‘Abalonzize Okuyishiba n’Obuzîne bw’Ensiku n’Amango’ Bayemera

1. K’abantu boshi banayemere omwanzi mwinja erhi baguyumva oburhangiriza? Ohugûle. (Ebijiro by’Entumwa 13:48, NWT; 16:14, 15)

BANTU banji omu kagana karhanzi bayemire okuli ho n’aho erhi bayumva omwanzi gw’Obwami. (Osome Ebijiro by’Entumwa 13:48, NWT; 16:14, 15.) Ene nalyo, bantu baguma na baguma banashagaluke erhi bayumva omwanzi mwinja oburhangiriza. Ciru n’abarhasimisibwi n’omwanzi gw’Obwami erhi baguyumva oburhangiriza banaguyemera agandi mango. Amango rhuli omu mukolo gwirhu gw’amahubiri, bicigi rhwakajira erhi rhwakarhimanana n’abantu “balonzize okuyishiba n’obuzîne bw’ensiku n’amango”?

2. Omu njira ehi omukolo gwirhu gw’okujira abanafunzi gushushinemwo n’omukolo gw’omuhinzi?

² Rhuganirire olwiganyo. Omukolo gwirhu gw’okujira abanafunzi gwanashushanyizibwa n’omukolo gw’omuhinzi. Malehe maguma na maguma omw’ishwa ganaba gakola gayezire n’okuyimbulwa embere z’agandi. Omuhinzi ashinganine ayimbule ago malehe ho n’aho, cikone ashinganine agendekere adomera n’okushibirira agandi malehe garhaciyera. Ko n’oko, omu mukolo gwirhu gw’amahubiri erhi rhwakarhimanana n’omuntu oli tayari okuyumvirhiza omwanzi mwinja, rhunalonze okumurhabala ho n’aho abe mwanafunzi wa Kristu. Omu kasanzi ko n’ako, rhunagendekere rhwarhabala abarhacibona obulagirire bw’omwanzi mwinja bahikire okusimisibwa. (Yn. 4:35, 36) Oburhimanya bunarhurhabale okucishoga enjira nyinja rhwakarhabalamwo abumvirhiza birhu. Lekagi rhuganirire ebi rhwakajira amango g’enganîro ntangiriza lyo rhurhabala abantu okuyemera omwanzi mwinja. Kandi rhwabona gurhi rhwakagendekera rhwabarhabala lyo bagendekera bayegera Yehova n’okuba bakozi bage.

OKU RHWAKARHABALAMWO ABANTU BASIMISIBWE N’OMWANZI MWINJA

3. Bici rhushinganine rhujire erhi rhwakarhimanana n’abantu basimisibwe omu mukolo gw’amahubiri? (1 Abakorinti 9:26)

³ Erhi rhurhimanana n’abantu basimisibwe omu mukolo gwirhu gw’amahubiri, ho n’aho rhunabarhabale bayige lugenda Yehova n’okurhondera balambagira omu njira ehêsire ebwa buzine bw’ensiku n’amango. Ciru akaba bo burhanzi rhwarhimanana nabo, rhurhashinganini rhurhindire okurhondeza ifunzo ly’Ebibliya ho n’aho n’okubalalika oku ntimanano zirhu.​—Osome 1 Abakorinti 9:26.

4. Oganirire olwiganyo lw’ebyabwinwe lw’omuntu wayemeraga okuyiga Ebibliya ho n’aho.

⁴ Orhondeze ifunzo ly’Ebibliya. Bantu baguma na baguma rhuganira nabo banayemere ifunzo ly’Ebibliya ho n’aho. Kwa lwiganyo, Lwa Kani luguma omu Canada mukazi muguma ociri musole ayegera eprezantware anarhôla ebroshire Oshagalukire Akalamo Ensiku n’Amango! Mwali wirhu wakag’ihubiri kw’eyo prezantware amuhugûlira oku abantu banayige Ebibliya buzira kulipa kugerera eyo broshire. Oyo mukazi asimisibwa anaha oyo mwali wirhu enimero yage y’etelefone. Enyuma z’aho mw’olo lusiku, oyo mukazi ayandikira oyo mwali wirhu anamudosa mangaci bakarhondire bayiga Ebibliya. Erhi oyo mwali wirhu amushuza oku akayishire oku buzinda bw’omugobe, oyo mukazi amubwira ntya: “Wanayisha irhondo. Ntabyo naba ndi najira.” Lwa Karhanu barhondera bayiga. Oyo mukazi aja oku ntimanano oburhangiriza oku buzinda bw’ogo mugobe anagendekera ajira amajambere.

5. Gurhi rhwakayerekanamwo oburhimanya amango rhwarhondeza ifunzo ly’Ebibliya? (Olole n’enfoto.)

⁵ Kobinali, rhurhakalangalira oku abantu boshi baba babidu okuyumvirhiza omwanzi gw’Ebibliya ho n’aho, ak’oyo mukazi waciri musole. Hali abantu biba bihûnyire rhugendekere rhwarhabala lyo bahikira okusimisibwa. Nkaba byanahûna rhurhondeze enshambalo omu kuganirira omwanzi gusimisize omuntu. Ciru akaba ntyo, erhi rhwakagendekera rhwaba n’entanya nyinja n’okugendekera rhwasimisibwa n’omuntu, nkaba omu kasanzi kasungunu, rhwanarhondeza ifunzo ly’Ebibliya. Bici rhwakaderha lyo rhurhondeza ifunzo ly’Ebibliya? Ery’idoso lyadosibwe bene wirhu na bali birhu balebe baba n’amalehe minja omu kurhondeza amafunzo g’Ebibliya.

6. Gurhi rhwakagendekezamwo enshambalo haguma n’omuntu osimisibwe?

⁶ Abahubiri na bapainiya badosibagwa lugenda okurhondeza amafunzo g’Ebibliya bahugwîre oku omu maeneo maguma na maguma kurhaba kwinja okukolesa enderho nka “okuyiga,” “ifunzo ly’Ebibliya,” erhi “kukuyigiriza” amango baganirira omupango gw’ifunzo. Bayerekine oku banabe n’amalehe minja omu kukolesa enderho nka “enganîro,” “enshambalo,” na “okuhikira okumanya Ebibliya.” Wanarhabala omuntu ly’ayemera okugendekeza enshambalo omu kuderha ntya: “Bisomezize okubona Ebibliya eba eshuzize oku madoso g’obulagirire omu kalamo” erhi “Ebibliya cirhaba citabu c’idîni kone; enarhurhabale omu njira z’obulagirire omu kalamo.” Wanayushûla ntya: “Birhahûna kasanzi kanji; omu miniti 10 kuhika oku miniti 15 omuntu anayiga akantu k’obulagirire.” Wanaderha ntyo buzira kukolesa enderho “eprograme” erhi “ngasi mugobe,” zakayerekana oku mwagendekera mwarhimanana.

7. Mangaci bantu baguma na baguma bamanyaga okuli oburhangiriza? (1 Abakorinti 14:23-25, Mashi Bible)

⁷ Olalike abantu basimisibwe oku ntimanano. Mangaci oshinganine obalalike? Kurhondera oku nganîro ntangiriza, wanalalika omumvirhiza wawe oku ntimanano y’oku buzinda bw’omugobe omu kumubwira ecirhwe c’ehotuba y’abantu boshi erhi ntanya ndebe zaganirirwa omw’Ifunzo ly’Ilabiro ly’Akalalizi ogo mugobe. Ecitabu Oshagalukire Akalamo Ensiku n’Amango! cirimwo omulali omw’isomo lya 10. Cikone orhashinganini olinde muhike kw’ery’isomo ly’olalika omuntu. Bibonekine oku omu mango g’entumwa Paolo, bantu baguma na baguma bamanyire okuli erhi baja oku ntimanano oburhangiriza. (Osome 1 Abakorinti 14:23-25, Mashi Bible.) Ene nalyo binabe ntyo kanji-kanji. Bantu banji bahyahya banajire amajambere erhi barhondera okuja oku ntimanano.

8. Bici rhwakabwira omuntu amango rhuli rhwamulalika oku ntimanano zirhu? (Izaya 54:13)

⁸ Amango oli walalika omuntu osimisibwe ayishe oku ntimanano, omuhugûlire gurhi entimanano zirhu zibamwo lubero n’ebi akaba akomire bijirwa omu gandi madîni. Erhi mwanafunzi muguma w’Ebibliya abona oburhangiriza gurhi Ifunzo ly’Ilabiro ly’Akalalizi lijirwa, adosa mwalimu wage ntya: “K’olongola aba amanyire izino lya ngasi muntu?” Mwali wirhu amuhugûlira oku rhunacihangane okumanya amazino g’abantu boshi b’omu cigamba, nk’oku rhunaba rhumanyire amazino g’abantu b’omu mulala gwirhu. Enyuma z’aho, oyo mwanafunzi aderha oku omu kanisa kage bantu banji barhaba bamanyine amazino. Na kandi rhwanahugûlira omuntu eyindi njira entimanano zirhu zibamwo lubero n’ez’agandi madîni. (Osome Izaya 54:13.) Rhunarhimanane lyo rhuharamya Yehova, okuyiga lugenda ye, n’okuhânana omurhima. (Hb. 2:12; 10:24, 25) Co cirhumire entimanano zirhu ziba zipanzirwe bwinja lyo zirhurhabala rhuyige, zirhanaba nkomedu kone. (1 Kr. 14:40) Aha rhujirira entimanano zirhu harhaba hantu ha kusomeza hanaba hajijirwe omu njira erhuma kwaba kulembu kuli rhwe okuyiga. Na kandi rhurhayerekana oku cama cilebe ciri cinja kulusha ecindi bulya rhurhalunga okuboko oluhande loshi-loshi omu by’epolitike; rhurhanarhimanana lyo rhujira akadali kayerekire entanya za ngasi muntu. Kwanaba kwinja okuyeresa omwanafunzi embere z’akasanzi evideo Bici Bijirwa Aha Nyumpa y’Obwami? Oko kwanamurhabala okumanya ebi ayish’ibona.

9-10. Amango rhuli rhwalalika omuntu oku ntimanano zirhu, bici rhwakamubwira ly’arhayobohaga okuyisha? (Olole n’enfoto.)

⁹ Bantu baguma na baguma banarhindire okuja oku ntimanano zirhu enyanya z’okuyoboha oku rhwabahûna barhenge omw’idîni lyabo. Oyemeze omuntu n’obwalagale oku rhunashagalukire okuyegereza ebigolo n’oku rhurhaseza abantu babe Bahamirizi erhi bashuze oku ntimanano zirhu. Rhunayegereze emilala, ciru n’emilala erimw’abana barho. Oku ntimanano zirhu, abana barhayigirizibwa kwago-kwago. Lubero n’oko, ababusi n’abana banatamale haguma n’okuyiga haguma. Oko kunarhume ababusi bamanya bandi abana babo bali haguma nabo na bici bali bayigirizibwa. (Lush. 31:12) Rhurhahûna ntûlo erhi kuja rhwageza ebigapo by’okuhiramwo oburhabale. Lubero n’oko, rhunashimbe irhegeko lya Yezu lidesire ntya: “Mwahâbirwe busha, ninyu muhâne busha.” (Mt. 10:8) Kandi wanabwira omuntu oku arhahûnyirwi okuyambala emishangi y’ibeyi ly’ayisha oku ntimanano, bulya Mungu analole emurhima ci arhalola oku omuntu ayosire emalanga.​—1 Sam. 16:7.

¹⁰ Erhi omuntu akayisha oku ntimanano, ojire oku wakanahasha koshi ly’aciyumva bwinja. Omumanyise oku bagula n’oku bandi bahubiri. Erhi akaciyumva oku abantu bali aho bali ba kujira obwîra banamushibirire, byanahashikana ayishe olundi lusiku. Amango g’entimanano erhi akaba arhagwerhi Bibliya, mwanasomera mwembi omu yawe amandiko oli wageza ehotuba adesire, n’okumuyeresa ecicapo rhuli rhwayiga ly’ashimbulira haguma na nirhu ebi rhuli rhwayiga.

EBI RHWAKAJIRA AMANGO RHWAMARHONDEZA IFUNZO LY’EBIBLIYA

11. Gurhi wakayerekanamwo oku okenzire akasanzi n’eprograme y’omumvirhiza wawe?

¹¹ Bici rhushinganine rhukengere amango rhwamarhondeza ifunzo ly’Ebibliya? Okenge akasanzi n’eprograme y’omumvirhiza wawe. Kwa lwiganyo, erhi akaba mwayumvikine oku mwarhimanana, okenge olusiku n’akasanzi mwayumvikine, ciru akaba abantu barhakenga akasanzi omu eneo yinyu. Na kandi, kwanaba kwinja enganîro ntanzi zibe nyofi. Bahubiri balebe b’obulenga badesire oku kuba kwinja okurharhôla kasanzi kanji, ciru akaba omuntu alonzize ayumve binji. Orhanaderhaga binji. Oleke omumvirhiza wawe aganirire oku ali aciyumva n’entanya zage.​—Mig. 10:19.

12. Muhigo guhi rhushinganine rhube nago kurhondera oku murhondero gw’ifunzo ly’Ebibliya?

¹² Kurhondera oku murhondero gw’ifunzo, omuhigo gwawe gushinganine gube kurhabala omumvirhiza wawe ahikire okumanya Yehova na Yezu n’okubazigira. Wanajira ntyo omu kukasegeza obwenge oku Kanwa ka Mungu ahali h’okucisegezako obwenge erhi kubusegeza oku bumanye bwawe. (Ebj. 10:25, 26) Omu nyigirizo zage, kanji-kanji entumwa Paolo yakag’isegeza obwenge bw’abumvirhiza bage kuli Yezu Kristu, Yehova arhumaga ly’arhurhabala okumumanya n’okumuzigira. (1 Kr. 2:1, 2) Omu kujira ntyo, kandi entumwa Paolo yayerekine n’obwalagale oku kuli kwa bulagirire okurhabala abanafunzi bahyahya babe n’amorhere minja, ago morhere Paolo agashushanyize n’enoro, amarhale, n’amabuye g’engulo ndarhi. (1 Kr. 3:11-15) Ago morhere g’obulagirire gahiziremwo obuyemere, obwenge, oburhimanya, n’okurhinya Yehova. (Enna. 19:9, 10; Mig. 3:13-15; 1 Pt. 1:7) Oyige enjira ya Paolo y’okuyigiriza omu kurhabala abanafunzi bawe babe n’obuyemere busezire n’obwîra bwa hofi-hofi haguma n’Ishe w’obuzigire w’omu mpingu.​—2 Kr. 1:24.

13. Gurhi rhwakayerekanamwo obulembedu n’olugero amango rhuli rhwarhabala abantu basimisibwe? (2 Abakorinti 10:4, 5, Mashi Bible) (Olole n’enfoto.)

¹³ Oyige enjira ya Yezu y’okuyigiriza omu kuba wa bulembedu na wa lugero. Oyake okudosa amadoso gakarhuma omuntu aciyumva kubi. Erhi akaba hali akantu omwanafunzi arhahugûsirwi bwinja, mwanagendekera oku mwayish’ikaganirira agandi mango. Ahali h’okuseza omwanafunzi ayemere enyigirizo arhaciba tayari okuyemera, omuhe akasanzi ly’azirhanyako n’okushanja entanya zage. (Yn. 16:12; Kl. 2:6, 7) Ebibliya eba eshushanyize enyigirizo z’obunywesi rhulonzize omuntu aleke n’evile ezungulusirwe n’enkuta nzibu. (Osome 2 Abakorinti 10:4, 5, Mashi Bible.) Ahali h’okuhongola evile y’enkuta nzibu y’omwanafunzi wawe, ko kuderha, enyigirizo akola agwerhe myaka minji ayemire, wanarhang’imurhabala ajire Yehova abe Lwakiro lwage.​—Enna. 91:9.

OKU RHWAKARHABALAMWO ABAHYAHYA BAYISHIRE OKU NTIMANANO

14. Gurhi rhushinganine rhujirire abahyahya bayishire oku ntimanano zirhu?

¹⁴ Yehova arhuhûnyire rhujirire abahyahya buzira kabôlo, buzira kulaba enkomedu zabo, buzira kulaba erhi bali bagale erhi bakenyi, erhi obûko bwabo. (Yk. 2:1-4, 9) Muli ntyo, gurhigi rhwakayeresamwo abahyahya bayishire oku ntimanano zirhu obuzigire?

15-16. Gurhi rhwakarhabalamwo abahyahya bali oku ntimanano zirhu lyo baciyumva bwinja?

¹⁵ Bantu baguma na baguma banayishe oku ntimanano zirhu bulya balonzize kone babone oku zijirwa erhi nkaba bulya hali owundi muntu olama omu yindi eneo wabahîre omurhima bazijeko. Co cirhumire rhurhashinganini rhurhindire okuyegera abantu bahyahya bayishire oku ntimanano. Orhashagalukaga okurhalusire olugero amango oli wabayegereza lyo barhaciyumvagya kubi. Obahûne batamale haguma na nawe. Musomere haguma nabo omu Bibliya yawe erhi omu cicapo c’ifunzo erhi obahe ayabo Bibliya n’ecabo cicapo. Na kandi oshibirire oku bali baciyumva. Mulume muguma wayishaga aha Nyumpa y’Obwami abwira mwene wirhu wamuyegerezagya oku ali aciyumva kubi bulya arhayambirhi bwinja nk’oku abandi bayambirhe. Oyo mwene wirhu ajira aciyumve bwinja anamuhugûlira oku Abahamirizi ba Yehova ko banaba ak’abandi bantu. Oyo mulume, wajiraga amajambere kuhika abatizibwa, arhakayibagira ciru n’ehitya oku oyo mwene wirhu arhumaga aciyumva. Cikone obe masu: Amango oli waganiza abahyahya embere n’enyuma z’entimanano, oyerekane oku osimisibwe nabo cikone orhacihiraga omu bintu biyerekire akalamo kabo bonene.​—1 Pt. 4:15.

¹⁶ Kandi rhwanajira abahyahya baciyumve bwinja omu kuba ba bukenge omu nshambalo zirhu, omu mashuzo girhu, n’omu bigabi by’entimanano biganirire abarhali Bahamirizi erhi obwemere bwabo. Oyake enderho zakabasarhaza erhi ezi bakayumva nka cijaci. (Tt. 2:8; 3:2) Kwa lwiganyo, orhashinganini ogayaguze ciru n’ehitya ebi abantu barhagwerhi buyemere buguma na nirhu baba bayemire. (2 Kr. 6:3) Lugenda oko, bene wirhu bageza ehotuba z’abantu boshi bashinganine babe masu ciru bwenene. Kandi banayerekana oku bali barhanya oku bantu barhali Bahamirizi bali omu bumvirhiza omu kuhugûla enderho zakaba nzibu kuli bo okuhugûkwa.

17. Omu mukolo gwirhu gw’amahubiri, omuhigo gwirhu guba guhi amango rhwamarhimanana n’abantu “balonzize okuyishiba n’obuzîne bw’ensiku n’amango”?

¹⁷ Ngasi lusiku luja oku nkuba, omukolo gwirhu gw’okujira abanafunzi gunagendekere gwaba gwa kujira buzira kulegama, rhunagendekire rhwarhimanana n’abantu “balonzize okuyishiba n’obuzîne bw’ensiku n’amango.” (Ebj. 13:48, NWT) Amango rhurhimanine nabo, rhurhashinganini rhurhindire okurhondeza ifunzo ly’Ebibliya erhi okubalalika oku ntimanano zirhu. Omu kujira ntyo, rhunabarhabale barhondere okulambagira omu ‘njira ehêka ebwa buzine.’​—Mt. 7:14.