Ndonzize Okufâ—K’Ebibliya Yanantabala Amango Ngwerhe Entanya z’Okulonza Okuciniga?
Ishuzo ly’Ebibliya
Neci! Ebibliya eba erhenzire emwa “Nyamuzinda orhuliriza abazamba.” (2 Abakorinti 7:6) Ciru akaba Ebibliya cirhaba citabu cakubuka abantu bagwerhe amazibu g’obukengere, yarhabire bantu banji bahashe okulwisa entanya z’okulonza okuciniga. Amahano gabamo ganakurhabala nawe.
Mandiko gahi g’Ebibliya gakakurhabala ohime entanya z’okulonza okuciniga?
Gurhi wakajira erhi omwîra wawe akaderha erhi, “Ndonzize nfê”?
Gurhi byakaba erhi akaba nal’ilonzize okuciniga omu mango gageraga?
Mahano gahi minja Ebibliya ehânyire?
● Okabwira abandi oku oliwaciyumva.
Ebi Ebibliya edesire: “Mwîra wa muntu abâ amuzigîre ngasi mango, kw’anabâ nka mwene wabo omuntu omu mbaka.”—Emigani 17:17.
Ebi oko kuhugwîre: Amango rhugwerhe entanya z’okurhuvuna omurhima, rhuba rhulagirire oku burhabale bw’abandi.
Erhi wakabula bubwira abandi gurhi oli waciyumva, entanya zawe mbi zanakuzidohera. Cikone erhi wakabwira abandi oku oli waciyumva, wanarhondera waciyumva bwinja hitya, n’okuba n’entanya zishinganine lugenda akanga kawe.
Opime Okujira ntya: Oganire na muntu mulebe ene, anaba muntu w’omu mulala erhi mwîra wawe oba olangalire.a Na kandi wanaganira omukuyandika oku oli waciyumva.
● Olonze oburhabale bw’abalenga.
Ebi Ebibliya edesire: Munganga “arhali wa bagumaguma, ci wa balwala.”—Mateyo 9:12.
Ebi oko kuhugwîre: Amango rhulwazire rhushinganine rhulonze oburhabale bwa munganga.
Entanya z’okulonza okuciniga byanaba bimanyiso by’endwala y’obukengere erhi y’ekandalala. Rhurhashinganini rhuyumve enshonyi z’okuciyumva ntyo bulya ziri ndwala ak’ezindi. Endwala y’obukengere n’ey’ekandalala zanabukwa.
Opime Okujira ntya: Olonze oburhabale bwa munganga ogwerhe obulenga embere z’akasanzi.
● Okengere oku Nnâmahanga akushibirire.
Ebi Ebibliya edesire: “Ka barhaguza rhufunzi rhurhanu bicere bibiri? Cikwone Nnâmahanga arhayibagira ciru n’ehiguma. . . . Murhayobohaga: mwe bakulu kulusha olukuli lw’orhufunzi.”—Luka 12:6, 7 Mashi Bible.
Ebi oko kuhugwîre: Oba wa bulagirire omu masu ga Nnâmahanga.
Byanahashikana ociyumve kahumba, cikone Nnâmahanga anabone ebi oli wageramo. Aba akushibirire ciru akaba orhaciba olonzize okulama. Ennanga 51:17, Mashi Bible, hadesire ntya: “Omurhima mulembu na gwa bwirhohye, Nnâmahanga orhagushomba.” Bulya Nnâmahanga aba akuzire, alonzize olame.
Opime Okujira ntya: Olole ebiri omu Bibliya biyerekine oku Nnâmahanga aba akuzigire. Kwa lwiganyo, olole ecigabi ca 24 c’ecitabu ciyimangire oku Bibliya cidesire Mkaribie Yehova.
● Oshenge Nnâmahanga.
Ebi Ebibliya edesire: “Amalagirire ginyu goshi mugahire omu maboko gage [ga Nnâmahanga], bulya kushibirira ayorha ammushibirira.”—1 Petro 5:7.
Ebi oko kuhugwîre: Nnâmahanga aba alonzize omuganirire oku oli waciyumva n’ebikuyobohize.
Nnâmahanga anakuha omurhûla gw’ekandalala n’emisi y’okugendekera walembera. (Abafilipi 4:6, 7, 13) Muli eyo njira, anarhabale abamuhûna oburhabale n’omurhima gwabo goshi.—Ennanga 55:22.
Opime Okujira ntya: Oshenge Nnâmahanga ene. Okolese izino lyage Yehova, onamubwire oku oli waciyumva. (Ennanga 83:18) Omuhûne akurhabale ogendekere walembera.
● Orhanye oku bulangalire Ebibliya ehânyire lugenda amango gayisha.
Ebi Ebibliya edesire: “Obwo bulangalire rhubugwerhe nka mutungo [enanga] gutunga omurhima gwirhu [bugumaguma, NWT], mutungo gw’okunali na muzibu.”—Abahabraniya 6:19.
Ebi oko kuhugwîre: Entanya zawe z’ekandalala zanaluga n’okuja eyi n’eyi nka bateau eri omu mulaba, cikone obulangalire Ebibliya ehânyire bwanarhuma wadekerera.
Obo bulangalire zirhali ntanya z’okulangalira kantu kalebe karhankahashikana, cikone buli bulangalire buyimangire oku ciragane Nnâmahanga ahânyire c’okurhenza ngasi ebilerha amalumwa.—Amafulûlo 21:4.
Opime Okujira ntya: Ly’oyiga binji lugenda obulangalire Ebibliya ehânyire, osome isomo lya 5 ly’ebroshire Omwanzi Mwinja Kurhenga emwa Nnamahanga!
● Ojire kantu kalebe kakakushagalusa.
Ebi Ebibliya edesire: “Omurhima gw’enshagali buba bufumu.”—Emigani 17:22, Mashi Bible.
Ebi oko kuhugwîre: Erhi rhwakajira ebintu byarhulerhera obushagaluke, rhwanakubûla okurhuciyumva omu bukengere kwananarhuma rhwaciyumva bwinja.
Opime Okujira ntya: Ojire kantu kalebe olug’ishagalukira. Kwa lwiganyo, oyumvirhize omuziki gwakarhuma waciyumva bwinja, osome kantu kalebe k’okuhâna omurhima, erhi ogeze akasanzi omukujira mukolo mulebe oshagalukira. Na kandi, wanayushula obushagaluke bwawe erhi wakajira kantu kalebe ly’orhabala abandi, ciru n’omu njira nsungunu.—Ebijiro by’Entumwa 20:35.
● Oshibirire amagala gawe.
Ebi Ebibliya edesire: “Okushagalusa omubiri [sport] kuba kwinja.”—1 Timoteyo 4:8, Mashi Bible.
Ebi oko kuhugwîre: Okujira e sport, okuhunga bwinja, n’okulya ebiryo binja, kunarhulerhere obunguke.
Opime Okujira ntya: Olambagire duba-duba ciru miniti 15.
● Okengere oku, oku omuntu aciyumva n’ebindi bintu binashanje omu kalamo.
Ebi Ebibliya edesire: “Murhamanyiri kurhi akalamo kinyu kâba irhondo!”—Yakobo 4:14, Mashi Bible.
Ebi oko kuhugwîre: Amazibu g’okuvuna omurhima, ciru n’agakabonekana nka gakurhalusire olugero, ganaba ga kasanzi kasungunu.
Ciru amazibu gawe gakabonekana gali madarhi bwenene ene, irhondo ganashanja. Co cirhumire, olonze gurhi wakagalwisamwo. (2 Abakorinti 4:8) Akanga kakuvunyire omurhima, kanahikira aha kahwa, cikone erhi wakaciniga erhi hoshi aho.
Opime Okujira ntya: Osome Emyanzi eganirirwe omu Bibliya y’abantu bakag’iciyumva bavunisire omurhima banalonza okufâ, onalole gurhi akalamo kabo kashanjire kanaba kinja ciru n’omu njira barhal’ilangalire. Rhuganirire nyiganyo nguma na nguma.
Ka hali bantu Ebibliya eganirire bal’ilonzize okufâ?
Neci. Ebibliya eganirire bantu baguma na baguma baderhaga ntya: “okufâ k’okukulu.” Nnâmahanga arhabakalihiraga. Cikone abarhabala. Na nawe anakurhabala.
Eliya
● Ali ndi? Eliya ali mulêbi w’obushiru. Cikone mango malebe naye avunika omurhima. Yakobo 5:17 hadesire oku “Eliya âli muntu akirhu.”
● Bulya gurhi al’ilonzize okufâ? Hali amango Eliya akag’iciyumva kahumba, al’iyobohire, anakag’iciyumva nk’arhali wabulagirire. Co carhumaga aderha ntya: “Nyakasane [Yehova, NWT] . . . orhôlage obuzine bwani.”—1 Abami 19:4.
● Bici byamurhabire? Eliya abwira Nnâmahanga gurhi akag’iciyumva. Gurhi Nnâmahanga amuhîremwo? Nnâmahanga ayereka Eliya oku amushibirire anamuyeresa oku agwerhe buhashe bunji. Na kandi Yehova ayemeza Eliya n’obwalagale oku aciri wa bulagirire, anamuha omurhabazi w’okumushibirira.
▸ Osome Okubiyerekire Eliya: 1 Abami 19:2-18.
Ayubu
● Ali ndi? Ayubu ali muntu mugale agwerhe omukazi n’abana banakag’iharamya Nnâmahanga w’okunali n’obwishwekerezi.
● Bulya gurhi al’ilonzize okufâ? Akalamo ka Ayubu kashanja kanaba kabi bwenene. Aheza obuhirhi bwage boshi. Obuhanya bwahikira abana bage boshi banafîra caligumiza. Alwala endwala ndarhi bwenene. Na buzinda abîra bage bamushobeka obunywesi oku yene wacidwirhire ago mazibu. Ayubu aderha ntya: “Akalamo kanshologosire, ntacilonzizi ngendekere nalama.”—Ayubu 7:16, NWT.
● Bici byamurhabire? Ayubu ashenga Nnâmahanga anaganirira abandi akanga gage. (Ayubu 10:1-3) Elihu, mwîra wage muguma wakag’imuyumviza obonjo bwenene amuha omurhima anamurhabala abe n’entanya zishinganine lugenda akanga kage. Cikone kulusha byoshi, Ayubu al’imubidu okuyumvirhiza n’okuyemera amahano ga Nnâmahanga n’oburhabale bwage.
▸ Osome Okubiyerekire Ayubu: Ayubu 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.
Musa
● Ali ndi? Musa ali cirongozi w’Abaisraheli ba mîra anali mulebi mwishwekerezi.
● Bulya gurhi al’ilonzize okufâ? Musa agwerhe mikolo minji yakujira, abandi bakag’imuderha kubi ngasi mango n’oko kwakarhuma aciyumva arhamire bwenene. Co carhumaga alakira Nnâmahanga erhi: “Nkusengire onyirhe.”—Emibalè 11:11, 15.
● Bici byamurhabire? Musa abwira Nnâmahanga oku akag’iciyumva. Nnâmahanga arhabala Musa okulembuhya omukolo gwage muzibu ly’arhag’ikaciyumva arhamire.
▸ Osome Okubiyerekire Musa: Emibalè 11:4-6, 10-17.
a Erhi entanya zawe z’okulonza okuciniga zakagendekera zayushûka na nta muzigirwa wawe okuli hofi, wanahamagala abandi balenga bakakurhabala.