AMAHUGÛLO G’AMANDIKO G’EBIBLIYA
Omurhondêro 1:1—“Aha Murhondêro, Nyamuzinda Alema Amalunga n’Igulu”
“Aha murhondêro, Nyamuzinda alema amalunga n’igulu.”—Omurhondêro 1:1, Biblia—Tafsiri ya Ulimwengu Mupya.
Amahugûlo g’Olwandiko lw’Omurhondêro 1:1
Olu lwandiko lurhanzi lw’Ebibliya luganirire nyigirizo ibirhi z’obulagirire. Burhangiriza, “amalunga n’igulu,” byagwerhe omurhondero. Bwa kabirhi, byalemagwa na Nnâmahanga.—Amafulûlo 4:11.
Ebibliya erhayerekini kasanzi kanganci Nnâmahanga ajijire ali alema igulu n’amalunga erhanahugwîri gurhi abilemagamwo. Cikone eyerekine oku alemire igulu n’amalunga kugerera ‘obuhashe n’imisi yage minji.’—Izaya 40:26, Mashi Bible.
Oluderho “alema” luhindwirwe kurhenga omu luderho lw’Ecihabraniya lukolesibwa omu kuganirira emikolo Nnâmahanga yene ahikiriza.a Omu Bibliya, Yehovab Nnâmahanga yene ohamagirwe Mulemi.—Izaya 42:5; 45:18.
Akanga Ebinwa Biri omu Murhondêro 1:1 Byaderhagwamwo
Ogu mulongo murhanzi gw’ecitabu c’Omurhondêro gurhondire n’omwanzi guganirire obulemi guli omu Omurhondêro cigabi ca 1 n’eca 2. Kurhangira oku Omurhondêro 1:1 kuhika 2:4, Ebibliya eganirire kwa bofofi ebi Nnâmahanga ajijire omu kulema igulu n’ebintu byoshi bibamw’obuzine, kuhiramwo omulume n’omukazi murhanzi. Enyuma z’okuganirira kwa bofofi ebintu by’obulagirire okubiyerekire obulemi, Ebibliya eganirire kwa bulîri okulemwa kw’omulume n’omukazi murhanzi.—Omurhondêro 2:7-25.
Ecitabu c’Omurhondêro ciyerekine oku Nnâmahanga alemire ebintu byoshi omu kasanzi ka “nsiku” ndarhu. Ezo zirhali nsiku za nsa 24, cikone rhuli rhusanzi rhulîri rhurhamanyikini. Kobinali, oluderho “lusiku” lwanakolesibwa omu kuganirira akandi kasanzi karhali ka nsa 24. Oko kuyerekinwe omu lwandiko lw’Omurhondêro 2:4, lukolesize “olusiku” omu kuganirire “amango” lunaganirire akasanzi k’obulemi bwa nsiku ndarhu nka lwali “lusiku” luguma.
Entanya z’Obunywesi Okubiyerekire Olwandiko lw’Omurhondêro 1:1
Entanya z’obunywesi: Hamagera bihumbi bisungunu by’emyaka kurhenga Nnâmahanga alemire amalunga n’igulu.
Okuli: Ebibliya erhayerekini mangaci amalunga n’igulu byalemagwa. Ebidesirwe omu lwandiko lw’Omurhondêro 1:1 birhapingini n’ebi abantu basomire esiyanse ba buno bayemire oku, hakola hali emiliyare y’emyaka kurhenga amango Nnâmahanga alemaga amalunga n’igulu.c
Entanya z’obunywesi: Olwandiko lw’Omurhondêro 1:1 luyerekine oku Nnâmahanga buba Busharhu bulya oluderho lw’Ecihabraniya lukolesibwe omu kuganirira “Nyamuzinda” luli omu bunji.
Okuli: Izino ly’eceyo “Nyamuzinda” lihindwire oluderho lw’Ecihabraniya ’Elo·himʹ, luli omu bunji, luyerekine olukengwa cikone lurhaganiriri omubalè gw’abantu. Citabu ciguma (New Catholic Encyclopedia) cidesire oku oluderho ’Elo·himʹ luli omu bunji lukolesibwe omu Murhondêro 1:1, “ngasi mango lunarhôle everbe eri omu busungunu, lunayerekane oku, nka kula mwami akolesa oluderho rhwe, ly’ayerekana olukengwa lunji agwerhe, cikone arhali omubalè gw’abantu luyerekana.”—Edition ya Kabirhi, Ibugu 6, bukurasa bwa 272.
Osome Omurhondêro cigabi ca 1 n’amahugûlo g’idako, n’ezindi referanse z’amandiko.
a Okubiyerekire olo luderho, Ebibliya HCSB Study Bible edesire ntya: “Oluderho lw’Ecihabraniya bara’ lukolesibwe aha, luhugwîre ‘kulema,’ luba luyerekire Nnâmahanga yene, ci arhali mwene omuntu.”—Bukurasa bwa 7.
b Yehova ly’izino lya Nnâmahanga.—Ennanga 83:18, NWT.
c Okubiyerekire oluderho lw’Ecihabraniya luhindwirwe “aha murhondêro,” citabu ciguma c’amahugûlo (The Expositor’s Bible Commentary) cidesire ntya: “Olo luderho lurhayerekine ako kasanzi kali ka bulîri bunganaci.”—Edition Ehindwirwe Buhyahya, Ibugu I, bukurasa bwa 51.