Ebicapo Bikolesibwe omu Ibugu ly’Entimanano Omukolo n’Akalamo k’Omukristu
© 2024 Watch Tower Bible and Tract Society of Pennsylvania
NSIKU 3-9/3
OBUGALE BW’AKANWA KA MUNGU | EMIGANI 3
Oyerekane oku Olangalire Yehova
Emigani 3:5, 6—“Orhanahîraga Okayegemera Obwenge Bwawe Wenene”
“Oyegemere Nyamuzinda n’omurhima gwawe gwoshi.” Rhunayerekane oku rhuyegemire Nnâmahanga erhi rhujira ebimushagalusa. Rhushinganine rhumuyegemere loshi-loshi, k’okuderha n’omurhima gwirhu goshi. Omu Bibliya, kanji-kanji omurhima gunaganirire omuntu w’ekandalala, guhiziremo okurhuciyumva, ebirhushumya, engererezo n’entanya zirhu. Cikone, okuyegemera Nnâmahanga kuhiziremwo binji kulusha okurhuciyumva. Guba muhigo rhurhôla bulya rhuyemire n’obwalagale oku Omulemi wirhu ayishi ebiba binja kuli rhwe.—Abaroma 12:1.
“Orhanahîraga okayegemera obwenge bwawe wenene.” Rhushinganine rhukayegemera Nnâmahanga bulya nta bunguke boshi-boshi entanya zirhu zirhal’inyima zakarhulerhera. Erhi rhwakaciyegemera rhwenene erhi kuleka entanya zirhu zishumye emihigo yirhu, rhwanarhôla emihigo ebonekine oku murhondero nk’eri minja, cikone buzinda eyish’irhulerhera amazibu. (Emigani 14:12; Yeremiya 17:9) Obwenge bwa Nnâmahanga buba bulushire obwirhu. (Izaya 55:8, 9) Erhi rhwakaleka alongoze entanya zirhu, akalamo kirhu kanayololoka.—Ennanga 1:1-3; Emigani 2:6-9; 16:20.
Emigani 3:5, 6—“Orhanahîraga Okayegemera Obwenge Bwawe Wenene”
“Omu mirimo yawe yoshi orhahiraga okamuhaba.” Rhushinganine rhukalonza entanya za Nnâmahanga omu bintu by’obulagirire by’akalamo kirhu n’omu mihigo y’obulagirire rhwakarhôla. Rhunajire ntyo erhi rhumushenga obulongozi n’omukukulikira ebi adesire omu Kanwa kage, Bibliya.—Ennanga 25:4; 2 Timoteyo 3:16, 17.
“Ayumanyanya enjira zawe.” Nnâmahanga anayumanyanye enjira zirhu omu kurhurhabala rhulame kushimbana n’amakanuni gage mashinganyanya. (Emigani 11:5) Omu kujira ntyo, rhunayake mazibu manji rhunanabe na bushagaluke bunji omu kalamo.—Ennanga 19:7, 8; Izaya 48:17, 18.
be buk. 76 cif. 4
Okajira Amajambere
Okuba omuntu ahikirwe n’akanga kalebe kanji-kanji omu kalamo, kwanarhuma arhanya ntya: ‘Nahikirwe n’akanga ka ntyo. Manyire ebi najira.’ K’okurhanya ntyo eri njira ya bwenge? Olwandiko lw’Emigani 3:7 (Mashi Bible) lurhuhanwîre ntya: “Orhacibonaga wa bumanye wene.” Kobinali ebi rhwacibwire byanarhurhabala lyo rhurhôla emihigo minja omu kanga kalebe. Cikone erhi akaba rhuli rhwajira amajambere g’ekiroho, ebi rhwacibwinire bishinganine bishumye obukengere n’emirhima yirhu bimanye oku rhulagirire oku migisho ya Yehova lyo rhubêrwa. Rhunayerekane oku rhwajijire amajambere arhali omu kucilangalira lyo rhulwisa kanga kalebe, cikone omu kuba babidu okuyegemera obulongozi bwa Yehova omu kalamo kirhu. Kandi rhunayerekane ntyo omu kuyemera n’obwalagale oku nta kantu kakajirikana nka Mungu arhayemiri kajirikane n’omu kugendekera rhwamulangalira bwenene n’okugendekeza obwîra bwinja haguma na Larha wirhu w’omu mpingu.
Obuhirhi bw’Ekiroho
w06 15/9 buk. 17 cif. 7
Ebintu by’Obulagirire by’omu Citabu c’Emigani
3:3. Rhushinganine rhukayerekana oku obuzigire bwishwekerezi n’okuli biri bya bulagirire omu kuyerekana n’obwalagale oku biri nka mulinga gwa ngulo ndarhi kuli rhwe. Kandi rhushinganine rhuyandike ago morhere omu mirhima yirhu n’okugajira gabe cigabi c’obulagirire omu kalamo kirhu.
NSIKU 10-16/3
OBUGALE BW’AKANWA KA MUNGU | EMIGANI 4
“Olange Omurhima Gwawe”
w19.01 buk. 15 cif. 4
Gurhi Wakalangamwo Omurhima Gwawe?
4 Omu Emigani 4:23, oluderho “murhima” lukolesibwe omu kuganirira “omuntu w’ekandalala” erhi “oborhere bw’omuntu burhabonekana.” (Osome Ennanga 51:6) Omu zindi nderho, “omurhima” guhugwîre entanya zirhu, oku rhuciyumva, ebirhushumya, n’enyifinjo zirhu. Kuli kuderha okurhuyorha ekandalala ci arhali okurhubonekana embuga.
w19.01 buk. 17 cif. 10-11
Gurhi Wakalangamwo Omurhima Gwawe?
10 Erhi akaba rhulonzize rhuhashe okulanga omurhima gwirhu, rhushinganine rhube n’obuhashe bw’okubona amazibu, n’okuba babidu okucilanga kuli go. Oluderho lwahindwirwe “olange” omu Emigani 4:23, lurhukengezize omukolo gwakag’ijirwa n’omulanzi. Omu nsiku za Mwami Solomoni, abalanzi bakag’iyimanga oku nkuta z’evile, banakag’ibuha emishekera erhi bakabwine obuhanya buyiruka. Eyo nfoto rhubwine omu bukengere erhurhabire rhuhugûkwe ebi rhushinganine rhujire lyo Shetani arhasherezagya entanya zirhu.
11 Omu mango ga mîra, abalanzi b’olukuta bakag’ikola bwenene haguma n’abalanzi b’emihango y’evile. (2 Sam. 18:24-26) Boshi bakag’irhabala okulanga evile n’okujira okwabo koshi lyo emihango ebêra eyigirwe ngasi mango erhi omushombanyi akabire ayegerire. (Neh. 7:1-3) Ezamiri yirhu ekomerezibwe n’Ebibliya yanakola nka mulanzi wirhu n’okurhurhonda amango Shetani ali alonza okuja omu murhima gwirhu. Omu zindi nderho; amango Shetani ali alonza okushumya entanya zirhu, okurhuciyumva, ebirhushumya, n’enyifinjo zirhu. Ngasi mango erhi ezamiri yirhu yakarhurhonda, rhushinganine rhuyiyumvirhize, n’okuyigala omuhango omu njira y’olwiganyo.
w19.01 buk. 18 cif. 14
Gurhi Wakalangamwo Omurhima Gwawe?
14 Lyo rhulanga omurhima gwirhu, rhurhashinganini kone rhuguyigale lyo enshumi mbi zirhamujaga, cikone kandi rhushinganine rhuguyigule lyo enshumi nyinja zimuja. Ocib’irhanya oku lwiganyo lw’evile egwerhe olukuta. Abalanzi b’emihango y’evile bakag’iyiyigala ly’abashombanyi barhajagamo, cikone kandi bakag’iyigula emihango lyo ebiryo n’ebindi bintu by’obulangirire bija omu vile. Acibaga nta lusiku ciru n’oluguma emihango y’evile yakag’iyigulwa, bacikala ba mw’eyo vile bakafîre n’ishali. Ko n’oko, nirhu rhushinganine rhukayigula emirhima yirhu ngasi mango ly’eshumibwa n’entanya za Mungu.
w12 1/5 buk. 32 cif. 2
“Olange Omurhima Gwawe!”
Bulya gurhi rhushinganine rhulange omurhima gwirhu gw’olwiganyo? Mungu ashumize Mwami Solomoni ly’andika ntya: “Olange omurhima gwawe kulusha ebindi byoshi, go guba nshôko y’obuzine.” (Emigani 4:23) Oku omurhima gwirhu gw’olwiganyo guyosire, ko kuyerekana erhi rhwaba n’akalamo kinja muli gano mango, ko kunayerekana oku rhugwerhe obulangalire bw’okupata obuzine bw’ensiku n’amango omu mango gayisha. Bulya gurhi? Bulya Mungu anabone ebiri omu murhima gwirhu. (1 Samweli 16:7) Oku rhuyosire ekandalala; ko kuderha “omuntu wirhu w’omu ndalala,” ko kuyerekana gurhi Mungu aciyumva enyanya zirhu.—1 Petro 3:4.
Obuhirhi bw’Ekiroho
K’oba Mubidu Okulinda Yehova Akole?
4 Emigani 4:18 erhubwizire oku “enjira y’abashinganyanya kw’eri nka bucè bwa lubûngu-bûngu [sezi-sezi], bwo buyisha bwakula kalînde kabâ kasirahînga [mulegerege].” Ezo nderho ziganirire enjira Yehova afulûliramwo abakozi bage omuhigo gwage bunyi-bunyi. Cikone kandi, olo lwandiko lwanakolesibwa kwa bulirî omu njira Omukristu ajira amajambere g’ekiroho omu kalamo kage. Binahûne akasanzi ly’omuntu ahikira aha akula kiroho. Erhi rhwakakaciyigiriza n’okukolesa omu kalamo kirhu amahano rhukûla omu Kanwa ka Nnâmahanga n’ikubuliro lyage, rhwanagendekera rhwaba n’amorhere g’Ecikristu. Na kandi rhwanahikira aha rhwaba na bumanye bunji lugenda Nnâmahanga. Rhuganirire olwiganyo Yezu akolesagya ly’arhuhugûlira ntyo.
NSIKU 17-23/3
OBUGALE BW’AKANWA KA MUNGU | EMIGANI 5
Oyake Olugenzi lw’Ebyenshonyi
w00 15/7 buk. 29 cif. 1
Wanaba n’Olugenzi Lucîre Omw’igulu Ligwerhe Olugenzi Lurhacîri
Muli ogu mugani omukazi “w’ecigolo” aganirirwe nka mukazi mugenzi erhi muhushi. Enderho akolesize ly’ashumya omusole muhwinja ziri nunu kulusha obuci zinali zarherera kulusha amavurha g’omuzeti. Ka kanji-kanji arhali ntyo k’olugenzi lw’eby’enshonyi lurhondera? Kwa lwiganyo, rhuganirire ebyahikiraga Amy, secretaire muguma ogwerhe myaka 27. Adesire ntya: “Ebwa kazi mulume muguma ananshibirire n’okunkunga ngasi mango nk’akapata obulyo bw’okujira ntyo. Omuntu anaciyumve bwinja bwenene erhi abandi bakakamusegeza k’obwenge. Cikone nabona n’obwalagale oku ali anshibirira bulya alonzize rhujire eby’enshonyi. Ntayemeraga okugwarhwa n’emirhego yage.” Enderho z’okukunga z’omuntu mubi kanji-kanji zinabonekane ziri nyinja ciru akaba rhurhamanyiri ecirhumire azikolesa. Co cirhumire rhushinganine rhukakolesa obuhashe bwirhu bw’okurhanya.
w00 15/7 buk. 29 cif. 2
Wanaba n’Olugenzi Lucîre Omw’igulu Ligwerhe Olugenzi Lurhacîri
Olugenzi lw’eby’enshonyi lunalerhere omuntu amazibu madarhi bwenene, lwananayagaza omuntu kulusha engorho ya moji abirhi; ko kuderha oku lwanarhuma omuntu aba n’amalumwa madarhi bwenene, lwananamuniga. Lwanarhuma ezamiri y’omuntu yakamutumuza, lwanarhuma aba n’izimi arhal’icirheganyizeko, erhi okuba n’endwala zilerhwa n’ecijiro c’eby’enshonyi. Na kandi olugenzi lw’eby’enshonyi lwarhuma omulume erhi omukazi balenganyagya aciyumva kubi bwenene. Cijiro ciguma cone c’okubula buba mwikubagirwa omu buhya canalerha amalumwa mazibu bwenene garhakahwa ciru n’ehitya omu kalamo. Kobinali olugenzi lw’eby’enshonyi lwananiga.
w00 15/7 buk. 29 cif. 5
Wanaba n’Olugenzi Lucîre Omw’igulu Ligwerhe Olugenzi Lurhacîri
Rhushinganine rhukayaka loshi enshumi za balya bajira olugenzi lw’eby’enshonyi. Kurhakaba kwinja rhuyemere rhwashumikwa nabo omukukayumvirhiza emiziki, okulaba evideo zirhashinganini, erhi okulaba epornografi. (Emigani 6:27; 1 Abakorinti 15:33; Abefezi 5:3-5) Na kandi, kuli kubula obwenge bwenene erhi rhwakakarhuma barhusegezako obwenge enyanya z’oku rhuyambirhe erhi enyanya z’oku rhuciyinjihya!—1 Timoteyo 4:8; 1 Petro 3:3, 4.
Obuhirhi bw’Ekiroho
w00 15/7 buk. 29 cif. 7
Wanaba n’Olugenzi Lucîre Omw’igulu Ligwerhe Olugenzi Lurhacîri
Solomoni ayerekine n’obwalagale amazibu gahikira omuntu enyanya z’okuba n’olugenzi lw’eby’enshonyi. Olugenzi lw’eby’enshonyi lunarhume omuntu ajira obugonyi, lunarhume arhacikacilangalira, n’okurhacikacikenga. K’orhabwini oku kuli kucibonesa nshonyi erhi omuntu akakacikolesa kone ly’ahikiriza irala lyage erhi ely’owundi ly’eby’enshonyi? Na kandi okuba n’olugenzi lw’okujira eby’enshonyi haguma n’omuntu orhali balo erhi mukawe kuli kucibulira obukenge bwenene?
NSIKU 24-30/3
OBUGALE BW’AKANWA KA MUNGU | EMIGANI 6
Bici Rhwakaciyigiriza Kugerera Olubasi?
it-1 buk. 115 cif. 1-2
Olubasi
‘Obwenge bw’Ensimba.’ Arhali muntu mulebe mwenge ye wahâga embasi obwenge bw’ensimba zijira, cikone Omulemi ye wazihâgabo. Ebibliya eganirire olubasi oku ‘lunacibîkire ebiryo amango g’ecanda n’amango g’okusarula lunacihakire ebiryo.’ (Mig 6:8, Mashi Bible) Egarhi k’embasi ziba omu Palestine, hali ezihamagalwa musaruzi erhi muhinzi (Messor semirufus), zinahake biryo binji omu mango g’enkuba nzindikiriza, n’omu mango g’ecidurhu lyo ziyish’ibikolesa omu mango g’emboho; mango kuba kuzibu bwenene okupata ebiryo. Kanji-kanji olo lubasi lunabonekane aha basarulira, bulya hanabe hali mogo-mogo nyinji. Erhi enkuba yakalobya ibikiro ly’ebyo biryo, olo lubasi lusarula lunahuluse ezo mogo-mogo n’okuzihira okw’izuba lyo zikala. Binamanyikine ciru oku olo lubasi lunakûle obwaso kw’ezo mogo-mogo, lyo zirhamereraga aha zibîkirwe omu depo. Embasi zisarula zinamanyikane kugerera oku ziyubaka bwinja aha zilama, n’ebisigaliza by’emogo-mogo zilekera aha luso lw’enyumpa zilamamwo.
Amorhere gazo gakayigwa. Okuciyigiriza kwa bofofi lugenda embasi, kuyerekine obulagirire bw’obu burhonde bukulikire: “Ja emw’embasi we molo, ololereze oku zilama, wanaba n’obumanye [bwenge].” (Mig 6:6, Mashi Bible) Ezo mbasi ziba za kusomeza bwenene arhali enyanya z’obwenge zijira bw’ensimba bone, ci n’enyanya z’okulembera kwazo, n’omuhigo zijira. Kanji-kanji embasi zinahêke erhi kubarhula buzira boba ebintu bigwerhe obuzirho kabirhi erhi kanji kulusha obuzirho bwazo, zinajire okwazo koshi lyo zihikiriza omukolo gwazo, zirhaleka okugujira ciru zakakulumba, zirherere, erhi kurhogera omu mwina muli. Bulya zijira ecinyabuguma bwenene, zinacêse aha zilama, zinashibirire ezabo zikola haguma, n’okurhabala ezayagalisire erhi kurhama omukuzigalula omu nyumpa yazo.
w00 15/9 buk. 26 cif. 3-4
Ocijirire izino linja
Ka nirhu rhurhashinganini rhube ba bushiru ak’embasi? Okukola n’obushiru n’okucihangana okujira bwinja akazi kirhu abandi babe bali barhubona erhi nanga, kuba kwa bulagirire bwenene. Kobinali, rhube rhuli emasomo, erhi amango rhuli ebwa kazi n’amango rhuli rhwajira emikolo y’ekiroho, rhushinganine rhucihangane okujira oku rhwakanahasha koshi. Nk’oku olubasi lupata obunguke enyanya z’obushiru lukolesa, ko Mungu alonzize nirhu ‘rhulye n’okunywa n’okucisimisa bwinja muli ebi rhukozire byoshi.’ (Omuhanûzi 3:13, 22; Mashi Bible 5:18) Okuba n’ezamiri ecîre n’okurhimukwa lo luhembo lw’okukola n’obushiru.—Omuhanûzi 5:12.
Omukukolesa madoso abirhi, Solomoni alonzize okuzusa omuntu molo ly’aleka obolo bwage. Adesire ntya: “Oyu mwolo-mwolo weki, ogwishîre kuhika mangaci? Mangaci warhengamwo eri irô lyawe?” Omu kuba nk’owamushekera, acib’iyushula ntya: “Mpu warhangihûnga hitya, mpu warhangibâ nka wahira olugohe oku lundi, mpu warhangibâ nka waheba okuboko oku kwabo ocihêngeke! Oku obuligo bwahanda aha mwawe nka mubalama, n’ecizômbo cikutulisirekwo amatumu!” (Emigani 6:9-11) Amango omuntu molo acibêrire omw’iro, obuligo bunahande omu mwage duba-duba nka cishambo n’obulagirire bunamurhere nka muntu odwirhe omuherho. Amashwa g’omuntu molo ganayunjule emishugi n’olundi lubala duba-duba. (Emigani 24:30, 31) Oburhunzi bwage bunahombe duba-duba. Kasanzi kanganaci bose wamuhâga akazi akamulembera? K’omwanafunzi molo bwenene orhayiga analangalira oku ahasha amasomo?
Obuhirhi bw’Ekiroho
w00 15/9 buk. 27 cif. 3
Ocijirire izino linja
Ebintu nda ogo mugani guganirire biri by’omusingi binafundisire haguma ebyaha byoshi. “Amasu g’omuntu ogayana” na “omurhima guhizire emihigo mibi” biba byahya bijirwa omu bukengere bw’omuntu. “Olulimi lw’omunywesi” na “omuhamirizi ohamiriza obunywesi” biri byahya bijirikana kugerera enderho. “Enfune zibulaga omuko gw’omuntu mweru-kweru” na “amagulu gakanyize mpu gaj’ikola amaligo” biri bijiro bigalu-galu. Yehova anashombe bwenene omuntu oshagalukira okulerha enongwe egarhi k’abantu bakalamire omu murhûla nk’eyo nongwe erhahali. Okuyushûla ogo mubale kurhenga oku ndarhu kuhika nda, arhali byo byaha byone Yehova ashomba ebyo, bulya bene bantu ensiku zoshi banagendekere bayushula ebijiro byabo bibi.
NSIKU 31/3–6/4
OBUGALE BW’AKANWA KA MUNGU | EMIGANI 7
Oyake Akanga Kakakuhira Omu Marhangulo
w00 15/11 buk. 29 cif. 5
“Yumvirhiza Amahano Gani ly’Olama”
Idirisha Solomoni alabiragamwo lyal’ijijirwe n’orhubarato rhuhumanyizibwe haguma rhwatulagwa n’abalenga omu by’obubasi. Erhi omwizimya gw’ebijingo gurhondera, Solomoni alangira omw’ibarabara omusole gwacihiraga omu mazibu. Oyo murhabana ali muhwinja, bulya arhagwerhe burhimanya arhanali mwenge. Kobinali al’imanyire gurhi obulungu bwage buyosire analimanyire amazibu gakamuhikire enyanya z’okugera mw’er’ibarabara. Ogo musole gwagera omu njira nnene eri hofi n’aha nyumpa yage, gwaja gwacishegeza “emwage.” Indi oyo? Bici ajira?
w00 15/11 buk. 30 cif. 4-6
“Yumvirhiza Amahano Gani ly’Olama”
Akanwa k’oyo mukazi kali kakushumya abandi. Bulya oyo mukazi al’ikazire enshonyi oku masu, arheganya enderho aderha buzira boba. Ngasi kantu akag’iderha koshi kali ka kushumya ogo musole. Omu kuderha oku ayusagya ahâna enterekêro y’omurhûla olo lusiku lo nnene n’oku ahikirizize ebiragane byage, alonzagya okuyerekana oku ali mushinganyanya n’oku anashibirire ebintu by’ekiroho. Enterekêro z’omurhûla zakag’ihânwa oku hekalu e Yeruzalemu omu kukolesa enyama, enshano, amavurha, n’idivayi. (Bene-Levi 19:5, 6; 22:21; Emibalè 15:8-10) Bulya owakag’ihâna enterekêro y’omurhûla akag’ilya oku byasigire ye n’omulala gwage, oyo mukazi ayerekana oku hali binji by’okulya n’okunywa emwage. Entanya z’oyo mukazi kwali kuderha oku ogo musole gwakacishagalusize emwage. Ahulusire omu mwage ly’ayisha ali lonza ogo musole gone. Enderho za ntyo zanaba ndarhi erhi omuntu akaziyemera. Musomi muguma w’Ebibliya adesire ntya: “Kobinali oyo mukazi ahulusire ly’aj’ilonza muntu mulebe, cikone k’ogo musole go nnene ajag’ilonza? Omuhwinja oli nk’ogo musole yene wakayemera ebi oyo mukazi aderhaga.”
Enyuma z’okuciyinjihya ly’ashumya ogo musole kugerera emishangi yage, enderho zage z’okukunga-kunga, okuguhobera, n’okugununugurha, oyo mukazi aba nk’okolesize orhuvurha rhw’ehisununu hinja ly’ashumika ogo musole gujire obugonyi haguma naye. Aderha ntya: “Encingo yani nayibambire kw’amashiro maluke obushanja, n’etapi nduke n’enusi nyinja zirhenga e Misri. Nabulagîre encingo yani kw’amavurha g’amanukato, n’amalashi, n’alowesi n’omudalasini.” (Emigani 7:16, 17, Mashi Bible) Ali amabamba encingo yage bwinja n’amashiro maluke n’enusi nyinja zirhenga e Misri, anashahizako amalashi, n’alowesi, n’omudalasini.
Aderha ntya: “Yishaga amasima rhugaluke bulinde buca,” agendekeza ntya; “oleke rhuyumve ebinunu.” Omulali amuhîre guli mwinja bwenene kulusha omulali gw’okushangira ebiryo bantu babirhi. Amulaganyize oku bashagalukira ecijiro c’eby’enshonyi. Kuli ogo musole, ogo mulali guli mwinja na gwakushagalusa bwenene! Ly’ashumya ogo musole bwenene, acib’iderha ntya: “Omulume nn’emwâni arhali aha kâ; àgenzire, àbalamîre ekuli. Ahêsire enshoho yage y’amagerha, Okugaluka aha mwage erhi omwezi gukola mukulu.” (Emigani 7:18-20) Amuyemeza n’obwalagale oku baba omu bulanzi bulya iba abalamire kuli, arhanalangaliri oku agaluka duba. Oyo mukazi akolesa obulenga ly’arheba ogo musole! “Nyamukazi àmuhima n’orhwanzi rhunji rhunji, Amushîshashîsha n’obulimîrhizi àmuhêka.” (Emigani 7:21) Omuntu oli aka Yozefu ye wakabire n’obuhashe bw’okuhagalika ezo nshumi ndarhi. (Omurhondêro 39:9, 12) K’ogo musole gwahasha okuba aka Yozefu?
w00 15/11 buk. 31 cif. 2
“Yumvirhiza Amahano Gani ly’Olama”
Bibonekine oku ogo musole gurhakalahira ogo mulali. Bulya ogo musole gurhagwerhe burhimanya, gwamukulikira “kula enkâfu enakulikira odwirhe akère.” Nka kula omushwekwa bashwesire obudagule omu magulu arhakalibirha ly’afulumuka obuhane bwage, ko n’ogo musole gurhakafulumusire ecaha. Arhabone amazibu oko kwamulerhera kuhika “omwampi gumurhule obudiku,” ko kuderha, kuhika ajeko ecihulu camulerhera olufû. Olufû lwanamuhikira omu hali y’omubiri bulya analwala endwala ziyirha ziyahukira omuntu omu kujira ecijiro c’eby’enshonyi. Kandi eco cihulu canarhuma afâ omu hali y’ekiroho; “buzira kumanya oku ogwage gukola gwayimbwa.” Akalamo kage koshi n’obuzine bwage biri omu mazibu, kandi ajirire Mungu ecaha cizibu. Muli ntyo, arhogera omu murhego gw’olufû nka kula akanyunyi karhogera omu muguli!
Obuhirhi bw’Ekiroho
w00 15/11 buk. 29 cif. 1
“Yumvirhiza Amahano Gani ly’Olama”
Solomoni acibir’iderha ntya: “Amahano [gani] ogashwekere oku minwe yawe, ogayandike oku lwâsi lw’omurhima gwawe.” (Emigani 7:3) Nk’oku rhubona eminwe ngasi mango, enanaba ya bulagirire lyo rhuhikiriza emihigo yirhu, ko rhunashinganine rhukabikirira amasomo rhuyiga omu Bibliya, n’okugaleka gakarhulongoza muli byoshi rhujira. Rhushinganine rhugayandike omu murhima gwirhu, n’okugajira gabe cigabi c’akalamo kirhu.
NSIKU 7-13/4
OBUGALE BW’AKANWA KA MUNGU | EMIGANI 8
Okayumvirhiza Obwenge bwa Yezu
cf buk. 131 cif. 7
“Nzigira Larha”
7 Omu mulongo gwa 22, obwenge budesire ntya: “Nie Nyamuzinda arhangig’ilema, erhi arhacijira eyindi mikolo yage yoshi.” Bibonekine oku arhali obwenge bo buli bwaganira aha bulya obo borhere ‘burhalemagwa.’ Obwenge burhajira omurhondero bulya Yehova ayorha ahaba ensiku zoshi anayorha aba mwenge. (Ennanga 90:2) Cikone, Mugala wa Mungu ye “nfula omu biremwa byoshi.” Ye Yehova arhangag’ilema embere aleme ebindi byoshi. (Abakolosi 1:15) Nk’oku biyerekinwe omu citabu c’Emigani, Mugala wa Mungu ahali embere igulu n’empingu bilemwe. Kandi ye nka Luderho, ko kuderha; Oderhera Mungu, ayerekine n’obwimana obwenge bwa Yehova.—Yowane 1:1.
cf buk. 131-132 cif. 8-9
“Nzigira Larha”
8 Gurhi Mugala wa Mungu akolesizemwo akasanzi kage embere ayishe hanw’igulu? Omulongo gwa 30 gurhubwizire oku ali aha burhambi bwa Mungu nka “mulenga.” Ko kuderha gurhi? Abakolosi 1:16 (Mashi Bible), hahugwîre ntya: “Bulya muli ye [kugerera ye] mwo Nnâmahanga alemaga ebiba igulu n’ebiba e mpingu, . . . Byoshi Nnâmahanga abilemire muli ye [kugerera ye] na kuli ye.” Ko kuderha oku Yehova, Mulemi, akolaga kugerera Yezu, Mulenga, ly’alema ebintu byoshi; kurhondera oku biremwa by’ekiroho biba empingu, n’amalunga gabonekana, n’okw’igulu alemako emirhi, ensimba, n’ebiremwa by’obulagirire bwenene, ko kuderha bene bantu. Omu njira y’obukenge, rhwanashushanya oko kukola omu cinyabuguma kwa Mungu n’Omugala, n’oku omulenga omu by’obubasi ocapa akola haguma n’omubasi ohikiriza ebi oyo mulenga anacapaga. Erhi rhubona kantu kalebe k’omu bulemi kakarhusomeza, rhunabe rhuli rhwakuza Omulenga Mukulu bwenene kulusha boshi. (Ennanga 19:1) Cikone kandi rhwanakengera kasanzi kanji na ka kushagalusa Omulemi akozire haguma ‘n’omulenga’ wage.
9 Amango bantu babirhi barhali bimana bali bakola haguma, hali amango kuba kuzibu kuli bo okuyumvikana. Oko kurhahikiraga Yehova n’Omugala! Mugala wa Mungu akozire kasanzi kanji haguma n’Ishe, n’Ebibliya edesire ntya lugenda oko: “Nakâcanacana emalanga gage ensiku zoshi.” (Emigani 8:30, Mashi Bible) Kobinali akag’ishagalukira okukola haguma n’Ishe, na bombi bakag’ishagalukira okukola haguma. Kobinali Mugala wa Mungu abire ak’Ishe omu kuyiga amorhere gage. Birhali bya kusomeza okubona ecinyabuguma egarhi ka Mungu n’Omugala casêzire! Ko binali nta bandi basag’iba n’obuzigire buli nk’obo bwa kurhenga mîra omu mpingu n’okw’igulu.
w09 15/4 buk. 31 cif. 14
Oshagalukire Yezu; Daudi Mukulu na Solomoni Mukulu
14 Kobinali mwene muntu muguma yene walushire Solomoni obwenge. Oyo muntu ye Yezu Kristu, anayerekine yene oku ‘alushire Solomoni.’ (Mat. 12:42) Yezu adesire “ebinwa by’obuzine bw’ensiku n’amango.” (Yn. 6:68) Kwa lwiganyo, Amahubiri g’oku Ntondo gayimangire oku makanuni g’omu migani miguma na miguma ya Solomoni. Solomoni aganirire bintu bilebe byakalerhera omukozi wa Yehova omwishingo. (Mig. 3:13; 8:32, 33; 14:21; 16:20) Yezu asegize oku omwishingo gw’okunali guba guyimangire oku kuharamya Yehova n’oku kuhikirizibwa kw’ebiragane bya Mungu. Aderha ntya: “Ab’omwishingo bali balya bamanyire obulagirire bwabo bw’ekiroho, bulya Obwami bw’empingu buli bwabo.” (Mt. 5:3, NWT) Balya bakolesa amakanuni gaba omu nyigirizo za Yezu banayegerere Yehova, “nshôko y’obuzine.” (Enna. 36:9, Mashi Bible; Mig. 22:11; Mt. 5:8) Kristu ayerekine ‘obumanye [obwenge] bwa Nnâmahanga.’ (1 Kr. 1:24, 30, Mashi Bible) Ye nka Mwami w’Ecimasiya, Yezu Kristu ajira “omuka gw’oburhimanya [bwenge].”—Iz. 11:2.
Obuhirhi bw’Ekiroho
Obwenge bw’Okunali Buli Bwayakûza
OMU bihugo binji, abantu bakag’ibona abahubiri b’Obwami bagwerhe omwishingo bali baha abantu bali bagera ebicapo. Ka nawe okola okolesize eyo njira nyinja y’okuhubiri? Akaba okola oyikolesize, buzira karhinda yakukengezize ezo nderho z’olwiganyo ziri omu citabu c’Emigani, zidesire oku obwenge buli bwayakûliza omu muhanda ly’abantu bayumva ihano lyabo. (Osome Emigani 1:20, 21.) Ebibliya n’ebicapo birhu bibamwo “obwenge bw’okunali,” k’okuderha obwenge burhenga emwa Yehova. Ogo go mwanzi abantu balagirireko lyo barhondera okulambagira omu njira ehêka ebwa buzine. Rhunashagaluke bwenene erhi muntu mulebe ayemera ecicapo cirhu. Cikone arhali bantu boshi bayemera ebicapo birhu. Bantu baguma na baguma barhasima okumanya ebi Ebibliya edesire. Abandi banarhushekere. Banarhanye mpu Ebibliya ciri citabu ca mira na nta bunguke cicigwerhe. N’abandi banakagayaguza ebi Ebibliya eyigirizize lugenda olugenzi lwinja, banaderhe oku abakulikira ezo nyigirizo barhaba ba lugero bananakacibona oku bo bashinganyanya. Cikone, enyanya z’obuzigire bwage, Yehova agendekire okuha abantu boshi obwenge bw’okunali. Omu njira nci ali abuhânamwo?
Enjira nguma Yehova akolesa ly’abantu bayumva obwenge bw’okunali kali Kanwa kage Bibliya. Hofi ngasi muntu anapata eco citabu. Gurhigi lugenda ebicapo birhu biyimangire oku Bibliya? Kugerera emigisho ya Yehova, ebyo bicapo biri omu ndimi zirhalusire 1 000. Abayumvirhiza, k’okuderha abasoma n’okukolesa ebi bali bayiga banabe n’obunguke. Cikone, bantu banji banacishoge okurhayumvirhiza izu ly’obwenge bw’okunali. Amango bagwerhe emihigo y’okurhôla, banasime okucilangalira bo nnene erhi okuyumvirhiza ababo bene bantu. Ciru banarhugayaguza bulya rhunahige okushimba ebi Ebibliya edesire. Eci cigabi caganirira bulya gurhi abantu bajira ntyo. Cikone, rhurhang’iganirira gurhi rhwakapatamwo obwenge burhenga emwa Yehova.
NSIKU 14-20/4
OBUGALE BW’AKANWA KA MUNGU | EMIGANI 9
Obe Mwenge, Ci Orhabaga Muntu wa Kulahira Amahano
‘Oyumvirhize Ebinwa by’ab’Obwenge’
4 Kobinali ihano lya ho n’aho lyo liba lizibu okuyemera. Ciru nkaba hali amango lyakarhugayisa. Bulya gurhi? Ciru akaba rhuba rhuyemire oku rhurhaba bimana, hali amango rhwakabona oku kuli kuzibu okuyemera ihano amango omuntu oli warhuhanûla ali asegeza obuzamba bwirhu. (Osome Omuhanûzi 7:9.) Nkaba rhwanarhondera rhwacihalira. Nkaba rhwanaba n’akarhinda okubiyerekire ebyashumagya oyo muntu ly’ayish’irhuhanûla. Erhi rhurhondere rhwabona amagosa omu njira akolesagya ly’arhuhanûla, hali amango rhwakarhondera rhwaderha kubi oyo muntu warhuhanûlaga omu kurhanya ntya: ‘Ka kobinali ashinganine okuyishimpanûla? Naye ajira obwage buzamba!’ N’erhi akaba rhurhasimiri er’ihano rhwanalilahira, erhi rhulonze owundi muntu wakarhuhanûla bulya rhulangalire oku ye waderha ebintu rhulonzize okuyumva.
‘Oyumvirhize Ebinwa by’ab’Obwenge’
12 Bici byakarhurhabala lyo rhukayemera ihano? Rhushinganine rhube birhohye omu kukakengera oku rhurhaba bimana n’oku hali amango rhujira ebintu by’obuhwinja. Nk’oku rhwabonaga embere, Ayubu agwerhe entanya mbi. Cikone ahikira aha akubûla entanya zage, na Yehova amugisha enyanya z’oko. Bulya gurhi? Bulya ali mwirhohye. Ayerekana oku ali mwirhohye omu kuyemera ihano Elihu amuhâga, ciru ankaba Elihu ali murho kumulusha. (Ayu. 32:6, 7) Ko n’oko, obwirhohye bwanarhurhabala rhukolese ihano ciru ankaba rhuli rhwarhanya oku rhurhalishinganini erhi owarhuhâga lyo ali murho kurhulusha. Mugula muguma olama e Canada, adesire ntya: “Bulya rhurhacibona nk’oku abandi barhubona, nka ntaye oli warhuha amahano kwanaba kuzibu okujira amajambere.” Ka rhweshi rhurhalagiriri oku kuba n’ilehe l’iroho litagatifu n’okuhikira aha rhwaba bigiriza binja b’omwanzi mwinja?—Osome Ennanga 141:5.
13 Okabona ihano nka cerekane c’obuzigire bwa Nnâmahanga. Yehova aba arhulongize ebintu binja. (Mig. 4:20-22) Anayerekane oku aba arhuzigire erhi arhuhanûla kugerera Akanwa kage, ebicapo birhu, erhi omu kukolesa owirhu mwemezi okuzire kiroho. Olwandiko lw’Abahabraniya 12:9, 10 ludesire oku ‘yehe anarhuhane oku bûnguke bwirhu.’
14 Osegeze obwenge oku mwanzi guli omu ihano ci arhali oku bakuhâga lyo. Hali amango nkaba rhuciyumva oku ihano barhuhire lirhahânyirwe omu njira nyinja. Kobinali, ngasi yeshi ohâna ihano, akwanine okulihâna omu njira nembu lyo liyemerwa. (Gl. 6:1) Cikone erhi akaba rhwe rhuli rhwahanûlwa, rhushinganine rhukasegeza obwenge bwirhu oku mwanzi guli mw’er’ihano, ciru akaba rhuli rhwarhanya oku lirhahânyirwe omu njira nyinja. Rhushinganine rhukacidosa ntya: ‘Ciru akaba ntashagalukire oku er’ihano lyahânagwa, ka hali ebi lyakanyigiriza? Ka nanaleka okusegeza obwenge bwani oku buzamba bw’omuntu wampaga ihano lyo linderhera obunguke?’ Rhwanaba erhi rhukozire n’obwenge erhi rhwakakalonza gurhi rhwayungukamwo n’ihano rhwahâbagwa.—Mig. 15:31.
w01 15/5 buk. 30 cif. 1-2
‘Obwenge Bwarhuma Rhwalama Nsiku Nyinji’
Erhi omuntu mwenge akalihirwa anajire ebintu omu njira eri lubero n’embula-bwenge. Solomoni adesire ntya: “Okalihire ow’obumanye [omwenge] akusîma. Erhi wakayigiriza ow’obumanye [omwenge] obumanye bwayushûka.” (Emigani 9:8b, 9a, Mashi Bible) Omuntu mwenge aba amanyire oku “nta buhane busîmisa amango bwacihânwa, ci bulerha oburhe. Buzinda lyo bulerhera ababuhâbagwa emburho y’obuholo n’obushinganyanya.” (Abahabraniya 12:11) Ciru akaba ihano lyanarhuma rhwaciyumva kubi, bulya gurhi rhwakalilahira erhi kucihalira n’obu rhumanyire oku okuliyemera kwanarhuma rhwaba benge?
Omwami w’obwenge agendekire aderha ntya: ‘Oyigirize omushinganyanya obwenge bw’okumanya bwamuyushûkira.’ (Emigani 9:9b, Mashi Bible) Ciru rhwaba benge gurhi erhi rhube na myaka inga, rhwanaciyigirizibwa. Biri byakushagalusa bwenene okubona oku ciru n’abantu bakola bashosi bali bayemera okuli n’okucihâna emwa Yehova! Na nirhu rhugendekere rhwaba n’irala ly’okuyiga.
w01 15/5 buk. 30 cif. 5
‘Obwenge Bwarhuma Rhwalama Nsiku Nyinji’
Ngasi muguma wirhu ashinganine akole n’obushiru ly’aba mwenge. Omukusegeza oko n’obwalagale, Solomoni adesire ntya: “Okabâ murhimanya, obûnguke buli bwawe, okabâ mugambanyi, wene kwanababaza.” (Emigani 9:12) Omuntu mwenge anacilerhere obunguke yene, n’omugambanyi ashinganine acitumuze yene enyanya z’amazibu gamuhikire. Kobinali rhunasarule ebi rhwahinzire. ‘Rhukarhega oburhimanya [obwenge] okurhwiri.’—Emigani 2:2.
Obuhirhi bw’Ekiroho
Ogendekere Wayunguka omu Kuyoboha Nnâmahanga
Hali ebirhumire binja bwenene bishinganine birhushumye rhuyake olugenzi lw’eby’enshonyi. “Nyamusirhye w’omukazi” aganirirwe nk’oli waderha ntya: “Amishi mazimbano go ganuna!” Ago ‘mishi mazimbano’ byo bici? Ebibliya eshushanyize ecijiro c’obuhya egarhi k’omulume na mukage n’amishi g’ehibohololo. (Mig. 5:15-18) Omulume na mukage banashagalukira ebijiro by’obuhya bikwanine omu buhya bwabo buyemerirwe n’amarhegeko g’ecihugo. Cikone, oko kuli lubero bwenene n’“amishi mazimbano.” Ganashushanya ecijiro cibi c’obuhya cirhayemerirwi n’amarhegeko. Kanji-kanji ecijiro ca ntyo cinajirikane omu bwifulikwe nka kula omushambo alug’izimba omu bwifulikwe. “Amishi mazimbano” ganabonekana nka manunu erhi akaba abali bajira eco cijiro bali barhanya oku ecaha cabo cirhamanyikane. Banabe bali bacirheba bwenene, bulya Yehova anabone byoshi. Okuheza okuyemerwa na Yehova ko kantu kalulu erhi kabi bwenene kakarhuhikira, co cirhumire karhakaba ‘kanunu’ erhi ka kushagalusa. (1 Kr. 6:9, 10) Cikone kwanarhulerhera agandi malehe mabi.
Ecijiro c’eby’enshonyi canarhuma rhwayumva enshonyi, canarhuma rhwaciyumva ba busha, canarhulerhera izimi rhurhal’ilonzize, cananashaba emilala. Bibonekine n’obwalagale oku okuyaka “enyumpa” ya nyamusirhye w’omukazi n’ebiryo byage kuli kukolesa obwenge. Ahanyuma n’olufû lw’ekiroho, bantu banji bajira ebijiro by’enshonyi banalwale endwala zibalerhera duba-duba olufû lw’okunali. (Mig. 7:23, 26) Omulongo gwa 18 gw’ecigabi ca 9 gushwinjire omu kuderha ntya: “Abalâlike ba nyamusirhye w’omukazi, omu rhubanda rhw’ekuzimu bali.” Bulya gurhigi bantu banji bayemera omulali gwage gw’oburhebanyi gubalerhera obuhanya?—Mig. 9:13-18.
NSIKU 21-27/4
OBUGALE BW’AKANWA KA MUNGU | EMIGANI 10
Gurhi Rhwakabamwo n’Omwishingo gw’Okunali?
w01 15/7 buk. 25 cif. 1-3
‘Omuntu Mushinganyanya Ye Oba n’Emigisho’
Omuntu mushinganyanya anagishwe omu yindi njira. “Njîngo zihozire, buligo afulusa; njingo zikanyire, bugale afulusa. Ohaka cânda ye mwenge, oj’irô amango basârûla ye bya nshonyi.”—Emigani 10:4, 5.
Ezo nderho za mwami ziyerekire abakozi b’amango g’okusarula. Amango g’okusarula karhaba kasanzi ka kuj’iro. Kaba kasanzi k’okuyusa nsa nyinji omuntu ali akola n’obushiru. Kobinali kaba kasanzi ka kukola duba-duba.
Erhi ali arhanya oku mango g’okusarula, arhali okusarula emogo-mogo ci okusarula abantu, Yezu abwira abanfunzi bage ntya: “Emyaka y’okusarulwa eri minji, ci abakozi banyiha. Hunagi Nn’emyaka, [Yehova Mungu] arhume abakozi omu myaka yage.” (Mateyo 9:35-38) Omu mwaka gwa 2000, bantu balushire miliyoni 14, bajire aha Kukengera Olufû lwa Yezu; n’abo bantu balushire kabirhi omubalè gw’Abahamirizi ba Yehova. Indi wakahakana oku ‘amashwa garhakola gayakirize n’emyaka’? (Yowane 4:35) Erhi Abakristu b’okuli baba bali bahûna Nn’emyaka arhume bakozi banji, banajire n’obushiru omukolo gw’okujira abanafunzi, na ntyo banakole kushimbana n’amasala gabo. (Mateyo 28:19, 20) Na Yehova agishire bwenene obushiru bwabo! Omu mwaka gw’omukolo gwa 2000, bantu balushire 280 000 babatizibwe. Abo nabo baba bigiriza b’Akanwa ka Mungu. Na nirhu rhwanacibonera omwishingo n’okurhimukwa kuba omu mukolo gw’okusarula omu kujira binji omu mukolo gw’okujira abanafunzi.
w01 15/9 buk. 24 cif. 3-4
Olambagire omu ‘Njira Nnongedu’
Solomoni aganirire obulagirire bw’obushinganyanya. Adesire ntya: “Obugale bw’omuhiri, lwo lwakiro lwage, obubî bw’omugûnda, bunali bulya bukenyi bwage. Ikola ly’entagengwa [omushinganyanya] kuciza liciza, ci obûnguke bw’enkola-maligo kuheza buheza.”—Emigani 10:15, 16.
Obugale bwanalanga omuntu kuli bintu biguma na biguma by’omu kalamo nka kulya evile nyubake elanga abayilamiremwo. N’obukenyi bwanalerha amazibu erhi rhwakahikirwa n’ebintu rhurhal’icirheganyizeko. (Omuhanûzi 7:12) Cikone, nkaba omwani w’obwenge akag’iganirira amazibu gakahikira omuntu mugale n’omuntu mukenyi. Omuntu mugale anahira obulangalire bwage boshi omu buhirhi, omu kurhanya oku ebintu by’obulagirire agwerhe biri “côgo cizibu cimuzônzire.” (Emigani 18:11) Omukenyi naye anacirheba omu kurhanya mpu nkaba obukenyi bwage bwanarhuma arhaba n’obulangalire bw’amango gayisha. N’oko kwanarhuma abo bantu bombi barhacijirira irhenge linja embere za Mungu.
it-1 buk. 340
Omugisho
Yehova Anagishe Bene Bantu. “Omugisho gwa Yehova go gujira omuntu abe mugale, arhanayushûla malumwa goshi goshi haguma nago.” (Mig 10:22, NWT) Yehova anagishe balya aba ayemire omu kubalanga, omu kubajira bayololoke, omu kubalongoza, omu kubarhabala babêrwe, omu kubahikirigiza amalagirire gabo, n’omu kubarhabala lyo baba n’omwishingo.
Obuhirhi bw’Ekiroho
w06 15/5 buk. 30 cif. 18
Omwishingo gw’Okuba Mwishwekerezi
18 “Omugisho gwa Yehova” go gurhuma abakozi bage bayololoka omu hali y’ekiroho. Rhunayemire n’obwalagale oku “arhanayushûla malumwa goshi goshi haguma nago.” (Emigani 10:22, NWT) Bulya gurhigi amarhangulo gahikira abakozi bishwekerezi ba Mungu, n’okurhuma balibuka? Hali bintu bisharhu bikulu birhuma rhwalibuka. (1) Okuba kwirhu banyabyaha. (Omurhondêro 6:5; 8:21; Yakobo 1:14, 15) (2) Shetani n’abazimu bage. (Abefezi 6:11, 12) (3) Igulu libi. (Yowane 15:19) Ciru akaba Yehova analeke ebintu bibi birhuhikire, arhali ye obilerhe. Kobinali, “ngasi ngalo nyinja na ngasi nshokano nkana bihubuka enyanya, birhenga emwa Nn’obulangashane.” (Yakobo 1:17) Yehova arhayushula malumwa goshi-goshi omu migisho yage.
NSIKU 28/4–4/5
OBUGALE BW’AKANWA KA MUNGU | EMIGANI 11
Orhaderhaga!
w02 15/5 buk. 26 cif. 4
Obwikubagirwa Bunalongoze Abantu Bashinganyanya
Obwikubagirwa bw’abantu bashinganyanya n’obubi bw’abantu bajira amabi binahume oku bandi bantu. Mwami w’e Israheli adesire ntya: “Akalimi k’endyalya kanagâyîse abalungu, n’obumanye bw’abashinganyanya bubalikûze.” (Emigani 11:9) Rhweshi rhumanyire oku obulenzi, okuderha abandi kubi, enderho zirhashinganini, n’okuderha-derha abandi, ebyo byoshi byanabayagaza. Oku bundi, enderho z’omuntu mushinganyanya ziba zicîre, za burhimanya bwinja, na za bukenge. Obumanye bunamucize bulya obwishwekerezi bwage bunamuhashise okuba n’entanya nyinja alagirireko ly’ayerekana oku abali bamushobeka kunywerha bali banywerha.
w02 15/5 buk. 27 cif. 2-3
Obwikubagirwa Bunalongoze Abantu Bashinganyanya
Bacikala bajira olugenzi lw’obushinganyanya banagendekeze omurhûla n’obololoke, bananayubake abandi omu lugo balamiremwo. Oko kunarhume olo lugo [vile] lwabamwo amajambere n’obololoke. Abantu baderha enderho z’obulyalya, z’okuyagaza abandi n’ebintu bibi, banarhume omurhûla gwabulikana, abantu babule omwishingo, bagabikanemwo, n’okulama omu kavulindi. Oko kunahikire bwenene erhi akaba abo bantu balengerire banamanyikine bwenene. Evile ya ntyo enabemwo akavulindi, ebituliro, olugenzi lubi, nkaba ciru n’amazibu g’okubula ensaranga.
Akanuni kali omu Emigani 11:11, kayerekire bwenene abantu ba Yehova amango bali haguma n’ababo bemezi omu bigamba bishushanyizibwe n’olugo [vile]. Ecigamba cirimwo abantu bashinganyanya bakuzire kiroho, balongozibwa n’obwishwekerezi bwabo, banashumye ecigamba cibemwo omwishingo, obushiru, abantu barhabalana, n’oko kunalerhere Mungu obukuze. Yehova anagishe eco cigamba, cinanayololoke omu hali y’ekiroho. Kanji-kanji, abantu basungunu barharhimukwa, balongereza amagosa n’okuderha kubi oku ebintu bili byajirwa, banabe nka “muzi . . . gulula” n’okuyahukiza abandi barhal’igwerhe oborhere bwa ntyo. (Abahabraniya 12:15) Kanji-kanji abantu ba ntyo banalonze obukulu n’okumanyikana. Banarhume abantu bakaderha oku hali obubule bw’obushinganyanya, akabolo, erhi bintu bishushine n’ebyo omu cigamba erhi egarhi k’abagula. Kobinali akanwa kabo kanalerha okugabikanamwo omu cigamba. Rhushinganine rhuyake okukabayumvirhiza n’okucihangana lyo rhuba bantu bakuzire kiroho bagendekeza omurhûla n’ecinyabuguma omu cigamba.
w02 15/5 buk. 27 cif. 5
Obwikubagirwa Bunalongoze Abantu Bashinganyanya
Kobinali ‘omuntu muhwinja’ analerha mazibu manji! Anagendekeze enderho z’okukoza abandi erhi okubagayaguza. Abagula bashinganine babe babidu okuyusa olugenzi lwa ntyo lurhashinganini. Lubero ‘n’omuhwinja,’ omuntu murhimanya anamanye akasanzi k’okuhulika. Ahali h’okufulûla emyanzi y’ihwe, anafulike ebyabire. Bulya amanyire oku olulimi lurhalanzirwi lwanalerha mazibu manji, omuntu murhimanya aba ‘mwikubagirwa.’ Aba mwikubagirwa oku babo bemezi arhanafulûla emyanzi y’ihwe yakabahira omu mazibu. Abantu ba ntyo bagendekeza obwishwekerezi baba mugisho oku cigamba!
Obuhirhi bw’Ekiroho
g20.1 buk. 11, cisanduku
Oku Wakalwisamwo Entanya z’Okuvunika Omurhima
“OKUBA MUNTU MWINJA KWANAKURHABALA OLWISE ENTANYA Z’OKUVUNIKA OMURHIMA”
“Obâ lukogo minja acijirira yênene, . . . ci omuntu omînya erhi yêne ocimînyîze.”—EMIGANI 11:17.
Ecitabu cihamagalwa Overcoming Stress cirimwo omwanzi gudesire “Okuba Muntu Mwinja Kwanakurhabala Olwise Entanya z’Okuvunika Omurhima.” Omwandisi w’eco citabu, Dr. Tim Cantopher, adesire oku okujirira abandi aminja kwanarhuma omuntu aba n’amagala minja n’okuba n’omwishingo. Oku bundi, omuntu orhajirira abandi aminja erhi muminya anacibuze yene omwishingo bulya anarhume abandi baciyegula naye.
Kandi rhwanalwisa entanya z’okuvunika omurhima omu kucijirira aminja. Kwa lwiganyo, rhurhashinganini rhukalonza okujira ebintu birhurhalusire olugero erhi ebi rhurhakahash’ijira. Kandi rhurhashinganini rhukacigayaguza. Yezu Kristu adesire ntya: “Wakâzigira owinyu nk’oku ocizigira wenene.”—Marko 12:31.