Oburhabale Burhali Bunyi Bunarhabale Abalagirire

Abahamirizi ba Yehova banajire omukolo g’obulagirire bwenene lyo barhabala abantu b’omu bihugo 200. Cikone hofi bihugo 35 byone bijira obuhashe bw’okulesa oburhabale bwabo bonene lyo bihikiriza amalagirire gabyo. Gurhi ebihugo bikenyi bihikirizamwo amalagirire gabyo?

Embaraza Eri Yalongoza enarhanye kw’ebi Abahamirizi ba Yehova b’omw’igulu lyoshi balagirireko lyo bamuharamya n’okuyigiriza omwanzi mwinja. Na ntyo oburhabale bunakolesibwe n’obwenge n’omu njira nyinja. Hali etawi ziba na burhabale bunji, na ntyo zinarhume obo burhabale omu bihugo biba bikenyi. Oko kulinganine n’omupango g’‘okuyumanyanya,’ Abakristu b’omu myaka igana mirhanzi bakagikolesa lyo barhabalana. (2 Abakorinti 8:14) Bakagikolesa oburhabale bwabo burhali bunyi lyo barhabala Abakristu bagwerhe obulagirire.

Gurhi bene wirhu bahâbwa obo burhabale burhali bunyi baciyumva? Kwa lwiganyo, e Tanzanie, enusu y’omubalè gw’abantu lyo balya banakakolesa ensaranga zirhahisiri dolare ibirhi ngasi lusiku obo burhabale burhali bunyi bwakolesibwe omu kukubula buhyahya Enyumpa y’Entimanano ekolesibwa n’Ecigamba c’e Mafinga. Eco cigamba cayandika ntya: “Kurhondera bakubwire buhyahya Enyumpa yirhu y’Entimanano, bantu banji bakola bakayisha oku ntimanano! Rhuvuzire ikubuliro lya Yehova omunkwa rhunavuzire bene wirhu na bali birhu omunkwa oku iroho lyabo ly’obuhânyi. Oko ko kwarhumire rhwaba n’ahantu hinja h’okujirira entimanano na h’okuharamiza Yehova.”

Bene wirhu baguma na baguma b’e Sri Lanka babula ebiryo enyanya z’obu bulwala bw’Ekorona. Imara Fernando n’omugala, Enosh, bali baguma ba muli abo bene wirhu bali omu bulagirire bw’ebiryo. Cikone kugerera oburhabale bwa bene wirhu na bali birhu b’omu bindi bihugo, bahâbwa oburhabale bw’ebi bal’ilagirireko. Bayandika ntya: “Rhuvuzire bene wirhu na bali birhu omunkwa okubona barhuyeresire obuzigire muli aka kasanzi kazibu. Rhushagalusire bwenene okuba mw’ogu mulala, rhunagendekire rhwashenga Yehova arhabale bene wirhu na bali birhu boshi muli ezi nsiku nzinda.”

Ciru bene wirhu na bali birhu bakaba balamire ngahi, boshi bahâne oburhabale bwabo kushimbana n’obuhashe bwabo. Kwa lwiganyo, Enosh, atengeneza ecibweta akahiramo ensaranga lyo naye akahâna oburhabale bw’okurhabala emilala eri omu bulagirire. Mwali wirhu Guadalupe Álvarez naye ajira er’iroho ly’okuhâna. Aba alamire omu eneo nguma y’e Mexique emunda bantu basungunu bone bajira akazi barhanakamarha nsaranga nyinji, ciru n’abandi barhakamarha. Cikone anakahâna oburhabale kushimbana n’obuhashe bwage. Ayandika ntya: “Nvuzire Yehova omunkwa oku bwinja bwage n’oku buzigire bwage bwishwekerezi. Manyire oku obu burhabale bwani bwayushulwa oku bundi bene wirhu bajijire na ntyo bwanarhabala bene wirhu na bali birhu bali omu bulalagirire.”

Bene wirhu baba omu biro by’etawi banashagaluke bwenene erhi barhuma ensaranga omu bihugo birimo obulagirire. Mwene wirhu Anthony Carvalho, okola omu Komite y’e Tawi y’e Brésil, adesire ntya: “Omu kasanzi ka myaka minji, omukolo g’omu cihugo cirhu gwal’ilagirire oku burhabale bw’ebindi bihugo. Obo burhabale bwarhuma mwaba majambere manji bwenene. Kuhika buno rhukola rhujira burhabale bunji. Oko kwarhumire nirhu rhwaba n’olukengwa lw’okukarhabala abandi. Bene wirhu bagendekire balunga okuboko omukolo gw’okuhubiri g’omw’igulu lyoshi banagendekire barhabala abandi banafunzi ba Yezu nabo babe n’iroho ly’okucihâna.”

Gurhi Abahamirizi ba Yehova bakarhabalamwo bene wabo na bali babo bali omu bulagirire? Arhali mpu kuhika barhume oburhabale bwabo ho n’aho oku tawi ya cihugo cilebe, cikone omu kuhâna oburhabale bw’okulunga okuboko akazi k’omw’igulu lyoshi. Wanajira ntya kugerera ecibweta c’oburhabale ciba ciyandikeko “Kazi ya Ulimwenguni Pote” erhi kugerera donate.jw.org. Rhuvuzire omunkwa bwenene kuli obo burhabale boshi.