâmahanga wirhu n’ikubuliro lyage ciru n’olusiku luguma? (Ennanga 31:13, 14)

³ Cikone, Ibilisi anajire okwage koshi ly’arhunanûla kuli Yehova, bwenene amango rhuli rhwalwisa amazibu omu kalamo. Gurhi ajiramwo ntyo? Anajire okwage koshi lyo rhuleka bunyi-bunyi okulangalira Yehova n’ikubuliro lyage. Cikone, rhwanahima emirhego yage. Erhi rhwakaba rhugwerhe obuyemere busêzire n’obulangalire buzibu muli Yehova, rhurhakaleka Nnâmahanga wirhu n’ikuliro lyage.​—Osome Ennanga 31:13, 14.

4. Bici rhwaganirira mw’eci cigabi?

⁴ Mw’eci cigabi, rhwaganirira mazibu asharhu gakarhuhikira kurhenga embuga z’ecigamba; ngasi maguma mw’ago mazibu ganarhuma rhwaleka okulangalira Yehova n’ikubuliro lyage. Gurhi ago mazibu gakarhunanûlamwo kuli Yehova? Na gurhi rhwakajira lyo rhuhima eyo mirhego ya Shetani?

ERHI AMAZIBU GARHUHIKIRA OMU KALAMO

5. Gurhi amazibu gakarhuma rhwaleka okulangalira Yehova n’ikubuliro lyage?

⁵ Hali amango amazibu garhuhikira omu kalamo, kwa lwiganyo okuhagalikwa n’abantu b’omu mulala erhi okuheza akazi kirhu. Gurhi amazibu gali nk’ago gakarhuma rhwaleka okulangalira ikubuliro lya Yehova n’okurhunanûla kuli ye? Erhi rhwakalembera amazibu kasanzi kanji, rhwanaheza obulangalire n’okuvunika omurhima. Shetani anakolese obulyo bwa ntyo ly’arhujira rhube n’akarhinda lugenda obuzigire bwa Yehova kuli rhwe. Ibilisi analonze rhurhanye oku Yehova ye rhudwirhire amazibu erhi ikubuliro lyage. Akanga kantyo kahikire Baisraheli baguma na baguma omu cihugo c’e Misri. Oku murhondero, bal’iyemire oku Yehova ahizireho Musa na Haruni lyo babacungula omu buja. (Lub. 4:29-31) Cikone buzinda erhi Faraoni ajira akalamo kabo kabe kazibu bwenene, barhanya mpu Musa na Haruni bo babadwirhire ago mazibu gabahikiraga. Bababwira ntya: “Faraoni na bambali bage barhacikalonza barhulolekwo erhi mwe murhuma; yabirage ngôrho mwabafumbisire mpu barhunige.” (Lub. 5:19-21) Banywerhera abo bakozi bishwekerezi ba Nnâmahanga. Bajijire kubi bwenene! Erhi akaba hamagera kasanzi kanji oli walembera amazibu, gurhi wakajira ly’ogendekera waba n’obulangalire busêzire muli Yehova n’ikubuliro lyage?

6. Bici olwiganyo lw’omulebi Habakuki lurhuyigirizize lugenda oku rhwakalwisamwo amazibu girhu? (Habakuki 3:17-19)

⁶ Oyigulire Yehova omurhima gwawe kugerera isala n’okumuhûna oburhabale. Omulebi Habakuki ahikirwe na mazibu manji. Mango maguma, abonekine oku arhal’iyemire n’obwalagale oku Yehova anamushibirire. Na ntyo abwira Yehova omw’isala oku akag’iciyumva. Aderha ntya: ‘Mâshi Nyakasane [Yehova, NWT], kuhika mangaci, nieki nahamagala nti oyishe ongwase orhanayumve? Carhuma walolereza obubisha?’ (Hab. 1:2, 3) Yehova ashuza er’isala lyarhengaga oku murhima ly’oyo mukozi wage mwishwekerezi. (Hab. 2:2, 3) Enyuma z’okurhanya bwenene lugenda oku Yehova ayokolaga abantu bage, Habakuki acib’iba n’omwishingo. Ayemera n’obwalagale oku Yehova akag’imushibirira n’oku akamurhabire ly’ahash’ilembera ngasi mazibu. (Osome Habakuki 3:17-19.) Bici ogo mwanzi gurhuyigirizize? Erhi akaba oli walwisa amazibu, okayegera Yehova kugerera isala n’okumubwira oku oli waciyumva. Buzinda, olangalire oburhabale bwage. Erhi wakajira ntyo, wanayemera n’obwalagale oku Yehova akuha emisi olagirireko ly’olembera. N’amango wamabona oku ali akurhabala, obuyemere bwawe muli ye bwanasêra.

7. Bici abantu b’omu mulala gwa Shirley balonzagya okumuyemeza, na bici byamurhabire ly’agendekera okuba n’obuyemere muli Yehova?

⁷ Ogendekere waba n’eprograme nyinja y’ekiroho. Rhulole gurhi okujira ntyo kwarhabire mwali wirhu Shirley w’omu Papouasie Nouvelle-Guinée amango al’igwerhe amazibu.b Omu mulala gwa Shirley bali bakenyi, hali n’amango bakag’ibula ebiryo balagirireko. Muntu muguma w’omu mulala gwabo ajira okwage koshi ly’arhuma Shirley aleka okulangalira Yehova. Oyo muntu amubwira ntya: “Onaderhe mpu iroho litagatifu lya Nnâmahanga linakurhabale, ngahigi obo burhabale buli? Muli bakenyi omu mulala gwinyu. Oli waheza akasanzi kawe omu kuja wahubiri.” Shirley adesire ntya: “Nakacidosa ntya: ‘Ka Nnâmahanga anarhushibirire erhi nanga?’ Buzira kulegama, narhondera okushenga Yehova n’okumubwira ngasi kantu kali omu bukengere bwani. Ntalekaga okukasoma Ebibliya n’ebicapo birhu, nanagendekera okuhubiri n’okuja oku ntimanano zirhu.” Enyuma za kasanzi kasungunu, oyo mwali wirhu ahugûkwa oku Yehova akag’ishibirira omulala gwabo. Omulala gwabo gurhafâga n’ishali, gwanal’igwerhe omwishingo. Shirley adesire ntya: “Nabona oku Yehova akag’ishuza amasala gani.” (1 Tm. 6:6-8) Erhi wakagendekera okuba n’eprograme nyinja y’ekiroho, orhakaleka akarhinda erhi amazibu gakunanûle kuli Yehova.

ERHI BENE WIRHU BALI BALONGOZA BAKAJIRIRWA KUBI

8. Bici byakahikira bene wirhu bali balongoza omw’ikubuliro lya Yehova?

⁸ Kugerera ebyombo by’okuhana emyanzi n’esite z’e Enternete z’okuganira na bantu banji, banalumize emyanzi y’obunywesi erhi kushobeka bene wirhu bali balongoza omw’ikubuliro lya Yehova. (Enna. 31:13) Hali bene wirhu baguma na baguma bagwasirwe banashobekwa oku bali banyankola-maligo. Abakristu b’omu myaka igana mirhanzi bahikirwe n’akanga ka ntyo erhi entumwa Paolo eshobekwa eby’obunywesi n’okushwekwa. Gurhi bajijire?

9. Gurhi Bakristu baguma na baguma bajijire amango entumwa Paolo yal’ishwesirwe?

⁹ Amango Paolo al’ishwekirwe e Roma, Bakristu baguma na baguma b’omu myaka igana mirhanzi bamulekerera. (2 Tm. 1:8, 15) Bulya gurhi? Ka bayumvize Paolo enshonyi bulya bantu banji bakag’imubona nka nyankola-maligo? (2 Tm. 2:8, 9) Erhi, ka bal’iyobohire oku nabo balibuzibwa akage? Babe bamuyumvize enshonyi erhi bal’iyobohire, orhanye gurhi Paolo aciyumvirhe enyanya z’oko. Ali amalembera mazibu manji n’okuhira obuzine bwage omu mazibu erhi bo barhuma. (Ebj. 20:18-21; 2 Kr. 1:8) Rhurhahiraga rhukaba nk’abo Bakristu balekereraga Paolo omu mango al’ilagirire oku burhabale! Bici rhushinganine rhukakengera amango bene wirhu bali balongoza bali balibuzibwa?

10. Bici rhushinganine rhukengere amango bene wirhu bali balongoza bali balibuzibwa, na bulya gurhi?

¹⁰ Okengere bulya gurhi rhulibuzibwa na bandi barhulibuza. Olwandiko lwa 2 Timoteyo 3:12 ludesire: “Ngasi boshi balonza okulama bwinja omu bukombêdu [bwishwekerezi kuli Nnâmahanga, NWT] muli Kristu Yezu, babone amalibuko.” Co cirhumire rhurhakasomerwa okubona Shetani anahire ecirhero kuli bene wirhu bali balongoza omw’ikubuliro. Aba alonzize ebyo birhero bivune obwishwekerezi bwabo n’okurhuyobohya.​—1 Pt. 5:8.

11. Bici olwiganyo lwa Onesiforo lurhuyigirizize? (2 Timoteyo 1:16-18)

¹¹ Ogendekere okulunga bene wirhu okuboko onabêre mwishwekerezi kuli bo. (Osome 2 Timoteyo 1:16-18.) Mukristu muguma w’omu myaka igana mirhanzi wakag’ihamagalwa Onesiforo yehe arhajiraga nk’oku abandi bajiraga amango Paolo al’ishwesirwe. ‘Arhabonaga nshonyi erhi nkoba [za Paolo] zirhuma.’ Cikone, Onesiforo aj’ilonza Paolo, n’erhi amubona, alonza gurhi akamurhabalamwo. Omu kujira ntyo, Onesiforo ahira akalamo kage omu mazibu. Bici oko kurhuyigirizize? Rhurhagwasirwi rhuleke okuyoboha bene bantu kurhume rhurhalunga bene wirhu bali balibuzibwa okuboko. Lubero n’oko, rhukabahalira n’okubarhabala. (Mig. 17:17) Balagirire oku buzigire n’oburhabale bwirhu.

12. Bici olwiganyo lwa bene wirhu na bali birhu b’e Russie lurhuyigirizize?

¹² Orhanye gurhi bene wirhu na bali birhu b’omu Russie barhabire ababo bemezi bali omu prizo. Erhi baguma na baguma mulibo basambisibwa, bene wirhu na bali birhu banji banayishe oku kagombe lyo babalunga okuboko. Bici oko kurhuyigirizize? Erhi bene wirhu bali balongoza bakashobekwa eby’obunywesi, bashwekwe, erhi kulibuzibwa, orhayobohaga. Okabaheba omu masala gawe, okashibirira abantu b’omu milala yabo, n’okulonza ezindi njira wakabalungamwo okuboko.​—Ebj. 12:5; 2 Kr. 1:10, 11.

ERHI RHWAKASHEKERWA

13. Gurhi okushekerwa kwakarhuma rhurhacilangalira Yehova n’ikubuliro lyage?

¹³ Abantu b’omu mulala gwirhu barhali Bahamirizi ba Yehova, abirhu banyakazi, erhi abirhu banafunzi banarhushekera enyanya z’omukolo gwirhu gw’okuhubiri erhi bulya rhunalame kushimbana n’amakanuni ga Yehova galengerire g’olugenzi lwinja. (1 Pt. 4:4) Banarhubwira ntya: “Mba nkuzigire bulya ntasag’icilemera owani muntu, cikone idîni lyawe lijira amarhegeko madarhi, murhanaba alamode.” Abandi banarhushekera enyanya z’oku rhujirira abatenzirwe n’ecigamba. Banaderha ntya: “Gurhigi mwakaderhamwo oku mujira obuzigire?” Enderho zantyo zanarhuma rhwaba n’akarhinda omu bukengere bwirhu. Rhwanarhangira okurhanya ntya: ‘Nkaba Yehova aba arhuhûnyîre binji wani! N’ikubuliro lyage nkaba lirharhulekera luhuma!’ Erhi akaba oli omu kanga kali nk’ako, gurhi wakajira ly’obêra mwishwekerezi kuli Yehova n’ikubuliro lyage?

14. Gurhi rhushinganine rhujire erhi abantu bakarhushekera bulya rhunalame kushimbana n’amakanuni ga Yehova? (Ennanga 119:50-52)

¹⁴ Ohige okulunga amakanuni ga Yehova okuboko. Ayubu ali muntu walunzire amakanuni ga Yehova okuboko ciru akaba akag’ishekerwa enyanya z’okujira ntyo. Ciru muguma w’omu bîra bage b’obunywesi ajira okwage koshi ly’amuyemeza oku ciru akarhumikira ago makanuni erhi nanga, ntaco oko kubwizire Nnâmahanga. (Ayu. 4:17, 18; 22:3) Cikone Ayubu alahira okuyemera obo bunywesi. Al’imanyire oku amakanuni ga Yehova lugenda aminja n’amabi gaba gashinganine, anal’ihizire okugalunga okuboko. Arhalekaga abandi barhume aheza obwishwekerezi bwage. (Ayu. 27:5, 6) Bici oko kurhuyigirizize? Orhalekaga okushekerwa kurhume waba n’akarhinda lugenda amakanuni ga Yehova. Orhanye oku bintu byakuhikire omu kalamo kawe. K’orhasag’icibonera kanji-kanji oku amakanuni ga Yehova gaba gashinganine n’oku ganakulerhere obunguke? Ohige okubêra omw’ikubuliro lilunga ago makanuni okuboko. Erhi wakajira ntyo, ciru abantu bakakushekera gurhi, ntaco wakaleka cikunanûle kuli Yehova.​—Osome Ennanga 119:50-52.

15. Bici byarhumaga Brizit ashekerwa?

¹⁵ Orhanye oku byahikiraga mwali wirhu muguma w’omu Inde ohamagalwa Brizit. Abantu b’omu mulala gwage bakag’imushekera enyanya z’obuyemere bwage. Kasanzi kasungunu enyuma z’okubatizibwa kwage omu mwaka gwa 1997, iba orhali Muhamirizi wa Yehova aheza akazi kage. Na ntyo, iba ahiga oku ye, Brizit, n’abana-nyere babo bagend’ilama haguma n’ababusi bage bal’ilamire omu yindi vile. Cikone Brizit akarhimanine n’amazibu madarhi kulusha ago. Bulya iba arhacigwerhe kazi, byakahûnyire oyo mwali wirhu akakola akasanzi koshi ly’ahikiriza amalagirire g’omulala gwabo. Kandi, ecigamba cali hofi bwenene n’aha bahamiraga cali oku bilometre 350 ntya. N’eby’okugayisa, abantu b’omu mulala gw’iba bamuhagalika enyanya z’obuyemere bwage. Brizit agendekera okuhagalikwa bwenene kuhika byahûna omulala gwabo gucib’ihama. Enyuma z’aho, iba akanuka. Buzinda, mwana-nyere wage muguma afâ n’akansere erhi anagwerhe myaka 12 yone. Eby’okugayisa bwenene, ciru abantu b’omu mulala gwa Brizit bamutumuza enyanya z’ago mazibu goshi gamuhikiraga. Bakaderha oku arhacibage Muhamirizi wa Yehova, ago mahanya goshi garhakamuhikire. Ciru akaba ntyo, agendekera okulangalira Yehova n’okubêra mwishwekerezi okw’ikubuliro lyage.

16. Gurhi Brizit agishirwemwo enyanya z’okubêra mwishwekerezi kuli Yehova n’ikubuliro lyage?

¹⁶ Bulya Brizit akag’ilama kuli bwenene n’ecigamba alimwo, mwangalizi muguma w’omuzunguko amuha omurhima oku akahubiri omu eneo al’ilamiremwo n’okukalongoza yene entimanano omu mwage. Oku murhondero, akabona oku okujira ntyo kuli kuzibu bwenene. Cikone akulikira obo bulongozi ahabagwa. Akaganirira abandi omwanzi mwinja, akajira entimanano omu mwage, anacihiriraho akasanzi k’okujira enterekêro y’omulala haguma na bali bage. Bunguke buci okujira ntyo kwamudwirhire? Brizit aba n’obuhashe bw’okurhondeza n’okulongoza mafunzo manji g’Ebibliya, na baguma mulibo babatizibwa. Omu mwaka gwa 2005, aba painiya w’akasanzi koshi. Okulangalira Yehova n’okubêra mwishwekerezi okw’ikubuliro lyage kwarhuma ahembwa. Bali bage bali bakolera Yehova n’obwishwekerezi, n’ene hali bigamba bibirhi mw’eyo eneo! Brizit ayemire n’obwalagale oku Yehova amuhîre emisi y’okulwisa amazibu gage n’okulembera okushekerwa n’abantu b’omu mulala gwage.

OBÊRE MWISHWEKEREZI KULI YEHOVA N’IKUBULIRO LYAGE

17. Bici rhushinganine rhuhige okujira?

¹⁷ Shetani alonzize rhuyemere oku Yehova anarhulikirire omu mango g’amazibu n’oku okulunga ikubuliro lya Yehova okuboko kunarhume akalamo kirhu kaba kazibu bwenene. Shetani analonze rhuyobohe erhi bene wirhu bali balongoza bakashobekwa eby’obunywesi, erhi bakalibuzibwa, erhi kukwebwa omu prizo. N’erhi abantu barhushekera, analonze rhuleke okulangalira amakanuni ga Yehova n’ikubuliro lyage. Cikone, rhuba rhumanyire bwinja emirhego yage rhurhakanayemera arhurhebe. (2 Kr. 2:11) Ohige okuhagalika obunywesi bwa Shetani n’okubêra mwishwekerezi kuli Yehova n’ikubuliro lyage. Okengere oku Yehova arhakakulikirira ciru n’olusiku luguma. (Enna. 28:7) Co cirhumire, orhalekaga akantu koshi-koshi kakunanûle kuli ye!​—Rm. 8:35-39.

18. Bici rhwaganirira omu cigabi cikulikire?

¹⁸ Mw’eci cigabi, rhwaganirire amazibu gakarhuhikira kurhenga embuga z’ecigamba. Cikone kandi, obulangalire bwirhu kuli Yehova n’ikubuliro lyage bwanarhangulwa kugerera amazibu garhenga omu cigamba. Bici byakarhurhabala lyo rhuhash’ilwisa ago mazibu? Rhwabiganirira omu cigabi cikulikire.