Oyige Yehova na Yezu omu Njira Yawe y’Okurhanya

1-2. Bici okuzigira Yehova kuhiziremwo, na gurhi Yezu ayerekinemwo oku al’izigire Yehova n’obukengere bwage boshi?

“OKÂZIGIRA Nyakasane Nyamuzinda wawe n’omurhima gwawe goshi, n’omûka gwawe gwoshi [n’obuguma-guma bwawe boshi, NWT] n’emisi yawe yoshi n’obukengere bwawe boshi.” (Lk. 10:27) Yezu ayerekine n’obwalagale oku elyo ly’irhegeko ly’obulagirire bwenene omu marhegeko ga Musa. Obwine oku obuzigire bwirhu kuli Yehova buhiziremwo omurhima gwirhu, ko kuderha, enyifinjo zirhu, entanya zirhu, n’oku rhuciyumva. Kandi buhiziremwo okucishwekera kuli ye n’obuguma-guma bwirhu boshi n’emisi yirhu yoshi. Cikone, obuzigire bwirhu kuli Yehova kandi buhiziremwo obukengere bwirhu, ko kuderha, enjira yirhu y’okurhanya. Kobinali, rhurhakahasha ciru n’ehitya okuhugûkwa bwinja-bwinja enjira ya Yehova y’okurhanya yoshi. Cikone rhwanahugûkwa enjira yage y’okurhanya omu kuyiga “obugerêreze bwa Kristu,” bulya Yezu ayerekine n’obwimana enjira y’Ishe y’okurhanya.​—1 Kr. 2:16, Mashi Bible.

² Yezu al’izigire Yehova n’obugerêreze erhi bukengere bwage boshi. Al’imanyire obulonza bwa Mungu kuli ye anal’ihizire okujira kushimbana nabo, ciru akaba okujira ntyo kwakamudwirhire amalibuko. Bulya Yezu al’isegize obwenge oku kujira obulonza bw’Ishe, arhalekaga akantu koshi-koshi kamuyibagize ogo muhigo.

3. Bici entumwa Petro yayizire kugerera Yezu, na bici Petro ahîre ababo Bakristu omurhima bajire? (1 Petro 4:1)

³ Petro n’ezabo ntumwa bal’igwerhe olukengwa lw’okugeza akasanzi haguma na Yezu banaciyigiriza oku akag’irhanya. Erhi Petro ayandika amaruba gage marhanzi galongozibagwa n’iroho litagatifu, aha Abakristu omurhima bajire enkengero za Kristu ebe yo mirasano yabo.a (Osome 1 Petro 4:1.) Petro akolesize enderho z’ecisoda erhi ayandika, “zibe yo mirasano.” Co cirhumire, erhi Abakristu bayiga obugerêreze bwa Kristu, erhi enjira yage y’okurhanya, banabe bagwerhe ecikolanwa c’obuhashe c’okulwisa irala ly’okujira ecaha n’igulu lirhegesirwe na Shetani.​—2 Kr. 10:3-5; Ef. 6:12.

4. Bici rhwaganirira mw’eci cigabi?

⁴ Rhwaganirira enjira ya Yezu y’okurhanya n’okubona oku rhwakayiyigamwo. Rhwayiga kugerera olwiganyo lwage (1) gurhi rhwakayigamwo enjira ya Yehova y’okurhanya, erhurhabala rhweshi rhube na ntanya nguma, (2) gurhi rhwakabamwo birhohye, na (3) gurhi rhwakabamwo n’obwenge bwinja omu kuyegemera Yehova kugerera isala.

OYIGE ENJIRA YA YEHOVA Y’OKURHANYA

5. Gurhi Petro ayabiragwamwo okuyerekana entanya za Yehova omu kanga kaguma?

⁵ Rhuganirire kanga kaguma Petro arhayerekanagamwo enjira ya Yehova y’okurhanya. Yezu ali amabwira entumwa zage oku akajire e Yeruzalemu, akahânyirwe omu maboko g’abakulu b’amadîni, akalembire amalibuko, na buzinda anigwe. (Mt. 16:21) Nkaba Petro abwine oku kuli kuzibu kuli ye okuyemera oku Yehova akalesire Yezu, wali bulangalire bw’Israheli na Masiya walaganyizibagwa, anigwe. (Mt. 16:16) Oko kwarhuma Petro ahêka Yezu aha burhambi anamubwira ntya: “Nanga, Waliha! Okwo kurhâbe.” (Mt. 16:22) Bulya Petro arhayerekanaga entanya za Yehova mw’ako kanga, entanya zage zali lubero n’eza Yezu.

6. Gurhi Yezu ayerekinemwo oku entanya zage zal’ipatine n’eza Yehova?

⁶ Entanya za Yezu zal’ipatine bwinja n’ez’Ishe w’omu mpingu. Yezu abwira Petro ntya: “Shetani, ntengaho! odwirhe wanshumika kubi, bulya enkengero zawe zirhali nkengero z’ebya Nnâmahanga, ci za bintu by’en’igulu!” (Mt. 16:23) Petro anaba erhi agwerhe obulonza bwinja, cikone Yezu alahira ihano lyage. Oko kurhuyigirizize er’isomo: Okucîka Yezu oku mazibu burhali bulonza bwa Yehova. Mw’ako kanga, Petro aciyigiriza isomo ly’obulagirire lugenda okuba n’entanya za Mungu.

7. Gurhi Petro ayerekinemwo buzinda oku al’ilonzize okukubûla entanya zage lyo zipatana n’eza Yehova? (Olole enfoto.)

⁷ Enyuma z’aho, Petro ayerekine oku al’ilonzize okuba n’entanya ziri nk’eza Yehova. Kal’ikola kasanzi ka Yehova k’okujira Abantu b’Amashanja babe cigabi c’olubaga lwage. Mungu arhegeka Petro agend’ihubiri Korneliyo wakabire Mukristu murhangiriza kurhenga omu Bantu b’Amashanja. Abayahudi barhagwerhe lushangi lunji haguma n’Abantu b’Amashanja, co cirhumire birhasomezizi okubona oku Petro al’ilagirire oku burhabale ly’acirheganya okujira ogo mukolo. Erhi Petro ahugûkwa obulonza bwa Mungu mw’ako kanga, akubûla entanya zage. Muli ntyo, erhi Korneliyo ahûna Petro amulambagirire, Petro ‘arhajiraga kadali.’ (Ebj. 10:28, 29) Ahubiri Korneliyo n’ab’omu mwage, banabatizibwa.​—Ebj. 10:21-23, 34, 35, 44-48.

8. Gurhi rhwakayerekanamwo oku entanya zirhu zipatine n’eza Yehova? (1 Petro 3:8, Mashi Bible)

⁸ Myaka milebe enyuma z’aho, Petro aha ababo Bakristu omurhima ‘babe na ngerêrezo nguma.’ (Osome 1 Petro 3:8, Mashi Bible.) Rhwanaba na ngerêrezo nguma na bene wirhu na bali birhu erhi rhwakayiga entanya za Yehova rhumanya kugerera ifunzo ly’Ebibliya. Kwa lwiganyo, Yezu ahûnyire abanafunzi bage bahire Obwami oku nafasi ntanzi omu kalamo kabo. (Mt. 6:33) Omu kuba n’ezo ntanya, muhubiri mulebe omu cigamba cinyu anahiga okurhondera mukolo mulebe gw’akasanzi koshi. Rhugwasirwe rhube masu ly’ebi rhwamubwira birhamuvunaga omurhima erhi birhume aleka okuhikiriza omuhigo gwage. Rhushinganine rhuderhe enderho nyinja lugenda ogo mukolo n’okumulunga okuboko.

OBE MWIRHOHYE

9-10. Gurhi Yezu ayerekinemwo obwirhohye bwago-bwago?

⁹ Omu budufu bw’embere z’okunigwa kwage, Yezu ayigirizize Petro n’ezindi ntumwa isomo ly’obulagirire lugenda obwirhohye. Embere z’aho, Yezu ali amarhuma Petro na Yowane bagend’ijira amarheganyo g’ishega lizinda akashangire haguma nabo embere afê. Ago marheganyo byanahashikana oku gal’ihiziremwo okulola erhi hali ebeseni n’ebitambara ly’ebigolo bikalaba amagulu embere z’ery’ishega. Cikone ndigi wakabire mwirhohye n’okushuka abandi amagulu?

¹⁰ Buzira kurhindira, Yezu ayerekana obwirhohye bwago-bwago. Entumwa za Yezu zigwasirwe zibe zasomirwe bwenene omu kubona Yezu ajira kantu kalebe abakozi bakag’ijira. Yezu ahogola ecishuli cage, arhôla ecitambara acikobeka omu cibunu cage, ahira amishi omu beseni, anarhondera ashuka amagulu gabo. (Yn. 13:4, 5) Okushuka amagulu g’entumwa 12 zoshi, kuhiramwo na Yuda wali hofi amulenganye, kugwasirwe kube kwarhôzire kasanzi kalebe. Ciru akaba ntyo, Yezu ayukiriza ogo mukolo n’obwirhohye. Buzinda Yezu ahugûla omu njira y’obulembedu ntya: ‘Ka muyumvirhe okwo mujirîre? Kwo munderha mpu Mwigiriza na Nyakasane, n’okwo muderha kwo binali, bulya ndi ye. Obula nie Nyakasane na Mwigiriza namamushuka amagulu, ninyu mukwanine okukashukana amagulu.’​—Yn. 13:12-14.

11. Gurhi Petro ayerekinemwo oku aciyigirizize okuba mwirhohye? (1 Petro 5:5) (Olole n’enfoto.)

¹¹ Petro aciyigirizize kugerera obwirhohye bwa Yezu. Enyuma za Yezu okugaluka empingu, Petro ajira ecisomerine omu kufumya omulume wali cirema kurhenga okuburhwa kwage. (Ebj. 1:8, 9; 3:2, 6-8) Ehitu hy’abantu hyabona eco cisomerine hyanazunguluka Petro. (Ebj. 3:11) Ka Petro acikunzire kulya kuba akuliraga omw’ishanja abantu bakag’isegeza okumanyikana bwenene n’okuba n’ecikono? Nanga, bulya Petro ayerekine obwirhohye, arhalonzagya bamuhe irenge. Lubero n’oko, abwira abantu balihe Yehova na Yezu omu kuderha ntya: “Buli buhashe bw’izino lya Yezu omu kucîkubagira lyo, bwo bwahîre oyu muntu emisi, mumubwine munamumanyire.” (Ebj. 3:12-16, Mashi Bible) Enderho Petro akolesize omu maruba ayandikiraga Abakristu lugenda obulagirire bw’okuciyigiriza okuba birhohye zanarhukengeza amango Yezu akobekaga ecitambara omu cibunu cage n’okushuka amagulu g’entumwa.​—Osome 1 Petro 5:5.

12. Aka Petro, gurhi rhwakagendekera rhwaciyigiriza okuba birhohye?

¹² Rhwanakulikira olwiganyo lwa Petro omu kuciyigiriza okuba birhohye. Okengere oku obwirhohye bw’okunali buhiziremwo binji kulusha okuderha kone enderho nyinja. Oluderho Petro akolesize lwahindwirwe bwirhohye, luyerekine oku obwirhohye buhiziremwo oku rhucirhanyiza rhwene n’oku rhurhanyiza abandi. Rhunajirire abandi ebintu binja bulya rhuba rhuzigire Yehova rhunaba rhuzigire abantu, ci arhali bulya rhulonzize okuhâbwa irenge. Rhunayerekane oku rhuli birhohye kobinali erhi akaba rhunakolere Yehova n’obushagaluke n’okukolera bene wirhu, ciru akaba abandi bantu barhabwine ebi rhwajijire.​—Mt. 6:1-4.

OBE N’“OBWENGE BWINJA”

13. Ohugûle bici okuba n’“obwenge bwinja” kuhiziremwo.

¹³ Bici okuba “birhonzi [n’obwenge bwinja, NWT]” kuhiziremwo? (1 Pt. 4:7) Omukristu ogwerhe obwenge bwinja anajire okwage koshi ly’arhôla emihigo minja eyerekine entanya za Yehova. Omukristu wa ntyo aba amanyire oku nta kantu kaba ka bulagirire bwenene omu kalamo kulusha obwîra bwage haguma na Yehova. Ajira entanya z’olugero okubimuyerekire yenene, bulya ayishi oku arhaba amanyire ngasi kantu. Ananayerekane oku aba ayegemire Mungu omu kumuyegera kanji-kanji kugerera isala ly’obwirhohye.b

14. Omu kanga kalebe, gurhi Petro ayabiragwamwo okulangalira Yehova?

¹⁴ Omu budufu buzinda embere z’okufâ kwage, Yezu arhonda abanafunzi bage ntya: “Obudufu bw’ene mweshi mwasarhala erhi nie ntuma.” Petro ashuza ntya erhi anacilangalire: “Ciru boshi bankasarhala erhi we orhuma, nta mango niehe nankasarhala.” Obo budufu, Yezu abwira baguma na baguma omu banafunzi bage ntya: “Mube masu munashenge.” (Mt. 26:31, 33, 41) Petro acikulikirage ery’ihano embere, nkaba enyuma z’aho akabire n’oburhwali bw’okuyemera oku ali mwanafunzi wa Yezu. Lubero n’oko, Petro ahakana Nnawabo, anaciyunjuza bwenene enyanya z’oko.​—Mt. 26:69-75.

15. Gurhi Yezu agendekiremwo aba n’obwenge bwinja omu budufu buzinda bw’akalamo kage nka mwene muntu?

¹⁵ Yezu al’ilangalire Yehova loshi-loshi. Ciru akaba Yezu ali mwimana, akag’isalira kanji-kanji. N’oko kwamuhîre oburhwali bw’okujira ebi Yehova al’ilonzize ajire. (Mt. 26:39, 42, 44; Yn. 18:4, 5) Okulabiriza oborhere bwa Yezu bw’okusalira kugwasirwe kube kwarhabire Petro bwenene.

16. Gurhi Petro ayerekinemwo oku aciyigirizize okuba n’obwenge bwinja? (1 Petro 4:7)

¹⁶ Enyuma za kasanzi kalebe, Petro aciyigirizize okulangalira Yehova bwenene kugerera isala. Enyuma z’okufûka kwage, Yezu ayemeza Petro n’obwalagale n’ezindi ntumwa oku bakahâbirwe iroho litagatifu lyo bahasha okuhikiriza omukolo gwabo gw’okuhubiri. Cikone Yezu ababwira oku baje e Yeruzalemu balindire yo oku oko kwaba. (Lk. 24:49; Ebj. 1:4, 5) Bici Petro ajijire amango ajag’alinda? Petro n’ababo Bakristu “bakashenga buzira kuhusa.” (Ebj. 1:13, 14) Buzinda, omu maruba gage marhanzi, Petro aha ababo Bakristu omurhima babe n’obwenge bwinja banayegemere Yehova kugerera isala. (Osome 1 Petro 4:7.) Petro aciyigirizize okuyegemera Yehova anahikira okuba mutungo gw’ecigamba.​—Gl. 2:9.

17. Bici rhushinganine rhugendekere rhwajira, ciru rhwakaba rhugwerhe buhashe bulebe bw’akaburhano? (Olole n’enfoto.)

¹⁷ Lyo rhuba n’obwenge bwinja, rhugwasirwe rhukayegera Yehova kanji-kanji kugerera isala. Ciru rhwakaba rhugwerhe buhashe buhi bw’akaburhano, rhunahugûkwe oku rhulagirire oku kugendekera rhwasalira Yehova. Co cirhumire, rhunashenge Yehova obulongozi, ci bwenene amango rhugwerhe emihigo y’obulagirire y’okurhôla bulya rhumanyire oku ye manyire ebiri binja bwenene kuli rhwe.

18. Gurhi rhwakakubûlamwo enjira yirhu y’okurhanya ly’epatana bwinja n’eya Yehova?

¹⁸ Rhuvuzire omunkwa bwenene okubona Yehova arhulemire n’obuhashe bw’okuyerekana amorhere gage. (Murh. 1:26) Kobinali, rhurhakahasha okuyiga Yehova omu njira y’obwimana. (Iz. 55:9) Cikone aka Petro, rhwanakubûla enjira yirhu y’okurhanya ly’epatana n’eya Yehova. Lekagi rhujire ntyo omu kugendekera rhwayiga enjira ya Mungu y’okurhanya, omu kuba birhohye, n’omu kuba n’obwenge bwinja.