Ka Hali Amasomo Wakaciciyigiriza Kugerera Enyigirizo z’Ebibliya z’Omusingi?

1. Gurhi enyigirizo z’Ebibliya zahindwire akalamo kawe erhi orhondera wayiga okuli?

ENYIGIRIZO z’Ebibliya z’omusingi zahindwire akalamo kirhu. Kwa lwiganyo, erhi rhuyiga oku izino lya Mungu ye Yehova, rhwarhondera rhwamuyegera. (Iz. 42:8) Erhi rhuyiga oku biba erhi omuntu afâ, rhurhacigendekeraga rhwacidosa erhi abazigirwa birhu bafîre bali balibuka. (Muh. 9:10) N’erhi rhuyiga lugenda eciragane ca Mungu c’okujira igulu libe Paradizo, rhurhacigendekeraga rhwayoboha lugenda amango girhu gayisha. Rhwayemera n’obwalagale oku akalamo kirhu karhabe ka kasanzi kasungunu kone, myaka 70 erhi 80 yone, cikone kaba k’ensiku n’amango.​—Enna. 37:29; 90:10.

2. Gurhi olwandiko lwa 2 Petro 1:12, 13 luyerekinemwo oku ciru n’Abakristu bakuzire kiroho banayunguka n’enyigirizo z’Ebibliya z’omusingi?

² Rhurhagwasirwi ciru n’ehitya rhubone nk’enyigirizo z’Ebibliya z’omusingi zirhaba za bulagirire. Orhanye oku Bakristu entumwa Petro yayandikiraga amaruba gayo ga kabirhi. Bal’ikola ‘basêzire buzibu omu nyigirizo z’okuli.’ (Osome 2 Petro 1:12, 13.) Ciru akaba ntyo, barhimanine n’amazibu g’ekiroho omu cigamba, gahiziremwo abalimu b’obunywesi n’abantu barhal’iyobohire Mungu. (2 Pt. 2:1-3) Petro al’ilonzize okurhabala bene wabo na bali babo lyo bacilanga oku bunywesi abo bantu bakag’iyigiriza. Ly’ajira ntyo, abakengeza nyigirizo nguma na nguma bali bamayiga. Ezo nyigirizo zakabarhabire lyo bagendekera baba bishwekerezi kuhika oku buzinda.

3. Ohâne olwiganyo luyerekine bulya gurhi Abakristu boshi bashinganine bagendekere barhanya bwenene oku nyigirizo z’Ebibliya z’omusingi.

³ Ciru rhwakaba rhukola rhugwerhe myaka minji omu okuli, rhwanayunguka n’enyigirizo z’Ebibliya z’omusingi. Kwa lwiganyo: Omudêsi okola ogwerhe obulenga n’owacirhondera banakolesa enungo zo n’ezo lyo badeka biryo bilebe. Cikone enyuma z’akasanzi, omudêsi okola ogwerhe obulenga anaciyigiriza gurhi akakolesamwo ezo nungo zo n’ezo omu njira ziri lubero ly’adeka biryo binji bihyahya na binunu. Ko n’oko, abamakakolera Yehova myaka minji muli rhwe banaciyigiriza amasomo gali lubero kugerera amandiko g’Ebibliya go n’ago kulusha abacirhondera okuyiga Ebibliya. Bulya gurhi? Akanga kirhu erhi emikolo yirhu y’eciteokrasi byanaba byashanjire kurhenga amango rhwabatizibagwa. Erhi rhurhanya oku nyigirizo z’Ebibliya rhwayizire mîra, rhunabone enjira ziri lubero ezo nyigirizo zakakolamwo omu kanga kirhu ene. Lekagi rhulole ebi Abakristu bakuzire kiroho bakaciyigiriza kugerera nyigirizo isharhu z’Ebibliya z’omusingi.

YEHOVA YE MULEMI

4. Gurhi okuyiga oku Yehova ye Mulemi kwarhurhabiremwo?

⁴ “Nnâmahanga ye wajiraga ebintu byoshi.” (Hb. 3:4, Mashi Bible) Rhumanyire oku igulu lirhu n’obuzine bubamwo byalemagwa n’Omulemi w’obwenge bunji na wa buhashe bunji bwenene. Ye warhulemaga, co cirhumire aba arhumanyire bwinjinja. Na kandi anarhushibirire. Aba amanyire ebiri binja bwenene kuli rhwe. Okumanya ezo nyigirizo nembu, oku Yehova ye Mulemi, kwahindwire akalamo kirhu omu njira nyinji nyinja kwanarhuma rhwaba n’omuhigo omu kalamo.

5. Nyigirizo zihi zakarhurhabala okuba birhohye? (Izaya 45:9-12)

⁵ Enyigirizo z’okuli ziyerekine oku Yehova ye Mulemi, zanarhuyigiriza isomo ly’obwirhohye. Enyuma za Ayubu okucisegezako obwenge bwenene n’okubusegeza oku bandi bantu, Yehova amukengeza oku ye Mulemi ogala-byoshi. (Ayu. 38:1-4) Okukengeza Ayubu ntyo kwamurhabala abone oku enjira za Mungu ziba zilushire bwenene eza bene bantu. Kushimbana n’oko, omulebi Izaya ayandisire ntya: “K’ibumba lyankabwira omubumbi walyo, erhi: ‘Bici ebyo wajira?’”​—Osome Izaya 45:9-12.

6. Mangaci kwakaba kwa bulagirire ciru bwenene okurhanya lugenda kunganaci Omulemi wirhu aba wa bwenge na wa buhashe? (Olole n’enfoto.)

⁶ Erhi muntu mulebe akaba amakolera Yehova myaka minji, anarhondera ayegemera bwenene entanya zage yenene ahali h’okulonza obulongozi kurhenga emwa Yehova n’omu Kanwa kage. (Ayu. 37:23, 24) Muli ntyo, gurhi okurhanya bwenene lugenda Omulemi wage Yehova na lugenda kunganaci aba wa bwenge na wa buhashe bunji kwakamurhabalamwo? (Iz. 40:22; 55:8, 9) Ezo nyigirizo z’omusingi zanamurhabala agendekere aba mwirhohye n’okubona oku entanya za Yehova zo z’obulagirire bwenene kulusha ezage.

7. Bici Rahela ajijire ly’ayemera empindulo lugenda obulongozi bw’ikubuliro?

⁷ Rahela, olama e Slovénie, abwine oku okurhanya lugenda Omulemi wage kwamurhabire ayemere empindulo lugenda obulongozi bw’ikubuliro. Adesire ntya: “Hali amango kurhabaga kulembu kuli nie okuyemera emihigo yarhôzirwe n’abali balongoza. Kwa lwiganyo, ciru n’enyuma z’okulola Eraporo ya 8 y’Embaraza Eri Yalongoza (2023), naciyumva kubi oburhangiriza nabonaga mwene wirhu ogwerhe obwanwa ali ageza ehotuba. Muli ntyo, nashenga Yehova antabale nyemere eyo mpindulo.” Rahela ayemire oku bulya Yehova ye Mulemi w’empingu n’igulu, agwerhe obuhashe bwimana bw’okulongoza ikubuliro lyage omu njira eshinganine. Erhi akaba onabone oku kuli kuzibu kuli we okuyemera amahugûlo mahyahya erhi obulongozi buhyahya, wanacirhohya n’okurhanya bwenene oku bwenge bunji bw’Omulemi wirhu n’obuhashe bwage burhagwerhi lugero.​—Rm. 11:33-36.

BULYA GURHI MUNGU ALESIRE AMALIBUKO GAGENDEKERE?

8. Okuyiga bulya gurhi Mungu alesire amalibuko gagendekere, bunguke buhi kwakudwirhire?

⁸ Bulya gurhi Mungu alesire amalibuko gagendekere? Bantu baguma na baguma bayabirwe okushuza kw’ery’idoso bahikire okubêra Mungu burhe erhi okurhanya oku Mungu arhabaho! (Mig. 19:3) Lubero n’oko, wayizire oku ecaha n’okurhaba bimana rhwayimagamwo byo birhuma haba amalibuko, ci arhali Yehova. Kandi wayizire oku obulembedu bwa Yehova kuyerekera bene bantu bwarhabire emiliyoni y’abantu bahikire okumumanya n’okuyiga oku ayish’iyusa amalibuko loshi-loshi. (2 Pt. 3:9, 15) Ezo nyigirizo zakurhulirizize zanakurhabala omuyegere bwenene.

9. Omu kanga kahi na kahi nkaba rhwakarhanya lugenda ebirhumire Yehova alesire amalibuko gagendekere?

⁹ Rhuhugûsirwe oku rhushinganine rhube ba kulembera amango rhuli rhwalinda oku Yehova ayusa amalibuko. Cikone, erhi muntu mulebe rhuzigira akafâ, erhi rhwakahikirwa n’amazibu erhi omulala gwirhu guhikirwe nago, erhi kujirirwa omu njira erhali ya bushinganyanya, rhwanahikira okuba burhe bulya rhurhanyize oku Yehova arhayusizi amalibuko duba. (Hab. 1:2, 3) Omu mango ga ntyo, kuli kukolesa obwenge okurhanya lugenda ebirhumire Yehova alesire abashinganyanya balibuke.a (Enna. 34:19) Kandi rhwanarhanya oku muhigo gwage gw’okuyusa amalibuko loshi-loshi.

10. Bici byarhabire Anne okulembera olufû lwa nnina?

¹⁰ Okumanya bulya gurhi Mungu alesire amalibuko gagendekere kwanarhurhabala lyo rhulembera. Anne, olama omu cirhwa c’e Mayotte, omu Nyanja y’Ebuhindi, adesire ntya: “Olufû lwa nyâma wafâga hamagera myaka milebe lunambabaze bwenene. Cikone, ngasi mango nancikengeze oku arhali Yehova ye rhulerhera amalibuko. Agwerhe irala linji ly’okuyusa amalibuko ga ngasi lubero n’okufûla abazigirwa birhu bafîre. Okurhanya bwenene kw’ezo nyigirizo kunarhume naba n’omurhûla omu bukengere, ogo murhûla gunansomeze kanji-kanji.”

11. Gurhi okumanya ebirhumire Yehova alesire amalibuko gagendekere kwakarhurhabalamwo lyo rhugendekera rhwahubiri?

¹¹ Okumanya okuli lugenda bulya gurhi Mungu alesire amalibuko gagendekere kwanarhushumya rhugendekere rhwahubiri. Enyuma za Petro okuhugûla oku Yehova aba mulembedu bulya alonzize abantu baciyunjuze banahikire okucira, ayandika ntya: ‘Muyumvîrhage bwinja kurhi mugwasirwe muyorhe! Mugwasirwe mube n’ebijiro bimana, bijiro biyerekine oku omuntu acîshwekire kuli Nnâmahanga.’ (2 Pt. 3:11, Mashi Bible) Omukolo gwirhu gw’amahubiri guli muli ebyo ‘bijiro biyerekine oku omuntu acîshwekire kuli Nnâmahanga.’ Aka Larha wirhu, rhuba rhuzigire abantu. Rhulonzize balame omw’igulu lihyahya lishinganyanya lya Nnâmahanga. Yehova ali alembera abantu b’omu eneo yinyu lyo baba n’obulyo bw’okumuharamya. Luli lukengwa lunene okukola haguma na Nnâmahanga n’okurhabala bantu banji bwenene nk’oku byakanahashikana bayige lugenda ye embere obuzinda buyishe!​—1 Kr. 3:9.

RHULAMIRE OMU “NSIKU NZINDA”

12. Okuyiga oku rhulamire omu “nsiku nzinda,” bunguke buhi kwarhudwirhire?

¹² Ebibliya eganirire buzira magosa oku abantu bakayosire omu “nsiku nzinda.” (2 Tm. 3:1-5) Erhi rhulaba oku abantu barhuzungulusire bacigendesa, rhunabone n’obwalagale oku ebyo Ebibliya edesire biri by’okuli. Rhuli rhwabona oku amorhere n’olugenzi lw’abantu biri byagendekera byabiha bwenene, oko kuli kwarhuyemeza ciru bwenene oku Akanwa ka Mungu kaba ka kulangalirwa.​—2 Tm. 3:13-15.

13. Kushimbana n’olwiganyo lwa Yezu luli omu Luka 12:15-21, Mashi Bible, madoso gahi kuli kwinja okucidosa?

¹³ Okumanya oku rhulamire omu nsiku nzinda kandi kunarhurhabale rhusegeze obwenge oku bintu biri by’obulagirire kobinali. Rhwanayiga bulya gurhi kuli kwa bulagirire bwenene okujira ntyo kugerera olwiganyo lwa Yezu luli omu Luka 12:15-21, Mashi Bible. (Osome.) Bulya gurhi oyo mulume mugale ahamagirwe oku ali “muhwinja”? Arhali bulya oyo omulume ali mugale, cikone bulya ebi al’ihizire oku nafasi ntanzi arhali byo byal’ishinganine. Al’ibîsire “birugu binji n’obwo embere za Nnâmahanga arhali mugale ciru.” Okurhakolesa akasanzi kage n’obwenge lyali igosa linene bulya oyo mulume arhakacilamire kasanzi kanji. Mungu amubwira ntya: “Muli obu budufu bw’ene bwo wafa mwo.” Ene, bulya er’igulu libi liyegerire ebuzinda, kuli kwinja okucidosa ntya: ‘K’emihigo yani eyerekine oku ndi nasegeza obwenge oku bintu by’obulagirire bwenene? Gurhigi lugenda emihigo ntabala abana bani bacihirireho? Ka nankolese emisi yani, akasanzi kani, n’ensaranga zani burhangiriza lyo ncibîkira niene omuhako erhi lyo mbîka omuhako empingu?’

14. Nk’oku olwiganyo lwa Miki luyerekine, bulya gurhi kuli kwinja okurhanya bwenene lugenda ebiganirirwe omu Mandiko biyerekine oku rhuli omu nsiku nzinda?

¹⁴ Erhi rhurhanya bwenene oku bintu biyerekine n’obwalagale oku rhulamire omu nsiku nzinda, oko kunarhurhabale okumanya mihigo ehi rhushinganine rhurhôle. Oko ko kwahikire mwali wirhu muguma ohamagalwa Miki. Adesire ntya: “Erhi nyusa amasomo, omurhima gwani gwal’igwerhe irala ly’okusoma amasomo g’e université lugenda ensimba. Kandi nagwerhe omuhigo gw’okujira obupainiya bw’akasanzi koshi n’okukolera ahali obulagirire bunji bwenene bw’abahubiri. Abîra bakuzire kiroho bampanûla ntanye bwinjinja lugenda erhi byakahashikine okupata akasi nal’ilonzize n’okuhikiriza emihigo yani y’ekiroho. Bankengeza oku er’igulu libi lyahwa hano hofi-hofi. Oku bundi, omw’igulu lihyahya, nayish’iba n’akalamo k’ensiku zoshi ly’onyiga lugenda nsimba nyinji bwenene nk’oku nannonzize. Muli ntyo nacishoga okusoma ago masomo omu programe nyofi. Oko kwantabala okupata akasi kakag’intabala okuhikiriza amalagirire gani na ndi painiya w’akasanzi koshi na buzinda nahamira omu cihugo c’e Équateur calimwo obulagirire bunji bwenene bw’abahubiri.” Ene Miki n’iba bali omu mukolo gw’omuzunguko mw’eco cihugo.

15. Nk’oku olwiganyo lwa Yakobo luyerekine, bulya gurhi rhurhashinganini rhuleke okuhubiri abantu barhaciyemera omwanzi mwinja? (Olole n’enfoto.)

¹⁵ Bulya gurhi rhurhashinganini rhuvunike omurhima erhi abantu bankarhang’ilahira omwanzi mwinja? Abantu banahinduka. Rhurhanye oku lwiganyo lwa Yakobo, mulumuna wa Yezu. Abwine oku Yezu ali akula, ahikira okuba Masiya anayigiriza oku omuntu yeshi-yeshi arhalisag’iyigiriza. Ciru akaba ntyo, omu myaka minji, Yakobo arhakulikiraga Yezu. Enyuma z’okufûka kwa Yezu go mango Yakobo abire mwanafunzi. Kobinali ahikira aha aba mwanafunzi w’obushiru bwenene!b (Yn. 7:5; Gl. 2:9) Orhakag’ibona nka kuli kurhamira busha okuhubiri abantu b’omu mulala barhasimisibwi erhi okushub’igalukira abantu barhaciyemera omwanzi gw’Obwami. Okengere oku rhulamire omu nsiku nzinda, co cirhumire omukolo gwirhu gw’okuhubiri guli gwa bulagirire bwenene. Ebi rhuli rhwababwira ene byanabahuma oku murhima enyuma z’akasanzi, nkaba ciru enyuma z’okurhondera kw’amalibuko madarhi.c

OGENDEKERE WABA WA KUVUGA OMUNKWA OKU NYIGIRIZO Z’OMUSINGI YEHOVA ARHUKENGEZA

16. Gurhi wayungusiremwo n’enyigirizo Yehova arhukengeza? (Olole n’ecisanduku cidesire “Okolese eyo Myanzi ly’Orhabala Abandi.”)

¹⁶ Biguma na biguma omu biryo by’ekiroho rhuhâbwa binarheganyizibwe abantu barhasag’iyumva enyigirizo z’Ebibliya z’omusingi. Kwa lwiganyo, ehotuba y’abantu boshi ya ngasi mugobe, myanzi miguma na miguma na video nguma na nguma ziba oku jw.org, n’amagazeti girhu g’abantu boshi, burhangiriza binarheganyizibwe abantu barhali Bahamirizi. Ciru akaba ntyo, rhunayunguke n’ezo nyigirizo. Zinayushûle obuzigire bwirhu kuli Yehova, zinazibuhye obuyemere bwirhu omu Kanwa kage, zinanarhurhabale okuba n’amalehe minja amango rhuli rhwayigiriza abandi enyigirizo z’omusingi.​—Enna. 19:7.

17. Omu kanga kahi kali lubero rhwakarhanya oku nyigirizo z’Ebibliya z’omusingi?

¹⁷ Rhuli Bahamirizi ba Yehova, rhunashagaluke bwenene erhi rhuhâbwa amahugûlo mahyahya lugenda oku rhwal’ihugûsirwe nyigirizo ndebe z’Ebibliya. Kandi rhuba rhuvuzire omunkwa bwenene oku nyigirizo z’obulagirire z’Ebibliya rhwayigaga oburhangiriza zanarhurhabalaga rhurhondere rhwayegera Yehova. Erhi akaba hali amango rhulonza okusegeza entanya zirhu rhwenene ahali h’okurhumikira obulongozi bw’ikubuliro lya Yehova, rhwanakengera n’obwirhohye oku Omulemi wirhu ogala-byoshi na wa bwenge bunji bwenene ye oli walongoza ery’ikubuliro. Erhi akaba rhwe erhi omuzigirwa wirhu ali alwisa amazibu, rhwanaba ba kulembera n’okurhanya lugenda bulya gurhi Yehova alesire amalibuko gagendekere. Na nka rhwahiga oku rhwakolesa akasanzi kirhu n’obuhirhi bwirhu, rhunakengere oku rhulamire omu nsiku nzinda n’oku harhacisigiri kansanzi kanji embere obuzinda buhike. Lekagi enyigirizo Yehova arhukengeza zigendekere zarhuzibuhya, zarhushumya, n’okurhujira rhube ba bwenge.