Olange Enkengero Zawe Amango Obwishwekerezi Bwawe Buli omu Marhangulo

1. Okulanga enkengero zirhu k’okuderha gurhi? (2 Timoteyo 4:5)

ERHI ebintu by’okurhugayisa birhuhikira omu kalamo, obwishwekerezi bwirhu kuli Yehova n’ikubuliro lyage bwanarhangulwa. Gurhi rhwakahimamwo amazibu ga ntyo? Rhushinganine rhulange enkengero zirhu n’okugendekera rhwaba masu, omu kusêra buzibu omu buyemere. (Osome 2 Timoteyo 4:5.) Rhunalange enkengero zirhu omu kugendekera rhwarhulirira, omu kurhanya bwinja, n’okujira okwirhu koshi lyo rhubona ebintu nk’oku Yehova ali abibona. Erhi rhwakajira ntyo, entanya zirhu zirhakalongozibwa n’oku rhuli rhwaciyumva.

2. Bici rhwaganirira mw’eci cigabi?

² Omu cigabi c’embere, rhwaganirire mazibu asharhu gakarhuhikira kurhenga embuga z’ecigamba. Mw’eci cigabi, rhwaganirira mazibu asharu rhwakarhimanana nago omu cigamba gakarhangula obwishwekerezi bwirhu kuli Yehova. Ago mazibu ganarhuhikira (1) amango rhuli rhwaciyumva oku rhwajirirwe kubi n’owirhu mwemezi, (2) amango rhwamahabwa obuhane, na (3) amango rhuli rhwabona oku kuli kuzibu kuli rhwe okukulikira mpindulo ndebe zijijirwe omw’ikubuliro. Gurhi rhwakalangamwo enkengero zirhu n’okubêra bishwekerezi kuli Yehova n’ikubuliro lyage amango rhuli rhwalwisa amazibu gantyo?

AMANGO RHULI RHWACIYUMVA OKU RHWAJIRIRWE KUBI N’OWIRHU MWEMEZI

3. Ntanya zihi rhwakaba nazo erhi rhwakaciyumva oku mwene wirhu erhi mwali wirhu anarhujirire kubi?

³ K’okola ociyumvirhe oku wajirirwe kubi n’owinyu Mukristu, nkaba ciru omuntu ogwerhe bukulu bulebe omu cigamba? Byanahashikana oyo mwene wirhu arhajijire ntyo n’obulonza. (Rm. 3:23; Yk. 3:2) Ciru akaba ntyo, ebijiro byage byakugayisize. Nkaba waheza iro budufu enyanya z’okurhanya kw’ebyo anakujirire. Nkaba ciru wanacidosa ntya: ‘Erhi mwene wirhu akanjirira ntya, ka kobinali eri liri ikubuliro lya Nnâmahanga?’ Ntyo ko Shetani aba alonzize rhurhanye. (2 Kr. 2:11) Entanya mbi zantyo zanarhuma rhwacinanûla kuli Yehova n’ikubuliro lyage. Omu kanga kantyo, gurhi rhwakalangamwo enkengero zirhu n’okuyaka entanya mbi erhi rhwakaciyumva oku mwene wirhu erhi mwali wirhu anarhujirire kubi?

4. Gurhi Yozefu alanziremwo enkengero zage erhi ajirirwa kubi, na bici olwiganyo lwage lwakarhuyigiriza? (Omurhondêro 50:19-21)

⁴ Orhabîkaga akarhinda omu murhima. Amango Yozefu aciri musole wa mushûko, bakulu bage bamujirira kubi. Bamushomba, ciru na baguma mulibo balonza okumuniga. (Murh. 37:4, 18-22) Buzinda, bamuguza ly’aj’iba muja. Enyanya z’oko, Yozefu ahikirwa n’amazibu madarhi gayusagya hofi myaka 13. Yozefu akacidosize erhi kobinali Yehova al’imuzigire. Kandi akarhanyize oku nkaba Yehova al’imulikirire mw’ako kasanzi al’ilagirire oku burhabale. Cikone Yozefu arhabîkaga akarhinda omu murhima. Lubero n’oko, alanga enkengero zage omu kugendekera arhulirira. Erhi aba n’obulyo bw’okucihôla kuli bakulu bage, arhajiraga ntyo, cikone abayeresa obuzigire anabababalira. (Murh. 45:4, 5) Yozefu ajijire ntyo bulya agwerhe obuhashe bw’okurhanya bwinja. Ahali h’okusegeza obwenge oku mazibu gage, abusegeza oku muhigo gwa Yehova. (Osome Omurhondêro 50:19-21.) Bici oko kurhuyigirizize? Erhi wakajirirwa kubi, orhabîkiraga Yehova akarhinda erhi kurhanya oku akulikirire. Ahali h’okujira ntyo, okarhanya bwenene lugenda gurhi ali akurhabalamwo ly’olembera er’irhangulo. Kandi, erhi abandi bakakujirira kubi, ocihangane ofunike obuzamba bwabo kugerera obuzigire.​—1 Pt. 4:8.

5. Gurhi Miqueas alanziremwo enkengero zage amango akag’iciyumva oku ajirirwe kubi?

⁵ Rhuganirire olwiganyo lwa muli gano mango lwa mugula muguma w’omu Amérique du Sud ohamagalwa Miqueas.b Akengire amango akag’iciyumva oku akag’ijirirwa kubi na bene wirhu baguma na baguma bagwerhe bukulu bulebe omu cigamba. Adesire ntya: “Ntagandi mango nalisag’iciyumva ntamire bwenene omu bwenge ntyo. Nakag’iciyumva nyobohire, ntakag’ija iro budufu, nanakarhôza emirenge bulya nakabona oku ntako nakajira.” Cikone, Miqueas agendekera okulanga enkengero zage anajira okwage koshi ly’agendekera okucihasha. Akasalira kanji-kanji, ly’ahûna Yehova iroho lyage litagatifu n’emisi y’okulembera. Kandi akalonza omu bicapo birhu emyanzi yakamurhabala. Bici oko kurhuyigirizize? Erhi wakaciyumva oku wajirirwe kubi na mwene wirhu erhi mwali wirhu mulebe, ogendekere warhulirira onajire okwawe koshi ly’ogendekera okucihasha. Orhakamanya kanga kahi oyo mwene wirhu erhi mwali wirhu alimwo karhumaga ajira erhi kuderha ntyo. Co cirhumire, oganire na Yehova kugerera isala n’okumuhûna akurhabale obone ebintu nk’oku oyo mwene wirhu erhi mwali wirhu ali abibona. Oko kwanakurhabala obone oku oyo mwene wirhu erhi mwali wirhu arhakujiriraga ntyo n’obulonza kandi kwanakurhabala omubabalire. (Mig. 19:11) Okengere oku Yehova amanyire bwinja akanga olimwo n’oku akuha emisi olagirireko ly’olembera.​—2 Nga. 16:9; Muh. 5:8.

AMANGO RHWAMAHABWA OBUHANE

6. Bulya gurhi kuli kwa bulagirire rhukabona obuhane Yehova arhuhire oku eri njira y’okurhuyeresa obuzigire bwage? (Abahabraniya 12:5, 6, 11)

⁶ Okuhabwa obuhane kwanarhuma rhwaciyumva kubi ekandalala. Cikone, erhi rhwakasegeza obwenge bwirhu k’oku rhuli rhwaciyumva kone, rhwanarhondera rhwarhanya oku obo buhane burhali bwa bushinganyanya, burhali bwa bulagirire kuli rhwe erhi oku buli bwa bukali bwenene. Oko kwanarhuma rhurhahugûkwa akantu k’obulagirire bwenene, k’okuderha oku obuhane eri njira ya Yehova y’okurhuyeresa obuzigire. (Osome Abahabraniya 12:5, 6, 11.) N’erhi rhwakagendekera rhwasegeza obwenge bwirhu kuli oko rhuli rhwaciyumva, rhwanaha Shetani obulyo bw’okukolesa ezo ntanya zirhu. Aba alonzize rhulahire obuhane, n’akantu kabi kulusha, rhuje kuli na Yehova n’ikubuliro lyage. Erhi wakahabwa obuhane, gurhi wakalangamwo enkengero zawe?

7. (a) Nk’oku biyerekinwe oku nfoto, gurhi Yehova akolesize Petro enyuma z’okuyemera obuhane ahabagwa? (b) Bici olwiganyo lwa Petro lukuyigirizize?

⁷ Oyemere obuhane, onajire empindulo zihûnyirwe. Arhali liguma lyone Yezu ahanwire Petro embere z’ezindi ntumwa. (Mk. 8:33; Lk. 22:31-34) Nkaba oko kwakarhumire Petro ayumva enshonyi bwenene! Ciru akaba ntyo, Petro abêra mwishwekerezi kuli Yezu. Ayemera obuhane ahabagwa anaciyigiriza binji kugerera amagosa gage. Enyanya z’oko, Yehova ahemba Petro erhi bwishwekerezi bwage burhuma anamuha emikolo y’obulagirire omu cigamba. (Yn. 21:15-17; Ebj. 10:24-33; 1 Pt. 1:1) Bici olwiganyo lwa Petro lwakarhuyigiriza? Rhunacilerhere obunguke n’okubulerhera abandi erhi rhuyemera obuhane n’okujira empindulo zihûnyirwe ahali h’okusegeza obwenge bwirhu oku nshonyi rhuyumva enyanya z’okuhabwa obuhane. Erhi rhujira ntyo, Yehova anarhukolese bwenene rhunanabe ba bulagirire kuli bene wirhu na bali birhu.

8-9. Enyuma z’okuhabwa obuhane, gurhi Bernardo aciyumvirhe oku murhondero, cikone bici byamurhabire ly’akubûla entanya zage?

⁸ Rhuganirire ebyahikiraga mwene wirhu Bernardo w’omu cihugo c’e Mozambique. Arhenzibwa oku mukolo gw’obugula. Gurhi Bernardo aciyumvirhe oku murhondero? Adesire ntya: “Nabîka akarhinda omu murhima bulya ntashagalukiraga obo buhane nahabagwa.” Akayoboha oku abandi omu cigamba bakamurhanyize kubi. Adesire ntya: “Byahûnyire myezi minji lyo mba n’entanya nyinja lugenda ako kanga, n’okucib’ilangalira Yehova n’ikubuliro lyage.” Bici byarhabire Bernardo ly’ashanja entanya agwerhe?

⁹ Bernardo akubûla entanya zage. Ahugwîre ntya: “Amango nali mugula, nakag’ikolesa olwandiko lw’Abahabraniya 12:7 lyo ntabala abandi babe n’entanya nyinja lugenda obuhane bwa Yehova. Lero nakacidosagya ntya: ‘Ndi oshinganine akolese olu lwandiko?’ Abakozi ba Yehova boshi, ciru na nani.” Enyuma z’aho Bernardo ajira ezindi mpindulo ly’acib’ilangalira Yehova n’ikubuliro lyage. Akasoma Ebibliya bwenene n’okugeza kasanzi kanji ali arhanya kw’ebi akag’isoma. Ciru akaba acikag’iyoboha oku bene wirhu na bali birhu bamurhanyiza kubi, akahubiri haguma nabo n’okuhana amashuzo oku ntimanano. Enyuma za kasanzi kalebe, Bernardo acib’iba mugula w’ecigamba. Aka Bernado, erhi akaba wahabirwe obuhane, orhakag’isegeza obwenge oku nshonyi oko kuli kwarhuma wayumva, oyemere ihano, onajire empindulo zihûnyirwe.c (Mig. 8:33; 22:4) Erhi wakajira ntyo, wanayemera n’obwalagale oku Yehova akuhemba bulya obêzire mwishwekerezi kuli ye n’ikubuliro lyage.

AMANGO RHULI RHWABONA OKU KULI KUZIBU KULI RHWE OKUKULIKIRA MPINDULO NDEBE ZIJIJIRWE OMW’IKUBULIRO

10. Mpindulo ehi yajiragwa idako ly’Irhegeko lya Musa yahiraga obwishwekerezi bwa Baisraheli baguma na baguma omu marhangulo?

¹⁰ Empindulo zijirwa omw’ikubuliro zanahira obwishwekerezi bwirhu omu marhangulo. Erhi akaba rhurhabiri masu, nkaba ciru rhwanaleka ezo mpindulo zirhunanûle kuli Yehova. Kwa lwiganyo, rhuganirire gurhi empindulo yajirikanaga idako ly’Irhegeko lya Musa yahiraga obwishwekerezi bwa Baisraheli baguma na baguma omu marhangulo. Embere Abaisraheli bahabwe Irhegeko lya Musa, b’ishe w’emilala bakag’ijira emikolo y’obukuhani. Bakag’iyubaka amazabahu n’okuha Yehova enterekêro enyanya z’emilala yabo. (Murh. 8:20, 21; 12:7; 26:25; 35:1, 6, 7; Ayu. 1:5) Cikone erhi Abaisraheli bahabwa Irhegeko, b’ishe w’emilala barhalicishinganine bakajira ogo mukolo. Yehova ahiraho abakuhani b’omu mulala gwa Haruni lyo bakahana enterekêro. Amango eyo mpindulo yarhonderaga okukolesibwa, erhi ishe w’omulala orhali w’omu bûko bwa Haruni akajijire omukolo gwakag’ijirwa n’abakuhani, alishinganine anigwe.d (Lev. 17:3-6, 8, 9) K’eyo mpindulo yali omu bintu byarhumaga Kora, Datani, na Abiramu n’abarhambo bw’olubaga 250 bahagalika obukulu bwa Musa na Haruni? (Mib. 16:1-3) Rhurhamanyiri bwinja. Abe ntyo ko byali erhi nanga, Kora n’abîra bage barhabêraga bishwekerezi kuli Yehova. Gurhi wakajira erhi empindulo zijijirwe omw’ikubuliro zakahira obwishwekerezi bwawe omu marhangulo?

11. Bici olwiganyo lwa Bakohati baguma na baguma b’omu mulala gwa Levi lurhuyigirizize?

¹¹ Olunge okuboko n’omurhima gwawe goshi empindulo zijijirwe omw’ikubuliro. Omu mibalamo Abakohati bajiraga omw’irungu, bakag’ihikiriza omukolo gwago-gwago. Ngasi mango erhi Abaisraheli bakahamisize ikambi, Bakohati baguma na baguma bakag’ibarhula isanduku ly’amalaganyo embere z’olugaba loshi. (Mib. 3:29, 31; 10:33; Yoz. 3:2-4) Olo lwali lukengwa lunene bwenene! Cikone, omukolo gwabo gwashanja erhi Abaisraheli barhondera balama omu Cihugo c’Amalaganyo. Isanduku lirhacijaga lyahamisibwa ngasi mango. Co carhumaga, amango Solomoni ali mwami, Bakohati baguma na baguma bahabwa omukolo gw’okuba bimbiza, abandi bali balanzi b’emihango, n’abandi bakashibirira amadepo. (1 Nga. 6:31-33; 26:1, 24) Nta mwanzi guli omu Bibliya guyerekine oku Abakohati bakag’iciduduma erhi kuhûna ogundi mukolo gulengerire bwenene mpu bulya bal’igwerhe omukolo gwago-gwago embere z’aho. Bici oko kwakarhuyigiriza? Olunge okuboko n’omurhima gwawe goshi ngasi mpindulo zijirwa omw’ikubuliro lya Yehova, ciru n’empindulo zakarhuma omukolo gwawe gwashanja. Okashagalukira ngasi mukolo ohabirwe. Okakengera oku arhali omukolo gwawe go gurhuma waba muntu wa bulagirire omu masu ga Yehova. Yehova anashagalukire bwenene okurhumikira kwawe kulusha ngasi mukolo wakaba ogwerhe.​—1 Sam. 15:22.

12. Gurhi Zaina aciyumvirhe erhi arhenzibwa oku Beteli?

¹² Rhuganirire olwiganyo lwa mwali wirhu ohamagalwa Zaina, omukolo gwage gwashanjaga erhi aheza olukengwa agwerhe. Enyuma z’okukolera oku Beteli myaka 23 na kulusha, arhumwa oku aj’ikolera omu cigamba. Adesire ntya: “Erhi omukolo gwani gushanja, navunika omurhima bwenene. Naciyumva wa busha nanakacidosa ntya, ‘Igosa lici najijire?’” Eby’okugayisa, bene wirhu na bali birhu baguma na baguma b’omu cigamba bakamuyushulira amalumwa omu kumubwira ntya: “Nka nt’igosa wajijire, barhakakurhenzize oku Beteli.” Hagezire kasanzi kalebe Zaina avunisire omurhima bwenene n’oko kwarhuma akalaka ngasi budufu. Cikone adesire ntya: “Nta lusiku nalesire oko kurhume naba n’akarhinda lugenda obuzigire bwa Yehova n’ikubuliro lyage.” Bici byarhabire Zaina ly’ahasha okulanga enkengero zage?

13. Bici Zaina ajijire ly’ahima entanya zage mbi?

¹³ Zaina ahashire okuhima entanya mbi agwerhe. Bici byamurhabire? Asoma omu bicapo birhu emyanzi eganirire ago mazibu gage. Ecigabi cidedire, “Unaweza Kukabiliana na Kivunja-Moyo!” ciri omw’Ilabiro ly’Akalalizi ly’omu lusiku 1/2/2001 (omu Ciswahiri) camurhabire bwenene. Eco cigabi ciganirire gurhi omwandisi w’Ebibliya ohamagalwa Marko nkaba naye alwisize entanya zantyo erhi omukolo gwage gushanja. Zaina akengire ntya: “Olwiganyo lwa Marko bo bufumu bwantabire okulwisa entanya z’okuvunika omurhima.” Kandi Zaina arhaciyegulaga oku bîra bage; arhanajaga aciyumviza obwonjo. Ahugûkwa oku iroho litagatifu lya Yehova linalongoze emihigo y’ikubuliro lyage n’oku bene wirhu bakagʼilongoza bal’imushibirire bwenene. Na kandi ahugûkwa oku ikubuliro lya Nnâmahanga ligwasirwe lijire ngasi kantu kashinganine ly’omukolo gwa Yehova gujirwa.

14. Mpindulo zihi zali nzibu kuli Vlado okulunga okuboko, na bici byamurhabire?

¹⁴ Mugula muguma w’omu cihugo c’e Slovénie ogwerhe myaka 73 aciyumvirhe kubi erhi ecigamba cabo cigushwa haguma n’ecindi cigamba n’Enyumpa yabo y’Entimanano yayigalwa. Adesire ntya: “Ntahugûkagwa bulya gurhi Enyumpa y’Entimanano nyinja ntyo yakayigalwa. Naciyumva kubi bulya ago mango lyo rhwaciyusagya rhwakubûla eyo Nyumpa yirhu y’Entimanano. Bulya mba mubinji, nakozire oku bintu biguma na biguma byali mw’eyo nyumpa. Kandi, okugusha ebyo bigamba byombi kwahûnyire mpindulo nyinji zirhali nembu kuli rhwe bahubiri bakola bashosi.” Bici byarhabire Vlado ly’alunga obo bulongozi okuboko? Ahugwîre ntya: “Ngasi mango okulunga okuboko empindulo zijijirwe omw’ikubuliro lya Yehova kunalerhe emigisho. Oko kunarhurheganye lyo rhuyish’ilunga okuboko empindulo zilushire ezo zayish’ijirwa omu mango gayisha.” K’oli waciyumva kubi bulya ecigamba cinyu cagushirwe haguma n’ecindi erhi bulya omukolo gwawe gwashanjire? Oyemere n’obwalagale oku Yehova ahugûsirwe oku oli waciyumva. Erhi wakalunga ezo mpindulo okuboko n’okubêra mwishwekerezi kuli Yehova n’ikubuliro ali akolesa, kobinali wagishwa.​—Enna. 18:25.

OLANGE ENKENGERO ZAWE MULI BYOSHI

15. Gurhi rhwakalangamwo enkengero zirhu erhi rhwakahikirwa n’amazibu kurhenga omu cigamba?

¹⁵ Oku rhuli rhwayegera obuzinda bw’er’igulu, ko na mazibu manji gakarhuhikira kurhenga omu cigamba. Ago mazibu ganahira obwishwekerezi bwirhu kuli Yehova omu marhangulo. Co cirhumire, rhugwasirwe rhulange enkengero zirhu. Erhi wakaciyumva oku wajirirwe kubi n’owinyu Mukristu, orhabikaga akarhinda omu murhima. Erhi wakahabwa obuhane, orhasegezagya obwenge bwawe oku nshonyi wakayumva enyanya z’obo buhane, oyemere ihano, onajire empindulo zihûnyirwe. N’erhi ikubuliro lya Yehova lyakajira empindulo zikuhumireko, oziyemere n’omurhima gwawe goshi onarhumikire obo bulongozi.

16. Gurhi wakajira ly’ogendekera walangalira Yehova n’ikubuliro lyage?

¹⁶ Wanagendekera okulangalira Yehova n’ikubuliro lyage erhi obwishwekerezi bwawe bwakaja omu marhangulo. Cikone ly’ohasha okujira ntyo, oshinganine olange enkengero zawe, k’okuderha, orhulirire, okarhanya bwinja, n’okubona ebintu nk’oku Yehova ali abibona. Ohige okuyiga lugenda abantu baganirirwe omu Bibliya bahashire okulwisa amazibu gantyo n’okurhanya oku nyiganyo zabo. Okahûna Yehova oburhabale. Orhanahiraga okaciyegûla n’ecigamba. Okajira ntyo, ciru byakaba gurhi, Shetani arhakahasha okukunanûla kuli Yehova n’ikubuliro lyage.​—Yk. 4:7.